रोडरोमिओंना पोलिसांकडून चोप

July 26, 2017, 2:30 pm

≫ Next: अर्ज न भरण्याचे रघुनाथदादांचे आवाहन

≪ Previous: गोव्याच्या तरुणाची हॉटेलमध्ये आत्महत्या

$

0

0

म. टा. प्रतिनिधी, कोल्हापूर

शाळा, महाविद्यालयांसह बसस्टॉपवर तरुणींची छेड काढणाऱ्या रोडरोमिओंची जुना राजवाडा पोलिसांनी धरपकड करून त्यांचा चोप दिला. बुधवारी (ता. २६) सकाळी शिवाजी पेठ, भवानी मंडप, मिरजकर तिकटी परिसरात पोलिसांनी कारवाई केली. पोलिसांच्या कारवाईमुळे रोडरोमीओंनी धूम ठोकली. यातील काहींवर पोलिसांनी प्रतिबंधात्मक केली.

शहरातील शाळा, महाविद्यालयांसह बसस्टॉप परिसरात पंधरा ते वीस तरुणांचे टोळके नेहमी उभे राहून महाविद्यालयीन तरुणींवर शेरेबाजी करते. अशा तक्रारी शहर पोलिस उपअधीक्षक डॉ. प्रशांत अमृतकर यांच्याकडे आल्या होत्या. त्यांनी शहरातील सर्व पोलिस ठाण्यांना कारवाईचे आदेश दिले होते. त्यानुसार जुना राजवाडा पोलिसांनी सकाळी साडेअकराच्या सुमारास शिवाजी पेठेतील एका कॉलेजच्या परिसरात विद्यार्थिनींची टिंगलटवाळी करणाऱ्या तरुणांची धरपकड केली. यावेळी कॉलेजशी संबधित नसलेल्या काही रोडरोमीओंना चोप देऊन समज दिली. अचानक झालेल्या या कारवाईमुळे इतर तरुणांनी धूम ठोकली. काही तरुणांच्या पालकांना पोलिस ठाण्यात बोलावून त्यांच्यासमोर तरुणांना समज देऊन सोडून दिले.

दरम्यान, पोलिसांनी अशा प्रकारची मोहिम सातत्याने राबवावी अशी मागणी पालकांकडून करण्यात येत आहे. मोहीम अचानक आणि सातत्याने राबविली गेली तरच रोडरोमीओंना चाप लावता येईल असे नागरिकांचे म्हणणे आहे.

मोबाइल अॅप डाउनलोड करा आणि राहा अपडेट

---

अर्ज न भरण्याचे रघुनाथदादांचे आवाहन

July 26, 2017, 2:30 pm

≫ Next: भाकपची इचलकरंजीत निदर्शने

≪ Previous: रोडरोमिओंना पोलिसांकडून चोप

$

0

0

म. टा. प्रतिनिधी, कोल्हापूर

‘कर्जमाफीचा निर्णय राज्य सरकारने घेतला असून निर्णयाची अंमलबजावणी बँकांनी करायची आहे. सरकारने निर्णय घेतल्यानंतर भारतीय रिझर्व्ह बँक किंवा नाबार्डकडून त्याबाबतचे स्पष्ट आदेश बँकांना अद्याप प्राप्त झालेले नाहीत. कोणत्याही शेतकऱ्याला त्याच्या कर्जखात्याची इत्यंभूत माहिती नसल्याने कर्जमाफीचे अर्ज शेतकऱ्यांनी भरू नयेत’, असे आवाहन सुकाणू समितीचे नेते रघुनाथ पाटील यांनी केले. १४ ऑगस्ट रोजी चक्काजाम आंदोलन केले जाईल. स्वातंत्र्यदिनी राज्यात कोणत्याही पालकमंत्र्यांच्या हस्ते ध्वजारोहण करू न देण्याचा इशारा त्यांनी दिला. कोणत्याही निकषाविना कर्जमाफीचा निर्णय झाल्याशिवाय आंदोलन मागे न घेण्याचा पुनरुच्चारही पाटील यांनी पत्रकार परिषदेत केला.

पाटील म्हणाले, ‘कर्जमाफीच्या निर्णयानंतर सरकार रोज नवीन आध्यादेश काढत आहे. ३० जून २०१७पर्यंतच्या शेतकऱ्यांना सरसकट कर्जमाफीसाठी सुकाणू समिती आग्रही आहे. आता ऑनलाइन अर्ज करण्याचा फंडा काढला आहे. कर्जमाफी मागणीचे अर्जच शेतकऱ्यांनी भरु नयेत. चक्काजाम आंदोलन व ध्वजारोहणादरम्यान आंदोलकांना ताब्यात घेऊन पहावे’ अशा इशाराही पाटील यांनी दिला.

पी. जी. पाटील, आदम मुजावर, अॅड. माणिक शिंदे, अजित पाटील, गुणाजी शेलार, धनपाल माळी, मुन्न सय्यद, राजेंद्र गुर्दाळे, संभाजी चौगले उपस्थित होते.


पालकमंत्र्यांना आव्हान

पालकमंत्री चंद्रकांत पाटील यांनी, नागरिकांनी जशी गॅस सबसिडी नाकारली त्याप्रमाणे शेतकऱ्यांनी कर्जमाफी नाकारल्याचे सांगितले आहे. जर शेतकऱ्यांनी कर्जमाफी नाकारली असल्यास त्यांची नावे जाहीर करण्याचे आवाहन रघुनाथ पाटील यांनी केले.

मोबाइल अॅप डाउनलोड करा आणि राहा अपडेट

भाकपची इचलकरंजीत निदर्शने

July 26, 2017, 2:33 pm

≫ Next: अंगणात रंगली माहेरची गाणी

≪ Previous: अर्ज न भरण्याचे रघुनाथदादांचे आवाहन

$

0

0

इचलकरंजी

स्वामीनाथन आयोगाच्या शिफारशींची अंमलबजावणी करून शेतकऱ्यांच्या शेतीमालास दीडपट हमीभाव मिळावा, सरसकट कर्जमाफी करुन शेतकऱ्यांचा सातबारा कोरा करावा, आयजीएम हॉस्पिटल व तेथील कर्मचाऱ्यांचे प्रश्न तातडीने मार्गी लागावेत यासह विविध मागण्यांसाठी भारतीय कम्युनिस्ट पक्षाच्यावतीने प्रांताधिकारी कार्यालयावर मोर्चा काढून निदर्शने करण्यात आली.

शेतकऱ्यांच्या विविध प्रश्नांसाठी वेगवेगळ्या मार्गाने सातत्याने आंदोलने केली जात आहेत. मात्र सरकार या प्रश्नांकडे जाणूनबुजून दुर्लक्ष करीत असल्याचा आरोप करत भारतीय कम्युनिस्ट पक्षाच्यावतीने कॉ. हणंमत लोहार, मारुती आजगेकर यांच्या नेतृत्त्वाखाली प्रांताधिकारी कार्यालयावर मोर्चा काढण्यात आला. यावेळी शिष्टमंडळाच्यावतीने शिरस्तेदार मनोज ऐतवडे यांना निवेदन देण्यात आले.

शेतकऱ्यांच्या विविध प्रश्नांच्या सोडवणुकीसाठी तत्कालीन काँग्रेस आघाडी सरकारला डाव्या पक्षाने पाठींबा दिला होता. त्यावेळी स्वामीनाथन आयोगाची नियुक्ती करण्यात आली. समितीने अहवालही सादर केला. पण त्याची अंमलबजावणी आजतागायत झाली नाही. आज देशभर विक्रमी अन्नधान्य उत्पादन झाल्याने हा प्रश्न पुन्हा एकदा ऐरणीवर आला आहे. उत्पादन वाढूनही योग्य भाव न मिळाल्याने शेतकरी आत्महत्या करीत आहेत. त्यामुळे कोणतीही वर्गवारी न करता सरसकट कर्जमाफी होऊन सातबारा कोरा झाला पाहिजे. त्याचबरोबर शेतकरी, शेतमजूर व कामगारांना दरमहा तीन हजार रुपये पेन्शन मिळावी. शहरातील आयजीएम हॉस्पिटल सध्या राज्य सरकारने हस्तांतरण करुन घेतले आहे. पण येथे कोणत्याही सुविधा नसून येथील अधिकारी व कर्मचाऱ्यांना चार महिन्यापासून वेतन मिळालेले नाही. शहरात कामगार वर्ग जास्त असून सोयी सुविधा नसल्याने उपचार घेता येत नाहीत. तरी हॉस्पिटलमध्ये आवश्यक त्या सुविधा उपलब्ध करुन द्याव्यात आदी मागण्या करण्यात आल्या आहेत.

