जिल्हा परिषदेतील कार्यालयीन अभिलेख वर्गीकरणाचा आढावा घेण्यासाठी पुणे विभागचे सहायक आयुक्त विलास जाधव, मुख्य कार्यकारी अधिकारी (सीईओ) डॉ. कुणाल खेमनार यांनी गुरुवारी विविध विभागांना भेट दिली. यावेळी कामात हलगर्जीपणा झालेल्या विभागची झाडाझडती घेतली. अभिलेख वर्गीकरणाचे काम काटेकोरपणे न केल्याचे निदर्शनास आल्यामुळे प्राथमिक शिक्षण विभागातील वरिष्ठ सहायक लिपिक विजय माहिते, माध्यमिक शिक्षण विभागातील राजू घोटणे यांच्यावर कारवाई करण्याचा आदेश दिला.
जिल्हा परिषदमधील सर्वच विभागात कार्यालय अभिलेख वर्गीकरणाचे काम आठ दिवसापासून युद्धपातळीवर सुरू आहे. ३१ जुलैपासून हे काम करण्याचे आदेश विभागीय आयुक्तांनी दिले आहेत. त्यामुळे दैनंदिन कामकाज बाजूला सारून सर्व अधिकारी, कर्मचारी अभिलेख वर्गीकरणाचे कामात व्यस्त आहेत. सहा प्रकारे दप्तर ठेवणे, फायलिंगचे वर्गीकरण करून वहित विवरण नोंद करणे, कामांची प्रतीक्षा यादी तयार करणे, प्रलंबित कामांची माहिती संकलित करणे अशी कामे केली जात आहेत. त्यामुळे गेल्या दहा वर्षापासून धूळ खात पडलेल्या अनेक फायली बाहेर काढण्यात आल्या आहेत. सर्वाधिक फायलिंचा ढिग माध्यमिक विभागात पडला आहे.
अभिलेख वर्गीकरण कामाचा आढावा घेण्यासाठी बुधवारपासून सहाय्यक आयुक्त जाधव कोल्हापूर दौऱ्यावर आलेत. गुरूवारी सकाळी बाराच्या सुमारास ते व सीईओ डॉ. खेमनार, अतिरिक्त मुख्य कार्यकारी अधिकारी इंद्रजित देशमुख यांनी प्राथमिक, माध्यमिक, ग्रामीण विकास यंत्रणा, समाजकल्याण, महिला व बालकल्याण विभागची तपासणी केली. त्यावेळी चांगले काम केलेल्या कर्मचाऱ्यांचे कौतुक केले. कामात दिरंगाई, दूर्लक्ष केलेल्यांची चांगलीच झडती घेतली. विभागप्रमुखांना लक्ष देण्याची सूचना दिली. अचानकपणे कोणत्याही विभागात जाऊन ते पाहणी करीत असल्याने सर्व अधिकारी, कर्मचारी सतर्क झाले.
प्राथमिक विभागची तपासणी करताना लिपीक मोहिते यांनी अभिलेख वर्गीकरणाच्या कामाकडे दूर्लक्ष केल्याचे निदर्शनास आले. अनेक त्रुटी आढळल्या. ‘माध्यमिक’मधील घोटणे यांचाही कामात हलगर्जीपणा आढळला. त्यामुळे या दोघांही कर्मचाऱ्यांची दप्तर तपासणी करून कारवाई करण्याचा आदेश सीईओ डॉ. खेमनार यांनी दिला.
‘शिक्षण’मध्ये गलथानपणा
प्राथमिक, माध्यमिक शिक्षण विभागाबद्दल प्रचंड तक्रारी आहेत. दोन्ही विभागवर गलथानपणाचा वारंवार आरोप होतो. सहायक आयुक्त जाधव यांच्या तपासणीतही या दोन विभागांतील कार्यालयीन अभिलेख वर्गीकरण काम असमाधानकारक असल्याचे स्पष्ट झाले. तेथील दोन कर्मचाऱ्यांवर कारवाई करण्याचेही आदेश दिले. त्यामुळे शिक्षण विभागमधील गलथानपणा पुन्हा एकदा चव्हाट्यावर आला.
उपशिक्षणाधिकाऱ्यांनी नागरिकांना हाकलले
माध्यमिक शिक्षण विभागात नेहमीप्रमाणे अभ्यगतांची गर्दी होती. ती गर्दी पाहून नव्याने रूजू झालेल्या एका उपशिक्षणाधिकाऱ्यांचे पित्त खवळले. ते खुर्ची सोडून विभागात आले. त्यांनी कक्ष अधिकाऱ्यांना ‘सर्व अभ्यगतांना बाहेर काढा. दरवाजा बंद करून घ्या. आमचे कर्मचारी निलंबित होत आहेत. बाहेरच्यांना का आत घेत आहात?’ असे सांगितले. शेवटी त्यांनी स्वतःच अभ्यगतांना बाहेर काढले. त्यावेळी एकाने त्यांच्याशी हुज्जत घालल्याने ते नरमले.
अभिलेख वर्गीकरणाचे कामकाज ३१ जुलैपर्यंत पूर्ण करण्याचा आदेश आयुक्तांनी दिला आहे. त्यानुसार काम सुरू आहे. त्याचा आढावा घेण्यासाठी विविध विभागास भेट दिली. त्यावेळी कामात हलगर्जीपणा केल्याचे दिसून आल्याने माध्यमिक, प्राथमिक शिक्षण विभागातील प्रत्येकी एक अशा दोन कर्मचाऱ्यांवर कारवाई करण्याचे आदेश दिले आहेत.
- डॉ. कुणाल खेमनार, सीईओ
मोबाइल अॅप डाउनलोड करा आणि राहा अपडेट
