बनावट दस्त तयार करून प्लॉटची विक्री करणाऱ्या नऊ जणांवर जुना राजवाडा पोलिस ठाण्यात गुन्हा दाखल झाला आहे. यातील कुमार शामलाल पंजाबी (वय ४०, सिध्दी विनायक अपार्टमेंट, राजारामपुरी) यास अटक केली. अन्य आठ जणांचा पोलिसांकडून शोध सुरू आहे. छाया ओमप्रकाश चव्हाण (वय ७१, रा. मूळ, तेलंगणा, सध्या. राजारामपुरी) यांनी पोलिसात तक्रार दिली आहे.
कुमार पंजाबी याच्यासह गौरव गोकुळ परिट (रा. सम्राटनगर), अजिंक्य राजू भिके (रा. राजेंद्रनगर), निखील नाथाजी सकट (रा. आर. के. नगर), दीपक गोते (रा. गोतेवाडी ता. पन्हाळा), बनावट आधारकार्ड देणारी अज्ञात महिला, वासंती कृष्णा शेट्टी, स्नेहल अभिजित पित्रगट, सुजाता प्रवीण चौगुले (रा. माळी कॉलनी) यांच्यावर गुन्हा दाखल करण्यात आला आहे.
छाया यांचा प्लॉट लाटण्यासाठी त्यांच्या वयाची बनावट महिला उभी करून बनावट आधारकार्ड तयार करून भवानी मंडप परिसरातील दुय्यम निबंधक कार्यालयात बनावट कागदपत्रांच्या आधारे दस्त करण्यात आला. चव्हाण यांना याची माहिती समजल्यावर त्यांनी जुना राजवाडा पोलिस ठाण्यात तक्रार दाखल केली. त्यानुसार बुधवारी याप्रकरणी नऊ जणांवर गुन्हा दाखल झाला. यातील कुमार पंजाबी याला अटक केली आहे. तर अन्य संशयितांचा पोलिस शोध घेत आहेत. पुढील तपास पोलिस निरीक्षक अनिल देशमुख करीत आहेत.
मोबाइल अॅप डाउनलोड करा आणि राहा अपडेट