मोबाइल अॅप डाउनलोड करा आणि राहा अपडेट

अंगणात रंगली माहेरची गाणी

July 27, 2017, 10:40 am

≫ Next: कोयनेतून शनिवारपासून पाण्याचा विसर्ग शक्य

≪ Previous: भाकपची इचलकरंजीत निदर्शने

$

0

0

सांगली : बारा घरच्या बारा जणी ...खेळती अंगणी..अंगणात रंगली ग माहेरची गाणी..काय सांगू काय सांगू मोलाचं... कसं सांगू राजा इंद्राच्या तोलाचं.
अशा अस्सल ग्रामीण ढंगाच्या गाण्यांच्या तालावर महाराष्ट्र,कर्नाटक, गोव्यातून आलेल्या शकडो महिला गुरुवारी शांतिनिकेतनच्या अंगणात नागपंचमीच रिंगण सजवले. खऱ्या अर्थाने पंचमीतील खेळांना पूरक असे आल्हाददायी वातावरण, खुले मैदान आणि मनमुराद आनंद घेणाऱ्या महिला असा सुरेख संगम घडून आला होता.
नवभारत शिक्षण मंडळाच्या शांतिनिकेतन लोक विद्यापीठांतर्गत निवासी जनरल थोरात अकॅडमीत शिक्षण घेणाèया आणि वसतिगृहात राहत असलेल्या मुला मुलींशी पालकांची भेट घालून देण्यासाठी नागपंचमीचा मुहुर्त साधला गेला होता. मुलामुलींना भेटायच आणि नागपंचमीच्या निमित्ताने लहान होऊन खरी पंचमी खेळायची संधी असल्याने महिला पालक मोठ्या संख्येन आले होते. जिल्हाधिकाऱ्यांच्या पत्नी जयश्री काळम-पाटील, उपजिल्हाधिकाऱ्यांच्या पत्नी शबाना मुल्ला यांच्यासह दीपा खरात, जया आंबोळे अशा अनेकजणी माहेरच्या अंगणात आल्यासारख्या खेळात रमून गेल्या होत्या. संसार करताना, नोकरीला गाठ घालताना रोजची तारेवरची कसरत करणाऱ्या या आयाबाया गुरुवारी मनसोक्त हसल्या, खेळल्या आणि भरभरून बोलल्याही. अकॅडमिच्या प्रमुख समिता पाटील यांनी हा योग घडवून आणला होता. त्यांनीच पुढाकार घेऊन उपस्थित महिलांना खेळण्यासाठी प्रोत्साहित केले.

मोबाइल अॅप डाउनलोड करा आणि राहा अपडेट

कोयनेतून शनिवारपासून पाण्याचा विसर्ग शक्य

July 27, 2017, 10:43 am

≫ Next: कराडजवळ गोंदी येथे मगरीचे दर्शन

≪ Previous: अंगणात रंगली माहेरची गाणी

$

0

0

कराड : दोन दिवसांपासून पावसाने पाठ फिरविली असली तरी रिमझिम पडणाऱ्या पावसाने सातारा जिल्ह्यातील कोयना धरणामध्ये एकूण ८२ टक्के पाणीसाठा झाला आहे. त्यामुळे शनिवारपासून (२९ जुलै) धरण पायथा विद्युतगृहातून वीज निर्मिती करून सुमारे २००० क्युसेक क्षमतेने पाण्याचा विसर्ग करावा लागणार आहे. त्यामुळे कोयना व कृष्णा नद्यांच्या पाणी पातळीत वाढ होण्याचा इशारा प्रशासनाने दिला आहे.
कोयना धरणाच्या पाणलोट क्षेत्रात आतापर्यंत दमदार पाऊस झाला असून, सध्याही पर्जन्यवृष्टी सुरू आहे. कोयना जलाशयात ८२ अब्जघनफूट (टीएमसी) पाणीसाठा आहे. पाऊस असाच सुरू राहिल्यास जलाशय परिचालन सूचीनुसार निर्धरित जलपातळी राखण्यासाठी शनिवारपासून धरण पायथा विद्युतगृहातून सुमारे २००० क्युसेक क्षमतेने पाण्याचा विसर्ग करावा लागणार आहे. त्यामुळे धरणाच्या खालील भागातील नदीकाठची गावे, वाड्या, वस्त्यांमध्ये राहणाऱ्या ग्रामस्थांनी, सुरक्षेच्या कारणास्तव नदीपात्रात प्रवेश करू नये. तसेच, वीज मोटारी, इंजिने, शेती अवजारे अथवा तत्सम साहित्य व पशुधन यांच्याही सुरक्षेची काळजी घ्यावी, असे आवाहन कोयना सिंचन विभाग कोयनानगरचे कार्यकारी अभियंता ज्ञानेश्वर बागडे यांनी केले आहे.
गुरुवारी सकाळी आठ वाजता संपलेल्या चोवीस तासांत सातारा जिल्ह्यात एकूण ७४.६ मिलिमीटर पाऊस पडल्याची नोंद झाली.

मोबाइल अॅप डाउनलोड करा आणि राहा अपडेट

कराडजवळ गोंदी येथे मगरीचे दर्शन

July 27, 2017, 10:46 am

≫ Next: १४० माध्यमिक शिक्षक ठरले अतिरिक्त

≪ Previous: कोयनेतून शनिवारपासून पाण्याचा विसर्ग शक्य

$

0

0

कराड : गोंदी (ता. कराड) येथील कृष्णा नदीकाठी मगरीचा वावर आढळला असून, या आठवड्यात ती नदीकाठावर सुस्तावलेल्या अवस्थेत पहुडलेली अनेकांना दिसली. मगरीच्या दर्शनामुळे नदीकाठी जाण्यास अथवा नदीकाठांवरील शेतात काम करण्यास ग्रामस्थ घाबरत आहेत. लगतच्या गायरान क्षेत्रात शेतकरी जनावरे चरायला नेत असतात, त्यांना धोका पोहोचू नये, यासाठी वन विभागाने त्वरित या मगरीचा बंदोबस्त करण्याची मागणी ग्रामस्थांमधून होत आहे.
गोंदी गावच्या पश्चिमेस कृष्णा नदीचा प्रवाह आहे. त्यालगत सुमारे ७० एकर जनावरांना चरण्यासाठी गायरान आहे. त्याचबरोबर गावालगत मोठा पाणवठाही आहे.त्यामुळे दिवसभर त्या भागात महिला व पुरुष वर्गाची मोठी वर्दळ राहते.गेल्या आठवड्यामध्ये झालेल्या पावसामुळे नदीचे पाणी पात्राबाहेर आले होते. दोन दिवसांनंतर पाण्याची पातळी ओसरल्यानंतर गायरानमध्ये जनावरे चरण्यासाठी आलेल्या शेतकर्यांना नदीकाठी मगरीचे दर्शन झाले. ही बाब त्यावेळेस कुणी फारशी मनावर घेतली नाही. मात्र त्यानंतर अनेकांना तिचे वारंवार दर्शन होऊ लागल्यानंतर सर्वत्र घबराट पसरली आहे. त्यामुळे पाणवठ्यावर महिला कपडे धुण्यासाठी जाण्याचे धाडस करत नाहीत. मगरीच्या वावरामुळे आठवडाभर पाणवठा ओस पडला आहे.

मोबाइल अॅप डाउनलोड करा आणि राहा अपडेट

१४० माध्यमिक शिक्षक ठरले अतिरिक्त

July 27, 2017, 1:47 pm

≫ Next: पारंपरिक खेळांनी नागपंचमीचा उत्साह

≪ Previous: कराडजवळ गोंदी येथे मगरीचे दर्शन

$

0

0

Bhimgonda.Desai@timesgroup.com
Tweet : @bhimgondaMT

कोल्हापूर : मार्च २०१७ च्या पटसंख्येनुसार जिल्ह्यातील १४० माध्यमिक शिक्षक अतिरिक्त ठरल्याचे नुकतेच स्पष्ट झाले. त्यामध्ये कोल्हापूर शहरातील विविध हायस्कूलमधील १७ शिक्षकांचा सामावेश आहे. त्यांना रिक्त जागा असलेल्या संस्थेत जावे लागणार आहे.

दरम्यान, अतिक्त शिक्षकांच्या समायोजनेत ‘माध्यमिक’ प्रशासनाचे वचक नसल्याने नव्या ठिकाणी हजर होण्यासाठी संस्थाचालक, मुख्याध्यापकांच्या घरचे उंबरे झिजवावे लागणार आहे. डोनेशन मागितले तर द्यावे लागणार आहे. जर हजर करून घेतले नाही तर अधांतरी राहावे लागणार आहे. परिणामी संबंधीत शिक्षक हवालदिल झाले आहेत. ते माध्यमि‌क शिक्षण विभागकडे हेलपाटे मारीत आमचे समायोजन कधी करणार अशी विचारणा करीत आहेत. मात्र ‘माध्यमिक’च्या प्रशासनाने शाळा सुरू होऊन एक महिना उलटला तरी अजून समायोजन प्रक्रिया सुरू केलेली नाही.

शिक्षण हक्क कायद्यानुसार सहावी ते ८ पर्यंतच्या वर्गासाठी ३३ विद्यार्थ्यांसाठी १ तर ८ ते १० वीपर्यंतच्या वर्गांसाठी ४० विद्यार्थ्यांसाठी १ शिक्षक मंजूर आहे. अनेक शैक्षणिक संस्थांना प्रत्यक्ष आणि अप्रत्यरित्या राजकीय वरदहस्त आहे. त्यामुळे बोगस पटसंख्या दाखवून शिक्षक भरती केली गेली. अतिरिक्त होण्यापासून शिक्षकांना वाचवले गेले. मात्र गेल्यावर्षापासून याला आळा बसला. यू डायस ऑनलाइन प्रणालीत प्रत्येक विद्यार्थ्यांचे आधार क्रमांक ‌भरावे लागत असल्याने बोगस पटसंख्येला चाप लागला. दुसऱ्या बाजूला विद्यार्थ्यांची संख्या घटत आहे. यामुळे दरवर्षी पटसंख्या कमी होत आहे. परिणामी शिक्षक अतिरिक्त होत आहे.

