पंचगंगेचे पाणी जामदार क्लबपर्यंत

July 21, 2017, 2:30 pm

≫ Next: आत्महत्येच्या धमकीने तारांबळ

≪ Previous: यशासाठी सुसंस्काराची जोड आवश्यक

$

0

0

म. टा. प्रतिनिधी, कोल्हापूर

गेले चार दिवस सुरू असलेल्या पावसाचा शुक्रवारीही जोर कायम होता. लक्ष्मीपुरी, शाहुपूरी, व्हीनस कॉर्नर परिसरात पाणी साचले. जयंती नाल्याच्या पाण्याची फूग वाढत असून आणखी एक दिवस पावसाचे प्रमाण कायम राहिल्यास पाणी शहरात शिरण्याची शक्यात आहे. रेडेडोह फुटल्याने पंचगंगा पुलावरील वाहतूकही सायंकाळी सहानंतर बंद करण्यात आली. तसेच रात्री उशिरा शियेमार्गे होणारी वाहतूकही बंद करण्यात आली.

पंचगंगा नदीचा पूर पाहण्यासाठी वाहनधारकांची आणि बघ्याची शिवाजी पुलावर मोठी गर्दी झाली होती. पंचगंगेची पाणी पातळी ४०.४ फुटावर गेले असून पाणी जामदार क्लबपर्यंत आले.

गुरुवारी पंचगंगेचे पाणी शुक्रवार पेठेतील गायकवाड वाड्यापर्यंत आले. या पाण्यातूनच धोकादायक पद्धतीने वाहतूक सुरू होती. पंचगंगेचे पाणी जामदार क्लबपर्यंत आल्याने या ठिकाणी बॅरिकेट लावून हा रस्ता वाहतुकीसाठी बंद करण्यात आला. तरीही काही वाहनधारकांनी या पाण्यातून मार्ग काढण्याचा प्रयत्न केला. त्यावेळी पोलिस आणि वाहनधारकांच्यात वाद झाला. पंचगंगेचे पाणी शुक्रवारी पेठ, दुधाळी, कसबा बावडा, शिये परिसरात पसरले आहे. दुधाळी येथील सांडपाणी प्रक्रिया केंद्रापर्यंत पाण्याची पातळी वाढली आहे. दुधाळी येथून लक्षतीर्थ वसाहतीकडे जाणाऱ्या मार्गांवर पाणी आल्याने हा मार्गही वाहतुकीसाठी बंद केला आहे. जयंती नाल्याचा प्रवाहाचा वेग वाढला असून रंकाळा, कळंबा, राजाराम तलावाच्या पाणी पातळी वाढली आहे. रेडेडोह फुटल्याने कोल्हापूर-पन्हाळा मार्गावरील वाहतूक शिवाजी पुलावर बॅरिकेट लावून बंद करण्यात आली. त्यामुळे काही काळ वाहतूक कोंडी झाली. गर्दीमुळे वाहनांची रांग तोरस्कर चौकापर्यंत झाली. सुमारे एक तास या पुलावरील वाहतूक सुरू करण्यात आली. रात्री नऊनंतर पुन्हा ही वाहतूक बंद करण्यात आली. दसरा चौकातून शियेकडे जाणारी वाहतूक सुरू राहिली. मात्र रात्री नऊ नंतर शिये टोल नाका परिसरात पाणी आल्याने एका बाजूने वाहतूक सुरू करण्यात आली.

जिल्ह्यात पावसाचा जोर कायम असून शाहूवाडी, राधानगरी, गगनबावडा, आजरा आणि चंदगड तालुक्यात अतिवृष्टी झाली. गगनबावड्यात ११२ मिलिमीटर पावसाची नोंद झाली. शाहुवाडीत ६७ राधानगरीत ६६, आजरा ६८, चंदगडमध्ये ८१ मिलिमीटर पावसाची नोंद झाली. बारा तालुक्यात सरासरी ६१६.३६ मिलिमीटर पावसाची नोंद झाली. धरणक्षेत्रात दिवसभर पावसाचा जोर कायम राहिला.

००

धरणसाठी असा (टीएमसीमध्ये)

राधानगरी ७.३६

तुळशी २.६२

वारणा २४.८७

दूधगंगा १५.७१

कासारी २.५६

कडवी २.१२

कुंभी २.२९

पाटगांव २.६९

चिकोत्रा ०.३९

चित्री १.११

जंगमहट्टी ०.९९

मोबाइल अॅप डाउनलोड करा आणि राहा अपडेट

---

आत्महत्येच्या धमकीने तारांबळ

July 21, 2017, 2:30 pm

≫ Next: पुजारी गाभाऱ्याचे हक्कदार नाहीत

≪ Previous: पंचगंगेचे पाणी जामदार क्लबपर्यंत

$

0

0

म. टा. प्रतिनिधी, कोल्हापूर

वारणानगर येथील शिक्षण संस्थेच्या इमारतीतून ९ कोटी १३ लाख रुपये लंपास केल्याप्रकरणी संगलीतील सात पोलिसांवर गुन्हे दाखल आहेत. याशिवाय चोरटा मैनुद्दीन मुल्ला याच्याकडून चोरीच्या पैशातून बुलेट भेट घेणाऱ्या पोलिसांवर कारवाई सुरू आहे. संशयित पोलिस सापडत चौकशीसाठी बोलवलेल्या पोलिसांच्या वडिलाने शुक्रवारी पोलिस अधीक्षक कार्यालयाच्या पहिल्या मजल्यावर गोंधळ घातला. वारंवार चौकशीसाठी बोलवून पोलिस त्रास देत असल्याचा आरोप करीत पहिल्या मजल्यावरून उडी घेऊन आत्महत्या करण्याचा इशारा दिल्याने पोलिसांची तारांबळ उडाली.

चोरटा मैनुद्दीन मुल्ला याच्याकडील चोरीच्या पैशातून बुलेट भेट घेतल्याच्या आरोपावरून सांगलीतील एका पोलिसाची विभागीय चौकशी सुरू आहे, तर दुसऱ्या पोलिसास निलंबित केले आहे. याबाबत कोल्हापूर पोलिसांकडून चौकशीसाठी संशयितांच्या नातेवाईकांना वारंवार पोलिस अधीक्षक कार्यालयात बोलवले जात आहे. शुक्रवारी चौकशीसाठी आलेल्या संशयित पोलिसाच्या वडिलांने पोलिस अधिकाऱ्यांची भेट घेऊन याप्रकरणी नाहक त्रास देऊ नका, अशा मागणीचे निवेदन दिले. चौकशीच्या नावाखाली पोलिस विनाकारण त्रास देत असल्याचा आरोपही या नातेवाईकांनी केला आहे. ‘ज्यांनी गुन्हा केला त्यांना अटक करून कारवाई करा. आम्हाला त्रास दिल्यास पोलिस अधीक्षक कार्यालयातच आत्महत्या करू,’ असा इशारा संशयितांच्या वडिलाने दिला. काही वेळातच त्यांनी पहिल्या मजल्यावरून उडी घेण्यासाठी धाव घेतली असता, पोलिसांनी त्यांना रोखले. वरिष्ठ अधिकाऱ्यांनी त्यांची समजूत काढल्यानंतर अखेर ते निघून गेले.या प्रकाराने पोलिस अधीक्षक कार्यालयात काही काळ तणावाचे वातावरण निर्माण झाले होते.

मोबाइल अॅप डाउनलोड करा आणि राहा अपडेट

पुजारी गाभाऱ्याचे हक्कदार नाहीत

July 21, 2017, 2:30 pm

≫ Next: उदयनराजेंच्या अटकेचा निर्णय तपासअधिकाऱ्यांचा’

≪ Previous: आत्महत्येच्या धमकीने तारांबळ

$

0

0

म. टा. प्रतिनिधी, कोल्हापूर

अंबाबाई मंदिरात दानपेटी, गाभाऱ्याचा हक्क अशा अनेक कारणांसाठी पूर्वीपासून पुजाऱ्यांनीच देवस्थान समितीच्या विरोधात वेगवेगळ्या याचिका दाखल केल्या आहेत. २००६ मध्ये जिल्हा सत्र न्यायालयाने दिलेल्या सूचनेनुसार पुजाऱ्यांना गाभाऱ्यातील उत्पन्न घेण्यास हरकत नाही, पण तो त्यांचा हक्क ठरत नसल्याचे न्यायालयाने स्पष्ट केले आहे. पण, अजूनही हे प्रकरण न्यायप्रविष्ठ असून मंदिर देवस्थान समितीच्या अखत्यारित आहे. पुजारी पूजा-अर्चा करण्याचे कर्तव्य करत असल्यामुळे गाभाऱ्यावर त्यांचा हक्क असू शकत नाही, असा दावा देवस्थान समितीने जिल्हाधिकारी अविनाश सुभेदार यांना दिलेल्या ६२५ पानी अहवालात म्हटले आहे.

देवस्थान समिती कधीही पुजाऱ्यांच्या कर्तव्यामध्ये अडथळा आणत नाही. उलट पुजाऱ्यांनी नेगवी समितीला वज्रलेप करण्यापासून रोखणे, मूर्तीची व्यवस्थ‌ित निगा न राखणे, गाभाऱ्यात गुटखा खाणे, भक्ताने दान केलेली सोन्याची वस्तू समितीकडे जमा न करणे अशा अनेक प्रकरणातून श्रीपुजकांचा बेशीस्तपणा व गैरवर्तन दिसून येत आहे. याबाबातच्या लेखी तक्रारी, पोलिस तक्रारींचे पुरावे समितीने सादर केले आहेत.

यावेळी २०१४ सालातील तत्कालीन जिल्हाधिकारी तथा देवस्थान समिती अध्यक्ष राजाराम माने यांच्या अध्यक्षतेखाली केलेला देवस्थान समितीच्या ठरावाची प्रतही देण्यात आली. त्यामध्ये पंढरपूरच्या धर्तीवर अंबाबाई मंदिरातही सरकारी पुजारी नेमावेत, अशी मागणी करण्यात आली आहे.

दानपेटीतील ५२ कोटी पडून

गेल्या अनेक वर्षांपासून अंबाबाई मंदिरातील दानपेट्याबाबत पुजाऱ्यांनी याचिका दाखल केल्यामुळे भाविकांकडून आलेले ५२ कोटीचे दान पडून आहे. काही दानपेट्यांचा निकाल न्यायप्रविष्ठ असल्यामुळे ५२ कोटीचा निधी वापरता येत नाही, असे अहवालात म्हटले आहे.

