सोलापूर झेडपीसाठी चुरशीने मतदान
पंढरपूर
सोलापूर जिल्हा परिषदेसाठी मंगळवारी ७० टक्के भरघोस मतदान झाले. या मतदानाचा फायदा पुन्हा एकदा सत्ताधारी काँग्रेस आणि राष्ट्रवादीला मिळणार असल्याचा अंदाज व्यक्त केला जात आहे.
प्रचाराच्या सुरुवातीपासून शिवसेना आणि भाजपात काडीमोड झाल्यानंतर विरोधक एकत्र येऊच शकले नाहीत. त्याचा फायदा अनेक ठिकाणी एकत्रित सामोऱ्या गेलेल्या काँग्रेस आणि राष्ट्रवादीला मिळाला आहे. माळशिरस, माढा, सांगोला, मंगळवेढा, बार्शी अशा अनेक भागांत राष्ट्रवादीला फायदा मिळाल्याचे मतदानावरून समोर येत आहे.
सकाळपासून मतदान केंद्रे ओस पडल्याने उमेदवारांच्या चिंता वाढू लागल्या होत्या, मात्र सकाळची शेतातली कामे उरकून दुपारी मतदार बाहेर पडले आणि भराभर मतदानाची टक्केवारी वाढू लागली. दुपारी साडेतीनपर्यंत हा टक्का ५० च्या पुढे गेल्यावर मात्र उमेदवार सुखावले. काही ठिकाणी मतदान यंत्राच्या बिघाडामुळे थोडावेळ गोंधळ दिसून आला. मतदानाच्या अखेरच्या टप्प्यात देखील अनेक मतदान केंद्रावर लांबच लांब रांगा लागल्याचे दिसून आले. सैनिकांबाबत वादग्रस्त विधान करणारे आमदार प्रशांत परिचारक यांनी पंढरपूर तालुक्यातील खर्डी येथे आपल्या मतदानाचा हक्क बजावला.
मंगळवेढ्यात मतदान यंत्रात बिघाड
मंगळवेढा तालुक्यातील खोमनाळ येथील मतदान केंद्रावरील मशीनमध्ये भाजप उमेदवारा समोरील बटन दाबताच दुसऱ्याच उमेदवारापुढील दिवा लागत असल्याचे निदर्शनास येताच येथील मतदान थांबविण्यात आले. निवडणूक निर्णय अधिकारी आणि निरीक्षक या दोघांनीही या केंद्राला भेट दिली. त्यांना संतप्त मतदारांच्या रोषाला सामोरे जावे लागले. मतदान यंत्र बदलून मतदानाची वेळ वाढवून देण्यात आली. पंढरपूर तालुक्यातील उपरी येथील यंत्र सकाळी बंद पडल्याने मतदारांना ताटकळत थांबावे लागले होते.
घड्याळावर लावला चुना
माळशिरस तालुक्यातील वेळापूर जिल्हा परिषदेच्या विझोरी केंद्रावर मतदान यंत्राशी छेडछाड झाली. अज्ञात मतदाराने सर्वच मशीनवरील राष्ट्रवादीच्या घड्याळ चिन्हावर चुना लावल्याने मतदारांना चिन्हच दिसत नव्हते. याची तक्रार राष्ट्रवादीचे नेते धैर्यशील मोहिते पाटील यांनी निवडणूक अधिकाऱ्याकडे केली. या बाबत गुन्हा दाखल करण्याची मागणी केली आहे.
राष्ट्रवादीचे तेरा कार्यकर्ते ताब्यात
माळशिरस तालुक्यातील वेळापूर जवळ मंगळवारी पहाटे पैसे आणि मतदारांच्या याद्या घेऊन जाणाऱ्या गाडीला पोलिसांनी ताब्यात घेतले. गाडीतून ६७१०० रुपये आणि मतदारयादी जप्त करण्यात आली. या प्रकरणी १३ जणांना ताब्यात घेतले असून, हे सर्व राष्ट्रवादीचे कार्यकर्ते असल्याचे सांगण्यात आले.
