कोल्हापुरात आदर्श मराठा भवन उभारण्यावर रविवारी पहिल्या मराठा आमसभेत एकमत झाले. यासाठी सभेत उत्स्फूर्तपणे ४६ लाखांची निधी उभा राहिला. यात राजकीय नेत्यांनी मोठा वाटा उचलला असून, भवनच्या उभारणीत जागा मिळविण्यात आणि बांधकामात कसलीही कमी पडू देणार नसल्याची ग्वाही जिल्ह्यातील नेतेमंडळींनी यावेळी दिली. मार्केट यार्ड येथील शाहू सांस्कृतिक भवनात पार पडलेल्या या मेळाव्याला प्रचंड गर्दी झाली होती.
मराठा आरक्षण, मराठा स्वराज्य भवन आणि मराठा समाज आचारसंहिता या तीन मुद्यांवर अखिल भारतीय मराठा महासंघाच्या कोल्हापूर शाखेने आमसभेचे आयोजन केले होते. त्याला लोकप्रतिनिधींसह पुणे म्हाडाचे अध्यक्ष समरजितसिंह घाटगे, शिक्षण तज्ज्ञ डी. बी. पाटील, बी. एम. हिर्डेकर, माजी आमदार के. पी. पाटील, सुरेश साळोखे, बजरंग देसाई, जिल्हा परिषद सदस्य अरुण इंगवले, राहुल देसाई, उद्योगपती चंद्रकांत जाधव, भगवान काटे आदी प्रमुख उपस्थित होते.
मराठा महासंघाचे जिल्हाध्यक्ष वसंतराव मुळीक यांनी प्रस्ताविक केले. ते म्हणाले, ‘समाजातील मुलभूत प्रश्न मार्गी लावण्यासाठी ही आमसभा आयोजित केली आहे. विज्ञाननिष्टपणा येण्यासाठी आचारसंहिता मांडत आहोत. आता यात्रा, जत्रेवरील खर्च कमी करून मुलांच्या शिक्षणावर खर्च करण्याची वेळ आली आहे.’ कोल्हापुरात मराठा भवन नाही, ही खेदाची बाब आहे. त्यासाठी सहा एकर जागेची मागणी केली आहे. त्यामुळे आता मराठा भवनसाठी मिशन-२०१७ची घोषणा करून ही आमसभा यशस्वी करण्याचे आवाहन मुळीक यांनी केले.
मराठा भवनसाठी गेल्या वर्षी बैठक झाली. निधी जमा झाला. पण, जागेचा प्रश्न होता. जागेसाठी मुख्यमंत्र्यांशी पत्रव्यवहार केला होता. जागा मिळाली, तर एकही रुपया कमी पडणार नाही याची काळजी घेऊ. मंत्रिमंडळातील वजनदार नेते असल्याने चंद्रकांत पाटील यांनी जागा देण्यासाठी प्रयत्न करावेत. तुम्ही जागा द्या, बांधकामासाठी आम्ही पैसे मागणार नाही.
- सतेज पाटील, आमदार
मराठा भवन केवळ मराठा समाजाचे नव्हे, तर बहुजन समाजाचे असेल. मराठा मोर्चाची पुढची पायरी शिक्षणातून पुढे जाण्याची असेल. कोल्हापूरच्या मराठा भवनात ग्रंथालय आणि विज्ञानकेंद्र उभारण्यासाठी लागेल तेवढे पैसे देण्याची माझी तयारी आहे. या भवनसाठी जागा मिळवण्याची जबाबदारी लोकप्रतिनिधींची आहे. आता पुढच्यावर्षी भवनच्या उद्‍घाटनसाठीच एकत्र येऊ, असा अजेंडा केला पाहिजे.
