म. टा. वृत्तसेवा, सातारा मॅफेड्रॉन ड्रग्ज तस्करी प्रकरणामध्ये तक्रारदाराला जिल्हा विशेष सत्र न्यायालयात सोइस्कर अहवाल देण्यासाठी व नमूद गुन्ह्यातून दोषमुक्त करण्यासाठी पाच लाख रुपयांची लाच वाईचे पोलिस उपअधीक्षक दीपक हुंबरे यांच्यासाठी स्वीकारताना महाराष्ट्र नवनिर्माण सेनेचे माजी जिल्हा सरचिटणीस युवराज ढमाळ यांना मुंबई लाचलुचपत प्रतिबंधक विभागाच्या पथकाने खंडाळा येथे रंगेहाथ पकडले. हुंबरे यांना सातारा येथून पोलिसांनी ताब्यात घेतले. उपअधीक्षकाला लाचप्रकरणी पकडल्याची ही जिल्ह्यातील पहिलीच घटना असल्याने खळबळ उडाली आहे. मॅफेड्रॉन ड्रग्ज तस्करीप्रकरणी खंडाळा तालुक्यातील कण्हेरी या गावी ९ मार्च २०१५रोजी मुंबई येथील पोलिस हवालदार धर्मराज काळोखे याच्याकडून अमली पदार्थांचा मोठा साठा केल्याचे उघड झाल्यानंतर महाराष्ट्रासह अन्य राज्यांतून यांची पाळेमुळे खणण्यात पोलिसांना यश आले होते. यामध्ये बेबी पाटणकर यांच्या नातेवाईकांसह अनेक पोलिस अधिकाऱ्यांवर कारवाई झाली होती. यातच प्रयोग शाळेतून हा अंमली पदार्थ नसल्याचा दाखला बेबी पाटणकर व धर्मराज काळोखे यांना मिळाल्याने या प्रकरणाला वेगळेच वळण लागले होते. दरम्यान, खंडाळा आणि मुंबई या दोन्ही ठिकाणी या बाबत गुन्हे दाखल करण्यात आले होते. सूत्रधार बेबी पाटणकर व धर्मराज काळोखे यांना पोलिस कोठडीही देण्यात आली होती. या प्रकरणाचा तपास विभागीय पोलिस अधिकारी दीपक हुंबरे करीत होते. कोर्टात केस डिस्चार्ज करण्यासाठी अहवाल सादर करण्यासाठी दीपक हुंबरे यांनी तक्रारदाराकडे मुंबई येथे पाच लाख रुपयांची मागणी केली होती. त्यानंतर तक्रारदाराने मुंबई लाचलुचपत विभागाकडे तक्रार केली. त्यानुसार पोलिसांनी ट्रॅप लावला. शनिवारी सकाळी मुंबई येथून निघताना संबंधितांचे बोलणे फोनवरुन झाले होते. दुपारी दोन वाजण्याच्या सुमारास खंडाळा येथील हॉटेल आमराई येथे पोलिसांचे हस्तक व मनसेचे माजी सरचिटणीस युवराज ढमाळ याच्याकडे तक्रारदार यांनी पैशांची बॅग सुपूर्त केली. त्यांच्यासोबत आलेल्या लाचलुचपत विभागाच्या पथकाने रक्कमेसह युवराज ढमाळ याला ताब्यात घेतले. त्यानंतर दीपक हुंबरे सातारा येथे कोर्टात कामकाजासाठी गेल्याचे समजताच पोलिसांनी सातारा येथे दोन पथके रवाना करून दीपक हुंबरे यांना ताब्यात घेऊन खंडाळा येथे चौकशीसाठी आणले. उशीरापर्यंत त्यांची चौकशी सुरू होती. दोघांच्या घराचीही झडती रात्री उशिरापर्यंत सुरू होती.
मोबाइल अॅप डाउनलोड करा आणि राहा अपडेट
