दुचाकीच्या धडकेत पादचारी महिला ठार

March 30, 2017, 2:30 pm

≫ Next: दिव्यांगांच्या शाळा असुरक्षित !

≪ Previous: करमणूक’च्या तिजोरीत दहा कोटी

$

0

0

म. टा. प्रतिनिधी, कोल्हापूर

कोल्हापूर-रत्नागिरी मार्गावर केर्ली (ता. करवीर) गावाजवळ दुचाकीस्वाराच्या धडकेत जयश्री जगन्नाथ मराठे (वय ६०, सध्या रा. केर्ली, मूळ रा. जत्राट, निपाणी) ही पादचारी महिला जागीच ठार झाली. दुचाकीस्वार विनायक महादेव वाडकर (वय २०, रा. रेसकोर्स नाका, कोल्हापूर) याच्यासह त्याची मैत्रीण गंभीर जखमी झाली असून, यांना उपचारासाठी सीपीआर रुग्णालयात दाखल केले. गुरूवारी (ता. ३०) सकाळी साडेनऊच्या सुमारास हा अपघात झाला.

याबाबत घटनास्थळासह करवीर पोलिस ठाण्यातून मिळालेल्या माहितीनुसार निपाणी तालुक्यातील जत्राट येथील जयश्री मराठे या दोन दिवसांपूर्वीच केर्ली येथील मुलगी रेखा गोविंद शिंदे यांच्याकडे आल्या होत्या. गुरुवारी सकाळी त्या फिरण्यासाठी घराबाहेर पडल्या. कोल्हापूर-पन्हाळा रोडवरून चालताना कोल्हापुरातून पन्हाळ्याच्या दिशेने जाणाऱ्या दुचाकीने त्यांना जोराची धडक दिली. या धडकेत जयश्री मराठे यांचा पदर दुचाकीच्या चाकात अडकल्याने दुचाकीने त्यांना फरफटत नेले. त्यांच्या डोक्याला गंभीर इजा झाल्याने अतिरक्तस्रावाने त्यांचा जागीच मृत्यू झाला, तर दुचाकीस्वार विनायक वाडकर याच्यासह दुचाकीवरील त्याची मैत्र‌ीणही गंभीर जखमी झाली. जखमींना उपचारासाठी १०८ रुग्णवाहिकेतून सीपीआरमध्ये दाखल करण्यात आले. तपासणीनंतर डॉक्टरांनी जयश्री मराठे यांना मृत घोषित केले. त्यांच्या पश्चात सात मुली व एक मुलगा असा परिवार आहे. अपघाताची माहिती मिळताच केर्ली आणि जत्राट येथील नागरिकांनी सीपीआरच्या अपघात विभागासमोर गर्दी केली होती. दोन्ही जखमींवर उपचार सुरू असून, त्यातील विनायक वाडकरची प्रकृती गंभीर आहे.

अपघातानंतर घटनास्थळी बघ्यांनी प्रचंड गर्दी केली होती, त्यामुळे कोल्हापूर-पन्हाळा मार्गावरील वाहतूक काही काळ विस्कळीत झाली होती. महाविद्यालयीन तरुण दुचाकींवरून भरधाव वेगाने पन्हाळ्याकडे जातात, त्यामुळे अपघातांची संख्या वाढली आहे. तरुणांच्या बेपर्वाईचा इतरांना फटका बसत असल्याने भरधाव वाहने चालवून नागरिकांच्या जीवाला धोका निर्माण करणाऱ्या दुचाकीस्वारांवर कारवाई करण्याची मागणी परिसरातील नागरिकांकडून होत आहे.

मोबाइल अॅप डाउनलोड करा आणि राहा अपडेट

---

दिव्यांगांच्या शाळा असुरक्षित !

March 30, 2017, 2:30 pm

≫ Next: आरोग्यासाठी द्या पहिला रविवार

≪ Previous: दुचाकीच्या धडकेत पादचारी महिला ठार

$

0

0

Bhimgonda.Desai
@timesgroup.com

Tweet : @bhimgondaMT

कोल्हापूर : समाजकल्याण विभागाच्या नियंत्रणातील अनुदानित, विनाअनुदानित दिव्यांग विद्यार्थ्यांच्या शाळा असुरक्षित असल्याचे विशेष पथकाच्या तपासणी अहवालातून समोर आले आहे. जिल्ह्यातील १२ शाळांत गंभीर त्रुटी आढळल्या आहेत. त्यात तातडीने सुधारणा करण्याच्या सूचना देण्यात आल्या आहेत.

दोन महिन्यांपूर्वी शाहूवाडी तालुक्यातील आधार वसतिगृहातील तीन विद्यार्थ्यांच्या मृत्यूचे प्रकरण गाजले. त्यानंतर प्रशासनाने दिव्यांगाच्या शाळांची तपासणी केली. त्रुटी आढळलेल्या शाळांच्या व्यवस्थापकांना प्रशासनाने दोन महिन्यांत सेवा-सुविधा आणि त्रुटी दूर कराव्यात, अशा सूचना दिल्या आहेत. ‌मुदतीत सुधारणा न झाल्यास शाळा बंद करण्याची कारवाई करण्यात येणार आहे.

दिव्यांग विद्यार्थ्यांसाठी शहर आणि जिल्ह्यात मिळून एकूण ३८ शाळा आहेत. यापैकी १६ शाळा अनुदानित आहेत. उर्वरित २२ शाळा विनाअनुदानित आहेत. ‌अनुदानित शाळांना सरकारकडून वर्षाला अनुदान मिळते. विनाअनुदानीत शाळा समाजातील दानशूर लोकांकडून देणगी घेऊन चालवल्या जातात. अनुदानित, विनाअनुदानित अशा सर्व शाळांत विद्यार्थ्यांना नियमाप्रमाणे सेवा-सुविधा देणे बंधनकारक आहे. मात्र या सुविधांमध्ये त्रुटी आहेत. सर्वोच्च न्यायालयाच्या आदेशानुसार सर्वच सरकारी कार्यालये, शाळा, कॉलेजांमध्ये रॅम्प सक्तीचे आहेत. पण, अपंगासाठीच्या शाळांमध्येच रॅम्प सुस्थितीत रॅम्प नाहीत.

कोल्हापुरातील विद्यामंदिर लोहिया मूकब‌धीर अनुदानित निवासी शाळेत आणखी स्वच्छतागृह, स्नानगृहांची आवश्यकता आहे. जिज्ञासा विकास मतिमंद मुलांच्या शाळेत स्वच्छतागृहांची संख्या कमी आहे. कूरमधील (ता. भुदरगड) जीवन शिक्षण मतिमंद निवासी विद्यालयात स्वच्छता केली जात नाही. स्वच्छतागृह व स्नानगृह प्रशस्त नाहीत. निवासी मूकबधीर अनुदानित शाळेतील विद्यार्थ्यांना सकाळी चहा, नाष्टा दिला जात नाही. भडगाव (ता. गडहिंग्लज) येथील चैतन्य अपंगमती विकास निवासी अनुदानित विद्यालयातील ‌मुले, मुलींसाठी स्वतंत्र स्नानगृहे नाहीत. भादवण (ता. आजरा) येथील रत्नामाला घाळी शाळेतील स्वच्छतागृहात स्वच्छता नाही. गिजवणेमधील निवासी अनुदानीत मूकबधीर विद्यालयातील कर्मचाऱ्यांकडून त्रास होत असल्याची तक्रार विद्यार्थ्यांनी केली आहे. जयसिंगपुरातील सौरभ मतिमंद मुलांच्या अनुदानीत शाळेची जागा अपुरी आहे, अशा त्रुटी चौकशीवेळी आढळल्या.

मोबाइल अॅप डाउनलोड करा आणि राहा अपडेट

आरोग्यासाठी द्या पहिला रविवार

March 30, 2017, 2:30 pm

≫ Next: एसी, कुलरच करतोय ‘कूल’

≪ Previous: दिव्यांगांच्या शाळा असुरक्षित !

$

0

0

कोल्हापूर टाइम्स टीम

कोल्हापूर रन या मॅरेथॉनचा उत्साह कायम ठेवण्यासाठी रग्गेडियन क्लबच्या वतीने एफएसओएम (First Sunday Of Month) या उपक्रमाचे आयोजन करण्यात आले आहे. आपल्या सुदृढ आरोग्यासाठी दर महिन्याच्या पहिल्या रविवारी सर्वांनी एकत्र यायचे असून, यातून व्यायाम, खिलाडूवृत्ती आणि क्रीडा संस्कृतीचा चालना देण्याचा प्रयत्न केला जाणार आहे. ‘टार्गेट-फिट कोल्हापूर’ ही या उपक्रमाची टॅगलाइन आहे.‘महाराष्ट्र टाइम्स’च्या ‘कल्चर क्लब’चे या उपक्रमाला सहकार्य लाभले आहे. सर्वांत महत्त्वाचे म्हणजे, हा उपक्रम पूर्णपणे मोफत असून, सर्व वयोगटासाठी खुला असणार आहे. नागरिक सहकुटूंब सहभागी होऊ शकतात.

कोल्हापुरातील पहिला एफएसओएम उपक्रम येत्या रविवारी (ता.२ एप्रिल) राबविला जाणार आहे. ताराबाई पार्कातील नाना नानी पार्कमध्ये सकाळी साडे सहा ते नऊ या वेळेत हा उपक्रम होईल. प्रत्येक महिन्याच्या पहिल्या रविवारी कोल्हापूरकरांनी एकत्र यायचे आहे. तेथे आरोग्यविषया तज्ज्ञ डॉक्टर सल्ला देतील, आहाराविषयी माहिती देतील, तसेच झुंबा डान्स, हास्य योगाचे उपक्रमही राबविले जाणार आहेत. उपक्रमांमध्येही वैविध्य असणार आहे. त्यात टॉवर रन, पावसात धावणे, थंडीत खडकाळ भागात धावणे, ग्रीन रन असे उपक्रम त्या त्या महिन्यातील ऋतू नुसार राबविले जाणार आहेत. विशेष म्हणजे यातील प्रत्येक रविवारी व्यायाम आणि आरोग्याविषयी वेगळी कल्पना राबविली जाणार आहे. त्यामुळे दर वेळी आपण, यातून वेगळं काही तरी घेऊन जाणार आहोत.