मार्च २०१७ अखेरपर्यंतच्या पटसंख्येनुसार प्रत्येक संस्थेतून शिक्षकांची कार्यरत संख्या माध्यमिक प्रशासनाने घेतली. त्यामध्ये १४० शिक्षक अतिरिक्त होत असल्याचे उघड झाले. अतिरिक्त शिक्षकांची शाळानिहाय यादी प्रसिध्द केली. यादीत नाव असलेले शिक्षक निराश होऊन, आता आमचे पुढे काय अशी ‌विचारणा प्रशासनाकडे करीत आहे. याउलट माध्यमिक शिक्षण विभागचे प्रशासन गेले महिनाभर अभिलेख वर्गीकरणात व्यस्त आहे. दैनंदिन कामकाज ठप्प आहे. शाळा सुरू होऊन एक महिना झाले तरी अतिरिक्त शिक्षकांची अवस्था ‘ना घर का ना घाट का’ अशी झाली आहे. कार्यरत संस्थेत अतिरिक्त ठरल्याने मस्टरवर सही घेणे बंद केले आहे. समायोजनच सुरू नसल्याने नवे ठिकाण कोणते मिळणार हेही गुलदस्त्यात आहे. अतिरिक्त शिक्षकांची मानसिकता अस्थिर झाली आहे.

सर्वाधिक कागल तालुक्यातील

तालुकानिहाय अतिरिक्त शिक्षक

कोल्हापूर शहर - १७, करवीर – १९, हातकणंगले – ४, चंदगड – १०, शाहूवाडी – ६, भुदरगड – ४, राधानगरी – २०, शिरोळ – ८, गडहिंग्लज – ७, पन्हाळा – १२, आजरा – ६, कागल – २७.

पारदर्शकतेचे आव्हान

अतिरिक्त शिक्षकांच्या समायोजनेत यापूर्वी माध्यमिक प्रशासन, काही संस्था चालकांनी ‘ढपला’ पडला. या पार्श्वभूमीवर आता नव्या शिक्षणाधिकाऱ्यांवर पारदर्शकपणे अतिरिक्त शिक्षक समायोजन करण्याचे पहिले आव्हान असणार आहे.


जिल्ह्यात १४० शिक्षक अतिरिक्त झालेत. अतिरिक्त शिक्षकांच्या समायोजनाची प्रक्रिया अजून सुरू नाही. प्रभारी कार्यभार असल्यामुळे याची परिपूर्ण माहिती घेतलेली नाही. लवकरच प्रक्रिया करू.

बी. बी. भंडारी, प्रभारी माध्यमिक शिक्षणाधिकारी

मोबाइल अॅप डाउनलोड करा आणि राहा अपडेट

पारंपरिक खेळांनी नागपंचमीचा उत्साह

July 27, 2017, 1:48 pm

≫ Next: माफी न मागितल्यास तावडेंना कोल्हापूरबंदी

≪ Previous: १४० माध्यमिक शिक्षक ठरले अतिरिक्त

$

0

0

म. टा. प्रतिनिधी, कोल्हापूर

नागपंचमीनिमित्त शहरातील नागोबा मंदिरात भाविकांनी दर्शनासाठी गर्दी केल्याने मंदिर परिसरात गर्दी झाली. श्रावण महिन्यातील पहिला सण म्हणून ओळखल्या जाणाऱ्या नागपंचमीनिमित्त धार्मिक विधी करण्यात आले. सर्पमित्र संस्थांच्यावतीने नागरिकांना सर्पांविषयी माहिती देण्यात आली.

धार्मिक आणि सामाजिक दृष्टिकोनातून शहरात नागपंचमी साजरी करण्यात आली. नागपंचमीनिमित्त घरोघरी नागाच्या मूर्तीची पूजा करण्यात आली. दूध, लाह्या, ओल्या नारळाच्या करंजा यांचा नैवेद्य दाखवण्यात आला.

नागाळा पार्क येथील नागोबा मंदिर परिसरात दरवर्षीप्रमाणे गुरूवारीही जत्रा भरली. लहान मुलांच्या खेळण्यांच्या स्टॉलनी परिसर गजबजून गेला. यावेळी भाविकांना प्रसाद वाटप करण्यात आले. नागाळा मंदिर परिसरातील झाडांना बांधलेल्या झोपाळ्यांसोबत लहान मुलांनी आनंद लुटला. शुक्रवार पेठेतील नागराज गल्लीत नागपंचमीनिमित्त महाप्रसादाचे आयोजन केले होते. अंबाबाई मंदिरातील कारंजा चौकात असलेल्या नागोबा प्रतिमेचे दर्शन घेण्यासाठी भाविकांनी गर्दी केली. शिवाजी पेठ येथील महाकाली मंदिरात नागपंचमी उत्सव मोठ्या उत्साहात साजरा करण्यात आला. नागदेववाडी येथे नव्यानेच बांधण्यात आलेल्या नागोबा मंदिरात वि​विध धा​र्मिक कार्यक्रम करण्यात आले. यावेळी परिसरात झोपाळे बांधण्यात आले होते. भाविकांना प्रसादवाटप करण्यात आले.


निसर्गप्रेमींतर्फे सर्प जागृती

सर्पाविषयी असलेल्या गैरसमजुती आणि अंधश्रद्धा दूर करण्यासाठी शहरातील निसर्गमित्र संस्था आणि सर्पमित्र यांच्यावतीने नाग मंदिर परिसर व सार्व​​जनिक ठिकाणी जाणीव जागृती प्रबोधन करण्यात आले. सर्पांच्या विविध जाती आणि त्यांचे वैशिष्ट्य याविषयी माहिती देणाऱ्या कार्यक्रमांचे नियोजन करण्यात आले होते.

मोबाइल अॅप डाउनलोड करा आणि राहा अपडेट

---

माफी न मागितल्यास तावडेंना कोल्हापूरबंदी

July 27, 2017, 1:50 pm

≫ Next: मुख्य न्यायमूर्तींकडे खंडपीठाची शिफारस

≪ Previous: पारंपरिक खेळांनी नागपंचमीचा उत्साह

$

0

0

म. टा. प्रतिनिधी, कोल्हापूर

‘करवीरनिवासिनी श्री अंबाबाई मूर्तीची झीज झालेलीच नाही. भारतीय पुरातत्व सर्व्हेक्षण विभागाने केलेल्या पाहणीनुसार मूर्तीची झीज झाला नसल्याचा अहवाल दिला आहे. त्यामुळे मूर्तीची झीज झाली असल्याच्या निष्कर्षात कोणतेही तथ्य नाही’ असे विधान सांस्कृतिक कार्यमंत्री विनोद तावडे यांनी विधीमंडळाच्या ​अधिवेशनात केले आहे. मंत्री तावडे यांचे हे विधान धादांत खोटे आहे. या विधानाबाबत त्यांनी आठ दिवसांत माफी न मा​गितल्यास तावडे यांना कोल्हापुरात प्रवेशबंदी करण्याचा इशारा अंबाबाई मंदिर पुजारी हटाओ संघर्ष समितीच्यावतीने गुरूवारी देण्यात आला.

दोन वर्षापूर्वी अंबाबाई मूर्तीवर केलेल्या रासायनिक संवर्धन प्रक्रियेनंतर तीन महिन्यांपूर्वी मूर्तीवर पांढरे डाग पडत असल्याचे निदर्शनास आले. यावरून मूर्ती संवर्धन प्रक्रिया फोल ठरल्याचे स्पष्ट होत असल्याचा प्रश्न शिवसेनेच्या आमदार डॉ. नीलम गोऱ्हे यांनी विधानपरिषदेत मांडला होता. यासंदर्भात उत्तर देताना तावडे यांनी मूर्तीची झीज झालीच नसल्याचे स्पष्ट केले होते. या पार्श्वभूमीवर संघर्ष समितीच्यावतीने कोल्हापुरात घेण्यात आलेल्या पत्रकार प​रिषदेत तावडे यांनी विधान मागे घ्यावे अन्यथा कोल्हापुरात त्यांना प्रवेशबंदी आंदोलन करण्यात येईल असे स्पष्ट केले.

समितीचे सदस्य, शिवसेना जिल्हाप्रमुख संजय पवार म्हणाले, ‘दोन वर्षापूर्वी संवर्धन झाल्यानंतर सहा महिन्यांनी मूर्तीची पाहणी पुरातत्व विभाग व रासायनिक संवर्धन समितीचे प्रमुख मनेजर सिंग यांनी केली होती. त्यावेळी संवर्धनपश्चात मूर्तीची शास्त्रीय काळजी घेण्याबाबत समितीने केलेल्या सूचनांची अंमलबजावणी पुजाऱ्यांनी केली नसल्याचा अहवाल दिला होता. तसेच २​ जून २०१६ रोजी औरंगाबाद येथील पुरातत्व रसायन तज्ज्ञ समितीनेही मूर्तीची पाहणी करून झीज झाल्याच्या निष्कर्षाला अहवालद्वारे दुजारो दिला आहे. त्यामुळे तावडे यांच्याकडून करण्यात आलेले, मूर्तीची झीज झालीच नसल्याचे विधान पुजाऱ्यांना पाठीशी घालणारे आहे.’

