twitter:@satishgMT
कोल्हापूर : म्हैसाळ (ता. मिरज) आणि पिराचीवाडी (ता. कागल) येथे उघडकीस आलेल्या गर्भलिंग चाचणी व बेकायदेशीर गर्भपात यांसारखी संवेदनशील प्रकरणे उघडकीस आल्यानंतर सर्वच राजकीय पक्ष, महिला आघाड्यांनी त्याविषयी कोणतीच भूमिका घेतलेली नाही. काँग्रेस, राष्ट्रवादी, शिवसेना, भाजप या राजकीय पक्षांच्या महिला आघाड्यांमध्येही शांतताच आहे. एरवी कोणत्याही प्रश्नांवर आंदोलन करणाऱ्या आघाडीवर असणाऱ्या महिला आघाड्यांची महिलांबाबतच्या संवेदनशील प्रश्नांवरील अशी प्रतिक्रीया अस्वस्थ करणारी ठरले आहे.
स्थानिक स्वराज्य संस्थांमध्ये महिलांना ५० टक्के आरक्षण आहे. सरकारच्या आदेशानंतर सर्वच राजकीय पक्षांनी महिला नेतृत्व पुढे आणण्यासाठी पुढाकार घेतला असून महिला आघाड्या स्थापन केल्या आहेत. काँग्रेस, राष्ट्रवादी, भाजप, शिवसेना या राजकीय पक्षांच्या शहर व जिल्हा अशा दोन आघाड्या कार्यरत आहेत. महागाई, पाणी अशा प्रश्नांवरील आंदोलनात त्या पुढे असतात. कोल्हापुरातील टोल आंदोलनात सर्व राजकीय पक्षांच्या महिला कार्यकर्त्या पक्षभेद विसरून आंदोलनात आक्रमक झाल्या होत्या. अंबाबाई मंदिर गाभारा प्रवेशावेळी तर महिला आघाडीतील नेत्या, कार्यकर्त्यांनी थेट तृप्ती देसाई यांच्यावर हल्ला करण्याचा प्रयत्न केला होता.
शिवसेनेची महिला आघाडी आंदोलनात पुढाकार घेते. अगदी चारच दिवसांपूर्वी अमेरिकेतील भारतीयांवरील होणाऱ्या हल्ल्यांच्या निषेधार्थ महिला आघाडीच्या कार्यकर्त्या अमेरिकन राष्ट्रध्वजाची होळी करण्यासाठी पुढे होत्या. मात्र म्हैसाळ, पिराचीवाडी यांसारख्या गावांत गर्भातच कळ्या खुडल्या जात असताना त्यांना याचे सोरयसूतक नाही. आमदार, जिल्हाप्रमुखांच्या वादात महिला आघाडीची सूत्रे पुरुषच ठरवत असल्याने या गंभीर प्रश्नाबाबत महिला कार्यकर्त्या शांत आहेत. केंद्रात आणि राज्यात सत्तारुढ असलेल्या भाजप महिला आघाडीनेही या प्रश्नावर मौन स्वीकारले आहे. स्वतःच्या पक्षाची सत्ता असताना आंदोलन का करता असा ‘मंत्र्यां’नी प्रश्न विचारला तर उत्तर काय द्यायचे अशी व्दिधा अवस्था या पक्षातील महिला आघाडीची असावी.
महिला पंतप्रधान, महिला पक्षाध्यक्षा पदाचा वारसा सांगणाऱ्या काँग्रेसची महिला आघाडीही या प्रश्नांवर शांत आहे. पक्षाच्या केंद्र व राज्य पातळीवरुन जोपर्यंत आदेश येत नाही, तोपर्यंत आंदोलन अथवा निवेदन काढले जात नाही. पक्षशिस्तीच्या नावाखाली महिला आघाडीला ‘आवाज’ नसल्याने स्त्री भ्रूणहत्येसारख्या घटनांवर भाष्य करणे टाळले जाते. राष्ट्रवादी काँग्रेस पक्षाच्या खासदार सुप्रिया सुळे महिलांच्या प्रश्नांवर आवाज उठवतात. मात्र स्थानिक महिला आघाडीच्या सदस्यांना ‘कागल’चा आदेश नसल्याने त्या आंदोलन करू शकत नाहीत. कागल तालुक्यातील पिराचीवाडीत गर्भलिंग चाचणीचा प्रकार उघड होऊनही पक्षाची महिला आघाडी ‘देवीं’च्या दर्शनात गुंग आहे. महिल्या आघाड्यांचे नेतृत्व पुरूषांकडेच असल्याचे यातून अधोरेखित होते.
‘डाव्या’ कार्यकर्त्यांचा आवाज
स्वाभिमानी, जनसुराज्य, ताराराणी आघाडी पक्ष यांच्याकडूनही आंदोलन अथवा अन्य कोणतीच पावले उचलली जात नाहीत. डाव्या आघाडीच्या भाकप व माकप या दोन पक्षांच्या महिला कार्यकर्त्या पक्षाची ताकद कमी असूनही गर्भलिंग चाचणी व गर्भपात केंद्रांविरोधात आवाज उठवत आहेत. ज्योती भालकर या यापूर्वी थेट स्टींग ऑपरेशमध्ये सहभागी झाल्या होत्या . मात्र अन्य राजकीय पक्षांकडून संवेदनशील प्रश्न बेदखल करण्यात आला आहे.
मोबाइल अॅप डाउनलोड करा आणि राहा अपडेट
