साताऱ्यात पाऊस

March 31, 2017, 10:30 am

≫ Next: ​ डॉ. अशोक चौसाळकरांनामहर्षी शिंदे पुरस्कार जाहीर

≪ Previous: महाबळेश्वर बंदला प्रतिसाद

$

0

0

म. टा. वृत्तसेवा, सातारा

पंधरा दिवसांपासून जिल्ह्यात उन्हाने अंगाची लाही लाही होत होती. शुक्रवारी सायंकाळी पाच वाजल्यापासून ढगाळ वातावरण निर्माण झाले होते. अखेर रात्री सात वाजण्याच्या सुमारास सातारा शहरासह परिसरात सोसाट्याच्या वाऱ्यासह पाऊस कोसळण्यास सुरुवात झाली.

फेब्रुवारी महिन्याच्या शेवटच्या आठवड्यातच उन्हाची चाहूल जाणवू लागली होती. त्यात मार्च महिन्यातील शेवटच्या आठवड्यात तर उन्हाने अंगाची लाहीलाही होत होती. सातारा जिल्ह्यातील महाबळेश्वर वगळता सर्वत्र पारा ४० अंशावर गेला होता. मात्र, शुक्रवारी सायंकाळी पाच वाजता अचानक ढगाळ वातावरण झाल्याने जिल्ह्यातील शेतकरी वर्गाने गवत, काडी, लाकुड फाटा झाकून ठेवण्याची धांदल उडाली. रात्री सातच्या सुमारास सोसाट्याचा वारा आणि पावसाने सुरुवात केली. रात्री उशिरापर्यंत पाऊस कोसळत होता. शाहुपुरी अंजली कॉलनी येथे जोरदार वाऱ्याने वडाचे झाड कोसळले. वीजवाहक तारा तुटल्याने शाहुपुरी करंजे सदर बझार बोगदा-पोवई नाका तसेच प्रतापगंज पेठ येथे सुमारे पाऊण तास वीज गायब झाली होती. संध्याकाळच्या वळीवाने वातावरणात काहीकाळ गारवा निर्माण झाला मात्र, पुन्हा अंगाची काहिली सातारकरांना सहन करावी लागली.

औंध परिसरात पावसाचा शिडकावा

शुक्रवारी सायंकाळी पाचच्या सुमारास औंध परिसरात वादळी वारे, मेघगर्जनेसह काही भागात पावसाच्या हलक्या सरी पडल्या.

औंधच्या उत्तरेकडील जायगाव येथे सुमारे वीस मिनिटे पाऊस पडला. भोसरे, चौकीचा आंबा, वरूड, औंध व अन्य भागात पावसाचा काही प्रमाणात शिडकावा झाला. आकाश काळवंडून आल्याने जोरदार पाऊस होईल व हवेत गारवा निर्माण होईल, अशी आशा नागरिक, शेतकऱ्यांमध्ये निर्माण झाली होती. मात्र, जोरदार वाऱ्यामुळे पावसाने हुलकावणी दिली. रात्री उशीरा हवेत पुन्हा कमालीचा उष्मा निर्माण झाला होता, तसेच ढगाळ वातावरण होते.

मोबाइल अॅप डाउनलोड करा आणि राहा अपडेट

---

​ डॉ. अशोक चौसाळकरांनामहर्षी शिंदे पुरस्कार जाहीर

April 3, 2017, 10:22 am

≫ Next: कॅनॉलमध्ये बुडूनमुलाचा मृत्यू

≪ Previous: साताऱ्यात पाऊस

$

0

0

म. टा. वृत्तसेवा, सातारा

रा. ना. चव्हाण प्रतिष्ठान, वाई यांच्या वतीने देण्यात येणारा यंदाचा २१वा महर्षी विठ्ठल रामजी शिंदे पुरस्कार प्रा. डॉ. अशोक चौसाळकर यांना जाहीर झाला आहे. १९८० नंतरच्या काळात मराठी भाषेतील वैचारिक साहित्याच्या क्षेत्रात महत्त्वाची भूमिका डॉ. चौसाळकर यांनी बजावली आहे. प्रतिष्ठानचे ज्येष्ठ विश्वस्त आणि सामाजिक कार्यकर्ते, दलितमित्र संभाजीराव पाटणे यांनी पत्रकार परिषदेत ही माहिती दिली.

या पुरस्काराचे वितरण रा. ना. चव्हाण यांच्या २४व्या स्मृतिदिनी, दहा एप्रिल रोजी ब्राह्म समाज रविवार पेठ, वाई येथे सकाळी साडेनऊ वाजता ज्येष्ठ सामाजिक कार्यकर्ते व विचारवंत बाबा आढाव यांच्या अध्यक्षतेखाली होणाऱ्या कार्यक्रमात ज्येष्ठ साहित्यिक व समीक्षक प्रा. डॉ. द. ता. भोसले यांच्या हस्ते होणार आहे.

दलितमित्र रा. ना. चव्हाण यांनी ज्यांच्या प्रेरणेने आपले प्रबोधनपर साहित्य समृद्ध व समर्थ केले त्या महर्षी विठ्ठल रामजी शिंदे यांच्या नावाने हा पुरस्कार दिला जातो. हा पुरस्कार सामाजिक, शैक्षणिक क्षेत्रात, संशोधन क्षेत्रात व साहित्यिक क्षेत्रात भरीव कामगिरी करणाऱ्या व्यक्तीस दर वर्षी सन्मानपूर्वक दिला जातो. स्मृतिचिन्ह, शाल व श्रीफळ, असे या पुरस्काराचे स्वरूप आहे.

समाजप्रबोधन पत्रिकेचे संपादक असलेले प्रा. डॉ. अशोक चौसाळकर राज्यशास्त्राचे नामवंत प्राध्यापक आणि राजकीय विश्लेषक म्हणून ओळखले जातात. शिवाजी विद्यापीठाच्या राज्यशास्त्र विभागाचे प्रमुख आणि प्राध्यापक म्हणून ते सेवानिवृत्त झाले आहेत. एक निष्णात राजकीय, सामाजिक विश्लेषक म्हणून ते सतत सक्रिय राहिले असून, त्यांनी संशोधनाच्या व वैचारिक लेखनाच्या क्षेत्रात वेगळा ठसा उमटविला आहे. मराठी व इंग्रजी या दोन्ही माध्यमातून विपुल, अशी ग्रंथसंपदा त्यांनी निर्माण केली आहे. १९व्या शतकातील सामाजिक आणि धर्मविचार हा त्यांच्या चिंतनाचा विषय आहे.

मोबाइल अॅप डाउनलोड करा आणि राहा अपडेट

कॅनॉलमध्ये बुडूनमुलाचा मृत्यू

April 17, 2017, 2:30 pm

≫ Next: हयातीच्या दाखल्यासाठी परवड

≪ Previous: ​ डॉ. अशोक चौसाळकरांनामहर्षी शिंदे पुरस्कार जाहीर

$

0

0

कागल

वाळवे खुर्द (ता.कागल ) येथील हर्षल सदाशिव पाटील या शाळकरी मुलाचा कॅनॉलमध्ये बुडून दुर्दैवी मृत्यू झाला. आपल्या चुलत भावांना आपल्याला कसे पोहता येते हे दाखवण्याच्या नादात तो बुडाला. हर्षल हा एकुलता एक होता. त्याचे वडील पानपट्टी व्यवसाय करतात. या घटनेने वाळवेवर शोककळा पसरली.

हर्षल सोमवारी दुपारी आपले चुलते हिंदुराव पाटील यांच्या दोन मुलांबरोबर कालव्यात पोहायला गेला होता. पोहून झाल्यावर तिन्ही मुलांना कालव्याच्या बाजूला कपडे घालण्यासाठी उभे करून हिंदुराव हे आपल्या पोल्ट्री फार्मकडे गेले. तिथे डॉक्टर आल्याने ते थोडा वेळ थांबले. या दरम्यान, आपल्याला कसे पोहता येते हे चुलत भावांना दाखवण्यासाठी हर्षलने कॅनॉलमध्ये उडी मारली. तो गटांगळ्या खाताना पाहून भावांनी आरडाओरड केली. परंतु तोपर्यंत सुमारे १५० मीटर गटांगळ्या खात हर्षल पाण्यात बुडाला. चुलत्यांनी त्याला पाण्याबाहेर काढले, पण त्याचा मृत्यू झाला होता.

मोबाइल अॅप डाउनलोड करा आणि राहा अपडेट

हयातीच्या दाखल्यासाठी परवड

April 17, 2017, 2:30 pm

≫ Next: राष्ट्रवादीची तहसीलवर धडक

≪ Previous: कॅनॉलमध्ये बुडूनमुलाचा मृत्यू

$

0

0

इचलकरंजी

संजय गांधी निराधार योजनेतील लाभार्थ्यांना अनुदान पदरात पाडून घेण्यासाठी जिवंतपणी देखील हयातीचा दाखला घ्यावा लागतो. यासाठी तलाठी कार्यालयात ताटकळत थांबावे लागतेच, पण आर्थिक लूटही केली जात आहे. इचलकरंजी शहरात नऊ हजारांहून अधिक लाभार्थ्यांची परवड थांबणार का ? असा प्रश्न उपस्थित होत आहे.

इचलकरंजी विधानसभा मतदारसंघात संजय गांधी निराधार योजनेचे सुमारे तेरा हजार लाभार्थी आहेत. यामध्ये कबनूर, चंदूर, कोरोची , तारदाळ , खोतवाडीसह इचलकरंजी शहराचा समावेश आहे. एकट्या इचलकरंजीत नऊ हजारांहून अधिक लाभार्थी आहेत. सरकारकडून मिळणाऱ्या तुटपुंज्या अनुदनासाठी सरकारी तसेच राजकीय पक्षांच्या कार्यालयात वारंवार हेलपाटे मारावे लागतात. जिल्हा मध्यवर्धी सहकारी बँकेत अनुदान मिळत असल्याने सरकारी नियमानुसार प्रत्येक वर्षी एप्रिल महीन्यात लाभार्थी हा हयात आहे का, याची खातरजमा करण्यासाठी बँकेत दाखला जमा करावा लागतो.

यंदाही दाखला मिळविण्यासाठी लाभार्थी सकाळपासूनच तलाठी कार्यालयासमोर ताटकळत उभे असतात. कार्यालयात दैनंदिन कामात अधिक रस असणारे कर्मचारी अशा लाभार्थ्यांची दखलच घेत नाहीत. तुटपुंज्या अनुदानासाठी पायपीट करून येणाऱ्या लाभार्थ्यांना या कार्यालयातील कर्मचारी अक्षरशः लुटत आहेत. अज्ञानपणाचा गैरफायदा घेत कोणतीही सरकारी पावती न देता प्रत्येकी वीस रुपये उकळले जात आहेत.

