माणसं मरायची वाट पाहता?

November 17, 2015, 12:47 pm

≫ Next: एटीएमनी दिले १२५ कोटी

≪ Previous: टोलप्रश्नावर आज मुख्यमंत्र्यांशी चर्चा

$

0

0

जिल्हाधिका‍री डॉ. सैनी यांनी दिले चौकशीचे आदेश

म. टा. प्रतिनिधी, कोल्हापूर

पंचगंगा नदीचे पाणी प्रदूषित झाल्याने शिरोळ तालुक्यातील आठ गावांचा पाण्याचा प्रश्न गंभीर बनल्याने नदी प्रदूषणाच्या मुद्यावरून जिल्हाधिकारी डॉ. अमित सैनी संतापले. याबाबत जिल्हाधिकारी कार्यालयात आयोजित केलेल्या बैठकीत बोलताना त्यांनी, माणसं मरण्याची वाट पाहणार काय? असा सवाल करीत प्रदूषणास कारणीभूत असलेल्या घटकांच्या प्रतिनिधींना धारेवर धरले.

गेल्या आठवड्यापासून शिरोळ तालुक्यात पंचगंगा नदीमध्ये प्रदूषित पाणी मिसळल्याने ग्रामस्थांच्या पिण्याचा पाण्याचा गंभीर प्रश्न निर्माण झाला आहे. काही गावांमध्ये प्रदूषित पाण्यामुळे आरोग्याचीही समस्या उद्भवली आहे, त्यामुळे प्रदूषणास संबंधित घटकांवर कारवाई करण्यासाठी स्वाभिमानी शेतकरी संघटनेने जिल्हाधिकारी डॉ. अमित सैनी यांना सोमवारी (ता.१६) निवेदन दिले होते. जिल्हाधिका-यांनी तातडीने मंगळवारी बैठक घेऊन प्रदूषण नियंत्रण मंडळ, औद्योगिक वसाहत, साखर कारखाने, कोल्हापूर महापालिका आणि इचलकरंजी नगरपरिषदेच्या अधिका-यांकडून प्रदूषण नियंत्रित करण्यासाठी केलेल्या उपाययोजनांचा आढावा घेतला. यावेळी शिरोळ तालुक्यातील नदी काठावरील नागरिकांनी कागल पंचतारांकित एमआयडीसी, इचलकरंजी शहर आणि साखर कारखान्यांकडून प्रदूषित पाणी नदीत सोडले जात असल्याचे जिल्हाधिका-यांच्या निदर्शनास आणून दिले.

जिल्हाधिकारी डॉ. सैनी यांनी संबंधितांकडून आढावा घेतल्यानंतर अजूनही औद्योगिक वसाहतीतील प्रदूषित पाणी प्रक्रिया केंद्रे(सीईटीपी) पूर्ण क्षमतेने सुरू नसल्याचे स्पष्ट झाले. प्रदूषण नियंत्रण मंडळानेही संबंधित जबाबदार घटकांवर तातडीने आणि कठोर कारवाई केली नसल्याने संतप्त झालेल्या जिल्हाधिका-यांनी प्रदूषणास कारणीभूत असलेल्या घटकांना धारेवर धरले. शिरोळ तालुक्यातील गावांमध्ये सध्या पाणी टंचाई जाणवत आहे, या स्थितीत पाणी प्रदूषित होऊनही तातडीने कारवाई होत नसल्याने संतापलेल्या जिल्हाधिका-यांनी, माणसं मरण्याची वाट पाहणार काय? असा सवाल करीत इचलकरंजीसारखा प्रकार पुन्हा घडू नये यासाठी सर्वच जबाबदार घटकांनी दक्ष राहण्याची सूचना केली. नदी प्रदूषणावरून कायदा सुव्यवस्थेचा प्रश्न निर्माण झाला तर सहन करणार नाही असा इशाराही त्यांनी दिला आहे.

