शाळा, महाविद्यालये, मंदिरे आणि प्रार्थनास्थळांच्या परिसरात अंतराचे नियम डावलून सुरू असलेल्या दारू दुकानांविरोधात नागरिकांतून असंतोष वाढत आहे. नागरिकांनी अशा दारू दुकानचालकांविरोधात आवाज उठवणे सुरू केले असून, राज्य उत्पादन शुल्क विभागाने शाळा, महाविद्यालयांच्या परिसरातील दारू दुकानांचे हवाई अंतर मोजावे, अशी मागणी केली जात आहे. राज्य उत्पादन शुल्क विभागासह जिल्हा प्रशासनाने नागरिकांच्या तक्रारींची दखल घेऊन कारवाई करावी, अन्यथा याविरोधात आंदोलन करण्याचा इशारा शिवसेनेच्या वतीने देण्यात आला आहे.
अंतराचे नियम धुडकावून शहरात मंदिरे आणि शाळा, महाविद्यालयांच्या परिसरात दारू दुकाने सुरू असल्याची वस्तुस्थिती ‘महाराष्ट्र टाइम्स’ने दाखवली होती. राज्य उत्पादन शुल्क विभागाचे अधिकारी आणि दारू विक्रेते यांच्यातील संगनमतानेच नियमांना बगल देऊन दारू दुकाने सुरू असल्याचा आरोप नागरिकांमधून होत आहे. शहरातील उमा टॉकीज चौकापासून जवळच असलेल्या ओढ्यावरील गणपती मंदिराच्या पाठीमागे असलेले दारू दुकान, हॉकी स्टेडियम, धैर्यप्रसाद हॉल, कसबा बावड्यातील रेणुका मंदिर, बिंदू चौकातील मशिदीच्या बाजूला शाळा आणि मंदिरांच्या आसपास दारू दुकाने सुरू आहेत. ही दुकाने शाळा आणि मंदिरांपासून ३० ते ५० मीटरच्या आत असल्याचे स्पष्ट दिसते. मात्र हवाई अंतरापेक्षा सोयीचे वळणाचे रस्ते दाखवून दुकाने नियमात बसवण्याचा प्रयत्न केला आहे. या दुकानांमुळे परिसरातील स्वास्थ्य धोक्यात आले आहे. स्थानिक नागरिकांनी वारंवार तक्रारी करूनही या दुकानांवर कारवाई होत नसल्याने नागरिक संतापले आहेत.
सुप्रिम कोर्टाने महामार्गांवरील ५०० मीटर अंतरातील दारू विक्री बंद करण्याचे आदेश दिल्याने जिल्ह्यातील एक हजारहून अधिक दुकानांना टाळे लागले आहेत. दुकाने बंद झाल्यानंतर विक्रेत्यांकडून स्थलांतरासाठी मोक्याचा जागा बळकावण्यासाठी नियमांचा सोयीने वापर केला जात आहे. सायबर चौकात नव्याने बांधलेल्या एका इमारतीत नुकतेच दारू दुकान सुरू झाले. या दुकानाविरोधात परिसरातील नागरिक रस्त्यावर उतरले आहेत. रस्ता ओलांडताच सायबर कॉलेज आहे. समोरच शिवाजी विद्यापीठाचा कॅम्पस आहे. सतत विद्यार्थांचा वावर या चौकात असतो. त्यामुळे दारूचे दुकान सुरू होऊ नये, अशी मागणी नागरिकांनी केली होती. मात्र स्थानिकांचा विरोध डावलून हे दुकान सुरू झाल्याने अखेर नागरिकांनी रस्त्यावर उतरून विरोध सुरू केला आहे.
शनिवार पेठेतील रोहिडेश्वर मंदिरापासून अवघ्या ३० मीटर अंतरावर दारू दुकान सुरू आहे. जवळच एक मशिदही आहे. सकाळी ९ वाजल्यापासून ते रात्री उशिरापर्यंत हे दुकान सुरू असते. या दुकानात दारूसोबत सोडा आणि कोल्ड्रींक्सचीही विक्री होते. त्यामुळे परिसरात तळीराम उघड्यावरच मद्यप्राशन करतात. रात्री परिसराचा ओपन बार होतो. दारुच्या रिकाम्या बाटल्या, प्लास्टिकचे ग्लास यामुळे परिसर नेहमीच अस्वच्छ होतो. विक्रेत्याची राजकीय पार्श्वभूमी असल्याने तो नागरिकांना धमकावतो. पोलिस ठाण्यात तक्रारी केल्यानंतरही पोलिस याकडे दुर्लक्ष करतात, असा नागरिकांचा अनुभव आहे.
हवाई अंतर मोजणीची मागणी
शाळा आणि प्रार्थनास्थळांपासून किमान ७० मीटर अंतराबाहेर दारू दुकानांना परवानगी द्यावी, असा नियम आहे. प्रत्यक्षात मात्र अंतराच्या नियमातून पळवाट काढण्यासाठी दारू दुकानापासून ते शाळांचे अंतर मोजताना वळणाच्या रस्त्यांचा आधार घेतला जातो. प्रार्थनास्थळ आणि दारू दुकान एकमेकांच्या समोर असले तरीही हवाई अंतर मोजले जात नाही. शहरातील सर्व दारू दुकाने आणि त्या परिसरातील शाळा, महाविद्यालये, प्रार्थनास्थळांचे हवाई अंतर मोजावे, अशी मागणी नागरिकांनी केली आहे.
नागरिक आक्रमक होणार
नियम डावलून सुरू असलेल्या दुकानांच्या विरोधात नागरिक रस्त्यावर उतरत आहेत. हॉकी स्टेडियम आणि सायबर चौकातील दारू दुकानांविरोधात जनक्षोभ उसळला आहे. नागरिकांनी राज्य उत्पादन शुल्क विभागासह पोलिस अधिकाऱ्यांकडेही तक्रारी दिल्या आहेत. विरोध डावलून ही दुकाने सुरू असल्याने अखेर नागिरकांनी रस्त्यावर उतरून निदर्शने सुरू केली आहेत. वेळ पडल्यास आक्रमक होऊन दुकाने बंद पाडण्याचा इशारा नागरिकांनी दिला आहे.
शिवसेनेचा इशारा
नियम डावलून कायदा सुव्यवस्थेचा प्रश्न निर्माण करणाऱ्या दारू विक्रेत्यांविरोधात शिवसेनाही आक्रमक बनली आहे. गेल्या महिन्यात शिवसेनेच्या कार्यकर्त्यांनी मध्यवर्ती बसस्थानक परिसरातील मुख्य मार्गावरील दारू दुकानात सुरू असलेली अवैध विक्री उधळून लावली होती. राज्य उत्पादन शुल्क विभागाने दारू दुकानांचे हवाई अंतर मोजून नागरिकांच्या तक्रारींचे निरसन करावे, अन्यथा शिवसेना स्टाइलने दारू दुकाने बंद पाडू, असा इशारा शिवसेनेचे जिल्हाप्रमुख संजय पवार यांनी दिला आहे.
मोबाइल अॅप डाउनलोड करा आणि राहा अपडेट
