चांदोलीत धुवॉंधार

June 27, 2017, 10:21 am

≫ Next: ​ गजानन महाराजांची पालखी सोलापुरात‛गण गण गणात बोते' च्या जयघोषाने आसमंत दुमदुमला

≪ Previous: साताऱ्यात पावसाची दमदार हजेरी

$

0

0

म. टा. वृत्तसेवा, शिराळा

शिराळा तालुक्यातील चांदोली धरण परिसरात रविवारपासून धुवाधार पाऊस सुरू आहे. गेल्या चोवीस तासांत १०७ मिलीमीटर पावसाची नोंद वारणावती येथील पर्जन्यमापकावर झाली आहे.

धरणाची पाणी पातळी ५९६.९० मीटर झाली आहे. १०.९५ टीएमसी पाणीसाठा झाला आहे. धरणातून ३०० क्युसेक पाण्याचा विसर्ग वारणा नदीत सुरू आहे. पावसाचे आगार समजल्या जाणाऱ्या शिराळा तालुक्यात गतवर्षीच्या तुलनेत सरासरी ४० टक्के पाऊस कमी झाला आहे. मात्र, रविवारपासून पुन्हा पावसाने दमदार सुरुवात केल्यामुळे बळीराजा सुखावला आहे. पाऊस सुरू झाल्यामुळे शेतकरी कोळपणी व भांगलणीच्या कामात व्यस्त आहेत. शिराळा तालुक्याचा पश्चिम भाग सोडला तर इतरत्र मात्र, पावसाची उघडझाप सुरू आहे. या परिसरात मोठ्या पावसाची गरज आहे. यंदा जून महिना संपत आला तरी पुरेसा पाऊस न झाल्याने ओढे-नाल्याना पाणी नाही. परिणामी भात रोप लागणीला उशीर होणार असल्याने शेतकरी चिंताग्रस्त आहेत. धुळवाफेवर पेरलेल्या भातपिकाची उगवण चांगल्या प्रकारे झाली असली तरी त्याला मोठ्या पावसाची गरज आहे.

मोबाइल अॅप डाउनलोड करा आणि राहा अपडेट

---

​ गजानन महाराजांची पालखी सोलापुरात‛गण गण गणात बोते' च्या जयघोषाने आसमंत दुमदुमला

June 27, 2017, 10:24 am

≫ Next: ​ बेकायदा गर्भपातप्रकरणी कोठडीघरातच सुरू होता गर्भपाताचा धंदा

≪ Previous: चांदोलीत धुवॉंधार

$

0

0

म. टा. वृत्तसेवा, सोलापूर

खांद्यावर भगवी पताका, कपाळी केशरी रंग, गळ्यात तुळशीची माळ, हातात टाळ आणि मृदंग, अंगात पांढरा शुभ्र पोशाख, विजार आणि धोतर, डोक्यावर टोपी आणि मुखी गजाननाचा जयघोष करीत शेगावहून पंढरीच्या सावळ्या विठ्ठलाच्या भेटीला निघालेल्या शेगावीचा राणा श्री गजानन महाराजांच्या पालखीचे मंगळवारी मोठ्या भक्तिमय वातावरणात सोलापुरात आगमन झाले. परंपरेप्रमाणे पाणी गिरणी चौकात महापौर शोभा बनशेट्टी आणि पोलिस आयुक्त महादेव तांबडे यांच्या हस्ते पालखीची पूजा करण्यात आली. तसेच पालखीसमोर गुलाब फुलांच्या पायघड्या आणि पालखीवर पुष्पवृष्टी करून गजाननाचे सोलापुरात स्वागत करण्यात आले. पालखीचा सोलापुरात दोन दिवस मुक्काम आहे.

गजानन महाराज पालखी सोहळ्याने ३१ मे रोजी शेगाव येथून प्रस्थान झाले होते. पालखीसोबत ६५० वारकरी, ३ अश्व आणि नऊ वाहने आहेत. वारकऱ्यांसाठी अॅम्बुलन्स आहे. ३३ दिवसांचा प्रवास पूर्ण करून सोहळा २ जुलै रोजी पंढरीत पोहोचणार आहे. शेगाव-पंढरपूर असा एकूण ३३ दिवसांचा प्रवास असून, ७५० किलोमीटर इतके अंतर कापून पालखी पंढरीला पोहोचणार आहे.

दरम्यान, सोमवारी सायंकाळी उस्मानाबाद जिल्ह्यातील मुक्काम आटोपून पालखी सोहळ्याने सोलापूर जिल्ह्यात उळे गावाजवळ आगमन होताच पालकमंत्री विजयकुमार देशमुख यांनी पालखीचे स्वागत केले. त्यानंतर उळे गावचा मुक्काम आटोपून पालखीने सोलापूरच्या दिशेने प्रस्थान ठेवले. पहाटे सहा वाजता निघालेली पालखी सकाळी नऊ वाजता सोलापुरात पोहोचल्यानंतर गजानन महाराजांच्या दर्शनासाठी भाविकांनी अलोट गर्दी केली. या वेळी गजानन महाराज संस्थानच्या वतीने महापौर शोभा बनशेट्टी तसेच मान्यवरांचा सत्कार करण्यात आला. त्यानंतर पालखी पहिल्या मुक्कामासाठी कुचन प्रशालेकडे रवाना झाली. आज, बुधवारी पालखीचा दुसरा मुक्काम उपलप मंगल कार्यालयात आहे. गुरुवारी पालखी पंढरीच्या दिशेने प्रस्थान ठेवणार आहे.

१६ हजार गावांना भजनी साहित्य

संस्थानच्या वतीने पंढरपूर येथे पालखी मुक्कामी दशमी, एकादशी आणि द्वादशीला सुमारे तीन लाख वारकऱ्यांना महाप्रसाद दिला जातो. महाराष्ट्रसह गुजरात, कर्नाटक, मध्य प्रदेश, उत्तरप्रदेश, उत्तराखंड, आंध्रप्रदेश या प्रांतातील ६८ जिल्ह्यांमध्ये आतापर्यंत १६ हजार ९१५ गावांना प्रत्येकी दहा टाळजोड, वीणा, मृदंग, हातोडी तसेच ध्यानेश्वरी, एकनाथी भागवत आणि तुकाराम गाथा देण्यात देण्यात आल्या आहेत.

मोबाइल अॅप डाउनलोड करा आणि राहा अपडेट

​ बेकायदा गर्भपातप्रकरणी कोठडीघरातच सुरू होता गर्भपाताचा धंदा

June 27, 2017, 10:26 am

≫ Next: ​ जुनी मिलमध्ये सहकारमंत्री देशमुखांचाअडीच एकराचा बेकायदा भूखंडआपच्या प्रीती शर्मा-मेनन यांचा आरोप

≪ Previous: ​ गजानन महाराजांची पालखी सोलापुरात‛गण गण गणात बोते' च्या जयघोषाने आसमंत दुमदुमला

$

0

0

पंढरपूर

पंढरपूर येथे राहत्या घरामध्ये पैसे घेऊन अवैधरित्या गर्भपात करताना एका महिलेला अटक करण्यात आली. हा धक्कादायक प्रकार सोमवारी (दि. २६) उघडकीस आला. गर्भपात करीत असतानाच तालुका पोलिसांनी या घरावर छापा टाकला. न्यायालयाने संशयित महिलेला सात दिवसांची पोलिस कोठडी सुनावली आहे. या घटनेने खळबळ उडाली आहे.
पोलिसांनी दिलेल्या माहितीनुसार, येथील लक्ष्मीटाकळी परिसरात राहत असलेल्या सुनीता उर्फ जान्हवी विठ्ठल गायकवाड (वय ३८, मुळगाव हालदहीवडी ता. सांगोला, जि. सोलापूर सध्या रा. श्रीनगर, लक्ष्मीटाकळी शिवार ता, पंढरपूर) ही महिला राहत्या घरामध्ये पैसे घेऊन अवैधरित्या गर्भपात करीत असल्याची माहिती तालुका पोलिसांना समजली. या वेळी पोलिस निरीक्षक कृष्णदेव खराडे, उपनिरीक्षक हर्षल गालिंदे व गौरीशंकर शिंदे, एस. एस. पानसरे, ए. पी. गाडे, एस. एस. जगताप, महिला पोलिस डी. बी. लेंडवे, निमगरे यांनी सोमवारी दुपारी साडेबारा वाजता गायकवाडच्या घरी छापा टाकाल. त्यावेळी गायकवाड बीड येथील एका महिलेचा गर्भपात करीत असल्याचे निदर्शनास आले. पोलिसांनी त्वरीत डॉक्टरांना बोलावून तपासणी केला असता गर्भपात करण्यात येत असल्याचे निष्पन्न झाले. डॉक्टरांनी गायकवाडविरोधात पंढरपूर तालुका पोलिस ठाण्यात फिर्याद दिली असून, पोलिसांनी तिला अटक करून ताब्यात घेतले होते. मंगळवारी तिला न्यायालयात हजर केले असता. न्यायालयाने तिला सात दिवसांची पोलिस कोठडी सुनावली आहे. पोलिस उपनिरीक्षक हर्षल गालिंदे पुढील तपास करीत आहेत.

मोबाइल अॅप डाउनलोड करा आणि राहा अपडेट

​ जुनी मिलमध्ये सहकारमंत्री देशमुखांचाअडीच एकराचा बेकायदा भूखंडआपच्या प्रीती शर्मा-मेनन यांचा आरोप