काय आहे ‘एफएसओएम’?

एफएसओएम हा युरोपमधील एक प्रचलीत प्रकार आहे. तेथे महिन्याच्या पहिल्या रविवारी शहरातील हजारो लोक एके ठिकाणी एकत्र येतात. तेथे फिटनेस संदर्भात विविध उपक्रम राबविले जातात. यात व्यायामांचे प्रकार असतील किंवा डाएट विषयी सल्ला असेल किंवा एकूण आरोग्याची काळजी घेण्याविषयी नागरिकांना प्रोत्साहन दिले जाते. भारतात दिल्ली, बेंगळुरू, पुणे अशा शहरांमध्ये याचा ट्रेंड आहे. त्याच धर्तीवर कोल्हापुरातही आता एफएसओएम सुरू होत आहे.

कसा असेल पहिला रविवार?

पहिल्या एफएसओएममध्ये चार ते पाच किलोमीटर धावणे किंवा चालणे असा उपक्रम असेल. वयाच्या १८व्या वर्षी आयर्न मॅन झालेला धीरज रावळू यावेळी उपस्थितांना चालण्या आणि धावण्याविषयी मार्गदर्शन करणार आहे. सहभागी होणाऱ्यांनी त्यांच्या शारीरिक क्षमतेनुसार धावणे अपेक्षित आहे. त्याचबरोबर डॉ. दिलीप चुन्नीलाल शाह आरोग्य, हास्ययोग याविषयी मार्गदर्शन करतील. हल्लीच्या धावपळीत माणूस मोकळेपणाने हसणे विसरून गेला आहे. आऱोग्यासाठी हे घातक आहे. त्याविषयीच डॉ. शाह मार्गदर्शन करणार आहेत. त्याचबरोबर अधिक माहितीसाठी ९६२३६८८८८६ या क्रमांकावर संपर्क साधावा

मोबाइल अॅप डाउनलोड करा आणि राहा अपडेट

एसी, कुलरच करतोय ‘कूल’

March 30, 2017, 2:30 pm

≫ Next: कोल्हापूर-मुंबई ‘उडान’ लवकरच

≪ Previous: आरोग्यासाठी द्या पहिला रविवार

$

0

0

कोल्हापूर टाइम्स टीम

गेल्या काही दिवसांपासून वाढलेल्या तापमानामुळे हैराण होण्याची वेळ आली आहे. ‘दोन किंवा तीनवर’ पंखा वेगाने फिरूनही घामाच्या धारा थांबत नाहीत. त्यामुळे आता उन्हाच्या काहिलीवर एसी आणि कूलर हा जालीम उपाय करण्यास कोल्हापूरकरांनी सुरुवात केली आहेत. गुढीपाडव्याच्या मुहुर्तावर एसी आणि कूलर यांची विक्री जोरात झाली आहे आणि येत्या महिन्याभरात ती आणखी वाढणार असल्याचे व्यवसायिकांचे म्हणणे आहे.

दरवर्षी होळीनंतर तापमान वाढायला सुरुवात होते. मात्र, यंदा लहरी हवामानामुळे फेब्रुवारीच्या उत्तरार्धापर्यंत रात्री आणि पहाटे थंडी अऩुभवायला मिळाली. या थंडीला बाजूला सारून कडकडीत उन्हाने आता जम बसवला आहे. त्यामुळे नागरिक एसी व कूलर यांच्या खरेदीसाठी दुकानांच्या पायऱ्या चढत आहेत. गुढीपाडव्याच्या मुहूर्तावर घरासाठी एखादी वस्तू घेण्याची प्रथा असल्याने यंदा टीव्ही, फ्रीज, मोबाइल यांच्यासह एसी आणि कूलरलाही मोठी मागणी होती. मध्यमवर्गीय आणि उच्च मध्यमवर्गीयांच्या ‘वन बीएचके’ किंवा ‘टू बीएचके’ घरात एसी बसवला जाते.

या ग्राहकांसाठी एक ते दीड टनाचा ‘एसी’ पुरेसा असतो. एसीमध्ये एक टनाच्या एसीला सर्वाधिक मागणी आहे. हा एसी दहा बाय पंधराची एक रूम थंड करू शकतो. यावरून खरेदी करणारे मध्यमवर्गीयच आहेत, हे स्पष्ट होत असल्याचे व्यवसायिक सांगतात. तर ज्यांच्यासाठी ‘एसी’च्या किमती अद्यापही आवाक्याबाहेर आहेत ती मंडळी ‘कूलर’ला पसंती देत आहेत. एकत्र कुटुंबात डबल डोअरच्या फ्रीजला मागणी आहे. १२ ते १६ हजारांपर्यंतच्या फ्रीजला पसंती मिळत आहे.

जाग्यावर फायनान्स

फायनान्स कंपन्यांची माणसे शोरूममध्येच उपलब्ध असल्याने नामांकित कंपन्यांचे कुलर, एसी, फ्रीज खरेदीसाठी ग्राहकांना जागेवरच फायनान्स उपलब्ध होत आहे. त्याचा थेट फायदा ग्राहकांना होताना दिसत आहे. केवळ चौकशीसाठी आलेले अनेक ग्राहक फायनान्स सुविधेमुळे दुकानांतून वस्तू खरेदी करून जातात, असे व्यावसायिक सांगतात.

गेल्या पंधरा दिवसांत एसी आणि कुलरच्या मागणीत प्रचंड वाढ झाली आहे. पाडव्याच्या दिवशी आम्हाला याचा अनुभव आला. त्यादिवशी आमच्याकडे ५० कूलर आणि २० एसींची विक्री झाली. सध्या रोज दहा ते बारा कुलर आणि सहा एसींची विक्री होत आहे. शहरात पाच मोठ्या शोरूम्स आहेत. तेथेही असाच ट्रेंड असल्याने मागणीचा अंदाज येतो.

- कशप शहा, व्यावसायिक

मोबाइल अॅप डाउनलोड करा आणि राहा अपडेट

कोल्हापूर-मुंबई ‘उडान’ लवकरच

March 30, 2017, 2:30 pm

≫ Next: दुचाकी वाहन बाजारात तेजी

≪ Previous: एसी, कुलरच करतोय ‘कूल’

$

0

0

म. टा. प्रतिनिधी, कोल्हापूर

केंद्र सरकारच्या ‘उडान’ योजनेंतर्गत कोल्हापूर-मुंबई विमानप्रवास अवघ्या २५०० रुपयांत करता येणे शक्य होणार आहे. केंद्रीय नागरी हवाई वाहतूकमंत्री अशोक गजपती राजू यांनी गुरुवारी योजनेतील ४५ मार्ग जाहीर केले. यामध्ये कोल्हापूर-मुंबई या मार्गाचाही समावेश आहे. आगामी चार ते सहा महिन्यांत ही विमानसेवा सुरू होणार असल्याचे मंत्र्यांनी जाहीर केल्याने कोल्हापूरच्या विकासाला चालना मिळणार आहे. गेली पाच वर्षे बंद असलेली विमानसेवा सुरू होणार असल्याने आशा पल्लवित झाल्या आहेत. योजनेत कोल्हापूरसह नांदेड, नाशिक, जळगाव आणि सोलापूर या पाच शहरांचा समावेश आहे.

कोल्हापूर विमानतळाचा विकास आणि विमानसेवा सुरू करण्यासाठी गेले वर्षभर प्रयत्न सुरू आहेत. हवाई वाहतुकीसाठीचा उड्डाण परवाना, धावपट्टीची दुरूस्ती, विस्तारीकरण, विमानतळाचा विकास यासाठी प्रयत्न सुरू आहे. या पार्श्वभूमीवर नागरी विमानवाहतूक मंत्री अशोक गजपती राजू यांनी ४५ मार्ग जाहीर केले. छोट्या शहरांना विमान सेवेने जोडण्यासाठीची ही उडान योजना आहे. योजनेतील मार्गांमध्ये कोल्हापूर, नांदेड, नाशिक, जळगाव आणि सोलापूर या शहरांचा समावेश आहे. नांदेड-मुंबई, नांदेड-हैदराबाद, नाशिक (ओझर) - मुंबई, नाशिक (ओझर) - पुणे, कोल्हापूर - मुंबई, जळगाव -मुंबई, सोलापूर-मुंबई हे मार्ग आहेत. कोल्हापूर ते मुंबई या मार्गावरील प्रवास हा २५०० रुपयांत करता येणार आहे. विमानातील एकूण जागांपैकी निम्म्या जागा २५०० रुपये दराने मिळणार आहेत. त्यासाठी प्रथम येणाऱ्याला प्रथम प्राधान्य दिले जाईल. उर्वरित जागांसाठी नियमित शुल्क असेल.

कनेक्टिव्हिटी वाढणार

कोल्हापूरची विमानसेवा सुरू झाल्यास देशभरातील विमानतळाची कनेक्टिव्हिटी वाढणार आहे. पुणे, मुंबई, हैद्राबाद, नांदेड, नाशिक, जळगाव, सोलापूर, चेन्नई, बेंगळुरू, दिल्ली, जम्मू, श्रीनगर, चंदीगडसह देशभरातील महत्वाच्या विमानतळांशी संपर्क वाढणार आहे. छोट्या शहरांची कनेक्टिव्हिटी अधिक वाढणार असली तर लांब पल्ल्याच्या प्रवासाला जाण्यासाठी पुणे, मुंबई, बेंगळुरू येथील आंतरराष्ट्रीय विमानतळांपर्यंत जाण्यासाठी कोल्हापूरहून सुरू होणाऱ्या विमानसेवेची संधी उपलब्ध होणार आहे.

