उद्योजकाला खंडणी मागितल्याप्रकरणी खासदार उदयनराजे भोसले यांचा अटकपूर्व जामीन अर्ज मुंबई उच्च न्यायालयाने फेटाळल्यानंतर उदयनराजे मंगळवारी स्वतःहून सातारा शहर पोलिस ठाण्यात हजर झाले. त्यांना साताऱ्याचे अतिरिक्त जिल्हा सत्र न्यायाधीश बी. ए. ढोलकिया यांनी सात दिवसांसाठी जामीन मंजूर केला.
उदयनराजेंना अटक होण्याच्या शक्यतेमुळे हे प्रकरण संवेदनशील झाले होते. मात्र, कायद्याचा मान राखत वकिलांनाही कल्पना न देता उदयनराजे मंगळवारी सकाळी सातारा शहर पोलिस ठाण्यात हजर झाले. वैद्यकीय तपासणी करून त्यांना कोर्टात हजर केले असता कोर्टाने न्यायालयीन कोठडी सुनावली. त्यानंतर त्यांच्या वकिलांच्या वतीने जामिनासाठी अर्ज करण्यात आला. या प्रकरणी पुढील सुनावणी २ ऑगस्टला होणार आहे.
उदयनराजेंच्या अटकेची बातमी कळताच सातारा शहरात बंद पाळण्यात आला. काही कार्यकर्त्यांनी दोन एसटी बसची तोडफोड केल्याने तणाव निर्माण झाला; परंतु, पोलिसांची पूर्वतयारी असल्याने शहरात सर्वत्र तातडीने बंदोबस्त तैनात करण्यात आला. त्यामुळे किरकोळ अपवाद वगळता अनुचित प्रकार घडला नाही. संपूर्ण दिवसभर शहरात तणावाची परिस्थिती होती. खासदार उदयनराजे भोसले यांनीही कार्यकर्त्यांनी कायद्याचा आदर राखावा, संयम राखावा, असे आवाहन केले होते.
उदयनराजेंना जामीन मंजूर झाल्यानंतर साताऱ्यात ठिकठिकाणी समर्थकांनी फटाके वाजवून या निर्णयाचे स्वागत केले. कोर्टातून बाहेर पडल्यानंतर उदयनराजे आणि दमयंतीराजे यांनी पोवई नाक्यावर येऊन छत्रपती शिवाजी महाराजांच्या पुतळ्यास पुष्पहार अर्पण केला. नाक्यावर समर्थकांनी मोठा जल्लोष केला. खासदार उदयनराजेंनी नेहमीची स्टाईल केल्याने जल्लोष अधिकच वाढला.
पोलिस अधिकाऱ्याशी गळाभेट
शरण येण्यासाठी पोलिस ठाण्यात गेलेले खासदार उदयनराजे यांची पोलिस निरीक्षक सारंगकर यांनी गळाभेट घेतली. अटकेसाठी आलेल्या आरोपीची पोलिस अधिकाऱ्याने गळाभेट घेतल्याने साऱ्यांच्यात भुवया उंचावल्या. अटकेसाठी उदयनराजेंनी धक्कातंत्र वापरले. कोणालाही कल्पना न देता ते थेट सकाळी सव्वा आठ वाजता शहर पोलिस ठाण्यात गेले. त्यांच्याबरोबर वकीलही नव्हते. अटक आणि वैद्यकीय तपासणी झाल्यानंतर उदयनराजेंचे वकील धैर्यशील पाटील यांना कळविण्यात आले.
पोलिसांनीच केला जामिनाचा मार्ग मोकळा
या प्रकारच्या प्रकरणात आरोपीला अटक झाल्यास कोर्टात दुपारी हजर करण्यात येते. परंतु कायदा आणि सुव्यवस्थेचा प्रश्न लक्षात घेता या प्रकरणी तातडीने सुनावणी करण्याची विनंती अॅड. धैर्यशील पाटील यांनी पोलिसांना केली. त्यानुसार पोलिसांनी विनंती केल्यानंतर अकराच्या सुमारास उदयनराजेंना न्यायालयात हजर करण्यात आले. तेथे सुमारे पाच हजार कार्यकर्ते उपस्थित होते. पोलिसांनी न्यायालयीन कोठडीची मागणी केल्यामुळे उदयनराजेंचा जामिनासाठी अर्ज करण्याचा मार्ग मोकळा झाला. पोलिसांनी पोलिस कोठडीची मागणी केली असती तर त्यांना जामिनासाठी अर्ज करता आला नसता.
मोबाइल अॅप डाउनलोड करा आणि राहा अपडेट
