म. टा. वृत्तसेवा, सांगली
धुवॉधार पावसाने सांगलीसह मिरज, तासगाव परिसराला झोडपून काढले. सलग तीन तास एकसारखा पाऊस कोसळत राहिल्याने संपूर्ण सांगली जलमय झाली. रस्ते वाहू लागले तर अनेक ठिकाणी वाहने पाण्यात अडकली. शहरवासियांची तारांबळ उडविली. शनिवारचा आठवडा बाजारातील विक्रेत्यांची आणि ग्राहकांची दैना उडवून दिली. यंदाच्या पावसाळ्यातला सर्वात मोठा आणि एकसारखा कोसळेला पाऊस म्हणून शनिवारच्या पावसाची चर्चा होती.
हवामान खात्याच्या अंदाज खरा ठरवत राज्याच्या कानाकोपऱ्यात जोरदार पाऊस कोसळू लागला असून, शनिवारी सांगली, मिरज परिसरात तुफान पाऊस पडला. धरण आणि कृष्णा-कोयना नदीच्या पाणलोट क्षेत्रातील पावसाचा जोर वाढल्याने सांगलीनजीक कृष्णेच्या पाण्याची पातळी झपाट्याने वाढत असतानाच शनिवारी जोरदार पावसाला सुरुवात झाली.
तासगाव परिसरात दुपारी सुरू झालेला पाऊस रात्री उशीरापर्यंत सुरूच होता. सांगलीत एकसारखा पाऊस कोसळत राहिल्याने जनजीवन विस्कळित होऊन एक प्रकारची कोंडी झाली होती. राजवाडा चौक, शिवाजी मंडई, मारुती चौक, मध्यवर्ती बसस्थानक या परिसरात पाणी साचल्याने दुचाकी वाहने अडकून पडली. विस्तारीत भागातील नागरिकांचीही दैना उडाली होती. शनिवार असल्याने दुपारी सुटणाऱ्या शाळा, कॉलेजातील विद्यार्थी काही तास शाळेतच अडकून पडले होते.
चांदोलीत ४० मीमी
शिराळा
चांदोली धरण परिसरात गेल्या दोन दिवसांपासून पावसाची संततधार सुरूच आहे. गेल्या २४ तासांत ४० मी. मी पावसाची नोंद झाली आहे. धरणाच्या सांडव्यातून ७८०० तर वीज निर्मितीतून १५५५ असा एकूण ९३५५ पाण्याचा विसर्ग वारणा नदीत सुरू आहे. धरणात ३४.४० टीएमसी इतका शंभर टक्के पाणीसाठा झाला आहे. गेल्या दोन दिवसांपासून संपूर्ण तालुक्यात पावसाची संततधार सुरू असल्यामुळे वारणा नदीच्या पाणी पातळीत वाढ होत आहे. सध्या पडत असलेल्या पावसामुळे सोयाबीन, भुईमुग काढणीच्या कामात व्यत्यय येत असून, शेतकऱ्यांचे नुकसानही होत आहे.
मिरजला पावसाने झोडपले
मिरज
मागील दीड महिन्यांपासून विश्रांती दिलेल्या पावसाने शनिवारी शहरासह पूर्व भागाला मुसळधार पावसाने झोडपून काढले. सलग तीन तास पडलेल्या पावसाने शहरातील सर्वच रस्ते जलमय झाले. शहरातील व्यवहार काही काळ ठप्प झाला. पूर्व भागातील ओढे, नाले, बंधारे तुडुंब भरून ओसडून वाहत आहेत. तर, संततधार पावसामुळे शहरातील रस्त्यावरील खड्ड्यातील मुरुमाचे चिखलात रुपांतर होत असल्याने वाहनधारकांसह पादचाऱ्यांना चालणेही मुश्किल झाले आहे.
तब्बल दीड महिना विश्रांती घेतलेल्या पावसाने गेल्या दोन दिवसांपासून पुन्हा जोर लावला आहे. शुक्रवारी तुरळक स्वरुपाचा पाऊस झाला. मात्र, शनिवारी पावसाने पुन्हा जोरदार हजेरी लावली. काही भागात मुसळधार तर, अनेक ठिकाणी संततधार पाऊस सुरूच आहे. शहरात संततधार पावसामुळे अनेक व्यवहार ठप्प आहेत. सलग नागरीक घरातच थांबून आहे. शहरातील बस स्थानक, गांधी चौक, गणेशनगर, कुपवाड रस्ता, झारी बाग, शासकीय दूध डेअरी, कमान वेस, दिंडी वेस, मालगाव रोड, उदगाव वेस, वखारभाग आदी प्रमुख रस्त्यावरील खड्डे मुजविण्यासाठी महापालिकेने गणेशोत्सवापूर्वी मुरुम टाकले होते. मात्र, मुरुमात मातीचे प्रमाण जास्त असल्याने सर्वच रस्ते चिखलमय आणि खड्डे आहे तसेच आहेत. त्यामुळे दुचाकी वाहनधारकांसह पादचाऱ्यांना चालणे ही मुश्किल झाले आहे.
पूर्व भागातील म्हैसाळ, बेडग, आरग, सलगरे, एरंडोली, खंडेराजुरी, मल्लेवाडी, मालगाव, बेळंकी आदी परिसरातही पावसाने झोडपून काढले. सकाळपासूनच ढगाळ वातावरण होते. मात्र, बारा वाजता सुरू झालेल्या पावसाने तब्बल तीन तास जोरदार तर, दोन तास संततधार पाऊस सुरूच होता. अनेक द्राक्षबागायतदारांचे द्राक्ष छाटणीची कामे सुरू आहेत. सलग पाऊस सुरू असल्याने मजुरांना काम करता आले नाही.
मोबाइल अॅप डाउनलोड करा आणि राहा अपडेट