मोबाइल अॅप डाउनलोड करा आणि राहा अपडेट

दुचाकी वाहन बाजारात तेजी

March 30, 2017, 2:30 pm

≫ Next: बांधकामांना विमानतळाची एनओसी सक्ती

≪ Previous: कोल्हापूर-मुंबई ‘उडान’ लवकरच

$

0

0

म. टा. प्रतिनिधी, कोल्हापूर

सण नाही की केंद्रीय अर्थसंकल्पापूर्वीचे वातावरण नाही. तरीही विविध कंपन्यांच्या दुचाकी वाहनांची खरेदी करणाऱ्यांसाठी गुरुवारी वीस हजार रुपयांपर्यंतचा डिस्काउंट दिल्याने जिल्ह्यात दुचाकी खरेदीसाठी नागरिकांनी शोरुम्समध्ये मोठी गर्दी केली.

सर्वोच्च न्यायालयाने ‘बीएस ३’ प्रकारात मोडणाऱ्या वाहनांच्या विक्री व नोंदणीवर एक ​एप्रिलपासून बंदी घातल्याने कंपनींनी हा डिस्काउंट दिला आहे. त्यामुळे जिल्ह्यातील डिलर्सकडे असलेल्या ३५०० दुचाकींपैकी दीड हजार दुचाकींची विक्री झाली. शुक्रवारीही मोठ्या प्रमाणावर दुचाकींची विक्री होण्याची शक्यता वर्तवण्यात येत आहे.

डिस्काउंटची माहिती गुरुवारी सोशल मीडियावरुन मिळू लागल्यानंतर त्याची खात्री करण्यासाठी अनेकांनी शोरुम्समध्ये जाऊन विचारणा केली. अनेकांनी कंपन्यांच्या शोरुम्समध्ये रोख पैसे भरुन वाहनांचे बुकींग केले.

जिल्ह्यात बीएस ३ प्रकारातील सुमारे साडेतीन हजारांहून अधिक दुचाकी वाहने वितरकांकडे आहेत. गुरुवारी त्यापैकी १५०० वाहनांची विक्री झाली.

- विशाल चोरडिया, डिलर

मोबाइल अॅप डाउनलोड करा आणि राहा अपडेट

बांधकामांना विमानतळाची एनओसी सक्ती

March 30, 2017, 2:30 pm

≫ Next: प्रवेशकर लागणार

≪ Previous: दुचाकी वाहन बाजारात तेजी

$

0

0

satish.ghatage
@timesgroup.com

Tweet : @satishgMT

कोल्हापूर : कोल्हापुरात विमानसेवा सुरू होण्याची प्रक्रिया सुरू असताना विमानतळापासून २० किलोमीटरच्या परिसरात सर्व प्रकारच्या नव्या बांधकामांना भारतीय विमानतळ प्राधिकरणाची परवानगी घेणे बंधनकारक ठरणार आहे. विमानतळ प्राधिकरणाच्यावतीने याबाबतचा आदेश जिल्हा प्रशासनाला कळविण्यात आला आहे. प्राधितकणाच्या या अटीमुळे कोल्हापूर शहरासह, इचलकरंजी, हुपरीसह २० किलोमीटर परिसरातील बांधकामांपुढे अडचणी येणार आहेत.

कोल्हापुरात विमानसेवा सुरू व्हावी यासाठी गेले पाच वर्षे प्रयत्न सुरू आहेत. केंद्र सरकारने राज्यातील पाच शहरांत विमानसेवा सुरू करण्याची घोषणा केली आहे. त्यामध्ये कोल्हापूर शहराचा समावेश आहे. कोल्हापुरात विमानसेवा सुरू होणार असल्याने विमानतळ प्राधिकरणाने जिल्हा प्रशासनाला नव्या बांधकामांबाबतचा आदेश दिला आहे. विमानतळापासून वीस किलोमीटर अंतरातील बांधकामासाठी प्राधिकरणाची परवानगी घेण्यात यावी असा आदेश दिला आहे. कोल्हापुरात यापूर्वी विमानसेवा सुरू होती. मात्र हे विमानतळ महाराष्ट्र राज्य औद्योगिक विकास महामंडळाकडे (एमआयडीसी) होते. गुरूवारी विमानसेवा पुन्हा सुरू करण्याबाबतची घोषणा झाल्यानंतर ​विमानतळ प्राधिकरणाने नव्या बांधकामांसंदर्भात तातडीने जिल्हा प्रशासनाला आदेश बजावला आहे. उजळाईवाडी विमानतळ कोल्हापूर शहरापासून ९ किलोमीटरवर तर पुणे-बेंगळूरू महामार्गापासून ६ किलोमीटर अंतरावर आहे. विमानतळापासून वीस किलोमीटरच्या कक्षेत कोल्हापूर शहरासह कागल, हुपरी, इचलकरंजी आदी वीसहून अधिक मोठी गावे येतात. या सर्व ठिकाणी नवीन बांधकामे करणाऱ्यांना प्राधिकरणाची परवानगी आवश्यक ठरणार आहे.

देशातील सर्व विमानतळाच्या परिसरात बांधकामाबाबतचा हा वीस किलोमीटरचा नियम लागू आहे. सध्या उजळाईवाडी विमानतळ परिसरातील दोन किलोमीटर अंतरातील इमारतींच्या उंचीवर मर्यादा आहे. मयासंदर्भात बांधकाम व्यावसायिक पारस ओसवाल म्हणाले, ‘बांधकामास परवानगी देताना २० किलोमीटरची अट अडचणीची ठरणार आहे. सरसकट २० किलोमीटरसाठी परवानगीच्या अटीचा फटका शहरासह ग्रामिण भागाला बसणार आहे.’

यासंदर्भात निवासी उप जिल्हाधिकारी संजय शिंदे म्हणाले, भारतीय विमानतळ प्राधिकरणाने इमारतींच्या बांधकामासाठीच्या परवानगीबाबतचा आदेश जिल्हा प्रशासनाला पाठवला आहे. आदेशाची प्रत नगररचना उपसंचालकांसह महापालिकेला पाठविली आहे.’

मोबाइल अॅप डाउनलोड करा आणि राहा अपडेट

प्रवेशकर लागणार

March 30, 2017, 2:30 pm

≫ Next: अफजलखानाच्या कबरीभोवतीच्या१९ अवैध खोल्या पाडण्याचे आदेश

≪ Previous: बांधकामांना विमानतळाची एनओसी सक्ती

$

0

0

म. टा. प्रतिनिधी, कोल्हापूर

जकात, एलबीटी बंद झाल्यामुळे कमकुवत बनलेल्या महापालिकेच्या आर्थिक उत्पन्नात वाढ करण्यासाठी कोल्हापूर शहर आणि जिल्ह्यातील वाहनांना वगळून बाहेरील जिल्ह्यांतील वाहनांना प्रवेशकर लावण्याचा प्रस्ताव स्थायी सभापती डॉ. संदीप नेजदार यांनी गुरुवारी यंदाच्या अंदाजपत्रकात मांडला.

सभापती नेजदार यांनी अंदाजपत्रक सादर करताना प्रवेशकराच्या माध्यमातून महापालिकेच्या महसुली उत्पन्नात सुमारे २० कोटी रुपयांची वाढ होईल. ही रक्कम शहरातील रस्त्यांच्या देखभाल, दुरुस्तीसह अन्य विकासकामांसाठी खर्च करण्यात येईल असे स्पष्ट केले. दरम्यान, महापालिकेच्या या प्रस्तावित प्रवेशकर आकारणीविरोधात शहर सर्वपक्षीय टोलविरोधी समितीने पुन्हा आक्रमक होत आंदोलनाचा इशारा दिला आहे.

महापालिकेच्या सर्वसाधारण सभेने अंदाजपत्रकासह जिल्ह्याबाहेरील वाहनांना प्रवेशकर लावण्याच्या पर्यायालाही मंजुरी दिली. अवजड वाहनांना ५० रुपये तर चारचाकी वाहनांना २० किंवा ३० रुपये प्रवेशकर आकारणीचा प्रस्ताव आहे. रस्ते विकास प्रकल्पांतर्गत आयआरबी कंपनीने कोल्हापुरात ४९ किलोमीटरचे रस्ते तयार केले. बीओटी तत्वावरील हा प्रकल्प २००८ मध्ये राबविण्यात आला. त्यासाठी आयआरबी कंपनीला ३० वर्षे टोल आकारणीचा ठेका दिला होता. मात्र प्रकल्पाचे काम पूर्ण झाल्यावर शहरांतर्गत टोल आकारणीविरोधात कोल्हापुरात मोठे आंदोलन उभे राहिल्यानंतर राज्य सरकारने टोल रद्द केल्याचे जाहीर केले.

आरोग्यदायी आणि पर्यावरणपूरक अंदाजपत्रक

कोल्हापूर शहराचा पर्यावरण समतोल राखत नागरिकांना उत्तम आरोग्य सुविधा देण्याचा संकल्प महापालिकेने आगामी वर्षाच्या अंदाजपकातून केला आहे. सार्वजनिक आरोग्य सुविधांचा दर्जा उंचाविण्यासाठी दवाखान्यांना १ कोटी रुपयांचा निधी, अत्याधुनिक ब्लड बँक उभारणी, घनकचरा व्यवस्थापनसाठी घरोघरी डस्टबीन पुरविण्यात येणार आहेत. सांडपाण्याचा निचरा करून प्रदूषण रोखताना शहरांतर्गत नवीन चॅनल बांधण्यासाठी १ कोटी रुपयांची तरतूद हे अंदाजपत्रकाचे वैशिष्ट्य आहे.