June 27, 2017, 10:30 am

≫ Next: जीएसटीएनची विंडो पुन्हा खुली

≪ Previous: ​ बेकायदा गर्भपातप्रकरणी कोठडीघरातच सुरू होता गर्भपाताचा धंदा

$

0

0

म. टा. वृत्तसेवा, सोलापूर

सोलापुरातील बंद पडलेल्या जुनी मिलच्या जागेवर सर्वप्रथम कामगारांचा हक्क असताना संघर्ष समितीचे संस्थापक कुमार करजगी यांनी यातील अडीच एकर जागा सहकारमंत्री सुभाष देशमुख यांचे पुत्र रोहन देशमुख यांना विकलीच कशी, मंत्रिपदावर असणारे देशमुख यांनी या बाबत खुलासा करावा अन्यथा मुख्यमंत्री देवेंद्र फडणवीस यांच्याकडे आपण चौकशीची मागणी करणार आहोत, असा इशारा आम आदमी पार्टीच्या राष्ट्रीय कार्यकारिणीच्या सदस्य प्रीती शर्मा-मेनन यांनी केला. मंगळवारी सोलापुरात पत्रकार परिषदेत त्या बोलत होत्या.
दरम्यान मिलच्या जागेत माजी केंद्रीय गृहमंत्री सुशीलकुमार शिंदे यांचे एकेकाळचे अत्यंत विश्वासू आणि निकटवर्तीय असलेले स्वर्गीय विष्णुपंत कोठे यांनी शिंदे यांचे वडील संभाजीराव शिंदे यांच्या नावाने मोठी शाळा काढली असून, हे जागेचे दोनही व्यवहार बेकायदा आहेत. यासह अन्य जागाच्या खरेदी-विक्रीमध्ये सुमारे ४०० ते ५०० कोटींचा अपहार झाल्याचा गंभीर आरोपही मेनन यांनी केला आहे. जुनी मिलची एकूण १३५ एकर जागा होती. त्यापैकी कुमार करजगी यांनी ७५ एकर जागा वाटप आणि विकली. आणखी ३५ एकर जागा शिल्लक असून, त्यामधील ३२ एकर जागा जुनी मिल संघर्ष समितीमधील कामगार सदस्यांची आहे. त्यावर एकूण ८०० सदस्यांना ११०० प्लॉट देणे अपेक्षित असताना करजगी यांनी अद्यापही जागा सदस्यांना दिली नाही. आणखी २५ एकर जागाही गडप आहे. या प्रकरणी कामगारांनी न्यायालयाचे दरवाजे ठोठावले असता करजगी यांना न्यायालयाने अटक केली असून, ते सध्या कारागृहात आहेत.
करजगी जुनी मिल बेकार कामगार व वारसदार तसेच जनहित संघर्ष समिती काढली होती. त्यासाठी अनेक कामगार उपोषणाला बसले होते, जागा ताब्यात मिळाल्यानंतर करजगी यांनी उमा सहकारी गृहनिर्माण संस्था स्थापन करून सभासद करून घेतले आणि त्यांच्याकडून काही लाखांत रक्कम घेऊन त्यांना घरे बांधून देण्याचा शब्द दिला होता. मात्र, करजगी यांनी घरे सोडा जागा देण्यासही टाळाटाळ केली. तत्पूर्वी जुनी मिल जागेचा लिलाव होऊन प्लॉट क्रमांक एक ही जुनी मिल ज्या ठिकाणी उभी होती ती जागा संघर्ष समितीच्या ताब्यात मिळण्यापूर्वीच समितीचे अध्यक्ष कुमार करजगी व कुलमुखत्यार शरद मुथा यांनी संभाजीराव शिंदे विद्यालयास विकली. तसा नोंदणीकृत दस्तही २०-१२-१९८७ रोजी करण्यात आला असल्याचे मेनन यांनी सांगितले.
खऱ्या अर्थाने कौटुंबिक लाभासाठी धर्मादाय आयुक्तांची व्यवहारावर बंदी असताना जागा खरेदी विक्री व्यवहार झालाच कसा, असा संशयही मेनन यांनी उपस्थित केला आहे. २००१ साली जुनी मिलच्या जागेबाबत कोणत्याही प्रकारचे व्यवहार करू नयेत असे आदेश खुद्द सहायक धर्मादाय आयुक्त लातूर (सद्या पुणे) यांनी दिले असतानाही त्यांच्या आदेशाला केराची टोपली दाखविण्यात आली असून, या शिवाय आता या जागेवर मोठे मॉल, व्यापारी संकुल उभारून करोडो रुपयांचा गैर व्यवहार झाल्याचे सांगत या प्रकरणी चौकशी करण्याची मागणी करण्यात आल्याचे मेनन यांनी सांगितले. कामगारांना तसेच सभासदांना घरे न मिळाल्यास आणि मंत्र्यांनी बेकायदा प्लॉटबाबत खुलासा न केल्यास राज्यभरात आंदोलन उभे करण्याचा इशाराही मेनन यांनी दिला आहे.

मेनन यांच्याविरुद्ध अब्रुनुकसानीचा दावा ठोकणार

आपच्या प्रीती मेनन यांचे आरोप धादांत खोटे आहेत. प्रसिद्धी मिळविण्यासाठी त्यांचा हा खटाटोप दिसतोय. कोणतेही कागदोपत्री पुरावे नसताना मेनन यांनी देशमुख परिवारावर आरोप केले आहेत. आपल्याबाबत जर त्यांच्याकडे सबळ पुरावे असते तर त्यानी माझ्याविरोधात न्यायालयात तक्रार दाखल करावी आणि सिद्ध करून दाखवावे. मी मेनन यांच्याविरोधात अब्रुनुकसानीचा दावा ठोकणार आहे, अशी माहिती रोहन देशमुख यांनी दिली आहे. आमची कोणतीही जागा जुनी मिलमध्ये नाही, हे मी छातीठिकापणे सांगतो असेही रोहन म्हणाले.

मोबाइल अॅप डाउनलोड करा आणि राहा अपडेट

जीएसटीएनची विंडो पुन्हा खुली

June 27, 2017, 2:30 pm

≫ Next: हेल्मेटने बचावले चार जीव

≪ Previous: ​ जुनी मिलमध्ये सहकारमंत्री देशमुखांचाअडीच एकराचा बेकायदा भूखंडआपच्या प्रीती शर्मा-मेनन यांचा आरोप

$

0

0

म. टा. प्रतिनिधी, कोल्हापूर

वस्तू आणि सेवाकर कायद्याच्या (जीएसटी) अंतिम टप्प्यातील नोंदणीसाठी जीएसटीएन नेटवर्कने २५ जूनपासून जीएसटीएन विंडो पुन्हा खुली केली. त्यामुळे आता प्रोव्हिजनल आयडी मिळालेल्यांना कागदपत्रे जमा करता येणार आहेत. २५ जूनपासून पुढील तीन महिने कागदपत्रे जमा करण्याची प्रक्रिया सुरू राहील, असे विक्रीकर विभागातील अधिकाऱ्यांनी सांगितले.

जीएसटीची दुसऱ्या टप्प्यातील नोंदणी १५ जूननंतर बंद करण्यात आली होती. त्यामुळे केवळ प्रोव्हिजनल आयडी मिळालेल्यांना कागदपत्रे जमा करताना अडचण होत होती. मात्र, गेल्या दोन दिवसांत विंडो पुन्हा खुली झाल्याने व्यापारी आणि व्यवसायिकांना जीएसटी नोंदणीसाठी आवश्यक कागदपत्रे अपलोड करण्याची संधी मिळणार आहे. अपलोडिंगसाठी तीन महिन्यांचा अवधी देण्यात आला आहे. त्यामुळे जीएसटीची अंमलबजावणी सुरू झाल्यानंतरही ही प्रक्रिया सुरू राहणार असल्याचे स्पष्ट होत आहे. कोल्हापूर विक्रीकर विभागांतर्गत ९० टक्के व्यापारी, व्यवसायिक आणि उद्योजकांना प्रोव्हिजनल आयडी देण्यात आला आहे. हा प्रोव्हिजनल आयडीच पुढे जीएसटी आयडी होणार आहे. त्यामुळे हा आयडी म्हणजे जीएसटी नोंदणीतील निम्मी प्रक्रिया पूर्ण झाल्याचे मानले जाते.

७१ हजार डिलर्सची नोंदणी अपेक्षित

कोल्हापुरातील ७१ हजार डिलर्सची अधिकृत जीएसटी नोंदणी अपेक्षित आहे. त्यातील ९० टक्के जणांना प्रोव्हिजनल आयडी देण्यात आला असून, त्यातील ४१ हजार जणांनी आपली कागदपत्रे जीएसटी विंडोद्वारे अपलोड करून, डिजिटल सिग्नेचरसह अंतिम प्रक्रिया पूर्ण केली आहे. प्रक्रिया पूर्ण केलेल्यांची सहा जूनपर्यंतची माहिती उपलब्ध आहे. त्यानंतर ७ जून ते १५ जूनपर्यंतची नोंदणीची माहिती येत्या दोन दिवसांत उपलब्ध होणार असल्याचे विक्रीकर विभागाती जीएसटी विभागाचे विशेष अधिकारी सचिन जोशी यांनी ‘महाराष्ट्र टाइम्स’शी बोलताना सांगितले.

मदत कक्ष सुरू

विक्रीकर विभागाने कोल्हापुरातील व्यापारी, व्यवसायिकांच्या अडचणी दूर करण्यासाठी मदत कक्ष सुरू केला आहे. सकाळी दहा ते सायंकाळी या कार्यालयीन वेळेत येथे संपर्क साधता येणार आहे. तेथे जीएसटीशी संबंधित सर्व शंकांचे निरसन केले जाईल. तेथे (०२३१) २६८९२२२ या क्रमांकावर थेट संपर्क साधता येणार आहे, तसेच helpdesk.kolhapur@gmail.com या ई-मेलवरूनही शंका आणि प्रश्न विचारता येणार आहेत, असे विक्रीकर विभागाच्या सूत्रांनी सांगितले.

महा ई-सेवा केंद्रातही सुविधा

पहिल्यांदा जीएसटी नोंदणी करत असणाऱ्यांमध्ये ग्रामीण भागातील व्यापाऱ्यांची संख्या कमी आहे. त्यांना काही आवश्यक कागदपत्रे जीएसटी विंडोमध्ये अपलोड करावी लागतात. जिल्ह्यात ग्रामीण भागातील व्यापाऱ्यांसाठी सरकारने महा ई-सेवा केंद्रांमध्येही याची सुविधा उपलब्ध करून दिली आहे. पहिल्यांदा जीएसटी नोंदणी करणाऱ्यांना सुविधा देण्यासाठी महा ई-सेवा केंद्रधारकांना प्रशिक्षणही देण्यात आले आहे. सोमवारी (ता. २६) हे प्रशिक्षण पूर्ण झाले. जिल्ह्यात २६१ महा ई-सेवा केंद्रे असल्याने याचा जीएसटी नोंदणीसाठी चांगला फायदा होईल, अशी अपेक्षा आहे.

मोबाइल अॅप डाउनलोड करा आणि राहा अपडेट

हेल्मेटने बचावले चार जीव

June 27, 2017, 2:30 pm

≫ Next: राजर्षी शाहूंचा विचार पुढे न्या

≪ Previous: जीएसटीएनची विंडो पुन्हा खुली

$

0

0

कोल्हापूर टाइम्स टीम

पोलिसांनी महामार्गांवर सुरू केलेल्या हेल्मेट सक्तीमुळे जिल्ह्यात गेल्या दोन दिवसांत चौघांचे जीव बचावले. रोहन मिरजे आणि धोंडीराम सुतार हे दोघे अपघातात बचावले असून, या दोघांनीही पोलिसांनी सुरू केलेल्या हेल्मेट सक्तीचे आभार मानले आहेत. हेल्मेट सक्तीला विरोध करणाऱ्यांना या दोन घटनांनी चांगला धडा दिला असून, सुरक्षित प्रवासासाठी हेल्मेट अत्यावश्यक असल्याचेच स्पष्ट केले आहे.

