टिंबर मार्केट भाजी मंडईत नियमापेक्षा जादा जागा बळकावत त्यावर विनापरवाना कट्टे आणि पत्र्याचा शेड महानगरपालिकेच्या अतिक्रमणविरोधी पथाकेन गुरुवारी काढून टाकले. यावेळी भाजी विक्रेत्यांनी कारवाईला विरोध करत जेसीबी व इतर मशिनरी अडवली. काही महिला विक्रेत्या मशिनरीच्या आडव्या उभ्या राहिल्याने तणाव निर्माण झाला. अधिकाऱ्यांशी हुज्जत, आरडाओरड यामुळे जवळपास तीन तास या भागात तणावाचे वातावरण होते. यावेळी विरोध करणाऱ्या मनसेचे पदाधिकारी राजू जाधव यांना ताब्यात घेतल्यानंतर भाजीविक्रेतेही नरमले. त्यानंतर पुन्हा कारवई सुरू केली. क्रशर चौकातील विनापरवाना चायनीज स्टॉलही पथकाने काढले.
या कारवाईत ५० हून अधिक शेड व टपऱ्या हटविल्या. परिसरात तणाव निर्माण झाल्यानंतर शंभरहून अधिक पोलिस कर्मचारी तैनात केले. महापालिकेच्या गांधी मैदान विभागीय कार्यालय, अतिक्रमण विभाग व इस्टेट विभागामार्फत कारवाई झाली. गुरुवारी दुपारी दीड वाजण्याच्या सुमारास महापालिकेचा फौजफाटा टिंबर मार्केट भाजी मंडई परिसरात दाखल झाला. उपशहर अभियंता रमेश मस्कर, कनिष्ठ अभियंता संजय नागरगोजे, सुनील भाईक, सागर शिंदे, इस्टेट अधिकारी प्रमोद बराले, अतिक्रमण निर्मूलन पथकाचे प्रमुख पंडित पोवार यांच्या सूचनेप्रमाणे पवडी, इस्टेट, विद्युत व अतिक्रमण विभागाकडील कर्मचाऱ्यांनी कारवाई सुरू केली. कारवाईला भाजी विक्रेत्यांनी विरोध केला. त्यावेळी उपशहर अभियंता रमेश मस्कर यांनी भाजी विक्री करण्यास कोणताही विरोध नाही. महापालिकेने भाजी विक्रेत्यांना जागा निश्चित करुन दिली आहे. मात्र अनेक विक्रेत्यांनी जादा जागा व्यापली आहे, त्यावर विना परवाना शेड, कट्टे बांधले आहेत. विक्रेत्यांना अतिक्रमण काढून घेण्याबाबत नोटिसा काढल्या होत्या, असे सांगितले.
वादावादीमुळे मोहिमेत अडथळे
महापालिकेने नोटिसा देऊनही विक्रेत्यांनी अतिक्रमण काढून घेतले नसल्यामुळे कारवाई होणार असल्याचे अधिकाऱ्यांनी स्पष्ट केले. महापालिकेच्या जेसीबी व इतर यंत्रणेच्या मदतीने पत्र्याचा शेड, व कट्टे काढावयास सुरुवात झाल्यानंतर विक्रेत्यांकडून विरोध वाढला. यावेळी पोलिस कर्मचाऱ्यांची संख्या कमी होती. कारवाई सुरु असताना मनसेचे पदाधिकारी जाधव कारवाईस्थळी येऊन विरोध करण्यास सुरुवात झाली. यावेळी भाजी विक्रेते व अधिकारी-कर्मचाऱ्यांमध्ये वादावादी झाली. अधिकाऱ्यांशी हुज्जत घालण्याचा प्रकार, आरडाओरड, गोंधळामुळे तणाव निर्माण झाला. यामुळे दोन वेळा अतिक्रमण विरोधी मोहिम थांबवावी लागली. जाधव व भाजी विक्रेत्यांनी कारवाईला विरोध करत महापालिकेची मशिनरी रोखली. काही जण मशिनरीच्या आडवे उभे राहिले. तणाव निर्माण झाल्याने अधिकाऱ्यांनी आयुक्त चौधरी यांना माहिती दिली. त्यानंतर जादा पोलिस बंदोबस्त मागविला. मोठ्या संख्येने पोलिस आल्यानंतर पुन्हा कारवाईला सुरुवात झाली. पोलिसांनी जाधव यांना ताब्यात घेतले. नियमबाह्यपणे जागा व्यापणाऱ्या आणि कारवाईवेळी आडमुठी भूमिका घेणाऱ्या जाधव व काही भाजी विक्रेत्यांच्या भूमिकेविषयी नागरिकांतून उलटसुटल मते उमटली. दरम्यान नागरिकांकडून अतिक्रमण विरोधी कारवाईचे स्वागत होत आहे.
५० शेड, टपऱ्या हटविल्या
विद्युत पोलवरील ७५ बॅनर्स काढले
जुना वाशी नाका, राज कपूर पुतळा, सानेगुरुजी वसाहत रोडवरही कारवाई
देवकर पाणंद परिसरातील विना परवाना होर्डिग्जवर कारवाई
जुना राजवाडा पोलिस स्टेशनकडून मोठा बंदोबस्त
मोबाइल अॅप डाउनलोड करा आणि राहा अपडेट