- संभाजीराजे छत्रपती, खासदार
समाजातील मुलांचा जन्मदर सुधारण्यासाठी मानसिकता बदलण्याची गरज आहे. भ्रूण हत्या रोखण्यासाठी प्रत्येक गर्भवतीची पोलिस ठाण्यात नोंद करून महिला कॉन्स्टेबलद्वारे संबंधित महिलेची तिच्या घरी भेट घेतली पाहिजे. ओबीसी आयोग स्थापन होत असून, त्यात मराठा समाजाचा समावेश हवा. समाजाच्या आरक्षणाचा प्रश्न न्यायालयात असला, तरी लोकसभेत हा प्रश्न मांडला आहे.
- धनंजय महाडिक, खासदार
राजधानी दिल्लीत प्रत्येक राज्याचे सदन आहे. त्याच धर्तीवर कोल्हापुरातील मराठा भवन व्हावे. या भवनच्या उभारणीसाठी प्रत्येकाने आपल्या परीने निधी दिला पाहिजे. माझ्या मतदारसंघातून यासाठी जेवढा निधी जमा होईल, त्यावर एक रुपया जादा निधी मी देईन. आचारसंहितेबरोबरच आपल्या समाजातील कोणी पुढे जात असेल, तर त्याला मागे ओढू नका. बोलण्यातही एक प्रकारची आचारसंहिता पाळावी लागेल.
- सुरेश हाळवणकर, आमदार
सरकार मराठा समाजाच्या मागण्यांसाठी सकारात्मक आहे. समाजाला आरक्षण देण्याचा प्रश्न कोर्टात असला तरी त्याला इतर समाजांचाही कोणाचाही आक्षेप नाही. कोल्हापुरात मराठा भवन उभारणीसाठी जागेचा अडसर असला, तरी अगदी रेडिरेकनरप्रमाणे जागा खरेदी करण्यातही काही अडचण येईल, असे वाटत नाही. इथे व्यासपीठावर उपस्थित सगळ्यांची जबाबदारी आता वाढली आहे.
- चंद्रदीप नरके, आमदार
चांगल्या कामासाठी दोघे एकत्र
खासदार संभाजीराजे छत्रपती यांनी भाषणात खासदार महाडिक आणि आमदार सतेज पाटील यांनी चिमटे काढले. ‘मराठा भवनसाठी उत्स्फूर्त निधी जाहीर करायला आम्ही, महाडिक किंवा पाटील नाही’, असे संभाजीराजे यांनी म्हणताच सभागृहात हशा पिकला. चांगल्या कामासाठी सगळ्यांनी एकत्र येण्याची गरज असल्याचे सांगून खासदार संभाजीराजे म्हणाले, ‘दिल्लीत काम करत असताना खासदार महाडिक आणि मी एकत्र काम करतो. आमच्यातील मतभेद कोल्हापुरात ठेऊन आम्ही दिल्लीत एकत्र असतो.’ यावरही जोरादार टाळ्या वाजवून उपस्थितांनी प्रतिसाद दिला.
यांनी दिला उत्स्फूर्त निधी
पापाभाई बागवान – एक लाख एक हजार
दिनकरराव आदिक – एक लाख
मयूर उद्योग समूह – दोन लाख
तंबाखू संघ कर्मचारी – ७५ हजार
नगरसेवक नाना कदम – एक लाख
खासदार धनंजय महाडिक – १० लाख
महादेवराव महाडिक आणि अमल महाडिक – एकूण ११ लाख
आयटी पार्कजवळ जागा
कोल्हापुरात हॉकी स्टेडियम रोडवर आयटी पार्क शेजारी असणारी सहा एकर सरकारी जागा मराठा भवनसाठी देण्याचा प्रस्ताव असल्याची माहिती आमदार सतेज पाटील यांनी भाषणात दिली. ते म्हणाले, ‘या जागेचा प्रस्ताव जिल्हाधिकाऱ्यांनी विभागीय आयुक्तांकडे पाठविला आहे. कोल्हापुरातील मराठा भवन उभारताना पुढील शंभर वर्षांचा विचार करून ते उभारले पाहजे. त्यासाठी ही जागा अतिशय योग्य आणि सोयीची आहे.’
मोबाइल अॅप डाउनलोड करा आणि राहा अपडेट