अंबाबाई मंदिर प्रकरणी ६ खटले प्रलंबित

श्री अंबाबाई मंदिरातील गाभाऱ्याच्या आतील येणारे उत्पन्नाबाबत १९९५ मध्ये संजीव व वसंत मुनीश्वर आणि प्रभावती ठाणेकर या पुजाऱ्यांनी याचिका दाखल केली आहे. तसेच १९८१ मध्ये एक भक्ताने देवीला सोन्याचे डोळे दान केले होते. ते एका पुजाऱ्याने चोरल्याची तक्रार, २००० मध्ये नवरात्रोत्सवाआधी पुजाऱ्यांनी मूर्तीचे घासकाम केले म्हणून जुना राजवाड्यात तक्रार करण्यात आली आहे. तसेच २००२ ला मातृलिंग येथील पादुका पुजाऱ्यांनी हलविल्या, १९९७ मूर्तीची झीज केली तसेच मूर्तीला ३ किलो एमसील, लोखंडी पट्ट्या वापरुन मूर्तीच्या देखभालीकडे दुर्लक्ष आणि २०१७ ला अंबाबाईला घागरा-चोली परिधान केल्याप्रकरणी गुन्हा दाखल करण्यात आला आहे, याचाही उल्लेख अहवालात केला आहे.

मानाची साडीही नेसविली जात नाही

गेल्या अनेक वर्षांपासून देवस्थान समितीकडून अंबाबाई, महाकाली आणि सरस्वती देवीला मानाची साडी दिली जाते. मात्र पुजारी ते केवळ देवीच्या पायाला लावून परत करतात. मात्र भाविकांनी दिलेल्या साड्या देवीला परिधान केल्या जात असल्याचे समितीने अहवालात नमून केले आहे.

पुजेचा सर्व खर्च समितीचा

भक्तांना देवीचे व्यवस्थ‌ित दर्शन व्हावे या उद्देशाने देवस्थान समिती कार्य करत आहे. मंदिरात भाविकांनी अर्पण केलेल्या दानातून समिती मंदिरामध्ये सुविधा, अन्य नियमित खर्च करत असते. मंदिरातील दिवाबत्ती तसेच पूजेच्या साहित्यापर्यंत सर्व खर्च समिती करते. हा सर्व खर्च भाविकांनी दिलेल्या दानावर चालतो. त्यासाठी ठेवलेल्या दानपेट्यांवरून किंवा बोर्ड लावण्यावरून पुजारी मंडळी देवस्थानबरोबर वाद घालतात. असा वाद घालणाऱ्या व गाभाऱ्यातील उत्पन्न मिळवणाऱ्या पुजाऱ्यांनी मंदिरात कोणत्या सुविधा उपलब्ध केल्या हे स्पष्ट करावे, असे आव्हानही समितीने दिले आहे.

मोबाइल अॅप डाउनलोड करा आणि राहा अपडेट

उदयनराजेंच्या अटकेचा निर्णय तपासअधिकाऱ्यांचा’

July 21, 2017, 2:30 pm

≫ Next: पंचगंगा धोका पातळीकडे

≪ Previous: पुजारी गाभाऱ्याचे हक्कदार नाहीत

$

0

0

म. टा. प्रतिनिधी, कोल्हापूर

‘खंडणीसाठी उद्योजकाला मारहाण करून धमकावल्याप्रकरणी खासदार उदयनराजे यांच्यावर गुन्हा दाखल आहे. मुंबई हायकोर्टाने खासदार उदयनराजे यांचा अटकपूर्व जामीनअर्ज फेटाळल्याने त्यांच्या अटकेची चर्चा सुरू आहे. उदयनराजे यांच्या अटकेचा निर्णय तपास अधिकारी सातारा जिल्हा पोलिस अधीक्षक संदीप पाटील घेतील,’ अशी माहिती विशेष पोलिस महानिरीक्षक विश्वास नांगरे-पाटील यांनी दिली.

खासदार उदयनराजे यांच्यावर खंडणीसाठी व्यापाऱ्याला धमकावल्याचा गुन्हा सातारा शहर पोलिस ठाण्यात नोंद आहे. या गुन्ह्यातील इतर १० संशयितांना यापूर्वीच अटक झाली आहे. जिल्हा कोर्टाने अटकपूर्व जामीन नाकारल्यानंतर उदयनराजे यांनी मुंबई हायकोर्टात धाव घेतली होती. हायकोर्टाने उदयनराजे यांचा जामीन अर्ज फेटाळल्यानंतर वेळप्रसंगी उदयनराजे यांना अटक करणार असल्याचे वक्तव्य आयजी नांगरे-पाटील यांनी केले होते. याबाबत शुक्रवारी नांगरे-पाटील यांना विचारणा केली असता ते म्हणाले, ‘खासदार उदयनराजे यांच्या अटकेचा निर्णय तपास अधिकारी पोलिस अधीक्षक संदीप पाटील घेतील. या प्रकरणी तपास अधिकाऱ्यांशी वेळोवेळी चर्चा केली जात असून, तपास अधिकारी योग्य वेळी योग्य निर्णय घेतील.’

मोबाइल अॅप डाउनलोड करा आणि राहा अपडेट

पंचगंगा धोका पातळीकडे

July 21, 2017, 2:30 pm

≫ Next: मंदिरात सरकारी पुजारी नेमा

≪ Previous: उदयनराजेंच्या अटकेचा निर्णय तपासअधिकाऱ्यांचा’

$

0

0

म. टा. प्रतिनिधी, कोल्हापूर

धरणक्षेत्रात आणि शहरातही शुक्रवारी दमदार पाऊस सुरू राहिल्याने पंचगंगा नदीने इशारा पातळी ओलांडली. नदीची पाणीपातळी शुक्रवारी रात्रीपर्यंत ४०.५ फूटांपर्यंत पोहोचली. आता काही तासांत पाणी धोकापातळी गाठण्याची शक्यता आहे. धोकादायक पातळी ४३ फूटावर आहे. नदी इशारा पातळीवरून वाहत असल्याने पाणी पूररेषेपर्यंत पोहोचले. त्यामुळे ‘रेडेडोह’ फुटला. पाणी कोल्हापूर-रत्नागिरी रस्त्यावर आल्याने सायंकाळी साडेपाच वाजल्यानंतर शिवाजी पुलावरून कोल्हापूर-पन्हाळा मार्गावरील वाहतूक बंद करण्यात आली. दरम्यान, कळे, मरळी, लोंघे, मांडुकली येथे पाणी आल्याने कोल्हापूर-गगनबावडा रस्ता बंद झाला. या दोन्ही मार्गावरील कोकणात जाणारी वाहतूक पर्यायी मार्गे वळविली आहे. जिल्हा प्रशासनाने हायअलर्ट जाहीर केला असून जिल्हाधिकारी अविनाश सुभेदार यांनी शिवाजी पुलावरील वाहतूक बंद केल्याची घोषणा रात्री उशीरा केली.

धरण क्षेत्रातील दमदार पावसाने राधानगरी धरण ९० टक्के भरले आहे. जिल्ह्यातील ८२ बंधारे पाण्याखाली असून ९ राज्यमार्ग, २० प्रमुख जिल्हामार्ग, ग्रामीण ४ आणि इतर जिल्हामार्ग ११ बंद झाले आहेत. जिल्ह्यात पावसामुळे जनजीवन विस्कळीत झाले असून सुमारे १५० गावांचा संपर्क तुटला आहे. संततधार पावसाने नद्यांच्या पाणीपातळीत झपाट्याने वाढ होत आहे. राधानगरी धरणातून २३०० क्युसेक पाण्याचा विसर्ग वाढविण्यात आला आहे. अतिवृष्टी आणि धरणातील विसर्गामुळे नद्यांच्या पाणीपातळीत दर तासाला एक इंचाची वाढ होत आहे. जिल्ह्यातील दूधगंगा, वेदगंगा, कुंभी, कासारी, भोगावती, तुळशी या नद्यांचीही पाणीपातळी झपाट्याने वाढली. गुरूवारी रात्री पंचगंगा नदीचे पाणी इशारा पातळीवर होते. शुक्रवारी सकाळी नऊ वाजल्यापासून त्यात झपाट्याने वाढ झाली.

पंचगंगा नदीचे पाणी विस्तारल्याने प्रयाग चिखली येथील दत्त मंदिर, गणेश मंदिर, कार्तिक स्वामी, महादेव मंदिरात पाणी शिरले. चिखली ते वडणगे मार्गावरही पाणी आले. आता चिखली-आंबेवाडी मार्ग बंद होण्याची शक्यता आहे. दरम्यान गावांतील पूरस्थितीची दक्षता घेऊन काही काही कुटुंबे सोनतळी येथील पुनर्वसन वसाहतीत स्थलांतरित करण्यात आली. आंबेवाडी, वरणगे, पाडळी, केर्ली, शिंगणापूर, हणमंतवाडी गावांतही पूरस्थिती निर्माण झाली आहे. रात्री उशीरा कोल्हापूर ते शिये मार्गावर डाव्या बाजूला पाणी आले. त्यामुळे एका बाजूने वाहतूक राहिली. या मार्गावर पाणी वाढल्यास कोल्हापूर ते शिये मार्गावरील वाहतूक बंद होण्याची शक्यता आहे. हा मार्ग बंद झाल्यास पन्हाळा, रत्नागिरीकडे जाणारी वाहतूक पुणे-बंगळुरू राष्ट्रीय महामार्गावरून वळविली जाणार आहे. जिल्ह्यात पावसाचा जोर कायम राहिला. राधानगरी धरणातून सुमारे २५०० क्युसेक पाण्याचा विसर्ग सुरू राहिला.

आपत्तकालीन यंत्रणा सज्ज

जिल्ह्यात पूरस्थिती निर्माण झाल्याने जिल्हा आपत्ती व्यवस्थापन सज्ज झाले आहे. जिल्हा आपत्ती व्यवस्थापन अधिकारी दिनकर कांबळे यांच्या मार्गदर्शनाखाली पथकाने, शाहुपूरी, उत्तेश्वर पेठ, कसबा बावडा परिसराला भेट दिली. शासकीय विश्रामगृहात दहा जणांची विशेष टीमही तयार आहे. ही टीम स्पीड बोट, लाइफ जॅकेट, रिंगसह सज्ज आहे. जिल्हा परिषद, महापालिका प्रशासनाने सज्ज झाले आहे.