विशेष पोलिस महानिरीक्षक विश्वास नांगरे-पाटील यांनी परिक्षेत्रातील राज्य आणि राष्ट्रीय महामार्गांवर दुचाकीस्वारांसाठी हेल्मेच वापरणे सक्तीचे केले आहे. याविरोधात काही संघटनांसह दुचाकीस्वारांनी हेल्मेट सक्तीला विरोध करून पोलिसांच्या हेल्मेटसक्ती मोहिमेच्या विरोधात सोशल मीडियात नाराजी व्यक्त केली. दुचाकीस्वारांकडून पैसे उकळण्यासाठीच पोलिसांची मोहीम सुरू असल्याचे आरोपही काहींनी केले. मात्र प्रत्यक्षात महामार्गांवरील प्रवासात हेल्मेट किती गरजेचे आहे ते अपघातांच्या घटनांवरूनच स्पष्ट होते. गेल्या तीन दिवसांत शहरात दोन अपघातांमध्ये हेल्मेटच्या वापरानेच चौघांचे जीव वाचवले आहेत. रविवारी पुणे-बेंगळुरू महामार्गावर अंबप फाटा येथे रस्त्याकडेला उभ्या असलेल्या ट्रकला दुचाकीस्वाराने पाठीमागून धडक दिली. अपघातातील रोहन मिरजे या तरुणाने हेल्मेट परिधान केले होते, त्यामुळे त्याच्या डोक्याला इजा झाली नाही. अन्यथा थेट ट्रकवर धडकलेल्या रोहनचा कपाळमोक्ष झाला असता.

सोमवारी जोतिबा केर्ली मार्गावरील एका वळणावर दुचाकीस्वाराचे नियंत्रण सुटून दुचाकी थेट रस्त्याकडेच्या झाडावर आदळली. या अपघातात वळीवडे येथील धोंडीराम आनंदा सुतार, त्यांची पत्नी सावित्री आणि मुलगा कुश हे तिघे जखमी झाले. जोतिबाला जाण्यापूर्वी धोंडीराम यांनी गल्लीतील एका मित्राचे हेल्मेट मागून आणले होते. सुदैवाने हेल्मेट डोक्यावर असल्यानेच मोठा अनर्थ टळला. झाडावर आदळल्याने त्यांच्या हेल्मेटला तडा गेला. मात्र डोक्याला इजा झाली नाही. हेल्मेट नसते तर पुढील भयानक अपघाताची कल्पनाही करणे अवघड आहे. या दोन्ही अपघातातील जखमींची प्रकृती उपचारानंतर ठिक आहे. विशेष म्हणजे हे दोघेही दोन्ही कुटुंबातील कर्ते पुरुष आहेत. दुर्दैवाने यांचे बरेवाईट झाले असते, तर संपूर्ण कुटुंबच उद्धवस्त झाले असते. अपघातानंतर दोन्ही जखमींनी पोलिसांनी सुरू केलेल्या हेल्मेट सक्तीचे आभार मानले आहेत. ००००

जोतिबाला जाताना मी मित्राचे हेल्मेट घेऊन गेलो होतो. केर्लीजवळ रस्त्याकडेच्या झाडावर आदळून आमच्या दुचाकीला अपघात झाला. अपघातात माझे डोके झाडावर आपटले. सुदैवाने हेल्मेटमुळे किरकोळ जखमेवर हा अपघात निभावला.

धोंडीराम सुतार, अपघातातील जखमी

हेल्मेट सुरक्षेचा व्हिडिओ

केर्ली येथील अपघातातील जखमींवर १०८ रुग्णवाहिकेतील डॉ. अभिजित जाधव यांनी प्राथमिक उपचार करून सीपीआरमध्ये दाखल केले. हेल्मेटमुळे अपघातातील दुचाकीस्वार धोंडीराम सुतार आणि त्यांचे कुटुंबीय वाचल्याचे लक्षात येताच डॉ. जाधव यांनी अपघातस्थळावरूनच हेल्मेटमुळे होणाऱ्या सुरक्षेची माहिती देणारा व्हिडीओ तयार केला. हेल्मेट सक्तीला विरोध करणाऱ्यांना या व्हिडिओ सध्या सोशल मीडियातून बिनतोड उत्तर देत आहे.

मोबाइल अॅप डाउनलोड करा आणि राहा अपडेट

राजर्षी शाहूंचा विचार पुढे न्या

June 27, 2017, 2:30 pm

≫ Next: ‘जीएसटीसाठी स्वयंशिस्त पाळा’

≪ Previous: हेल्मेटने बचावले चार जीव

$

0

0

ज्येष्ठ शास्त्रज्ञ डॉ. माशेलकर यांचे आवाहन

म. टा. प्रतिनिधी, कोल्हापूर

‘राजर्षी छत्रपती शाहू महाराजांनी शंभर वर्षांपूर्वी शिक्षणाचा मूलभूत विचार मांडला. तो मोठ्या प्रयत्नाने कृतीत उतरवला. त्यांनी केलेली विकासाची मांडणी जगाच्याही पुढे होती. आजच्या मेक-इन-इंडियाच्या कल्पनेला ज्ञान-विज्ञान-तंत्रज्ञानाची जोड दिली पाहिजे,’ अशा शब्दांत शाहू महाराजांच्या विचारांची सांगड घालत हा विचार पुढे न्या, असे आवाहन पद्मविभूषण डॉ. रघुनाथ माशेलकर यांनी येथे सोमवारी केले.

राजर्षी शाहू छत्रपती मेमोरियल ट्रस्टतर्फे दिला जाणारा राजर्षी शाहू पुरस्कार स्वीकारल्यानंतर ते बोलत होते. अध्यक्षस्थानी पालकमंत्री चंद्रकांत पाटील होते. श्रीमंत शाहू महाराज छत्रपती यांच्या हस्ते मानपत्र, रोख एक लाख रुपये, स्मृतिचिन्ह, शाल, श्रीफळ देऊन डॉ. माशेलकर यांना सन्मानित करण्यात आले. यावेळी त्यांच्या पत्नी वैशाली माशेलकर उपस्थित होत्या. शाहू स्मारक भवनात आयोजित सोहळ्याला मोठी गर्दी होती.

ते पुढे म्हणाले, ‘मेक इन इंडियापेक्षा स्वतः संशोधन करून उत्पादन तयार केल्यास बेरोजगांराच्या ज्ञानाला चालना आणि हाताला काम मिळेल. आताच्या शिक्षण पद्धतीमध्ये बदल करणे काळाची गरज आहे. रोबोटिक तंत्रज्ञानाने वस्त्रोद्योग, चप्पल उत्पादनातील मनुष्यबळ कमी झाले आहे. परिणामी अनेकांवर बेरोजगार होण्याची वेळ आली. भविष्यात रोजगारासाठी तंत्रज्ञानाधारित शिक्षण दिले पाहिजे. काळाच्या ओघात गुरूकुल, गुरू-शिष्य अध्यापन पद्धती मागे पडली. आता डिजिटल अध्यापन पद्धती आली. त्याचा स्वीकार करीत ज्ञान, विज्ञान, तंत्रज्ञानाचा सामावेश असलेली शिक्षण पद्धती अमलात आणण्यासाठी विद्यापीठांनी पुढाकार घ्यावा.’

मोबाइल अॅप डाउनलोड करा आणि राहा अपडेट

‘जीएसटीसाठी स्वयंशिस्त पाळा’

June 27, 2017, 2:30 pm

≫ Next: जीएसटीबाबत व्यापारी बेफिकीर

≪ Previous: राजर्षी शाहूंचा विचार पुढे न्या

$

0

0

म. टा. प्रतिनिधी, कोल्हापूर

‘गुड्स अॅन्ड सर्व्हिस टॅक्स अर्थात जीएसटीची अंमलबजावणी १ जुलैपासून होत आहे. पूर्वीच्या टॅक्स धोरणाच्या तुलनेत यात जास्त रिटर्न भरावे लागणार आहेत. त्यासाठी स्वयंशिस्त हाच मार्ग आहे. त्यामुळे प्रत्येकाने महिन्याचे अकाउंटिंग काटेकोर पद्धतीने करावे,’ असा सल्ला इनडायरेक्ट टॅक्सेसचे बोर्ड ऑफ मेंबर, सीए चेतन ओसवाल यांनी व्यापारी आणि उद्योजकांना दिला. कोल्हापूर जिल्हा व्यापारी व उद्योजक महासंघाने मंगळवारी आयोजित केलेल्या जीएसटी कार्यशाळेत ते बोलत होते. केशवराव भोसले नाट्यगृहात झालेल्या शिबिरास शहर आणि जिल्ह्यातील व्यापाऱ्यांचा प्रतिसाद मिळाला.

शिबिरात सीए ओसवाल यांनी जीएसटी कर प्रणालीतील बारकावे सोप्या भाषेत सांगितले. ते म्हणाले, ‘पूर्वीच्या करप्रणालीत वर्षातून एकदा अकाउंटिंग करणे, काही अडजेस्टमेंट करून वर्षाअखेरीस किंवा नंतर दिलेल्या मुदतीत टॅक्स भरणे, अशा सवयी आपल्या अंगवळणी पडल्या आहेत. जीएसटीमध्ये हा प्रकार इतिहासजमा होणार आहे. वर्षअखेरीस नव्हे, तर प्रत्येक महिन्याला अकाउंट काटेकोरपणे ठेवावे लागणार आहेत. तरच महिन्याला तीन वेळा ऑनलाइन रिटर्न भरणे शक्य होणार आहे. त्यामुळे व्यवसायाला वेगळी शिस्त लागून त्यातून अकाउंटिंग व्यवस्थित ठेवणे गरजेचे आहे.’

सीए ओसवाल यांच्याबरोबरच टॅली सॉफ्टवेअरचे पार्टनर संजीव शिवापूरकर यांनी प्रत्यक्ष काम करतानाच्या सॉफ्टवेअरचे पॉवर पॉइंट प्रेझेंटेशन केले. सॉफ्टवेअरमध्ये कोणतीही चूक स्वीकारता येत नसल्याने कार्यपद्धती सोपी असल्याचे शिवापूरकर यांनी स्पष्ट केले. महासंघाचे अध्यक्ष सदानंद कोरगावकर, संचालक अमर क्षीरसागर, विनोद कटारिया, सचिन शहा, अमोल नष्टे, संतोष लाड, संजय रामचंदाणी, बाबा महाडिक यांच्यासह व्यापारी मोठ्या संख्येने उपस्थित होते.

प्रत्येकाचे जीएसटी रेटिंग

सप्लाय चेनमध्ये एखादा पुरवठादार जीएसटीचे रिटर्न व्यवस्थित भरत नसेल, तर त्याचा फटका त्याने व्यापार केलेल्या व्यक्तीला बसण्याची शक्यता आहे. यावरून अनेकांच्या मनात शंका आहेत. व्यापार कोणाशी करावा आणि समोरचा व्यापारी काटेकोरपणे नियम पाळत आहे का हे कसे तपासावे, असा प्रश्न व्यापाऱ्यांतून उपस्थित होत आहे. त्यावर सीए ओसवाल म्हणाले, ‘बँकांकडून कर्जदारांचे जसे क्रेडिट रेटिंग केले जाते, त्याप्रमाणे प्रत्येक व्यापाऱ्याचे जीएसटी रेटिंग जाहीर केले जाणार आहे. संबंधिताच्या जीएसटी नंबरवरून हे रेटिंग पाहता येणार आहे. त्यावरून समोरच्या व्यक्तीशी व्यापार करण्याविषयी निर्णय घेता येईल.’