अधिका‍ऱ्यांच्या दाव्याबाबत शंका

पंचतारांकित औद्योगिक वसाहतीतून दररोज सात एमएलडी पाणी बाहेर पडते. या पाण्यावर प्रक्रिया होत असल्याचा दावा सीईटीपीच्या अधिका-यांनी केला आहे, तर हे पाणी शेतकरी शेतीसाठी वापरत असल्याने एक टक्काही पाणी थेट नदीत मिसळत नसल्याचा दावा अधिका-यांनी केला. यावर जिल्हाधिका-यांनी करवीर प्रांताधिकारी आणि प्रदूषण नियंत्रण मंडळाच्या अधिका-यांना चौकशीचे आदेश दिले.

मोबाइल अॅप डाउनलोड करा आणि राहा अपडेट

---

एटीएमनी दिले १२५ कोटी

November 17, 2015, 12:55 pm

≫ Next: वकिलांच्या अर्जाला हरकत

≪ Previous: माणसं मरायची वाट पाहता?

$

0

0

Maruti.Patil@timesgroup.com

कोल्हापूर : दिवाळी सणामध्ये सलग पाच दिवस आलेल्या सुट्यांमुळे बँकानी मेगा हॉलिडे साजरा केला. मात्र, त्याचा ग्राहकांच्या रोखीच्या व्यवहारांवर कोणताही परिणाम झाला नाही. सुट्यांच्या काळात शहरातील दीडशे एटीएम सेंटरमधून तब्बल १२५ कोटी रुपयांचा व्यवहार (विथ्ड्रॉल) झाला. एटीएममध्ये होणारी गर्दी लक्षात घेऊन शहरातील १९ राष्ट्रीयीकृत व खासगी बँकांनी आगाऊ रकमेची व्यवस्था केली होती. एटीएममधून झालेल्या व्यवहारांतून अनेकांनी खरेदी करत दिवाळीचा आनंद द्विगुणित केला. सुटीच्या काळात बँक ऑफ इंडिया २२ कोटी व एचडीएफसी बँकेच्या एटीएममधून २० कोटी रुपये काढण्यात आले.

बँकांमध्ये पूर्वी एटीएमटी सुविधा नव्हती त्यावेळी पैसे जमा किंवा काढण्यासाठी ग्राहकांना बँकेत जाण्याशिवाय पर्याय नव्हता. यामुळे सुटीपूर्वी किंवा सुटीनंतर बँकांमध्ये ग्राहकांची रोखीचे व्यवहार करण्यासाठी प्रचंड गर्दी होत होती. मात्र, बँकिंग क्षेत्रात वाढलेल्या स्पर्धेमुळे राष्ट्रीयीकृत बँकेसह खासगी बँका अत्याधुनिक सेवा पुरवत आहेत. नेटबँकिंग, मोबाइल बँकिंग, फोन बँकिंग, डिबेट कार्ड आणि एटीएम यांसारख्या सुविधा पुरवल्या जात आहेत. नोकरी, व्यवसायानिमित्त व्यस्त असलेल्या ग्राहकांना बदललेल्या सुविधा अधिक आकर्षित करत आहेत. घरबसल्या किंवा ऑफिसमध्ये बसून असे रोखीचे व्यवहार करण्याकडे सर्वांचाच कल वाढत आहे. यामुळे सुटीच्या दिवसांत पैसे काढणे ग्राहकांना अधिक सुलभ बनत आहे. याचा प्रत्यय नुकत्याच पाच दिवसांच्या मेगा हॉलिडेमध्ये दिसून आला आहे.

दिवाळीला मंगळवारपासून सुरुवात झाली. मंगळवार वगळता बुधवारी लक्ष्मीपूजन, पाडवा त्यानंतरचा शुक्रवार वगळता दुसरा शनिवारी व रविवार असा सलग सुटीचा मेगा हॉलिडे आल्याने बँकिंग कर्मचाऱ्यांत आनंदाचे वातावरण होते. सलग सुट्यांमुळे धनादेश आणि डीडी वितरणाचे काम ठप्प झाले असले, तरी ग्राहकांनी एटीएममधून पैशाची उचल करत सुट्यांचा परिणाम बँकिंग व्यवहारावर झाला नसल्याचे स्पष्ट झाले आहे. अनेकांना एटीएमचाच मोठा आधार होता. अग्रणी बँक असलेल्या बँक ऑफ इंडियाच्या जिल्ह्यातील ९० एटीएम सेंटरमधून दिवसाला साडेचार कोटी याप्रमाणे पाच दिवसांत २२ कोटी रुपये काढण्यात आले.

