म. टा. प्रतिनिधी, कोल्हापूर
पंचगंगा नदीचा पूर कोल्हापूर शहरातही घुसला होता. महापुराने आंबेवाडी, चिखली, आंबेवाडी केर्ली, निगवे या प्रमुख गावांसह अनेक गावांना विळखा घातलाच. पण शहरात प्रवेश करणाऱ्या सर्व रस्त्यांवर पाणी आले होते. पुणे-बेंगळुरू राष्ट्रीय महामार्गावरील शिरोली येथील नवीन पुलावर अडीच ते तीन फूट पाणी होते. त्यामुळे महामार्गावर वाहनांच्या मोठ्या रांगा लागल्या होत्या. रुकडीजवळील पूलही वाहतुकीसाठी बंद केल्याने रेल्वेवाहतूक ठप्प झाली होती.
ज्यांच्या घरात पाणी शिरले होते त्यांना महापालिकेच्या शाळा, खासगी शाळा, शंकराचार्य मठ, चित्रदुर्ग मठ, मुस्लिम बोर्डिंग येथे सुरक्षित ठेवले होते. शहरातील मंडळे व तालमी संस्थांनी पुरात अडकलेल्या लोकांना जेवण, नाष्टा व चहाची सोय केली होती. पुरातून लोकांना सुरक्षित बाहेर काढण्यासाठी युवा वर्ग धाडसाने पाण्यात उतरला होता. काही युवकांनी थेट शिरोळ तालुक्यात मदतीसाठी धाव घेतली होती. जिल्हा प्रशासनाला मदत करण्यासाठी नागरिक सरसावले होते. पुराच्या पाण्यात मदतकार्य करणारे शाहूपुरी कुंभार वसाहत व पंचगंगा नदी परिसरातील दोन युवकांना लेप्टोची लागण झाली व त्यात त्यांचा मृत्यू झाला.
रेडझोनचा फटका
महापुराने प्रशासन, सामाजिक संस्था, नागरिकांना बरेच काही शिकवले. महापुराच्या अनुभवातून काही उपाययोजना केल्या, पण ज्या ठिकाणी उपाययोजना हवी होती त्याकडे सोयीस्कर दुर्लक्षही झाले. जयंती नाल्यावरील पुलावर, दसरा चौकातील सुतार वाड्यातून टायटन शोरुमजवळील पेट्रोल पंपापर्यंत, कोंडा ओळ, शाहूपुरी कुंभार गल्ली या परिसरात पुराच्या पाण्याने ठाण मांडले होते. त्यावेळी हायवेच्या सर्व्हिस रोडवरही पाणी आल्याने वाहतूक दुसऱ्या मार्गाने वळवावी लागली होती. शहराशेजारील प्रयाग चिखली, आंबेवाडी, वडणगे या गावांना पुराच्या पाण्याचा नेहमीपेक्षा जास्त काळ तडाखा बसला. येथे पुराचे पाणी जवळपास पंधरा दिवसाहून अधिककाळ होते. त्यावेळी शहरालगत नदीच्या पूररेषेत झालेल्या बांधकामांचा हा परिणाम असल्याचे अभ्यासकांचे मत होते.
ऐतिहासिक रंकाळा ओसंडला...
२६ जुलै २००५ चा दिवस कोल्हापूरकरांच्याही कायम स्मरणात राहिला. आठवडाभर पडलेल्या पावसाने रंकाळा काठोकाठ भरला होता. २५ जुलैला रात्री पावसामुळे टेंबलाई परिसरात बंधारा फुटल्याने पाणी नागरी वस्तीत घुसले. त्याच रात्री रंकाळा भरून राजघाटाजवळून वाहू लागल्याची बातमी पसरली. रात्री रंकाळा ओसंडून वाहायला सुरुवात झाली. दुसऱ्या दिवशी 'न भूतो, न भविष्यती' असा हा क्षण पाहण्यासाठी कोल्हापूरसह परिसरही लोटला. रंकाळा टॉवरमधून धबधब्यासारखे पाणी वाहू लागल्याने हा क्षण पाहण्यासाठी नागरिकांच्या झुंडी येऊ लागल्या. ओसंडून वाहणारे पाणी रंकाळा टॉवरकडून नागोजीराव पाटणकर हायस्कूलच्या दिशेने असलेल्या रंकाळा तालीम मंडळ, आयरेकर गल्लीतील लोकांच्या घरात घुसले होते. रंकाळ्याचा सांडवा बुजवून पाणी जाण्यासाठी छोटे नळ घातले होते. तत्कालीन नगरसेवक विजय साळोखे सरदार यांनी जेसीबीने नळ व सांडवा फोडून पाण्याला वाट करून दिल्यानंतर तब्बल दोन दिवसानंतर ओसंडून वाहणारा रंकाळा वाहायचा थांबला.
घरांत पाणी शिरल्याने हाहाकार
विल्सन पूल वगळता जयंती पूल. शेळके पूल, संभाजी पूल बुडाले होते. शहरातील सुतार वाडा, शाहूपुरी कुंभार गल्ली, शंकराचार्य मठ, उत्तरेश्वर पेठ गवत मंडई, लक्षतीर्थ वसाहत, सुतार मळा, कदमवाडी, भोसलेवाडी, बापट कॅम्प या परिसरातील घरात पाणी शिरले होते. जयंती नाल्याच्या पाण्याची फूग जिल्हाधिकारी कार्यालयापर्यंत पोहोचली होती. केव्हीज प्लाजा या वसाहतीत पाणी पसरले होते.
मोबाइल अॅप डाउनलोड करा आणि राहा अपडेट