जीएसटीतील महत्त्वाचे

- नोंदणी नसलेल्यांकडून माल खरेदी केल्यास रिव्हर्स चार्ज लागणार

- रिव्हर्स चार्जवर मर्यादा घालण्याचा केंद्र सरकारचा विचार; अद्याप निर्णय नाही

- जीएसटी नंबर दुकानाच्या फलकावर, कारखाना, गोदामावर लिहावा लागणार

- व्यवसायाची बदललेली ठिकाणे जीएसटीत नोंदवावी लागणार

- व्यवसायातील सर्व उत्पादने, सेवांची जीएसटीत नोंदणी अत्यावश्यक

- ट्रान्सपोर्ट व्यवसायिकांना जीएसटी एनरोलमेंट नंबर घेणे गरजेचे

मोबाइल अॅप डाउनलोड करा आणि राहा अपडेट

---

जीएसटीबाबत व्यापारी बेफिकीर

June 27, 2017, 2:30 pm

≫ Next: बांधकाम कामगारांचे १७ कोटी पडून

≪ Previous: ‘जीएसटीसाठी स्वयंशिस्त पाळा’

$

0

0

म. टा. प्रतिनिधी, कोल्हापूर

देशातील करप्रणालीत एकसूत्रता आणुन सुधारणा आणणारी जीएसटी करप्रणाली अंमलबजावणीच्या तोंडावर असतानाही, कोल्हापुरात अनेक व्यापारी आणि व्यवसायिक याबाबत निष्काळजीपणा दाखवत आहेत. करप्रणालीची अंमलबजावणी अवघ्या तीन-चार दिवसांवर आली असताना अनेकांची त्यासाठी तयारी नसल्याचे दिसून येत आहे. सरकार, विक्रीकर विभाग, व्यापारी संस्था, सीए यांच्याकडून मोठ्या प्रमाणावर प्रशिक्षण कार्यक्रम राबविण्यात आले. मात्र, अनेक व्यापारी आणि व्यवसायिकांनी त्याकडे दुर्लक्ष केल्याचे दिसत आहे.

अडथळ्यांची शर्यत पार करत केंद्र सरकारने जीएसटी कायद्याला मंजुरी मिळविली. शनिवारपासून (ता. १ जुलै) हा कायदा लागू होणार असून, संपूर्ण देशासाठी एकच कर प्रणाली लागू होत आहे. या कर प्रणालीत महिन्याला ठराविक वेळा आणि अतिशय काटेकोरपणे वेळेत रिटर्न्स भरावे लागणार आहेत. या कर पद्धतीमुळे एकूणच व्यापाराची पद्धत बदलणार असून, विनाबिल व्यवसाय करता येणे अशक्यच होणार आहे. ही पद्धत लागू होताना प्रत्येक व्यवसायिक, व्यापाऱ्याने किंवा उद्योजकांना आपल्या अकाउंटिंग आणि इतर कामकाजात बदल करून घ्यावे लागणार आहेत. असे असतानाही कोल्हापूर शहर आणि जिल्ह्यात अनेकांनी जीएसटीसाठी लागणाऱ्या गोष्टींची तरतूद करण्यात निष्काळजीपणा दाखविला आहे. प्रत्यक्ष करप्रणाली लागू झाल्यानंतर त्यांना याचे परिणाम दिसणार आहेत असे तज्ज्ञांचे म्हणणे आहे.

जीएसटीमध्ये रिटर्न भरताना एखादी चूक स्थानिक व्यापारी वर्गाकडून झाली नाही, मात्र, त्या व्यापाऱ्या माल पुरवठा करणारा व्यापारी चुकला, तर त्याचा फटाका अकारण दुसऱ्या व्यापाऱ्यालाही बसण्याची शक्यता आहे. त्यामुळे या साखळीतील प्रत्येकाने त्याची जबाबदारी नीट पार पाडली आहे का?, याची काळजी घेणे महत्त्वाचे असल्याचे तज्ज्ञांचे म्हणणे आहे. त्यासाठीच जीएसटीची शास्त्रोक्त आणि बिनचूक माहिती करून घेणे महत्त्वाचे असल्याचे तज्ज्ञ सांगतात. कोल्हापुरात अनेकांनी पैसे वाचविण्यासाठी फ्री सेमिनारला उपस्थिती लावून स्वतःचा आणखी गोंधळ उडवून घेतला आहे. कर लागू झाल्यानंतर व्यापारी क्षेत्रातील प्रत्येकाचे प्रश्न वेगळे असणार आहेत. त्यामुळे त्यांचा सामना करण्यासाठी पूर्वतयारीनेच मैदानात उतरणे गरजेचे आहे.

स्लॅब केवळ ग्राहकांसाठीच?

सरकारने काही दिवसांपूर्वी जीएसटीच्या टक्केवारीचे स्लॅब जाहीर केले आहेत. हे स्लॅब जाहीर होण्यापूर्वी अनेकांनी ‘स्लॅब जाहीर होऊ देत’, असे म्हणत जीएसटी टाळण्याचा प्रयत्न केला. पण, स्लॅब हे केवळ ग्राहकाला वस्तू स्वस्त की महाग याविषयीची उत्सुकता म्हणून महत्त्वाचे आहेत. त्यामुळे त्या व्यतिरिक्त जीएसटी करप्रणालीतील इतर महत्त्वाच्या गोष्टींकडे दुर्लक्ष करून चालणार नसल्याचे अनेकांच्या लक्षात आलेला नाही. त्यामुळे इतर सर्व गोष्टी बाजूला ठेवून जीएसटी समजून घेण्याचा प्रयत्न व्यापारी, व्यवसायिकांनी केला पाहिजे असे तज्ज्ञांचे म्हणणे आहे.


एक जुलैपासून लागू होत असलेली देशव्यापी नवी करप्रणाली योग्य पद्धतीने शिकून घेऊन व्यवसाय करावा किंवा व्यवसाय करताना धक्के खाऊन चुकांमधून जीएसटी शिकावा असे दोनच पर्याय व्यापारी, व्यवसायिकांपुढे आहेच. यातील दुसरा पर्याय निश्चित नुकसान करणारा असल्याने योग्य कन्सल्टंटकडून जीएसटीबाबत मार्गदर्शन करूनच व्यापाऱ्यांनी व्यवसायातील या बदलांसाठी सज्ज व्हायला हवे.

- चेतन ओसवाल, सीए आणि जीएसटी तज्ज्ञ

मोबाइल अॅप डाउनलोड करा आणि राहा अपडेट

बांधकाम कामगारांचे १७ कोटी पडून

June 27, 2017, 2:30 pm

≫ Next: वनमहोत्सव केंद्रांवर रोप विक्री सुरू

≪ Previous: जीएसटीबाबत व्यापारी बेफिकीर

$

0

0

Maruti.Patil@ timesgroup.com

Tweet : @MarutipatilMT

कोल्हापूर : नोंदणीकृत बांधकाम कामगारांना महाराष्ट्र इमारत आणि इतर बांधकाम कल्याणकारी मंडळाकडून १७ कोटी ५० लाख रुपयांचा निधी आला आहे. मात्र बोगस नोंदणी केलेल्या कामगारांना निधी मिळाल्यास कामगार आयुक्तांवरच कारवाई करण्याचे आदेश राज्य सरकारने दिले आहेत. त्यामुळे निधी वाटपास कामगार कार्यालयाकडून टाळाटाळ होत आहे. गेल्या दोन महिन्यांपासून ३५ हजार प्राप्त कामगारांना निधी पडून राहिला आहे.

गवंडी, सेंट्रिंग, सुतार, फरशी पॉलिश, वायरमन, वेल्डर आणि इतर बांधकाम कामगारांना साहित्य खरेदीसाठी कामगार आयुक्त कार्यालयाकडे नोंदणी झाल्यानंतर पाच हजार अर्थसाह्य देण्याची मागणी कामगार संघटनांनी केली होती. मागणीसाठी मुंबईत नोव्हेंबर २०१५ मध्ये सर्व संघटनांनी मोर्चाही काढला. कामगारांच्या मागणीनुसार महाराष्ट्र इमारत व इतर बांधकाम कल्याणकारी मंडळाने ही मागणी राज्य सरकारकडे केली. केंद्र आणि राज्य सरकारमधील परवानगीमुळे हा प्रश्न निकालात निघू शकला नव्हता. कामगार संघटना व मंडळाने केंद्रीय पातळीवर पाठपुरावा केल्यानंतर केंद्र सरकारने जानेवारी २०१७ मध्ये राज्य सरकारला निर्णय घेण्याची स्वायत्तता दिली. त्यानंतर राज्य सरकारने एक मार्च २०१७ रोजी नोंदणीकृत व नूतनीकरण झालेल्या कामगारांना पाच हजार रुपये अर्थसाह्य देण्याचा आदेश काढला.

मात्र आदेशामध्ये राज्य सरकारने यातील बोगस कामगारांना निधी दिल्यास कामगार आयुक्तांवरच कारवाई करण्याचा इशारा देण्यात आला आहे. त्यामुळे कामगार कार्यालय जोखीम घ्यायला तयार नाही. पर्यायाने पात्र कामगारही निधीपासून वंचित आहेत. कामगारांची नोंदणी ग्रामस्तरावर ग्रामसेवक, महापालिका व नगरपालिका क्षेत्रात आयुक्त व मुख्याधिकाऱ्यांकडे होती. कागदपत्रांची छाननी केल्यानंतर नोंदणीसाठी कामगार आयुक्त कार्यालयाकडे पाठवले जाते. मात्र क्लिष्ट प्रक्रिया असूनही मिळालेला निधी वितरित करण्यास कामगार कार्यालय असमर्थता दाखवत आहे. जिल्ह्यात सुमारे एक लाख बांधकाम कामगार आहेत. यातील ३८ हजार कामगारांची नोंदणी व नूतनीकरण झालेले नाही. नोंदणी झालेल्या ६२ हजारांपैकी ३५ हजार कामगार पात्र ठरलेले आहेत.


संघटना ताकद लावणार

बांधकाम कामगारांना शिष्यवृत्ती, विमा व अन्य लाभ मिळतात. जिल्ह्यातील कामगारांची अशा लाभसाठी नोंदणी करण्यात कामगार संघटना व्यस्त आहेत. त्यामुळे निधी प्राप्त होऊनही त्यासाठी संघटनांनी ताकद लावलेली नाही. मात्र अन्य लाभाची नोंदणी झाल्यानंतर आलेला निधी मिळण्यासाठी जोरदार प्रयत्न केले जाणार असल्याचे कामगार प्रतिनिधीने सांगितले.



राज्यातील नोंदणीकृत कामगार - पाच लाख

जिल्ह्यातील नोंदणीकृत कामगार - ६२ हजार

कोल्हापूर - ५४ हजार

इचलकरंजी - सहा हजार

निधीसाठी पात्र कामगार - ३५ हजार

मगारांसाठी आवश्यक निकष

नोंदणीनंतर साहित्य खरेदीसाठी तत्काळ रक्कम

महामंडळाकडे सलग तीन वर्षे नोंदणी आवश्यक

विहित नमुन्यातील अर्ज बंधनकारक

अर्थसाह्य थेट बँक खात्यावर

कुटुंबातील फक्त एका व्यक्तीस अर्थसाह्य

तीन वर्षांच्या नोंदणीनंतर पुन्हा लाभ

…………………

अधिकारी निधी वाटपास अकार्यक्षम असतील तर महामंडळाने स्वतंत्र कर्मचाऱ्यांची नेमणूक करावी, अशी आम्ही मागणी केली आहे. त्यासाठी स्वतंत्र कायदाही केला आहे. मात्र सध्याच्या सरकारचे लक्ष कामगारांपेक्षा मालकांकडे जास्त असल्याने अडीच वर्षांपासून ही मागणी प्रलंबीत राहिली आहे.