स्थायी समितीने
सुचविली ३८ कोटींची वाढ

स्थायी समिती सभापती डॉ. संदीप नेजदार यांनी गुरुवारी सर्वसाधारण सभेत अंदाजपत्रक सादर केले. सत्तारुढ काँग्रेस-राष्ट्रवादी काँग्रेस, शिवसेनेसह विरोधी भाजप, ताराराणी आघाडीने अंदाजपत्रकाचे स्वागत केले. महापौर हसीना फरास यांच्या अध्यक्षतेखाली व आयुक्त पी. शिवशंकर यांच्या उपस्थितीत झालेल्या सर्वसाधारण सभेत २०१६-१७चे सुधारित आणि २०१७-१८च्या नव्या अंदाजपत्रकास उपसूचनेसह मंजुरी देण्यात आली. प्रशासनाने स्थायी समितीस महसुली आणि भांडवली मिळून ५१९ कोटी ७५ लाख ३६ हजार ०९६ रुपयांचे जमेचे अंदाजपत्रक सादर केले. स्थायी समितीने त्यामध्ये महसुली १७ कोटी १८ लाख रुपये आणि भांडवली २० कोटी ६० लाख रुपये वाढ करत एकूण ३८ कोटी ५८ लाख रुपयांची वाढ सुचविली.

प्रमुख तरतुदी

- अत्याधुनिक ब्लड बँक उभारणीसाठी जिल्हा नियोजन समितीकडे प्रस्ताव
- ब्लड बँकेत रक्त विघटन केंद्र, वैद्यकीय साधनांचा समावेश
- झूम प्रकल्पातील कचरा हटविण्यासाठी चार कोटी रुपयांची तरतूद
- ओला कचऱ्यावर अत्याधुनिक तंत्रज्ञानाच्या सहाय्याने प्रक्रिया
- कचरा उठावसाठी नवीन वाहन खरेदी
- केएमटीसाठी सहा कोटी रुपयांचे अर्थसहाय

कोल्हापूर शहरात दररोज सुमारे दीड लाख लोक ये-जा करतात. त्यांना पुरविल्या जाणाऱ्या मूलभूत सुविधांचा ताण महापालिकेवर पडत आहे. त्याचा परिणाम शहरवासियांच्या सुविधांवर होतो. कर भरणारे नागरिक सुविधापासून वंचित राहतात. उत्पन्नवाढीसाठी शहर व जिल्ह्यातील वाहने वगळून बाहेरच्या जिल्ह्यातून येणाऱ्या वाहनांना प्रवेश कर आकारणीचा प्रस्ताव आहे. यासंदर्भात टोलविरोधी कृती स​मितीच्या पदाधिकाऱ्यांशी चार दिवसांत चर्चा करण्यात येणार आहे.
- डॉ. संदीप नेजदार, सभापती, स्थायी समिती

जे नेते पूर्वी राज्यात सत्तेवर होते, त्यांच्याकडेच महापालिकेची सत्ता आहे. नाग​रिकांनी टोल हटविण्यासाठी आयआरबीविरोधात आंदोलन केले. भाजप सरकारने जनेतला न्याय दिला. त्यामुळे काही नेत्यांचा इगो दुखावला असावा असे मला वाटते. त्यामुळे मागील दाराने पुन्हा टोल लादण्याचा हा प्रयत्न आहे. काँग्रेस सरकारने पूर्वी तशी ऑफर दिली होती. जनतेच्या भावनेचा अनादर करू नये. नव्या पर्यायाला लोकशाही पद्धतीने विरोध करू.

- निवास साळोखे, निमंत्रक, टोलविरोधी समिती

मोबाइल अॅप डाउनलोड करा आणि राहा अपडेट

---

अफजलखानाच्या कबरीभोवतीच्या१९ अवैध खोल्या पाडण्याचे आदेश

March 31, 2017, 10:25 am

≫ Next: महाबळेश्वर बंदला प्रतिसाद

≪ Previous: प्रवेशकर लागणार

$

0

0

म. टा. वृत्तसेवा, सातारा

किल्ले प्रतापगड येथील अफझलखानाच्या कबरीभोवती वन खात्याच्या भूमीवर बेकायदा बांधण्यात आलेल्या १९ खोल्यांचे बांधकाम काढून टाकण्याचे आदेश वनमंत्री सुधीर मुनगंटीवार यांनी ३० मार्च रोजी वनखाते आणि सातारा जिल्हा पोलिस प्रशासनाला दिला आहे.

विधानभवनातील सुधीर मुनगंटीवार यांच्या दालनात दुपारी तीन वाजता श्री शिवप्रताप भूमी मुक्ती आंदोलन संघटनेच्या पदाधिकाऱ्यांनी मुनगंटीवार यांची भेट घेतली. चर्चेनंतर त्यांनी वनविभागाच्या वरिष्ठ अधिकाऱ्यांना हा आदेश दिला.

या बैठकीला वन विभागाचे सचिव खारगे, मुख्य वनसंरक्षक पाटील, विभागीय वनअधिकारी अंजनकर, श्री शिवप्रताप भूमी मुक्ती आंदोलनाचे निमंत्रक आणि सांगलीचे माजी आमदार आणि मनसेचे नेते नितीन शिंदे यांच्यासह विविध संघटनांचे प्रितिनिधी उपस्थित होते.

अफझलखान कबर परिसरातील वनखात्याच्या भूमीवर केलेले बेकायदा बांधकाम त्वरित हटवण्यात यावे, असा आदेश मुंबई हायकोर्टाने सरकारला दोन वेळा दिला आहे. तरीही सरकारने बांधकामे हटविली नाहीत. या पूर्वीच्या सरकारने या विषयी काहीच कृती केलेली नाही. सरकारने संबधित बांधकामे हटवावीत, अशी मागणी नितीन शिंदे यांनी मुनगंटीवार यांच्याकडे केली. त्यांना अवैध बांधकामांची छायाचित्रेही दाखवली.

मुनगंटीवार म्हणाले, ‘वन खात्याच्या जमिनीवरील बेकायदा १९ खोल्यांचे बांधकाम हटवण्यात येईल; मात्र वनखात्याची जमीन सोडून अन्य ठिकाणी असलेले बांधकाम आम्हाला पाडता येणार नाही.’

मोबाइल अॅप डाउनलोड करा आणि राहा अपडेट

महाबळेश्वर बंदला प्रतिसाद

March 31, 2017, 10:28 am

≫ Next: साताऱ्यात पाऊस

≪ Previous: अफजलखानाच्या कबरीभोवतीच्या१९ अवैध खोल्या पाडण्याचे आदेश

$

0

0

म. टा. वृत्तसेवा, सातारा

जंगलात चोरून सुरू असलेल्या गोहत्येच्या निषेधार्थ तालुक्यातील ११० गावांनी पुकारलेल्या तालुका बंदला उत्स्फूर्त प्रतिसाद मिळाला. महाबळेश्वर येथे कडकडीत बंद पाळण्यात आला. पोलिसांच्या असमाधानकारक तपासाच्या निषेधार्थ तहसीलदार कार्यालयावर भव्य मोर्चा काढण्यात आला. तेथेच मोर्चाचे रूपांतर सभेत झाले

गोहत्या व धोंडीबा आखाडे यांच्या खुनाचा तपास सीआयडी मार्फत करण्याची मागणी तहसीलदार रमेश शेंडगे यांच्याकडे निवेदनाद्वारे करण्यात आली

गोहत्या बंदी असतानाही महाबळेश्वर तालुक्याच्या ग्रामीण भागात जंगलात गोहत्या केली जात आहे. तसेच देवळी गावातील वृद्ध शेतकरी धोंडीबा आखाडे यांचा खून झाल्याचा संशय व्यक्त करून या दोन्ही घटनांचा परस्पर संबधित आहेत. मात्र, पोलिस या दोन्ही गुन्ह्यांच्या तपासात दिरंगाई करीत आहेत. २५ दिवसांत पोलिस काहीच प्रगती करू शकले नाहीत, त्यामुळे तालुक्यात तीव्र संतापाची लाट पसरली आहे. पोलिसांच्या अशा कामगिरीच्या निषेधार्थ तालुक्यातील ११० गावातील जनतेने आज तालुका बंदची हाक दिली होती. या बंदला तालुक्यात उत्स्फूर्त प्रतिसाद मिळाला. शुक्रवारी महाबळेश्वर येथे कडकडीत बंद पाळण्यात आला. महाबळेश्वर बंद ठेवून तालुक्यातील लोक मोठ्या संख्येने येथीय छ. शिवाजी महाराज चौकात एकत्र आले. तेथे छ. शिवाजी महाराजांच्या प्रतिमेला वंदन करून मार्चाला प्रारंभ करण्यात आला. मोर्चाचे नेतृत्व शिवसेनेचे माजी नगराध्यक्ष डी. एम. बावळेकर, माजी नगराध्यक्ष संतोष आखाडे, गणेश उतेकर आदींनी केले.

मोबाइल अॅप डाउनलोड करा आणि राहा अपडेट

साताऱ्यात पाऊस

March 31, 2017, 10:30 am

≫ Next: केएमटीची जीप पाणी भरण्यासाठी

≪ Previous: महाबळेश्वर बंदला प्रतिसाद

$

0

0

म. टा. वृत्तसेवा, सातारा

पंधरा दिवसांपासून जिल्ह्यात उन्हाने अंगाची लाही लाही होत होती. शुक्रवारी सायंकाळी पाच वाजल्यापासून ढगाळ वातावरण निर्माण झाले होते. अखेर रात्री सात वाजण्याच्या सुमारास सातारा शहरासह परिसरात सोसाट्याच्या वाऱ्यासह पाऊस कोसळण्यास सुरुवात झाली.

फेब्रुवारी महिन्याच्या शेवटच्या आठवड्यातच उन्हाची चाहूल जाणवू लागली होती. त्यात मार्च महिन्यातील शेवटच्या आठवड्यात तर उन्हाने अंगाची लाहीलाही होत होती. सातारा जिल्ह्यातील महाबळेश्वर वगळता सर्वत्र पारा ४० अंशावर गेला होता. मात्र, शुक्रवारी सायंकाळी पाच वाजता अचानक ढगाळ वातावरण झाल्याने जिल्ह्यातील शेतकरी वर्गाने गवत, काडी, लाकुड फाटा झाकून ठेवण्याची धांदल उडाली. रात्री सातच्या सुमारास सोसाट्याचा वारा आणि पावसाने सुरुवात केली. रात्री उशिरापर्यंत पाऊस कोसळत होता. शाहुपुरी अंजली कॉलनी येथे जोरदार वाऱ्याने वडाचे झाड कोसळले. वीजवाहक तारा तुटल्याने शाहुपुरी करंजे सदर बझार बोगदा-पोवई नाका तसेच प्रतापगंज पेठ येथे सुमारे पाऊण तास वीज गायब झाली होती. संध्याकाळच्या वळीवाने वातावरणात काहीकाळ गारवा निर्माण झाला मात्र, पुन्हा अंगाची काहिली सातारकरांना सहन करावी लागली.

