शहरातील कचऱ्याच्या प्रश्नावर सातत्याने टीकेला सामोरे जावे लागल्यानंतर महापालिकेने साधनसामग्री खरेदी प्रक्रियेला सुरुवात केली. स्थायी समिती सभेने ३०० कंटेनर खरेदीची १ कोटी १८ लाख ८० हजार रुपयांच्या निविदेला मंजुरी दिली. कंटेनर पुरविणाऱ्या कंपनीवर एक वर्ष देखभालीसह वॉरंटी असणार आहे. मात्र २०० घंटागाडी खरेदीबाबत फेरप्रस्ताव सादर करण्याच्या सूचना प्रशासनाला करण्यात आल्या. स्थायी समिती सभापती मुरलीधर जाधव सभेच्या अध्यक्षस्थानी होते. दरम्यान सत्ताधारी गटाचे सदस्य उशिरा आल्याने विरोधी ताराराणी भाजप आघाडीच्या सदस्यांनी नीलेश देसाई यांना अध्यक्षस्थानी बसवत सभा सुरू केल्याने तणाव निर्माण झाला. तर सभेच्या उत्तरार्धात नगरोत्थान योजनेतील आरईइन्फ्रा कंपनीनला दिलेली मुदतवाढ आणि बिलावरून प्रशानसानाने बेदखल केल्याप्रकरणी सत्ताधारी गटाने सभात्याग केला.
आजच्या सभेत प्रशासनाकडून कंटेनर खरेदीचा प्रतिकंटेनर ६१ हजार रुपयांच्या एस्टिमेटचा प्रस्ताव मंजुरीचा ठराव ठेवण्यात आला होता. कंटेनर खरेदीच्या निविदा प्रक्रियेत सुशीलानंद इक्विपमेंटसने प्रति कंटेनर ४६,००० रुपये दराने निविदा सादर केली होती. नागपूर येथील तिरुपती रिक्षा ट्रेडर्सची ३९,६०० रुपयांची कमी दराच्या निविदेला मंजुरी मिळाली. निविदा सादर करण्याच्या प्रक्रियेत अपुऱ्या कागदपत्राअभावी तिरूपती ट्रेडसची निविदा पहिल्या टप्प्यात अपात्र ठरली होती. स्थायी समिती सदस्या मेहजबीन सुभेदार यांनी तिरुपतीच्या कमी दराच्या निविदेकडे प्रशासनाचे लक्ष वेधले. या कंपनीकडून कंटेनर घेतल्यास महापालिकेची सुमारे १८ लाख रुपयांची बचत होईल हे सामोरे आणल्यानंतर ‘तिरुपती’ च्या निविदेवर शिक्कामोर्तब झाले. विरोधी आघाडीच्या सतर्कतेमुळे दोन प्रकल्पात गेल्या तीन महिन्यात महापालिकेची ५० लाख रुपयांची बचत झाल्याचा दावा भाजपाचे अजित ठाणेकर यांनी केला.
नगरसेवक सत्यजित कदम, सूरमंजिरी लाटकर, रुपाराणी निकम यांनी ठोक मानधनावरील कर्मचाऱ्यांचे पगार का थांबवले? अशी विचारणा केली. रिना कांबळे यांनी फुलेवाडी रिंगरोड रस्त्याची दूरवस्था निदर्शनास आणली. पाटणकर हायस्कूल व टाकाळा येथील प्रोजेक्टच्या कामास विलंब झाल्याने ठेकेदाराला ब्लॅकलिस्ट करण्याची कार्यवाही सुरू असल्याचे उत्तर प्रशासनाने दिले. चर्चेत निलोफर आजरेकर, सुनील पाटील यांनी सहभाग घेतला.
सत्ताधाऱ्यांचा सभा संपताना सभात्याग
आरईइन्फ्रा कंपनीने निकृष्ट कामे केली असताना बिल का दिले? कंपनीला मुदतवाढ कशाच्या आधारे दिली? कंपनीच्या कामाविषयी सदस्यांनी विचारणा करूनही प्रशासनाकडून माहिती मिळत नसल्याचा आरोप नगरसेविका प्रतिज्ञा निल्ले, जयश्री चव्हाण, दीपा मगदूम यांनी केला. प्रशासनाकडून समाधानकारक उत्तर न मिळाल्याने सभापतीसह काँग्रेस, राष्ट्रवादीच्या सदस्यांनी सभा संपताना सभात्याग केला.
नीलेश देसाई सभाध्यक्ष झाले
सत्तारूढ काँग्रेस, राष्ट्रवादी आणि विरोधी भाजप, ताराराणी आघाडी एकमेकावर राजकीय कुरघोडी करण्याची एकही संधी दवडत नाहीत. स्थायी समिती सभेची नियोजित वेळ सकाळी ११ ची होती. यावेळी सत्ताधाऱ्यांनी पार्टी मिटींग सुरू होती. तर भाजप, ताराराणी आघाडीचे सभेसाठी दाखल झाले होते. बारा वाजेपर्यंत सभापती जाधव हे सभेसाठी न आल्याने भाजप, ताराराणी आघाडीच्या सात सदस्यांनी नगरसचिव दिवाकर कारंडे यांच्याकडे नियमावलीची माहिती घेतली. कोरम पूर्ण होताच नगरसेवक नीलेश देसाई यांची सभाध्यक्ष म्हणून निवडून कामकाजाला सुरुवात केली. सभापती जाधव यांना याची माहिती मिळताच क्षणाचाही विलंब न करता सभागृहात दाखल झाले. सभापती जाधव यांचे आगमन होताच देसाई यांनी सूत्रे जाधव यांच्याकडे दिली.
मोबाइल अॅप डाउनलोड करा आणि राहा अपडेट