००

राधानगरी धरण ९० टक्के भरले, २५०० क्युसेक विसर्ग

कोल्हापूर- पन्हाळा मार्गावर पाणी आले

प्रयाग चिखली गावाला पुराच्या पाण्याने वेढले, मंदिरांत पाणी

नदीकाठच्या गावांना सतर्कतेचा इशारा

आंबेवाडी, वरणगे, पाडळी, केर्ली, शिंगणापूर, हणमंतवाडी गावातही पूरस्थिती

रात्री उशीरा कोल्हापूर ते शिये मार्गावरील डाव्या बाजूला पाणी

कोल्हापूर- गगनबावडा मार्गावर पाण्यात ४ लक्झरी बस अडकल्या

राधानगरी धरण ९० टक्के भरले

जिल्ह्यातील ८२ बंधारे पाण्याखाली

९ राज्यमार्ग, २० जिल्हामार्ग, ४ ग्रामीण, ११ अन्य जिल्हामार्ग बंद

मोबाइल अॅप डाउनलोड करा आणि राहा अपडेट

मंदिरात सरकारी पुजारी नेमा

July 21, 2017, 2:30 pm

≫ Next: विद्यार्थिनीला पाठवले अश्लील मेसेज

≪ Previous: पंचगंगा धोका पातळीकडे

$

0

0

म. टा. प्रतिनिधी, कोल्हापूर

करवीरनिवासिनी अंबाबाई मंदिरातील गाभाऱ्यावर पुजाऱ्यांचा हक्क नाही. त्यामुळे मंदिरात पंढरपूरच्या धर्तीवर सरकारी पुजारी नेमावेत अशी भूमिका शुक्रवारी पश्चिम महाराष्ट्र देवस्थान व्यवस्थापन समितीने जिल्हाधिकारी अविनाश सुभेदार यांच्यासमोर मांडली. पुजाऱ्यांचा मंदिराच्या गाभाऱ्यावर हक्क नसल्याबाबतचा ६२५ पानी अहवाल सादर करण्यात आला. दरम्यान, श्री करवीर निवासिनी अंबाबाई हक्कदार श्रीपूजक मंडळानेही मंदिरातील पूजेबाबत आपला हक्क असल्याचे २५० पानी पुरावे सादर केले.

गेल्या दीड महिन्यांपासून अंबाबाई मंदिरातील पुजारी हटाव मोहीम दिवसेंदिवस तीव्र झाली आहे. मोहिमेत पुजारी हटाओ संघर्ष समितीच्यावतीने वेगवेगळ्या टप्प्यांवर आंदोलन सुरू केले आहे. गेल्या काही दिवसांपासून लोकप्रतिनिधींना भेटून सरकारी पुजारी नेमण्याची मागणी केली. जिल्हा परिषद आणि महापालिकेच्या सभेत पुजारी हटाव ठराव एकमताने मंजूर करण्यात आला. दोन दिवसांपूर्वी जिल्हाधिकाऱ्यांनी सुनावणीवेळी तोंडी माहिती सांगणाऱ्यां पुजाऱ्यांना लेखी पुरावे सादर करण्याच्या सूचना केल्या होत्या. त्यानुसार आज देवस्थान समिती आणि श्रीपूजक मंडळाने पुरावे जिल्हाधिकाऱ्यांसमोर मांडले.

देवस्थान समितीचे सचिव विजय पोवार यांनी सांगितले की, ‘जिल्हाधिकाऱ्यांच्या सुचनेप्रमाणे देवस्थान समितीच्या स्थापनेपासून आजअखेरची कागदपत्रे, पुरावे सादर करण्यात आले आहेत. त्यात देवस्थान समितीशी पुजाऱ्यांच्या झालेल्या न्यायालयीन खटल्यांचाही समावेश आहे. पुजाऱ्यांच्या गैरवर्तनाबदल भाविकांनी समितीकडे केलेल्या तक्रारी, समितीच्या सदस्यांबाबतच्या तक्रारी, १९४५ ते १९५५ पर्यंतच्या देवस्थानच्या कंट्रोलींग नोट (व्यवस्थापन कागदपत्रे) यांसारखे माहितीजन्य पुराव्याचे अहवाल सादर करण्यात आले आहेत.’

देवस्थान समिती सदस्य शिवाजीराव जाधव, संगिता खाडे, प्रमोद पाटील, बी. एन. पाटील, शिवाजीराव साळवी, अभियंता सुदेश देशपांडे, व्यवस्थापक धनाजी जाधव आदींसह समितीचे अधिकारी उपस्थित होते.

पश्चिम महाराष्ट्र देवस्थान समितीने ६२५ पानी अहवाल सादर केला आहे. त्यात पुजाऱ्यांविरोधातील तक्रारी, पुजाऱ्यांनी यापूर्वी देवस्थान समितीविरोधात दाखल केलेल्या याचिका आदींचा समावेश आहे. मात्र देवस्थान समितीने कधीही पुजाऱ्यांच्या कर्तव्यात अडथळा आणलेला नाही. पंढरपूरच्या धर्तीवर येथेही सरकारी पुजारी नियुक्ती व्हावी अशी मागणी समितीच्यावतीने केली आहे.

- विजय पोवार, सचिव, पश्चिम महाराष्ट्र देवस्थान समिती

श्रीपूजक मंडळाकडून २५० पानी पुरावे

जिल्हाधिकारी अविनाश सुभेदार यांच्यासमोर शुक्रवारी झालेल्या सुनावणीवेळी श्री करवीरनिवासिनी अंबाबाई हक्कदार श्रीपूजक मंडळाने कायदेशीर अधिकार आणि न्यायालयीन आदेशांच्या प्रती असा अडीचशे पानांचा पुराव्याचा अहवाल जिल्हाधिकारी अविनाश सुभेदार यांच्याकडे सादर केला.

मोबाइल अॅप डाउनलोड करा आणि राहा अपडेट

विद्यार्थिनीला पाठवले अश्लील मेसेज

July 21, 2017, 2:30 pm

≫ Next: शंकर चाफाडकरयांचे निधन

≪ Previous: मंदिरात सरकारी पुजारी नेमा

$

0

0

म. टा. प्रतिनिधी, कोल्हापूर

मोरेवाडी परिसरातील वसंतराव चौगुले इंग्लिश मीडियम शाळेतील शिक्षकाने मोबाइलवरून विद्यार्थिनीला अश्लील मेसेज पाठवल्याप्रकरणी विद्यार्थिनीच्या नातेवाईकांनी शिक्षकाला शाळेत जाऊन बेदम मारहाण केली. शीतल कुमार माने (वय ३३, रा. उजळाईवाडी, ता. करवीर) असे संशयित शिक्षकाचे नाव असून, शुक्रवारी (ता. २१) सकाळी साडेदहाच्या सुमारास हा प्रकार घडला. जखमी शिक्षकावर खासगी रुग्णालयात उपचार सुरू आहेत, तर विद्यार्थिनीच्या नातेवाईकांनी शिक्षक माने याच्या विरोधात राजारामपुरी पोलिस ठाण्यात फिर्याद दाखल केली.

राजारामपुरी पोलिस ठाणे आणि पीडित विद्यार्थिनीच्या नातेवाईकांकडून मिळालेल्या माहितीनुसार मोरेवाडी येथील वसंतराव चौगुले इंग्लिश मीडियम स्कूलमध्ये शीतल माने हा शिक्षक गेल्या चार वर्षांपासून नोकरी करतो. शाळेतील एका १३ वर्षीय विद्यार्थिनीशी सलगी करून गेल्या काही दिवसांपासून तो तिच्याशी व्हाट्सअपवर चॅटिंग करीत होता. गेल्या आठवड्यात या शिक्षकाने संबंधित विद्यार्थिनीस मोबाइलवर मेसेज पाठवून शाळेच्या चौथ्या मजल्यावर भेटायला बोलवले. यानंतर अंबाबाई मंदिर परिसरातही भेटायला बोलवले. शिक्षकाने काही अश्लील मेसेज पाठवल्यानंतर घाबरलेल्या विद्यार्थिनीने याची माहिती नातेवाईकांना दिली.

शुक्रवारी सकाळी साडेदहाच्या सुमारास याचा जाब विचारण्यासाठी नातेवाईक विद्यार्थिनीला घेऊन शाळेत गेले. शाळेच्या आवारात पालकांसह आलेल्या विद्यार्थिनीला पाहून शिक्षक माने हा पळून जात होता, मात्र विद्यार्थिनीचे मामा आणि वडिलांनी पाठलाग करून त्याला पकडले. उडवाउडवीची उत्तरे देताच पालकांनी शिक्षकाला बेदम चोप दिला. मुख्याध्यापकांच्या केबिनमध्ये घेऊन गेल्यानंतर तिथेही शिक्षकाला मारहाण केली. या घटनेत माने जखमी झाला असून, त्याला उपचारासाठी खासगी रुग्णालयात दाखल केले आहे. विद्यार्थिनीच्या पालकांनी राजारामपुरी पोलिस ठाण्यात जाऊन संशयित शिक्षक शीतल माने याच्या विरोधात फिर्याद दाखल केली आहे. पोलिसांनी विद्यार्थिनीचा जबाब घेऊन मोबाइलवरील मेसेजच्या प्रिंटही चौकशीसाठी ताब्यात घेतल्या आहेत. रात्री उशिरापर्यंत शिक्षक माने याला अटक झाली नव्हती.

शाळेकडून शिक्षकाची होणार चौकशी

शाळेच्या आवारातच शिक्षकाला मारहाण झाल्यानंतर शाळा प्रशासनाने हा प्रकार गांभीर्याने घेतला आहे. विद्यार्थिनीच्या नातेवाईकांनी शाळेत तक्रार दिली असती तर याची चौकशी करता आली असती, मात्र नातेवाईकांनी परस्पर शिक्षकाला मारहाण करणे योग्य नाही. आम्ही संबंधित शिक्षकाची चौकशी करून पुढील कार्यवाही करू, अशी माहिती शाळा प्रशासनाने पत्रकारांशी बोलताना दिली.