इतिहास अभ्यासक इंद्रजित सावंत म्हणाले, ‘दोन वर्षापूर्वी रासायनिक संवर्धनापूर्वी केलेल्या पाहणीत मूर्तीवर एमसीलचा थर असल्याचे तसेच मूर्तीच्या मानेच्या उजव्या बाजूला खांद्याजवळ तीन ठिकाणचे भाग धातूच्या पट्ट्या जोडल्याचे आढळले होते. रासायनिक संवर्धन समितीच्या अहवालात हा मुद्दा नमूद आहे. १९५५ साली झालेल्या संवर्धनापूर्वी एमसीलचा थर मूर्तीवर नव्हता. दोन जून रोजी केलेल्या पाहणीत पुरातत्व तज्ज्ञांकडून झीज झाल्याचे सांगण्यात येते आणि त्यानंतर अडीच महिन्यात सांस्कृतिक कार्यमंत्र्यांकडे दिलेल्या अहवालात झीज झाली नसल्याचे स्पष्ट करण्यात येते. या विसंगतीमागे नेमका कोणता हेतू आहे हे तावडे यांनी स्पष्ट करावे, अन्यथा कोल्हापुरात तीव्र पडसाद उमटतील.’

मूर्तीची झीज झाल्याबाबतच्या अहवालात फेरफार करून पुजाऱ्यांना वाचवण्याचा प्रयत्न केल्यास आंदोलन करण्याचा इशारा दिलीप देसाई यांनी पत्रकारांशी बोलताना दिला. यावेळी सचिन तोडकर, जयश्री चव्हाण यांच्यासह समितीचे सदस्य उपस्थित होते.

थेट चर्चा होणे अयोग्य

अंबाबाई मूर्तीची झीज, रासायनिक संवर्धन प्रक्रिया, संवर्धनपश्चात मूर्तीची काळजी आणि सूचनांची अंमलबजावणी हे मुद्दे पश्चिम महाराष्ट्र देवस्थान समितीशी संबंधित आहेत. संवर्धनाबाबत पाहणीस व त्याचा अहवाल यासंदर्भात देवस्थान समितीशी कोणतीही चर्चा न करता थेट विधान परिषदेत चर्चा होणे योग्य नाही. मूर्तीच्या झीजबाबत तज्ज्ञांनी काय अहवाल दिला आहे याची माहिती देवस्थान समितीला देणे आवश्यक होते असे देवस्थान समितीचे सदस्य शिवाजीराव जाधव आणि संगीता खाडे यांनी यावेळी सांगितले.

मंत्री तावडेंचा दावा

वृत्तपत्रांत प्रसिद्ध झालेल्या बातम्यांच्या अनुषंगाने उपअधीक्षक पुरातत्त्वीय रसायन तज्ज्ञ, भारतीय पुरातत्त्व सर्वेक्षण औरंगाबाद यांनी 2 जून रोजी श्री अंबाबाई मूर्तीची पाहणी केली. त्यात मूर्तीची कोणत्याही प्रकारची झीज झाली नसल्याचे निष्पन्न झाल्याची माहिती विनोद तावडे यांनी दिली आहे.

मोबाइल अॅप डाउनलोड करा आणि राहा अपडेट

मुख्य न्यायमूर्तींकडे खंडपीठाची शिफारस

July 27, 2017, 1:52 pm

≫ Next: सह्याद्री व्याघ्र प्रकल्पग्रस्तांचे दोन तपांनंतरही पुनर्वसन नाही

≪ Previous: माफी न मागितल्यास तावडेंना कोल्हापूरबंदी

$

0

0

म. टा. प्रतिनिधी, कोल्हापूर

‘कोल्हापूर येथे मुंबई उच्च न्यायालयाचे खंडपीठ (सर्किट बेंच) सुरू व्हावे यासाठी राज्य सरकार सकारात्मक आहे. याबाबत मंत्रिमंडळाने बैठकीत निर्णय घेतला असून, मुख्य न्यायमूर्तींकडेही शिफारस केली आहे. आता मुख्य न्यायमूर्तींकडून पुढील कार्यवाही होणे अपेक्षित आहे,’ अशी माहिती मुख्यमंत्री देवेंद्र फडणवीस यांनी विधान परिषदेत दिली. आमदार सतेज पाटील यांनी कोल्हापुरातील खंडपीठाबाबत विधान परिषदेत प्रश्न उपस्थित केला होता. विधान परिषदेत उपस्थित झालेल्या या प्रश्नाने पुन्हा एकदा खंडपीठाच्या मुद्याला चालना मिळाली आहे.

मुंबई उच्च न्यायालयाचे कोल्हापुरात खंडपीठ सुरू व्हावे याची जाहीर घोषणा मुख्यमंत्र्यांनी केली. मात्र या घोषणेची अंमलबजावणी अद्याप होऊ शकलेली नाही. याबाबत आमदार सतेज पाटील यांनी विधान परिषदेत प्रश्न उपस्थित केला होता. ‘कोल्हापुरातील खंडपीठाला मान्यता देण्याबाबत सरकारने कोणती कार्यवाही केली आहे? कोल्हापुरातील खंडपीठाचा प्रस्ताव उच्च न्यायालयाकडे सादर केला आहे काय? असल्यास प्रस्तावाची सद्यस्थिती काय आहे? नसल्यास विलंब का होत आहे?’ असे प्रश्न आमदार पाटील यांनी उपस्थित केले होते.

यावर मुख्यमंत्री फडणवीस म्हणाले, ‘मंत्रीमंडळाने १२ मे २०१५ मध्ये झालेल्या बैठकीत कोल्हापुरातील फिरत्या खंडपीठाचा सकारात्मक विचार व्हावा अशी शिफारस केली आहे. १७ जुलै २०१५ मध्ये मुख्य न्यायमूर्तींना शिफारस पत्रही लिहिले आहे. याबाबत उच्च न्यायालयाकडून पुढील कार्यवाही होणे अपेक्षित आहे. राज्य सरकारने कोणताच विलंब केलेला नाही.’

मोबाइल अॅप डाउनलोड करा आणि राहा अपडेट

सह्याद्री व्याघ्र प्रकल्पग्रस्तांचे दोन तपांनंतरही पुनर्वसन नाही

July 27, 2017, 1:53 pm

≫ Next: सुशीलकुमार शिंदेंना जेव्हा दंड होतो

≪ Previous: मुख्य न्यायमूर्तींकडे खंडपीठाची शिफारस

$

0

0

कराड : सातारा व सांगली जिल्ह्यांच्या पश्चिम घाटावर सुरू झालेल्या सह्याद्री व्याघ्र प्रकल्पाच्या जंगलात येणाऱ्या पाटण तालुक्यातील पाथरपुंज, मळे आणि कोळणे या गावांचा ‘वन’वास दिवसेंदिवस वाढत चालला आहे. हा प्रकल्प जाहीर होऊन दोन तपे उलटूनही या गावांच्या पुनर्वसनासह त्यांच्या मुलभूत सोयींना तिलांजली दिली गेली आहे. त्यामुळे ‘आमचा वनवास संपणार तरी कधी?,’ असा थेट सवाल संतप्त ग्रामस्था करीत आहेत.
पाटण तालुक्यातील कोयना- चांदोली अभयारण्याच्या किर्रर्र जंगलात सातारा जिल्याच्या शेवटच्या टोकावर पाथरपुंज, मळे, कोळणे ही गावे वसलेली आहेत. या गावांना लागूनच सांगली व रत्नागिरी जिल्ह्यांच्या सीमा आहेत. या सीमावर्ती भागांत १९८३ साली कोयना- चांदोली अभयारण्याची घोषणा झाली. त्यानंतर तीन वर्षांनी या तीन गावांच्या पुनर्वसनाची घोषणा झाली. १९९१ ला पुनर्वसनाची अधिसूचना जाहीर झाली. पण, गेल्या २४ वर्षांपासून कोणताही ठोस निर्णय झाला नाही. पुनर्वसनासंदर्भात विविध विभागांच्या अधिकाऱ्यांनी गावांना भेटी दिल्या; मात्र निष्पन्न काहीच झाले नाही.
पनर्वसनाच्या अधिसूचनेनंतर पाटण तालुक्यातच गांधी टेकडी, सोनायचीवाडी, बहुले या गावच्या हद्दीतील वन विभागाच्या जागा पुनर्वसनासाठी दाखविल्या गेल्या होत्या. त्या जागा जंगलग्रस्त लोकांना मान्य झाल्या. मात्र, त्याच्यापुढे शासनाने कोणतेच पाऊल पुढे उचलले नाही. वनविभाग व वन्यजीव यांच्या मते, पुनर्वसन ज्या गावाच्या हद्दीत होत आहे, त्या - त्या ग्रामपंचायतीचा ठराव जंगलग्रस्त ग्रामस्थांनी घ्यावा. तर, पुनर्वसन शासनाच्या हद्दीत होत असेल तर ग्रामपंचायतीच्या ठरावाचा संबंध येतो कुठे? असा सवाल पुनर्वसनग्रस्त करत आहेत. पुनर्वसनग्रस्तांना संबंधित ग्रामपंचायती जुमानत नसल्याने जर आवश्यकता असेल, तर असे ठराव शासनानेच घ्यावे व पुनर्वसन मार्गी लावावे, अशी पुनर्वसनग्रस्तांची मागणी आहे.
गावकऱ्यांचा इशारा
शासनाच्या नाकर्तेपणामुळे व सध्या कोसळत असलेल्या मुसळधार पावसात तेथील नागरिकांना आपले जीवन जगणे म्हणजे, जंगली ‘वन’वास सुरू झाला आहे. सध्याच्या पावसाळ्यात भर पुरातून वाट शोधत जीवावर उदार होऊनच प्रवास करावा लागत आहे. विद्यार्थ्यांना तर घराबाहेर पडणेही मुश्किल झाले आहे. रस्ते नाहीत, प्रवासाची साधने नाहीत, वीज, पिण्याच्या पाण्याची सोय नाही. त्यामुळे मुलांना शिक्षणापासून वंचित राहावे लागत आहे. या ‘वन’वासातून आम्हाला बाहेर काढण्याचा निर्णय तातडीने झाला नाही, तर येथून पुढील काळात पाथरपुंज, मळे, कोळणे या गावच्या हद्दीतील जंगलात कोणत्याही वन्यजीव, वन विभागाच्या अधिकाऱ्यासह लोकप्रतिनिधींना फिरकू देणार नाही. तसेच, येणाऱ्या सर्व निवडणुकांत नोटावर मतदान करून उमेदवाराला मतदान करण्यास बहिष्कार टाकू, असा इशारा गावकऱ्यांनी दिला आहे.

