देशभक्त रत्नाप्पाण्णा कुंभार जनता सेंट्रल को-ऑपरेटिव्ह कंझ्युमर्स स्टोअर्सच्या (जनता बझार) पंचवार्षिक निवडणुकीत सत्तारुढ रत्नाप्पाण्णा कुंभार विकास आघाडीने १९ पैकी १५ जागांवर विजय मिळवत निर्विवाद वर्चस्व मिळवले. चार अपक्ष विजयी उमेदवारांपैकी तीन उमेदवार विद्यमान चेअरमन उदय पोवार गटाचे समर्थक असल्याने पोवार यांनी जनता बझारवर एकतर्फी वर्चस्व मिळवले आहे. निवडणुकीत विद्यमान संचालक प्रल्हाद चव्हाण व बाळासाहेब कुंभार यांच्या पराभव झाला असून एकप्रकारे आमदार सतेज पाटील यांच्या गटाला माजी आमदार महादेवराव महाडिक यांनी जबदरस्त धक्का दिला आहे. निवडणुकीत नऊ विद्यमान संचालकांसह दहा उमेदवारांना प्रथमच संधी मिळाली आहे.
जनता बझारच्या पंचवार्षिक निवडणुकीसाठी रविवारी सकाळी ८ ते ४ वेळेत मतदान झाले. एकूण २३७३ मतदारांपैकी केवळ ८७१ मतदारांनी मतदानाचा हक्क बजावला. केवळ ३७ टक्के मतदान झाल्याने निवडणुकीतील केवळ औपचारिकता बाकी होती. तरीही विकास पॅनेलमधील उमेदवारांचे भिन्न-भिन्न चिन्हे असल्याचे निकालाबाबत उत्सुकता लागली होती. केवळ तासाभरात मतमोजणी पूर्ण होऊन पोवार यांच्या नेतृत्वाखालील विकास आघाडीने निर्विवाद वर्चस्व मिळवले.
निवडणुकीमध्ये दोन पॅनेल होणार असल्याने पोवार यांना कपबशी तर चव्हाण यांना विमान चिन्ह मिळाले होते. चिन्हवाटप झाल्यानंतर अनेक नाट्यमय घडामोडीनंतर सर्व जुने संचालक एकत्र येऊन विकास आघाडी आकाराला आली होती. त्यामध्ये दोन जागा कर्मचारी प्रतिनिधींनाही देण्यात आल्या होत्या. मात्र प्रचारांदरम्यान पोवार यांनी चिन्हांचा खुबीने वापर करुन राजकीय खेळीद्वारे चव्हाण व कुंभार यांना शह दिला. अपक्ष निवडून आलेले वैभव पोवार, आकाराम पाटील, बिपिन जाजू यांचेही चिन्ह कपबशी असल्याचा फायदा घेत चव्हाण, कुंभार यांच्यासह कर्मचारी प्रतिनिधी मधुकर चित्रुक यांचा पत्ता कापला. ‘क’ वर्ग गटातून पोवार समर्थक प्रकाश खुडे यांना केवळ एक मताने पराभव पत्करावा लागाला. या गटात आमदार पाटील समर्थक रमेश उलपे यांनी बाजी मारत गटाचे अस्तित्व राखले.
सर्व कर्मचारी व चव्हाण यांना सोबत घेऊन आमदार पाटील यांनी पॅनेल करण्याचा निर्धार केला होता. पण चव्हाण यांनी ऐनवेळी महाडिक यांची भेट घेऊन गोंधळ निर्माण केला. सचिन चव्हाण यांच्या उमेदवारी जोरदार विरोध करत महाडिक यांनी पोवार यांच्यामागे सर्व ताकद लावली होती. अखेर चव्हाणही महाडिक यांच्याकडे गेल्यानंतर आमदार पाटील गटाची हवा गेली होती. त्याचाच फायदा घेत पोवार यांनी पॅनेलमध्ये तब्बल १४ समर्थकांनी संधी दिली होती. त्यातील खुडे वगळता सर्व उमेदवार विजयी झाले असून चार अपक्षांपैकी तीन विजयी उमेदवार पोवार समर्थक असल्याने त्यांनी जनता बझारवर एकतर्फी वर्चस्व मिळवले आहे. निवडणुकीच्या माध्यमातून मात्र महाडिक यांनी आमदार पाटील गटाला जबरदस्त शह दिला आहे.
पॅनेलच्या विजयामध्ये महादेवराव महाडिक, आमदार राजेश क्षीरसागर, माजी आमदार विनय कोरे यांची मदत मिळाली. निकालातून आम्ही ‘अजिंक्यतारा’ला ताकद दाखवून दिली आहे. पुढील काळात सर्व संचालकांना सोबत घेऊन जनता बझारला गतवैभव मिळवून देऊ.
उदय पोवार, पॅनेल प्रमुख
महाडिकांची खेळी यशस्वी
पॅनेल रचनेमध्ये आमदार सतेज पाटील यांचे समर्थक असलेल्या प्रल्हाद व सचिन चव्हाण पितापुत्रांना घेण्यास माजी आमदार महादेवराव महाडिक यांनी विरोध केला होता. काँग्रेसचे जिल्हाध्यक्ष पी. एन. पाटील यांच्या मध्यस्थीने प्रल्हाद चव्हाण यांची पॅनेलमध्ये वर्णी लागली होती. चव्हाण व बाळासाहेब कुंभार यांना पॅनेलमध्ये घेताना वैभव पोवार व बिपिन जाजू यांचा पत्ता कट केला होता. पोवार व जाजू पॅनेलमध्ये नसले, तरी चिन्ह कपबशी असल्याने त्यांचा मार्ग सोपा झाला होता. या चिन्हांमुळेच चव्हाण व कुंभार यांचा पराभव झाला असला, तरी महाडिकांची ही खेळी यशस्वी झाल्याचे दुपारी त्यांनी मतदान केंद्रावर लावलेल्या उपस्थितीने स्पष्ट झाले होते.
पिता-पुत्र व पती-पत्नीला संधी
जनता बझारच्या निवडणुकीत प्रथम पिता-पुत्र व पती-पत्नीला प्रतिनिधीत्व करण्याची संधी मिळाली आहे. यामध्ये विद्यमान चेअरमन उदय पोवार यांच्या बरोबर त्यांचा मुलगा वैभव याला संधी मिळाली आहे. तर विद्यमान संचालक प्रकाशराव बोंद्रे यांच्यासह सुहास बोंद्रे यांनी विजय मिळवला आहे. संचालक मधुकर शिंदे यांच्या पत्नी तृप्ती या देखील विकास आघाडीतून निवडणूक आल्या आहेत.
कर्मचारी ते संचालक
किणी येथील विद्या माळी यांनी जनता बझारमध्ये अकाउंट विभागात २० वर्षे काम केले आहे. जनता बझारमधील कर्मचारी कमी केल्यानंतर माळी यांनी निवृत्ती घेतली. पॅनेल रचनेमध्ये कर्मचाऱ्यांना प्रतिनिधीत्व दिल्यानंतर माळी यांची वर्णी लागली होती. त्यामध्ये माळी यांनी विजय मिळवला असून कर्मचारी चित्रुक यांना मात्र पराभव पत्करावा लागला.
मोबाइल अॅप डाउनलोड करा आणि राहा अपडेट