काही दिवसांपूर्वी पुरवठा कार्यालयात सहाय्यक तलाठी महिलेने पैसे उकळल्याचे उघड होताच पुरवठा निरीक्षकांनी त्यांना तेथून हाकलून लावले होते. याबाबतची तक्रार हातकणंगले तहसिलदार राजश्री राजमाने यांच्याकडे झाली आहे. त्यानंतर पुन्हा तलाठी कार्यालयात लाभार्थ्यांची अडवणूक केली जात आहे.

नऊ हजाराहून अधिक लाभार्थ्यांकडून प्रत्येकी वीस रुपयांची वसुली केवळ हयातीच्या दाखल्यासाठी केली जात आहे. याला आवर घालण्यासाठी काही सामाजिक कार्यकर्त्यांनी कंबर कसली आहे. गोरगरीब लाभार्थ्यांची लूटमार करणाऱ्या तलाठी कार्यालयातील कर्मचाऱ्यांना साडी चोळीचा आहेर दिला जाणार आहे.

.........

चौकट

कोतवाल शिरजोर

या कार्यालयातील कारभार एक कोतवाल चालवतो. मागील तीस वर्षांपासून तो याच कार्यालयात ठाण मांडून आहे. त्याने मुलाला देखील कार्यालयात अनाधिकृतरित्या आणून इतर कर्मचाऱ्यांना नाहक त्रास देण्याचा प्रयत्न चालवला आहे. शिकाऊ कर्मचारी सावज शोधत असतात. कार्यालयातील शिपाई ते तलाठी ही साखळी मोडून काढून सर्वसामान्यांना न्याय देण्याचा प्रयत्न वरीष्ठांकडून होणार काय, अशी विचारणा होत आहे

मोबाइल अॅप डाउनलोड करा आणि राहा अपडेट

राष्ट्रवादीची तहसीलवर धडक

April 17, 2017, 2:30 pm

≫ Next: पोलिसाच्या संपत्तीसह बँक खाते सील

≪ Previous: हयातीच्या दाखल्यासाठी परवड

$

0

0

जयसिंगपूर

राज्य व केंद्र सरकार शेतकऱ्यांच्या हिताविरोधी निर्णय घेत आहे. शेतकऱ्यांच्या उत्पादनाला हमीभाव नाही, परिणामी देशातील शेतकरी आर्थिक अरिष्ठात सापडले आहेत. त्यामुळे शेतकरी कर्जमुक्त झाल्याशिवाय तरणोपाय नाही. यासाठीच राष्ट्रवादी काँग्रेसने शेतकरी कर्जमाफीसाठी लढा उभारला असून सातबारा कोरा झाल्याशिवाय राष्ट्रवादी काँग्रेस स्वस्थ बसणार नाही. कर्जमाफी झाली नाही तर मे महिन्यात अंकली टोल नाक्यावर रास्ता रोको आंदोलन करून हा लढा तीव्र करण्याचा इशारा शिरोळ तालुका राष्ट्रवादी काँग्रेसचे नेते आणि शरद साखर कारखान्याचे चेअरमन राजेंद्र पाटील-यड्रावकर यांनी दिला.

शेतकऱ्यांना कर्जमुक्त करावे, या मागणीसाठी राष्ट्रवादी काँग्रेसच्यावतीने शिरोळ तहसील कार्यालयावर मोर्चा काढण्यात आला. यावेळी राजेंद्र पाटील-यड्रावकर बोलत होते. ते म्हणाले, ‘काँग्रेस राष्ट्रवादी आघाडीचे सरकार असताना तत्कालीन पंतप्रधान मनमोहन सिंग व कृषीमंत्री शरद पवार यांनी कर्जमाफी देऊन सर्वसामान्य शेतकऱ्यांचा सातबारा कोरा केला होता. मात्र, काहींनी खोडा घालून कोल्हापूर जिल्ह्यातील शेतकऱ्यांच्या कर्जमाफीला विरोध केला. अपात्र कर्जाच्या नावाखाली शेतकऱ्याचे पैसे बँकांनी वसूल केले. आमदार हसन मुश्रीफ यांच्या नेतृत्वाखाली अपात्र कर्जमाफीसाठी न्यायालयात दाद मागितली. न्यायालयानेही कर्जमाफीचा निर्णय दिला. त्यामुळे वसूल झालेल्या शेतकऱ्यांचे पैसे नाबार्डने व बँकांनी त्वरीत द्यावेत, अशी आमची मागणी आहे.’

काँग्रेस राष्ट्रवादीने नेहमीच शेतकरी हिताचे निर्णय घेतले मात्र, सध्याचे सरकार शेतकरी हितविरोधी निर्णय घेऊन शेतकऱ्याचे कंबरडे मोडत आहे. शेतकऱ्यांची कर्जमाफी झाली नाही तर राष्ट्रवादी काँग्रेसच्या माध्यमातून शिरोळ तालुक्यात तीव्र आंदोलन छेडण्यात येईल, इशारा राजेंद्र पाटील यड्रावकर यांनी यावेळी दिला.

यावेळी शेतकऱ्यांची संपूर्ण कर्जमाफी झाली पाहिजे, या मागणीचे निवेदन तहसीलदार किरणकुमार काकडे यांना देण्यात आले. याप्रसंगी तालुका अध्यक्ष प्रकाश पाटील-टाकवडेकर, माजी जिल्हा परिषद सदस्य अमरसिंह पाटील, गोकुळचे माजी अध्यक्ष दिलीपराव पाटील, पं.स.सभापती मल्लाप्पा चौगुले, माजी उपसभापती राजू कुरडे, राष्ट्रवादीचे सरचिटणीस प्रा.आण्णासाहेब क्वाणे यांनी मनोगत व्यक्त केले.

यावेळी राष्ट्रवादी युवक काँग्रेसचे जिल्हाध्यक्ष संजय पाटील-यड्रावकर, पं.स.सदस्या रूपाली मगदूम, मिनाक्षी कुरडे, दिपाली परीट, जि.प.सदस्या परवीन पटेल, सावित्री कुंभार, स्मिता कांबळे राष्ट्रवादीचे पदाधिकारी, शेतकरी मोठ्या संख्येने उपस्थित होते.

............

चौकट

साखरचे दर कोसळण्याची शक्यता

केंद्र व राज्य सरकारला शेतकऱ्याची अवस्थाच माहीत नाही, अशा टीका करून यड्रावकर म्हणाले, ‘शेतकऱ्यांच्या उत्पादन मालाला हमीभाव नाही. सध्या साखरेला दर चांगला असल्यामुळे ऊस उत्पादक शेतकऱ्यांना चार पैसे जादा मिळत आहेत. मात्र, त्याठिकाणीही धनदांडग्यांच्या दबावाखाली सरकार साखर आयोग नेमून परदेशातून साखर आयात करीत आहे. त्यामुळे साखरेचे दर कोसळण्याची शक्यता आहे.

मोबाइल अॅप डाउनलोड करा आणि राहा अपडेट

पोलिसाच्या संपत्तीसह बँक खाते सील

April 17, 2017, 2:30 pm

≫ Next: संशयितांची शोधमोहीम

≪ Previous: राष्ट्रवादीची तहसीलवर धडक

$

0

0

म. टा. प्रतिनिधी, कोल्हापूर

वारणानगरात मोहिद्दीन मुल्लाने केलेल्या चोरी प्रकरणाच्या तपासात गोलमाल करून नऊ कोटी १८ लाख रुपये हडप करणाऱ्या सांगलीतील पोलिस अधिकाऱ्यांची संपत्ती सील केली जाणार आहे. फिर्यादी बांधकाम व्यावसायिक झुंजार सरनोबत यांना संशयित पोलिस निरीक्षक विश्वनाथ घनवट याने तक्रार मागे घेण्यासाठी रोख १८ लाखांसह ३४ लाखांचा एक प्रॉपर्टीही देऊ केली होती. सोमवारी (ता. १७) तपास अधिकाऱ्यांनी ही प्रॉपर्टी सील केली. त्याचबरोबर संशयिताचे कोल्हापुरातील एका राष्ट्रीयकृत बँकेतील खातेही सील केले. दरम्यान, याचा तपास सीआयडीकडे वर्ग करण्यात आा आहे. दोषी फरारी पोलिसांना कोणत्याही क्षणी अटक होऊ शकते. त्यांच्यावर निलंबनाची कारवाई होईल, अशी माहिती विशेष पोलिस महानिरीक्षक विश्वास नांगरे-पाटील यांनी दिली.

वारणानगरातील शिक्षक कॉलनीतील बिल्डिंग क्रमांक ५ मधील फ्लॅट क्रमांक तीनमधून मैनुद्दीन मुल्ला याने ८ मार्च २०१६ रोजी रात्री सुमारे तीन कोटी २८ लाखांची चोरी केली होती. सांगली पोलिसांनी चोरट्यास अटक केल्यानंतर तपासादरम्यान सुमारे ९ कोटी १८ लाख रुपयांची रक्कम लंपास केल्याचे उघडकीस आले आहे. फिर्यादी झुंजार सरनोबत यांच्या तक्रारीनुसार कोल्हापुरात अपर पोलिस अधीक्षक सुहेल शर्मा आणि सांगलीतील अपर पोलिस अधीक्षक कृष्णकांत उपाध्याय यांनी केलेल्या संयुक्त चौकशीत ही बाब उघडकीस आली. पोलिस अधिकाऱ्यांनीच चोरीतील रकमेवर डल्ला मारल्याने वरिष्ठांनी याची गंभीर दखल घेतली आहे.

चौकशीत निष्पन्न झालेली माहिती तातडीने पोलिस महासंचालक कार्यालयाकडे पाठविण्यात आली. पोलिस निरीक्षक विश्वनाथ घनवट, सहायक निरीक्षक सूरज चंदनशिवे, शरद कुरळपकर, पोलिस हेड कॉनस्टेबल दीपक पाटील, शंकर पाटील, पोलिस नाईक कुलदीप कांबळे, रवींद्र पाटील या सात पोलिसांसह ज्याच्या बँक खात्यावर चोरीतील रक्कम जमा केली, तो प्र्रवीण भास्कर सावंत (रा. वासूद, जि. सोलापूर) याच्यावरही पोलिसांनी चोरी, ठकबाजी, कट रचण्याचे गुन्हे दाखल केले आहेत. याचा तपास सीआयडीकडे वर्ग करण्याबाबत पोलिस महासंचालकांशी चर्चा केल्याचे विशेष पोलिस महानिरीक्षक विश्वास नांगरे-पाटील यांनी सांगितले.

गेल्या सहा महिन्यांपासून संबंधित पोलिसांची वरिष्ठ अधिकाऱ्यांनी चौकशी केली. पोलिसांचे कॉल डिटेल्स, लोकेशन, बँक खात्यांमधील व्यवहार आदींची माहिती घेतली गेली. पोलिसांनी लुबाडलेली रक्कम वाहन खरेदी, फ्लॅट आणि प्लॉट खरेदीत गुंतवली आहे. काही अधिकाऱ्यांनी बंधकाम व्यवसायात भागीदारीही केल्याचे तपासात पुढे आले. ही संपत्ती सील करण्यात येणार आहे.

