Appasaheb.mali@timesgroup.com
कोल्हापूर ः लहान मुलांचे अपघात घडतात, काही वेळेला शस्त्रक्रिया करण्याशिवाय पर्याय नसतो. उपचारावेळी रक्ताची गरज भासते. पण गरीब कुटुंबांकडे पैशाची सोय नसते. पैशाची जुळवाजुळव करण्यासाठी पालकांची धावाधाव होते. रक्ताचा हा खर्च उचलण्यासाठी कोल्हापुरात 'बाल संजीवनी' निधीची उभारणी केली जात आहे. कायमस्वरूपी निधी उभारून त्या माध्यमातून गरीब आणि गरजू मुलांना रक्तासाठी अर्थरूपी टॉनिक दिले जाणार आहे.
लोकवर्गणीतून हा निधी उभारण्यात येणार आहे. गेल्या आठवड्यापासून निधी संकलनाला सुरुवात झाली आहे. रुईकर कॉलनी येथील श्री स्वामी समर्थ भक्त मंडळ ट्रस्टने याकामी पुढाकार घेतला आहे. या उपक्रमात अधिकाधिक लोकांना सामावून घेण्यासाठी जवळपास एक हजार पत्रके वितरित केली आहेत. रूईकर कॉलनी येथे फलक उभे केले आहे. समाजमनाला गरीब मुलांच्या रक्ताकरिता विशेष सवलत योजनेत सहभागाविषयी साद घातली आहे. संस्थेच्या आवाहनाला प्रतिसाद देत नागरिकांनी अर्थसाह्य करण्यास सुरुवात केली आहे. अपघात, शस्त्रक्रिया झाली की लहान मुलांना मोठ्या प्रमाणात रक्ताची गरज भासते. उपचारादरम्यान लहान मुलांच्या रक्तासाठी जो खर्च होईल, ती रक्कम ट्रस्टमार्फत दिली जाणार आहे. दरवर्षी या निधीमध्ये वाढ होत जाईल. ट्रस्टचे अध्यक्ष नारायण बुधले, प्रकाश चव्हाण, प्रा. भाऊ घाडगे, जयसिंग जाधव, शिवाजी साळोखे यांनी याकामी पुढाकार घेतला आहे.
शैक्षणिक पालकत्व योजना
पैशाअभावी कुणी शिक्षण घेण्यापासून वंचित राहू नये हा उद्देश ठेवून तीन वर्षापासून संस्थेने शैक्षणिक पालकत्व योजना सुरू केली आहे. ट्रस्टकडे जमणाऱ्या निधीतून २५ मुलांना शिक्षणासाठी दत्तक घेण्यात आले आहे. संस्था, पहिली ते दहावीपर्यंतच्या शिक्षणाचा खर्च केला जातो. शालेय फी, गणवेश, वह्या, दफ्तर, स्टेशनरी साहित्य विद्यार्थ्यांना पुरविण्यात येते.
सदगुरू ज्ञानेश्वर हरी काटकर यांच्या जयंतीचे औचित्य साधून उपक्रम सुरू केला आहे. ही योजना कायमस्वरूपी असावी याकरिता निधी उभारण्यात येणार आहे. एका रक्ताच्या पिशवीची किंमत एक हजार रुपयांहून अधिक आहे. उपचारादरम्यान काही रुग्णांना तीन-चार पिशव्या रक्त लागते. ट्रस्टमार्फत रक्तासाठी होणारा खर्च केला जाणार आहे. यामुळे गरीब कुटुंबांना आर्थिक हातभार लाभणार आहे. पहिल्या टप्प्यात कोल्हापूर शहरापुरता ही योजना मर्यादित असणार आहे.'
-नारायणराव बुधले (ट्रस्टचे अध्यक्ष)
मोबाइल अॅप डाउनलोड करा आणि राहा अपडेट
