म. टा. वृत्तसेवा, सांगली
सांगलीतील मराठा क्रांती मोर्चाची तयारी पूर्ण झाली आहे. मंगळवारी सकाळी दहा वाजता विश्रामबाग येथील क्रांतीसिंह नाना पाटील यांच्या पुतळ्यापासून मोर्चाला सुरुवात होणार आहे. जिल्हाधिकाऱ्यांना निवेदन देण्यासाठी निवडण्यात आलेल्या पाच मुली मध्यवर्ती बसस्थानकाकडून येताना डॉ. बाबासाहेब आंबेडकर, छत्रपती शिवाजी महाराज यांच्या पुतळ्याला अभिवादन करून जिल्हाधिकाऱ्यांना निवेदन देवून राम मंदिर भागात मोर्चात सहभागी होणार आहेत.
विश्रामबागमधील क्रांतीसिंहाच्या पुतळ्याला, कर्मवार भाऊराव पाटील यांच्या पुतळ्याला अभिवादन करण्यासाठी दुसऱ्या पाच मुलींचे पथक निश्चित करण्यात आले आहे. मोर्चासाठी निश्चित करण्यात आलेला सुमारे तीन किलोमीटरचा मार्ग आणि त्यालगतच्या पसिरात स्पीकर्स लावण्यात आले आहेत. त्या स्पिकरवर वाहतुकीच्या बदलाची माहिती, शाहिरी पोवाडे वाजण्यास सुरुवात झाली आहे.
दरम्यान, पोलिस बंदोबस्त सोमवारी सायंकाळीच आपापल्या जागेवर तैनात झाला होता. अन्नदान, पिण्याच्या पाण्याचा पुरवठा करणाऱ्या संघटनांनी आपले स्टॉल उभे केले आहेत. संपूर्ण शहर आणि मोर्चाचा तीन किलोमीटरचा मार्ग भगव्या झेंड्यांनी भगवामय झाला आहे. मोर्चात सहभागी होण्यासाठी काहीजण सोमवारी सायंकाळीच सांगलीत दाखल होताना दिसत होते. सोमवारी सायंकाळी कोल्हापूर पोलिस परिक्षेत्राचे विशेष पोलिस महानिरीक्षक विश्वास नांगरे-पाटील, पोलिस अधीक्षक दत्तात्रय शिंदे यांनी बंदोबस्ताची पाहणी केली.
कोपर्डी घटनेचा निषेध, मराठा समाजाचे आरक्षण यासह विविध मागण्यांसाठी निघणाऱ्या मराठा क्रांती मोर्चासाठी सांगली सज्ज झाली आहे. सांगली मिरज आणि कुपवाड महापालिका क्षेत्रासह अवघा जिल्हा मोर्चामय झाला आहे.
जिल्ह्याचे शेवटचे टोक असलेल्या जत तालुक्यातील उमेदीपासून सांगलीपर्यंतचे अंतर सुमारे दोनशे किलोमीटर आहे. उमदीपासून ते शिराळ्याच्या दुसऱ्या टोकापर्यंतचा मराठा समाज पहाटे चार वाजताच सांगलीच्या दिशेने निघणार आहे. सकाळी सातपासूनच मोर्चाच्या मार्ग गर्दीने फुलायला सुरू होईल, असे चिन्हे दिसत आहेत. शहरात कोंडी होऊ नये यासाठी प्रशासनाने सर्व वाहनांच्या पार्किंगचे काटेकोर नियोजन केले आहे. मिरज गांधी चौकातून मोर्चात सहभागी होणाऱ्या वाहनांशिवाय इतर वाहनांना सोडण्यात येणार नाही. मोर्चाच्या दिशेने येणाऱ्या सर्व वाहनांना त्याच मार्गावर पार्किंगची सोय केली आहे. पार्किंग जागा भरेल त्या प्रमाणे पार्किंग पॉर्इंट मागे-मागे जाणार आहेत.