संशयितांपैकी प्रवीण सावंत याच्या बँक खात्यावरील १८ लाख रुपये आणि सोलापूर जिल्ह्यातील ३४ लाख रुपयांची प्रॉपर्टी सोमवारी पोलिस अधिकाऱ्यांनी जप्त केली. दरम्यान, फिर्यादी झुंजार सरनोबत यांच्याकडे १४ कोटींची रक्कम कुठून आली? याचा मूळ मालक कोण? हा पैसा बेहिशोबी आहे का? याची चौकशी करण्यासाठी प्राप्तीकर विभागाला कळवण्यात आल्याचे नांगरे-पाटील म्हणाले.

अहवाल प्राप्तीकरकडे पाठवला

पोलिसांनी चोरी आणि तपासातील अफरातफरीची चौकशी करून संशयितांवर गुन्हे दाखल केले. मात्र फिर्यादी झुंजार सरनोबत यांच्याकडे इतकी मोठी रक्कम कुठून आली? त्याचा हिशोब शोधण्यासाठी सोमवारी तपास अधिकारी हर्ष पोद्दार यांनी चौकशी अहवाल प्राप्तीकर विभागाकडे सोपवला. प्राप्तीकरच्या चौकशीतून वारणानगरात सापडलेल्या रकमेचे गूढ उकलण्याची शक्यता आहे.

प्राथमिक चौकशीत सात पोलिसांसह त्यांचा एक साथीदार दोषी आढळला आहे. संशयितांवर गुन्हे दाखल केले आहेत. हा तपास सीआयडीकडे वर्ग केला जात आहे. संशयितांना कोणत्याही क्षणी अटक करून पुढील निलंबनाची किंवा बडतर्फीची कारवाई केली जाईल. कोणाचीही गय केली जाणार नाही.

विश्वास नांगरे- पाटील, विशेष पोलिस महानिरीक्षक

मोबाइल अॅप डाउनलोड करा आणि राहा अपडेट

संशयितांची शोधमोहीम

April 17, 2017, 2:30 pm

≫ Next: मुलींच्या जन्मदरातील घट चिंताजनक

≪ Previous: पोलिसाच्या संपत्तीसह बँक खाते सील

$

0

0

म. टा. प्रतिनिधी, कोल्हापूर

वारणानगरातील चोरीचा तपास करताना संगनमताने ९ कोटी १८ लाख रुपयांची लूट करणाऱ्या सात पोलिसांसह त्यांचा मित्र प्रवीण भास्कर सावंत आणि चोरटा मैनुद्दीन मुल्ला या ९ जणांवर कोडोली पोलिस ठाण्यात गुन्हे दाखल झाले आहेत. कारवाईची कुणकुण लागताच सांगलीतील संशयित पोलिसांनी पळ काढला आहे. दोन दिवसांनंतरही संशयित फरार असल्याने, त्यांच्या शोधासाठी पथके रवाना झाली आहेत. कोणत्याही क्षणी संशयितांना अटक होईल. त्यांच्यावर निलंबन किंवा बडतर्फीची कारवाई केली जाईल असे विशेष पोलिस माहनिरीक्षक विश्वास नांगरे-पाटील यांनी स्पष्ट केले.

गुन्हे दाखल करण्याची प्रक्रिया सुरू होताच संशयितांनी सांगलीतून पळ काढला. त्यांचे मोबाइलदेखील स्विचऑफ आहेत. सांगली पोलिसांनी संशयितांच्या अटकेसाठी पथक तयार केले आहे. अटकेच्या प्रक्रियेनंतर निलंबन किंवा बडतर्फीची कारवाई होणार आहे. चोरटा मैनुद्दीनशी संगनमत करून कोट्यवधींच्या रकमेवर डल्ला मारणाऱ्या सांगली पोलिसांचे बिंग फुटल्याने हा प्रकार उघडकीस आला. सध्या तरी यात सांगलीतील तीन पोलिस अधिकाऱ्यांसह एकूण सात पोलिसांचा सहभाग निष्पन्न झाला आहे.

तपास अहवाल वरिष्ठांकडे

पोलिसांनीच तपासादरम्यान कोट्यवधींची रक्कम लुटल्याने अधिकाऱ्यांनी तपासात कमालीची गोपनीयता बाळगली होती. सहा महिन्यांच्या तपासानंतर तयार झालेला अहवाल तपास अधिकाऱ्यांनी आयजींकडे सोपवला होता. प्रकरणातील गांभीर्य ओळखून नांगरे-पाटील यांनी अहवालाची प्रत अतिरिक्त पोलिस महासंचालकांकडे पाठवली आहे. राज्य सरकारलाही याची माहिती दिल्याचे नांगरे-पाटील यांनी सांगितले.

दरम्यान, पोलिसांनीही मैनुद्दीनची चौकशी केली होती. कोडोली पोलिस ठाण्यातच गुन्हा दाखल आहे, त्याचबरोबर एलसीबीकडेही मैनुद्दीनचा ताबा होता. त्यामुळे चोरीच्या पैशात आणखी काही वाटेकरी असल्याचा संशय शिवसेनेने व्यक्त केला आहे.

फिर्यादीला दाखवले आमिष

तपासाच्या पद्धतीवर संशय आल्याने फिर्यादी झुंजार सरनोबत यांनी सहा महिन्यांपूर्वी आयजी नांगरे-पाटील यांच्याकडे तक्रार केली होती. ही तक्रार मागे घ्यावी यासाठी सांगली एलसीबीचे पोलिस निरीक्षक विश्वनाथ घनवट यांनी फिर्यादीला रोख रकमेसह चोरीच्य पैशातून खरेदी केलेली प्रॉपर्टी देण्याचे आमिष दाखवले होते. यात १८ लाख रुपये रोख रकमेसह ३४ लाखांच्या प्रॉपर्टीचाही समावेश आहे. बँक खाते आणि संबंधित प्रॉपर्टी सील केल्याचे आयजी नांगरे-पाटील यांनी सांगितले.

ईडीकडे तपास देण्याची
शिवसेनेची मागणी

वारणा लूट प्रकरणाटी सखोल चौकशी करण्याचे निवेदन शिवसेनेने सोमवारी आयजी नांगरे-पाटील यांना दिले. निवेदनात म्हंटले आहे, ‘सांगली पोलिसांनी केलेल्या ९ कोटी अपहार प्रकरणातील फिर्यादी झुंजार सरनोबत यांच्याकडे इतकी रक्कम आली कोठून याचा गुंता सुटत नाही. या प्रकरणात तत्कालीन कोल्हापूर पोलिस अधीक्षक व विशेष पोलिस महानिरीक्षक यांची भूमिकाही संशयास्पद आहे. स्थानिक अधिकाऱ्यांनी चुकीचा तपास केल्याने त्यांच्यावरही कारवाई व्हावी. ज्या शैक्षणिक संकुलात ही रक्कम सापडली त्या संस्थेचीही चौकशी करावी. तपास जलदगतीने व्हावा, यासाठी हे प्रकरण ईडीकडे वर्ग करावा. शिवसेना लवकरच गृहराज्यमंत्री दीपक केसरकर यांची भेट घेवून सखोल चौकशीची मागणी करणार आहे. कोणत्याही बड्या नेत्यांना वाचवण्यासाठी प्रयत्न झाल्यास शिवसेना या प्रकरणी उच्च न्यायालयात जनहीत याचिका दाखल करणार आहे,’ असा इशाराही शिवसेनेने निवेदनातून दिला आहे.

शिष्टमंडळात शिवसेनेचे जिल्हाध्यक्ष संजय पवार, विजय देवणे, शहर प्रमुख शिवाजीराव जाधव, दुर्गेश लिंग्रस, रवि चौगुले, शिवाजीराव पाटील, दत्ता टिपुगडे, हर्षल सुर्वे, विराज पाटील, रिया पाटील, दीपाली शिंदे, कमल पाटील, राजू यादव, संजय जाधव, आदी उपस्थित होते.

मोबाइल अॅप डाउनलोड करा आणि राहा अपडेट

मुलींच्या जन्मदरातील घट चिंताजनक

April 17, 2017, 2:30 pm

≫ Next: राजलक्ष्मीनगर प्रभागात सर्वांगिण विकासाची प्रतीक्षा

≪ Previous: संशयितांची शोधमोहीम

$

0

0

Gurubal.Mali @timesgroup.com
Tweet :@gurubalmaliMT

कोल्हापूर : आर्थिकदृष्ट्या सधन आणि शिक्षणातही आघाडीवर असलेला पश्चिम महाराष्ट्र मुलींच्या जन्मदरात गेल्या चार वर्षांच्या तुलनेत मागे पडला आहे. ‘बेटी बचाओ’ चळवळीअंतर्गत अनेक उपक्रम राबवून कौतुकाची थाप मारून घेणारा कोल्हापूर जिल्हादेखील यात मागेच राहिल्याने ‘पालथ्या घड्यावर पाणी’ अशीच स्थिती चळवळीची झाली आहे. कोकण विभागात रत्नागिरीने लेकींच्या जन्मदरात बाजी मारली असली, तरी सिंधुदूर्ग जिल्ह्यातील स्थिती मात्र चिंताजनक आहे. म्हैसाळला उघडकीस आलेल्या स्त्री भ्रूण हत्या प्रकरणाने राज्यभर बदनाम झालेल्या सांगली जिल्ह्यात मात्र लेकींचा जन्मदर वाढला आहे

आरोग्य विभागाने गेल्या चार वर्षांतील राज्यभरातील मुलींच्या जन्मदराचा तुलनात्मक अहवाल तयार करण्यात आला आहे. या अहवालानुसार मुलींचा जन्मदर घटल्याचे उघड झाले आहे. राज्य आणि केंद्र सरकारबरोबरच अनेक सामजिक संस्थांच्यावतीने राज्यात सतत मुलींच्या जन्मदर वाढीबाबत प्रयत्न सुरू आहेत. तरीही प्रत्यक्षात जन्मदर वाढीत अपयश आल्याचे समोर आले आहे. अद्यापही मुली आणि मुले असा भेदभाव करत, स्त्री भ्रूण हत्या केली जात असल्यानेच मुलींचे प्रमाण कमी होत आहे.

महाराष्ट्राचा विचार करता २०१५ साली असलेला दर हजारी मुलामागे असलेला ९०७ हा मुलींचा जन्मदर गेल्यावर्षी (सन २०१६) ८९९ पर्यंत कमी झाला आहे. पश्चिम महाराष्ट्रातील कोल्हापूर, सोलापूर, सातारा आणि पुणे जिल्ह्यातदेखील मुलींचा जन्मदर घटला आहे. कोल्हापुरात चार वर्षांपूर्वी मुलांची हजार मुलांमागे जन्मदर ८९२ होता, तो आता ८७२ पर्यंत घसरला आहे.

