धान्य वितरण पद्धती सुलभ व्हावी यासाठी राज्य सरकारने स्वस्त धान्य दुकानदारांना दिलेल्या बायोमेट्रीक पॉज मशिनमध्ये सतत व्यत्यय निर्माण होत असल्याने बुधवारी शहरातील सर्वच रेशनधान्य दुकानदारांनी सर्व मशिन पुरवठा अधिकारी महादेव शिंदे यांच्याकडे सुपूर्द केल्या. त्यामुळे सर्वसामान्यांना धान्य मिळण्यात अडचणी निर्माण होण्याची शक्यता आहे.
शहरात एक लाख बत्तीस हजार लाभार्थी असून त्यांना १०३ रेशनधान्य दुकानातून धान्य वितरीत केले जाते. सार्वजनिक धान्य वितरण व्यवस्था पारदर्शक होण्यासाठी कर्नाटक, राजस्थान, हिमाचल राज्यांच्या धर्तीवर महाराष्ट्रातसुध्दा बायोमॅट्रिक मशीनद्वारे धान्य वितरण करण्याचा निर्णय राज्य सरकारने घेतला. त्यानुसार धान्य दुकानदारांना एक मे पासून बायोमेट्रीक पॉज मशिनचे वितरण करण्यात आले होते. रेशनकार्डवर ज्या व्यक्तींची नावे आहेत, त्यापैकी एका व्यक्तीचा अंगठा मशीनला लावल्याशिवाय धान्य मिळत नाही. मात्र ऑनलाईन पध्दतीत सतत व्यत्यय निर्माण होत असल्याने दुकानातील मशीन ऑपरेट होत नाहीत. सर्व्हर डाऊन होत असल्याने धान्य वितरणात अडथळा निर्माण होत आहे. शिवाय काही लाभार्थ्यांची नावे यादीत नसल्याने दुकानदारांना विविध समस्यांना तोंड द्यावे लागत आहे. त्यामुळे दुकानदार आणि ग्राहकांमध्ये वाद निर्माण होत आहेत.
या प्रकाराला कंटाळून शहरातील १०३ रेशनधान्य दुकानदारांनी पुरवठा अधिकारी शिंदे यांची भेट घेऊन सर्व मशिन्स आणून त्यांच्या टेबलावर ठेवल्या. जोपर्यंत सर्व्हर व मशिन व्यवस्थितरित्या कार्यान्वित होत नाहीत तोपर्यंत मशिन ताब्यात घेणार नाहीत, असा इशाराही त्यांनी दिला. त्याचबरोबर ही यंत्रणा कार्यान्वित होईपर्यंत पूर्ववत रेशनधान्य देण्यास परवानगी द्यावी, अशी मागणी केली. या संदर्भात पुरवठा अधिकारी शिंदे यांनी जिल्हा पुरवठा अधिकाऱ्यांशी संपर्क साधण्याचा प्रयत्न केला. पण संपर्क होऊ शकला नाही. यावेळी चंद्रकांत यादव, अन्वर मोमीन, रमेश पाटील, दीपक ढेरे, बाजी आवळे, उत्तम पाटील, दिनकर पाटील, पाडुरंग सुबेदार, बाळू मुजावर यांच्यासह शहरातील रेशनधान्य दुकानदार उपस्थित होते.
मोबाइल अॅप डाउनलोड करा आणि राहा अपडेट