मोबाइल अॅप डाउनलोड करा आणि राहा अपडेट

शंकर चाफाडकरयांचे निधन

July 22, 2017, 10:02 am

≫ Next: ​ राष्ट्रपतिपदाच्या निवडणुकीतकाँग्रेसची मते फुटली नाहीत ज्येष्ठ सुशीलकुमार शिंदे यांचा दावा

≪ Previous: विद्यार्थिनीला पाठवले अश्लील मेसेज

$

0

0

बेळगाव
पुस्तकप्रेमी आणि वाचनप्रेमी म्हणून साहित्यविश्वात परिचित असलेले शंकर अनंत चाफाडकर (८०) यांचे निधन झाले. चाफाडकर अविवाहित होते. त्यांच्या पश्चात भाऊ, बहीण आहेत. त्यांनी देहदानाचा संकल्प केला होता. त्यांचा मृतदेह केएलई संस्थेला देण्यात आला.
चाफाडकरांच्या वैयक्तिक ग्रंथालयात साडेपाच हजार निरनिराळ्या पुस्तकांचा संग्रह होता. विशेष म्हणजे चाफाडकरानी ही सर्व पुस्तके वाचलेली होती. लहानपणापासून वाचनाची आवड जोपासलेल्या चाफाडकरानी अखेरच्या श्वासापर्यंत वाचनाची आवड जोपासली.
मूळचे गोव्याचे असलेले चाफाडकर यांनी बीएसएफमध्ये सेवा बजावली होती. बीएसएफमधून असिस्टंट कमांडंट म्हणून ते निवृत्त झाले होते. निवृत्तीनंतर चाफाडकरानी आपल्या वाचन आणि पुस्तक संग्रहाच्या छंदाला वाहून घेतले होते.
पुस्तकांना कव्हर कसे घालावे, पुस्तक कपाटात कसे ठेवावे, पुस्तकांचा संग्रह कसा करावा, याबद्दल अनेक ग्रंथालयांना त्यांनी मार्गदर्शन केले होते. बेळगावात आलेले नामवंत साहित्यिक, विविध क्षेत्रातील मान्यवरांनी चाफाडकर यांचे ग्रंथालय बघून कौतुक केले होते. पुस्तकाच्या वेडामुळे अनेक साहित्यिकांशी त्यांचे जवळचे संबंध होते. मधू मंगेश कर्णिक, विद्या बाळ, तारा भवाळकर, अरुणा ढेरे आदी मान्यवरांनी त्यांचा पुस्तकांचा संग्रह पाहून त्यांचे कौतुक केले होते.

मोबाइल अॅप डाउनलोड करा आणि राहा अपडेट

---

​ राष्ट्रपतिपदाच्या निवडणुकीतकाँग्रेसची मते फुटली नाहीत ज्येष्ठ सुशीलकुमार शिंदे यांचा दावा

July 22, 2017, 10:10 am

≫ Next: डीसीसी बँकांकडूनशेतकऱ्यांची अडवणूकसहकार मंत्री सुभाष देशमुख यांचा आरोप

≪ Previous: शंकर चाफाडकरयांचे निधन

$

0

0

म. टा. वृत्तसेवा, सोलापूर
‘राष्ट्रपतिपदाच्या निवडणुकीत काँग्रेस पक्षाची मते फुटली नाहीत,’ असा दावा माजी केंद्रीय गृहमंत्री सुशीलकुमार शिंदे यांनी केला. शनिवारी सोलापुरात काँग्रेस भवनात पत्रकारांशी ते बोलत होते.
हिमाचल प्रदेशचे प्रभारी म्हणून नियुक्ती झाल्याबाबत बोलताना शिंदे म्हणाले, ‘अखिल भारतीय काँग्रेस पक्षाचा सरचिटणीस असताना माझ्याकडे हिमाचल प्रदेशची जबाबदारी होती. तेव्हा काँग्रेसने दोन निवडणुका जिंकल्या होत्या. पक्षाने जबाबदारी दिलेली स्वीकारली आहे.’
राज्यात कर्जमाफीचा प्रश्न ऐरणीवर आहे. कर्जमाफीची घोषणा झाली. मात्र त्या बाबतचे प्रस्ताव आलेले नाहीत. तहसीलदार, डीसीसी बँका यांना प्रस्ताव येणे गरजेचे होते, सरकारने केलेली कर्जमाफीची घोषणा केवळ घोषणाच राहिली आहे, अशी टीकाही शिंदे यांनी केली.

मोबाइल अॅप डाउनलोड करा आणि राहा अपडेट

डीसीसी बँकांकडूनशेतकऱ्यांची अडवणूकसहकार मंत्री सुभाष देशमुख यांचा आरोप

July 22, 2017, 10:14 am

≫ Next: लग्नाचे आमिषाने युवतीवर बलात्कार

≪ Previous: ​ राष्ट्रपतिपदाच्या निवडणुकीतकाँग्रेसची मते फुटली नाहीत ज्येष्ठ सुशीलकुमार शिंदे यांचा दावा

$

0

0

म. टा. वृत्तसेवा, सांगली
‘शेतकऱ्यांना तातडीचे दहा हजार रुपयांचे पेरणीसाठीचे कर्ज देण्यास राज्यातील काही जिल्हा बँका टाळाटाळ करीत असल्याचे निदर्शनास येत आहे. अशी अडवणूक करणाऱ्या बँकांवर तातडीने कारवाई करण्यात येईल,’ असा इशारा पालकमंत्री आणि सहकारमंत्री सुभाष देशमुख यांनी सांगलीत शनिवारी दिला.
सांगलीतील टिळक स्मारक मंदिरातील भाजपच्या मेळाव्यात देशमुख यांनी कर्जमाफीचा विषय कार्यकर्त्यांसमोर विस्ताराने मांडला. देशमुख म्हणाले, ‘सरकारने घेतलेल्या कर्जमाफीच्या निर्णयामुळे शेतकऱ्यांना दिलासा मिळाला आहे. पूर्वीच्या सरकारने साडेसात हजार कोटींची कर्जमाफी दिली होती. आमच्या सरकारने मात्र तब्बल ३४ हजार कोटीची माफी दिली आहे. दीड लाखांपर्यंतच्या ३६ लाख शेतकऱ्यांचा सात-बारा कोरा होणार आहे. दोन लाखांपर्यंतचे कर्ज थकीत असलेल्या शेतकऱ्यांनी पन्नास हजार भरल्यानंतर त्यांचेही सातबारा कोरे होणार आहेत. कर्जमाफीबाबत सरकारने फसविल्याचा अपप्रचार करून शेतकऱ्यांची दिशाभूल करण्याचा काहीजण उद्योग करीत आहेत. कर्जमाफी देताना खऱ्या शेतकऱ्यांना त्रास होऊ नये, हा यामागचा हेतू आहे. आघाडी सरकारच्या काळात झालेल्या कर्जमाफीत मोठे घोटाळे झाले, हे सर्वांनाच माहीत आहे. ते टाळण्यासाठी सरकारने कर्जमाफी देताना सर्व निकष तपासून देण्याचा निर्णय घेतला आहे.’
पतसंस्थांमधील ठेवींना संरक्षण
बँकांप्रमाणे यापुढे पतसंस्थांच्या ठेवींनाही विमा संरक्षण देण्यात येईल. त्यासाठी विम्याचा हप्ता निश्चित करून लवकरच या नियमाची अंमलबजावणी केली जाईल, अशी ग्वाही सहकार मंत्री सुभाष देशमुख यांनी शनिवारी सांगलीत दिली. जिल्ह्यातील पतसंस्था चालकांची सहकार परिषद झाली. त्यावेळी देशमुख बोलत होते.
ग्रामपंचायतीच्या तयारीला लागा
सांगली जिल्ह्यातील ग्रामपंचायती आणि आगामी सांगली महापालिकेच्या निवडणुकीसाठी भाजपने शनिवारी पालकमंत्री सुभाष देशमुख यांच्या उपस्थित रणशिंग फुंकले. कार्यकर्त्याना आतापासूनच तयारीला लागण्याचे आवाहनही त्यांनी केले.
कार्यालयासाठी निधी जमवा
देशमुख म्हणाले, जिल्ह्यात सर्वाधिक मोठा पक्ष भाजप आहे. परंतु दुर्दैवाने जिल्ह्याच्या ठिकाणी पक्षाचे सुसज्ज कार्यालय नाही. त्यासाठी कार्यकर्त्यांनी निधी जमवावा. जेणेकरून कार्यालयात तुमचीही सोय होईल, कोणाच्या मेहेरबानीने नव्हे तर तुमच्या योगदानामुळे तुमचाही हक्क राहील. त्यासाठी एकवेळची तंबाखू सोडा, चहा सोडा आणि त्याचे पैसे निधी म्हणून द्या.

मोबाइल अॅप डाउनलोड करा आणि राहा अपडेट

लग्नाचे आमिषाने युवतीवर बलात्कार

July 22, 2017, 1:08 pm

≫ Next: भरधाव कार कडवी नदीत कोसळली

≪ Previous: डीसीसी बँकांकडूनशेतकऱ्यांची अडवणूकसहकार मंत्री सुभाष देशमुख यांचा आरोप

$

0

0

म. टा. वृत्तसेवा,गारगोटी

फये (ता.भुदरगड) येथील महाविद्यालयीन युवतीस लग्नाचे आमिष दाखवून शारीरिक सबंध ठेऊन ठार मारण्याची धमकी दिल्याप्रकरणी दत्तवाड येथील तरुणासह चौघांवर भुदरगड पोलिसात गुन्हा दाखल झाला आहे. रणजित प्रकाश चव्हाण, प्रकाश चव्हाण दोघेही (रा.दत्तवाड ता. शिरोळ) आजोबा विठ्ठल केसरकर, मामा संदीप विठ्ठल केसरकर (रा.जळकेवाडी ता. राधानगरी) अशी आरोपींची नावे आहेत.

फये येथील महाविद्यालयीन युवती आणि शिरोळ येथील रणजित प्रकाश चव्हाण यांचे आजोळ जळकेवाडी आहे. त्यामुळे ते दोघेही आपल्या आजोळी जात होते. त्यावेळी त्यांची एकमेकाशी ओळख झाली होती. या ओळखीचे रुपांतर प्रेमात झाले. यादरम्यान युवतीने कॉलेज शिक्षण घेण्यासाठी गारगोटी येथे भाड्याच्या खोलीत राहत होती. याठिकाणी रणजितने लग्नाच्या आमिषाने शारीरिक संबंध ठेवले. एक वर्षानंतर युवतीने रणजितबरोबर लग्नाचा तगादा लावला. त्याने लग्नास नकार दिला. तर रणजितच्या घरातील मंडळीनी लग्नासाठी चार तोळे सोन्याचे दागिने व एक एकर जमिनीची मागणी केली. रणजितचा मामा संदीप केसरकर याने रणजित बरोबर लग्न केल्यास ठार मारण्याची धमकी युवतीस दिली.