बँकिंग प्रणालीमध्ये वेगाने बदल घडून येत आहेत. नेट बँकिंग, मोबाइल बँकिंग, एटीएम, आदी सुविधांमधून ग्राहक आर्थिक व्यवहार करत आहेत. बँकांना सलग सुट्या असल्या तरी एटीएममुळे त्याचा व्यवहारावर कोणताही परिणाम झाला नाही. सुटीच्या पाच दिवसांत बँक ऑफ इंडियाच्या ९० एटीएम सेंटरमधून ग्राहकांनी तब्बल २२ कोटी ५० लाख रुपये काढले.

- गुलाम हुसेन पैलवान, आयटी व्यवस्थापक, बँक ऑफ इंडिया

मोबाइल अॅप डाउनलोड करा आणि राहा अपडेट

वकिलांच्या अर्जाला हरकत

November 17, 2015, 12:52 pm

≫ Next: समीरचा विनंती अर्ज फेटाळला

≪ Previous: एटीएमनी दिले १२५ कोटी

$

0

0

म. टा. प्रतिनिधी, कोल्हापूर

ज्येष्ठ नेते कॉम्रेड गोविंदराव पानसरे यांच्या हत्येप्रकरणी अटकेत असलेला संशयित समीर गायकवाड याच्या वकिलांच्या अर्जाला सरकारी वकिलांनी हरकत घेतली. खटल्यासंबधी गोपनीय माहिती देण्यासाठी समीरला कोर्टात हजर करावे अथवा त्याला जी माहिती लिहून द्यावयाची आहे त्यासाठी कोर्टाने कारागृह अधीक्षकांना आदेश द्यावेत, अशी मागणी केली होती. प्रथम वर्ग न्यायदंडाधिकारी आर.डी. डांगे यांच्यासमोर मंगळवारी दोन्ही वकिलांनी युक्तिवाद केल्यानंतर समीरला कोर्टात हजर करावयाचे की नाही याबाबत बुधवारी (ता.१८) निर्णय देण्यात येणार आहे.

सात नोव्हेंबरच्या सुनावणीवेळी समीरचे वकील अॅड. वीरेंद्र इचलकरंजीकर यांनी समीरला गोपनिय व निर्णायक माहिती द्यावयाची असल्याने त्याला कोर्टात हजर करावे असा आदेश कोर्टाने द्यावा अथवा समीरने लेखी म्हणणे द्यावे यासाठी कळंबा कारागृह अधीक्षकांना आदेश द्यावा अशा मागणीचा अर्ज केला होता. या संदर्भात सरकारी पक्षाला म्हणणे मांडण्यासंबधी मंगळवारी सुनावणी झाली.

विशेष सरकारी अभियोक्ता चंद्रकांत बुधले यांनी युक्तिवाद केला. आरोपींच्या वकिलांनी केलेल्या विनंतीनुसार कोर्टाला आदेश देणे बंधनकारक आहे का?. संशयिताने लेखी म्हणणे लिहून द्यावे असे कारागृह अधीक्षकांना सांगण्याचा आदेश देणे न्यायालयाची कार्यपध्दती नाही. कोर्ट संशयिताला माहिती दे असे सांगू शकत नाही. संशयिताने दिलेली माहिती त्याचे वकील कोर्टात सांगू शकतात. अशी माहिती कारागृहात गोपनीय राहूच शकत नाही.

समीरला कोर्टात ताबडतोब हजर करण्याचा आदेश आवश्यक नाही. कायद्याच्या कोणत्याही तरतुदीशिवाय समीरच्या वकिलांनी अर्ज दिला आहे. समीरला येणाऱ्या अडचणी कारागृह अधीक्षक कायद्याच्या कक्षेत अडचणी सोडवू शकतात. कारागृहात कैद्याला पेन, कागद उपलब्ध करून देता येते. कैदी कोर्टात ती माहिती पाठवू शकतात.