भरमा कांबळे, कार्याध्यक्ष, राज्य बांधकाम फेडरेशन

मोबाइल अॅप डाउनलोड करा आणि राहा अपडेट

वनमहोत्सव केंद्रांवर रोप विक्री सुरू

June 27, 2017, 2:30 pm

≫ Next: शालिनी सिनेटोनसाठी एकवटले कलाकार

≪ Previous: बांधकाम कामगारांचे १७ कोटी पडून

$

0

0

म. टा. प्रतिनिधी, कोल्हापूर

कोल्हापूर वनविभागाने ‘रोप आपल्या दारी’ या योजनेअंतर्गत जिल्ह्यात १२ वनमहोत्सव केंद्रांवर रोप विक्री सुरू केली आहे. नागरिकांचा रोप विक्रीला चांगला प्रतिसाद मिळत आहे. विभागाने पाच दिवसांत दीड लाख रोप विक्रीचे उद्दिष्ट ठेवले आहे. शहरात बिंदू चौक, ताराबाई पार्क येथील पितळी गणपती मंदिर, शिवाजी विद्यापीठ चौक आणि रंकाळा तलाव या ठिकाणी विक्री केंद्रे आहेत.

राज्य सरकारने एक जुलै रोजी चार कोटी वृक्षलागवडीचा संकल्प केला आहे. कोल्हापूर जिल्ह्यात आठ लाख १९ हजार ५३० वृक्षलागवडीचे उद्दिष्ट ठेवले आहे. योजनेत ४७ सरकारी कार्यालये सहभागी होणार आहेत. सामाजिक संस्था आणि नागरिकांना यातसहभागी होण्याचे आवाहन केले आहे. त्यासाठी ‘रोप आपल्या दारी’ या उपक्रमांतर्गत वनखात्याने सहा ते दहा रुपये अशा सवलतीच्या दरात रोपविक्री सुरू केली आहे. रोपविक्रीस शनिवारी सुरुवात झाली. शुक्रवारपर्यंत (ता. ३०) रोपविक्री होणार आहे.

मंगळवारी रोप खरेदीसाठी नागरिकांनी रांगा लावल्या. बिंदू चौक, ताराबाई पार्क, शिवाजी विद्यापीठ, रंकाळा तलाव या केंद्रावरही चांगला प्रतिसाद लाभला आहे. इचलकरंजी येथे डीकेटीई कॉलेज, एसटी स्टँड, नगरपालिका, राणी बाग येथे रोप विक्री सुरू आहे. गडहिंग्लज येथे बसस्टँड, मार्केट यार्ड, शिवराज कॉलेज, आयोध्यानगर बसस्टॉप येथे विक्री सुरू आहे. प्रत्येक केंद्रातून १० ते १५ हजार रोपांची विक्री केली जाणार आहे. प्रत्येक नागरिकाला पाच रोपे खरेदी करता येतात. गृहनिर्माण संस्थांसह अन्य संस्थांना २५ रोपे खरेदी करण्याची सवलत दिली आहे. खरेदी केलेली रोपे संस्थांना वृक्षारोपणाच्या ठिकाणी पोहोच केली जाणार आहेत. रोप खरेदी करणाऱ्या व्यक्तीचा पत्ता, मोबाइल क्रमांक लिहून घेतला जात आहे. रोपांच्या वाहतुकीसाठी वृक्षमित्रांची नियुक्ती करण्यात आली आहे.

राज्य सरकारच्या वृक्षलागवडीत नागरिकांचा सहभाग वाढावा यासाठी ‘ना नफा ना तोटा’ तत्वानुसार रोपांची विक्री केली सुरू आहे. मागणी वाढल्यास रोप विक्री केंद्रांची संख्या वाढवता येईल.

प्रभुनाथ शुक्ल, उपवनसंरक्षक

एक वाजेपर्यंत सवलत

एक जुलै रोजी राज्यात वृक्षलागवड मोहीम असेल. जिल्ह्यातील ४७ सरकारी व निमसरकारी विभाग योजनेत सहभागी होणार आहेत. सकाळी सहा ते दुपारी एक वाजेपर्यंत वृक्षलागवड करण्यात येणार आहे. योजनेत सहभागी होणाऱ्या सरकारी कर्मचाऱ्यांना कार्यालयात एक वाजेपर्यंत, उशीरा येण्याची सवलत सरकारने जाहीर केली आहे.

रोपांचे दर असे

- सुबाभूळ, ग्लिरीसिडीया, भेंडी, बाभूळ, खैर, निलगिरी, प्रोसोपिस, महारुख, पांगारा, अंजन, निम, सुरु, काशिद, शिरस, बकैन, लिंबू, ऑस्टेलियन, अॅकेशिया, बाभूळ, करंज, सावर, विलायती चिंच, चिंच, बोर, आवळा, सिताफळ, शेवगा, जांभूळ, हादगा, रायवळ आंबा, मोहा, कवठ, बेहडा, हिरडा, वड, उंबर, पिंपळ, बिबा, खिरणी, रामफळ (सुटी रोपे ५.५० रुपये, पॉलिथिन पिशवी ६.०० रुपये)

- काजू, रातांबा, चारोळी (सुटी रोपे ८ रुपये, पॉलिथन पिशवी १५ रुपये)

- शिवाण, बिजा, बांबू, साग (सुटी रोपे ६ रुपये, पॉलिथन पिशवी ७ रुपये)

- घायपात, कंद, खस, गवत, थोंब २० सेंटीमीटर उंचीचे (१२ रुपये किलो)

- सिल्व्हर ओक, स्पॅथोडिया, गुलमोहर, जॅकरांडा, अमलतास, अॅक्रोकार्पस, इंडियन कॉर्क, बॉटल ब्रेश, चाफा, रेन ट्री, पेल्टोफोरम, कांचन, पारिजात (सुटी रोपे ९ रुपये, पॉलिथन पिशवी ११ रुपये)

- रातराणी, बोगनवेल, क्रोटॉन, ड्युरांडा, मोगरा (पॉलिथन पिशवी ६ रुपये)

- वड, भेंडी, पांगारा, शेवगा, चाफा, सांबर, महारुख, पॉपलर, तुती, उंचीने मोठी रोपे (पॉलिथन पिशवी १६ रुपये)

- डुपिंग, अशोक, चंदन (पॉलिथन पिशवी ३० रुपये)

- ख्रिसमस ट्री, पिवळा बांबू, थूजा, पाईन्स (पॉलिथन पिशवी ४५)

मोबाइल अॅप डाउनलोड करा आणि राहा अपडेट

शालिनी सिनेटोनसाठी एकवटले कलाकार

June 27, 2017, 2:30 pm

≫ Next: दोन हजारांवर दुचाकीस्वारांवर कारवाई

≪ Previous: वनमहोत्सव केंद्रांवर रोप विक्री सुरू

$

0

0

म. टा. प्रतिनिधी, कोल्हापूर

शालिनी सिनेटोनअंतर्गत ​चित्रपटाच्या चित्रीकरणासाठी राखीव असलेल्या पाच आणि सहा क्रमांकाच्या भूखंडावर बिल्डर लॉबीकडून घुसखोरी सुरू असल्यामुळे शालिनी सिनेटोनची जागा वाचवण्यासाठी मंगळवारी कलाकार एकवटले. आंदोलनाच्या माध्यमातून अखिल भारतीय मराठी चित्रपट महामंडळातर्फे शालिनी सिनेटोनच्या जागेवर सिनेटोनच्या नावाचा फलक लावण्यात आला. ही जागा चित्रीकरणासाठी आरक्षित करण्याबाबत महापालिकेच्या स्तरावर सहकार्य करण्याची मागणी शालिनी सिनेटोन बचाव कृती समितीने महापौर हसीना फरास यांच्याकडे निवेदनाद्वारे केली. ‘शालिनी सिनेटोन बचाव कृती समितीचा विजय असो..’अशी घोषणाबाजी करत हरीओमनगर येथे शालिनी सिनेटोन परिसरात साखळी आंदोलन करण्यात आले.

ज्येष्ठ अभिनेते भालचंद्र कुलकर्णी, दिग्दर्शक यशवंत भालकर, मिलिंद अष्टेकर, अखिल भारतीय मराठी चित्रपट महांमडळाचे कार्याध्यक्ष रणजित जाधव, धनाजी यमकर, अर्जुन नलावडे, इम्तियाज बारगीर, संतोष शिंदे, सुरेंद्र पन्हाळकर, मिलिंद अष्टेकर, यशवंत भालकर, भालचंद्र कुलकर्णी, रणजितसिंह चव्हाण, युवासेनेचे जिल्हाध्यक्ष हर्षल सुर्वे आदींसह स्थानिक कलाकार आणि तंत्रज्ञ मंडळी उपस्थित होते.

१९३४ साली उभारण्यात आलेल्या शालिनी स्टुडिओची मालकी ‘महाराजा ऑफ देवास’ तुकोजीराव पवार यांच्याकडे होती. काहीकाळ चित्रपटनिर्मिती कमी झाल्यामुळे या भूखंडातून व्यावसायिक वापरासाठीच्या हालचाली सुरू झाल्या होता. त्यावेळी चित्रपट कलाकारांनी केलेल्या आंदोलनाच्या बडग्यामुळे हा घाट हाणून पाडला गेला आणि पाच व सहा क्रमांकाचा भूखंड शालिनी सिनेटोनसाठी राखीव ठेवले गेले. पण आता त्या जागेवर पुन्हा भराव टाकण्याचे काम सुरू आहे. ही जागा चित्रीकरणासाठी आरक्षित असल्याने हे दोन्ही भूखंड शालिनी सिनेटोनसाठीच राखीव ठेवावे, अशी मागणी यावेळी चित्रपट कलाकार, तंत्रज्ञ यांनी केली.

शालिनी सिनेटोनचे जतन आवश्यक

‘प्रभात कंपनी इथून गेल्यानंतर जयप्रभा आणि शालिनी सिनेटोनमधून चित्रपट निर्मिती होऊ लागली. व्ही शांताराम, अनंत माने, महेश कोठारे यांसह आमच्यासारख्या अनेक दिग्दर्शकांनी इथे खूप चित्रपट केले. हजारो कामगारांना काम मिळवून देण्याचे काम शालिनी सिनेटोनने केले आहे. मोठी ऐतिहासिक पार्श्वभूमी लाभलेल्या सिनेटोनचे जतन होणे आवश्यक आहे’ असे मत दिग्दर्शक यशवंत भालकर यांनी व्यक्त केले.

