म. टा. वृत्तसेवा, मिरज
म्हैसाळ (ता. मिरज) येथील डॉ. खिद्रापुरे प्रकरणाची सखोल चौकशी करण्यासाठी नेमलेल्या चौकशी समितीची दुसरी बैठक मंगळवारी दुपारी मिरजेत पार पडली. समितीचे सर्व सदस्य उपस्थित होते. तीन टप्प्यात ही चौकशी समिती आपल्या चौकशीचा अंतिम अहवाल येत्या आठवडाभरात राज्य सरकारला सादर करणार आहे, अशी माहीती चौकशी समितीच्या अध्यक्ष डॉ. पल्लवी सापळे यांनी दिली.
समितीचे सचिव तथा जिल्हा आरोग्य अधिकारी डॉ. राम हंकारे, अप्पर जिल्हाधिकारी संजयसिंह चव्हाण, सांगली शहर पोलिस उपअधीक्षक डॉ. दीपाली काळे, पुणे येथील डॉ. जावडेकर आणि युनिसेफचे डॉ. कर्नाटकी प्रा. डॉ. विद्या मुळे आदी सदस्य उपस्थित होते. या समितीच्या बैठकीत भ्रूणहत्या संदर्भात सरकारी यंत्रणेतील त्रुटींचा गैरफायदा डॉ. खिद्रापुरेसारख्या प्रवृत्तीचे लोक घेत असतात त्यामुळे सरकारी यंत्रणेतील त्रुटी दूर करून कडक उपाययोजना करण्याबाबत बैठकीत भर देण्यात आला. समितीतील सर्व सदस्यांची मते आजमावून निर्दोष उपाययोजना, कडक कायदे, सामाजिक प्रबोधन करणेही गरजेचे असल्याचे मत व्यक्त करण्यात आले. स्थानिक, राज्य, आणि राष्ट्रीय पातळीवर अशा घटनांची पुनरावृत्ती होऊ नये म्हणून नेमकेपणाने आणि प्रभावीपणे उपाययोजना कशी करता येईल या संदर्भातही बैठकीत चर्चा झाली. ही चौकशी समिती सरकारने आपल्यावर टाकलेली जबाबदारी प्रभावीपणे पार पाडेल आणि येत्या आठवडाभरात आपला अंतिम अहवाल राज्य सरकारला सादर करेल, असे डॉ. पल्लवी सापळे यानी सांगितले. मात्र, अधिक माहिती सांगण्यास त्यांनी नकार दिला.
मोबाइल अॅप डाउनलोड करा आणि राहा अपडेट