कोल्हापूर जिल्हा परिषदेच्या आकडेवारीनुसार, मुलींचा जन्मदर वाढल्याचे दिसत असले तरी शहर व जिल्हा याचा एकत्रित विचार केला तर तो कमी असल्याचेच पुढे आले आहे. सीमाभागात सुरू असलेल्या गर्भलिंग चाचण्यांमुळेच या भागात स्त्री भ्रूणहत्या होण्याचे प्रमाण कमी होण्याऐवजी वाढत आहे. सातारा व सोलापूर हे जिल्हेदेखील मुलींच्या जन्मदरात मागेच आहेत. सलग चार वर्षे सतत सातारा जिल्ह्यात हे प्रमाण कमी होत आहे.

दोन महिन्यांपूर्वी सांगली जिल्ह्यातील म्हैसाळ प्रकरण राज्यभर गाजले. सांगली जिल्ह्याची बदनामी झाली. मात्र, गेल्या चार वर्षात या जिल्ह्यात मुलींच्या जन्मदरात दरवर्षी वाढ होत असल्याचे स्पष्ट होते. ही बाब कौतुकाची आहे. चार वर्षापूर्वी ९०० असलेला हा दर आता ९०६ पर्यंत पोहचला आहे. पश्चिम महाराष्ट्रात हे प्रमाण सर्वात चांगले आहे. दुष्काळी सांगली जिल्ह्यात ही चांगली परिस्थिती असताना सधन कोल्हापूर जिल्हा मात्र मागे पडल्याची चिंताजनक बाब आहे. गेल्या दहा वर्षांपासून जिल्हा प्रशासनाने सायलंट ऑब्झर्व्हर, बेटी बचाओ-बेटी पढाओ, लेक वाचवा अभियानासह अनेक उपक्रम राबवले. त्यामुळे काही तालुक्यांत मुलींचे प्रमाण वाढले असले तरी जिल्ह्याच्या शहरी भागात हे प्रमाण कमीच आहे. आरोग्य विभागाच्या डोळ्यात अंजन घालणारा हा अहवाल असल्याने यापुढे तरी परस्परांवर जबाबदारी न झटकता कारवाई झाली, तरच ही स्थिती सुधारण्याची शक्यता आहे.


मुलींचे जन्मदर कमी होण्यास आरोग्य विभागच कारणीभूत आहे. कुंपणच शेत खात असेल तर विचारायचे कुणाला? अशी स्थिती आहे. छुपे गर्भलिंग निदान, स्त्री भ्रूण हत्या थांबवण्यासाठी ज्या भागात, गावात मुलींच्या जन्माचे प्रमाण कमी आहे, अशा भागात अचानक तपासणी करण्यासह गुन्हे दाखल करण्याची गरज आहे. परिस्थिती आणखी बिघडू नये यासाठी सरकारचे डोळे उघडण्याची गरज आहे.

- अॅड. वर्षा देशपांडे, सदस्या

मोबाइल अॅप डाउनलोड करा आणि राहा अपडेट

---

राजलक्ष्मीनगर प्रभागात सर्वांगिण विकासाची प्रतीक्षा

April 17, 2017, 2:30 pm

≫ Next: अपेंडिक्सचे वेळीच निदान हवे

≪ Previous: मुलींच्या जन्मदरातील घट चिंताजनक

$

0

0

म. टा. प्रतिनिधी, कोल्हापूर

राजलक्ष्मीनगर प्रभागात प्रभागातील रहिवाशांना सर्वांगिण विकासाची प्रतीक्षा कायम आहे. प्रभागात सुमारे ६० लाख रुपयांची विकासकामे केल्याचा दावा नगरसेविका दीपा मगदूम यांचा आहे. मात्र, अद्यापही प्रभागातील अनेक कॉलन्यांत गटर्स नाहीत. पिण्याचे पाणी पुरेशा दाबाने येत नाही. वेळेत कचरा उठाव होत नसल्याच्या सार्वत्रिक तक्रारी आहेत. त्यातही गेल्यावेळपेक्षा यावेळच्या नगरसेविकांचे काम चांगले आहेत. निधी उपलब्ध होईल, त्याप्रमाणे विकासकामे मार्गी लागत असल्याचे अनेकांनी प्रभाग फेरीवेळी ‘महाराष्ट्र टाइम्स’शी बोलताना सांगितले.

प्रभाग पुनर्रचनेत राजलक्ष्मीनगर नव्याने तयार झाला. या प्रभागात तपोवन परिसराचा सामावेश झाला. जुनी मोरे कॉलनी, श्रीकृष्ण, राधिका, मधुबन या कॉलन्यांसह वसंतराव सरनाईक पार्क, विजयनगर, शिवाजीनगर, सरदार पार्क, मनोरमानगर, पद्मावती कॉलनी, भवानी हौसिंग सोसायटी, राजलक्ष्मीनगर, रंगकमलनगर, निकम पार्क, पांडुरंगनगरी, शाम सोसायटी, जांभळेखण, दळवी कॉलनी, इरा पार्क असा परिसर प्रभागात येतो. सहा हजार मतदार असलेल्या प्रभागात दोन हजार कुटुंबे आहेत. श्रीमंत आणि मध्यमवर्गीयांची संख्या प्रभागात अधिक आहे.

प्रभागात काँग्रेसच्या दीपा मगदूम आणि भाजपच्या शोभा बामणे यांच्यात चुरशीने लढत झाली होती. त्यामध्ये मगदूम विजयी झाल्या. २००५ मध्ये मगदूम यांनी तपोवन प्रभागातून निवडणूक लढवली. मात्र निसटत्या मतांनी त्यांचा पराभव झाला. त्यांचे पती कै. दिलीप मगदूम १९९० ते २००५ या काळात नगरसेवक होते. २००२-०३ मध्ये त्यांनी महापौरपदही भूषवले. त्यामुळे मगदूम कुटुंबाचा संपर्क पहिल्यापासून प्रभागात चांगला आहे. त्याचा फायदा दीपा मगदूम यांना नगरसेविका झाल्यानंतर होत आहे. वैयक्तिक संपर्क ठेवत अनेक वर्षापासून प्र‌लंबित असलेली कामे त्या मार्गी लावत आहेत.

पावसाळ्यात देवकर पाणंद परिसरात पाणी येते. पाणी वाहून जाण्यासाठी श्रीकृष्ण कॉलनी ते देवकर पाणंदपर्यंतचा ओढा खोल करणे, संरक्षक भिंत बांधण्यासाठी १ कोटी ६० लाख मंजूर झाले आहेत. हे काम निविदा प्रक्रियेत आहे. पांडुरंग नगरीत १ किलोमीटरचा रस्ता १९९५ पासून फेरडांबरीकरणाच्या प्रतीक्षेत होता. तो करण्यासाठी ७ लाख मंजूर आहेत. विजयनगरमध्ये सात वर्षांपासून एक दिवसआड पाणी येते होते. तेथे रोज पिण्याचे पाणी मिळावे, यासाठी नगरसेविकांनी आंदोलन करत आयुक्तांच्या कक्षाला कुलूप लावले. त्यानंतर प्रशासनाने तेथील पाणी समस्या निकालात काढली. राजलक्ष्मीनगरातील अंतर्गंत पाइपलाइनसाठी ६ लाख मंजूर झाले आहेत. गणपती चौकात हायमास्ट बसविण्यात आले आहेत. मनोरमानगराजवळून ओढा वाहतो. पावसाळ्यात त्या ओढ्यातील पाण्याच्या फुगवटा जवळच्या घरात जात होता. ही समस्या सोडवण्यासाठी ओढ्याला संरक्षण भिंत बांधण्याचे काम सुरू आहे. सरदार पार्कमध्ये महिलांसाठी ओपन जीम तयार करण्यासाठी निधी मंजूर झाला आहे.

सध्या पद्मावती कॉलनी, मनोरमानगरमधील अंतर्गंत रस्त्यांची कामे सुरू आहेत. दीपसरोवर, राधिका कॉलनीत रस्ते, गटर्ससाठी निधी मंजूर आहे. संकल्पसिध्दीत हायमास्ट मंजूर आहे. भवानी सोसायटी परिसरात गटर्स बांधकामासाठी निधी मंजूर आहे. जुनी मोरे कॉलनीत अंतर्गंत रस्त्यासाठी १ लाख ७५ हजार ‌मंजूर आहेत. सर्व मंजूर कामे निविदेच्या टप्यात आहेत, असे नगरसेविका मगदूम यांनी सांगितले.

शाळा, आरोग्य सेवा नाही

प्रभागात महापालिकेची एकही शाळा नाही. त्यामुळे विद्यार्थ्यांची गैरसोय होते. आरोग्य सेवेसाठी रुग्णालय नाही. त्याचा सर्वाधिक फटका प्रभागातील सामान्य कुटुंबातील रुग्णांना बसतो. सुसज्य असे मैदान नाही. खेळांडूची गैरसोय होत आहे. मनोरमानगर, शिवाजीनगर, मोरेवाडी यासह कॉलन्यातील सर्व भागात गटर्स नाहीत. सांडपाणी तुंबून राहते. डासांचा उपद्रव कायम आहे. आरोग्याचा प्रश्न निर्माण होत आहे. एकाही ठिकाणी महिलांसाठी स्वतंत्र स्वच्छतागृह नाही.

बॅडमिंटन कोर्ट

नगरसेविका मगदूम आणि परिसरातील नागरिकांनी स्वखर्चाने देवकर पाणंद येथे लहान मुलांसाठी बॅडमिंटन कोर्ट तयार केले आहे. महापालिकेने या भागातील सर्वच कॉलन्यांत लहान मुले, जेष्ठ नागरिक, महिलांसाठी उद्यान, बागा तयार कराव्यात, अशी मागणी आहे.


निवडणुकीत दिलेली विकासकामांची आश्वासने पूर्ण केली. अनेक वर्षापासून प्रलंबित असलेली कामेही मार्गी लावली. नगरसेविका झाल्यानंतर सुमारे ६० लाखांची विकासकामे केली आहेत. यंदा तपोवन महोत्सवाचे आयोजन करून महिलांच्या कला गुणांना वाव दिला. नेते आमदार सतेज पाटील यांच्या नेतृत्वाखाली प्रभागात अधिकाधिक कामे पूर्ण करण्याचा प्रयत्न आहे. पुढील कालावधीत मोरे कॉलनीत महिलांसाठी सभागृह, मधुबन कॉलनीत महिलांसाठी ओपन जीम तयार करणार आहे.

दीपा मगदूम, नगरसेविका

प्रभागातील सर्व कॉलन्यांत मूलभूत सुविधा नाहीत. वेळेत कचरा उठाव होत नाही. पुरेशा प्रमाणात आणि पुर्ण दाबाने पिण्याच्या पाण्याचा पुरवठा होत नाही. कॉलन्यात गटर्स नाहीत. रस्ते खराब झाले आहेत. सांडपाण्याची निर्गत होत नाही. एकही चांगले मैदान नाही.

शोभा बामणे, प्रतिस्पर्धी उमेदवार


देवकर पाणंद परिसरात गटर्स बांधकाम करणे गरजेचे आहे. गटर्स नसल्याने सांडपाणी निचरा होत नाही. डासांची निर्मिती होत आहे. गटर्स, अंतर्गत रस्ते करण्याकडे विशेष लक्ष द्यावे.