औंध परिसरात पावसाचा शिडकावा

शुक्रवारी सायंकाळी पाचच्या सुमारास औंध परिसरात वादळी वारे, मेघगर्जनेसह काही भागात पावसाच्या हलक्या सरी पडल्या.

औंधच्या उत्तरेकडील जायगाव येथे सुमारे वीस मिनिटे पाऊस पडला. भोसरे, चौकीचा आंबा, वरूड, औंध व अन्य भागात पावसाचा काही प्रमाणात शिडकावा झाला. आकाश काळवंडून आल्याने जोरदार पाऊस होईल व हवेत गारवा निर्माण होईल, अशी आशा नागरिक, शेतकऱ्यांमध्ये निर्माण झाली होती. मात्र, जोरदार वाऱ्यामुळे पावसाने हुलकावणी दिली. रात्री उशीरा हवेत पुन्हा कमालीचा उष्मा निर्माण झाला होता, तसेच ढगाळ वातावरण होते.

मोबाइल अॅप डाउनलोड करा आणि राहा अपडेट

केएमटीची जीप पाणी भरण्यासाठी

March 31, 2017, 2:30 pm

≫ Next: तोंडी भाडेकरारांवर जीएसटी कसा?

≪ Previous: साताऱ्यात पाऊस

$

0

0

म. टा. प्रतिनिधी, कोल्हापूर

केएमटी बस थांब्यापासून २०० मीटरच्या अंतरात होणाऱ्या वडाप व्यवसाय आणि विनातिकीट प्रवास करणाऱ्या प्रवाशांवर कारवाई करण्यासाठी केएमटीकडे जीप उपलब्ध आहे. पण केएमटीतील अधिकारी या जीपचा मूळ कामासाठी वापर न करता कंट्रोल केबीनमधून पाणी आणण्यासाठी तसेच बँकेत पैसे भरण्यासाठी करत असल्याचे सामोरे आले. परिवहन समिती सभापती नियाज खान व इतर सदस्यांनी जीपचा ताबा घेऊन प्रशासनाकडे खडे बोल सुनावत ज्या त्या कामासाठी वाहनांचा वापर करा, असे आदेश दिले.

केएमटीचे दैनंदिन उत्पन्न आणि होणारा खर्च यामध्ये तफावत आहे. केएमटीला रोज अडीच लाख लाख रुपयांचा तोटा आहे. केएमटीसमोर वडाप व्यावसायिकांचे मोठे आव्हान आहे. बस थांब्यावरुनच वडाप व्यावसायिक अवैधरित्या प्रवासी वाहतूक करतात. आरटीओ, शहर वाहतूक शाखा आणि केएमटीच्या अधिकाऱ्यांमार्फत संयुक्त कारवाई केली जाते. वडाप व्यावसायिकावर कारवाई करण्यासाठी केएमटीच्या वाहतूक निरीक्षकांना जीप देण्यात आली आहे. पण मूळ काम सोडून जीपचा वापर हा कंट्रोल केबीनमध्ये पाणी भरण्यासाठी तसेच बँकेत रक्कम भरण्यासाठी उपयोग केला जात होता. वाहतूक निरीक्षकांकडून जीप उपलब्ध नसल्याचे कारण देत वडाप चालक आणि विनातिकीट प्रवास करणाऱ्यावर कारवाईत चालढकल सुरू होती.

अधिकाऱ्यांना जीपचा मूळ कामासाठी जीपचा वापर करण्याच्या सूचना केल्या होत्या. पण प्रशासनाकडून त्याला प्रतिसाद मिळाला नाही​. यामुळे संतप्त झालेल्या सभापती ​नियाज खान यांनी सदस्य सयाजी आळवेकर, सचिन पाटील, चंद्रकांत सूर्यवंशी यांना सोबत घेऊन केएमसी वर्कशॉपमध्ये गेले. जीप ताब्यात घेऊन मूळ कामासाठी त्याचा वापर झाला पाहिजे, यासाठी केएमटी प्रशासनाकडे सुपूर्द केली. अवैध वाहतूक करणाऱ्यावर कारवाई झाली नाही तर केएमटीच्या मुख्य कार्यालयाला ठाळे ठोकण्याचा इशारा दिला. तसेच प्रादेशिक परिवहन ​अधिकारी डी. टी. पवार यांना भेटून वडापवर कारवाईची मागणी करणार असल्याचे खान यांनी सां​गितले.

मोबाइल अॅप डाउनलोड करा आणि राहा अपडेट

तोंडी भाडेकरारांवर जीएसटी कसा?

March 31, 2017, 2:30 pm

≫ Next: प्रवेशकर नव्हे हा पर्यटन कर

≪ Previous: केएमटीची जीप पाणी भरण्यासाठी

$

0

0

म. टा. प्रतिनिधी, कोल्हापूर

वस्तू व सेवा कर अर्थात जीएसटी आता घरभाडे आणि भाडेतत्त्वावरच्या जमिनीवर लागू होणार आहे. एक जुलैपासून जीएसटी कायदा लागू होत असला, तरी कोल्हापुरात भाडेकरारांची नोंदणी होण्याची संख्या मोठ्या शहरांच्या तुलनेत फार कमी आहे. त्यामुळे शहरात या व्यवहारांवर जीएसटी कसा लागू होईल, याविषयी शंका व्यक्त होत आहे. इमारत अथवा जमीन विक्रीच्या व्यवहारावर जीएसटी लागू होणार नाही, ही यात समाधानाची बाब मानली जात आहे.

जीएसटीच्या नव्या नियमाप्रमाणे कोणत्याही प्रकारचा भाडेकरार म्हणजेच, भाड्याने जमीन अथवा घर देणे, जमिनीच्या मालकी हक्कासाठी लागणारा परवाना या सगळ्यावर जीएसटी लागू होणार आहे. याशिवाय जमीन अथवा इमारतींच्या अर्ध्या भागाच्या भाडेतत्त्व करारासाठीसुद्धा जीएसटी लागू असणार आहे. हा कर इमारतीच्या रहिवासी आणि व्यावसायिक या दोन्ही प्रकारच्या वापरावर लागू असेल.

कोल्हापूरसारख्या शहरात जमीन व्यवसायिक वापरासाठी भाडेतत्वावर देताना त्याचे रीतसर नोंदणी होत असते. पण, छोटे फ्लॅट्स किंवा घरांचा भाडे करार तोंडी होतो. डिपॉझिटची रक्कम ठरते, कधीकधी तेही माफ केले जाते. भाडे रोखीनेच दिले जाते. त्यामुळे अशा व्यवहारांवर कर कसा लागू करणार, असा प्रश्न उपस्थित होत आहे. शहरात राजारामपुरी, नागाळा पार्क, ताराबाई पार्क, शिवाजी पार्क, स्टँड परिसर येथील भाड्येकरारांचे नोंदणीचे प्रमाण सर्वाधिक आहे. त्याउलट शिवाजी पेठ, मंगळवार पेठ, रविवार पेठ, बुधवार पेठ येथे ओळखीने अथवा नातेवाइकांमार्फत तोंडी भाडेकरार होतात. संपूर्ण शहराचा विचार केला, तर एकूण भाडेकरारांच्या केवळ २५ टक्के करार नोंदणीकृत म्हणजे कागदावर येतात. त्यामुळे उर्वरित ७५ टक्के भाडेकरारांवर कर कसा लागणार, असा प्रश्न उपस्थित होत आहे.

प्रतिज्ञापत्रावर गॅस कनेक्शन

प्रामुख्याने गॅस कनेक्शन घेण्यासाठी भाडे कराराची नोंदणी आवश्यक असते. पण, गॅस वितरक संबंधित भाडेकरूनच्या प्रतिज्ञापत्रावरही गॅस कनेक्शन देतात. महा ई-सेवा केंद्रात केवळ ५० रुपयांना प्रतिज्ञापत्र मिळते. त्यात मी, यांच्या घरी भाड्याने राहत असल्याचा मायना असतो. त्यावरून गॅसचे काम होत असल्याने भाडेकराराचे रीतसर रजिस्ट्रेशन करण्याची गरज पडत नाही.

कोल्हापुरात काही ठराविक भागांतील भाडेकरारांची नोंदणी होते. भाडेकरू परगावचा असेल, खासगी नोकरदार असेल तर नोंदणीसाठी आग्रह धरला जातो. स्थानिक भाडेकरूंची नोंदणी होण्याचे प्रमाण अतिशय कमी आहे. अनेकजण पुणे-मुंबईचे रहिवासी असून, त्यांनी कोल्हापुरातील फ्लॅट भाड्याने दिले आहेत. ते मात्र खबरदारी म्हणून रीतसर नोंदणी करून घेतात. त्यांचे भाडेही थेट खात्यावर जमा होत असते.

- उदय गाडगीळ, इस्टेट ब्रोकर

मोठ्या शहरांत नोंदणीची सक्ती

मुंबई, पुणे यांसारख्या शहरात बाहेरून परगाव आणि परराज्यातून मोठ्या प्रमाणात कुटुंबे राहण्यासाठी येतात. हे लोक ओळखीचे नसल्याने घरमालक भाडे कराराची रीतसर नोंदणी करून घेऊन जवळच्या पोलिस ठाण्यातही याची माहिती देतात. यामुळे दहशतवादी कारवायांसह गुन्हेगारी टोळ्यांवरही अंकूश ठेवण्यात पोलिसांना मदत होत असते.

