प्रभागात स्वच्छता कामगार कमी पाठवल्याच्या रागातून आपटेनगर-तुळजाभवानी प्रभागातील नगरसेवक राजू दिंडोर्ले यांचे भाऊ विशाल उर्फ पप्पू आनंदराव दिंडोर्ले (वय २८, रा. सानेगुरुजी वसाहत) यांच्यावर जुना राजवाडा पोलिस ठाण्यात गुन्हा दाखल झाला. पोलिसांनी दिंडोर्ले याना शुक्रवारी (ता. १४) चौकशीसाठी ताब्यात घेतले. घटना घडल्यांतर तिसऱ्या दिवशी महापालिकेतील वरिष्ठ अधिकाऱ्यांच्या आदेशानंतर गुन्हा दाखल करण्यात आला. आरोग्य निरीक्षक अमर भीमराव कांबळे (वय २९, रा. शिवाजी पेठ) यांनी फिर्याद दाखल केली.
आपटेनगर-तुळजाभवानी प्रभागात स्वच्छतेसाठी कमी कामगार पाठवले जातात असा आरोप करीत नगरसेवक राजू दिंडोर्ले यांचा भाऊ विशाल उर्फ पप्पू दिंडोर्ले यानी महापालिकेच्या अधिकाऱ्यांना दमदाटी केली होती. बुधवारी (ता. १२) सकाळी साडेसहा ते सातच्या सुमारास दिंडोर्ले यानी संभाजीनगर एसटी स्टँड परिसरात आरोग्य निरीक्षक अमर कांबळे व सौरभ पावरा यांना शिवीगाळ आणि दमदाटी केली. यानंतर कळंबा फिल्टर हाऊस येथील कार्यालयात जाऊन उपस्थित कर्मचाऱ्यांना शिवीगाळ करीत बायोमेट्रीक हजेरी मशिनची मोडतोड केली. यात मशिनचे सुमारे २५ हजार रुपयांचे नुकसान झाले होते.
दिंडोर्ले यांच्याकडून दुसऱ्यांदा असा प्रकार घडल्याने महापालिकेच्या कर्मचाऱ्यांनी कामबंद आंदोलन करून दिंडोर्ले यांच्या विरोधात निदर्शने केली होती, त्याचबरोबर वरिष्ठ अधिकाऱ्यांकडे तक्रारही केली होती. याबाबत पोलिस ठाण्यात मात्र गुन्हा दाखल झाला नव्हता. अखेर महापालिकेतील वरिष्ठ अधिकाऱ्यांनीच गुन्हा दाखल करण्याचे आदेश दिल्यानंतर आरोग्य निरीक्षक अमर कांबळे यांनी शुक्रवारी जुना राजवाडा पोलिस ठाण्यात फिर्याद दाखल केली. या फिर्यादीत विशाल दिंडोर्ले यांच्यावर शिवीगाळ, दमदाटी आणि सरकारी कामात अडथळा केल्याबद्दल गुन्हा दाखल करण्यात आला आहे. पोलिस निरीक्षक अनिल देशमुख यांनी तातडीने विशाल दिंडोर्ले यांना ताब्यात घेतले आहे. पोलिस उपनिरीक्षक तेजस्विनी पाटील अधिक तपास करीत आहेत.
गुन्हा दाखल करण्यास दिरंगाई
नगरसेवक आणि त्यांच्या नातेवाईकांकडून महापालिकेतील कर्मचाऱ्यांना आरेरावी करण्याचे प्रकार वाढले आहेत. प्रत्येकवेळी मारहाण किंवा दमदाटीची घटना घडल्यानंतर तात्पुरता राग व्यक्त होतो, पण पोलिस ठाण्यात तक्रार दाखल केली जात नाही. याहीवेळी तक्रार दाखल करण्यास टाळाटाळ सुरू होती. अखेर वरिष्ठ अधिकाऱ्यांच्या आदेशानंतरही २४ तासांनी फिर्याद दाखल झाली.
मोबाइल अॅप डाउनलोड करा आणि राहा अपडेट