कृष्णा साळुखे, रहिवासी

मनोरमानगरात ओढ्याला संरक्षक भिंत नसल्याने काही घरात पावसाळ्यात पाणी येत होते. नगरसेविका मगदूम यांनी संरक्षक भिंतीसाठी निधी मंजूर करून घेतला. कामही गतीने सुरू आहे. परिसरातील सांडपाणी निचरा होण्यासाठी गटर्स बांधावेत. अंतर्गंत रस्ते करावेत. डास होऊ नये, यासाठी औषधांची नियमित फवारणी करण्यास सांगावे.

रमेश जाधव, रहिवासी

मोबाइल अॅप डाउनलोड करा आणि राहा अपडेट

अपेंडिक्सचे वेळीच निदान हवे

April 17, 2017, 2:30 pm

≫ Next: फ्रेंड्स अकॅडमीचा पक्ष्यांसाठी धान्य पुरवठा

≪ Previous: राजलक्ष्मीनगर प्रभागात सर्वांगिण विकासाची प्रतीक्षा

$

0

0

म. टा. प्रतिनिधी, कोल्हापूर

फास्टफूड आणि बद्धकोष्ठता यामुळे कोल्हापुरातही अपेंडिक्सच्या आजाराने डोकं वर काढलं आहे. संसर्ग तसेच इतर कारणांमुळे अपेंडिक्सचा प्रवेश बंद होतो. त्यामुळे अपेंडिक्सला सूज येते. दुर्लक्षामुळे गँगरीन होण्याचा तसेच अपेंडिक्सला छीद्र पडण्याचाही धोका संभवतो. अपेंडिक्सची लक्षणे दिसताच वेळीच निदान करणे आवश्यक असून कोल्हापुरात अपेंडिक्सने किमान १० टक्के रुग्ण त्रस्त असल्याचे वैद्यकीय क्षेत्रातील तज्ज्ञांचे म्हणणे आहे.

शस्त्रक्रियाकरून अपेंडिक्स काढणे हा अपेंडिसायटिसवरील एक उपचार आहे. अनेक वेळा अपेंडिक्सची लक्षणे दिसत असूनही, त्याचा त्रास कमी जाणवत असल्यामुळे रुग्ण त्याकडे दुर्लक्ष करतात. मात्र अपेंडिक्सवर शस्त्रक्रिया हा उपाय असला तरी, त्याचे वेळीच निदान होऊन उपचार होणे आवश्यक आहे. कोल्हापुरात १००रु ग्णांमध्ये १० रुग्ण अपेंडिक्सच्या विकारांनी त्रस्त असल्याचे डॉक्टर सांगतात. हा आजार १० ते ३० वयोगटात अधिक दिसून येतो. यावरील शस्त्रक्रिया सर्रास लॅप्रोस्कोपी म्हणजे लहान छीद्राद्वारे केली जात असल्यामुळे रुग्ण लवकर बरा होतो.

गंभीर आजारासाठी लवकर शस्त्रक्रिया करणे गरजेचे आहे. काही वेळा सूज आल्याने अपेंडिक्सला होणारा रक्तपुरवठा बंद पडतो. त्यामुळे गँगरीन किंवा छीद्र पडलेले असल्यास ताबडतोब शस्त्रक्रिया करावी लागते. तर बराच काळ असलेल्या अपेंडिसायटिससाठी सोयीनुसार शस्त्रक्रिया केली जाते. पारंपरिक पद्धतीने तसेच आता आलेल्या लॅप्रोस्कोपी म्हणजे लहान छीद्राद्वारे शस्त्रक्रिया करण्यावर भर दिला जात आहे. अपेंडिक्सकडे दुर्लक्ष केल्यास गँगरीन होण्याचा धोका असतो. अपेंडिक्सच्या आतील भागात सूज येऊन वेदना प्रचंड प्रमाणात वाढते की पेशंट ताठ उभाही राहू शकत नाही. अपेंडिक्स फुटल्यास संपूर्ण शरीरात संसर्ग होण्याची शक्यता असते, त्यामुळे रुग्णांची स्थिती गंभीर होण्याची शक्यता असते. अनेक वेळा प्राथमिक स्तरावर असलेला हा आजार सोनोग्राफीमध्येही निदान होत नाही. यासाठी तज्ज्ञ डॉक्टरांचा सल्ला घेणे आवश्यक असते. पेशंटला पाच दिवसांपेक्षा जास्त काळ लक्षणे दिसल्यास काही दिवस अँटिबायोटिक्स दिली जातात. त्यानंतर अपेंडिक्सची सूज कमी आल्यानंतर, आजूबाजूचा संसर्ग कमी आल्यानंतर शस्त्रक्रिया केली जाते.


आहारातील बदल आ‌णि बद्धकोष्ठता यामुळे कोल्हापुरात सध्या अपेंडिक्सचे रुग्ण दिसून येत आहेत. या आजाराचे वेळीच निदान होण्यासाठी रुग्णांनी आवश्यक त्या चाचण्या करणे गरजेचे असते. वेळीच शस्त्रक्रिया केल्यास होणारा त्रास आणि उपचारासाठी होणारा खर्च कमी होऊ शकतो. याकडे दुर्लक्ष केल्यास रुग्णाला अपेंडिक्स फुटणे किंवा गँगरीनसारख्या गंभीर स्थितीला सामोरे जावे लागते.

डॉ. वैभव मुधाळे, सर्जन, पोटविकार तज्ज्ञ

मोबाइल अॅप डाउनलोड करा आणि राहा अपडेट

फ्रेंड्स अकॅडमीचा पक्ष्यांसाठी धान्य पुरवठा

April 17, 2017, 2:30 pm

≫ Next: प्राप्त‌िकरच्या सहायक आयुक्तांच्या घरी चोरी

≪ Previous: अपेंडिक्सचे वेळीच निदान हवे

$

0

0

म. टा. प्रतिनिधी, कोल्हापूर

अन्नासाठी पक्ष्यांची ससेहोलपट थांबवण्यासाठी ‘महाराष्ट्र टाइम्स’ ने ‘पक्षी वाचवूया’ या अभियानांतर्गत दिलेल्या आवाहनानुसार अनेक पक्षीप्रेमींचे हात सरसावले आहेत. विविध समाजांचे प्रतिनिधी, महिला, लहान मुलांकडून घरटी, धान्य, पाण्याची भांडी देण्यात येत असून तरुणाईही यामध्ये पाठीमागे राहिलेली नाही. फ्रेंडस अकॅडमीच्यावतीने पक्ष्यांसाठी विविध प्रकारचे धान्य ‘महाराष्ट्र टाइम्स’ कडे सुपुर्द केले.

पक्ष्यांबाबत संवेदनशील असलेल्या अनेक समाजाने, नागरिकांनी घरटी, धान्ये, पाण्याची भांडी भरभरुन दिली आहेत. उन्हाळ्यामध्ये पक्ष्यांची भटकंती थांबवण्यासाठी विविध ठिकाणी ही घरटी लावण्याबरोबरच पाण्याची भांडीही लटकवण्यात येणार आहेत. त्यामधून पक्ष्यांना कडाक्याच्या उन्हाळ्यात दिलासा मिळणार आहे. काही लहान मुलांनी स्वतः तयार केलेली घरटी दिली आहेत. तर काहींनी बांबूपासून तयार केलेली घरटी ‘मटा’ कडे सुपुर्द केली आहेत. मातीच्या भांड्यातून पाणी ठेवल्यास ते थंड राहून पक्षी तहान भागवू शकतात हा अनुभव असल्याने इतर भांडी देण्यापेक्षा मातीची भांडीच सर्वांनी दिली आहेत. ही भांडी भिंतीवर, अंगणात, टेरेसवर, संरक्षक भिंतीवर जशी ठेवता येतात, तशीच ती झाडांना अथवा उंचीवर लटकवताही येतात.

फ्रेंडस अकॅडमीच्यावतीने ​​त्रिवेणीकुमार कोरे, चेतन गुरव, प्रथमेश पाटील, प्रणव घाटगे, ऋतुराज शिंदे, पुष्पक पालव, आ​शिष आसादी, तन्मय तिवले या तरुणांनी पक्ष्यांसाठी लागणारे विविध प्रकारचे धान्य सुपुर्द केले. तसेच ​आपापल्या घरांच्या परिसरातही पक्ष्यांसाठी पाणी, धान्याची सोय केली असल्याचेही सांगितले. यामुळे तरुणाईही या कृतीशील उपक्रमामध्ये उत्साहाने सहभागी होत आहे.

मोबाइल अॅप डाउनलोड करा आणि राहा अपडेट

प्राप्त‌िकरच्या सहायक आयुक्तांच्या घरी चोरी

April 18, 2017, 2:30 pm

≫ Next: पोलिसांच्या अटकेस टाळाटाळ

≪ Previous: फ्रेंड्स अकॅडमीचा पक्ष्यांसाठी धान्य पुरवठा

$

0

0

म. टा. प्रतिनिधी, कोल्हापूर

सदरबाजार परिसरातील मनीषा पार्कमध्ये राहणारे आयकर विभागाचे सहायक आयुक्त विठ्ठल बाबूराव सरगर (वय ५३) यांच्या घरी अज्ञात चोरट्यांनी धाडशी चोरी करून २ लाख, ३५ हजार रुपयांसह १५ हजार रुपयांचा मोबाइल असा अडीच लाखांचा मुद्देमाल लांबवला. गुरुवारी (ता. १३) सकाळी ७ वाजण्याच्या सुमारास ही घटना घडली. याबाबतची फिर्याद विठ्ठल सरगर यांनी मंगळवारी (ता. १८) शाहूपुरी पोलिस ठाण्यात दिली.

याबाबत अधिक माहिती अशी की, विठ्ठल सरगर हे जबलपूर येथे सहायक आयकर आयुक्त पदावर कार्यरत आहेत. ते पत्नी व मुलांसह जबलपूर येथे राहतात. कोल्हापूर येथील मनीषा पार्क येथे सरगर यांच्या मालकीचा सोनाई बंगला आहे. मंगळवार (ता. ११) रोजी ते जबलपूर येथून कोल्हापूर येथे सुटीसाठी राहण्यास आले होते. गुरुवारी सकाळी ७ वाजण्याच्या सुमारास ते सार्वजनिक बांधकाम विभाग येथे फिरण्यासाठी गेले होते. यानंतर घरी परतल्यावर त्यांनी बेडरुममध्ये पाहिले असता, कपाटामध्ये रोकड नसल्याचे दिसून आले. २ लाख ३५ हजारांची रोकड तर १० हजार रुपयांचा मोबाइल चोरट्यांनी लंपास केल्याचे त्यांच्या लक्षात आले. सरगर यांनी शाहूपुरी पोलिसांशी संपर्क साधून या घटनेची फिर्याद दिली. अधिक तपास पोलिस निरीक्षक प्रवीण चौगुले यांच्या मार्गदर्शनाखाली शाहूपुरी पोलिस करीत आहेत.

