चित्रांतून उलगडणार ‘इनव्हिजिबल माइंड’

January 18, 2016, 1:30 pm

≫ Next: विशाळगडावर व्हॅली क्रॉसिंगचा थरार

≪ Previous: 'पर्रिकरसाहेब, नेमकं काय करणार आहात?'

कोल्हापूर : जे दिसत नाही ते अदृश्य! आपण ज्या पध्दतीने अदृश्याचा विचार करतो त्यात अशीही एक छटा आहे की, अदृश्य हे कधीतरी दृश्य असतं, दिसू शकतं. चाफ्याची फुले ही खूप काही सांगून जातात. असं बोललं जातं कारण त्याचा अदृश्य असणारा सुगंध हा दृश्य रुपातून आपल्याला मोहून टाकतो. हे काम फक्त कलाकारच करू शकतो. जे सामान्य लोकांच्या नजरेत दिसत नाही तेच कलाकार हा आपल्या नजरेतून म्हणजे कलाकृतीद्वारे दाखवत असतो. काही कलाकृती अनुभवण्यापेक्षा आत्मसात करायच्या असतात. कारण त्यातील आनंद काही वेगळाच असतो. हाच आनंद चित्रकार अभिजित कांबळे आणि प्रविण वाघमारे यांच्या 'इनव्हिजिबल माइंड' या चित्रप्रदर्शनातून होतो.

प्रदर्शनात एकूण १८ कलाकृती असून त्या तैलरंग व जलरंग माध्यमात बनविल्या आहेत. प्रदर्शन रविवारपासून सुरू झाले आहे. २४ जानेवारीपर्यंत शाहू स्मारक भवनातील आर्ट गॅलरीत सकाळी साडेदहा ते रात्री साडेआठपर्यंत प्रदर्शन खुले आहे.

चित्रकार अभिजित दत्तात्रय कांबळे हातकणंगले येथील असून ते दळवीज् आर्ट इन्स्टिट्यूट येथे प्राध्यापक आहेत. व्यक्तिचित्रण, निसर्गचित्रण व तैलरंग या माध्यमात त्यांचा हातखंडा असून अनेक ठिकाणी त्यांची प्रात्यक्षिके झाली आहेत. अनेक कलाकृतींना पुरस्कार मिळाले आहेत. लहान मुलांचे विश्व, त्याला असलेल्या परंपरेचे वलय, तसेच नववधूच्या भावनांचे अदृश्य मनोविश्लेषण हे त्यांच्या कलाकृतीचे विषय आहेत. प्रत्येक कलाकृतीतील बालकांचे निरागस भाव, त्याची मांडणी व प्रत्येक कलाकृतीत असलेला चाफा हा वेगळाच अनुभव देऊन जातो.

धुळे येथील चित्रकार प्रविण रत्नाकर वाघमारे हेही दळवीज आर्ट इन्स्टिट्यूटमध्ये प्राध्यापक आहेत. रचनाचित्र व निसर्गचित्र या विषयामध्ये त्यांचा हातखंडा आहे. त्यांच्या अनेक कलाकृतीची निवड झाली असून अनेक ठिकाणी प्रात्यक्षिके व अनेक कलाकृतींना पुरस्कार मिळाले आहेत. कोल्हापुरात प्रसिद्ध असलेल्या वास्तूंचे अनेक कलाकारांनी चित्रण केले आहे. पण वाघमारे यांनी आपल्या कलाकृतींद्वारे त्या वास्तूला एक वेगळे रुप दिलं आहे. नेहमीचा तोच टिपिकलपणा टाळून त्यांनी उत्कृष्ठ रंगसंगतीतून अप्रतिम कलानिर्मिती केली आहे.

Latest Images