मोबाइल अॅप डाउनलोड करा आणि राहा अपडेट

भरधाव कार कडवी नदीत कोसळली

July 22, 2017, 2:30 pm

≫ Next: सुकाणू समिती आक्रमक

≪ Previous: लग्नाचे आमिषाने युवतीवर बलात्कार

$

0

0

म. टा. वृत्तसेवा शाहूवाडी

कोल्हापूर-रत्नागिरी महामार्गावरील वारूळ (ता.शाहूवाडी) गावच्या हद्दीतील कडवी नदीच्या पूलावरून भरधाव स्विफ्ट कार नदीत पुराच्या पाण्यात कोसळली. स्थानिक नागरिकांनी वेळीच घटनास्थळी धाव घेतल्याने गाडीतील इचलकरंजीतील तिघेजण सुखरूप बचावले. शनिवारी सायंकाळी ५.३० च्या सुमारास ही घटना घडली असून अपघातग्रस्त कार पुराच्या पाण्यात अडकून पडली आहे.

घटनास्थळावरून समजलेली अधिक माहिती अशी अमित नंदनगे, सचिन पाटील, पिंटू खान (सर्वजण रा. इचलकरंजी) हे तिघे मित्र इचलकरंजीतून आपली मारूती स्विफ्ट (एम. एच. ०ई २३४९) या कारने पावसाळी सहलीसाठी कोल्हापूर-रत्नागिरी महामार्गावरून शाहूवाडी तालुक्यातील केर्ले धबधबा व अन्य ठिकाणे पाहण्यासाठी जात होते. ही स्विफ्ट कार वारूळ गावच्या हद्दीतील वळणावरून भरधाव वेगाने आंबा दिशेने जात असताना कडवी नदीत पूलावरून डावीकडील बाजूला गाडी सरळ खाली नदीत कोसळली. यावेळी चालकांने प्रसावधान राखून गाडीचे दरवाजे उघडल्यामुळे गाडीतील अमित नंदनगे, सचिन पाटील, पिंटू खान हे सर्व नदीच्या पाण्यात पडले. कार पूलावरुन थेट नदीत पडल्याने मोठा आवाज झाला. वारूळ गावातील ग्रामस्थांनी तातडीने नदीतील पूराच्या पाण्यात उतरून तिघांनाही सुखरुप बाहेर काढले. केवळ दैव बलवत्तर म्हणूनच हे तिघेही बचावले. दोन वर्षापूर्वी याच पूलावरून गाडी नदीत पडली होती. या मार्गावर पावसामुळे मोठे खड्डे पडले आहेत. साइड पट्ट्याही भरलेल्या नाहीत. त्यामुळे या मार्गावर कोठे ना कोठे नेहमी अपघात होत असतात. यावेळी केशव सपकाळ, प्रकाश पाटील, किरण परीट, रावजी पाटील, परशुराम मिरजकर, संतोष पाटील, बंडू आरसेकर, आदी युवकांनी अपघातग्रस्तांना मदत केली.

मोबाइल अॅप डाउनलोड करा आणि राहा अपडेट

सुकाणू समिती आक्रमक

July 22, 2017, 2:30 pm

≫ Next: हाळोलीत शाळा कोसळली

≪ Previous: भरधाव कार कडवी नदीत कोसळली

$

0

0

म. टा. प्रतिनिधी, कोल्हापूर

मुख्यमंत्री देवेंद्र फडणवीस यांनी जाहीर केलेली कर्जमाफी ऐतिहासिक नव्हे तर ती ऐतिहासिक कर्जवसुली योजना आहे. केवळ दीड लाखांपर्यंतचे कर्जमाफ न करता आणि कोणत्याही निकषाविना ३० जून २०१७ पर्यंतच्या कर्जदारांचे संपूर्ण कर्जमाफ ३१ जुलैपर्यंत केलेच पाहिजे, या मागणीवर आक्रमक होत कर्जमाफी देण्याच्या धोरणात बदल करा अन्यथा शेतकरी सरकार बदलतील, अशा इशारा जिल्हा सुकाणू समितीने शनिवारी येथे दिला. समितीची शेतकरी परिषद येथे झाली. आज (रविवारी) पुण्यात समितीची शेवटची परिषद होणार असून, तीत आंदोलनाची दिशा ठरवण्याचा एकमुखी निर्णय यावेळी घेण्यात आला.

मार्केट यार्ड येथील शाहू सांस्कृतिक भवनात झालेल्या परिषदेच्या अध्यक्षस्थानी माजी आमदार संपतबापू पवार-पाटील होते. कर्जमाफीची घोषणा केल्यानंतर मुख्यमंत्री फडणवीस यांनी राज्यातील ८९ लाख शेतकऱ्यांना ३४ हजार कोटींची कर्जमाफी होणार असल्याचे सांगितले जात आहे. मात्र त्यातील निकषांत तब्बल ५३ लाख शेतकरी बसणार नाहीत. त्यामुळे सरकारकडून करत असलेले दावे बुद्धीभेद करणारे आहेत. कर्जमाफीच्या पहिल्याच बैठकीत निकषाच्या प्रती समितीतील सदस्यांनी फेकून दिल्या आहेत. तरीही समितीत फूट पाडण्याचे अनेक प्रयत्न झाले.

मुख्यमंत्र्यांनी कर्जमाफीचा निर्णय घेतल्याच्या पंधरा दिवसांत १९ अध्यादेश काढले आहेत. सर्व अध्यादेशातून सरकारचा गोंधळच दिसतो. एकूण त्यांना कर्जमाफी द्यायचीच नाही, असे दिसून येत आहे. सरकारचा कावेबाजपणा लक्षात आल्यानंतर राज्यात सर्व शेतकरी संघटना, पक्ष एकत्र आले असून, राज्यभर मेळावे घेतले जात आहेत. मेळाव्याच्या दबावामुळे प्रथम २०१२ पासून जाहीर केलेली कर्जमाफी २००९ पर्यंत वाढवली आहे. आंदोलनाची हीच धग कायम ठेवल्यास २०१७ पर्यंतची सर्व सरसकट कर्जमाफी मिळणार आहे. त्यासाठी सर्वांनी एकजूट ठेवण्याचा संकल्पही यावेळी करण्यात आला.

२००८ मध्ये जाहीर केलेल्या कर्जमाफीत पाच एकरांची मर्यादा घातली होती. या कर्जमाफीतील वंचित शेतकऱ्यांसह रक्कम किंवा क्षेत्राची अट न लावता सरसकट कर्जमाफी घेतल्याशिवाय आंदोलन मागे घेण्याचा नाही, असा निर्धारही यावेळी बोलून दाखवण्यात आला. उद्या पुण्यात होणाऱ्या परिषदेत आंदोलनाची दिशा ठरवण्यात येणार असल्याचे सांगितले.

राज्य सुकाणू समितीचे निमंत्रक डॉ. अजित नवले, आमदार जयंत पाटील, करण गायकर, बळीराजा संघटनेचे संजय पाटील, किशोर ढमाले, हणमंत ताटे, अशोक ढवळे, सुशीलाताई मोराळे आदी राज्यस्तरीय शेतकरी संघटनांचे प्रतिनिधी उपस्थित होते.



कर्जमाफीसाठी कृषी केंद्रे विका

शेतकऱ्यांना कर्जमाफी देण्यासाठी पैसे नसल्याचे सरकारकडून वारंवार सांगितले जात आहे. कर्जमाफीसाठी पैसे नसतील तर शिवाजीनगर (पुणे) येथील कृषी संशोधन केंद्राची जमीन विका. त्यातून सुमारे तीन लाख कोटी रुपये मिळतील. संशोधनाचा पांढरा हत्ती सांभाळण्यापेक्षा ग्रामीण भागात संशोधन केंद्र स्थापन करा आणि विक्रीतून आलेली रक्कम कर्जमाफीसाठी वापरण्याचा सल्ला आमदार जयंत पाटील यांनी यावेळी दिला.

मोबाइल अॅप डाउनलोड करा आणि राहा अपडेट

हाळोलीत शाळा कोसळली

July 22, 2017, 2:30 pm

≫ Next: शिवाजी पूल हलक्या वाहनांसाठी खुला

≪ Previous: सुकाणू समिती आक्रमक

$

0

0

म. टा. वृत्तसेवा, आजरा

गेल्या दोन दिवसांपासून सुरू असलेल्या जोरदार पावसामुळे आजरा तालुक्यातील हाळोली प्राथमिक शाळेची इमारत सकाळी सव्वा पाचच्या सुमारास कोसळली. शनिवारी सकाळची शाळा होती. तत्पुर्वीच ही घटना घडल्याने मोठा अनर्थ टळला.

तालुक्यातील पश्चिम विभागाच्या अतिवृष्टीजन्य परिसरातील ही शाळा द्विशिक्षकी असून, येथे चौथीपर्यंत २१ विद्यार्थी शिकतात. गावच्या मध्यभागी ग्रामपंचायत इमारतीजवळील उपलब्ध जागेत या शाळेच्या दोन खोल्या, पाठीमागे अंगणवाडीच्या दोन खोल्या व स्वयंपाकघर बांधलेले आहे. प्राथमिक शाळा इमारत १९५४ मध्ये बांधली होती. अतिवृष्टीमुळे ६०-६५ वर्षापूर्वीच्या या इमारतीच्या भिंतींना तडे गेले होते. पावसाळ्यात तर जमिनीला व भिंतींनाही ओलावा येत होता. त्यामुळे ही इमारत पूर्णत: धोक्याची बनली होती. ग्रामस्थांच्या मागणीकडे पंचायत समितीच्या बांधकाम विभागासह जिल्हा परिषदेनेही दुर्लक्ष केले. इमारत धोकादायक असूनही तेथे अन्य पर्याय नसल्याने येथेच वर्ग भरत होते. शनिवारी पहाटे शाळेच्या मागील भिंती व छप्पर मागील अंगणावाडी व स्वयंपाक घरावर कोसळले. अन्य भिंतींच्या भेगा पडल्याने तेही कोसळण्याच्या स्थितीत आहे.

अनर्थच घडला असता

हा परिसर हत्ती वावर व नुकसानीने ग्रस्त आहे. अशातच गेले आठवडाभर या परिसरात सलग अतिवृष्टी होते आहे. परिणामी भिंतींच्या भेगामध्ये पाणी झिरपून पहाटेच्या सुमारास ही इमारत कोसळली. यावेळी मोठा आवाज झाल्याने आजूबाजूचे ग्रामस्थ जमा झाले. हत्तीमुळे काही विपरीत घडल्याचा प्राथमिक अंदाज होता. पण अखेर शाळेची इमारत कोसळल्याचे निदर्शनास आले. हीच घटना आणखी दोन तासाने, शाळा भरल्यावरनंतर इमारत कोसळली असती तर कोवळ्या जीवांना धोका निर्माण झाला असता.

