सार्वजनिक गणेश उत्सवामध्ये पोलिस प्रशासनाने केलेले डॉल्बीमुक्तीचे आवाहन धुडकावून लावत डॉल्बी लावणाऱ्या १६ मंडळांवर पोलिसांनी कारवाईचा बडगा उगारला आहे. कडक कारवाईसाठी पोलिसांचे प्रयत्न सुरू असल्याने या कारवाईतून सूट मिळवण्यासाठी मंडळांनी लोकप्रतिनिधींकडे धाव घेतली आहे. या मंडळांना कारवाईतून सूट मिळाल्यास डॉल्बीमुक्त गणेशोत्सव साजरा करणाऱ्या प्रामाणिक मंडळांवर अन्याय होणार आहे, त्याचबरोबर आधी गुन्हा करायचा आणि नंतर दिलगिरी व्यक्त करून सवलत मिळवायची अशी प्रवृत्तीही वाढण्याचा धोका आहे.
सर्वोच्च न्यायालयाच्या आदेशानुसार डॉल्बीमुक्त गणेशोत्सव साजरा व्हावा यासाठी पोलिस प्रशासनाने एक महिन्यापूर्वीच गणेश मंडळांसह डॉल्बी मालक आणि चालकांचे प्रबोधन सुरू केले होते. स्वतः विशेष पोलिस महानिरीक्षकांनीही मंडळांच्या पदाधिकाऱ्यांशी संवाद साधत मोठ्या आवाजाच्या डॉल्बीला फाटा देण्याचे आवाहन केले होते. बहुतांश मंडळांनी या आवाहनाला सकारात्मक प्रतिसाद दिला. गणेश आगमनासह विसर्जन मिरवणुकीत डॉल्बीचा आवाज मर्यादेत ठेवला. शहरातील १६ मंडळांनी मात्र गणेश विसर्जन मिरवणुकीत ऐनवेळी आवाज मर्यादेचा भंग केला. पोलिसांच्या सूचनांकडे दुर्लक्ष झाल्याने पोलिसांनी तातडीने दुसऱ्या दिवशी संबंधित १६ मंडळांवर गुन्हे दाखल केले. कोल्हापूर परिक्षेत्रातील २८ हजार गणेश मंडळांनी आवाजाला मर्यादा घातली. केवळ १६ मंडळांनी आवाज मर्यादेचे उल्लंघन केल्याने या मंडळांना अद्दल घडवण्यासाठी पोलिस प्रशासन सरसावले आहे. पालकमंत्री चंद्रकांत पाटील यांनीही दोषी मंडळांवर कारवाई करण्यासाठी पोलिसांना पाठबळ दिल्याने पोलिसांनी कायदेशीर उणिवा राहू नयेत यासाठी प्रयत्न सुरू केले आहेत. पोलिसांची आक्रमकता पाहून दोषी मंडळांच्या कार्कर्त्यांचे धाबे दणाणले आहेत. या मंडळांनी कारवाईपासून पळ काढण्यासाठी लोकप्रतिनिधींचा आसरा शोधला आहे.
शहरात दोन पक्षांच्या नेत्यांनी सोळा मंडळांच्या पदाधिकाऱ्यांसोबत बैठक घेऊन कारवाईत शिथिलता मिळावी, अशी विनंती केली आहे. यासाठी जनतेची माफी मागून पालकमंत्री चंद्रकांत पाटील यांच्याकडे दिलगिरीचे पत्रही देण्याचे नियोजन दोषी मंडळांसह लोकप्रतिनिधींकडून सुरू आहे. लोकप्रतिनिधींच्या या भूमिकेमुळे मंडळांचा आत्मविश्वास वाढू शकतो, त्याचबरोबर पुन्हा-पुन्हा ते अशा चुका करण्यास प्रवृत्त होऊ शकतात. याशिवाय डॉल्बीला फाटा दिलेल्या मंडळांमध्ये अन्याय झाल्याची भावना बळावणार आहे. डॉल्बी लावून कायद्याचे उल्लंघन करणाऱ्या मंडळांना पाठीशी घालणाऱ्या लोकप्रतिनिधींनी जनतेचीही भावना जाणून घ्यावी, असे आवाहन नागरिकांकडून केले जात आहे.
कोडोलीत आठ मंडळांवर कारवाई
गणेश विसर्जन मिरवणुकीत विनापरवानगी ध्वन‌िक्षेपक लावल्याने आणि रात्री बारानंतरही ध्वन‌िक्षेपक सुरू ठेवल्याने कोडोली पोलिस ठाण्याने आठ मंडळांवर कारवाई केली. मुंबई पोलिस कायद्यानुसार गुन्हे दाखल झालेल्या आठ मंडळांना कोर्टाने एक लाख ८८ हजार रुपयांचा दंड सुनावला. या मंडळांनी आवाज मर्यादेचे पालन केले होते. यांनी आवाज मर्यादेचा भंग केला असता, तर आर्थिक दंडासह कारावासाचीही शिक्षा भोगावी लागली असती.
दीडशेहून अधिकांवर कारवाईचा बडगा
गेल्या वर्षभरात शहरात विविध सार्वजनिक कार्यक्रमांसह खासगी क्रार्यकमांमध्ये डॉल्बीचा आवाज वाढवणाऱ्या दीडशेहून अधिक जणांवर गुन्हे दाखल झाले आहेत. यातील दोषींवर न्यायालयात खटले दाखल केले असून, काही दिवसातच यांना शिक्षा होऊ शकते. सर्व दोषींना अधिकाधिक शिक्षा होण्यासाठी पोलिस प्रशासनाकडून प्रयत्न सुरू आहेत. यामध्ये बऱ्याच मंडळांचाही समावेश आहे.
पालकमंत्र्यांची भूमिका महत्त्वाची
दोषी १६ मंडळांवर पोलिसांनी कारवाईचा बडगा उगारताच भयभीत झालेल्या मंडळांनी सत्तेतील दोन्ही पक्षांच्या नेत्यांकडे धाव घेतली आहे. या दोन्ही नेत्यांनी पालकमंत्र्यांकडे दिलगिरी व्यक्त करण्याचा पर्याय मंडळांना सूचवला आहे. पोलिसांना कारवाईसाठी पाठबळ देणारे पालकमंत्री अवघ्या सोळा मंडळांवरील कारवाई शिथील करण्यासाठी इतर प्रामाणिक मंडळांवर अन्याय करणार का? असा प्रश्न विचारला जात आहे. पालकमंत्री काय भूमिका घेतात, यावरच दोषी मंडळांवरील कारवाईचे भवितव्य अवलंबून असेल.
गणेश विसर्जन मिरवणुकीत ज्या मंडळांनी आवाज मर्यादेचे उल्लंघन केले, त्या मंडळांवर गुन्हे दाखल झाले आहेत. पोलिस प्रशासनासह प्रदूषण नियंत्रण मंडळ आणि शिवाजी विद्यापीठाचेही आवाज मापनाचे अहवाल कोर्टात सादर करणार आहोत. मंडळांनी स्वतःच डॉल्बीमुक्त गणेश उत्सव साजरा करण्याचे प्रतिज्ञापत्र लिहून दिले होते, त्यामुळे कोणत्याही मंडळांवर मेहरबानी दाखवण्याचा प्रश्नच उद्भवत नाही.
भारतकुमार राणे, पोलिस उपाधीक्षक
मोबाइल अॅप डाउनलोड करा आणि राहा अपडेट
