Twitter - @rg_ravirajMT
दुपारच्या जेवणाचा डबा घरातून न्यायचा. केएमटी बसने कागल एमआयडीसी गाठायची. सकाळी आठ वाजता तेथील घाटगे-पाटील इंडस्ट्रीजमध्ये पोहचायचे. दिवसभर काम करायचे आणि चार वाजता बाहेर पडायचे. संध्याकाळी पाच वाजेपर्यंत गव्हर्न्मेंट पॉलिटेक्निकमधील धातूतंत्र प्रबोधिनीच्या कॉलेजमध्ये पोहचायचे. तेथे पाच ते नऊ कॉलेज करायचे आणि रात्री नऊनंतर घरी जायचे. हा दिनक्रम एखाद्या कामगाराचा नाही. तर फाउंड्रीतील कामाचे प्रशिक्षण घेत काम करणाऱ्या मुलींचा आहे. सध्या राजारामपुरी परिसरातील सहा मुली पुरुषांचेच क्षेत्र समजल्या जाणाऱ्या फाउंड्रीत काम करून स्वतःच्याच नव्हे, तर तमाम स्त्रीयांची पोलादी क्षमता सिद्ध करत आहेत.
धनश्री श्रीपती माने, संध्या शिवाजी घुणकीकर, शीतल मारुती चौगुले, ऐश्वर्या सुरेश कुंभार, शिवानी सुरेश नलवडे, बेबी राजेंद्र टकले या मुलींनी करिअरची नवी वाट धुंडाळली आहे. प्रबोधिनीतील कास्टिंग डेव्हलपमेंट अँड क्वालिटी अश्युअरन्स या तीन वर्षांच्या अभ्यासक्रमासाठी त्यांनी प्रवेश घेतला आहे. अभ्यासक्रमाचे वर्ष पूर्ण केल्यानंतर पाच मुलींना कागलमधील घाटगे-पाटील इंडस्ट्रीजमध्ये सीएसआर उपक्रमातून नोकरी मिळाली. एआयसीटीकडून स्किल नॉलेज प्रोव्हायडर म्हणून मान्यता मिळालेली कंपनी मुलींना महिन्याला सहा हजार मानधन देते. त्याचबरोबर त्यांच्या तीन वर्षांच्या कोर्सची फीची जबाबदारीही कंपनीनेच उचलली आहे.
काम करण्याला घरच्यांनी किंवा इतर नातेवाईकांनी विरोध केला नाही का? या प्रश्नावर मुली म्हणाल्या, ‘सुरुवातीला घरच्यांचा विरोध होता. पण, मेकॅनिकल डिपार्टमेंटचे दत्ता सुतार यांनी व प्रबोधिनीचे मुख्य समन्वयक एस. एम. मांडरे यांनी घरच्यांची भेट घेऊन त्यांना समजावल्यानंतर घरचेही तयार झाले. आज घरीच नव्हे, तर आमच्या शेजाऱ्यांकडूनही आम्हाला वेगळा सन्मान मिळतो आहे.’ काहीतरी वेगळे करण्याच्या उद्देशानेच हे क्षेत्र निवडल्याचे या मुली सांगतात. जिल्ह्यात जवळपास २८० फाउंड्री आहेत. त्यात काम करणाऱ्या या मुलींची संख्या प्रातिनिधीक असली तरी इतर मुली आणि महिलांना प्रोत्साहन देणारी नक्कीच आहे.
‘कुठेही काम करू शकतो’
कारखान्यामध्ये इतर विभागांत महिला आहेत. पण, कोअर मशिन ऑपरेट करणाऱ्या या चौघीच आहेत. त्यात चार मशिन चौघीजणी स्वतंत्रपणे हाताळतात. मशिनसाठी लागणारे दहा ते चौदा किलोचे कोअर उचलले कष्टाचे असते. आता त्याचे काही वाटत नाही, असे या मुली आत्मविश्वासाने सांगतात. कोअर मशीनबरोबरच मेल्टिंग पॉइंट, मोल्डिंग, असेंब्लीचे कामही मुलींनी शिकून घेतले आहे. यातील कोणत्याही विभागात सक्षमपणे काम करू शकतो, असा विश्वास त्या व्यक्त करतात.
===
सीएसआरच्या माध्यमातून आम्ही मुलींची जबाबदारी उचलली आहे. कंपनी आउट ऑफ वे जाऊन मुलींना सहकार्य करते. चारपैकी एका युनिटमध्ये केवळ महिलांनी काम करावे, असे आमच्या कंपनीचे स्वप्न आहे.
- गिरीष श्रीखंडे, एचआर विभागप्रमुख घाटगे-पाटील इंडस्ट्रीज
===
या मुलींना दहावीत ७० टक्के गुण आहेत. या मुली मात्र खूप सीन्सिअर आहेत. त्यांची प्रगती खूप चांगली आहे. यातील एका मुलीने कंपनीत चांगल्या अटेंडन्ससाठी बक्षीसही मिळवले आहे.
एस. एम. मांडरे, मुख्य समन्वयक, धातूतंत्र प्रबोधिनी
मोबाइल अॅप डाउनलोड करा आणि राहा अपडेट