म. टा. वृत्तसेवा, कराड
कोयना धरणाच्या पाणलोट क्षेत्रात पावसाचा जोर मंदावला आहे. धरण परिसरातील पाटण तालुक्यासह शेजारील कराड व जावली, महाबळेश्वर तालुक्यांतही पावसाने दांडी मारल्याने धरणात येणाऱ्या पाण्याची आवकही कमी झाली आहे. गेल्या आठवडाभरापासून सध्या केवळ आकाशात ढगाळ वातावरण असून काळ्या-पांढऱ्या ढगांनी संपूर्ण आकाश व्यापून टाकले आहे. मात्र, एखाद दुसरी सर बरसली तर बरसली अन्यथा आले ढग निघून जात आहेत.
कोयना धरण पूर्ण क्षमतेने भरण्यासाठी मोठ्या पावसाची आवश्यकता निर्माण झाली आहे. ऑगस्ट महिनाही पावसाचा महिना म्हणून ओळखला जातो, या महिन्यात मोठ्या पावसाने हजेरी लावली तर धरण लिलया भरून जाईल, असा विश्वास धरण व्यवस्थापनाने व्यक्त केला आहे.
दरम्यान, गुरुवारी रात्रीपासून शुक्रवारी रिमझिम पावसाने हजेरी लावली होती. शुक्रवारी सायंकाळी पाच वाजेपर्यंत कोयनानगर येथे ७६, नवजा ५४, महाबळेश्वर २७, मिलीमीटर पावसाची नोंद झाली आहे. त्यामुळे कोयना धरणात ५ हजार ५५७ क्युसेक वेगाने पाण्याची आवक होत आहे. धरणात एकूण ५७.३५ टीएमसी पाणीसाठा झाला आहे. धरणातील पाणीपातळी २११५ फूट ०७ इंच व ६४४.८३० मीटर इतकी उंची झाली आहे. गतवर्षी याच दिवशी कोयना धरणात ६३.८८ टीएमसी इतका पाणीसाठा होता.
सांगलीत रिमझिम पाऊस
सांगली :
ऐन पावसाळ्यात कडक उन्हाळ्याचा अनुभव देणाऱ्या वातावरणात शुक्रवारी बदल झाला. दुपारपर्यंत संततधार पावसाने सांगली आणि परिसरात हजेरी लावली. दरम्यान, गुरुवारी रात्रीच्या सुमारास कायम दुष्काळी जत तालुक्याला पावसाने काही प्रमाणात दिलासा दिला. अवघ्या दोन तासांत १८ मिलीमीटर पाऊस झाला. असे असले तरी अद्यापही जिल्ह्यातील सर्वाधिक टँकर याच तालुक्यात असून, पिण्याच्या पाण्याची टंचाई कायम आहे.
पावसाने दीर्घकाळ केवळ विश्रांतीच घेतली नाही तर सलग चार दिवस उन्हाचे चटकेही सहन करायले लावले. गेल्या दोन दिवसांपासून पुन्हा पावसाळी वातावरण असून, गुरुवारी रात्री उशीरा रिमझीम पावसाने हजेरी लावली. गुरुवारी रात्री दहा वाजण्याच्या सुमारास जतमध्ये पावसाने दमदार हजेरी लावली. यंदाच्या पावसाळ्यात प्रथमच काही ठिकाणच्या नाल्यांतून तर काही भागातील ओढ्यांतून पावसाचे पाणी वाहताना दिसले. जिल्ह्याच्या कवठेमहांकाळ, तासगाव , खानापूर, विटा या भागातही काहीसा पाऊस झाला आहे.
अलमट्टी धरण भरले
सांगली
कृष्णेसह वारणा व पंचगंगा या उपनद्यांतून गेल्या दोन महिन्यांत कर्नाटकात तब्बल १३५ टीएमसी पाणी वाहून गेले आहे. त्याचा परिणाम म्हणून अलमट्टी धरण तुडूंब भरले आहे. हे पाणी म्हैसाळ सिंचन योजनेतून उचलून जत, कवठेमहांकाळ, मिरज पूर्वभागासह सोलापूर जिल्ह्यातील सांगोला तालुक्यात टाकावे, अशी मागणी होत आहे. टेंभू योजनेतून आटपाडी, खानापूर तालुक्यांना पाणी द्यावे, या मागणीनेही जोर धरला आहे. या मुद्दा विधानसभेतही उपस्थित करण्यात आला आहे.
दर वर्षी कृष्णेतून सरासरी २५० टीएमसी पाणी कर्नाटकात वाहून जाते. या वर्षी जुलै महिन्यात जोराचा पाऊस झाला. सांगली, सातारा, कोल्हापूर या तीन जिल्ह्यांत पावसाने दमदार हजेरी लावली. तीनही नद्या दुथडी भरून वाहिल्या. त्यामुळे कर्नाटकातील अलमट्टी धरण शंभर टक्के भरले आहे.
राष्ट्रवादीचे गटनेते जयंत पाटील यांनी विधानसभेत या प्रश्नावार आवाज उठविला. या तिन्ही नद्यांचे कर्नाटकात वाहून जाणारे पाणी दुष्काळी भागातील तलाव भरून घेण्यासाठी का वापरले नाही, असा प्रश्न त्यांनी केला. म्हैसाळ, ताकारी, टेंभू योजना कार्यान्वित करा, तलाव भरून घ्या, जेणे करून दुष्काळी भागातील जनतेला दिलासा मिळेल. उन्हाळ्यात पाणीवाटप करताना प्रशासनावर ताण येणार नाही, अशी भूमिका त्यांनी मांडली आहे.
