स्वीकृत नगरसेवकपदासाठी शेवटच्या दिवशी काँग्रेसकडून मोहन सालपे व तौफिक मुल्लानी, राष्ट्रवादीकडून प्रा. जयंत पाटील, भाजपकडून किरण नकाते तर ताराराणी आघाडीकडून माजी महापौर सुनील कदम यांचे पाच अर्ज दाखल झाल्याने त्यांची निवड निश्चित झाली आहे. बुधवारी (२० जानेवारी) सर्वसाधारण सभेत त्यांच्या निवडीवर शिक्कामोर्तब होणार आहे. पाटील व कदम हे यापूर्वी सभागृहात सदस्य असल्याने तीन नवे चेहरे सभागृहात प्रथमच येणार आहेत.
शुक्रवारी सकाळी अकरा वाजल्यापासून काँग्रेसचे गटनेते शारंगधर देशमुख, राष्ट्रवादीचे सुनील पाटील, भाजपचे विजय सूर्यवंशी व ताराराणीचे सत्यजित कदम यांनी आयुक्त पी. शिवशंकर यांच्याकडे इच्छुकांचे फॉर्म सादर केले. यावेळी चार पक्षाच्या समर्थकांनी महानगरपालिकेत मोठी गर्दी केली होती.
तीन 'कदमां'ची एंट्री
ताराराणी आघाडीने माजी महापौर सुनील कदम यांच्यावर शिक्कामोर्तब केल्याने सभागृहात विरोधी पक्षाला पाठबळ मिळणार आहे. कदम यांच्या निवडीने सत्यजित कदम व सुनील कदम या दोन कदम बंधुच्याकडे ताराराणीचे सर्व सुत्रे जाणार आहेत. सत्यजित कदम यांच्या वहिनी सीमा कदम या देखील निवडून आल्या आहेत. यामुळे एका कुटुंबातील तीन सदस्य आता सभागृहात दिसणार आहेत.
काँग्रेसची सालपे, मुलाणींना संधी
स्वीकृत नगरसेवकपदांसाठी काँग्रेस, राष्ट्रवादी, भाजप व ताराराणी आघाडीकडून इच्छुकांची मोठी संख्या होती. काँग्रेसकडून माजी नगरसेवक हरिदास सोनवणे, दिलीप भुर्के, अजित पोवार धामोडकर, मोहन सालपे, तौफिक मुल्लाणी, अमर समर्थ, राजू साबळे, विजय देसाई यांनी इच्छा व्यक्त केली होती. पण काँग्रेसने सालपे व मुल्लाणी यांच्या नावे मोहोर उमटवली. सालपे हे आमदार सतेज पाटील यांचे समर्थक असून ते कसबा बावड्यातील राम सोसायटीचे माजी अध्यक्ष आहेत. सालपे यांच्या निवडीमुळे बावड्यातील नगरसेवकांची संख्या सहा झाली आहे. मुल्लाणी हे काँग्रेस संघटनेत गेली २१ वर्षे सक्रीय असून ते अल्पसंख्याक सेलचे जिल्हाध्यक्ष आहेत. लोकसभा निवडणुकीत राहुल गांधी यांनी मुल्लाणी यांना जाहिरात प्रचारात संधी दिली होती. जम्मू काश्मीर निवडणुकीत त्यांनी निरीक्षक म्हणून काम केले आहे. प्रदेशाध्यक्ष अशोक चव्हाण यांचे ते विश्वासू असून जिल्ह्यातील राजकारणात ते सतेज पाटील व जिल्हाध्यक्ष पी. एन. पाटील यांचे जवळचे आहेत. त्यांचे नाव थेट चव्हाण यांच्याकडून आल्याचे समजते.
मोदींची संधी हुकली
भाजपनेही किरण नकाते यांना संधी दिली असल्याने माजी नगरसेवक सुनील मोदी यांची संधी हुकली आहे. नकाते आमदार महादेवराव महाडिक यांचे समर्थक असून त्यांच्यासाठी सुहास लटोरे यांनी ताकद वापरली. नकाते यांच्या प्रयत्नामुळे भाजपला तीन प्रभागात विजयाचे खाते खोलण्यास संधी मिळाली. त्याचे फळ त्यांना देण्यात आले. माजी नगरसेवक सुभाष रामुगडे, राहुल चिकोडे, विजय जाधव, श्रीकांत गुंठे, अॅड संपतराव पवार यांची नावे चर्चेत होती. पण लटोरे यांच्या आग्रहामुळे नकाते यांचे नाव निश्चित झाले.
राष्ट्रवादीचे 'क्लासटीचर' प्रा. पाटील
निवडणुकीत राष्ट्रवादीला १५ जागांवर समाधान मानावे लगल्याने यावेळी प्रा. जयंत पाटील हे एकमेव स्वीकृत नगरसेवक सभागृहात दिसणार आहे. सभागृहात राष्ट्रवादी काँग्रेसचे मोट हाकण्यासाठी काम पाटील यांना आमदार मुश्रीफ यांनी प्राधान्य दिले आहे. राष्ट्रवादीकडून माजी महापौर आर. के. पोवार, शहराध्यक्ष राजू लाटकर, माजी नगरसेवक अजित राऊत, अदिल फरास, उत्तम कोराणे, विनायक फाळके हे इच्छुक होते. पाटील हे जनसुराज्यचे असले तरी राष्ट्रवादीने त्यांना संधी दिली आहे. पाटील हे चौथ्यादा स्वीकृत नगरसेवक म्हणून सभागृहात जात आहेत.
मोबाइल अॅप डाउनलोड करा आणि राहा अपडेट