कोल्हापूर : जन्म किंवा मृत्यूचा दाखला मिळवायचा असेल तर सरकारी कार्यालयात अनेक फेऱ्या माराव्या लागतात. मात्र सरकारी कार्यालयेही नव्या तंत्रज्ञानाचा वापर करत लोकांना होणारा त्रास कमी करण्यासाठी प्रयत्नशील आहेत. आगामी दीड महिन्यात जिल्ह्यात सीआरएस संगणक प्रणालीद्वारे एका क्लिकवर जन्म-मृत्यू दाखले मिळण्याची सुविधा सुरू होणार आहे. त्यामुळे वेळ, पैसा आणि शारिरीक त्रास कमी होणार आहे.
राज्य सरकार सार्वजनिक आरोग्य विभागाच्या माध्यमातून नवीन सीआरएस संगणक प्रणालीद्वारे जन्म-मृत्यू नोंदणी करून दाखला तत्काळ कोठुनही मिळविण्याची सुविधेसाठी प्रयत्नशील आहे. या प्रणालीचे काम जिल्ह्यात सुरू आहे.
संबंधित जिल्हा परिषदेच्या कर्मचाऱ्यांना ट्रेनिंग देण्यात आले आहे. ही प्रणाली जिल्ह्यातील सर्व हॉस्पिटल्सना जोडण्यात येणार असून काही डाटा या प्रणालीत अपलोड करण्याची प्रक्रिया सुरू आहे.
सीआरएस प्रणालीसाठी राज्यातील १५ जिल्ह्यांची निवड करण्यात आली आहे. देशभर या प्रणालीचा वापर केला जात आहे. प्रत्येक गावासाठी स्वतंत्र आयडी, पासवर्ड देण्यात आले आहेत. एकदा या प्रणालीमध्ये नोंदणी केल्यानंतर मिळणाऱ्या नोंदणी क्रमांकावरून या प्रणालीमुळे कोणालाही घरबसल्या, सायबर कॅफेमधून किंवा बाहेर कोठेही कामानिमित्त गेल्यास तेथे जन्म-मृत्यू दाखल्याची प्रत ऑनलाइन मिळू शकेल. आहे. या प्रक्रियेसाठी महापालिकेच्या आरोग्य विभागाला पुण्यात ट्रेनिंग देण्यात आले होते. जिल्हा परिषदेच्यावतीने पुन्हा ट्रेनिंग देण्यात येणार आहे. लवकरच ही प्रणाली जिल्ह्यात कार्यान्वित होणार आहे.
जन्म नोंदणीचे फायदे
बाळंतपणासाठी सरकारी फायदे घेण्यासाठी, लसीकरण, शिधापत्रिकेत नावनोंदणी, शाळाप्रवेश, जातीचा दाखला किंवा रहिवाशी दाखला, कायदेशीर घोषणापत्र, पासपोर्ट, आयुर्विमा, मतदार यादीत नाव नोंदणी, वाहन चालक परवाना, नोकरी, सरकारी नोकरी, आजारपणाचा विमा, विवाह दाखला आदींसाठी जन्मनोंदणी आवष्यक आहे.
मृत्यू नोंदणीची गरज
कायदेशीर वारसाहक्क, मालमत्ता हस्तांतरासाठी, आयुर्विमा दावा, बँक आणि मुदत ठेवी, काँटुंबिक निवृत्तीवेतन, गॅस नोंदणीचे नाव बदलण्यासाठी, दूरध्वनी नोंदणी नाव बदलण्यासाठी, दूरध्वनी नोंदणी नाव बदलण्यासाठी, वीज व पाणी मीटर नाव बदलणे, मतदार यादीतील नाव कमी करण्याकरिता, ज्येष्ठ नागरिकांचे फायदे व पेन्शन आदी.
मोबाइल अॅप डाउनलोड करा आणि राहा अपडेट