मोबाइल अॅप डाउनलोड करा आणि राहा अपडेट

दोन हजारांवर दुचाकीस्वारांवर कारवाई

June 27, 2017, 2:30 pm

≫ Next: सक्तीच्या रजेनंतर मुख्याधिकारी औंधकर हजर

≪ Previous: शालिनी सिनेटोनसाठी एकवटले कलाकार

$

0

0

कोल्हापूर ः महामार्गांवर कोल्हापूर पोलिस प्रशासनाने हेल्मेट सक्ती केली आहे. जून महिन्याच्या पहिल्या आठवड्यापासून राज्य आणि राष्ट्रीय महामार्गांवर दुचाकीस्वारांसाठी ही सक्ती केली आहे. या दरम्यान दंडाची कारवाईही करण्यात येत आहे. हेल्मेटविना प्रवास करणाऱ्यांकडून ५०० रुपये दंडाची वसुली केली जात आहे. गेल्या महिन्याभरात पोलिसांनी २ हजारहून अधिक दुचाकीस्वारांवर कारवाई केली आहे. त्यांच्याकडून १० लाख रुपयांची दंडवसुली केली आहे. ही कारवाई यापुढेही सुरूच राहणार असल्याने हेल्मेट वापरण्याकडे दुचाकीस्वारांचा कल वाढला आहे.

दर्जावर नियंत्रणाचा अभाव

पोलिसांकडून हेल्मेट सक्ती सुरू होताच शहरासह महामार्गांवर ठिकठिकाणी हेल्मेट विक्रीचे स्टॉल थाटले आहेत. दीडशे ते चारशे रुपयांपर्यंत हेल्मेटची विक्री केली जाते. मात्र या हेल्मेटमुळे सुरक्षेची हमी मिळत नाही. काही हेल्मेट वजनदार आहेत. त्यामुळे मानेला त्रास होऊ शकतो. काही हेल्मेटला आतून थर्माकोल किंवा फायबरचा वापर केला असून, त्यांचा दर्जा अगदीच सुमार आहे. बनावट हेल्मेटवरही आयएसआय मार्क असल्याने ग्राहकांची दिशाभूल होत आहे. हेल्मेटच्या दर्जाबाबत तपासणी करणारी स्वतंत्र यंत्रणाच अस्तित्वात नसल्याने पोलिसांच्या कारवाईपासून पळ काढण्यासाठी बनावट हेल्मेटविक्री जोरात सुरू आहे.

सुरक्षित हेल्मेट कसे ओळखावे?

रस्त्याकडेला विकली जाणारी सर्व हेल्मेट कमी दर्जाची आणि बनावट आहेत.

दर्जेदार आणि सुरक्षित हेल्मेटसाठी अधिकृत विक्रेत्यांकडूनच खरेदी करावी.

हेल्मेटचे फिटिंग महत्त्वाचे, डोके आणि चेहऱ्यांवर योग्य पद्धतीने बसावे.

हेल्मेटच्या रंगातच आएसआय मार्किंग असते.

बनावट हेल्मेटवर आयएसआय मार्कची स्टीकर लावली आहेत.

दर्जेदार हेल्मेटची किमत ८०० ते २५०० रुपयांपर्यंत आहे. जिवाची किंमत यापेक्षा नक्कीच जास्त आहे.

मोबाइल अॅप डाउनलोड करा आणि राहा अपडेट

सक्तीच्या रजेनंतर मुख्याधिकारी औंधकर हजर

June 28, 2017, 10:03 am

≫ Next: ​ कोयनेत जोर ओसरला

≪ Previous: दोन हजारांवर दुचाकीस्वारांवर कारवाई

$

0

0

म. टा. वृत्तसेवा, कराड
जनतेला हवे हवेसे, मात्र पालिका नगरसेवकांसह अधिकारी, कर्मचाऱ्यांना नकोसे वाटणारे येथील पालिकेचे मुख्याधिकारी विनायक औंधकर अखेर सर्व अफवा, चर्चांना पूर्णविराम देत बुधवारी सकाळी पाऊणे दहा वाजता नगरपालिकेत कामावर हजर झाले. त्यांना पोलिस बंदोबस्त देण्यात आला आहे. नगरपालिकेच्या प्रांगणात सर्व कर्मचारी काम बंद करून जमा झाले होते. पोलिस फौजफाटा, नगरपालिका कर्मचारी आणि बघ्यांची गर्दी यामुळे नगरपालिका गजबजून गेली होती.
औधकर यांच्या बदलीसाठी गेल्या बारा जूनपासून येथील नगरपालिकेतील तीन कर्मचारी आमरण उपोषणास बसले होते. यांना पाठींबा म्हणून इतर कर्मचाऱ्यांनी काम बंद आंदोलन करून त्यांना पाठींबा दिला होता. याच दिवशी कराड नगरपरिषद येथे विशेष सभा बोलावण्यात आली होती. या विशेष सभेतही नगरसेवकांनी ‘अभी नही कभी नही तो कभी नही,’ असा नारा देत आमरण उपोषणाला जाहीर पाठींबा दिला होता. त्यामुळे मुख्याधिकारी पालिका सदस्य, अधिकारी व कर्मचाऱ्यांच्या रडारवर आले होते. यावर तोडगा म्हणून येथील प्रांताधिकाऱ्यांनी मुख्याधिकारी औंधकर यांना सक्तीच्या रजेवर पाठवविले होते. तेव्हापासून मंगळवार, २७जून अखेर रजेवर होते.
औंधकर सक्तीच्या रजेवर गेल्यानंतर आंदोलक कर्मचाऱ्यांनी आपले उपोषण मागे घेतले होते. मात्र, नगरसेवकांनी औंधकर यांना पालिकेत हजर करून न घेण्याची मागणी जिल्हाधिकाऱ्यांकडे केली होती. तर मुख्याधिकारी औंधकर यांना आम्ही नगरपालिकेत पाय ठेवू देणार नाही, असा इशाराही दिला होता. त्यामुळे विनायक औंधकर हजर होणार की नाही, याकडे संपूर्ण शहरवासीयांचे लक्ष लागून राहिले होते. अखेर सर्व अफवांना छेद देत अखेर मुख्याधिकारी विनायक औंधकर बुधवारी सकाळी नियोजित वेळेत नगरपालिकेत हजर झाले.
नागरिकांची बदली न करण्याची मागणी
पालिकेला कडक शिस्त लावणारा कामाचा मुख्याधिकारी, अशी विनायक औंधकरांची येथील जनमाणसांतील प्रतिमा आहे. वेळेत कामावर येऊन कर्मचाऱ्यांना वेळेत कामावर येण्यास भाग पाडणारा, पालिका कामांवर स्वत: निगराणी ठेवणारा, शहरातील कोणत्याही भष्टाचारास पाठीशी न घालणाऱ्या मुख्याधिकारी औंधकर यांची बदली करण्याची मागणी नगरसेवक, कर्मचाऱ्यांमधून होत असली तरी त्याची बदली करू नये, अशी मागणी येथील काही सामाजिक संस्था आणि नागरिकांमधून होत आहे.

मोबाइल अॅप डाउनलोड करा आणि राहा अपडेट

​ कोयनेत जोर ओसरला

June 28, 2017, 10:09 am

≫ Next: माउलींचे सोलापुरात आगमनपालखी सोहळा नातेपुते मुक्कामी विसावला

≪ Previous: सक्तीच्या रजेनंतर मुख्याधिकारी औंधकर हजर

$

0

0

कराड :

कोयना धरण पाणलोट क्षेत्रात बुधवारी पावसाचा जोर काही अंशी कमी झाला. जलाशयातील पाण्याची आवकही कमी झाली आहे. मात्र अधून-मधून पावसाच्या सरी कोसळत असल्याने धरणात १४ हजार २६० क्युसेक प्रतिसेकंद पाण्याची आवक होत असून, पाणीपातळी तीन फुटाने वाढली आहे. सध्या धरणातील जलाशयात २२.३५ टीएमसी इतका पाणीसाठा झाला आहे. नवजा परिसरात असणारा ओझर्डे धबधबाही ओसंडून वाहत असल्याने पाणीसाठ्यात झपाट्याने वाढ होत आहे.
कोयना, पाटणसह परिसरात बुधवारी दिवसभर पावसाने काही प्रमाणात उसंत घेतली होती. पाटण तालुक्यातील मणदुरे विभागात पडत असलेल्या पावसामुळे साखरी-चिटेघर धरण पूर्ण क्षमतेने भरून सांडव्यातून पाणी वाहू लागले आहे. बुधवारी सकाळी आठ ते सायंकाळी सहा वाजेपर्यंत कोयना येथे २८, नवजा ३८, व महाबळेश्वर येथे ३५ मिलीमीटर इतका पाऊस झाला आहे.
साखरी-चिटेघर धरण ओव्हर फ्लो
पाटण तालुक्यातील मणदुरे विभागात सुरू असलेल्या संततधार पर्जन्यवृष्टीमुळे मणदुरे विभागाला वरदान ठरणारा साखरी-चिटेघर लघुपाटबंधारे प्रकल्प बुधवारी पहाटेच्या सुमारास पूर्ण क्षमतेने भरला आहे. सांडव्यातून पाणी वाहू लागले आहे. त्यामुळे केरा नदीच्या पाणी पातळीत वाढ झाली आहे. पाटण तालुक्यातील विविध धरणांपैकी साखरी-चिटेघर धरण प्रथमच भरल्याने शेतकऱ्यांमध्ये आनंदाचे वातावरण आहे. धरणातील पाणीसाठा पाहण्यासाठी ग्रामस्थांची गर्दी होऊ लागली आहे.

