म. टा. प्रतिनिधी, कोल्हापूर
गल्ली बोळांमध्ये वसलेली जुनी वस्ती आणि रंकाळा तलावाशेजारील शेतीमध्ये तयार होत असलेले अपार्टमेंट व बंगले असा परिसर असलेल्या दुधाळी पॅव्हेलियन प्रभागातील बराचसा परिसर सखलामध्ये असल्याने विविध ठिकाणांहून वाहून येणारे सांडपाणी याच परिसरातील मोठा नाला व गटारीतून वाहत असल्याने त्याच्या देखभालीचे मोठे आव्हान आहे. बऱ्याच वर्षानंतर त्यांच्या दुरुस्तीच्या कामांना आता सुरुवात झाली आहे. तसेच रस्त्यांची दुरुस्ती गरजेची असून जुन्या असलेल्या ड्रेनेज लाइनचे नुतनीकरण आवश्यक आहे.
रंकाळ्यालगत असलेल्या प्रभागातून काँग्रेसचे प्रतापसिंह जाधव यांनी भाजपचे हेमंत कांदेकर यांचा पराभव केला. अतिशय दाट लोकवस्ती असलेल्या प्रभागामध्ये जुन्या वस्तीचे प्रमाण प्रचंड आहे. छोट्या गल्ली व बोळांची संख्या जास्त असून या अरुंद रस्ता, पॅसेजमध्ये जुन्या ड्रेनेज लाइन आहेत. दुधाळी मैदानामुळे प्रभागाला दुधाळी पॅव्हेलियन हे नाव देण्यात आले असून आंतरराष्ट्रीय खेळाडू निर्माण केलेली दुधाळी शूटींग रेंज, प्रसिद्ध धुण्याची चावी, विविध प्रकारची हॉस्पिटल्स, शाहू उद्यान, दुधाळी एसटीपी प्लँट भागात आहे.
या परिसरात फिरताना सर्वात जास्त आवश्यक वाटते ती रस्त्यांची दुरुस्ती. अनेक रस्त्यांवर कित्येक वर्षे डांबर पडलेले नाही, असे नागरिक सांगत आहेत. त्यामुळे त्यांची अवस्थाही त्याच प्रकारची आहेत. अनेक ठिकाणी वेगवेगळ्या कामासाठी करण्यात आलेल्या खोदाईच्या खुणा अजूनही ठिकठिकाणी पहायला मिळतात. त्यांच्यावर फारसे पॅचवर्क झालेले नाही. धुण्याच्या चावीजवळचा एका रस्त्याचे काम केले जात आहे. त्याच्याजवळच असलेल्या व जावळाच्या गणपती मंदिराकडे जाणाऱ्या रस्त्याचे काम आवश्यक आहे. दुधाळी परिसरातील तसेच उत्तरेश्वर भागातील अंतर्गत रस्त्यांचीही दुरुस्ती गरजेची आहे.
रस्त्यांबरोबर दुधाळी परिसरातून जात असलेल्या नाला व गटारीची देखभाल महत्वाची आहे. भागातून मोठा नाला गेला आहे. पावसामध्ये अनेक ठिकाणी पाणी तुंबण्याचे प्रकार नागरिकांना त्रासदायक ठरत होते. काही ठिकाणी अगदी उथळ तर दुधाळी मैदानाशेजारी अतिशय खोल आहे. सध्या शिवतारा हॉटेलजवळील नाला बंदिस्त करण्याचे काम सुरु आहे. तिथून पुढे दुधाळी मैदानाजवळील कोपऱ्यावर कित्येक वर्षापासून ढासळलेल्या भिंतीचे कामही महिनाभरापूर्वी सुरु करण्यात आले आहे. छोट्या गटारींची दुरुस्ती करण्याची गरज आहे. या प्रभागात रंकाळा चौपाटीपासून नागोजीराव पाटणकर हायस्कूलसमोरील प्रचंड वर्दळीचा रस्ता आहे. या परिसरात वाहतूक सुरळीत होण्याच्यादृष्टीने काही उपाययोजना आवश्यक आहेत. महापालिकेच्या मामा भोसले विद्यालयाची जुनी इमारत मोडकळीस आली आहे. मध्यवस्तीत असलेल्या या इमारतीची डागडुजी गरजेची आहे.
निवडून आल्यानंतर प्रभागातील ड्रेनेज, गटारींच्या कामांची गरज लक्षात घेऊन स्वखर्चाने क्रॉसड्रेन, गटारींचे नुतनीकरण, सिमेंट पाइप टाकून देण्याचे काम केले आहे. या परिसरातील धुण्याची चावी हा ऐतिहासिक ठेवा आहे. तो जपण्यासाठी २० लाख रुपयांचा निधी मंजूर केला असून तेथील फरशी, वीजेची व्यवस्थाही केली जाणार आहे. १७ वर्षानंतर ही धुण्याची चावी सुरु करण्यात आली आहे. याबरोबर परिसरातून वाहणाऱ्या संपुर्ण दुधाळी नाल्याचे नुतनीकरण करण्यासाठी ८० लाख रुपयांचा निधी मंजूर आहे. त्याअंतर्गत काही ठिकाणी मोठ्या पाइप टाकून नाला बंदिस्त करुन रस्ता प्रशस्त करण्यात आला आहे. तर दुधाळी मैदानाशेजारील पडलेल्या भिंतीचे काम सुरु आहे. विकास विद्यामंदिरसमोरील नाल्याची दुरुस्ती करण्यात आली आहे. दुधाळी पॅव्हेलियनच्या नुतनीकरणासाठी ३ कोटी रुपये मंजूर आहेत. त्याच्याही कामाला लवकर सुरुवात होईल. दुधाळी एसटीपीचे काम सुरु आहे. त्यातून भागात नवीन ड्रेनेज लाइन टाकण्यात येणार आहेत. सध्या नाला, गटारींचे, क्रॉसड्रेनचे काम सुरु असल्याने रस्त्याची कामे केलेली नाहीत. रंकाळावेश स्टँड ते उत्तरेश्वर नाका, हरि मंदिर टॉवर ते उत्तरेश्वर महादेव मंदिर, धुण्याच्या चावीचा रस्त्याची कामे मंजूर आहेत.
- प्रतापसिंह जाधव, नगरसेवक
पालकमंत्री चंद्रकांत पाटील यांच्या फंडातून काही कामे सुरु आहेत. धुण्याच्या चावीजवळून जावळाच्या मंदिराकडे जाणारा रस्ता करण्याची गरज आहे. मंत्री पाटील, पूर्वीच्या नगरसेवकांनी दिलेल्या तसेच आत्ताच्या नगरसेवकांनी आणलेल्या फंडातून भागात कामे सुरु आहेत. पण रस्त्यांची कामे प्राधान्याचे करण्याची गरज आहे. राजमाता मंडळ परिसरातील भागात जुन्या ड्रेनेज लाईन आहेत. त्यांचे नुतनीकरणही आवश्यक आहे. पूर्वीपासून ज्या पद्धतीने सफाई होत आली आहे, तशीच आताही सुरु आहे.
- हेमंत कांदेकर, प्रतिस्पर्धी उमेदवार
मोबाइल अॅप डाउनलोड करा आणि राहा अपडेट