सोलापुरात दुपारनंतर
मतदानाला वेग
सोलापूर
सोलापूर महानगरपालिकेसाठी मंगळवारी चुरशीने मतदान झाले. पालिकेच्या १०२ जागांसाठी ६२३ उमेदवार निवडणुकीच्या रिंगणात आहेत. भाजप, शिवसेना, काँग्रेस, राष्ट्रवादी, माकप, एमआयएम, बसपासह छोटे-मोठे पक्ष आणि अपक्ष उमेदवार निवडणुकीच्या रिंगणात उभे आहेत.रविवार १९ फेब्रुवारी रोजी प्रचाराचा धुराळा संपल्यानंतर सोमवारी कोणताही प्रचार न करता उमेदवारांनी मतदारांच्या घरोघरी जाऊन भेटीगाठी घेतल्या. रात्री अनेकांना लक्ष्मी दर्शनही झाल्याचे सांगण्यात आले. मंगळवारचा मतदानाचा दिवस उजाडला. उमेदवारांनी सकाळी लवकर उठून कुलदैवताचे दर्शन घेतले आणि घराबाहेर पडले. आपापल्या भागातील मतदान केंद्रांवर चौघांनी एकत्र जाऊन भेटी दिल्या. प्रभागाचा परिसर लांबच लांब असल्याने आणि एकत्र फिरणे शक्य नसल्याने उमेदवारांनी भाग वाटून घेतला. सकाळी दमानी नगर, देगाव, निराळे वस्ती, कल्पना टॉकीज, पत्रा तालीम, मंगळवेढा तालीम यासह बापूजी नगर, लोधी गल्ली, शास्त्री नगर, नई जिंदगी, कुमठा नाका, विमानतळ या भागात फेरफटका मारला असता मतदान केंद्रांवर मतदारांच्या मोठ्या प्रमाणावर रांगा दिसून आल्या. उमेदवार प्रत्येक मतदान केंद्रांवर फिरताना दिसून येत होते. एमआयएमचे उमेदवार तौफिक शेख आणि राष्ट्रवादीचे उमेदवार माजी उपमहापौर हारुन सैय्यद यांच्यात दोन दिवसांपूर्वी तुंबळ हाणामारी झाल्यानंतर मातदानादिवशी कोणताही अनुचित प्रकार घडू नये म्हणून नई जिंदगी अमन चौकात कडेकोट पोलिस बंदोबस्त ठेवण्यात आला होता. नई जिंदगीमध्ये एमआयएम आणि राष्ट्रवादी यांच्यात तसेच काही ठिकाणी शिवसेना आणि काँग्रेसमध्ये काट्याची लढत होत असल्याने या भागात प्रत्येक केंद्रांवर मतदारांच्या रांगा लागल्या होत्या. हा भाग मुस्लिम बहुल असल्याने पुरुषांबरोबर महिलाही मतदानासाठी बाहेर पडल्या होत्या. या परिसरात प्रमुख रस्ते आणि गल्लोगल्ली कार्यकर्ते टेबल टाकून मतदारांना माहिती देण्यासाठी बसले होते. पोलिसांची गाडी फिरत असल्याने कोणीही गोंधळ करण्याचे धाडस दाखवले नाही. पोलिसांनी या भागाला वेढाच टाकला होता. बापूजी नगर हा कामगारवर्गाचा भाग असला तरी सुद्धा विडी कामगार महिलांनी मतदानासाठी गर्दी केली होती. लोधी गल्ली परिसरातील एक मतदान केंद्र भर रस्त्यावरच असल्याने मतदारांची रांगही रस्त्यावर आली होती. कायम हा भाग वर्दळीचा असल्याने आणि त्यातच मतदान असल्याने परिसर गर्दीने अधिकच फुलून गेला होता. कार्यकर्त्यांचे जथेच्या जथे रस्त्यावर गर्दीने उभे होते. संवेदनशील भाग म्हणून घोषित केलेल्या प्रभाग क्रमांक सात पत्रा तालीम आणि मंगळवेढा तालीम परिसरात जणू अघोषित संचारबंदीच लागू असल्याचे चित्र होते. या भागातील मतदान केंद्रांवर शांततेत मतदान सुरू होते. या शिवाय याच प्रभागातील निराळे वस्ती परिसरातील शरदचंद्र पवार प्रशाला येथे असलेल्या एकूण आठ मतदान केंद्रावर मतदानासाठी रांगा लागल्या होत्या. उमेदवार नगरसेवक मनोहर सपाटे, नगरसेवक देवेंद्र कोठे, अमोल शिंदे, पद्माकर काळे यांच्यासह त्यांचे कार्यकर्ते गटागटाने मतदान केंद्राबाहेर थांबून मतदारांना आवाहन करताना दिसून आले. सकाळपासून या मतदान केंद्रावर गर्दी दिसून आली. अश्विनी रुग्णालयाजवळील मतदान केंद्राबाहेर मैदानात गर्दी दिसून आली. या ठिकाणी मतदार कमी आणि कार्यकर्ते जास्त अशी परिस्थिती दिसून आली. शिवसेना नगरसेवक म्हेत्रे यांच्या घराजवळील मतदान केंद्रावर प्रथम मतदानासाठी आलेल्या तरुणींमध्ये उत्साह दिसून आला. सोशल हायस्कूलमधील मतदान केंद्रावर मतदानासाठी उशीर लागत असल्याने महिलांना बसण्यासाठी बाकडे टाकण्यात आले होते. एकूणच शहराच्या काही भागात सकाळच्या सत्रात मतदानासाठी रांगा, दुपारी संथ तर शेवटच्या सत्रात मतदानासाठी जोर आल्याचे दिसून आले.