म. टा. वृत्तसेवा, कराड
चोरीच्या गुन्ह्यात अटकेत असलेला संशयित रावसाहेब लक्ष्मण जाधव (वय ४२, रा. निंबोरे ता. करमाळा, जि. सोलापूर) यांच्या कराड शहर पोलिस स्टेशनमधील कोठडीत शनिवारी झालेल्या मृत्यूप्रकरणी दोन पोलिस अधिकारी व आठ कॉन्स्टेबल अशा बारा जणांना रविवारी निलंबित करण्यात आले. तसेच या संपूर्ण प्रकरणाचा तपास सीआयडीकडे सोपविण्यात आला आहे. कोणताही गुन्हा दाखल न करता संशयिताकडे चौकशी सुरू केलेले कराड पोलिस संशयाच्या भोवऱ्यात सापडले आहेत.
याप्रकरणी शहर पोलिस ठाण्यातील वरिष्ठ पोलिस निरीक्षक विकास धस, सहायक निरीक्षक हणमंत काकंडकी यांच्यासह कॉन्स्टेबल दिलीप क्षीरसागर, अतुल देशमुख, सुधीर जाधव, राजकुमार कोळी, नितीन कदम, सुमित मोहिते, संजय काटे, अमोल पवार, शरद माने, वैभव डांगरे यांची रविवारी तडकाफडकी निलंबित करण्यात आले. साताऱ्याचे अतिरिक्त पोलिस अधिक्षक विजय पवार यांनी ही माहिती दिली.
दरम्यान, ही घटना शनिवारी घडली होती. संबधिताचा मृत्यू पोलिस मारहाणीत झाल्याचा आरोप करीत मृताच्या नातेवाईकांसह जेऊर-करमाळ्याचे शिवसेना आमदार नारायण आबा पाटील आणि त्यांच्या कार्यकर्त्यांचा जमाव रविवारी सकाळी शहर पोलिस ठाण्यात आले. आमदार पाटील यांचे बंधू राजन पाटील यांच्यासह नातेवाईकांनी रावसाहेब जाधव यांचा मृत्यू पोलिस मारहाणीतच झाल्याचा आरोप करत मारहाण करणारे पोलिस अधिकारी व कर्मचाऱ्यांवर सदोष मनुष्यवधाचा गुन्हा दाखल केल्याशिवाय मृतदेह ताब्यात न घेण्याचा पवित्रा घेतला. आंदोलकांनी शहर पोलिस ठाण्यासमोरच ठिय्या मारल्याने या प्रकरणाने गंभीर वळण घेतले.
पोलिस निरीक्षक धस यांची
मृत जाधव यांना अमानुष मारहाण
कराडमध्ये काही दिवसांपूर्वी बस दरोड्यात पाऊण कोटींचे सोने चोरीस गेले होते. हे सोने खरेदी केल्याच्या सशंयावरुन कराड शहर पोलिसांनी शुक्रवारी ( दि. १७) पहाटे पाच वाजता सोलापूर जिल्ह्यातील करमाळा तालुक्यातील निंबोरे गावातील रावसाहेब लक्ष्मण जाधव या सराफ व्यवसायिक, सामाजिक कार्यकर्ता आणि त्याचा शिक्षक मेव्हुणा अनिल दशरथ डिकोळे (३७, रा. घोटी, ता. करमाळा) या दोघांना ताब्यात घेतले होते. मात्र, या बाबतची नोंद स्थानिक पोलिस ठाण्यात करण्याची कायदेशीर बाब पूर्ण केली नव्हती. पोलिसांनी त्यांना बेकायदा ताब्यात घेऊन करमाळा-कराडपर्यंत त्यांना आमानुष मारहाण करीत आणले. कराडमध्ये आल्यानंतर येथील पोलिस ठाण्यात कोणतीही नोंद न करता शहरातील कार्वेनाका पोलिस चौकीत नेण्यात आले. तिथे काही दिवसांच्या रजेवर गेलेले कराड शहरचे वरिष्ठ पोलिस निरीक्षक विकास धस यांनी व त्यांच्या पथकातील पोलिसांनी दोघांना बेदम मारहाण करीत सोडून देण्यासाठी पंचवीस लाख रुपयांची मागणी केल्याचा आरोप प्रत्यक्षदर्शी तिथे उपस्थित असलेले साक्षीदार व मृत जाधव यांचे मेव्हुणे अनिल दशरथ डिकोळे यांनी केला आहे. शनिवारी सकाळी परत आपल्यासमोर जीवघेणी मारहाण करीत असतानाच चौकीत जागेवरच रावसाहेब जाधव यांचा मृत्यू झाला असल्याचेही अनिल डिकोळे यांचे म्हणणे आहे. काही दिवसांच्या रजेवर असतानाही तुला मारण्यासाठी मी येथे आलो आहे, माझ्या भितीने तीन वर्षांपूर्वी एकाने इमारतीवरुन उडी मारली होती, तरीही माझे येथे कोणी काय करू शकले नाही, असेही पो. नि. विकास धस यांनी दम भरत जाधव यांच्या गळ्यावर पाय दिल्याचा गंभीर आरोपही अनिल डिकोळे या मारहाणीचा प्रत्यक्षदर्शीने पत्रकारांशी बोलताना केला आहे.
यांचे तडकाफडकी निलंबन
या प्रकरणी कराड शहर पोलिस ठाण्यातील वरिष्ठ पो. नि. विकास धस, सहा. पो. नि. हणमंत काकंडकी यांच्यासह पोलिस कॉन्स्टेबल दिलीप क्षिरसागर, अतुल देशमुख, सुधीर जाधव, राजकुमार कोळी, नितीनद कदम, सुमित मोहिते, संजय काटे, अमोल पवार, शरद माने, वैभव डांगरे यांना रविवारी तडकाफडकी निलंबित करण्यात आल्याचे सातारा जिल्ह्याचे अतिरिक्त पोलिस अधीक्षक विजय पवार यांनी सांगितले. या प्रकरणाचा सीआयडी तपास सुरू झाल्याचेही पवार यांनी स्पष्ट केले.