मोबाइल अॅप डाउनलोड करा आणि राहा अपडेट

---

माउलींचे सोलापुरात आगमनपालखी सोहळा नातेपुते मुक्कामी विसावला

June 28, 2017, 10:10 am

≫ Next: ​ तुकोबाराय सराटी मुक्कामी

≪ Previous: ​ कोयनेत जोर ओसरला

$

0

0

म. टा. वृत्तसेवा, पंढरपूर
आळंदी येथून लाखो भक्तांसह पंढरीकडे निघालेल्या कैवल्यमूर्ती ज्ञानियाने बुधवारी सातारा जिल्ह्यातून सोलापूर जिल्ह्यात धर्मापुरी येथे प्रवेश केला. सायंकाळी समाज आरतीनंतर पालखी सोहळा नातेपुते मुक्कामी विसावला. सोलापूरचे पालकमंत्री विजय देशमुख, जिल्हाधिकारी राजेंद्र भोसले, पोलिस अधीक्षक एस. विरेशप्रभु, जिल्हा परिषद अध्यक्ष संजय शिंदे, मुख्य कार्यकारी अधिकारी डॉ. राजेंद्र भारूड आदींसह हजारो भाविक माउलीच्या स्वागताला धर्मपुरी येथे जमले होते.
सातारा जिल्ह्यातील शेवटच्या बरड मुक्कामानंतर सोहळा सकाळी ६.३० वाजता नातेपुतेकडे मार्गस्थ झाला. पहाटे श्री ज्ञानेश्‍वर महाराज संस्थानचे प्रमुख विश्‍वस्त डॉ. अजित कुलकर्णी यांच्या हस्ते माउलींची विधीवत पूजा व आरती करण्यात आली. आरतीनंतर पालखी सोहळा धर्मपुरीकडे मार्गस्थ झाला. सकाळपासूनच ढगाळ वातावरण होते. या ढगाळ वातावरणात वारकऱ्यांची पावले पंढरीच्या दिशेने झपझप पडत होती. दिंड्यादिंड्यामध्ये भजनाला रंग भरत होता. सकाळचे काकड्याचे अभंग दिंड्यादिंड्यामधून गायले जात होते. टाळ, मृदुंगाच्या सुरेख साथीने गोड व कर्णमधुर चालीने वातावरण प्रसन्न बनले होते. पंढरी समीप आल्याने वारकऱ्यांमध्ये उत्साह संचारला होता. सकाळच्या न्याहरीसाठी सोहळा सव्वा नऊ वाजता साधुबुवाच्या ओढ्याजवळ पोहोचला. रथातून माउलींची पालखी उतरविण्यात आली. ती असंख्य भाविकांनी खांद्यावर घेवून माउली माउली नामाचा जयघोष करीत साधुबुवांच्या मंदिरात आणली. साधुबुवांच्या पादुकांवर माउलींच्या पादुका ठेवून तेथे पूजा व आरती करण्यात आली. या वेळी कुंभारगावकरांच्या वतीने अॅड. संपतराव कुंभारगावकर यांनी प्रवचनाची सेवा केली. सकाळची न्याहरी झाल्यानंतर सकाळी दहा वाजता हा सोहळा धर्मपुरीकडे मार्गस्थ झाला. धर्मपुरी बंगला येथे दुपारचा नैवेद्य, भोजन व विश्रांतीसाठी हा सोहळा दुपारी बारा वाजता पोहोचला.
बरड मुक्कामानंतर शिखर शिंगणापूरच्या महादेवाच्या दर्शनासाठी गेलेले हजारो वारकरी शिंगापूर फाटा येथे सोहळ्यात पुन्हा सहभागी झाले. शिंगणापूर फाटा येथे सायंकाळचा विसावा घेऊन सोहळा नातेपुतेकडे मार्गस्थ झाला. सायंकाळी नातेपुते ग्रामस्थांनी सोहळ्याचे स्वागत केले. सायंकाळी सहा वाजता हा सोहळा पालखी तळावर पोहोचला. समाज आरतीनंतर हा सोहळा नातेपुते मुक्कामी विसावला.
पहिले गोल रिंगण आज
माउलींच्या पालखी सोहळ्यातील पहिले गोल रिंगण आज, गुरुवारी सदाशिवनगर येथील पुरंदावडे हद्दीतील नवीन जागेत होणार आहे. या रिंगण सोहळ्याची जय्यत तयारी करण्यात आली आहे. रिंगण सोहळ्यानंतर हा सोहळा माळशिरस मुक्कामी पोहोचेल.

मोबाइल अॅप डाउनलोड करा आणि राहा अपडेट

​ तुकोबाराय सराटी मुक्कामी

June 28, 2017, 10:23 am

≫ Next: ​ निवृत्तीनाथांची पालखी जेऊरमध्ये विसावली

≪ Previous: माउलींचे सोलापुरात आगमनपालखी सोहळा नातेपुते मुक्कामी विसावला

$

0

0

म. टा. वृत्तसेवा, पंढरपूर
जगद्गुरु संतश्रेष्ठ तुकाराम महाराजांचा पालखी सोहळा इंदापूर नगरीतील आपला बारावा मुक्काम आटोपून बुधवारी बावडा मार्गे पुणे जिल्ह्यातील शेवटच्या मुक्कामासाठी सराटी येथे विसावला.
बुधवारी पहाटे पाच वाजता इंदापूरच्या नगराध्यक्षा अंकिता शहा यांच्यासह इंदापूरवासीयांनी व सोहळा प्रमुखांनी काकडा आरती झाल्यानंतर पालखी सकाळी सहा वाजता शहरातून हरिनामाचा गजर करीत विठूरायाच्या ओढीने निघाली. पालखी सोहळ्यात खासदार छत्रपती सभांजी महाराज व माजी सहकार मंत्री हर्षवर्धन पाटील यांनी पायी चालत सोहळ्यात सहभागी झाले.
शहरातून पालखी सोहळा मुख्य बाजारपेठ, खडकपुरा, नेहरु चौक डॉक्टर बाबासाहेब आंबेडकर नगर, लोकशाहीर आण्णा भाऊ साठे नगरमधून ज्योतीबा मंदिरापासून ज्योतिबाच्या माळावरुन पुढे मुख्य रस्त्याला लागून विठ्ठलवाडीकडे निघाला. या वेळी इंदापूर वासीयानी दर्शनासाठी गर्दी केली होती. विठ्ठलवाडी गलांडवाडी नंबर दोनच्या ग्रामस्थांनी सोहळा गावाच्या वेशीवर येताच स्वागत केले. सकाळची न्याहारी येथेच झाली गावातील अनेकांनी अल्पोपहार दिला. पुढे वडापुरी गावात पालखी तासभर विसावली. सुरवड वकिलवस्ती येथून बावडा गावात दुपारचे भोजन आणि नंतर तालुक्यातील शेवटचे गाव सराटीत मुक्कामी विसावली. आज गुरुवारी नीरा नदीत पादुका स्नानानंतर पालखी सोहळा सोलापूर जिल्ह्यात प्रवेश करून माळशिरस तालुक्यातील अकलूज गावात मुक्कामी विसावणार आहे. अकलूज येथे पालखी सोहळ्यातील तिसरे गोल रिंगण होणार आहे. अकलूज येथील पालखी सोहळ्याचा मुक्काम यंदापासून बदलण्यात आला असून, याला काही अकलूज ग्रामस्थांनी विरोध केला होता. मात्र पूर्वीची जागा कमी पडत असल्यानेच मुक्काम बदलण्याचा निर्णय घेतल्याची भूमिका पालखी सोहळ्याच्या मानकऱ्यांनी घेतला आहे

मोबाइल अॅप डाउनलोड करा आणि राहा अपडेट

​ निवृत्तीनाथांची पालखी जेऊरमध्ये विसावली

June 28, 2017, 10:25 am

≫ Next: अंबाबाई मंदिरप्रश्नी पालकमंत्र्यांचे घूमजाव

≪ Previous: ​ तुकोबाराय सराटी मुक्कामी

$

0

0

म. टा. वृत्तसेवा, पंढरपूर
त्र्यंबकेश्‍वर येथून पंढरपूरकडे निघालेल्या संत निवृत्तीनाथ पालखी सोहळा बुधवारी जेऊर येथे विसावला. आज, गुरुवारी पहाटे पालखी सोहळा कंदर मुक्कामाकडे मार्गस्थ होईल.
रावगाव येथे पहाटे जयंत गोसावी यांच्या हस्ते श्री निवृत्तीनाथांच्या पादुकांची विधीवत पूजा व आरती करण्यात आली. येथे भाविकांनी दर्शनासाठी गर्दी केली होती. पूजा व आरतीनंतर सकाळी साडेसात वाजता सोहळा रावगावहून जेऊर मुक्कामाकडे मार्गस्थ झाला. दुपारच्या भोजन व विश्रांतीसाठी सोहळा सकाळी साडेदहा वाजता करमाळा येथे पोहोचला. करमाळा नगरवासीयांनी निवृत्तीनाथ पालखी सोहळ्याचे मोठ्या उत्साही व भक्तीमय वातावरणात स्वागत केले. अल्पशा विश्रांतीनंतर सोहळा दुपारी साडेबारा वाजता जेऊरकडे मार्गस्थ झाला.
करमाळा-जेऊर या वाटचालीत अभंग, गवळणींनी वाटचाल रंगून गेली. आता प्रत्येकालाच विठूरायाच्या भेटीची ओढ लागली होती. प्रत्येकाच्या चेहऱ्यावरील उत्साह ओसंडून वाहत होता. पंढरी समीप आल्याने वारकऱ्यांच्या पायाला चंद्रभागेच्या प्रवाहाप्रमाणे गती आली होती. ढगाळ वातावरणाच्या अल्हाददायक वातावरणातच वारकरी मार्गक्रमण करीत होते. सोहळा सायंकाळी जेऊर समीप येताच मेघराजाने निवृत्तीनाथांच्या पालखी सोहळ्यावर मेघवृष्टी करण्यास सुरूवात केली. मेघराजा बरसू लागला तसे वारकरी चिंब होत आनंदाने नाचू लागले. टाळ, मृदुंगाच्या तालावर नाचत, गात अंगावर पावसाच्या सरी घेत जेऊर हद्दीत पोहोचला. आज, गुरुवारी सोहळा सकाळी शेलगाव वांगीमार्गे कंदर मुक्कामी पोहोचेल.

मोबाइल अॅप डाउनलोड करा आणि राहा अपडेट

अंबाबाई मंदिरप्रश्नी पालकमंत्र्यांचे घूमजाव

June 28, 2017, 2:30 pm

≫ Next: महापालिका शाळा ठरल्या ‘भारी’

≪ Previous: ​ निवृत्तीनाथांची पालखी जेऊरमध्ये विसावली

$

0

0

म. टा. प्रतिनिधी, कोल्हापूर

अंबाबाई मंदिरातील पुजाऱ्यांना हटवून पंढरपूरच्या धर्तीवर तेथे सरकार नियुक्त पुजारी नेमावेत, या मागणीसंदर्भात अभ्यास करून अहवाल देण्यासाठी जिल्हाधिकाऱ्यांच्या अध्यक्षतेखाली समिती नेमण्यास पालकमंत्री चंद्रकांत पाटील यांनी बुधवारी नकार दिला. कायदेशीररित्या अशी समिती स्थापन करता येत नाही, असे स्पष्ट करून पालकमंत्र्यांनी श्री अंबाबाई मंदिर पुजारी हटाओ संघर्ष समितीतील सदस्यांना त्यांच्या तांत्रिक आणि कायदेशीर मुद्दे मांडण्याच्या सूचना दिल्या.

विशेष म्हणजे पालकमंत्री पाटील यांनीच २२ जूनच्या बैठकीत समिती स्थापन करण्याच्या सूचना दिल्या होत्या. अवघ्या सहा दिवसांत त्यांनी ‘यू टर्न’ घेतल्याने आश्चर्य व्यक्त होत आहे. दरम्यान, येत्या तीन महिन्यांत जिल्हाधिकारी याबाबतचा अहवाल विधी व न्याय विभागाला पाठवतील, याचा पुनरुच्चारही पाटील यांनी केला.

पाटील यांच्या उपस्थितीत २२ जून रोजी जिल्हाधिकारी कार्यालयातील ताराराणी सभागृहात व्यापक बैठक झाली होती. अंबाबाईला घागरा चोली नेसविल्याप्रकरणी पुजारी अजित ठाणेकर यांना शिक्षा आणि मंदिरात सरकारी पुजारी नेमण्याच्या मागणीबाबत बैठकीत चर्चा झाली. या बैठकीदरम्यान पुजारी ठाणेकर यांना संतप्त भाविकांकडून मारहाणही करण्यात आली होती. त्यात अंबाबाईला घागरा-चोली नेसवल्याचे प्रकरण आणि मंदिरात सरकारी कर्मचारी नेमणे हे दोन स्वतंत्र विषय असल्याचे पालकमंत्री पाटील यांनी स्पष्ट केले होते. त्यानुसार घागरा-चोली नेसविल्याप्रकरणी जिल्हाधिकारी सुभेदार यांच्या उपस्थितीत बैठक झाली आणि कायदा सुव्यवस्थेचा प्रश्न निर्माण झाल्याने ठाणेकर यांना मंदिर परिसरात येऊ न देण्याचा आदेश जिल्हाधिकाऱ्यांनी पोलिस प्रशासनाला दिला.

