‘करदात्यांचे रद्द करण्यात आलेल्या क्रमांकाचे दोन दिवसांत पुर्ननोंदणी केली जाईल. विक्रीकर भवनात दर सोमवारी सायंकाळी चार ते सहा या वेळेत जीएसटीचे मार्गदर्शन केले जाणार आहे. व्यापाऱ्यांचे परिपूर्ण शंका-समाधान होईपर्यंत मार्गदर्शन कक्ष सुरूच ठेवला जाईल’, अशी ग्वाही विक्रीकर विभागाचे सहआयुक्त विलास इंदलकर यांनी दिली. कोल्हापूर चेंबर ऑफ कॉमर्स अॅण्ड इंडस्ट्रीज, विक्रीकर विभागातर्फे संलग्न व्यापारी, औद्योगिक संघटना यांच्या सहकार्याने वस्तू व सेवा कर कायदा (जीएसटी) संदर्भात आयोजित मार्गदर्शन कार्यशाळेत ते बोलत होते. दसरा चौकातील राजर्षी शाहू स्मारक भवनात चर्चासत्र झाले.
सहआयुक्त विलास इंदलकर म्हणाले, ‘विभागाने विविध कारणांनी दहा हजार नोंदणी रद्द केल्या आहेत. यापैकी ३०० करदात्यांनी नोंदणी क्रमांकही २४ तासांत फेरनोंदणी केले जातील. एक जुलैपासून जीएसटी ही एकच सोपी आणि सुटसुटीत करप्रणाली लागू होणार आहे. या करप्रणालीमुळे सोळा कायदे संपणार आहेत. व्यापाऱ्यांना मिळणारा परतावा, इन्फोटॅक्स क्रेडिटच्या (आयटीसी) अडचणी दूर होणार आहेत. ही करप्रणाली अत्यंत सुटसुटीत आहे. व्यापाऱ्यांना वैयक्तिक पातळीवर कोणतीही अडचण येणार नाही, याची दक्षता घेतली आहे. इन्कमटॅक्स, जीएसटी आणि कस्टम हे तीनच कर राहणार आहेत. विक्रीकराचे विवरण प्रत्येक महिन्याला व्यापारी आणि खरेदीदारांना द्यावे लागणार आहे. काहीवेळा तांत्रिक अडचणीमुळे ऑनलाइन सिस्टीममध्ये बिघाड होऊ शकतो. मात्र महिन्याच्या अखेरीस व्यापाऱ्यांनी विवरणपत्रे भरण्यासाठी गर्दी करू नये. केवळ जीएसटीचा नवीन क्रमांकासाठी धावपळ करू नये. कारण प्रत्येक व्यवहाराची ऑनलाइन नोंद आणि करप्रणाली पारदर्शी राहणार आहे. आतापर्यंत पाच जिल्ह्यांतील करदात्यांचे ८८ टक्के नोंदणीची प्रक्रिया पूर्ण झाली आहे. कागदपत्रे अपलोड करण्याची प्रक्रिया ५० टक्के झाली आहे. येत्या काही दिवसांत ही प्रक्रिया करदात्यांना तातडीने पूर्ण करावी लागणार आहे. त्याशिवाय त्यांना कायमस्वरूपी नोंदणी क्रमांक दिला जाणार नाही.’
केंद्रीय उत्पादन शुल्क विभागाचे अधिकारी सी. व्ही. केदार म्हणाले, ‘जीएसटीची कार्यप्रणाली सोपी आणि सुटसुटीत आहे. यामध्ये करदात्यांना कोणताही त्रास सहन करावा लागणार नाही. वस्तूंच्या किंमतीवर कर आकारले जाणार आहे. एकच कर प्रणाली सुरू होणार असल्याने करदात्यांना फायदा होणार आहे.’
विक्रीकर विभागाचे सहआयुक्त मुकुंद पन्हाळकर, सहआयुक्त अभिजित पोरे यांनी मार्गदर्शन केले. चेंबरचे अध्यक्ष ललित गांधी यांनी करदात्यांना येणाऱ्या अडचणी मांडल्या. अध्यक्ष गांधी म्हणाले, ‘सरकारने जीएसटी लागू करण्यासाठी दिलेला वेळ अपुरा आहे. जीएसटी लागू करण्यापूर्वी व्हॅटसंदर्भातील अनेक अडचणी दूर करण्याची गरज आहे. करदात्यांचे जुने नोंदणी क्रमांक रद्द केले आहेत. ऑनलाइन सिस्टीमही काहीवेळा तांत्रिक कारणामुळे बंद पडत आहे. नवीन कर लागू होण्यापूर्वी अन्य सर्व प्रकारचे कर रद्द करून कायदेशीर सोपी आणि सुटसुटीत प्रक्रिया व्यापाऱ्यांसाठी असावी.’
यावेळी विक्रीकर विभागाचे उपआयुक्त सुनील कानगुडे, नितीन बांगर, चेंबरचे उपाध्यक्ष चंद्रकांत जाधव, खजिनदार संजय पाटील, मानद सचिव शिवाजीराव पोवार, जयेश ओसवाल आदी उपस्थित होते. मान्यवरांच्या हस्ते कोल्हापूर इंजिनीअरिंग असोसिएशनचे अध्यक्ष बाबासाहेब कोंडेकर, कोल्हापूर उद्यम को- ऑपरेटिव्ह सोसायटीचे अध्यक्ष चंद्रकांत मुळे, इन्स्टिट्यूट ऑफ इंडियन फौंड्रीमेन असोसिएशनचे अध्यक्ष दीपांकर विश्वास यांचा सत्कार झाला. एसटीपी असोसिएशनचे अध्यक्ष श्रीकांत हेर्लेकर, इन्स्टिट्यूट ऑफ चार्टड अकौटंटचे अध्यक्ष अवधूत चिकोडी यांनी मनोगत व्यक्त केले. चेंबरचे मानद सचिव धनंजय दुग्गे यांनी स्वागत केले. मानद सचिव हरिभाई पटेल यांनी सूत्रसंचालन केले. चेंबरचे उपाध्यक्ष संजय शेटे यांनी आभार मानले.
वेळीच खबरदारी घ्या
‘पाच जिल्ह्यांत ७१ हजार करदाते आहेत. यापैकी जे व्यवसाय करीत नाहीत, त्यांचे नोंदणी क्रमांक रद्द केले आहेत. आतापर्यंत १० हजार नोंदणी रद्द केली आहेत. यापैकी ३०० करदात्यांनी आमचे क्रमांक रद्द करू नयेत, अशी विनंती केली आहे. त्या व्यापाऱ्यांची प्रत्यक्ष पथक पाहणी करेल. जुन्या करदात्यांना जीएसटी क्रमांक देणे अवघड नाही. मात्र, करदात्यांनी जीएसटीची प्रणाली समजून घेण्याची गरज आहे. ही समजून घेतल्यास करदात्यांना त्रास होणार नाही’ असे अधिकारी इंदलकर यांनी सांगितले.
मोबाइल अॅप डाउनलोड करा आणि राहा अपडेट
