सोमवारी (ता.३१) गडहिंग्लज येथून आंबोली येथे पावसाळी पर्यटनासाठी गेलेल्या आणि कावळेसाद दरीमध्ये मद्यप्राशन केल्यामुळे पडलेल्या दोन तरूणांच्या मृतदेहापैकी अखेर शुक्रवारी पाचव्या दिवशी प्रताप उजगरे (रा. बीड) याचा मृतदेह दरीतून वरती काढण्यात शोधपथकाला यश आले. दुपारी साडेतीनच्या सुमारास सांगेली (ता.सावंतवाडी) च्या पथकाला हे यश मिळाले. मात्र दुसरा तरूण इम्रान गारदी याचा मृतदेह पाण्याच्या प्रवाहात दरीच्या खाली वाहून गेल्याने पथकाला आढळून आला नाही. यामुळे त्याच्या मृतदेहाचे शोधकार्य शनिवारीदेखील सुरू राहील. दरम्यान, पाचव्या दिवशी सापडलेला प्रतापचा मृतदेह कमालीचा सडला होता. त्यामुळे आंबोली आरोग्य केंद्रामध्ये सावंतवाडीहून आलेल्या वैद्यकिय अधिकाऱ्यांमार्फत शवविच्छेदन केल्यानंतर प्रतापचे वडील व काका यांच्यासह आलेल्या नातलगांच्या ताब्यात तो देण्यात आला. बीडला त्याच्यावर अंतिम संस्कार करण्यात येणार आहेत.
बेफाम वारा, मुसळधार पावसाच्या सरी, घनदाट धुके आणि पाण्याचा गतिमान प्रवाह अशा प्रतिकूल वातावरणामुळे गेले चार दिवस कावळेसादच्या सहाशे फूटाहून अधिक खोल दरीत पडलेल्या प्रताप व इम्रान यांच्या मृतदेहाचा शोध शुक्रवारी सकाळी पुन्हा एकदा सुरू झाला. घटनास्थळी आटलेले आसू आणि दाटलेले दु:ख मनात घेऊन या दोघा तरूणांच्या नातलागांच्या आशा कायम होत्या. पण प्रतिकूल हवामानामुळे आजही यश मिळेल याची खात्री कोणीही देऊ शकत नव्हते. दरम्यान, सिंहगडचे नवे पथक शुक्रवारी घटनास्थळी दाखल झाले होते. पण या परिसराची माहिती असलेल्या सांगेलीच्या पथकाने शोध घेण्याबाबत नातलगांनी आग्रह धरला. त्यामुळे सकाळी साडेदहाच्या सुमारास या पथकातील बाबल अल्मेडा, किरण नार्वेकर, संतोष नार्वेकर व दाजी नार्वेकर हे स्वयंसेवक दरीमध्ये उतरले.
शोधपथकाला पाण्याच्या प्रवाहामध्ये दूर गेलेला प्रतापचा मृतदेह त्यांना आढळून आला. मात्र गेल्या चार दिवसात मृतदेह कमालीचा सडला होता. जलचरांनी मृतदेहाचे लचकेही तोडले होते. तशा स्थितीत इम्रानचा मृतदेहही शोधण्यात आला, पण तो आढळला नाही. अखेर प्रतापचा मृतदेह व्यवस्थित बांधून क्रेनच्या सहाय्याने दुपारी दरीबाहेर काढण्यात आला. मृतदेह काढल्यानंतर गेले चार दिवस कोंडलेला नातलगांचा आक्रोश अखेर बाहेर पडला. शवविच्छेदनानंतर मृतदेह घेऊन प्रतापचे नातलग गावाकडे परतले.
मात्र इम्रानच्या नातेवाईकांची शुक्रवारी पाचव्या दिवशीही घोर निराशाच झाली. दरीमध्ये पडल्यानंतर वास्तविकत: इम्रानचा मृतदेह प्रथमत: आढळून आला होता. मात्र वेळ जात राहल्याने पाण्याच्या प्रवाहाबरोबर दरीखाली सरकत गेलेला इम्रानचा मृतदेह सापडू शकला नाही. शनिवारी पुन्हा एकदा त्याचा शोध घेण्यासाठी दरीच्या पश्चिमेकडील शिरसंगे व वेर्णे गावाकडून सांगेलाकर जातील, असे सांगण्यात आले. दरम्यान या शोधकार्यामध्ये राष्ट्रीय आपत्ती व्यवस्थापन पथक (एनडीआरएफ) सहभागी होणार आहे. तशा सूचना पोलिस अधिक्षकांनी दिल्या असल्याचेही स्पष्ट करण्यात आले.
............
चौकट
नियोजित वधूला पाहिलेच नाही
प्रताप खरेतर लग्नासाठी मुलगी पाहण्यासाठी सोमवारी गावी जाणार होता. वधू पाहण्याचा कार्यक्रम नातलगांनी निश्चित केला होता. त्यामुळे गावी येत असल्याचा निरोप त्याने गावी दिला होता. पण त्याच्या दैवातच ते नव्हते. त्याआधीच तो काम करीत असलेल्या पोल्ट्री मालकाकडून प्रताप बेपत्ता असल्याचे नातलगांना कळविण्यात आले होते. पण येथे आल्यानंतर व व्हायरल झालेला व्हीडीओ पाहिल्यानंतर त्यांनाही वास्तव कळून चुकले.
.............
सांगेली पथकाला मदतीचे आवाहन
गेले चार दिवस शोधकार्यापासून थोडे दूर राहिलेल्या सांगेलीच्या पथकातील बाबल अल्मेडा व नार्वेकर साहसवीरांनी शुक्रवारी काही तासातच एक मृतदेह दरीबाहेर काढला. वास्तविकत: पहिल्या दिवशीच या पथकाचे स्वयंसेवक मृतदेहाजवळ पोहोचले होते. मात्र अपुऱ्या दोरखंडामुळे त्या दिवशी इम्रानचा मृतदेह वरती काढता आला नाही. या धाडसी पथकाला पुरेसे दोरखंड व इतर अनुषंगिक साहित्य दिल्यास त्यांचा अशा आपत्ती परिस्थितीत चांगले काम करता येईल, असे आवाहन दोन्हीकडच्या नातेवाईकांसह स्थानिकांनीही केले.
मोबाइल अॅप डाउनलोड करा आणि राहा अपडेट