त्यानंतर मंदिरातील पुजारी हटवून त्यांच्याजागी पंढरपूरप्रमाणे सरकार नियुक्त पुजारी नेमण्याविषयी बुधवारी अंबाबाई मंदिर पुजारी हटाओ संघर्ष समितीच्या पंधरा सदस्यांची बैठक शासकीय विश्रामगृहात पडली. बैठकीनंतर समितीच्या सदस्यांनी जिल्हाधिकारी कार्यालय गाठले. तेथे पालकमंत्री पाटील यांच्या उपस्थितीत शाहू जन्मस्थळ विकास आणि जिल्हा नियोजन मंडळाच्या बैठका सुरू होत्या. त्यातच समितीच्या सदस्यांनी जिल्हाधिकाऱ्यांच्या कक्षात पालकमंत्री पाटील यांची भेट घेतली. त्यावेळी पालकमंत्री पाटील यांच्याकडे समिती स्थापन करण्याबाबत विनंती करण्यात आली. त्यावर पाटील यांनी कायद्यानुसार अशी कोणतीही समिती स्थापन करता येणार नाही, असे स्पष्ट केले. त्यावर पुजारी हटाओ संघर्ष समितीच्या सदस्यांनी नाराजी व्यक्त केली.

पालकमंत्र्यांची सूचना

पालकमंत्री पाटील यांनी संघर्ष समितीच्या सदस्यांना येत्या आठ दिवसांत त्यांच्याकडील तांत्रिक मुद्दे, ऐतिहासिक संदर्भ, जिल्हाधिकारी सुभेदार यांच्याकडे सुपूर्द करण्याच्या सूचना केल्या. या संदर्भात जिल्हाधिकारी संघर्ष समितीला एक पत्र देतील, त्यानंतर या सूचना पाठवून द्याव्यात, असे पालकमंत्र्यांनी सांगितल्याची माहिती संघर्ष समितीचे संजय पवार यांनी दिली. मंदिरात परंपरागत बाबीत बदल करण्यासाठी सूचना आणि पुरावे प्रत्येकाने द्यावेत. ते जमा झाल्यानंतर लोकमानस आणि लोकभावना लक्षात घेऊन जिल्हाधिकारी त्यांचा अहवाल विधी व न्याय विभागाला पाठवतील, असे पालकमंत्र्यांनी सांगितल्याची माहिती पवार यांनी माध्यमांशी बोलताना दिली.

‘मदत’ समिती

दरम्यान, पंढरपूरच्या धर्तीवर सरकारी पुजारी नेमण्याबाबत जिल्हाधिकारी सुभेदार यांच्या नेतृत्वाखाली जो अहवाल तयार होणार आहे, त्यासाठी आवश्यक कागदपत्रे, पुरावे देण्यासाठी मदत समिती स्थापन करण्यात येणार आहे. सध्याच्या पुजाऱ्यांचा गैरकारभार आ​णि पुजाऱ्यांबाबत शाहूकालीन नोंदींसंदर्भातील पूरक माहिती देण्याचे काम ही समिती करेल. या समितीत १५ सदस्य असतील. चौकशीसाठी लागेल ती मदत जिल्हा प्रशासनाला देण्यात येईल, अशी भूमिका समिती सदस्यांनी घेतली आहे.

पालकमंत्री २२ जूनच्या बैठकीत काय म्हणाले होते?

पंढरपूर आणि देशातील इतर देवस्थानांप्रमाणे अंबाबाई मंदिरात सरकारी पुजाऱ्यांची नेमणूक करण्यासाठी जिल्हाधिकारी अविनाश सुभेदार यांच्या अध्यक्षतेखाली समिती स्थापन करावी. त्यात इतिहास संशोधक इंद्रजित सावंत, सुभाष देसाई, दिलीप देसाई, दिलीप पाटील यांच्यासारख्या व्यक्तींचा समावेश करावा, तसेच दोन महिलांचाही समावेश करावा. आगामी तीन महिन्यांत ही समिती विधी आणि न्याय विभागाकडे अहवाल देईल. हे खाते मुख्यमंत्र्यांकडे असल्याने ते यावर निर्णय घेतील, याकडे मी लक्ष देतो.


ठळक मुद्दे....

- श्री अंबाबाई मंदिर पुजारी हटाओ संघर्ष समितीला तांत्रिक आणि कायदेशीर मुद्दे मांडण्याच्या सूचना.

- संघर्ष समितीची सकारात्मक भूमिका

- जिल्हाधिकारी तीन महिन्यांत अहवाल पाठवणार

- विधी व न्याय खात्याच्या अंतिम अहवालावर मुख्यमंत्री निर्णय घेणार

मोबाइल अॅप डाउनलोड करा आणि राहा अपडेट

महापालिका शाळा ठरल्या ‘भारी’

June 28, 2017, 2:30 pm

≫ Next: मिळाली ऑनलाइन प्रवेशाची किल्ली

≪ Previous: अंबाबाई मंदिरप्रश्नी पालकमंत्र्यांचे घूमजाव

$

0

0

म. टा. प्रतिनिधी, कोल्हापूर

महाराष्ट्र राज्य शिक्षण परिषदतर्फे घेण्यात आलेल्या शिष्यवृत्तीच्या परीक्षेत महापालिका शाळांतील विद्यार्थी ‘भारी’ ठरले. त्या शाळांतील विद्यार्थ्यांनी राज्यात गुणवत्तेचा झेंडा फडकविला. आजच्या स्पर्धात्मक युगात महापालिकांच्या शाळाही कमी नाहीत, हे या विद्यार्थ्यांनी दाखवून दिले. खासगी क्लासला न जाता टेंबलाईवाडी विद्यालयातील विद्यार्थ्यांनी अगदी राज्यात प्रथम क्रमांकापर्यंतची झेप घेतली.

गेल्या काही वर्षात मरगळलेल्या महापालिका शाळांमध्ये अलीकडे गुणवत्तापूर्ण शिक्षण मिळत आहे. मूलभूत सुविधा उपलब्ध होत आहेत. पहिलीपासून इंग्रजी, सेमी इंग्रजी शिक्षण दिले जाते. त्यामुळे सरकारी शाळांतील विद्यार्थी गुणवत्तेत आघाडीत घेत आहेत. महापालिकेच्या टेंबलाईवाडी विद्यामंदिरमध्ये इयत्ता सातवीपर्यंत शिक्षण दिले जाते. ‌तेथील सर्वच शिक्षक विद्यार्थ्यांची गुणवत्ता वाढवण्यासाठी धडपडत असतात. यंदा या शाळेतील इयत्ता पाचवीची २० मुले शिष्यवृत्ती परीक्षेस बसली होती. या मुलांसाठी शिक्षकांनी जादा तास घेतले. रोज सकाळी ९ ते सायंकाळी ७ वाजेपर्यंत विद्यार्थ्यांचा अभ्यास घेतला. त्यामुळे या शाळेचा वर्धन माळी हा राज्यात पहिल्या क्रमांकाने उत्तीर्ण झाला. शाळेचे दहा विद्यार्थी राज्याच्या गुणवत्ता यादीत चमकले. आता आगामी वर्षातही राज्यात पहिला क्रमांक कायम राखण्यासाठी या शाळेचे शिक्षक आतापासून तयारी करून घेत आहेत.

लक्ष्मीबाई जरग विद्यामंदिरमधील पाच विद्यार्थी राज्याच्या गुणवत्ता यादीत झळकले आहेत. एकूण ५७ विद्यार्थी परीक्षेला बसले होते. त्यापैकी २१ विद्यार्थी जिल्हा गुणवत्ता यादीत आले. या शाळेत पहिलीपासून इंग्रजी शिकवले जाते. शिक्षकांनी विद्यार्थ्यांच्या गुणवत्तेवर लक्ष केंद्रीत केले आहे. या शाळेची पटसंख्या तब्बल १४५० आहे. ‌‌अधिकधिक मुले ‌शिष्यवृत्ती परीक्षेत उत्तीर्ण व्हावी यासाठी एक वर्ष आधीच तयारी करून घेतली. मोफत जादा तास घेतले जातात. शिक्षक प्रत्येक विद्यार्थ्याच्या अभ्यासवर लक्ष केंद्रीत करतात. पुढच्या वर्षी ६३ विद्यार्थी शिष्यवृत्ती परीक्षेला बसणार आहेत. त्यांची तयारी आतापासून सुरू झाली आहे.

नेहरुनगर विद्यामंदिरचे दोन विद्यार्थी राज्याच्या गुणवत्ता यादीत चमकले. २५ विद्यार्थी शिष्यवृत्ती परीक्षेला बसले होते. शिक्षकांनी शाळेच्या वेळेव्य‌तिरिक्त सकाळी आणि सायंकाळी विद्यार्थ्यांसाठी जादा तास घेतले. शाळेत प्रश्नपत्रिका सोडवून घेतल्या. प्रभावी अध्यापन पद्धतीसाठी तंत्रज्ञानाचा वापर केला. त्यामुळेच गुणवत्तेत सुधारणा झाली. पुढील वर्षीही शिष्यवृत्तीत चांगले यश मिळेल असा विश्वास शिक्षक व्यक्त करीत आहेत. या सर्वच शाळांत शिक्षण घेणारे आणि राज्याच्या गुणवत्ता यादीत चमकलेले विद्यार्थी सामांन्य कुटुंबातील आहेत. गुणवत्तेच्या जोरावर हजारो रुपयांची फी देऊन खासगी शाळांत शिकणाऱ्या विद्यार्थ्यांना त्यांनी मागे टाकले. महापालिका शाळेकडे पाहण्याची दृष्टी बदलण्याचा संदेश त्यांनी दिला आहे.

शिष्यवृत्ती परीक्षेला बसलेल्या विद्यार्थ्यांसाठी मोफत जादा तास घेतले. सरावासाठी सुमारे दीडशे प्रश्नपत्रिका सोडवून घेतल्या. त्यामुळे शिष्यवृत्ती परीक्षेत आमच्या शाळेतील विद्यार्थ्यांनी चांगले यश मिळवले.

उत्तम गुरव, मुख्याध्यापक, लक्ष्मीबाई जरग विद्यामंदिर

विद्यार्थ्यांना सराव व्हावा यासाठी सकाळी आठ वाजल्यापासून जादा तास घेतले. प्रश्नपत्रिका सोडवून घेतल्या. त्यातून राज्याच्या गुणवत्ता यादीत शाळेच्या विद्यार्थ्यांचा सामावेश झाला. पुढील वर्षासाठी आतापासून तयारी करून घेतली जात आहे.

सुजाता दाभोळकर, वर्गशिक्षिका, नेहरूनगर विद्यालय

मोबाइल अॅप डाउनलोड करा आणि राहा अपडेट