‘आषाढी यात्रेसाठी राज्यभरातून येणाऱ्या शेकडो पालखी सोहळ्याच्या सुविधांसाठी पालखी तळ आणि रिंगण ठिकाण विकसित करण्यासाठी पुढील ३० वर्षांचे नियोजन करण्यात येत आहे. गरजेनुसार जागेचे अधिग्रहण करण्यास सुरुवात झाली आहे,’ अशी माहिती सोलापूरचे जिल्हाधिकारी राजेंद्र भोसले यांनी दिली.
जिल्हाधिकारी भोसले यांनी सोलापूर जिल्ह्यातील सर्व पालखीतळ आणि रिंगणस्थळांची पाहणी केली. संत ज्ञानेश्वर आणि संत तुकाराम या प्रमुख पालखी सोहळ्यासह इतर पालखी सोहळ्यासोबत येणाऱ्या भाविकांच्या संख्येत दिवसेंदिवस झपाट्याने वाढ होत आहे. त्यामुळे सध्याचे पालखी तळ अपुरे पडत असल्याच्या तक्रारी सोहळा प्रमुखांनी सरकारकडे केल्या आहेत. त्या पार्श्वभूमीवर जिल्हाधिकाऱ्यांनी ही माहिती दिली.
सध्या सोलापूर जिल्ह्यात पालखी सोहळे आल्यावर नातेपुते, पिराची कुरोली, भंडीशेगाव आणि वाखरी येथील पालखी तळाच्या मोठ्या समस्या असल्याच्या तक्रारी पालखी सोहळा प्रमुखांनी केल्या होत्या. त्यानुसार मानकऱ्यांच्या सूचनेनुसार पर्यायी जागा ताब्यात घेण्याच्या दृष्टीने प्रशासनाने प्रयत्न सुरू केले आहेत. नातेपुते येथील सध्याची जागा देण्यास खासगी जागामालकांची अडचण असल्याने वारकरी सांप्रदायाने त्या ठिकाणची एका सहकारी कुकुटपालन संस्थेची जागा पसंत केली आहे. ही जागा जिल्हा बँकेत गहाण असून, त्याचा लवकरच लिलाव होणार आहे. बँकेच्या लिलावात उतरून प्रशासन ही जागा घेणार असल्याचे जिल्हाधिकारी भोसले यांनी सांगितले.
तसेच, खुडूस फाटा येथील रिंगणाच्या जागा शेतकरी स्वखुशीने देत असून, आता होणाऱ्या रस्ता रुंदीकरणात मात्र यातील बरीचशी जागा जाणार आहे. ती वाचवण्यासाठी रोडची रचना याठिकाणी बदलण्यात येणार आहे. ठाकूर बुवा रिंगण ठिकाणी दोन शेतकऱ्यांच्या जागा असून, यात थोडी अडचण येत असल्याने त्यांना त्याच गावात शिल्लक असलेली शेती महामंडळाची जमीन दिल्यास याचा वापर रिंगणासाठी करता येईल, अशी मानकऱ्यांची मागणी आहे. संत तुकाराम महाराज पालखी मार्गावरील पिराची कुरोली येथे जागेची मोठी समस्या असल्याने येथेही गरजेनुसार अधिग्रहण करून वारकऱ्यांची कायमस्वरुपी सोय करण्यात येणार आहे. भंडी शेगाव आणि वाखरी येथे सर्वच पालख्या एकत्र येण्यास सुरुवात होत असल्याने येथे जागा अपुरी पडत असून, त्या ठिकाणी सोयीच्या पर्यायाचा विचार सुरू आहे. यासाठी जमीन अधिग्रहण नवीन कायद्यानुसार कारवाई करण्यात येणार आहे. यासाठी निधीची कोणतीही कमतरता नसल्याचे जिल्हाधिकाऱ्यांनी सांगितले. मात्र, सध्या पंढरपूरमध्ये सुरू असलेल्या तीर्थक्षेत्र विकास आराखड्यास प्रकल्प म्हणून घोषित करून मंत्रालयात सर्वच पालखी सोहळ्यासाठी वेगळा कक्ष स्थापन करण्याची वारकरी संप्रदायाची मागणी आहे.
मुख्यमंत्री देवेंद्र फडणवीस सरकारने पालखी तळ विकासासाठी मोठा निधी दिलेला असला, तरी सध्या या विकासापेक्षा जागा अधिग्रहण महत्त्वाचे आहे. हे पैसे त्या जागेसाठी वापरल्यास पालखी सोहळ्यासोबत पायी चालत येणाऱ्या लाखो वारकऱ्यांना हक्काचे विश्रांती ठिकाण मिळेल, अशी मागणी संत ज्ञानेश्वर पालखी सोहळ्याचे मानकरी राजाभाऊ चोपदार यांनी केली.
तर, वारकऱ्यांच्या सुविधांसाठी निधीची अजिबात कमतरता नसून जिथे जागा अधिग्रहण शक्य आहे तिथे ती करून आणि जिथे अशक्य आहे तिथे कायदेशीर करार करून जागा ताब्यात घेतली जाणार आहे. आषाढीसाठी येणाऱ्या पालखी सोहळ्यांना कोणतीही असुविधा भासणार नाही, असे जिल्हाधिकारी म्हणाले.
मोबाइल अॅप डाउनलोड करा आणि राहा अपडेट