मोबाइल अॅप डाउनलोड करा आणि राहा अपडेट

पोलिसांच्या अटकेस टाळाटाळ

April 18, 2017, 2:30 pm

≫ Next: ज्येेष्ठ वृत्तपत्र व‌ितरक जयवंत लुकतुके यांचे निधन

≪ Previous: प्राप्त‌िकरच्या सहायक आयुक्तांच्या घरी चोरी

$

0

0

म. टा. प्रतिनिधी, कोल्हापूर

वारणा लुटीतील ९ कोटी, १८ लाखांची रक्कम लंपास करणाऱ्या सात पोलिसांपैकी सहा जणांवर सागंली जिल्हा पोलिस अधीक्षकांनी निलंबनाची कारवाई केली असली तरी, संशितांच्या अटकेसाठी पोलिसांकडून काहीच हालचाली सुरू नाहीत. संशयितांवर गुन्हे दाखल होऊन तीन दिवस उलटले, मात्र सांगलीसह कोल्हापूर पोलिसही संशयित स्वतःहून हजर होण्याची वाट पाहत आहेत. पोलिसांच्या अटकेसाठी टाळाटाळ होत असल्याने वरिष्ठ पोलिस अधिकाऱ्यांच्या कार्यपद्धतीवर शंका उपस्थित झाली आहे.

एखाद्या गुन्ह्यात सर्वसामान्य नागरिक पोलिसांच्या रेकॉर्डवर आल्यानंतर त्याला सळो की पळो करून सोडणारे पोलिस आपल्या खात्यातील लोकांच्या अटकेसाठी हात आखडता घेत असल्याची शंका वारणा लुटीतील संशयितांच्या अटकेबाबत व्यक्त केली जात आहे. पोलिस निरीक्षक विश्वनाथ घनवट, सहायक पोलिस निरीक्षक सूरज चंदनशिवे, शरद कुरळपकर, पोलिस हेड कॉन्स्टेबल शंकर पाटील, दीपक पाटील, पोलिस नाईक रवींद्र पाटील आणि कुलदीप कांबळे या सात पोलिसांनी वारणा लुटीत ९ कोटी, १८ लाखांची रक्कम परस्पर हडपल्याचे उघडकीस आले आहे. वरिष्ठ पोलिस अधिकाऱ्यांनी केलेल्या चौकशीनंतर रविवारी (ता. १६) सकाळी कोडोली (ता. पन्हाळा) पोलिस ठाण्यात या सात पोलिसांसह प्रवीण भास्कर सावंत आणि चोरटा मैनुद्दीन मुल्ला याच्यावर गुन्हे दाखल झाले आहेत. गुन्हे दाखल होऊन तीन दिवस उलटले, मात्र यातील एकाही संशयिताला पोलिसांनी अटक केली नाही. कारवाईची कुणकुण लागताच संशयित सांगलीतून गायब झाले आहेत. त्यांच्या अटकेसाठी पोलिसांचे पथक कार्यरत असल्याची माहिती पहिल्या दिवसापासून वरिष्ठ अधिकारी देत आहेत, पण तीन दिवसांत एकही संशयित पथकाच्या हाती लागत नाही. चोरीच्या रकमेवर डल्ला मारून फरार झालेले सात पोलिस दोन्ही जिल्ह्यातील पोलिस दलाला भारी पडत आहेत असेत दिसत आहे.

प्राप्तिकरची पुण्यातील टीम करणार चौकशी

फिर्यादी झुंजार सरनोबत यांच्याकडील रकमेबाबत चौकशी करण्याचे पत्र कोल्हापूर पोलिसांनी प्राप्तिकरच्या तपास विभागाला दिले आहे. याचा तपास पुण्यातील विशेष पथकाकडून होणार आहे. यापूर्वीही वारणा लुटीबाबत पोलिसांनी प्राप्तिकरला चौकशीसाठी पत्र दिले होते. त्याचा अहवाल तीन महिन्यांनी मिळाला होता. नव्याने मागणी केलेल्या चौकशी अहवालासाठी पोलिसांना किमान दोन महिने प्रतीक्षा करावी लागेल अशी शक्यता आहे. मागील चौकशीनंतर फिर्यादी सरनोबत यांना दीड कोटी रुपयांचा आयकर भरावा लागला होता, अशी माहिती वरिष्ठ अधिकाऱ्यांनी दिली.

मोबाइल अॅप डाउनलोड करा आणि राहा अपडेट

ज्येेष्ठ वृत्तपत्र व‌ितरक जयवंत लुकतुके यांचे निधन

April 18, 2017, 2:30 pm

≫ Next: भूजल पातळी खालावली

≪ Previous: पोलिसांच्या अटकेस टाळाटाळ

$

0

0

म. टा. प्रतिनिधी, कोल्हापूर

‘टाइम्स’ वृत्त समुहाच्या प्रकाशनांचे कोल्हापुरातील मुख्य वितरक जयवंत रामचंद्र लुकतुके ऊर्फ अप्पा (वय ६७) यांचे मंगळवारी अल्पशा आजाराने निधन झाले. त्यांच्या पश्चात पत्नी, मुलगी, जावई असा परिवार आहे.

लुकतुके कुटुंबीय गेल्या शंभर वर्षांहून अधिककाळ कोल्हापुरात टाइम्स वृत्तसमुहाच्या प्रकाशनांचे वितरक म्हणून कार्यरत आहेत. या परिवारातील तिसऱ्या पिढीतील जयवंत लुकतुके महाद्वार रोडवरील बी. टी. लुकतुके एजन्सीत भागीदार होते. गेली अनेक वर्षे वृत्तपत्र वितरणाचे त्यांचे काम अव्याहतपणे सुरू होते.

गेले काही दिवस लुकतुके आजारी होते. मंगळवारी पहाटे एकच्या सुमारास त्यांची प्राणज्योत मालवली. सकाळी आठच्या सुमारास प्रतिभानगरातील निवासस्थानापासून त्यांची अंत्ययात्रा काढण्यात आली. महाद्वार रोडवरील बी. टी. लुकतुके एजन्सी येथे त्यांच्या मित्रपरिवाराने पार्थिवास पुष्पहार अर्पण करून त्यांना आदरांजली वाहिली. यावेळी वृत्तपत्र विक्रेते संघटनेचे पदाधिकारी, सदस्य, ‘आस्मा’ या जाहिरात संघटनेचे सदस्य मोठ्या संख्येने उपस्थित होते. सकाळी साडेनऊच्या सुमारास पंचगंगा स्मशानभूमीत त्यांच्यावर अंत्यसंस्कार करण्यात आले. रक्षाविसर्जन गुरुवारी (२० एप्रिल) सकाळी नऊ वाजता आहे.

मोबाइल अॅप डाउनलोड करा आणि राहा अपडेट

भूजल पातळी खालावली

April 18, 2017, 2:30 pm

≫ Next: ‘आधार’साठी मेल आयडीची सक्ती

≪ Previous: ज्येेष्ठ वृत्तपत्र व‌ितरक जयवंत लुकतुके यांचे निधन

$

0

0

Satish.ghatage
@timesgroup.com

Tweet : @satishgMT

कोल्हापूर ः यंदा समाधानकारक पाऊस झाला असूनही मार्च २०१७ अखेर चंदगड (-०.२१), पन्हाळा (-०.१९), कागल (-०.१५), शाहूवाडी (-०.०७), गडहिंग्लज (-०.०९) या तालुक्यातील भूजल पातळी घसरली आहे. मार्चअखेर जिल्ह्याची सरासरी भूजल पातळी ०.०५ इतकी असून ती सर्वसामान्य असल्याचे मत भू वैज्ञानिकांनी व्यक्त केले आहे. मागील वर्षी जिल्ह्याची भूजल पातळी -०.६५ इतकी घसरली होती. उन्हाचा तडाखा वाढल्याने पुढील दीड महिन्यात भूजल पातळी एक मीटरपर्यंत खाली जाण्याची शक्यता वर्तवली जात आहे.

गेल्या वर्षी भूजल पातळी एक मीटरने घसरली होती. पण जूननंतर दमदार पावसास सुरुवात झाल्यानंतर धरणे, तलाव, विहिरी तुडुंब भरल्या होत्या. राज्य सरकारच्या जलयुक्त शिवार योजना व कृषी खात्याकडून राबवण्यात येणाऱ्या पुनर्भरण योजनेमुळे पाण्याची पातळी काही प्रमाणात वाढली.

भूजल सर्वेक्षण आणि विकास यंत्रणेच्यावतीने ऑक्टोबर, जानेवारी, मार्च व मे महिन्यात भूजल पातळी मोजली जाते. पाणी पातळी मोजण्यासाठी जिल्ह्यातील ९९ विहिरी व ११२ बोअरवेल निश्चित केल्या आहेत. त्यानुसार मार्च महिन्यातील भूजल पातळीचे सर्वेक्षण प्राप्त झाले आहे. यावर्षी (-०.२१), पन्हाळा (-०.१९), कागल (-०.१५), शाहूवाडी (-०.०७), गडहिंग्लज (-०.०९) या तालुक्यातील भूजल पातळी खालावली आहे. मागीलवर्षी मार्च २०१६ मध्ये चंदगड (-०.९६), पन्हाळा -०.७७, कागल -०.६५, शाहूवाडी -०.०.६०, गडहिंग्लज -०.०.७५ या अशी भूजल पातळी होती. यावेळी करवीर तालुका खालावलेल्या भूजल पातळीच्या डेंजर झोन मधून बाहेर पडला आहे. करवीर तालुक्याची भूजल पातळी मार्च २०१६ मध्ये ०.२७ इतकी आहे. गेल्यावर्षी करवीर तालुका (-०.८१) मायनसमध्ये होता. मागील वर्षी सर्व तालुक्यांतील भूजल पातळी मायनसमध्ये होती.

कागल, पन्हाळा, शाहूवाडी, गडहिंग्लज, चंदगड तालुक्यात पाण्याची पातळी खालावली असल्याने पुढील दीड महिन्यात पाण्याची टंचाई भासणार आहे. यंदा हातकणंगले व शिरोळ तालुक्यातील परिस्थिती सुधारली आहे. गेल्या वर्षी शिरोळ तालुक्यात शिरोळ -०.८४ तर हातकणंगले तालुक्यात -०.५३ अशी भूजल पातळी खालावली होती. यंदा हातकणंगले ०.३१ तर शिरोळची ०.०२ अशी झाली आहे. भूजल पातळी गेल्या वर्षीच्या तुलनेत स्थिर असली तरी धोक्याची घंटा नसल्याचे भू वैज्ञानिक एस.ए. शिंदे यांनी सांगितले.

