वरुणराजाच्या हलक्या सरी झेलत देखावे पाहण्यांसाठी अबालवृद्धांनी बुधवारी अखेरच्या दिवशी मोठी गर्दी केली होती. गुरुवारी होणाऱ्या विसर्जनाच्या पूर्वसंध्येला भाविकांनी भव्य आणि वैविध्यपूर्ण मूर्ती, आकर्षक विद्युत रोषणाई, तांत्रिक देखावे पाहण्यासाठी गर्दी केली. शिवाजी पेठ, लक्ष्मीपुरी, शाहूपुरी, राजारामपुरी, कसबा बावडा, जुना बुधवार पेठ येथील रस्ते गर्दीने खचाखच भरले होते. 'गणपती बाप्पा मोरया...'च्या अखंड गजर करत उत्साही युवक गटागटाने देखाव्यांचा आनंद घेत होते.
मंगळवारी रात्री झालेल्या पावसामुळे बुधवारी सकाळपासून ढगाळ वातावरण होते. दुपारपासूनच पावसाची रिपरिप सुरू झाल्याने भाविकांनी सायंकाळी सातपासूनच देखावे पाहण्याला सुरुवात केली. शहरातील प्रमुख मंडळांच्या मूर्ती दर्शनानंतर देखाव्यांसाठी प्रसिद्ध ठिकाणांकडे भाविकांनी गर्दी करण्यास सुरुवात केली होती. बहुतांशी मंडळांनी गर्दी खेचण्यासाठी अनोख्या संकल्पना राबवल्या. अनेकांनी ज्वलंत प्रश्नांवर भर देत देखावे सादर केले होते. ऐतिहासिक व्यक्तीरेखा, स्थानिक कलाकारांनी सादर केलेल्या विनोदी नाटकांमुळे गर्दी एकाचठिकाणी थांबत होती. या गर्दीला अटकाव करण्यासाठी कार्यकर्ते भाविकांना मार्गदर्शन करताना दिसत होते. तरीही वाहतुकीची कोंडी होत होती.
राजारामपुरीतील शिवाजी तरुण मंडळाने तयार केलेला आकर्षक गणेश महाल पाहण्यासाठी चांगली गर्दी झाली होती. परिसरातील राजारामपुरी स्पोटर्सचे शिवमंदिर, जयशिवराय फ्रेंड्स सर्कलचा आकर्षक गाभारा, तर हिंदवी स्वराज्य तरुण मंडळाचा 'राजे तुम्ही फक्त लढ म्हणा' सजीव देखावा युवकांमध्ये स्फुल्लींग फुलवीत होता. तर इंद्रप्रस्थ तरुण मंडळाचा ड्रॅगन व उद्यमनगरातील मदनलाल धिंग्रा तरुण मंडळाचा पोकेमॅन बालचमूच्या उत्साहामध्ये अधिक भर टाकत होता.
मंगळवार पेठ, लक्ष्मीपुरी, शाहूपुरी, जुना बुधवार पेठ, शुक्रवार पेठ, शनिवार पेठ, कसबा बावडा भाविकांनी चांगली गर्दी केली. जिल्ह्यातील भाविकांचीही गर्दी दिसत होती. ग्रामीण भागातील भाविक चारचाकी वाहनांतून आले होते. या वाहनधारकांचा बराच वेळ पार्किंगची जागा शोधण्यामध्ये जात होता. पावसाने ऐनवेळी हजेरी लावल्याने भाविक छत्री, रेनकोटसह देखावा पाहण्यात गुंग होते. मात्र भाविकांची गर्दी लक्षात घेवून आगाऊ तयारी केलेल्या खाद्यपदार्थांच्या स्टॉलधारकांना पावसाचा चांगलाच फटका बसला.
प्रसादामुळे भाविक तृप्त
गेल्या काही दिवसांपासून देखावा पाहण्यासाठी येणाऱ्या भाविकांसाठी प्रसादाचे आयोजन केले जात आहे. मोठ्या मंडळाबरोबर ठिकठिकाणच्या छोट्या मंडळांनीही प्रसादाचे आयोजन केले होते. पुलाव, मसाले भात, गव्हाची खीर, बुंदी, मसाले दूध, मोदक, केळी वाटपामुळे भाविक तृप्त होऊन जात होते. प्रसादाबरोबरच भाविकांनी खाद्यपदार्थांच्या स्टॉलवर प्रचंड गर्दी केली होती.
दरवर्षी गणेशोत्सवामध्ये राजारामपुरी, शिवाजी पेठ, लक्ष्मीपुरी, शाहूपुरी, मंगळवार पेठेतील देखावे भाविकांना आकर्षित करत असतात. गेल्या काही वर्षामध्ये ही गर्दी ऐतिहासिक देखाव्यांमुळे कसबा बावड्याकडे आकर्षित होऊ लागली आहे. यावर्षी जुना बुधवार पेठ, शनिवार पेठ व शुक्रवार पेठेतील मंडळांनी भाविकांचे लक्ष वेधण्यात यश मिळवले. तांत्रिक व ऐतिहासिक देखाव्यांसोबत समाजप्रबोधन करणारे, विनोदी देखाव्यांमुळे भाविकांची तुडूंब गर्दी झाली होती.
वाहतूक कोंडी नित्याचीच
गुरुवारी गणरायचे विसर्जन होणार असल्याने अखेरच्या दिवशी देखावे पाहण्यासाठी भाविकांनी मोठी गर्दी केली होती. पावसाची रिपरिप सुरू असतानाच काहीजण चारचाकी वाहनातून, मोटारसायकलवरून देखावे पाहत होते. कार्यकर्त्यांच्या 'पुढे चला'चा आवाहनाला कोणताच प्रतिसाद न देता वाहनधारक थांबून राहत असल्याने कोंडी होत होती. त्याचा सर्वाधीक फटका पादचाऱ्यांना होत होता.
ओशाळली माणुसकी
जुना बुधवार पेठ येथील शिपुगडे तालीम मंडळाने सादर केलेल्या 'इथे ओशाळली माणुसकी' या तांत्रिक देखाव्यांने चांगलीच गर्दी खेचली होती. डांगे गल्लीतील वाहतूक कोंडी दाखवणारा आणि वीर बाजीप्रभू तरुण मंडळाने वृक्ष संवर्धनाचे संदेश देणारा समाजप्रबोधनपर देखाव्यांमुळे येथे चांगली गर्दी झाली होती.
मोबाइल अॅप डाउनलोड करा आणि राहा अपडेट