समीरचे वकील अॅड. सुहास पटवर्धन यांनी युक्तिवाद करताना, समीरला कोर्टात हजर करावे अशी मागणी केली. समीरला कारागृहातून जी गोपनीय माहिती द्यावयाची आहे ती कारागृह अधीक्षकांच्या माध्यमातून येणार असल्याने ती गोपनीय राहू शकत नाही. समीरला कारागृहातून कोर्टात आणण्यास नकार दिला जातो. ही तर व्यक्तिस्वातंत्र्यावरील बंदी आहे.

पानसरे कुटुंबीयांच्यावतीने अॅड. विवेक घाटगे यांनी युक्तिवाद करताना, समीरच्या वकिलांना सनसनाटी घडवायचा हेतू आहे. त्याच्या वकिलांनी दाखल केलेल्या अर्जास दहा दिवस उलटून गेले आहेत. या कालावधीत समीरला जी माहिती द्यावयाची होती ती टपालाने दोन दिवसात पोहोचली असती याकडे त्यांनी लक्ष वेधले.

मोबाइल अॅप डाउनलोड करा आणि राहा अपडेट

समीरचा विनंती अर्ज फेटाळला

November 18, 2015, 5:17 am

≫ Next: चार वर्षांच्या मुलीसह आईची रंकाळ्यात आत्महत्या

≪ Previous: वकिलांच्या अर्जाला हरकत

$

0

0

पानसरे हत्या तपास

म. टा. प्रतिनिधी, कोल्हापूर

ज्येष्ठ नेते कॉम्रेड गोविंदराव पानसरे यांच्या हत्येप्रकरणी अटक करण्यात आलेला संशयित आरोपी समीर गायकवाडच्या वकिलांनी केलेला अर्ज प्रथम वर्ग न्यायदंडाधिकारी आर डी डांगे यांनी फेटाळला आहे. समीरला खटल्यासंबधी लेखी निवेदन द्यायचे असल्याने कारागृह अधिक्षकांना कोर्टाने आदेश द्यावेत, असा विनंती अर्ज वकिलांमार्फत करण्यात आला होता. पण कारागृह अधीक्षकांच्या हक्कामध्ये हस्तक्षेप करण्यास कोर्टाने नकार देत अर्ज फेटाळला.

समीरचे वकील विरेंद्र इचलकरंजी यांनी समीरला खटल्यासंबधी लिखित गोपनीय माहिती दयायची असल्याने कोर्टाने कारागृह अधीक्षकांना आदेश द्यावेत, असा विनंती अर्ज केला होता. या अर्जाला विशेष सरकारी वकील चंद्रकांत बुधले यांनी हरकत घेत कारागृह कायद्यात हस्तक्षेप होईल, असा युक्तीवाद केला होता. हा युक्तीवाद ग्राह मानून कोर्टाने आज या अर्जावर निकाल दिला.

कोर्टाने दिलेल्या आदेशात सविस्तर महाराष्ट्र प्रिझन मॅन्युअलमधील कायदा व कलमांचा उल्लेख केला आहे. या कायद्यातील चॅप्टर ३१ मधील ४ प्रमाणे कारागृहातील कच्च्या कैद्यांना योग्य सुविधा दिल्या जातात. कच्चे कैदी जो संवाद साधतात तो सेन्सॉर करण्याचे अधिकार कारागृह अधीक्षकांना असतात. जेल मॅन्युअलप्रमाणे कारागृहातील कैद्यांना पत्रव्यवहार करता येतो. पण जर पत्रव्यवहार अयोग्य असेल व हरकती घेण्यासारखा असेल तर कायद्यानुसार कारागृह अधीक्षक त्यात हस्तक्षेप करू शकतात. तसेच अयोग्य मजकूर खोडूही शकतात. त्यामुळे कारागृह अधीक्षकांना कोर्टाने आदेश देणे हे कारागृह अधीक्षकांच्या हक्कामध्ये हस्तक्षेप केल्यासारखे होईल, असे न्यायालयाने नमूद केले.