मोबाइल अॅप डाउनलोड करा आणि राहा अपडेट

प्रवेशकर नव्हे हा पर्यटन कर

March 31, 2017, 2:30 pm

≫ Next: रेडीरेकनरमध्ये पाच ते दहा टक्के वाढीची शक्यता

≪ Previous: तोंडी भाडेकरारांवर जीएसटी कसा?

$

0

0

म. टा. प्रतिनिधी, कोल्हापूर

प्रवेशकर म्हणजे टोल आकारणी नाही. टोल आकारणीचा कोणताही निर्णय झालेला नाही. उत्पन्नवाढीसाठी नवा स्त्रोत म्हणून महापालिकेने प्रवेशकर आकारणीचा प्रस्ताव केला आहे असे स्थायी समिती सभापती डॉ. संदीप नेजदार यांनी सांगितले.

नेजदार म्हणाले, ‘कोल्हापूर शहरात येणाऱ्या बाहेरच्या जिल्ह्यांतील पर्यटकांवर एका अर्थाने पर्यटनकर म्हणून कर आकारणी विचाराधीन आहे. यामध्ये पर्यटकांना देण्यात येणाऱ्या सुविधांचा समावेश आहे. कोल्हापूर शहरात ऐतिहासिक, धार्मिक पर्यटनासह सहली आणि विविध कामानिमित्त दररोज सुमारे दीड लाख नागरिक ये-जा करतात. महापालिका या नागरिकांना रस्ते, पाणी, पार्किंग, वाहतूक व्यवस्था पुरविते. या बाबींवर महापालिकेचा कोट्यवधी रुपयांचा निधी खर्च होतो. मात्र बाहेरच्या जिल्ह्यांतील नागरिकांना कोणत्याही प्रकारचे शुल्क सध्या द्यावे लागत नाही. कोल्हापूर शहरातील नागरिकांकडून जमा होणाऱ्या करातून सर्व सुविधा पुरविल्या जातात. मग आणखी सोयी-सुविधांसाठी कोल्हापुरातील नागरिकांवर कराचा किती बोजा टाकायचा? असा प्रश्न आमच्यासमोर आहे.

शहरातील नागरिकांचा विचार करून येथील रस्त्यांची देखभाल-दुरुस्ती आणि विकासकामांना चालना देण्यासाठी अंदाजपत्रकात प्रवेशकराची संकल्पना मांडली आहे. कोल्हापुरात आयआरबी कंपनीने बीओटी तत्वावर ४९ किलोमीटरचे रस्ते केले. नगरोत्थान योजनेंतर्गत ५० किलोमीटरहून अधिक रस्ते तयार झाले. शहरांतर्गत रस्त्यांची लांबी ७५० किलोमीटरपेक्षा अधिक आहे. डीपी रस्ते आहेत. या रस्त्यांच्या देखभाल-दुरुस्तीसाठी वर्षाला कोट्यवधी रुपये लागतात. केवळ आयआरबीने केलेल्या रस्त्यांच्या देखभाल दुरुस्तीसाठी वार्षिक दहा कोटी रुपये आवश्यक आहेत. महापालिकेची आर्थिक स्थिती नाजूक आहे. राज्य सरकारकडून रस्ते दुरुस्ती, देखभालीसाठी अनुदान मिळत नाही. महापालिकेला देखभाल खर्च परवडत नाही. आयआरबीच्या रस्त्यांवरील विद्युत दिवे बंद आहेत. प्रवेशकराच्या माध्यमातून महापालिकेच्या उत्पन्नात वाढीसह रस्त्यांच्या दुरुस्ती-देखभालीसाठी निधीची तरतूद होऊ शकते. प्रवेशकरातून जमणाऱ्या निधीतून रस्त्यांची देखभाल, दुरुस्ती आणि विकासकामांसाठी खर्च करण्यात येईल. त्यातून पर्यटकांना जादा सुविधा उपलब्ध होतील. दर्जेदार रस्ते, पार्किंगच्या सोयीसह वाहतूक व्यवस्था सुधारेल. अत्याधुनिक स्वच्छतागृहे, पिण्याच्या पाण्याची सोय होईल. प्रवेशकराच्या रकमेचा प्रशासकीय खर्चासाठी वापर होणार नाही हे स्पष्ट आहे.

कोल्हापूर जिल्ह्यातील किल्ले पन्हाळा, दख्खनचा राजा जोतिबा आणि नृसिंहवाडी या लहान शहरांसह राज्यातील अन्य मोठ्या शहरांतही प्रवेशकराची आकारणी केली जाते. त्याच धर्तीवर कोल्हापुरातही प्रवेशकराची आकारणी प्रस्तावित आहे. यात कोल्हापूर शहर आणि जिल्ह्यातील वाहनांना सवलत आहे. प्रवेशकर लावायचा की नाही याचे सर्वाधिकार मला नाहीत. प्रवेशकराबाबत प्रशासन, सभागृह, कोल्हापूरकरांच्या हिताचा विचार करणाऱ्या संस्था, टोलविरोधी कृती समिती या सर्वांशी चर्चा केली जाईल. सर्वांशी चर्चा करून, सहमतीने निर्णय झाला तर प्रवेशकर आकारणी होईल. याबाबत सर्वसाधारण सभेतच निर्णय होईल. जनतेच्या भावनांचा आदर करून निर्णय घेऊ. टोल आकारणीचा हेतू नाही. तसे कोणी समजूही नये.

मोबाइल अॅप डाउनलोड करा आणि राहा अपडेट

रेडीरेकनरमध्ये पाच ते दहा टक्के वाढीची शक्यता

March 31, 2017, 2:30 pm

≫ Next: प्रवेशकराचा प्रस्ताव रद्द

≪ Previous: प्रवेशकर नव्हे हा पर्यटन कर

$

0

0

म.टा. प्रतिनिधी, कोल्हापूर

महागाईचा दणका दिवसेंदिवस बसत असताना रेडीरेकनरमध्येही (सरकारी बाजार मूल्य) पाच ते दहा टक्के वाढ होण्याची शक्यता आहे. शनिवारपासून ही दरवाढ अंमलात येणार आहे. दरम्यान, नोटाबंदी व बाजारातील मंदी लक्षात घेऊन रेडीरेकनरमध्ये वाढ करु नये, अशी मागणी बांधकाम व्यावसायिकांकडून राज्य सरकारकडे केली आहे.

दरवर्षी एक एप्रिलपासून राज्य सरकारकडून रेडीरेकनर जाहीर होतात. त्याकडे बांधकाम व्यावसायिकांबरोबर महापालिका तसेच महसूल विभागाचे लक्ष असते. रेडिरेकरनुसार अन्य करांमध्येही वाढ होते. जिल्हा मुद्रांक कार्यालयातील कर्मचारी शुक्रवारी सकाळी पुण्यातील कार्यालयात जिल्ह्याच्या रेडीरेकनरची माहिती घेण्यासाठी गेले आहेत. पण, रात्री उशिरापर्यंत रेडीरेकनरचे दर जाहीर झालेले नव्हते. मध्यरात्री वेबसाईटवर रेडीरेकनरचे दर जाहीर केले जाणार आहेत, अशी माहिती प्रभारी जिल्हा मुद्रांक अधिकारी एम.एम. भुत्ते यांनी दिली.

गेल्यावर्षी राज्य सरकारने रेडीरेकनर दरात सात ते आठ टक्के वाढ केली होती. नोटाबंदीनंतर बाजारपेठेत मंदीचे सावट आहे. त्यातच हे दर वाढले तर बांधकाम व्यवसायातही मंदीचे सावट आणखी गडद होऊ शकते. त्यामुळे रेडीरेकरन दरात जास्त वाढ करु नये, अशी मागणी बांधकाम व्यावसायिकांनी केली होती. या संदर्भात गेल्या आठवड्यात महसूल मंत्री चंद्रकांत पाटील यांनी रेडीरेकनरमध्ये सरसकट वाढ केली जाणार नसल्याचे स्पष्ट केले होते. ज्या ठिकाणी रेडीरेकनरपेक्षा जास्त दराने व्यवहार झाले आहेत त्या ठिकाणी रेडीरेकनरमध्ये वाढ होण्याचे संकेत त्यांनी दिले होते.

मोबाइल अॅप डाउनलोड करा आणि राहा अपडेट

---

प्रवेशकराचा प्रस्ताव रद्द

March 31, 2017, 2:30 pm

≫ Next: २३४ कोटी कुठून आले?

≪ Previous: रेडीरेकनरमध्ये पाच ते दहा टक्के वाढीची शक्यता

$

0

0

म.टा. प्रतिनिधी, कोल्हापूर

‘लोकांना त्रास होईल अशा कोणत्याही प्रकारच्या कर आकारणीचा निर्णय घेऊ नका. प्रवेश कर लावण्याचा प्रस्ताव रद्द करा. प्रशासनाच्या दबावाखाली प्रवेश कराचा निर्णय होऊ नये,’ अशी स्पष्ट सूचना आमदार सतेज पाटील यांनी स्थायी सभापती संदीप नेजदार यांच्यासह महापालिका पदाधिकाऱ्यांना केली. त्यामुळे प्रस्तावित प्रवेश कर आकारणीचा प्रस्ताव बारगळण्याची दाट चिन्हे आहेत.

स्थायी सभापती नेजदार यांनी गुरुवारी अंदाजपत्रक सादर करताना उत्पन्नवाढीसाठी जिल्ह्याबाहेरील वाहनांना प्रवेश कर लावण्याचा प्रस्ताव मांडला होता. या उत्पन्नातून शहरातील रस्त्यांची दुरुस्ती, देखभाल आणि विकासकामे करण्याचा मानस त्यांनी व्यक्त केला होता. मात्र प्रवेशकर आकारणीवरुन संमिश्र प्रतिक्रिया उमटत आहेत. टोलविरोधी कृती समितीने प्रवेशकराला विरोध केला आहे. काहींनी आंदोलनाचा इशारा दिला. याची दखल घेत महापालिकेतील सत्ताधारी काँग्रेसने प्रवेश कर आकारणीचा प्रस्ताव चोवीस तासाच्या आत मागे घेत असल्याचे घोषित केले.