मोबाइल अॅप डाउनलोड करा आणि राहा अपडेट

सुशीलकुमार शिंदेंना जेव्हा दंड होतो

July 27, 2017, 1:55 pm

≫ Next: ‘महारेरा’ने वाढणार एजंटांचा फेरा

≪ Previous: सह्याद्री व्याघ्र प्रकल्पग्रस्तांचे दोन तपांनंतरही पुनर्वसन नाही

$

0

0

सोलापूर : वाहन परवान्याच्या नूतनीकरणास विलंब झाल्यामुळे माजी केंद्रीय गृहमंत्री सुशीलकुमार शिंदे यांनी गुरुवारी सोलापूरच्या उपप्रादेशिक परिहन कार्यालयात येऊन २५६० रुपयांचा दंड भरला.

शिंदे यांनी गुरुवारी सकाळी साडेअकरा वाजता परिवहन कार्यालयात येऊन स्मार्ट कार्ड लायसन्स काढले. ११ नोव्हेंबर १९६४ मध्ये मोटरसायकल व चार चाकी वाहनाच्या काढलेल्या परवान्याच्या नूतनीकरणाची मुदत संपली होती. यानंतर गुरुवारी त्यांनी कार्यालयात येऊन वाहन परवाना नूतनीकरणाची प्रक्रिया पार पाडली.

२०१२ पासून वाहन परवाना नूतनीकरणास विलंब झाल्याने शिंदे यांना दंड भरावा लागला. ‘कायदा व नियम सर्वांना समान आहेत. कायद्यापेक्षा कुणीही मोठा नाही,’ अशी प्रतिक्रिया दंड भरल्यानंतर सुशीलकुमार शिंदे यांनी माध्यमांशी बोलताना दिली.

मोबाइल अॅप डाउनलोड करा आणि राहा अपडेट

‘महारेरा’ने वाढणार एजंटांचा फेरा

July 27, 2017, 2:30 pm

≫ Next: २९ कर्मचारी बडतर्फ होणार

≪ Previous: सुशीलकुमार शिंदेंना जेव्हा दंड होतो

$

0

0

कोल्हापूर टाइम्स टीम

केवळ ग्राहकाला फ्लॅट दाखवून त्याची खरेदी झाल्यानंतर कमिशन घेण्याचा एजंटांचा प्रकार महारेरा कायद्याने बंद होणार आहे. या कायद्याने वीज कनेक्शन देणे, सातबारावर नाव लावणे, लिव्ह अँड लायसेन्स करार रजिस्टर केल्यावर त्याची एक प्रत पोलिस ठाण्यात देऊन नोंद करून देणे यासह विविध प्रकारची कामे एजंटला करावी लागणार आहेत. त्यामुळे महारेराने एजंटांमागे कामांचा फेरा आणल्याचे स्पष्ट होत आहे.

केंद्र सरकारने रेरा अर्थात रिअल इस्टेट रेग्युलेटरी अॅक्ट कायदा १ मे २०१७ रोजी अंमलात आणला. या कायद्यांतर्गत केवळ बिल्डरांवर वचक रहाणार नसून, इस्टेट एजन्सी व्यवसायदेखील यात अंतर्भूत करण्यात आला आहे. फ्लॅट आणि बंगले विकणे आणि भाड्याने देणे तसेच बिगरशेती प्लॉट विकणे व्यवसायाचे स्वरूप असलेल्यांनाही नोंदणी करणे बंधनकारक करण्यात आल्याने ग्राहकांची एजंटांकडून होणारी फसवणूक टळणार आहे. ३१ जुलै ही एजंटांसाठी नोंदणी करण्याची अखेरची तारीख आहे.

रेरा कायद्यांतर्गत रजिस्टर इस्टेट एजंट असणे बंधनकारक करण्यात आले आहे. आता रेरा कायद्यांतर्गत इस्टेट एजंटांचाही या कायद्यात अंतर्भाव केल्याने आता एजंटांवरही कारवाई होणार आहे. पूर्वी पॉवर ऑफ अॅटर्नी व खरेदी-विक्री तसेच लिव्ह अँड लायसेन्स या व्यवहारात मसुदा तयार करून ग्राहक व विक्रेता यांच्यात एजंटांमार्फत व्यवहार करून दिले जात होते. परंतु, आता या व्यतिरिक्त एजंटांना जबाबदारी पार पाडावी लागणार आहे. विक्रेता व ग्राहक यांची समोरासमोर मिटिंग करून मेमोरंडम ऑफ अंडरस्टॅहडिंग नोटराईज करणे, दस्त रजिस्टर करून पूर्ण फाइल ग्राहकाच्या हातात देणे. खरेदीपत्र झाले की नवीन ग्राहकाच्या नावे वीज मीटर, पाणी मीटर हस्तांतर करणे, सिटी सर्व्हे किंवा ७/१२ उतारा सदरी नाव लावून देणे. विक्री झालेल्या घरांच्या खरेदीला एक वर्ष पूर्ण झाले की ग्राहकाची चौकशी करणे, लिव्ह अँड लायसेन्स करार रजिस्टर केल्यावर त्याची एक प्रत पोलिस ठाण्यात देऊन नोंद करून देणे. इत्यादी कामे नवीन कायद्यांतर्गत करून द्यावी लागणार आहेत. दुय्यम निबंधक कार्यालयातील कामे म्हणजे तारणगहाण खत, रिकन्व्हेशन डिड, मृत्यूपत्र, बक्षीस पत्र, हक्कसोड पत्र, खरेदी पत्र, करारनामा, खरेदीखत ही कामेही करून द्यावी लागणार आहेत.

जे बिल्डर गृहबांधणी करतात ते शक्यतो स्वतः घरांच्या विक्रीत सहभागी नसतात. त्यांनी नियुक्त केलेले एजंटच खरेदी-विक्रीचे व्यवहार बघत असतात. ग्राहकांना घर दाखवण्यापासून घराचा दर कमी जास्त करण्यातही त्यांचा मोठा वाटा असतो. त्यामुळे महारेराकडे नोंदणी झालेले बिल्डर आणि त्यांच्या गृहनिर्माण प्रकल्पासाठी काम करणाऱ्या इस्टेट एजंटनाही नोंदणी बंधनकारक आहे.

गृहनिर्माण प्रकल्पात काही त्रुटी आढळल्या, कागदपत्रांची पूर्तता व्यवस्थित नसेल किंवा महारेराच्या निकषांचा भंग झाला असेल तर संबंधित बिल्डर जबाबदार राहणार असून त्यांच्यावर दंडात्मक कारवाईची तरतूद महारेरा कायद्यात आहे. एजंटांवर मात्र प्रकल्पाची कोणतीही जबाबदारी नसेल. स्थानिक पातळीवर कमिशन घेऊन भाड्यांच्या घराची ​किंवा जुन्या घरांच्या खरेदी-विक्रीचे व्यवहार करणाऱ्या इस्टेट एजंटांना महारेराकडे नोंदणी करणे बंधनकारक नाही. महारेराकडे नोंदणी करणाऱ्या एजंटांची संख्या महिनाअखेरपर्यंत लक्षणीयरित्या वाढेल असे दिसते.

४६ हजारांवर एजंटांची नोंदणी

दरम्यान, या ‘महारेरा’ प्राधिकरणाकडे आतापर्यंत ४६ हजारांपेक्षा जास्त इस्टेट एजंटांनी नोंदणी केली आहे. गृहनिर्माण साकारणाऱ्या बिल्डरांसाठी ज्या प्रमाणे विविध नियम आणि अटी आहेत, त्या धर्तीवर इस्टेट एजंटांना मात्र कोणत्याही अटी नाहीत. मात्र महारेरा अंतर्गत नोंद झालेल्या गृहनिर्माण प्रकल्पातील घरांच्या​ विक्रीची अधिकृत जबाबदारी घेणाऱ्या इस्टेट एजंटना महारेरामध्ये नोंदणी करावी लागणार आहे.

