कोल्हापूर
जिल्ह्यातील महायुतीची घोडदौड रोखण्यासाठी जिल्हा परिषद निवडणुकीत निवडणूक जाहीर होण्यापूर्वीच काही मतदासंघांत काँग्रेसबरोबर आघाडी करण्याचे संकेत राष्ट्रवादीच्या नेत्यांनी दिले आहेत. ताकद असूनही काही कारणांमुळे नगरपालिका निवडणुकीत राष्ट्रवादीला दणका बसल्याच्या पार्श्वभूमीवर या हालचाली सुरू झाल्या आहेत. पालिकेतील अपयशाने राष्ट्रवादीचे नेते अस्वस्थ झाले असून जिल्हा परिषद निवडणुकीत चुका टाळण्यासाठी आतापासूनच व्यूहरचना आखण्यात येत आहे.
जिल्ह्यात दोन्ही काँग्रसची चांगली ताकद आहे. जिल्हा बँक, महापालिका, बाजार समिती या सारख्या महत्वाच्या संस्था या पक्षाच्या ताब्यात आहेत. त्यामुळे पालिका निवडणुकीत याच पक्षाला रोखण्यासाठी भाजपने तयारी केली. त्यासाठी या पक्षातील अनेक स्थानिक नेत्यांनी आपल्या पक्षात घेतले. जनसुराज्य पक्षाला आपल्या तंबूत घेतले. आमदार हसन मुश्रीफ यांना कागलमध्येच रोखण्यासाठी समरजितसिंह घाटगे यांना ताकद दिली. शिवसेनेचे सह संपर्कप्रमुख प्रा. संजय मंडलिक हे भाजपबरोबर रहावेत यासाठी शेवटच्या क्षणापर्यंत प्रयत्न केले. त्याला काही प्रमाणात यश आले. मलकापुरात काँग्रेसने भाजपला मदत करावी अशी परिस्थिती निर्माण केली. या पार्श्वभूमीवर राष्ट्रवादीचे नेते अधिक सक्रीय होतील अशी शक्यता होती, मात्र तसे न झाल्याने या पक्षाला गडहिंग्लज, कागल, मुरगूड, जयसिंगपूर, मलकापूर, कुरूंदवाड अशा अनेक ठिकाणी दणका बसला. केवळ पेठवडगावला या पक्षाला अतिशय चांगले यश मिळाले.
सर्व पालिकांत राष्ट्रवादीची ताकद असतानाही या पक्षाची वाताहत झाली. यामुळे आगामी जिल्हा परिषद निवडणुकीत ही परिस्थिती निर्माण होऊ नये यासाठी पक्षाचे नेते सक्रीय झाले आहेत. भाजपने ज्या पध्दतीने स्वाभिमानी, शिवसेना,जनसुराज्य या पक्षाची मदत घेतली. त्याच पध्दतीने मित्रपक्षाची मदत घेण्याचे नियोजन राष्ट्रवादीने सुरू केले आहे. त्याचाच एक भाग म्हणून काही मतदारसंघात काँग्रेसबरोबर आघाडी करण्यात येणार आहे. तसे संकेत आमदार मुश्रीफ यांनी दिले आहेत. नगरपालिका निवडणुकीत पाच वर्षापूर्वी राष्ट्रवादीने दणदणीत यश मिळवले होते, पेठवडगाव वगळता यावेळी सर्वच पालिकेत या पक्षाची पिछेहाट झाली आहे, त्यामुळेच हा निर्णय घेतला जाण्याची शक्यता आहे.
…………
राष्ट्रवादीची स्थिती
नगरपालिका २०११ २०१६
इचलकरंजी ११ ७
वडगाव ४ १३
गडहिंग्लज ८ ४
कागल १० ९
मुरगूड १० १
कुरूंदवाड ८ ५
जयसिंगपूर २१ १३
...
कोट
‘निवडणुकीच्या तोंडावर पक्षाच्या काही स्थानिक नेत्यांनी व कार्यकर्त्यांनी पक्षाची फसवणूक केली, ही फसवणूक महागात पडली. गडहिंग्लज, कुरूंदवाड येथे याचा फार मोठा फटका बसला. कागलला यश मिळाले असले तरी ते समाधानकारक नाही. यामुळे आगामी जिल्हा परिषद व पंचायत समितीच्या निवडणुकीच्या पार्श्वभूमीवर कार्यकर्त्याना विश्वासात घेऊन चांगली जोडणी केली जाईल.
ए.वाय. पाटील, जिल्हाध्यक्ष
............
‘सत्तेचा वापर करत भाजपने काही ठिकाणी आमिषे दाखवल्याने अनेकजण या पक्षात गेले. पण अशाने पक्ष वाढत नाही. ही सूज आहे. जिल्हा परिषद निवडणुकीत ही सूज नक्की उतरेल. कारण ग्रामीण भागात दोन्ही काँग्रेस बळकट आहेत. जेथे आमची ताकद आहे, तेथे स्वबळावर लढू आणि ताकद कमी असलेल्या ठिकाणी काँग्रेस अथवा मित्र पक्षांबरोबर आघाडी करू.
हसन मुश्रीफ, आमदार
.........
चौकट
नेत्यांचे दुर्लक्षच पक्षाला भोवले
जिल्ह्यात राष्ट्रवादीचा एक खासदार, दोन आमदार आहेत. जिल्हा बँक, महापालिका याशिवाय पाच ते सहा साखर कारखाने ताब्यात आहेत. सात पालिका या पक्षाच्या ताब्यात होत्या, त्यामुळे जिल्ह्यात हा पक्ष बळकट असल्यानेच पालिका निवडणुकीत या पक्षाकडून कार्यकर्त्यांना होत्या. पण खासदार धनंजय महाडिक, माजी खासदार निवेदिता माने, आमदार संध्यादेवी कुपेकर, जिल्हाध्यक्ष ए.वाय. पाटील यांच्यासह अनेकांनी या निवडणुकीत म्हणावे तेवढे लक्ष दिले नाही. यातील बहुतेकजण आमदार मुश्रीफ यांच्या कारभारावर नाराज आहेत. ही नाराजी त्यांनी या निवडणुकीत दाखवून दिली,पण त्याचा फटका पक्षाला बसला. यामुळे जिल्हा परिषद निवडणुकीत ही नाराजी दूर करण्याचे आव्हान मुश्रीफांसमोर आहे.
मोबाइल अॅप डाउनलोड करा आणि राहा अपडेट