मोबाइल अॅप डाउनलोड करा आणि राहा अपडेट

---

‘आधार’साठी मेल आयडीची सक्ती

April 18, 2017, 2:30 pm

≫ Next: सुटीच्या हंगामासाठी एसटीच्या जादा गाड्या

≪ Previous: भूजल पातळी खालावली

$

0

0

Bhimgonda.Desai@timesgroup.com

Tweet : @bhimgondaMT

कोल्हापूर: आधार कार्ड मिळविण्यासाठी कुटुंबातील एकाचा ई- मेल आयडी, मोबाइल क्रमांक सक्तीचा होणार आहे. पुढील सहा महिन्यात त्याची अंमलबजावणी सुरू होईल. त्यादृष्टीने प्रशासन जागृती करीत आहे. पैशासाठी कुठेही जाऊन आधार कार्ड काढण्याच्या प्रकाराला चाप लावण्यासाठी यंत्रास जीपीएस (ग्लोबल पोझीशन सिस्ट‌िम) कार्यान्व‌ित करणे बंधनकारक केले आहे. यामुळे यंत्रावर ऑनलाइन नजर राहणार आहे. सर्वाना आधार कार्ड मोफतच आणि वेळेत मिळण्यासाठी प्रशासकीय यंत्रणा असे बदल करीत आहे.

सरकारच्या विविध योजनांचा लाभ देताना प्रशासनाकडून आधार कार्डची विचारणा होत आहे. अनुदानातील बोगसगीरी कमी करण्यासाठी आधार कार्ड बँक खात्याशी कनेक्ट केले जात आहे. परिणामी अंगणवाडी ते महाविद्यालयीन विद्यार्थ्यांचे आधार कार्ड काढण्यासाठी विशेष मोहीम राबवली. त्यामुळे २०११ च्या जनगननेनुसार जिल्ह्यातील ३८ लाख, ७६ हजार जणांनी आधार कार्ड काढले. २०१५ च्या जनगननेनुसार अजून दीड लाखांवर लोकांकडे आधार नाही. त्यामध्ये २ वर्षांपर्यंतची बालके, वयोवृद्ध व्यक्ती, सर्वोच्च न्यायालयाच्या आदेशानुसार आधारची सक्ती नाही, असे म्हणणाऱ्यांचा सामावेश आहे.

पहिल्या टप्यात आधार कार्ड काढण्यासाठी आवश्यक ऑनलाइन अर्ज भरण्यासाठी यंत्रांची संख्या कमी होती. प्रचंड गर्दी राहिली. अपवाद वगळता सर्वच केंद्रावर आधारसाठी मनमानी पद्धतीने पैसे घेतले. त्यावर नियंत्रण ठेवणारी महसूल विभागाची यंत्रणा बघ्याची भूमिका घेतली. गेल्या सहा महिन्यांपासून आधारसाठी पैसे घेतात, अशी तक्रारी येत आहेत. यावर कारवाईही होत आहे. त्यामुळे या प्रकारांना चाप बसला आहे. तसेच कार्यालयातच आधार कार्डची नोंदणी करावी यासाठी मश‌िनला जीपीएस बसविण्यात येणार आहे.

अडथळा ठरण्याची शक्यता

आधार कार्डसाठी ई -मेल आयडी सक्तीचा केल्यास अल्पशिक्षीत, इंटरनेटचे ज्ञान नसलेल्यांची अडचण होईल. ज्यांचे ई-मेल आयडी, मोबाइल क्रमांक नाहीत त्यांना आधार कार्ड काढता येणार नाही. आधारसाठी ऑनलाइन अर्ज भरताना कागदपत्रात जी माहिती आहे ती भरण्याच्या सूचना ऑपरेटर्सना दिल्या आहेत. त्यामुळे थेट आधार कार्डात चुकीची दुरुस्ती करता येणार नाही. करायचे असल्यास पहिल्यांदा मूळ कागदपत्रात बदल करावे लागणार आहे. सकाळी ६ ‌ते सायंकाळी ७ या वेळेतच आधार कार्ड काढावे लागणार आहे. रात्री कार्ड काढण्यावर निर्बंध आणले आहेत.

उशिराचे शहाणपण

मोफत असतानाही पहिल्या टप्यात आधार कार्ड काढण्यासाठी कमीत कमी १०० पासून ५०० रुपयांपर्यंत पैसे घेतले. त्याकडे सरकारी यंत्रणेने फारसे लक्ष दिले नाही. आधार केंद्र चालक मालामाल झाले. पण उशिरा का होईना प्रशासनास शहाणपण सूचल्याने आता आधार कार्डच्या लुटीवर नियंत्रण ठेवले आहे.

आधार कार्ड काढण्यासाठी पुढील काही दिवसात कुटुंबातील एकाचा ई-मेल आयडी, मोबाईल क्रमांक सक्तीचा होईल. त्यासंबंधीची माहिती आता ऑपरेटर्सना दिली आहे. आधार यंत्रास जीपीएस यंत्रणा कार्यान्व‌ित करणे बंधनकारक केले. यामुळे पूर्व परवानगीशिवाय कुठेही जाऊन आधार कार्डसाठी ऑनलाइन अर्ज भरून घेता येणार नाही. आधारसाठी पैसे घेतात अशी तक्रार आल्यास त्वरित कारवाई केली जात आहे.

जयंत पाटील, जिल्हा ई-प्रकल्प अधिकारी

मोबाइल अॅप डाउनलोड करा आणि राहा अपडेट

सुटीच्या हंगामासाठी एसटीच्या जादा गाड्या

April 18, 2017, 2:30 pm

≫ Next: दोन लाख शेतकऱ्यांच्या कृषिपंपांना मिळणार वीज

≪ Previous: ‘आधार’साठी मेल आयडीची सक्ती

$

0

0

म. टा. प्रतिनिधी, कोल्हापूर

उन्हाळी सुटीचा हंगाम लक्षात घेऊन एसटी महामंडळाने कोल्हापुरातून जादा गाड्यांची सोय केली आहे. कोल्हापूर मुंबई आणि कोल्हापूर सोलापूर मार्गावर या जादा गाड्या सोडण्यात आल्या असून, एकूण ४२ गाड्यांचा यात समावेश आहे. आज, शनिवार १५ एप्रिलपासून या मार्गांवर जादा गाड्या धावू लागल्या आहेत. सुट्यांचा हंगाम संपेपर्यंत या गाड्या सुरू राहणार आहेत.

दर वर्षी एसटी महामंडळाच्या कोल्हापूर आगाराकडून सुट्यांसाठी जादा गाड्यांची सोय केली जाते. सुटीच्या काळात पर्यटनासाठी आणि नातेवाइकांकडे जाणाऱ्यांची संख्या जास्त असते. प्रवाशांची गैरसोय होऊ नये यासाठी एसटी महामंडळाकडून जादा गाड्यांची सोय केली जाते. यात प्रामुख्याने पुणे-मुंबईकडे जाणाऱ्यांचा ओघ जास्त असतो. त्यामुळे या मार्गावर सर्वाधिक २६ जादा गाड्या देण्यात आल्या आहेत. त्यातही पुण्यासाठी सर्वाधिक २२ जादा गाड्या देण्यात आल्या आहेत.

कोकणातूनही कोल्हापूर मार्गे पुणे-मुंबई मार्गावर जादा गाड्या सोडण्यात येत आहेत. त्याही कोल्हापूरमार्गे जाणार असल्याने त्याचा फायदा कोल्हापूरच्या प्रवाशांना होणार आहे. सांगली व सोलापूर या मार्गावरही १६ नव्या गाड्या देण्यात आल्या असून, त्यातून सुटीतील वाढीव प्रवाशांची सोय करण्यात येत आहे. दरम्यान, इचलकरंजी, सांगली आणि इस्लामपूरला जाण्यासाठी मध्यवर्ती बसस्थानकावरून विनावाहक गाड्या सोडण्यात येतात. या मार्गावरही सुटीसाठी जादा गाड्या देण्यात येत आहेत. केवळ, स्थानकावरील या मार्गासाठीची गर्दी लक्षात घेऊन गाड्या सोडण्यात येणार आहेत. त्यामुळे स्थानकावरील प्रवाशांची गर्दी आणि गैरसोय टळणार आहे.

काही शाळांना अजून सुट्या सुरू झाल्या नसल्या तरी या आठवड्यात आंबेडकरजयंती आणि शनिवार, रविवारच्या सुट्या जोडून आल्याने पुणे मार्गावरील गाड्यांना चांगला प्रतिसाद आहे. हा प्रतिसाद सोमवारी (१७ एप्रिल) दुपारपर्यंत पुण्याला जाणाऱ्या गाड्यांसाठी चांगला असेल, अशी अपेक्षा असल्याचे एसटी महामंडळाचे वाहतूक अधीक्षक अक्षय कदम यांनी महाराष्ट्र टाइम्सशी बोलताना सांगितले.

मोबाइल अॅप डाउनलोड करा आणि राहा अपडेट

दोन लाख शेतकऱ्यांच्या कृषिपंपांना मिळणार वीज

April 18, 2017, 2:30 pm

≫ Next: मराठा महागोलमेज परिषद आज

≪ Previous: सुटीच्या हंगामासाठी एसटीच्या जादा गाड्या

$

0

0

कोल्हापूर : गेल्या दोन वर्षांत दोन लाख ७५ हजार शेतकऱ्यांना कृषिपंपासाठी वीज कनेक्शन देण्यात आले आहे. त्यानंतर आलेल्या मागणीनुसार पुन्हा नवीन दोन लाख १२ हजार शेतकऱ्यांना कृषिपंपासाठी वीज कनेक्शन देण्यात येणार आहेत. यासाठी सरकारला तीन हजार कोटी रुपये लागणार आहेत. राज्यात १७ हजार कोटींची थकबाकी असूनही एकाही शेतकऱ्याचे वीज कनेक्शन या सरकारने खंडित केले नाही. त्याचबरोबर महावितरणने राज्यातील थकित वीज बिल ग्राहकांसाठी प्रोत्साहन योजना जाहीर केली आहे.

शेतकऱ्यांकडील १७ हजार कोटीची थकबाकी, पाणीपुरवठा योजनांवरील थकबाकी, पथदिव्यांची थकबाकी हा महसूल मिळाला तर मोठया प्रमाणात कामे होतील. यानंतर ज्या विभागातून येणाऱ्या वसुलीचा पैसा त्याच विभागावर खर्च करण्याचा निर्णय राज्य सरकारने घेतला आहे. शेतकऱ्यांना १२ तास दिवसा अखंडीत वीज मिळावी म्हणून सोलर कृषी फिडरची योजना तयार होत आहे. आधी या योजनेसाठी ५२ कोटी खर्च होणार होता. तो प्रस्ताव आता ८ ते १० कोटीत होणार आहे, असे ऊर्जामंत्री चंद्रशेखर बावनकुळे यांनी स्पष्ट केले आहे.

नवीन वीजजोडणीसाठी विशेष कक्षमहावितरणच्या ग्राहकांना नवीन वीजजोडणी सुलभतेने मिळावी तसेच याबाबत तक्रार असल्यास ती तातडीने सोडविली जावी तसेच ग्राहक नावात बदल करण्यासाठी महावितरणच्या मुंबई येथील प्रकाशगड मुख्यालयात 'विशेष मदत कक्ष' सुरू करण्यात आला आहे. यासाठी ग्राहकांना (०२२)२६४७८९८९ व २६४७८८९९ या क्रमांकावर कार्यालयीन वेळेत संपर्क साधायचा आहे.