प्रासंगिक डागडुजीची रक्कम पडूनच

या पार्श्वभूमीवर गेल्या १० वर्षांपासून या इमारतीचे निर्लेखन करून नवी इमारत व्हावी, यासाठी सर्वस्तरीय प्रयत्न सुरू होते. मात्र या इमारतीच्या पाहणीकरीता विशेषत: बांधकाम विभागाचे अधिकारी येत, तेव्हा अद्याप इमारत चांगली आहे, दुरुस्ती करून घ्या, असे सुचविले जायचे. विशेष म्हणजे वर्षभरापूर्वी एप्रिल २०१६ ला प्रासंगिक डागडुजीसाठी १ लाख, २७ हजार रुपयांचा निधी शाळा खात्यावर जमा करण्यात आला होता. मात्र ग्रामस्थांनी मलमपट्टीऐवजी नव्या इमारतीचीच मागणी केल्याने तो निधी अद्यापही तसाच असल्याची पुढे आली.

मोबाइल अॅप डाउनलोड करा आणि राहा अपडेट

शिवाजी पूल हलक्या वाहनांसाठी खुला

July 22, 2017, 4:06 pm

≫ Next: ​ सदाभाऊ संघटनेशीप्रतारणा करणार नाहीतखासदार राजू शेट्टींचे मत

≪ Previous: हाळोलीत शाळा कोसळली

$

0

0

कोल्हापूर ः गेले चार दिवस दमदारपणे सुरू असलेल्या पावसाने शनिवारी थोडी विश्रांती घेतली. त्यामुळे पंचगंगेची पातळी ४१. १० फुटांवर स्थिर आहे. राधानगरी धरण ९१ टक्के भरले आहे. वाहतुकीसाठी बंद केलेला शिवाजी पूल शनिवारी दुचाकी आणि तीनचाकी वाहनांसाठी खुला करण्यात आला. मात्र केर्ली रोडवर पाणी असल्याने पुढील मार्ग वाहतुकीसाठी बंद केला आहे. दिवसभर पुराचे पाणी पाहण्यासाठी शिवाजी पूल, पिकनिक पॉइंटवर नागरिकांनी गर्दी केली होती.

पावसाची तीव्रता कमी झाल्याने पंचगंगेसह दूधगंगा, वेदगंगा, कासारी, कुंभी नदीची पाणी पातळी स्थिर आहे. दरम्यान, शहरात दुधाळी, शुक्रवार पेठ, केर्ली, चिखली, करवीर पंचायत समिती परिसरात पाणी आले आहे. रंकाळा, कळंबा आणि राजाराम तलावाच्या पाणी पातळीत वाढ झाली आहे. कोल्हापूर रत्नागिरी मार्गावर केर्ली येथे रस्त्यावर पाणी आहे.

कोयनेसह रेल्वेगाड्यांना उशीरा

लोणावळा आणि आसपासच्या परिसरात झालेल्या अतिवृष्टीमुळे या भागातील रस्ते पाण्याखाली गेले आहेत. भुशी डॅमकडे जाणारा रस्ता बंद करण्यात आला आहे. पुणे मुंबई रेल्वेरुळांवर दगड पडल्याने कोयना एक्स्प्रेससह काही गाड्यांना उशीर झाला. मात्र काही वेळातच दुरूस्तीचे काम पूर्ण करण्यात आले.

शिवाजी पुलावर पोलिस बंदोबस्त

दरम्यान, नोकरी, शिक्षण व औषधोपचारासाठी कोल्हापुरात येणाऱ्या दुचाकीस्वारांना शिवाजी पुलावरून सोडले जात आहे. हुल्लडबाज आणि सेल्फी काढून स्वतःचा जीव धोक्यात घालणाऱ्यांना रोखण्यासाठी दोन अधिकारी, वाहतूक पोलिस, एसआरपीएफचे जवान असा ३५ पोलिसांचा बंदोबस्त येथे पुलावर नेमला आहे. जिल्हाधिकारी अविनाश सुभेदार यांनी पुलावरील वाहतूक बंद करण्याचे आदेश दिले आहेत. शुक्रवारी सायंकाळी सर्वच वाहनांना पुलावरून जाण्यास बंदी घातली होती. मात्र आंबेवाडी, केर्ली, वडणगे, निगवेतून नोकरी, शाळा, औषधोपचारासाठी येणाऱ्या लोकांची गैरसोय टाळण्यासाठी दुचाकीस्वारांना प्रवेश देण्यात आला. नागरिकांनी पुलावर पुराचे पाणी पाहण्यासाठी गर्दी करू नये, यासाठी बंदोबस्त तैनात केला आहे. सेल्फी काढताना दुर्घटना घडण्याची शक्यता नाकारता येत नाही, त्यामुळे पोलिसांनी खबरदारी घेतली आहे. दिवसा आणि रात्री अशा दोन शिफ्टमध्ये ३५ पोलिसांचा बंदोबस्त ठेवला आहे. पुराचे पाणी कमी होईपर्यंत हा बंदोबस्त ठेवला जाणार असल्याचे शहर पोलिस उपअधीक्षक डॉ. प्रशांत अमृतकर यांनी सांगितले.

मोबाइल अॅप डाउनलोड करा आणि राहा अपडेट

---

​ सदाभाऊ संघटनेशीप्रतारणा करणार नाहीतखासदार राजू शेट्टींचे मत

July 23, 2017, 11:03 am

≫ Next: ​ पर्यावरणाच्या दृष्टीनेमोदी सरकार सर्वात वाईटपर्यावरण तज्ज्ञ डॉ. विश्वंभर चौधरींची टीका

≪ Previous: शिवाजी पूल हलक्या वाहनांसाठी खुला

$

0

0

म. टा. वृत्तसेवा, माढा
‘चळवळीतून मोठे झालेले कार्यकर्ते संघटनेशी प्रतारणा करणार नाहीत. संघटनेच्या कडक शिस्तीचा त्रास काही लोकांना होत आहे. मात्र, सदाभाऊ संघटनेतून बाहेर पडतील, असे वाटत नाही,’ अशी मत स्वाभिमानी शेतकरी संघटनेचे अध्यक्ष, खासदार राजू शेट्टी यांनी व्यक्त केले. माढा येथे एका कार्यक्रमासाठी आलेले शेट्टी पत्रकारांशी बोलत होते.
गेल्या काही दिवसांपासून स्वाभिमानी शेतकरी संघटनेत फूट पडणार, अशी चर्चा सुरू आहे. कृषी राज्यमंत्री सदाभाऊ खोत वेगळी संघटना काढणार असल्याचा कयास लावला जात आहे. राजू शेट्टी आणि खोत यांच्यात टोकाचा संघर्ष सुरू असतानाही रविवारचे शेट्टींचे वक्तव्य आशावादी होते.
दरम्यान, रघुनाथ पाटील यांनी केलेल्या टीकेबाबत बोलताना खासदार शेट्टी म्हणाले, ‘असल्या किरकोळ लोकांच्या टीकेला उत्तर द्यायला मला वेळ नाही. सरकारचा पाठिंबा कधी काढणार ते वेळ आल्यावर कळेल.’ कोल्हापूर आणि सांगली जिल्हा परिषदेसाठी स्थानिक आघाड्या करण्याचा निर्णय आधीच झाला होता. तसे अधिकार स्थानिक नेत्यांना दिले होते, असेही शेट्टी म्हणाले.
फुटीचे स्पष्ट संकेत
माढ्यातील शेट्टींच्या कार्यक्रमाकडे सदाभाऊ खोत यांना मानणाऱ्या संघटनेच्या जिल्हा अध्यक्षांसह अनेक कार्यकर्त्यांनी पाठ फिरवल्याने फुटीचे स्पष्ट संकेत मिळत होते. ही बाब शेट्टींच्या निदर्शनास आणताच, ‘रेल्वेत काही लोक चढत असतात तर काही उतरत असतात, त्यामुळे कोण आले आणि कोणी गेल्याने संघटनेस काही फरक पडणार नाही’, असेही शेट्टी म्हणाले.
कार्यकर्त्यांशी चर्चा
सध्या शेट्टी आणि सदाभाऊ खोत यांच्या वादाच्या पार्श्वभूमीवर शेट्टी काय बोलतात याकडे सर्वांचेच लक्ष होते. मात्र, शेट्टींनी थेट सदाभाऊ खोत यांच्या माढा लोकसभा मतदारसंघातच कार्यकर्त्यांच्या बैठक घेतल्या. रविवारी एका दिवसांत शेट्टी यांनी सांगोला, मंगळवेढा, माढा येथे दौरा करून पुन्हा माढ्यात जिल्ह्यातील प्रमुख कार्यकर्त्यांची बैठक घेतल्याने सदाभाऊ खोत यांनी संघटना सोडली तरी कार्यकर्ते एकत्र ठेवण्यासाठी शेट्टी सक्रिय झाल्याचे दिसले.
केंद्रीय कृषिमंत्र्यांनी
शेतीचा सत्यानाश केला
‘केंद्रीय कृषिमंत्री आणि अन्न व नागरी पुरवठा मंत्र्यांनी देशातील शेतकऱ्यांचा सत्यानाश केला आहे. गेल्या ४ वर्षांत सरकारने अन्नधान्याची आयात २८ हजार कोटी वरून १ लाख ४० हजार कोटींपर्यंत नेली आहे, असा आरोप गंभीर आरोप स्वाभिमानी शेतकरी संघटनेचे अध्यक्ष खासदार राजू शेट्टी यांनी केला. माढा येथे ते पत्रकारांशी बोलत होते.
कृषिप्रधान देशातील आयात वाढतेच, कशी असा सवाल करीत केंद्रीय कृषिमंत्री राधामोहन सिंह आणि अन्न व नागरी पुरवठा मंत्री रामविलास पासवान यांच्या खेळात शेतकऱ्यांचा बळी चालल्याचे त्यांनी सांगितले.
शेट्टींनी केंद्र, राज्य सरकारवर तोफ डागत केंद्र सरकारच्या धोरणांची चिरफाड केली. मोदी सरकारच्या फसव्या घोषणांमुळे देशभरातील शेतकरी अस्वस्थ असून, केंद्रीय कृषिमंत्री साफ खोटे बोलू लागल्याने आम्ही त्यांना मोदींच्या वक्तव्याचे पुरावेच दिले आहेत. केंद्रीय कृषी आणि अन्न पुरवठा मंत्रालयात ताळमेळ नसल्याने सध्याचे सरकार शेतीमालाची आयात करून शेतकरी मोडून पडत आहे. देशभरातील शेतकरी या सरकारच्या फसव्या घोषणांविरुद्ध एकत्र आला आहे. हेच पंतप्रधान मोदी यांचे मोठे योगदान आहे, असेही शेट्टी म्हणाले.
... तर फडणवीसांचा पाठिंबा काढू
राज्य सरकारच्या विरोधात एवढी आंदोलने करूनही त्यांना काही फरक पडत नाही. आम्ही २६ जुलैचा अल्टिमेटम फडणवीस सरकारला दिला असून, त्यांनी शब्द न पाळल्यास मात्र राज्य सरकारचा पाठिंबा काढून घेणार आहे, असेही शेट्टी म्हणाले.
कर्जमाफीचे आकडे फुगलेले
कर्जमाफीमध्ये आकडे फुगलेले आहेत. सर्व कर्जमाफी १० ते १२ हजार कोटींची आहे. सगळी नावे व माहिती जाहीर न करण्यामागची तीच गोम आहे. राज्यातील दुधाचा प्रश्न गंभीर झाला असून, खासगी संघ दुधाला कमी भाव देत असल्याने सोमवारी मुख्यमंत्र्यांची भेट घेऊन त्यांच्यावर कारवाई करण्याची मागणी करणार आहे, असेही शेट्टी म्हणाले.