मोबाइल अॅप डाउनलोड करा आणि राहा अपडेट

२९ कर्मचारी बडतर्फ होणार

July 27, 2017, 2:30 pm

≫ Next: समझोता झाला, आता निवडणुकीची औपचारिकता

≪ Previous: ‘महारेरा’ने वाढणार एजंटांचा फेरा

$

0

0

म. टा. प्रतिनिधी, कोल्हापूर

वारंवार नोटीसा देऊनही कामावर हजर न राहिलेल्या तब्बल २९ कर्मचाऱ्यांना घरचा रस्ता दाखविण्याचा निर्णय महापालिका प्रशासनाने घेतला आहे. गेली. यामध्ये आरोग्य आणि पवडी विभागातील कर्मचाऱ्यांचा समावेश असून येत्या दोन दिवसात त्यांच्यावर बडतर्फीची​ रितसर कारवाई होणार आहे. बडतर्फीच्या प्रस्तावाला आयुक्त अभिजित चौधरी यांची मान्यता मिळाली आहे. प्रशासकीय कामकाजानुसार प्रस्तावावर अतिरिक्त आयुक्तांची सही झाला की संबंधित कर्मचाऱ्यांना कामावर काढून टाकले जाईल.

यात आरोग्य आणि पवडी विभागात कर्मचाऱ्यांची संख्या आहे. अपुऱ्या कर्मचाऱ्यांमुळे यंत्रणेवर ताण पडत आहे. दुसरीकडे या दोन्ही विभागातील अनेक कर्मचारी सातत्याने गैरहजर राहतात. अधिकाऱ्यांना पूर्व कल्पना न देता कामाला दांडी मारणाऱ्या कर्मचाऱ्यांची यादी तयार करण्यात आली होती. गेली दोन वर्षे या कर्मचाऱ्यांना सातत्याने नोटीसा काढण्यात आल्या होत्या. लिपीक, मुकादम, शिपाई, सफाई कामगारांचा समावेश आहे. मात्र या कर्मचाऱ्यांनी प्रशासनाला कसलाही प्रतिसाद दिला नाही. काही कर्मचारी अन्यत्र राहण्यासाठी गेल्यामुळे त्यांना नोटीसाही मिळत नसल्याच्या तक्रारी आहेत. यासंदर्भात सहायक आयुक्त संजय भोसले यांनी संबंधित कर्मचाऱ्यांना यापूर्वी नोटीसा काढल्या होत्या. त्यांच्याकडून कसलाही प्रतिसाद मिळाला नाही. २९ कर्मचाऱ्यांवर बडतर्फीची कारवाई होणार असल्याचे सां​गितले. प्रशासनाने कामचुकार कर्मचाऱ्यांची यादी तयार केली आहे. सहायक आयुक्त कार्यालयाकडून गुरुवारी हा प्रस्ताव अधिकृतपणे आयुक्त व अतिरिक्त कार्यालयाकडे सादर झाला आहे.

यांच्यावर होणार कारवाई

पवडी विभाग

महादेव हरी कोळी व चंद्रकांत सदाशिव घाटगे (माळी काम), प्रशांत सुभाष खोचे (कनिष्ठ अभियंता), ज्योती रंगराव यादव व कामाबी महादेव डकरे (पहारेकरी), विलास दत्तात्रय बागडे, धोंडीराम लहू कांबळे, गणपती रा​जाराम कांबळे, सुरेश आत्माराम लोखंडे शिपाई, उमेश रामचंद्र चंडाळे, दिनकर गोविंद तिवारी व विलास आप्पा कांबळे (कामगार).

आरोग्य विभाग

इजाजअली शौकतअली उस्माने (लिपिक), लता राजाराम सस्ते (स्वीपर), मदन नरसिंह चव्हाण, राजेश रामदास दळे, सीताराम यशवंत हासुरे (वॉर्डबॉय), अनिल सोहनलाल छपरीबंद (कामगार) , शरीफ दावल शेख (झाडू कामगार), सुनील सोहनलाल छपरीबंद (सफाई कामगार), पुरुषोत्तम रमेशचंद्र ठाकूर (मुकादम), कुलदीपक भगवान गवंडी (ड्रेसर) यांच्यावर कारवाई होणार आहे. याशिवाय आप्पासो मारुती लोहार (चालक वर्कशॉप), संजय दत्तात्रय नाईक (क​निष्ठ लिपीक), मंगेश शंकरराव केंबळकर (क्लार्क इस्टेट) शिवाजी मल्हारराव वरकड (मेस्त्री).

मोबाइल अॅप डाउनलोड करा आणि राहा अपडेट

समझोता झाला, आता निवडणुकीची औपचारिकता

July 27, 2017, 2:30 pm

≫ Next: कोल्हापुरातीत अवघ्या ३३ बिल्डरांनी केली नोंदणी

≪ Previous: २९ कर्मचारी बडतर्फ होणार

$

0

0

म. टा. प्रतिनिधी, कोल्हापूर

जनता बझारची निवडणूक लढवण्याची तयारी केलेल्या दोन तुल्यबळ पॅनेलमध्ये गुरूवारी समझोता झाला. काँग्रेसचे जेष्ठ नेते पी. एन. पाटील आणि माजी आमदार महादेवराव महाडिक यांची राजाराम साखर कारखान्यावर चर्चा झाली. चर्चेत पॅनेलमधून सचिन चव्हाण यांचे नाव वगळून एकमताने १९ जणांची निवड करण्यात आली. मात्र जागेपेक्षा अधिक अर्ज राहिल्याने बझारची ६ ऑगस्ट रोजी रितसर निवडणूक होईल.

जनता बझारची निवडणुकीच्या अर्ज माघारीच्या अखेरच्या दिवशी, मंगळवारी १३ जणांनी माघार घेतली. ४३ जण रिंगणात राहिले. निवडणुकीसाठी आमदार सतेज पाटील विरूद्ध माजी आमदार महाडिक असे पॅनेल तयार झाले. मात्र, समझोत्यासाठी चर्चा सुरू राहिली. तोडगा अंतिम टप्यात आला असताना प्रल्हाद चव्हाण, प्रकाश बोंद्रे यांच्या कुटुंबातील दोघे सदस्य कशासाठी ? असा मुद्दा उपस्थित झाला. महाडिक यांनी, सचिन चव्हाण यांना थेट विरोध केला. त्यामुळे बुधवारी पुन्हा समझोत्यास ब्रेक लागला. पी. एन. पाटील यांनी महाडिक यांच्याशी चर्चा केली. सचिन चव्हाण यांचे नाव वगळले. त्यामुळे चर्चा पुढे गेली.

आमदार सतेज पाटील, राजेश क्षीरसागर, माजी मंत्री विनय कोरे, महाडिक, पी. एन. पाटील या प्रमुख नेत्यांच्या कार्यकर्त्यांना संधी देत १९ जागांवर सदस्य निवडी झाल्या. निवडीत माजी संचालकांना प्राधान्य देण्यात आले. उदय देसाई, दिपक शिराळे, प्रल्हाद चव्हाण, शिवाजी घाटगे, उदय भोपळे, बाळासाहेब कुंभार, अरूण साळुंखे, मधुकर चित्रुक, प्रकाश खुडे, प्रकाश बोंद्रे, उदय पोवार, मधुकर शिंदे, सुहास बोंद्रे, ललिता माळी, विद्या माळी, मदन चोडणकर, रविकिरण चौगुले, तानाजी साजणीकर अशी निवडलेल्यांची नावे आहेत. दरम्यान, जागेपेक्षा अधिक अर्ज राहिल्याने उमेदवारांना मतदारांपर्यंत पोहचावे लागणार आहे. चुरस संपली तरी निवडणूक प्रक्रिया होईल.

मोबाइल अॅप डाउनलोड करा आणि राहा अपडेट

---

कोल्हापुरातीत अवघ्या ३३ बिल्डरांनी केली नोंदणी

July 27, 2017, 2:30 pm

≫ Next: स्वाइन फ्लूचे आठ रुग्ण दाखल

≪ Previous: समझोता झाला, आता निवडणुकीची औपचारिकता

$

0

0

म. टा. प्रतिनिधी, कोल्हापूर

‘महारेरा’ कायद्याअंतर्गत गृहनिर्माण प्रकल्पांची नोंदणी करण्यास अवघे चार दिवस शिल्लक आहेत. आतापर्यंत कोल्हापुरातील केवळ ३३ बिल्डरांनी नोंदणी केली आहे. मात्र अजूनही बरेच बिल्डर नोंदणीपासून दूरच आहेत. येत्या चार दिवसांत कोल्हापुरात आणखी पंधरा ते वीसजणांची नोंदणी होण्याची शक्यता आहे.

राज्यातील ३० एप्रिल २०१७ पर्यंत ‘ओसी’ न मिळालेल्या, अपुऱ्या अवस्थेतील गृहनिर्माण प्रकल्पांची ३१ जुलैपर्यंत ‘महारेरा’कडे नोंदणी करणे बंधनकारक आहे. अन्यथा विकासकांना प्रकल्प मूल्याच्या १० टक्के इतका दंड आकारला जाऊ शकतो. रेरा कायद्यात तशी स्पष्ट तरतूद असून चुकार विकासकांवर कारवाई करण्यासाठी ‘महारेरा’ प्राधिकरणाने तयारी केली आहे.

राज्यात अपुऱ्या अवस्थेतील सुमारे १० हजार गृहनिर्माण प्रकल्प आहेत. आतापर्यंत फक्त १,४३० प्रकल्पांची नोंद झाली आहे. ३१ जुलै ही नोंदणीसाठी अंतिम तारीख असली, तरी आलेल्या अर्जांची छाननी करून गृह प्रकल्पांना रितसर नोंदणी क्रमांक मिळून प्रकल्पाची सर्व माहिती ‘महारेरा’च्या वेबसाटवर प्रदर्शित होण्यास एक महिना लागणार आहे. त्यामुळे कोणते अपूर्ण प्रकल्प ‘महारेरा’कडे नोंद झालेले नाहीत, हे ऑगस्ट अखेरपर्यंत स्पष्ट होणार आहे. अशा रेंगाळलेल्या प्रकल्पातील ग्राहकांनी ‘महारेरा’च्या वेबसाइटवर एक ऑगस्टपासून नियमितपणे नजर ठेवून आपल्या गृह प्रकल्पाची ‘महारेरा’कडे नोंदणी होतेय की नाही, याकडे लक्ष द्यावे, असे आवाहन पंचायतीने केले आहे.