तक्रार निराकरणासाठी विशेष मदत

ग्राहकांना नवीन वीजजोडणी घेताना अडचणी आल्यास त्या सोडविण्यासाठी या कक्षाद्वारे संबंधित कार्यालयाकडे पाठपुरावा करून ग्राहकांना सुलभतेने वीजजोडणी मिळावी यासाठी कार्यवाही करण्यात येणार आहे. याशिवाय ग्राहकांच्या नावात बदल करण्याबाबतच्या तक्रारींचे निराकरणही या विशेष मदत कक्षाद्वारे करण्यात येणार आहे. पैसे भरून नवीन वीजजोडणी न मिळालेल्या ग्राहकांच्या तक्रारींची दखल घेऊन अशा ग्राहकांना त्वरीत वीजजोडणी मिळावी, यासाठी या ‘विशेष मदत कक्षा’द्वारे मदत करण्यात येईल, असे महावितरणच्या सूत्रांनी सांगितले.

मोबाइल अॅप डाउनलोड करा आणि राहा अपडेट

मराठा महागोलमेज परिषद आज

April 18, 2017, 2:30 pm

≫ Next: सात पोलीस निलंबित

≪ Previous: दोन लाख शेतकऱ्यांच्या कृषिपंपांना मिळणार वीज

$

0

0

म. टा. प्रतिनिधी, कोल्हापूर

सकल मराठा समाजाच्या आरक्षणासह अन्य मागण्यांबाबत पुन्हा दबाव निर्माण करण्यासाठी राज्यातील मराठा समाजातील विविध संघटना एकत्रित झाल्या आहेत. ​येत्या बुधवारी (ता. १९) होणाऱ्या बैठकीस विविध क्षेत्रामध्ये काम करणाऱ्या संघटनेच्या पदाधिकाऱ्यांना तज्ज्ञांना पाचारण केले जाणार आहे. स्वाभिमान संघटनेचे नितेश राणे, आरक्षणाबाबतचे सर्व याचिकाकर्तेही उपस्थित राहणार आहेत. जवळपास ५०० प्रतिनिधी उपस्थित राहणार असल्याने महागोलमेज परिषदेची जय्यत तयारी सुरू आहे.

मराठा समाजाच्यावतीने राज्यभरामध्ये अतिशय शांततेत मोर्चे काढण्यात आले. आरक्षणासह मराठा समाजाच्या विविध मागण्या सरकारच्या कानावर घालण्यात आल्या. समाजाकडून मात्र कुठेही सरकारशी चर्चा केली नाही. सरकारने या मागण्यांबाबत स्वतःहून निर्णय घ्यावेत, अशी अपेक्षा व्यक्त करण्यात आली होती. सरकारकडून मान्य करुन घेता येऊ शकतील, अशा मागण्यांबाबत पुन्हा दबाव निर्माण करण्याची आवश्यकताही व्यक्त करण्यात आली. त्यातून पुढील दिशा ठरवण्यासाठी महागोलमेज परिषद घेण्याचा निर्णय घेण्यात आला आहे.

मराठा समाजातील राज्यातील जवळपास ४० हून अधिक विविध संघटनांच्या प्रतिनिधींना निमंत्रित करण्यात येत आहे. मुस्कान लॉन येथे होणाऱ्या परिषदेसाठी मराठा महासंघाचे शशिकांत पवार, स्वाभिमान संघटनेचे नितेश राणे उपस्थित राहणार आहेत. राणे यांनी यापूर्वीपासून समाजाच्या आरक्षणाच्या मुद्द्यावर ठाम भूमिका घेतली होती. या परिषदेला ते येणार की नाहीत याची चर्चा होती. पण ते परिषदेला उपस्थित राहून मार्गदर्शन करणार असल्याचे संयोजक दिलीप पाटील यांनी सांगितले. दिवसभर चालणाऱ्या या परिषदेसाठी प्रत्येक संघटनेच्या पदाधिकाऱ्यांना निमं​त्रित करण्यात आले आहे. जवळपास ५०० प्रतिनिधी उपस्थित राहणार आहेत. आरक्षणाबाबत याचिका दाखल केलेले याचिकाकर्तेही उपस्थित राहणार आहेत. या परिषदेतून आगामी आंदोलनाची वाटचाल स्पष्ट केली जाणार असल्याने राज्यातील मराठा समाजाचे लक्ष या परिषदेतील निर्णयाकडे लागले आहे. पहिल्या टप्प्यात ही परिषद घेऊन पुढे रेटा वाढवत नेण्याची रणनीती आखली जाण्याची शक्यता आहे.

मोबाइल अॅप डाउनलोड करा आणि राहा अपडेट

सात पोलीस निलंबित

April 18, 2017, 2:30 pm

≫ Next: समरजितसिंह घाटगे विधानसभा लढणार

≪ Previous: मराठा महागोलमेज परिषद आज

$

0

0

म. टा. वृत्तसेवा, सांगली

सव्वानऊ कोटी रुपयांच्या लूट प्रकरणी गुन्हा दाखल असलेला सहायक पोलिस निरीक्षक सूरज विष्णू चंदनशिवे याच्यासह सहाजणांना जिल्हा पोलिस अधीक्षक दतात्रय शिंदे यांनी मंगळवारी निलंबित केले. दरम्यान, पोलिस निरीक्षक विश्वनाथ घनवट याच्यासंदर्भातील अहवाल आल्यानंतर कोल्हापूर पोलिस परिक्षेत्राचे विशेष पोलिस महानिरिक्षक विश्वास नांगरे-पाटील यांनी रात्री उशिरा निलंबनाची कारवाई केली.

मिरजेतील बेथेलहेमनगरमध्ये एक वर्षापूर्वी संशयीत मोहिद्दीन मुल्ला याच्याकडील ३ कोटी ७ लाख ६३ हजार रुपयांची रोकड स्थानिक गुन्हे अन्वेषण शाखेचे तत्कालीन निरीक्षक विश्वनाथ घनवट, सहायक निरीक्षक चंदनशिवे याच्या पथकाने पकडली होती. या प्रकरणाचा तपास करताना पोलिस निरीक्षक घनवट, सहायक निरीक्षक चंदनशिवे, सहायक फौजदार शरद शंकरराव कुरळपकर, हवालदार दीपक उत्तमराव पाटील, शंकर महादेव पाटील, पोलिस नाईक रवींद्र पाटील, कुलदीप मारुती कांबळे आदींनी तब्वल ९ कोटी १८ लाख रुपयांची रोकड चोरल्याचे समोर आले आहे. संशयितांनी चोरटा मोहिद्दीनला हाताशी धरून तपासाच्या नावाखाली वारणानगर येथील शिक्षक कॉलनीत जाऊन ही चोरी केली आहे, अशी फिर्याद बांधकाम व्यावसायिक झुंजार सरनोबत यांनी कोडोली पोलिसांत दिली आहे.

पोलिस अधीक्षक शिंदे म्हणाले, ‘संबंधित संशयितांनी अतिशय गंभीर स्वरुपाचा गुन्हा केल्याचे प्राथमिक अहवालावरून दिसत आहे. त्यामुळे त्यांच्यावर तातडीने निलंबनाची कारवाई करण्यात आली आहे. यापैकी सहायक निरीक्षक चंदनशिवे हा स्थानिक गुन्हे अन्वेषण शाखेकडे नेमणुकीस आहे. सहायक फौजदार शरद कुरळपकर हा गुंडाविरोधी पथकाकडे, तर हवालदार दीपक पाटील, पोलिस नाईक रवींद्र पाटील हे स्थानिक गुन्हे अन्वेषण शाखेकडे नेमणुकीस आहेत. हवालदार शंकर पाटील हा बाँबशोधक आणि नाशक पथकाकडे नेमणुकीस आहे. पोलिस नाईक कुलदीप कांबळे सध्या मिरज शहर पोलिस ठाण्याकडे नेमणुकीस आहेत.

सर्व पोलिसांविरुद्ध कोडोली पोलिस ठाण्यात १६ मार्च रोजी भारतीय दंडविधान ४५४, ३८०,१२०(ब),१६६, १६७,४११, ३४ अन्वये गुन्हा दाखल करण्यात आला आहे. सव्वानऊ कोटी रुपयांच्या चोरी प्रकरणी दोन वेगवेगळे गुन्हे कोडोली पोलिस ठाण्यात दाखल आहेत. पहिल्या गुन्ह्यात सहायक निरीक्षक चंदनशिवेसह पाच पोलिस कर्मचाऱ्यांचा आणि अन्य दोन व्यक्तींचा अशा एकूण सात जणांचा समावेश आहे. चंदनशिवेने चोरीनंतर आपल्या वाट्याची रक्कम गावातील प्रवीण सावंत (वासुद, ता.सांगोला) याच्या नावावर बँकेत ठेवल्याचे समोर आले आहे. चोरी करताना त्यांनी मोहिद्दीन मुल्लाला बरोबर घेतले होते. सर्वांनी १३ मार्च २०१६ रोजी तपासाच्या निमित्ताने वारणानगरात जाऊन ६ कोटी रुपयांची रक्कम चोरून आणल्याचे नमूद आहे. दुसऱ्या गुन्ह्यात पोलिस निरीक्षक विश्वनाथ घनवट याचा प्रथम क्रमांकाचा संशयित म्हणून समावेश आहे. ’

आणखी पोलिस रडारवर
सद्रक्षणाय खलनिग्रहनाय असे ब्रीद घेऊन काम करणारे पोलिसच कायदा हातात घेऊन स्वतःच्या सोयीसाठी वापरत आहेत. प्रमुख सात संशयितांव्यतिरिक्त आणखी तिघेजण या प्रकरणात रडारवर असल्याने अनेकांचे धाबे दणाणले आहे. त्यांच्यावर कारवाईची शक्यता आहे.

प्रवीण सावंतचे खाते सील
संशयितांपैकी प्रवीण भास्कर सावंत याचे बँक खाते कोल्हापुरातील पंचगंगा बँकेत आहे. सावंत हा सोलापूर जिल्ह्यातील वासूद येथील रहिवासी आहे. सहायक पोलिस निरीक्षक सूरज चंदनशिवे हेदेखील त्याच गावचे आहेत. पंचगंगा बँकेतील त्याचे खाते आणि लॉकर सील केले आहे.

वारणानगरात घटनास्थळी पंचनामा
तपास अधिकारी हर्ष पोद्दार यांच्याकडे वारणा लुटीचा तपास आल्याने पोद्दार यांनी वारणानगर येथील शिक्षक कॉलनीत जाऊन त्या फ्लॅटची पाहणी केली. नव्याने घटनास्थळाचा पंचनामादेखील करण्यात आला आहे. याशिवाय संशयितांची बँक खाती आणि मालमत्ता सील करण्याचे कामही सुरूच आहे. याबाबत माहिती देण्यास मात्र पोलिस अधिकाऱ्यांनी स्पष्ट शब्दात नकार दिला.

मोबाइल अॅप डाउनलोड करा आणि राहा अपडेट