जिल्हा परिषद विषय समिती सदस्य निवड सभेत केवळ ८३ पैकी ७३ सदस्यांची निवड बिनविरोध झाल्याची घोषणा झाली. एकमत न झाल्याने सदस्यांची नावे लपवण्याची नामुष्की सत्ताधारी भाजप आघाडीवर ओढवली. सत्ताधारी आणि विरोधीमधील कारभारी सदस्यांनी समिती सदस्यांसाठी निवडणूक होऊ नये, यासाठी ही चाल खेळल्याचे बोलले जात आहे.
जिल्हा परिषदेच्या सभागृहात अध्यक्षा शौमिका महाडिक यांच्या अध्यक्षतेखाली दहा विषय समितीच्या ८३ सदस्य निवडीसाठी सभा झाली. निवडणूक निर्णय अधिकारी म्हणून महाडिक यांनी काम पाहिले.
अध्यक्षाच्या दालनात अध्यक्षा महाडिक, उपाध्यक्ष सर्जेराव पाटील, अरूण इंगवले, विजय भोजे तर विरोधी आघाडीचे काँग्रेसचे ज्येष्ठ सदस्य बंडा माने, उमेश आपटे, राष्ट्रवादीचे सतीश पाटील आदींची बैठक झाली. बांधकाम, महिला बालकल्याण, समाज कल्याण, स्थायी समितीमध्ये सदस्य होण्यासाठी सत्ताधारी, विरोधांत स्पर्धा लागली. शेवटपर्यंत एकमत झाले नाही. तशाच परिस्थितीत निवडीची सभा तब्बल एक तास उशिरा सुरू झाली. उपमुख्य कार्यकारी अधिकारी (सामान्य प्रशासन) चंद्रकांत वाघमारे, अध्यक्षा महाडिक यांनी जिल्हा परिषद अधिनियमानुसार निवड सभेची प्रक्रिया समजावून सांगितली.
दहा समितीच्या ८३ जागेसाठी ७३ जणांनी अर्ज दाखल केले. जागेपेक्षा कमी अर्ज दाखल झाले. निवड बिनविरोध झाल्याचे अध्यक्षा महाडिक यांनी घोषित केले. मात्र त्यांनी निवड झालेल्या ७३ सदस्यांची नावे जाहीर करणे टाळले. यामुळे सदस्यांमध्ये संभ्रमावस्था निर्माण झाली. उर्वरित १० जागेच्या निवडीचा अधिकार अध्यक्षांना राहील, असे जाहीर केले. परिणामी निवडीची सभा केवळ औपचारिकता आणि निवड प्र‌क्रियेचे अधिनियम वाचून दाखवण्यासाठी बोलावण्यात आल्याचे स्पष्ट झाले.
………………..
केवळ फॉर्म्युलाच
विरोधी आघाडीतील काँग्रेस, राष्ट्रवादी पक्षाच्या ३० सदस्यांना आणि ७ सभापतींना समिती सदस्य म्हणून संधी मिळेल. उर्वरित ४२ जागेवर सत्ताधारी सदस्यांची वर्णी लागेल. अध्यक्षांच्या अधिकारात निवड असलेल्या १० जागेवरही सत्ताधारी सदस्यांचीच वर्णी लागेल. असा फॉर्म्युला ठरला आहे. पण कोणत्या समितीमध्ये कुणाला संधी द्यायची हे निश्चित झाले नाही.
नवा पायंडा
विषय समिती सदस्य निवडीच्या या पूर्वीच्या सभेत अध्यक्ष निवड झालेल्या सदस्यांची समितीनिहाय नावे वाचून दाखवत होते. या पारदर्शक निवडीमुळे सदस्यांनाही माझी कोणत्या समितीवर नियुक्ती झाली हे कळत होते. त्याला सोयीस्करपणे गुरुवारच्या सभेत बगल दिली. निवडीची सभा झाल्याचे कागदोपत्री दाखवायचे आणि नेत्यांच्या आदेशानुसार बंद खोलीत बसून सोयीनुसार नावे समितीत घुसडण्याची नवी परंपरा आता जिल्हा परिषदेत सुरू झाली आहे.
भोजे, इंगवले यांच्यात सवाल प्रतिसवाल
हुपरी नगरपालिका केल्याबद्दल मुख्यमंत्री देवेंद्र फडणवीस, पालकमंत्री चंद्रकांत पाटील, आमदार सुरेश हाळवणकर यांच्या अभिनंदनाचा ठराव वियज भोजे मांडत होते. त्यावेळी या सभेत असा ठराव मांडता येतो, का असा सवाल अरुण इंगवले यांनी केला. त्याकडे दुर्लक्ष करीत भोजे यांनी ठराव मांडला. निवडीच्या सभेतील भोजे, इंगवले यांच्यातील कुरघोडी समोर आली.
ओळख परेड
पहिली सभा असल्याने सुरुवातीलाच सर्व पदा‌धिकारी, सदस्य, अधिकारी यांची ओळख परेड झाली. अनेक सदस्यांना ओळखपरेडवेळी टोपणनाव, प्राध्यापक, डॉक्टर आहे, हे जाणीवपूर्वक सांगण्याचा मोह आवरता आला नाही.
मोबाइल अॅप डाउनलोड करा आणि राहा अपडेट
