सातारा सार्वजनिक न्यास नोंदणी कार्यालयाच्या अधीक्षकांनी डॉ. नरेंद्र दाभोलकर यांच्या अंधश्रद्धा निर्मूलन समितीच्या (अंनिस) आर्थिक व्यवहारावर चौकशी अहवालात गंभीर ताशेरे ओढले आहेत. ट्रस्टमधील घोटाळे पाहता त्याचे विशेष लेखा परिक्षण करावे. ट्रस्टमध्ये आर्थिक गैरव्यवहार झाला असल्याने ‘अंनिस’वर प्रशासक नेमावा, अशी मागणी सनातन संस्थेचे प्रवक्ते अभय वर्तक यांनी गुरुवारी पत्रकार परिषदेत केली.
अभय वर्तक म्हणाले, ‘अंनिस’च्या आर्थिक व्यवहाराबाबत अनेक जणांनी तक्रारी केल्या आहेत. सहायक धर्मादाय आयुक्त कार्यालयाने ट्रस्टच्या कामांमध्ये अनेक त्रुटी दाखवल्या. सभेच्या इतिवृत्तात काही ठिकाणी खाडाखोड केली आहे. विलंब शुल्क आकारून हिशोबपत्रके स्वीकारण्यात आली आहेत. हिशोबपत्रे नियमित सादर कलेली नाहीत. संस्थेचा उद्देश मिश्र स्वरूपाचा असताना हिशोब तपासणीने संस्थेचा उद्देश शैक्षणिक दाखवला आहे. संस्थेने ठेवी, कायम ठेवी, म्युच्युअल फंड, शेअर्समध्ये कोट्यवधींची गुंतवणूक केली आहे. संस्थेला मोठ्या प्रमाणात परदेशी देणग्या मिळाल्या आहेत. परदेशातून आलेल्या देणग्यांच्या जमा पावत्या तपासल्या असता, त्यांवर एफसीआरए नोंदणी क्रमांक नाही. संस्थेच्या विश्वस्तांनी मोठ्या प्रमाणावर मानधन व अन्य संस्थांना देणग्यांचे वाटप केले आहे. महाराष्ट्र फाउंडेशन इंडिया (अमेरिका) या संस्थेने दाभोलकरांना १० लाख रुपये रक्कम दिली होती. मात्र २००६ च्या ऑडीट रिपोर्टमध्ये व किर्द खतावणीमध्ये ही रक्कम नोंदवलेली नाही.’
संस्थेच्या आर्थिक व्यवहारात त्रुटी आढळत असल्याने आर्थिक व्यवहारांची चौकशी करून संस्थेवर प्रशासक नेमावा अशी मागणी वर्तक यांनी केली. संस्थेच्या विश्वस्तांची चौकशी करून दाभोलकर यांची हत्या आर्थिक कारणावरून झाली आहे का याचीही चौकशी करावी, अशी मागणी त्यांनी केली.
वर्तक यांना विचारणार होते जाब
एका वृत्तवाहिनीवर अभय वर्तक यांनी ‘मुंबईत मराठा महिला पोलिसांवर मुस्लिमांनी अत्याचार केले’ असे वक्तव्य केले होते. या वक्तव्याचा जाब विचारण्यासाठी मराठा मोर्चातील मराठा व मुस्लिम समाजाचे कार्यकर्ते शाहू स्मारक भवन परिसरात येणार होते. मात्र पोलिसांनी वेळीच धाव घेत शाहू स्मारक भवन परिसरात कडक बंदोबस्त ठेवला. त्यामुळे कार्यकर्ते परिसरातून निघून गेले. पत्रकार परिषद संपल्यावरही वर्तक यांना कडक पोलिस बंदोबस्तात बाहेर नेण्यात आले.
मोबाइल अॅप डाउनलोड करा आणि राहा अपडेट