नोंदणी झालेल्या गृह प्रकल्पांबाबत खालील माहिती ग्राहकांना ‘महारेरा’च्या वेबसाइटवर मिळेल.

विकासकाने आधी सांगितलेली ताबा देण्याची तारीख आणि ‘महारेरा’कडे नोंदणी करताना सांगितलेली ताबा कधी दिला जाईल ती तारीख, अशा दोन्ही तारखा वेबसाइटवर मिळतील.

मागील पाच वर्षातील विकासकांच्या प्रकल्पाची माहिती, प्रकल्प अपूर्ण असल्यास त्याची कारणे, या अपूर्ण प्रकल्पाची सद्यस्थिती.

प्रत्येक गृहनिर्माण सदनिका, इमारती यांची सध्याच्या प्रगतीबाबतचे आर्किटेक्ट व इंजीनिअरचे प्रमाणपत्र

गृहनिर्माण प्रकल्पासाठी भविष्यात लागणारा निधी, आजपर्यंत ग्राहकांकडून प्राप्त झालेला निधी, अशा आर्थिक व्यवहाराबाबतचे लेखा परीक्षकाचे प्रमाणपत्र

पूर्वीच्या करारात सदनिकेचे क्षेत्रफळ बिल्टअप, सुपर बिल्टअपमध्ये दिले असले, तरीही आता ते नव्याने प्रत्यक्ष कार्पेट एरियामध्ये प्रदर्शित केलेले असेल.

विकासकाचे नाव, पत्त्यासोबत त्यांचे छायाचित्रही प्रदर्शित होणे बंधनकारक आहे.

मोबाइल अॅप डाउनलोड करा आणि राहा अपडेट

स्वाइन फ्लूचे आठ रुग्ण दाखल

July 27, 2017, 2:30 pm

≫ Next: पुन्हा रस्ते खोदणार

≪ Previous: कोल्हापुरातीत अवघ्या ३३ बिल्डरांनी केली नोंदणी

$

0

0

म. टा. प्रतिनिधी, कोल्हापूर

स्वाइन फ्लूचे नवीन आठ रुग्ण गुरूवारी (ता. २७) उपचारासाठी सीपीआरमध्ये दाखल झाले. यातील तीन रुग्णांचा तपासणी अहवाल पॉझिटिव्ह आला असून, पाच रुग्ण संशयित आहेत. आठ रुग्णांपैकी चौघे कोडोली (ता. पन्हाळा) येथील एकाच कुटुंबातील आहेत. यात तीन बालकांचा समावेश आहे. दरम्यान, सीपीआरसह खासगी रुग्णांलयांमध्ये एकूण १९ रुग्णांवर उपचार सुरू आहेत.

स्वाइन फ्लूचा विळखा वाढत असून गुरूवारी सीपीआरमध्ये नवीन आठ रुग्ण दाखल झाले. मेघा लक्ष्मण कांबळे (वय ३५, रा. मरळी, ता. शाहूवाडी), मीनाक्षी काशिनाथ मनमुळे (४५, रा. रुई, ता. हातकणंगले), राणी बाबूराव गावडे (२०, रा. न्यू पॅलेस परिसर), संगीता आनंदराव मेडके (३८, रा. वाळवा, जि. सांगली) यांच्यासह कोडोली येथील एकाच कुटुंबातील विकास विजय गोसावी (२०), पवन अविनाश गोसावी (६), वीर विकास गोसावी (७ महिने) आणि वैष्णवी अविनाश गोसावी (दीड वर्षे) या आठ रुग्णांवर उपचार सुरू आहेत. सर्वांवर सीपीआरच्या स्वाइन फ्लू कक्षात उपचार सुरू आहेत. इतर बारा रुग्ण जिल्ह्यातील खासगी रुग्णालयांमध्ये उपचार घेत आहेत.

गोसावी कुटुंबातील लहान मुलांनाही स्वाइन फ्लूची लागण झाल्याने या कुटुंबातील ३ मुलांना उपचारासाठी दाखल केले आहे. गुरुवारी सीपीआरसह जिल्ह्यातील विविध रुग्णालायांमध्ये १९ रुग्णांवर उपचार सुरू होते. महिनाभरात १५५ रुग्णांवर उपचार करण्यात आले. यातील ६ रुग्णांचा अहवाल पॉझिटिव्ह होता, तर ८९ रुग्णांचा अहवाल निगेटिव्ह आला आहे, अशी माहिती जिल्हा शल्यचिकित्सक डॉ. एल. एस. पाटील यांनी दिली.

मोबाइल अॅप डाउनलोड करा आणि राहा अपडेट

पुन्हा रस्ते खोदणार

July 27, 2017, 2:30 pm

≫ Next: खांबावरून पडून वायरमन गंभीर

≪ Previous: स्वाइन फ्लूचे आठ रुग्ण दाखल

$

0

0

म. टा. प्रतिनिधी, कोल्हापूर

पंचगंगा नदी व रंकाळा तलाव प्रदूषणमुक्त करण्यासाठी कोल्हापूर शहरात तब्बल १२० किलोमीटर लांब ड्रेनेजलाइन टाकण्यात येणार आहे. शहर आणि उपनगरातील विविध भागात ड्रेनेजलाइन प्रस्तावित आहे. अमृत योजनेत ही कामे समाविष्ट असून पाणीपुरवठा विभाग आणि शहर अभियंता कार्यालयात प्रस्तावित विकासकामाबाबत समन्वयाचा अभाव आढळत आहे. अमृत योजनेंतर्गत ड्रेनेजलाइन आणि रस्ता दुरुस्ती यासाठी दोन्ही विभागांनी एकत्र येऊन नियोजन केल्यास प्रस्तावित कामांची अंमलबजावणी करताना नागरिकांना त्रास सहन करावा लागणार नाही अशा सूचना नगरसेवकांनी केल्या आहेत.

शहरातील काही भागातील रस्ते नव्याने केल्या आहेत. ड्रेनेजलाइनच्या कामासाठी या रस्त्यांची खोदाई शक्य आहे. रस्ते खुदाईमुळे पुन्हा दुरुस्तीचा प्रश्न उपस्थित होणार असल्याने पाणी पुरवठा विभाग व शहर अभियंता कार्यालयाने समन्वय ठेवत विकास कामांची अंमलबजावणी झाली पाहिजे अशी नगरसेवकांची भावना आहे. महाराष्ट्र राज्य जीवन प्राधिकरणने अमृत योजनेचा आराखडा तयार केला आहे. केंद्र, राज्य सरकार आणि महापालिका यांच्या संयुक्त विद्यमाने या योजनेची अंमलबजावणी होणार आहे.

अमृत योजनेंतर्गत शहरातंर्गत १२० किलोमीटर लांबीची ड्रेनेज लाइन, दुधाळी व कसबा बावडा सांडपाणी प्रक्रिया केंद्र परिसरात कमी क्षमतेचे दोन एसटीपी आणि शहरातील नाले अडविण्याच्या कामांचा समावेश आहे. मंजूर ७२ कोटी रुपयांच्या विकास कामांपैकी ५७ कोटी रुपयांच्या ड्रेनेज लाइनच्या कामाची निविदा प्रक्रिया राबविण्यात येत आहे.

शहर अ​भियंता कार्यालयाने मागविला नकाशा

१२० किलोमीटर लांबीची ड्रेनेजलाइनही शहर आणि उपनगरातील विविध भागात प्रस्तावित केली आहे. ई वॉर्डासह उपनगरातही ड्रेनेज लाइनच्या कामांचा समावेश आहे. दरम्यान नगरोत्थान योजना, राज्य व महापालिका अनुदानातून शहरातील विविध भागात रस्ते तयार केले आहेत. ड्रेनेज लाइन टाकताना ठिकठिकाणी रस्त्यांची खोदाई करावी लागणार आहे. ड्रेनेज लाइनसाठी खोदाई केलेल्या ठराविक जागेचीच दुरुस्ती त्या निधीतून करण्याची तरतूद आहे. या योजनेत कुठल्या प्रभागाचा समावेश आहे याची माहिती मिळावी, नकाशा सादर करावेत अशा सूचना शहर अभियंता कार्यालयाने केल्या आहेत. दोन दिवसात सल्लागार कंपनीकडून प्रस्तावित कामाचा नकाशा सादर होणार आहे.


१२० किलोमीटर

टाकावी लागणारी ड्रेनेजलाइन

७२ कोटी रुपये

पहिल्या टप्प्यातील मंजूर निधी

५७ कोटी रुपये

कामाची प्रसिद्ध केलेली निविदा

मोबाइल अॅप डाउनलोड करा आणि राहा अपडेट

खांबावरून पडून वायरमन गंभीर

July 27, 2017, 2:30 pm

≫ Next: रत्नागिरी महामार्ग धोक्यांचा

≪ Previous: पुन्हा रस्ते खोदणार

$

0

0

कोल्हापूर ः रायगड कॉलनी परिसरातील एन. टी. सरनाईक नगरात विजेच्या खांबावर दुरुस्तीचे काम करताना खाली पडल्याने महापालिकेतील वायरमन गंभीर जखमी झाले. विजय वसंतराव गायकवाड (वय ४२, रा. जगतापनगर, जोतिर्लिंग कॉलनी) असे त्यांचे नाव आहे. गुरुवारी (ता. २७) सकाळी ११ वाजण्याच्या सुमारास हा प्रकार घडला. करवीर पोलिस ठाण्यात या घटनेची नोंद झाली आहे.