काँग्रेस कमिटीत शुक्रवारी सायंकाळी पक्षाच्या अनुसूचित जाती विभाग शहर अध्यक्षपदी दुर्वास कदम यांची नियुक्ती झाल्याबद्दल पाटील यांच्याहस्ते त्यांचा सत्कार झाला. त्यावेळी पाटील यांनी प्रवेशकराबद्दल स्पष्ट भूमिका व्यक्त केली. यावेळी आमदार पाटील यांनी कामकाजातून कुठल्याही प्रकारचा वाद निर्माण होणार नाही असे काम करा. चर्चा, विचारविनिमय केल्याशिवाय कोणताही निर्णय घेऊ नका. प्रवेश कराचा प्रस्ताव मागे घेतानाच ​ज्येष्ठ विचारवंत डॉ. एन. डी. पाटील यांची भेट घेण्याची सूचना पदाधिकाऱ्यांना केली.

उपमहापौर अर्जुन माने, स्थायी समिती सभापती संदीप नेजदार, सभागृह नेता प्रविण केसरकर, गटनेते शारंगधर देशमुख, नगरसेवक लाला भोसले, तौफिक मुल्लाणी, शोभा कवाळे आदी यावेळी उपस्थित होते.

मोबाइल अॅप डाउनलोड करा आणि राहा अपडेट

२३४ कोटी कुठून आले?

March 31, 2017, 2:30 pm

≫ Next: दुचाकीचे शोरूम्स हाऊसफुल्ल

≪ Previous: प्रवेशकराचा प्रस्ताव रद्द

$

0

0

satish.ghatage@timesgroup.com

twitter:@satishgMT

कोल्हापूर ः नोटाबंदीनंतर जिल्ह्यातील एका बड्या सहकारी बँकेत २३४ कोटींची संशयास्पद रक्कम जमा झाल्याचे प्राप्तिकर विभागाच्या निदर्शनास आले आहे. ही रक्कम २५० कोटीवर जाण्याची शक्यता असल्याचे प्राप्तिकर खात्याने संकेत दिले आहेत. प्राप्तिकर खात्याला चुकीची माहिती देणाऱ्या बँकावर दंडात्मक कारवाई करण्यात येणार आहे.

नोटाबंदीनंतर चालू खात्यावर साडेबारा लाख व बचत खात्यावर दोन ते अडीच लाख रुपये भरण्याची सूट दिली होती. पण, नोटाबंदीनंतर सहकारी बँकामध्ये मोठ्या संख्येने रक्कम झाली. त्यामुळे रिझर्व्ह बँकेने जिल्हा बँकांना नोटा स्वीकारण्यास बंदी घातली. सहकारी बँकांना नोटा स्वीकारण्यास परवानगी दिली.

नोटाबंदीच्या काळात आठ नोव्हेंबर ते ३० डिसेंबरदरम्यान सहकारी बँकेत प्रत्येक खात्यावर किती रक्कम जमा झाली, याची एकत्रित माहिती प्राप्तिकर विभागाने मागितली होती. ही माहिती एकत्रित न पाठवता नोटबंदीच्या काळाच्या ५० दिवसांत जशी रक्कम जमा झाली तशी ही माहिती ऑनलाइनद्वारे प्राप्तिकरला पाठवली. प्राप्तिकरच्या इंटेलिजन्स अँड क्रिमिनल इन्व्हेस्टिगेशन विभागाने त्यांच्याकडील सॉफ्टवेअरच्या मदतीने जमा झालेल्या रकमेचा शोध घेतला असा धक्कादायक माहिती मिळाली.

पुणे, औरंगाबाद, अहमदनगर, कोल्हापूर, नाशिक, ठाणे जिल्ह्यातील सहा सहकारी बँकांत नोटबंदीकाळात एक हजार कोटींची रक्कम प्राप्तिकरने शोधून काढली. कोल्हापूर जिल्ह्यातील एका बँकेत तब्बल २३४ कोटी रुपये रक्कम शोधून काढली आहे. प्राप्तिकर अधिकाऱ्यांनी या बँकेच्या मुख्य कार्यालयात जाऊन खात्यांची तपासणी केली. रकमेची खातरजमा करुन घेतली. त्यानंतर बँकेकडे खुलासा मागितला. तसेच ज्या खातेदाराच्या खात्यावर अशी जास्त रक्कम जमा झाली आहे त्यांच्याकडूनही खुलासा घेण्यात येणार आहे. चुकीची माहिती दिल्याने बँकेवर दंडात्मक कारवाई होणार आहे. खात्यावरील एका एंट्रीच्या चुकीबद्दल ५० हजाराचा जबर दंड ठोठावण्याची शक्यता आहे.

अशी शोधली रक्कम

जुन्या नोटा जमा करताना खातेदारांनी बचत खाते, चालू खाते, कर्ज खाते, ठेवीमध्ये रक्कम गुंतवली आहे. तसेच एकाच खातेदाराची अन्य बँकेतही खाती आहेत. बँकेने सर्व खात्याची माहिती प्राप्तिकरला दिल्यावर पॅनकार्ड, मोबाईल क्रमांक व खातेदारांचा पत्ता याचा वापर करुन एकाच व्यक्तीच्या खात्यावर क्षमतेपेक्षा जास्त व्यवहार असल्याचे लक्षात आले. बँकांनी माहिती लपवण्यापेक्षा खातेदारांची एकत्रित माहिती देऊन कारवाई टाळावी, असे प्राप्तिकर खात्याच्या या अधिकाऱ्याने आवाहन केले आहे.

मोबाइल अॅप डाउनलोड करा आणि राहा अपडेट

दुचाकीचे शोरूम्स हाऊसफुल्ल

March 31, 2017, 2:30 pm

≫ Next: राजाराम बंधारा ठरतोय जीवघेणा

≪ Previous: २३४ कोटी कुठून आले?

$

0

0

म. टा. प्रतिनिधी, कोल्हापूर

गुढीपाडव्याच्या बुकिंगचे रेकॉर्ड मोडीत काढीत बीएस ३ प्रकारांतील वाहने खरेदी करण्यासाठी ग्राहकांची शुक्रवारी सकाळपासूनच झुंबड उडाल्याचे चित्र होते. त्यातच विविध वाहनांवर पाच हजारांपासून ते वीस हजारांपर्यंत सूट दिल्याने शोरुम्सही गर्दीने फुलून गेली होती. शुक्रवारी प्रादेशिक परिवहन कार्यालयाकडे ४०९ वाहनांची नोंदणी झाली.

सुप्रीम कोर्टाने ‘बीएस ३’ प्रकारात मोडणाऱ्या वाहनांच्या विक्री व नोंदणीवर एक ​एप्रिलपासून बंदी घातल्याने कंपन्यांनी डिस्काउंट दिला आहे. डिस्काउंटची माहिती शुक्रवारीही सोशल मीडियावर सुरू राहिली. मार्केट यार्ड, लक्ष्मीपुरी, शाहुपूरीसह उपनगरातील विविध शोरूम्समध्ये वाहन खरेदीसाठी ग्राहकांची झुंबड उडाली. मोठ्या प्रमाणात आलेल्या ग्राहकांना सेवा देताना तेथील कर्मचाऱ्यांची दमछाक झाली. वाहनांवरील डिस्काउंटची माहिती देण्यासाठी विक्री प्रतिनिधींची संख्याही कमी पडली. अनेकांनी शोरूम्ससमोर रांगा लावल्या. काही शोरूम्ससमोर तर बीएस ३ प्रकारांतील वाहने संपल्याने शोरूम्स बंद केल्याचे फलक लावण्यात आले. तरीही विविध कंपनीच्या शोरूम्ससमोर दुचाकी खरेदी करणाऱ्यांची गर्दी राहिली. शहरातील शोरूम्समध्ये गर्दी झाल्याने फुलेवाडी, आपटेनगर, सानेगुरूजी, संभाजीनगर, आर. के. नगर, शिंगणापूर, उचगांव परिसरातील विक्रेत्यांकडे गर्दीचा ओघ राहिला. अनेकांनी शोरुम्समध्ये रोख पैसे भरुन वाहनांचे बुकिंग केले.

००

प्रादेशिक परिवहन कार्यालयात नियमानुसार ऑनलाइन नोंदणी सुरू आहे. वाहनांचा कर आणि विमा भरल्यानंतर कागदपत्रांची नोंदणी होत आहे. ३१ मार्चनंतर या प्रकारात खरेदी केलेल्या कोणत्याही वाहनाची नोंदणी केली जाणार नाही.

सतीश जाधव, सहाय्यक प्रादेशिक परिवहन अधिकारी

मोबाइल अॅप डाउनलोड करा आणि राहा अपडेट

राजाराम बंधारा ठरतोय जीवघेणा

March 31, 2017, 2:30 pm

≫ Next: वयोमर्यादेतून वैद्यकीय विद्यार्थ्यांची सुटका

≪ Previous: दुचाकीचे शोरूम्स हाऊसफुल्ल

$

0

0

राहुल मगदूम,कसबा बावडा

येथील पंचगंगा नदीवरील राजाराम बंधारा दिवसेंदिवस धोकादायक बनत आहे. राजकीय अनास्थेमुळे बंधाऱ्याची प्रचंड दुरवस्था झाली आहे. त्यामुळे अपघात होत आहेत. काही दिवसांपूर्वी बंधाऱ्यावरून पडून शिक्षकाचा मृत्यू झाल्यानंतर हा प्रश्न पुन्हा ऐरणीवर झाला आहे. बंधाऱ्याच्या ठिकाणी नवा पूल बांधण्याचा प्रस्ताव मंजूर झाला आहे. त्याचे काम तातडीने सुरू करण्याची मागणी होत आहे.