मोबाइल अॅप डाउनलोड करा आणि राहा अपडेट

चार वर्षांच्या मुलीसह आईची रंकाळ्यात आत्महत्या

November 18, 2015, 6:26 am

≫ Next: एफआरपीबाबत आज पुण्यात बैठक

≪ Previous: समीरचा विनंती अर्ज फेटाळला

$

0

0

म. टा. प्रतिनिधी, कोल्हापूर

चार वर्षाच्या मुलीसह महिलेने रंकाळा तलावात आत्महत्या केली असून बुधवारी दुपारी चारच्या सुमारास दोघींचे मृतदेह तलावात आढळले. राजश्री मच्छिंद्र वायदंडे (वय २९, रा. बोंद्रे नगर, फुलेवाडी) व समृध्दी (४) अशी मृतांची नावे आहेत. जुना राजवाडा पोलिस ठाण्यात आत्महत्येची नोंद झाली आहे.

रंकाळा तलाव उद्यानाच्या अंबाई तलावाच्या बाजूला पाण्यात दोघांचे मृतदेह उद्यानातील माळ्याच्या निदर्शनास आले. त्याने ताबडतोब जुना राजवाडा पोलिसांना याबाबत माहिती दिली. त्यानंतर अग्निशमन दलाच्या जवानांनी मृतदेह बाहेर काढल्यानंतर नातेवाईकांकडून मृतदेहाची ओळख पटवण्यात आली.

याबाबत जुना राजवाडा पोलिस ठाण्याचे सहाय्यक पोलिस निरीक्षक एस.एस. काळभोर यांनी माहिती दिली. मंगळवारी सकाळपासून राजश्री व तिची मुलगी बेपत्ता होती. तिचे नातेवाईक शोध घेत होते पण त्यांनी बेपत्ता असल्याची पोलिस ठाण्यात नोंद केलेली नाही. राजश्रीचा पती मच्छिंद हा शेतमजूर आहे. राजश्री हॉस्पिटलमध्ये काम करत होती. ११ वर्षापूर्वी त्यांचा विवाह झाला असून जयसिंगपूरजवळील कोथळी हे तिचे माहेर आहे. तिला नऊ वर्षाचा यश व सात वर्षाचा प्रेम अशी दोन मुले आहेत.

मोबाइल अॅप डाउनलोड करा आणि राहा अपडेट

एफआरपीबाबत आज पुण्यात बैठक

November 18, 2015, 12:51 pm

≫ Next: गुळाचा गोडवा वाढणार

≪ Previous: चार वर्षांच्या मुलीसह आईची रंकाळ्यात आत्महत्या

$

0

0

म. टा. प्रतिनिधी, कोल्हापूर

चालू गळीत हंगामातील एकरकमी एफआरपीचा तिढा सोडवण्यासाठी गुरुवार (ता.१९) पुणे येथील साखर संकुलात सकाळी ११ वाजता बैठक होणार आहे. सहकारमंत्री चंद्रकांत पाटील यांच्या अध्यक्षतेखाली होणाऱ्या बैठकीस राज्य साखर संघाचे अध्यक्ष, उपाध्यक्ष, कारखानदार आणि शेतकरी संघटनांच्या प्रतिनिधींना निमंत्रित केले आहे. कारखानदारांनी व शेतकरी संघटनांनी घेतलेल्या भूमिकेमुळे राज्यातील साखर उद्योगाचे बैठकीकडे लक्ष लागले आहे.

केंद्र सरकारने निश्चित केलेली एफआरपी रकम एकरकमी देण्यास साखर दरामुळे अडचणीत असल्याने तीन टप्प्यात एफआरपी देण्याचा ठराव अनेक साखर कारखान्यांनी वार्षिक सभेत घेतला होता. कारखान्यांच्या निर्णयाला शेतकरी संघटनांनी विरोध करत एकरकमी एफआरपीची मागणी केली होती. स्वाभिमानी शेतकरी संघटनेने तर कोल्हापूर प्रादेशिक साखर सहसंचालक कार्यालयावर मोर्चा व जयसिंगपूर येथील ऊसपरिषदेमध्ये निर्वाणीचा इशारा देत सहा डिसेंबरपर्यंत सरकार व कारखानदारांना अल्टीमेटम् दिला होती.