मोबाइल अॅप डाउनलोड करा आणि राहा अपडेट

​ पर्यावरणाच्या दृष्टीनेमोदी सरकार सर्वात वाईटपर्यावरण तज्ज्ञ डॉ. विश्वंभर चौधरींची टीका

July 23, 2017, 11:08 am

≫ Next: कोयनेत ७१.१८ टीएमसी पाणीसाठा

≪ Previous: ​ सदाभाऊ संघटनेशीप्रतारणा करणार नाहीतखासदार राजू शेट्टींचे मत

$

0

0

म. टा. वृत्तसेवा, सांगली
‘पर्यावरणाच्या जागा उद्योगपतींना दिल्या जात असल्याने सध्याचे केंद्र सरकार पर्यावरणाच्या दृष्टीने सर्वात वाईट सरकार आहे. त्याचबरोबर २५ झाडे तोडण्यासाठी परवानगीची आवश्यकता नाही, असा राज्य सरकारने अत्यंत चुकीचा निर्णय घेतला आहे,’ अशी टीका पर्यावरण तज्ज्ञ डॉ. विश्वंभर चौधरी यांनी रविवारी सांगलीत केली.
सांगलीत पर्यावरण परिषदेत ते बोलत होते. न्यायालयाच्या आदेशानंतरही घन कचरा व्यवस्थापनामध्ये चालढकल करण्याबरोबरच तत्काळ उपाययोजना म्हणून करण्यात आलेल्या यंत्र खरेदीत लाखोंचा भ्रष्टाचार करणाऱ्या सांगली महापालिकेच्या विरोधात न्यायालयाचा अवमान याचिका दाखल करण्याचा ठराव करण्यात आला.
सांगलीत कृष्णानदीकाठी असलेल्या वसंतदादा पाटील स्मारकस्थळाच्या परिसरात सांगली जिल्हा सुधार समितीने रविवारी पर्यावरण परिषदेचे आयोजन केले होते. या परिषदेला अ‍ॅड. असीम सरोदेही उपस्थित होते. जिल्हा सुधार समितीचे अध्यक्ष रवींद्र चव्हाण, कार्याध्यक्ष अ‍ॅड. अमित शिंदे, प्रा. आर. बी. शिंदे, पापा पाटील, प्रदीप सुतार, डॉ. रवींद्र व्होरा यांच्यासह अनेक पर्यावरण तज्ज्ञांनी परिषदेत सहभाग घेतला.
डॉ. चौधरी म्हणाले, पर्यावरणाचा प्रश्न हा एक मोठा राजकीय प्रश्न असतो. सांगलीतील शेरी नाल्याच्या प्रश्नावर काहीजण आमदार झाल्याचे समजले. सकारात्मकतेने प्रश्न सोडवताना राजकारण करणाऱ्यांना आपला विरोध असायचे कारण नाही. मात्र, काही लोक हा प्रश्न निर्माण करून आमदार झाले हे चुकीचे आहे. पर्यावरणाचा ऱ्हास करण्यासाठी तुम्ही आम्ही सर्वजण जबादार आहोत. त्यात भर म्हणून सरकारने चुकीच्या निर्णयांचा सपाटा लावला आहे. पर्यावरण संदर्भात या सरकारने सर्वाधिक चुकीचे निर्णय घेतलेले आहेत. गंगा शुद्धीकरणासाठी राजीव गांधीनीही प्रयत्न केला, मात्र तो चुकीच्या पद्धतीने केला. त्यामुळे ती योजना फसली. आताही तेच होते आहे. कचरा वर्गीकरण करण्यासाठी जर एकाच ठिकाणी प्रकल्प उभा करीत असतील तर त्याला विरोध करा, कारण कचरा वॉर्ड निहायच विकेंद्रित होणे गरजेचे आहे. घनकचरा व्यवस्थापन रॉकेट सायन्स नाही. सोपी पद्धती आहे. यासाठी लोकांनी नियोजनामध्ये सहभाग घेणे ही गरज आहे.
अ‍ॅड. सरोदे म्हणाले, सांगलीच्या शेरी नाल्यावर यापूर्वी अहवाल तयार झालेले आहेत. त्या अहवालांमध्ये धक्कादायक माहिती समोर येऊनही कोणतीही कारवाई येथील महापालिकेने, जिल्हाधिकाऱ्यांनी, प्रदूषण नियंत्रण मंडळाने केलेली नाही. सांडपाण्याचे नियोजन करण्यासाठी सांडपाणी वाहिकांचे नकाशे तयार करून नियोजन करणे गरजेचे असते मात्र, तसे होताना दिसत नाही. सांगलीच्या शेरी नाल्याचे आणि नदीच्या पाण्याचे परीक्षण होणे गरजेचे आहे. त्यासाठी नागरिकांनी या चळवळीत सक्रीय सहभाग घेणे गरजेचे आहे. आपण पर्यावरणावर नाही, तर स्वत:वरच उपकार करीत आहोत.

मोबाइल अॅप डाउनलोड करा आणि राहा अपडेट

कोयनेत ७१.१८ टीएमसी पाणीसाठा

July 23, 2017, 11:11 am

≫ Next: विकास प्राधिकरण १५ दिवसांत

≪ Previous: ​ पर्यावरणाच्या दृष्टीनेमोदी सरकार सर्वात वाईटपर्यावरण तज्ज्ञ डॉ. विश्वंभर चौधरींची टीका

$

0

0

म. टा. वृत्तसेवा, कराड
कराड, पाटणसह कोयना पाणलोट क्षेत्रामध्ये गेल्या तीन दिवसांपासून पावसाचा जोर मंदावला आहे. कोयना धरणात रविवारी ३२ हजार ३०९ क्युसेकने पाण्याची आवक सुरू होती. कोयना धरणात ७१.१८ टीएमसी एवढा पाणीसाठा झाला आहे. रविवारी सायंकाळी सहा वाजता संपलेल्या चोवीस तासांत कोयना १४२, नवजा ९५ व महाबळेश्वर येथे ११९ मिलीमीटर पावसाची नोंद झाली आहे.
भात लागणी जोमात
कोयना विभागासह कराड व पाटण तालुक्यांच्या विविध भागांत पावसाने उघडीप दिल्याने खरिपाच्या पेरण्यांना वेग आला आहे. शेतात साचलेल्या पाण्याचा फायदा घेत भात लागणीची कामे जोमाने सुरू झाली आहेत. या दोन्ही तालुक्यांच्या डोंगरी विभागात सर्वत्र पडलेल्या पावसामुळे डोंगर उतारावरुन येणारे पाणी आडव्या पाटाकडे वळवून रखडलेली भात लागणीची कामे उरकून घेण्यासाठी शेतकऱ्यांची लगबग सुरू आहे. सध्या गंगा कावेरी, इंद्रायणी, भोगावती, तृप्ती आदी भाताच्या वाणांची मोठ्या प्रमाणात लागवड करण्यात येत आहे. काही ठिकाणच्या शेतकऱ्यांनी खरीप पिकांतील भांगलन, कोळपणी या अंतरमशागतीच्या कामांसह भात, सोयाबीन, ज्वारी, बाजरी या पिकांना खतांची मात्रा दिली जात आहे.

मोबाइल अॅप डाउनलोड करा आणि राहा अपडेट

विकास प्राधिकरण १५ दिवसांत

July 23, 2017, 12:03 pm

≫ Next: सक्तीच्या प्राथमिक शिक्षण कायद्याची शतकपूर्ती

≪ Previous: कोयनेत ७१.१८ टीएमसी पाणीसाठा

$

0

0

म. टा. प्रतिनिधी, कोल्हापूर

कोल्हापूर शहरासह ४२ गावांचा समावेश असलेल्या कोल्हापूर क्षेत्र विकास प्राधिकरणाची येत्या १५ दिवसांत घोषणा होणार असल्याचे खात्रीशीर वृत्त आहे. कोल्हापूर शहराच्या हद्दवाढीला पर्याय म्हणून स्थापन होत असलेल्या या प्राधिकरणाची पावसाळी अधिवेशनात घोषणा होण्याची दाट शक्यता आहे. राज्य सरकारने यासाठी जिल्हा प्रशासनाकडून माहिती संकलन सुरू केले आहे. दरम्यान प्रा​धिकरणातून इचलकरंजी, कागल आणि पेठवडगाव या नगरपरिषदा वगळण्याचाही निर्णय झाल्याचे समजते.

राज्यात यापूर्वी मुंबई, पुणे आणि नागपूर या शहरांसाठी स्वतंत्र विकास प्राधिकरणे स्थापन झाली आहेत. कोल्हापूर विकास प्राधिकरण स्थापन करण्याबाबत ३० ऑगस्ट २०१६ रोजी मुख्यमंत्री देवेंद्र फडणवीस यांच्या अध्यक्षतेखाली कोल्हापुरातील सर्वपक्षीय हद्दवाढ कृती समिती, हद्दवाढविरोधी कृती समितीची एकत्रित बैठक घेण्यात आली होती. त्यामध्ये मुख्यमंत्र्यांनी कोल्हापूर शहरालगतच्या गावांच्या विकासासाठी स्वतंत्र प्राधिकरणाचा पर्याय मांडला होता.