कसबा बावडा आणि वडणगे, भुये, निगवे, कुशिरे, पोहाळे तसेच जोतिबाला जाण्यासाठी जवळचा मार्ग म्हणून या बंधाऱ्याचा वापर होतो. मोठ्या प्रमाणात असणारी वर्दळ लक्षात घेऊन बंधाऱ्याला संरक्षित कठडे बांधावेत, तसेच उंची वाढवून तो सरंक्षित करावा, अशी अनेक वर्षांपासूनची मागणी आहे. मात्र याबाबत कसलीही हालचाल झालेली नाही. राज्यात पुन्हा युतीचे सरकार आल्यानंतर एक-दीड वर्षापूर्वी या पुलाच्या १७ कोटी चार लाखाच्या कामाला मंजुरी मिळाली आहे. परंतु, त्याचे काम सुरू करण्याबाबत अद्याप हालचालीच झालेल्या नाहीत.

राधानगरी धरणातून येणारे पाणी थेट या बंधाऱ्यापर्यंत अडवले जाते. तर काळम्मावाडी धरणातून येणारे पाणी गैबी बोगद्यातून भोगावती नदीमार्गे येते. ते येथे अडवण्याची व्यवस्था आहे. राधानगरी तसेच काळम्मावाडी धरणातून पाणी सोडल्यानंतर सात दिवसांत हा बंधारा भरतो. पुढचे सात दिवस पाणी सोडणे बंद केले जाते. २४ मार्चला बावड्यातील शहाजी बाबुराव मासाळ या शिक्षकाचा बंधाऱ्यावरून पडून मृत्यू झाला. काही दिवसांपूर्वी पन्हाळा तालुक्यातील एक तरुण रात्रीच्या सुमारास मोटारसायकलवरून वडणगेकडून येत असताना नदीपात्रात पडला होता. डोक्याला हेल्मेट असल्याने तसेच नदीच्या पात्रात पाणी खूप कमी असल्याने तो वाचला. काही महिन्यापूर्वी बैलगाडीही घसरली होती. बंधाऱ्यावरील १६ व्या मोरीपासून ४८ व्या मोरीपर्यंत म्हणजे ७० टक्के बंधाऱ्यावरील रस्त्याची दुरवस्था आहे. त्यामुळे या रस्त्याची दुरुस्ती करण्याबरोबरच नियोजित पुलाचे काम तातडीने सुरू करण्याची मागणी होत आहे.

कामाची चौकशी करावी

अलीकडच्या दहा वर्षांत काही ठेकेदारांनी येथे विविध कामे काढली. बंधाऱ्यातील बाभळीच्या लाकडाच्या फळ्या काढून दोन-तीन वर्षांपूर्वी लोखंडी दारे लावली. ती दारेही आता गंजत आहेत. चार वर्षांपूर्वी केलेल्या कामांची लाखोंची बिले घेतली. मात्र प्रत्यक्षात काय कामे केली त्याची चौकशी करण्याची गरज आहे.

राजाराम बंधाऱ्यावरील पुलाची टेंडर प्रक्रिया पूर्ण झाली आहे. पुण्यातील ठेकेदाराने टेंडर भरल्याचे समजते. अधिवेशनानंतर मी या कामाचा आढावा घेणार आहे. ह्या पुलासाठी दोन वर्षे पाठपुरावा करून मागणीपत्रापासून नाबार्डची मंजुरी मिळवण्यापर्यंत सर्व पूर्तता केली आहे. सार्वजनिक बांधकाम विभागातील अधिकारी सोडले तर मला कोणत्याही राजकीय व्यक्तींचे सहकार्य मिळाले नाही. ठेकेदाराला लवकरात लवकर पूल पूर्ण करून घेण्याची सूचना करणार आहे.

आमदार राजेश क्षीरसागर

राजाराम बंधाऱ्यावर पूल व्हायलाच पाहिजे. अनेक वर्षे या प्रश्नाकडे कुणी लक्ष दिलेले नाही. निदान यावर्षीतरी पूल पूर्ण करावा. हा पूल पूर्ण झाल्यानंतर या भागातील काही गावांचे शहरात येण्यासाठीचे अंदाजे ६ किमी अंतर कमी होईल. वडणगे, शिये, भुये, भुयेवाडी, जठारवाडी, निगवे आदी गावांना या पुलाचा फायदा होईल. श्रेयवादात न पडता सुरक्षेच्यादृष्टीने पुलाचे काम तातडीने मार्गी लागावे.

प्रदीप पाटील भुयेकर, भुये.

पर्यायी पूल गरजेचाच आहे. बरेच वर्षे हा प्रश्न प्रलंबित आहे. राजाराम कारखाना, एमआयडीसी तसेच हायवेला जाण्यासाठी हा जवळचा मार्ग आहे. बंधाऱ्यावर होणाऱ्या दुर्घटना रोखण्यासाठी, पर्यायी पूल होईपर्यंत बंधारा संरक्षित करण्यासाठी आमदार चंद्रदीप नरके आणि वडणगे ग्रामपंचायतीच्या माध्यमातून स्वतः पाठपुरवठा करणार आहे.

इंद्रजित पाटील, सदस्य,करवीर पंचायत समिती

या ठिकाणी नवीन पूल झाल्यास शिवाजी पुलावरील वाहतुकीचा ताण कमी होईल. दिवाळीनंतर साखर कारखाने सुरू झाले की या रस्त्यावरून ऊसगाड्या तसेच अन्य वाहनांची वर्दळ सुरू असते. बंधाऱ्याच्या दोन्ही बाजूच्या चढावामुळे बैलांना खूप त्रास होतो. शिवाय रस्ता खराब झाल्याने धोका जास्तच वाढला आहे.

ऋतिकाराजे संग्रामसिंह चव्हाण, निगवे दुमाला.

मोबाइल अॅप डाउनलोड करा आणि राहा अपडेट

वयोमर्यादेतून वैद्यकीय विद्यार्थ्यांची सुटका

March 31, 2017, 2:30 pm

≫ Next: ​ सेना आमदार पाटीलविरोधात पोलिसात तक्रार

≪ Previous: राजाराम बंधारा ठरतोय जीवघेणा

$

0

0

Maruti.Patil@timesgroup.com

Tweet :@ MarutipatilMT

कोल्हापूर : वैद्यकीय अभ्यासक्रमासाठी मेडीकल कौन्सिल ऑफ इंडिया व सीबीएससी बोर्डाने घातलेली वयोमर्यादेची अट सुप्रीम कोर्टाने रद्द केली. तसेच २५ वर्षे पूर्ण झालेल्या विद्यार्थ्यांचे राष्ट्रीय पात्रता प्रवेश परीक्षेसाठी (नीट) पाच एप्रिलपर्यंत अर्ज दाखल करुन घेण्याचे निर्देशही सीबीएससीला शुक्रवारी दिले. या निर्णयाचा देशातील लाखो विद्यार्थ्यांना फायदा होणार आहे.

वयोमर्यादेची अट घातल्यानंतर महाराष्ट्र टाइम्सने २३ फेब्रुवारी रोजी ‘मेडिकलला वयोमर्यादेचा कोलदांडा’ वृत्त देऊन विद्यार्थ्यांच्या प्रश्नाकडे लक्ष वेधले होते. एमबीबीएस, बीडीएस अभ्यासक्रमाबरोबरच बीएचएमएस, बीएएमएस, बीयूएमएस या अभ्यासक्रमासाठी नीट परीक्षा घेण्याचा अध्यादेश डिसेंबर २०१६ मध्ये काढण्यात आला होता. सर्वच अभ्यासक्रमांच्या प्रवेश परीक्षा सात मे रोजी होणार आहेत. मात्र अध्यादेशात ज्या विद्यार्थ्यांचे वय २५ वर्षे पूर्ण आहे, अशा विद्यार्थ्यांना प्रवेश परीक्षा देता येणार नसल्याचे स्पष्ट केले होते. त्यामुळे विद्यार्थ्यांत असंतोष निर्माण झाला होता. याविरोधात विद्यार्थ्यांनी ज्या-त्या राज्यातील हायकोर्टात याचिका दाखल केली होती. मात्र या याचिकांवर सुनावणी होण्यापूर्वीच एक फेब्रुवारी ते एक मार्चपर्यंत प्रवेश परीक्षा ऑनलाइन भरण्याची वेळ निश्चित केली होती. त्याची मुदतही संपली होती. त्यामुळे सुप्रीम कोर्टातील याचिकेवरील निर्णयाकडे विद्यार्थ्यांचे लक्ष लागले होते.

ऑनलाइन अर्ज दाखल करण्याच्या कालावधीत सुप्रीम कोर्टात सुनावणी झाली. पण, त्यावर निर्णय होऊ शकला नव्हता. अध्यादेशात राज्यातील सीइटी परीक्षा रद्द केली असली तरी शैक्षणिक अर्हता निश्चित करण्याचा अधिकार राज्य सरकारला दिला होता. याचा आधार घेऊन विद्यार्थ्यांच्यावतीने सुप्रीम कोर्टात बाजू मांडण्यात आली. त्यावर विद्यार्थ्यांचे हित लक्षात घेऊन कोर्टाने वयोमर्यादेची अट लागू करता येत नसल्याचे म्हटले आहे. तसेच २५ वर्षे पूर्ण झालेल्या विद्यार्थ्यांना पाच एप्रिलपर्यंत ऑनलाइन अर्ज करण्याची मुदत देण्याची सूचना मेडिकल कौन्सिल ऑफ इंडिया व सीबीएससी बोर्डाला दिले आहेत. विद्यार्थ्यांच्यावतीने सुभाषचंद्र रॉय यांनी सुप्रीम कोर्टात याचिका दाखल केली होती.

वयोमर्यादेची अट घालून विद्यार्थ्यांना शिक्षणापासून वंचित ठेवण्याचे षड्‍यंत्र होते. पण राज्याराज्यांत दाखल झालेल्या याचिका आणि सुप्रीम कोर्टातील याचिकेमुळे विद्यार्थ्यांना दिलासा मिळाला आहे. सुप्रीम कोर्टाच्या निर्णयाचा फायदा देशातील लाखो विद्यार्थ्यांना होणार आहे- अनिरुद्ध माने, परीक्षार्थी

मोबाइल अॅप डाउनलोड करा आणि राहा अपडेट