Tweet:@anuradhakadamMt
कोल्हापूर : हौशी रंगकर्मींमधील अभिनय, लेखन, दिग्दर्शन, रंगभूषा, वेशभूषा या कलाविष्काराला मुक्त रंगमंच देणाऱ्या राज्यनाट्य स्पर्धेत गेल्या दोन दशकांहूनही अधिक काळापासून नाटकं गाजवणाऱ्या जुन्या नाट्यसंस्थांपैकी महत्त्वाच्या संस्था यावर्षी राज्यनाट्य स्पर्धेत नसतील. प्रायोगिक रंगभूमीबरोबरच राज्य नाट्य स्पर्धा गाजवणाऱ्या संस्था प्रथमच रंगमंचाबाहेर गेल्याने चर्चा रंगल्या आहेत.
‘प्रत्यय’ म्हटलं की राज्यनाट्य स्पर्धेत हमखास बक्षीस घेणारच...अभिरूची नाट्यसंस्था राज्यनाट्यच्या मंचावर कोणतं नाटक करणार ही उत्सुकता प्रत्येकाच्या मनात...देवलक्लबचा संच राज्यनाट्यसाठी कोणता वेगळा प्रयोग करणार हे जाणून घेण्यासाठी रसिकांचे लक्ष लागून असणारच तर प्रतिज्ञा, हनुमान या नाट्यसंस्थांची तयारी कोणत्या संहितेवर सुरू आहे ही जिज्ञासा रसिकांना स्वस्थ बसू देणार नाही. दरवर्षी राज्यनाट्य स्पर्धेचे बिगुल वाजले की कोल्हापुरातील या काही जुन्या आणि अनुभवी नाट्यसंस्थांच्या सादरीकरणाच्या चर्चेनेच राज्यनाट्यचे वातावरण तयार व्हायचे. १५ दिवसांवर आलेल्या राज्यनाट्य स्पर्धेच्या पार्श्वभूमीवर यंदा मात्र कोल्हापुरातील जुन्याजाणत्या प्रायोगिक नाट्यसंस्थांनी राज्यनाट्य स्पर्धेत आपला सहभागच नोंदवलेला नाही.
गेल्या अनेक वर्षापासून राज्यनाट्य स्पर्धेत अभिरूची नाट्यसंस्था सहभाग देते. गेल्यावर्षी बऱ्याच कालावधीनंतर ‘बळी’ नाटक केलं. मात्र सध्या काही राष्ट्रीय पातळीवरील प्रकल्पांमध्ये अभिरुची संस्थेचा सहभाग देण्याचा संकल्प आहे. त्याकडे लक्ष केंद्रीत करता यावे म्हणून यावर्षी राज्यनाट्यच्या मंचापासून दूर राहिलो आहे.
प्रसाद जमदग्नी, अध्यक्ष, अभिरुची नाट्यसंस्था
योगायोग
गायन समाज देवलक्लब, अभिरुची, प्रत्यय आणि हनुमान या अनुभवी नाट्यसंस्था यावर्षी राज्यनाट्य स्पर्धेतून बाहेर असल्या तरी हा निव्वळ योगायोग आहे. प्रत्येक संस्थेच्या काही व्यक्त‌िगत प्रकल्प व वेगळ्या प्रयोगांवर काम सुरू असल्यामुळे या संस्था राज्यनाट्य स्पर्धेत उतरल्या नाहीत हे खरे आहे. त्याबाबत या चारही संस्थांच्या सदस्यांमध्ये चर्चाही झालेली नाही.
सात नोव्हेंबरपासून स्पर्धेला सुरुवात
महाराष्ट्र राज्य सांस्कृतिक कार्य संचलनालयाच्या ५६ व्या राज्य नाट्य स्पर्धेच्या कोल्हापूर येथील केंद्रावरील प्राथमिक फेरीला सात नोव्हेंबरपासून सुरुवात होणार आहे. ३० नोव्हेंबरपर्यंत चालणाऱ्या या राज्यनाट्यच्या मंचावर एकूण २१ नाट्यप्रयोग पाहण्याची पर्वणी रसिकांना मिळणार आहे. कोतोली, भुयेवाडी येथील संघ यंदा पहिल्यांदाच स्पर्धेत उतरणार आहेत. दरम्यान, राज्यभरातील सर्व केंद्रावर सायंकाळी सात वाजता प्रयोग होतात. याच धर्तीवर येथील केंद्रावरही यंदा सात वाजता प्रयोगांना प्रारंभ होणार आहे.
स्पर्धेचे वेळापत्रक असे
७ नोव्हेंबर: अखिल भारतीय मराठी नाट्य परिषद शाखा, बेळगाव (नाटक- नेकी)
८ नोव्हेंबर: भालजी पेंढारकर सांस्कृतिक केंद्र, कोल्हापूर (बे दुणे साडे तीन)
९ नोव्हेबर: हृदयस्पर्श हौशी सांस्कृतिक व्यासपीठ, कोल्हापूर (लव्ह इथले भयकारी, अंधार किंवा अग्निदिव्य)
१०नोव्हेंबर: जय हिंद कला, क्रीडा युवक मंडळ, इचलकरंजी (प्रयाणपार)
११ नोव्हेंबर: जीवनक्रांती बहुउद्देशीय संस्था, कोतोली (अंतयात्रा)
१२ नोव्हेंबर: कुंभीकासारी बहुउद्देशीय संस्था, कोतोली (आशा नाम मनुष्यनाम)
१३ नोव्हेंबर: नाट्यशुभांगी संस्था, जयसिंगपूर (सलवा जुलूम)
१४ नोव्हेंबर: नवनाट्य मंडळ, आजरा (सहेर)
१५नोव्हेंबर: पदन्यास कला अकादमी, इचलकरंजी (माकड)
१६नोव्हेंबर- परिवर्तन कला फाउंडेशन (आनिगॉन)
१७नोव्हेंबर- फिनिक्‍स क्रिएशन्स (खेळीमेळी)
१८नोव्हेंबर- प्रज्ञान कला अकादमी-वारणानगर (पुज्य गुरुजी)
१९ नोव्हेंबर- रंगयात्रा नाट्यसंस्था, इचलकरंजी (सलवा जुलूम)
२०नोव्हेंबर- रसिक कलामंच (ऍन इनेमी ऑफ द पीपल)
२१ नोव्हेंबर- रूद्रांश ऍकॅडमी (पुन:श्च हनीमून)
२२नोव्हेंबर- सुगुण नाट्य संस्था (दुसरा मृत्यू किंवा शांतता कोर्ट चालू आहे)
२३नोव्हेंबर- शिवम नाट्य संस्था (अनवाँटेड)
२४नोव्हेंबर- सुगंध रंगकर्मी (घोटाळा झाला)
२८नोव्हेंबर- टीएफटी युनीट (खात्मा)
२९नोव्हेंबर- वंदे मातरम्‌ नाट्य संस्था,भुयेवाडी (अंगार अर्थात डोंगरचा राजा)
३० नोव्हेंबर- वरेरकर नाट्य संघ,बेळगाव (वास्तव-अवास्तव)
मोबाइल अॅप डाउनलोड करा आणि राहा अपडेट