ऊस दरावरुन कायदा व सुव्यवस्थेचा प्रश्न निर्माण होऊ नये, यासाठी मुख्यमंत्री फडणवीस व सहकारमंत्री पाटील यांनी चर्चेतून मार्ग काढण्याचे आवाहन केले होते. अशी चर्चा घडवून आणण्यासाठी साखर संकुलात बैठक घेण्याचा निर्णय पाटील यांनी जाहीर केला होता.

मोबाइल अॅप डाउनलोड करा आणि राहा अपडेट

गुळाचा गोडवा वाढणार

November 18, 2015, 12:52 pm

≫ Next: हुपरी मारामारीप्रकरणी सातजण अटकेत

≪ Previous: एफआरपीबाबत आज पुण्यात बैठक

$

0

0

म. टा. प्रतिनिधी, कोल्हापूर

जगभर प्रसिद्ध असलेल्या कोल्हापुरी गुळाच्या नावाने कर्नाटक आणि इतर ठिकाणाहून भेसळीचे प्रकार घडल्याने कोल्हापुरी गुळाच्या दर्जावर शंका उपस्थित केली जात होती. असा प्रकार वारंवार घडू नये आणि कोल्हापुरी गुळाचा दर्जा कायम राहावा, यासाठी अन्न व औषध प्रशासनाने गूळ उत्पादकांसाठी परवाने घेणे बंधनकारक केले होते. या निर्णयाला गूळ उत्पादकांनीही उत्स्फुर्त प्रतिसाद दिल्याने गुळाचा दर्जा वाढण्यास मदत होणार आहे.

गेल्या काही वर्षात दर्जामुळे गूळ उत्पादक शेतकऱ्यांना आर्थिक फायदा होत होता, मात्र दोन-तीन वर्षांपासून गुळाला आकर्षक रंग प्राप्त व्हावा यासाठी काही ठिकाणी रासायनिक रंगाचा वापर झाल्याचे उघडकीस आले होते. कर्नाटक आणि इतर ठिकाणावरून कोल्हापूर कृषी उत्पन्न बाजार समितीत येणाऱ्या गुळात भेसळीचे प्रकार आढळल्याने अन्न व औषध प्रशासनाने व्यापारी आणि गूळ उत्पादक शेतकऱ्यांवर कारवाईला सुरुवात केली होती. मागीलवर्षी एका व्यापाऱ्यावर कारवाई केल्यानंतर संतापलेल्या व्यापाऱ्यांनी पाच दिवस गूळ खरेदी बंद ठेवली होती. हंगामाच्या अखेरीस परवाने घेण्याची सक्ती अन्न व औषध प्रशासनाने केल्यानंतर गेल्या वर्षी अवघ्या पाच गूळ उत्पादकांनी परवाने घेतले होते. भेसळीमुळे गुळाच्या दर्जाबाबत प्रश्नचिन्ह निर्माण झाल्याने प्रशासनाने गूळ उत्पादक शेतकऱ्यांचे होणारे नुकसान लक्षात आणून दिले. परवाने मिळाल्याने गुळाची थेट निर्यात करण्याची मुभा मिळत असल्याचे आणि याबाबतचा खर्चही फारसा नसल्याचे शेतकऱ्यांना समजल्याने चालू हंगमात शेतकऱ्यांनी स्वतःहून परवाने घेणे सुरू केले आहे. आजवर १५० शेतकऱ्यांनी गूळ निर्मितीचे परवाने घेतले आहेत.

परवाना काढण्यासाठी आवश्यक कागदपत्रे

गूळनिर्मितीसाठी गुऱ्हाळ मालकाचे मतदार किंवा आधार कार्ड, रहिवाशाचा दाखला, जागेचा सात-बारा उतारा आणि पाच वर्षांसाठी ५०० रुपये फी याची पूर्तता अन्न व औषध प्रशासन कार्यालयाकडे केल्यास अवघ्या एका दिवसात परवाना मिळू शकतो.