एन. टी. सरनाईक नगरात गुरूवारी सकाळी वीज गेली होती, त्यामुळे परिसरातील नागरिकांनी महापालिकेच्या विद्युत विभागास फोन करून ही माहिती दिली. यानंतर प्रभारी वायरमन विजय गायकवाड आणि बबन घाटगे हे दोघे एन. टी. सरनाईक नगरात पोहोचले. गायकवाड हे २५ फूट विजेच्या खांबावर चढून दुरुस्तीचे काम करीत होते. यावेळी ते २५ फुटावरून खाली पडले. त्यांच्या पाठीस व कमरेला गंभीर दुखापत झाली आहे. खासगी वाहनातून त्यांना तातडीने सीपीआर रुग्णालयात दाखल केले. गायकवाड हे गेल्या २० वर्षापासून महापालिकेकडे वायरमन आहेत.

मोबाइल अॅप डाउनलोड करा आणि राहा अपडेट

रत्नागिरी महामार्ग धोक्यांचा

July 27, 2017, 2:30 pm

≫ Next: जिल्हा परिषदेत झाडाझडती

≪ Previous: खांबावरून पडून वायरमन गंभीर

$

0

0

Uddhav.Godase@timesgroup.com

Tweet @Uddhavg_MT

कोल्हापूर ः कोल्हापूर ते रत्नागिरी हा राष्ट्रीय महामार्ग असूनही रुंदीकरणासह मूलभूत सुविधांचा अभाव असल्याने हा मार्ग प्रवाशांसाठी जीवघेणा बनत आहे. अरूंद रस्त्यावरील वाढती वाहतूक अनेकांच्या जिवावर उठत आहे. जेमतेच वीस फूट रुंदीच्या मार्गावर बस स्टॉपलाही पुरेशी जागा नाही. शिवाय खाद्यपदार्थांसह अन्य साहित्य विक्रीच्या गाड्यांमुळे होणारी वाहतूक कोंडी आणि बेशिस्त पार्किंगमुळे कोल्हापूर ते बाघबीळ मार्ग अपघातांचा हॉट स्पॉट बनला आहे.

कोल्हापूर ते रत्नागिरी हा राष्ट्रीय महामार्ग आहे. कोल्हापूरहून जोतिबा, पन्हाळ्याकडे जाणे आणि पुढे मलकापूर, शाहूवाडीतून रत्नागिरीला जोडणारा हा मार्ग कोल्हापूर आणि कोकणातील महत्त्वाचा दुवा आहे. या मार्गाच्या रुंदीकरणाचा प्रस्ताव मंजूर झाला आहे. सार्वजनिक बांधकाम विभागाने जमीन हस्तांतरणासाठी महसूल विभागाशी पत्रव्यवहारही केला आहे. मात्र काही लोकप्रतिनिधींसह स्थानिकांच्या विरोधामुळे कोल्हापूर-रत्नागिरी मार्गाचे रुंदीकरण रखडले आहे. वाहनांची वाढलेली वर्दळ लक्षात घेता या मार्गाचे चौपदरीकरण तातडीने होणे गरजेचे आहे. गेल्या आठवड्यात झालेल्या दोन अपघातांनी मार्गाच्या रुंदीकरणाची गरज पुन्हा एकदा अधोरिखित केली आहे.

वाढत्या अपघातांच्या पार्श्वभूमीवर कोल्हापूर ते वाघबीळ मार्गाची पाहणी केल्यानंतर हा संपूर्ण मार्गच अपघातांचा सापळा बनल्याचे निदर्शनास आले. धोक्यांची सुरुवात शिवाजी पुलापासूनच होते. अरूंद पुलावरील वाढती वर्दळ, अवजड वाहनांमुळे होणारी कोंडी हा नित्याचाच प्रकार आहे. वडणगे फाट्यावर पेट्रोल पंप, हॉटेल्स, खाद्यपदार्थांच्या गाड्या, दुकाने यामुळे नागरिकांची वर्दळ वाढली आहे. यातच थेट रस्त्यावर थाटलेली हेल्मेट, टोप्या, रेनकोट विक्रीच्या दुकानांचीही गर्दी वाढली आहे. वडणगे फाटा ते आंबेवाडीपर्यंत रस्त्याकडेला तीन मंगल कार्यालये आहेत. लग्न समारंभासाठी आलेली वाहनेही या रस्त्याच्या दुतर्फा पार्क केली जातात. मुळातच जेमतेम २० फुटाचा हा रस्ता. यात दोन्ही बाजूने वाहनांच्या बेशिस्त पार्किंगमुळे उरलेल्या चिंचोळ्या जागेतून वाहनांना वाट कढून पुढे जावे लागते. आंबेवाडी ते केर्लीपर्यंत रस्त्याच्या दुतर्फा स्वीट कॉर्न, ज्यूस आणि फळ विक्रेत्यांच्या ३० ते ४० गाड्या लागतात. यातच काही हॉटेल्स, हेल्मेट आणि रेनकोट विक्रेत्यांमुळे गर्दी वाढली आहे. खरेदीसाठी थांबलेली वाहने रस्त्यावरच असतात.

डांबरी रस्त्याला लागून अवघी दोन ते तीन फुटांची साइडपट्टी आहे. दोन्ही बाजूच्या साइटपट्ट्या भरलेल्या नाहीत. अनेक ठिकाणी रस्ता खचला असून, ओबडधोबड रस्त्याचा वाहनचालकांना अंदाजच येत नाही. विशेष म्हणजे या महामार्गावर एसटीसाठी थांब्यांची व्यवस्थाच नाही. अचानक एसटी रस्त्यातच थांबते. मागून येणाऱ्या वाहनांना अचानक थांबावे लागते. त्यामुळे वाहने एकमेकांवर आदळण्याची भीती नेहमीच असते. अरूंद रस्ता आणि दोन्ही बाजूने सतत वाहनांची वर्दळ सुरू असल्याने ओव्हरटेकिंग म्हणजे अपघात हे समीकरणच बनले आहे.

रूंदीकरण रखडले

रत्नागिरी ते कोल्हापूर या मार्गाच्या रूंदीकरणाला सरकारने यापूर्वीच परवानगी दिली आहे. सार्वजनिक बांधकाम विभागाने जमीन हस्तांतरणासाठी प्रयत्न सुरू केले आहेत. जमिनीची मोजणीही सुरू आहे. मात्र काही लोकप्रतिनिधी आणि शेतकऱ्यांनी जमीन देण्यास विरोध दर्शवला आहे. विरोधामुळे रूंदीकरणाचे काम रखडले आहे. शेतकऱ्यांशी चर्चा करून तोडगा काढण्यासाठी जिल्हा प्रशासनाला पुढाकार घ्यावा लागणार आहे. अन्यथा या मार्गावरील प्रवास अधिकच धोकादायक ठरणार आहे.

अपघातांनी दिला इशारा

शनिवारी (ता. २२) रात्री नऊच्या सुमारास रेडेडोह येथे रस्त्यावरून थेट पुराच्या पाण्यात कार कोसळली. नशीब बलवत्तर म्हणूनच दोन्ही प्रवाशी बचावले. मंगळवारी (ता. २५) केर्लीजवळ गॅस सिलिंडरची वाहतूक करणाऱ्या भरधाव ट्रकने एसटीला धडक दिली. या अपघातात एसटी ड्रायव्हरचा जागीच मृत्यू झाला, तर १८ प्रवाशी जखमी झाले. या दोन घटना प्रातिनिधिक आहेत. या अपघातांनी भविष्यातील मोठ्या धोक्यांचा इशाराच दिला आहे.


बॅरिकेड्सचा अभाव

पावसाळ्यात शिवाजी पुलापासून ते आसुर्ले-पोर्ले फाट्यापर्यंत दुतर्फा पाणी साचते. पुराच्या पाण्यामुळे वाहनचालकांचे लक्ष विचलीत होते. रस्त्यावर पाणी येताच नेमका मार्ग कुठे आहे तेच समजत नाही. रात्रीच्या वेळी तर हा प्रवास अधिकच धोक्याचा ठरतो. पाण्याचा ओघ वाढल्यास वाहने वाहून जाण्याचाही धोका असल्याने रस्त्याच्या दोन्ही बाजूने बॅरिकेडिंगची गरज आहे.



कोल्हापूर ते वाघबीळ या मार्गाला दुसरा कोणताच पर्याय नाही. जोतिबा, पन्हाळा यासह कोकणाकडे जाणारी वाहतूक याच मार्गावर असते. त्यामुळे हा मार्ग प्रशस्त आसावा. धोकादायक झाडे हटवून तातडीने रूंदीकरण करावे. एखादा अपघात झाल्यानंतर काही काळ चर्चा होते आणि पुन्हा याकडे दुर्लक्ष होते. जिल्हा प्रशासनाने रस्ता रुंदीकरणासाठी प्रयत्न करावेत.

सागर पाटील, वाहनधारक

मोबाइल अॅप डाउनलोड करा आणि राहा अपडेट