महापौरांना हटकलेमहापौर प्रा. सुशीला आबुटे आयटीआय मतदान केंद्राच्या परिसरात सातत्याने फिरत होत्या. त्यामुळे पोलिस निरीक्षक अंकुशराव यांनी त्यांना हटकले. आपण केंद्राच्या परिसरात न फिरता बाहेर जावे, असे पोलिसांनी त्यांना सांगताच महापौर बाहेर पडल्या. याच केंद्रांवर सकाळची माजी केंद्रीयमंत्री सुशीलकुमार शिंदे आणि कुटुंबियांनी मतदानाचा हक्क बजावला होता.वृद्धांमध्ये मतदानासाठी उत्साहमतदानासाठी ज्येष्ठ आणि वृद्ध मंडळींनी हिरीरीने सहभाग नोदविला. नई जिंदगी, अश्विनी रुग्णालय परिसरासह अन्य ठिकाणी ही मंडळी आपली मुले, नातवांसमवेत रिक्षामधून, दुचाकीवरून आली होती. एका अपंग मतदाराने व्हिल-चेअरचा आधार घेऊन मतदानाचा हक्क बजावला. कोणी काटी टेकत, कोणी दुचाकीवर तर कोणी आपल्या नातेवाईकांसमवेत मतदानासाठी आले. सकाळच्या सत्रात ज्येष्ठ आणि वृद्ध मंडळी मतदानासाठी बाहेर पडली. परंतु, तरुणाई मतदानासाठी फारशी दिसून आली नाही.मतदान करताना तारेवरची करावी लागली कसरतमतदान प्रक्रिया सुरू झाल्यानंतर काही जणांनी मतदान करण्यासाठी केंद्र गाठले खरे परंतु, मतदान यंत्रासमोर गेल्यानंतर अनेकांची अडचण होऊन बसली. मतदान यंत्रावरील बटन दाबले असतानाही आवाज येत नसल्याने मतदार गोंधळून गेल्याचे दिसून आले. अखेर केंद्रातील अधिकाऱ्यांना लांबून मदत करावी लागली. ज्यांना उमेदवारांचे नाव वाचता आले नाही त्यांनी तर दिसेल त्या बटनावर बोट दाबून मतदान केल्याचे समाधान मानले. काही मतदान केंद्रांवर चार तर काही मतदान केंद्रांवर तीन मशीन ठेवण्यात आल्या होत्या. त्यामुळे मतदार गोंधळल्याचे दिसून आले त्यामुळे क्रॉस मतदानाची भिती व्यक्त करण्यात येत आहे.दिग्गजांनी केले रांगेतून मतदानमाजी केंद्रीय मंत्री सुशीलकुमार शिंदे, पत्नी उज्वलाताई शिंदे, कन्या आमदार प्रणिती शिंदे यांनी आयटीआय केंद्रावर, पालकमंत्री विजयकुमार देशमुख यांनी आई, मुलगा उमेदवार डॉ. किरण देशमुख आणि सुनबाई यांच्यासमवेत नुमवी प्रशाला येथे मतदानाचा हक्क बजावला. सहकारमंत्री सुभाष देशमुख यांनी पत्नी स्मिता यांच्यासह लिटिल फ्लॉवर हायस्कूल, माजी आमदार नरसय्या आडम यांनी बापूजी नगर येथे पत्नी कामिनी, कन्या आणि चिरंजीवासह मतदानाचा हक्क बजावला. या शिवाय महापौर सुशीला आबूटे यांनीही मतदानाचा हक्क बजावून प्रभागात फेरी मारली. एकूणच दुपारपर्यंत शांततेत मतदान पार पडले.मतदान केंद्रातवृद्धाचा मृत्यूसोलापूर :सोलापूर महानगरपालिकेसाठी मतदान करण्यासाठी मतदान कक्षाकडे जाताना पार्टेक फरशीवरून घसरून पडल्याने गंगाधर आण्णाराव शेटे (वय ७५) यांचे निधन झाले. ही घटना मंगळवारी दुपारी ग. ल. कुलकर्णी शाळेतील मतदान केंद्रात घडली.गंगाधर शेटे सिध्देश्वर यात्रेचे प्रमुख मानकरी होते. मुलासमवेत ते मतदान करण्यासाठी गेले असता ही दुर्घटना घडली. खाली पडल्यानंतर शेटे यांना तातडीने पोलिसांच्या मदतीने अॅम्ब्युलन्समधून हॉस्पिटलमध्ये नेण्यात आले, डॉक्टरांनी त्यांचा मृत्यू झाल्याचे सांगितले.भाजप उमेदवाराला चोपप्रभाग क्रमांक २५ येथे भाजपचे उमेदवार सुभाष शेजवाल यांना स्लिप वाटप करताना पोलिसांनी लाठीचा प्रसाद दिला. या घटनेमुळे काही काळ तणाव निर्माण झाला होता, मात्र काहीकाळानंतर तो निवळला.
मोबाइल अॅप डाउनलोड करा आणि राहा अपडेट
