Anuradha.kadam@timesgroup.com
Tweet: @anuradhakadamMT
कोल्हापूर ः कोल्हापूर बदललंय असं जरी आज आपण म्हणत असलो तरी कोल्हापूरचं ते रांगडं चित्र बदलण्याचं पहिलं पाऊल ठरलेल्या भक्तिपूजानगर या सोसायटीने दहा वर्षापूर्वीच ही बदलाची कास धरली. पुण्या-मुंबईसारख्या मेट्रो सिटीमध्ये दिसणाऱ्या टाउनशिपबद्दल कोल्हापूरकरांच्या मनात असलेली उत्सुकता दूर करण्याचं श्रेय नक्कीच भक्तिपूजा या टाउनशिपला जातं. शहरापासून हाकेच्या अंतरावर तरीही शांतता आणि निसर्गाच्या सान्निध्यात वसलेल्या भक्तिपूजानगरने बदलत्या कोल्हापूरचा श्रीगणेशा केला. दहा वर्षांच्या काळात कोल्हापुरात अनेक वैशिष्ट्यपूर्ण वसाहती, कॉलनी, सोसायटी उभ्या राहिल्या असल्या तरी मंगळवारपेठेच्या शेवटच्या टोकाला असलेल्या भक्तिपूजानगरने शहर आणि उपनगर यांचा सुवर्णमध्य साधला आहे.
मंगळवारपेठेतील बेलबाग ओलांडल्यानंतर पद्मावती मंदिरापासून डाव्या बाजूचे वळण घेतले की, अतिशय शांत आणि निसर्गरम्य परिसर असलेल्या पद्मावतीनगर परिसरात भक्तिपूजानगरचा डोलारा लक्ष वेधून घेतो. या सोसायटीच्या एका बाजूला जयप्रभा स्टुडिओसारखी कोल्हापूरची ओळख सांगणारी वास्तू, तर दुसऱ्या बाजूला आयटीपार्कचा परिसर. भक्तिपूजानगर ओलांडले की, कोल्हापूरच्या उपनगरांकडे जाणारी वाट सुरू होते. आजूबाजूला सुरू, आंबे, नारळ यांची झाडे असल्यामुळे निसर्गसौंदर्य आणि गारवा या दोन्ही सुखामुळे हा परिसर आल्हाददायक वाटतो.
अशा परिसरात सन २००२ मध्ये भक्तिपूजानगर या नव्या संकल्पनेवर बेतलेल्या उपनगराचे भूमिपूजन झाले. शहरातील पूजा बिल्डर्स या बांधकाम कंपनीने या जागेची निवड करताना टाउनशिप उभारण्याचा विचार आजच्या काळाला स्तुत्य होता याची प्रचिती आज येते. कोल्हापुरात अपार्टमेंटचे स्वरूप बदलत होते. अपार्टमेंटचा ऐसपैसपणा वाढत होता. इतकेच नव्हे तर जुन्या कोल्हापुरातही कौलारू घरांच्या जागी इमारती उभ्या राहत होत्या. मात्र, या पंक्तीतही भक्तिपूजानगरचे वेगळेपण होते ते टाउनशिपचे. पाचमजली तीन अपार्टमेंट आणि ४० बंगले असे डिझाइन तयार झाले आणि प्रत्यक्ष कामाला सुरुवात झाली. तीन वर्षांत कोल्हापुरातील पहिली टाउनशिप भक्तिपूजानगर या नावाने आकाराला आली.
भक्तिपूजानगरमध्ये प्रवेश केला की, चकचकीत स्वच्छ अंतर्गत रस्ते, दुतर्फा टुमदार दुमजली बंगले, डाव्या बाजूला अपार्टमेंट, मध्यभागी मुलांसाठी बाग, दोन मंदिरे, क्लब हाउस, स्वीमिंग पूल, ज्येष्ठांसाठी वॉकिंग ट्रॅक अशी प्रत्येक सुविधा करण्यात आली आहे. एकदा गेटच्या आत आले की, सर्व काही या कॉलनीमध्येच अशी रचना असलेल्या भक्तिपूजानगरची आखीवरेखीव मांडणी लक्ष वेधून घेते. दैनंदिन स्वच्छता, सुरक्षितता याकडे विशेष लक्ष दिले जाते. मनोरंजन, सामूहिक सणसमारंभ यामुळे भक्तिपूजानगरमध्ये नेहमीच चैतन्यदायी वातावरण असते. जैन मंदिर आणि अंबाजी मंदिर येथे सतत विविध उपक्रम आयोजित केले जातात. महिला, युवक एकत्र येऊन विविध कार्यक्रम सादर करतात.
फक्त शाकाहारी
भक्तिपूजानगर ही कोल्हापुरातील पहिली टाउनशिप अशी सोसायटीची ओळख आहेच, पण या कॉलनीचे आणखी एक वेगळेपण म्हणजे या नगरात राहणारे प्रत्येक कुटुंब शाकाहारी आहे. शाकाहारी असलेल्यांना अनेकदा शेजारच्या घरांमधून मांसाहाराचा दर्प सहन होत नाही. त्यामुळे ही कॉलनी वसवतानाच फक्त शाकाहारी असलेल्या कुटुंबांनाच प्राधान्य देण्यात आले.
भक्तिपूजानगरातील प्रसिद्ध व्यक्ती
उद्योजक ललित गांधी, बांधकाम व्यावसायिक पारस ओसवाल, प्रमोद ढोले, सुभाष नियोगी, मोहनलाल ओसवाल यांच्यासह विविध क्षेत्रांतील व्यावसायिक, उद्योजक, डॉक्टर भक्तिपूजानगरमधील स्थानिक नागरिक आहेत.
सुविधा आणि सुरक्षितता यादृष्टीने भक्तिपूजानगर सोसायटी अतिशय चांगली आहे. बहुतांश जैन, गुजराथी, मारवाडी समाजातील कुटुंबे येथे राहतात. त्यामुळे सण, समारंभ, धार्मिक उपक्रमांच्या माध्यमातून एकमेकांशी चांगल्याप्रकारे जोडले आहेत. कोल्हापूरच्या बदलत्या राहणीमानाची नांदी म्हणून भक्तिपूजानगर सोसायटीचा उल्लेख केला जातो.
महेंद्र ओसवाल, स्थानिक नागरिक
राजर्षी शाहू महाराजांनी शाहूपुरी, राजारामपुरी या वसाहती वसवल्या तेव्हा त्यांच्या डोक्यातही एक आखीव मांडणी असलेल्या वसाहतीचे चित्र होते. भक्तिपूजानगरमध्ये आल्यानंतरही अशाच प्रकारचा अनुभव येतो. सोसायटीतच दोन मंदिरे आहेत. त्यामुळे वातावरण प्रसन्न ठेवणारे धार्मिक उपक्रम सातत्याने होतात. सर्व सुविधांमुळे महिला, लहान मुले, युवक यांच्यासाठी सुरक्षित कॉलनी आहे.
प्रदीप ओसवाल, सोसायटी सचिव
मोबाइल अॅप डाउनलोड करा आणि राहा अपडेट