मोर्चात कोणताही अनुचीत प्रकार घडू नये यासाठी सर्वांनीच दक्ष राहण्याची गरज आहे. मिरवणूक मार्गावर ठिकठिकाणी पिण्याच्या पाण्याचे २५ टँकरची सोय करण्यात आली आहे. मोर्चा मार्गावर कोणताही कचरा होणार नाही याची दक्षता घेण्याचे आवाहन करण्यात आले आहे. मोर्चानंतर झालेला कचरा आंदोलक स्वतः गोळा करणार आहेत.
अशी आहे मोर्चाची तयारी
जिल्ह्यातील ३७४ शाळांकॉलेजांना सुट्टी.
स्वयंसेवक ५ हजार, ३० रुग्णवाहिका तैनात
मुख्य मार्गावर ९०० स्वयंसेवक,२०० प्राध्यापक
व्हिडिओ चित्रणसाठी ५ ड्रोनकॅमेरे
महिला व पुरुषांसाठी ४०० फिरती स्वच्छतागृहे
झेंडे, टोप्या, शर्ट वाटप आणि विक्रीचे स्टॉल.
महाडीक संस्थेकडून दोन लाख पाण्याच्या बॉटल्या
मुस्लिम समाजाकडून पाच लाख पाण्याची पाकिटे
कॉलेज कॉर्नरला सावकार गणेशोत्सव मंडळातर्फे अन्नदान
राम मंदिर चौकात व्यासपीठ
मोर्चाचे मुख्य व्यासपीठ राम मंदिर चौकात असेल. व्यासपीठावर श्रद्धांजली, निवेदन वाचन होईल. तीन मुलींचे भाषण आणि राष्ट्रगीत, असा एकूण तीस मिनिटांचा कार्यक्रम असेल.
अशी असेल पार्किंगची व्यवस्था
मोर्चाच्या मुख्यमार्गाकडे येणारे सर्व उपमार्ग सर्व प्रकारच्या वाहनांसाठी बंद असतील. मिरजेकडील वाहतूक मिरजेतील गांधी चौकात, कोल्हापूरकडून येणारी वाहतूक अंकली फाटा, इस्लामपूरकडून येणारी वाहतूक टोलनाका आणि तासगावकडून येणारी वाहतूक सांगली कॉलेज कॉर्नरपर्यंत असेल. या ठिकाणाहून पुढे मोर्चासाठी आलेली दुचाकी आणि चारचाकी हलकी वाहनेच मोर्चा निघण्याच्या ठिकाणापासून काही अंतरापर्यंत सोडली जातील.
मोर्चासाठी येणाऱ्या दुचाकी- मिरज रोडवर चिंतामणराव व्यापार महाविद्यालय, कांतीलाल शहा पुरुषोत्तम शाळा, विलिंग्डन महाविद्यालयावर पार्किंग.
मोर्चासाठी येणारी चार चाकी वाहने- नवीन प्रशासकीय इमारत, वालचंद अभियांत्रिकी महाविद्यालय, संजय भोकरे इन्स्टिट्यूटवर पार्किंग.
कोल्हापूरच्या दिशेने येणाऱ्या दुचाकींसाठी दामाणी हायस्कूल, मालू हायस्कूल, राजमती ग्राऊंडवर पार्किंग. चारचाकी वाहनांसाठी शंभर फुटी रस्त्याचा अर्धा भागावर पार्किंग असेल.
इस्लामपूर मार्गे येणाऱ्या चारचाकी वाहनांसाठी इदगाह मैदान, मल्टीप्लेस, तात्यासाहेब मळा येथे पार्किंग. तर दुचाकीसाठी करीता सांगलीवाडीची चिंचबाग, वैरण अड्डा, नदीचा घाट, टिळक चौकात पार्किंग.
कर्नाळ, तासगाव मार्गे येणाऱ्या वाहनांकरीता वसंतदादा शेतकरी साखर कारखाना, बुधगाव कॉलेज, वसंतदादा मार्केट यार्ड, कारखान्याचा गाडी अड्डा, यशवंतनगरमधील आंबा चौक येथे चारचाकी आणि दुचाकीसाठी छत्रपती शिवाजी स्टेडीयमवर पार्किंग असेल.
मोबाइल अॅप डाउनलोड करा आणि राहा अपडेट