कोल्हापूर नगरपालिकेचे रूपांतर महापालिकेत झाल्यानंतर गेल्या ४५ वर्षांत हद्दवाढ झालेली नाही. हद्दवाढीअभावी शहराच्या विकासाला मर्यादा आल्या आहेत. वाढते नागरीकरण, स्थलांतर यामुळे शहराच्या सुविधांवर ताण पडत आहे. कोल्हापूर महापालिकेच्या हद्दवाढीसाठी शहराच्या स्तरावर व्यापक पातळीवर लढा सुरू होता. मात्र, ग्रामीण भागातील राजकारणावर वर्चस्व ठेवण्याच्या राजकीय नेत्यांच्या भूमिकेमुळे शहर व जिल्ह्यातील नेत्यांनी हद्दवाढीला खोडा घातला. महापालिकेने वारंवार हद्दवाढीचा प्रस्ताव देऊनही राजकीय पाठबळ न मिळाल्याने शहराचा विस्तार झाला नाही.

दरम्यान, भाजप-शिवसेना सरकार सत्तेवर आल्यानंतर पुन्हा हद्दवाढीचा प्रश्न ऐरणीवर आला. हद्दवाढीवरून शहर आ​णि ग्रामीण असे दोन गट पडल्याने पालकमंत्री चंद्रकांत पाटील यांनी मुख्यमंत्री फडणवीस यांच्याशी चर्चा करून विकास प्राधिकरण स्थापण्यासाठी पुढाकार घेतला होता. नगरविकास विभागाच्या सचिव पातळीवरील अधिकाऱ्यांसमोर आक्षेप, हरकती​ नोंदविल्या होत्या. या साऱ्या बाबी विचारात घेऊन प्राधिकरण स्थापण्याच्या हालचाली अंतिम टप्प्यात पोहोचल्या आहेत.

प्राधिकरणातील समाविष्ट होणारी संभाव्य गावे

शिंगणापूर, हणमंतवाडी, नागदेववाडी, चिखली, आंबेवाडी, रजपूतवाडी, वडणगे, शिये, टोप, कासारवाडी, संभापूर, नागाव, शिरोली, वळीवडे, गांधीनगर, चिंचवाड, मुडशिंगी, सरनोबतवाडी, तामगाव, नेर्ली, गोकुळ शिरगाव, कणेरी, कंदलगाव, पाचगाव, भुये, निगवे दुमाला, भुयेवाडी, कणेरीवाडी, मोरेवाडी, सादळे मादळे, जठारवाडी, पाडळी खुर्द, वाडीपीर, वाशी, नंदवाळ, गिरगाव, कोगील खुर्द, उजळाईवाडी, नवे बालिंगे, कळंबा, उचगाव, गोकुळ शिरगाव.

तिन्ही नगरपरिषदा वगळणार

महापालिकेने प्राधिकरणाच्या अनुषंगाने राज्य सरकारकडे अहवाल सादर केला होता. त्यामध्ये कोल्हापूरच्या आसपासच्या ४२ गावांसह इचलकरंजी नगरपरिषद, कागल नगरपरिषद आणि वडगाव नगरपरिषदेचा प्राधिकरणात समावेश करण्याची मागणी केली होती. मात्र, नव्या माहितीनुसार प्राधिकरणातून तिन्ही नगरपरिषदा वगळण्याचा निर्णय झाल्याचे खात्रीशीर वृत्त आहे. राज्य सरकारने ​कोल्हापूर विकास प्राधिकरणास मंजुरी देताना महापालिकेसाठी ५५०० कोटी रुपये मं​जूर करावेत, असा अहवाल पदाधिकाऱ्यांनी सादर केला आहे.

मोबाइल अॅप डाउनलोड करा आणि राहा अपडेट

सक्तीच्या प्राथमिक शिक्षण कायद्याची शतकपूर्ती

July 23, 2017, 12:33 pm

≫ Next: पुण्याचे दोघेजण वाचले

≪ Previous: विकास प्राधिकरण १५ दिवसांत

$

0

0

satish.ghatage@timesgroup.com

Twitt:@satishgMT

कोल्हापूर : शिक्षणातून फक्त सुशिक्षित समाज तयार करणे, इतकेच माफक उद्दिष्ट न ठेवता शिक्षण ही परिवर्तनाची गंगोत्री आहे, हे ध्येय बाळगून राज्यशकट हाकणाऱ्या राजर्षी शाहू महाराजांच्या मोफत व सक्तीच्या प्राथमिक शिक्षणाची मुहुर्तमेढ रोवण्याच्या घटनेस शंभर वर्षे पूर्ण होत आहेत. २४ जुलै १९१७ रोजी शाहू महाराजांनी प्राथमिक शिक्षण मोफत व सक्तीचे करण्यासाठी कायदा केला होता. या जाहीरनाम्याची प्रत्यक्ष अंमलबजावणी २१ सप्टेंबर १९१७ रोजी करण्यात आली होती.

आजच्या काळात शिक्षणाचे बाजारीकरण व व्यापारीकरण होत असताना अपुरी साधनसंपत्ती व आर्थिक चणचण असतानाही शाहू महाराजांनी मोफत व सक्तीच्या शिक्षणाची अंमलबजावणी केली. शाहू महाराजांनी १८९४ मध्ये कोल्हापूर संस्थानाचा कारभार हाती घेतल्यावर लोककल्याणाचे अनेक निर्णय घेतले. लोकोपयोगी कायदे केले. अज्ञानात असलेल्या समाजाला शिक्षणाशिवाय तरणोपाय नसल्याचे लक्षात आल्यावर त्यांनी प्राथमिक शिक्षणासाठी जाणीवपूर्वक प्रयत्न केले. सर्व जाती-जमातीच्या विद्यार्थ्यांसाठी वसतिगृहांची स्थापना केली. शाहूंनी २८ वर्षात १८ वसतिगृहांची स्थापना करून कोल्हापूरला ‘मदर ऑफ होस्टेल’ अशी ओळख मिळवून दिली. शहरात शिक्षणाची सोय असली तरी शिक्षणाची ज्ञानगंगा ग्रामीण भागात पोचवण्यासाठी शाहूंनी विशेष प्रयत्न केले.

संस्थानात प्राथमिक शिक्षण मोफत व सक्तीचे करण्यासाठी राजर्षी शाहूंनी बंधू पिराजीराव घाटगे यांच्या अध्यक्षतेखाली १९१३ मध्ये समिती नेमली. भास्करराव जाधव, म. ग. डोंगरे, अण्णासाहेब लठ्ठे, वाय.के. दिलवर, डॉ. एच. एन. घाटगे या सदस्यांची नियुक्ती करुन शिफारशी मागवून घेतल्या. २४ जुलै १९१७ रोजी त्यांनी काढलेल्या हुकुमात प्राथमिक शिक्षण मोफत व सक्तीची योजना जाहीर करताना, ‘येत्या गणेश चुतर्थीपासून करवीर इलाख्यातील सर्व शाळांत मोफत व सक्तीचे शिक्षण अंमलात आणण्याचा उपक्रम होण्याचा आहे’ असे म्हटले होते. सर्व प्राथमिक शाळांतून फी माफी करण्यात आली आहे, असा आदेशही २५ जुलै १९१७ रोजी काढला. प्रत्येक गावात एक शाळा, यानुसार काम सुरू केले. गावातील चावडी, धर्मशाळा, मंदिरात शाळा सुरू करण्याचा आदेश काढला. ज्या गावात चावडी नाही, तेथे तुळजाभवानीचे मंदिर बांधून एका सोप्यात शाळा व दुसऱ्या सोप्यात चावडी बांधण्याचा आदेश काढला. गावकामगाराने शाळेच्या इमारतीची झाडलोट व सारवण-सुरवण काढण्याचा आदेश काढला.

मोफत प्राथमिक शिक्षण आणि सक्तीचा कायदा प्रसिद्ध करताना त्यांनी काढलेल्या आदेशात म्हटले की, ‘प्रत्येक गावातील पालकांनी ३० दिवसांत मुलांची नावे कळवावीत. नावे न कळवणाऱ्या पालकांना समन्स बजावण्यात येईल. जो विद्यार्थी शाळेत येणार नाही, त्याच्या पालकास दिवसाला एक रुपये दंड ठोठावला जाईल.’

आदेशाची अंमलबजावणी ५९ दिवसांत

राजर्षी शाहूंनी २४ जुलै १९१७ रोजी सक्तीच्या शिक्षणाचा आदेश काढल्यानंतर अवघ्या ५९ दिवसांत त्याची अंमलबजावणीही केली. परीक्षा घेऊन शिक्षकांची नियुक्ती केली. या योजनेसाठी मोठा खर्च होणार असल्याने शंभर रुपयांहून अधिक उत्पन्न असलेल्या नागरिकांना एक रुपया शिक्षणकराची आकारणी केली. १८९४ मध्ये संस्थानात २२१ शाळा होत्या तर १९२२ मध्ये शाळांचे प्रमाण ५५५ वर पोचले. १९१७मध्ये या कायद्याची अंमलबजावणी झाली, तेव्हा १२९६ विद्यार्थी शिक्षण घेत होते. शाहूंच्या मृत्यूसमयी १९२२ मध्ये २२ हजार ७ विद्यार्थी शिक्षण घेत होते. शाहूंच्या शिक्षणाचे धोरण कोल्हापूर संस्थानासह संपूर्ण देशाने स्वीकारले. घटनेतही प्राथमिक शिक्षण सक्तीचे करण्यात आले.


शाळांसाठी इमारती व पैसे नसतानाही राजर्षी शाहूंनी सक्तीचे मोफत प्राथमिक शिक्षणांसाठी कष्ट घेतले. आज जिल्हा परिषद, महानगरपालिकेसाठी इमारती, शिक्षक व निधी असतानाही शिक्षणाची हेळसांड होत आहे. शाहूंचे उठता बसता नाव घेणाऱ्या राज्यकर्त्यांनी त्यापासून धडा घ्यायला हवा.

इंद्रजित सावंत, इतिहास संशोधक

मोबाइल अॅप डाउनलोड करा आणि राहा अपडेट