गूळ उत्पादकांना परवाने देण्याबरोबरच शास्त्रोक्त पद्धतीने कमी खर्चात आणि दर्जेदार गूळ निर्मितीसाठी मार्गदर्शन करण्याचे काम सध्या अन्न व औषध प्रशासन विभागाकडून सुरू आहे. दर्जा कायम राहिला तर कोल्हापुरी गुळाचा लौकिक कायम राहील.

- संपत देशमुख, सहायक आयुक्त, अन्न व औषध प्रशासन, कोल्हापूर

अधिकृत गूळ निर्मिती परवान्यांची उपयुक्तता शेतकऱ्यांच्या लक्षात आली आहे. या प्रक्रियेतून गुळाचा दर्जा सिद्ध होत असल्याने आता दर्जेदार गुळाचा आर्थिक फायदा शेतकऱ्यांनाही मिळाला पाहिजे.

- भगवान काटे, जिल्हाध्यक्ष, स्वाभिमानी शेतकरी संघटना

मोबाइल अॅप डाउनलोड करा आणि राहा अपडेट

हुपरी मारामारीप्रकरणी सातजण अटकेत

November 18, 2015, 12:54 pm

≫ Next: महाडिक पॅटर्न चालणार का?

≪ Previous: गुळाचा गोडवा वाढणार

$

0

0

म. टा. वृत्तसेवा, हुपरी

हुपरी (ता. हातकणंगले) येथे शेजाऱ्याच्या घराचे उंबरे पूजने, लिंबू टाकणे, करणी करतो अशी खोटी माहिती लोकांमध्ये पसरवत असल्याच्या कारणावरून हुपरीत म्हेतर कुटुंबियात झालेल्या मारामारीप्रकरणी सात जणांना अटक करण्यात आली. त्यांना कोर्टात हजर केले असता न्यायालयीन कोठडीत ठेवण्याचे आदेश दिले. मंगळवारी ही मारामारी झाली होती. यामध्ये चांदी कारखानदार असोसिएशनचे संचालक रामदास म्हेतर व त्यांच्या भाऊ संतोष म्हेतर यांच्या कूटुंबियांना घरात घुसून बेदम मारहाण केल्या प्रकरणी सात जणांविरूद्ध हुपरी पोलिस ठाण्यात गुन्हा दाखल झाला आहे.

याबाबत अधिका माहिती अशी, म्हेतर कुटुं‌बिय हुपरी (ता. हातकणंगले) येथे विठ्ठल मंदीर जवळील नारायण चौकामध्ये राहतात. म्हेतर कूटूंबिंयामध्ये अनेक दिवसापासून वाद होत होता. गेल्या काही महिन्यांमध्ये म्हेतर कुटुंबियांचे अमावस्येला उंबरे पूजण्याचा प्रकार घडला होता. यामध्ये रामदास म्हेतर व त्यांचे कंटूंबिय नाहक आपली नावे पसरवत असल्याची शंका घेऊन रावसाहेब म्हेतर, युवराज म्हेतर, योगेश म्हेतर, व्यंकटेश म्हेतर, ओमकार म्हेतर, गजानन म्हेतर आदींनी रामदास म्हेतर व संतोष म्हेतर यांना जाब विचारला यातून झालेल्या मारामारी मध्ये संतोष म्हेतर जखमी झाला. यावेळी घरात घुसून महिलांना लाथा-बुक्यांनी मारहाण करत चांदीचे व्यवसायाचे ४० हजारांचे नुकसान झाले आहे.

या प्रकरणी रावसाहेब म्हेतर यांच्यासह सात जणांवर गुन्हा दाखल होवून त्यांना अटक करण्यात आली. त्यांना हुपरी इचकरंजी कोर्टात हजर केले असता त्यांना न्यायालयीन कोठडीची आदेश झाला.

मोबाइल अॅप डाउनलोड करा आणि राहा अपडेट

---

महाडिक पॅटर्न चालणार का?

November 18, 2015, 12:55 pm

≫ Next: ‘दौलत’चा हंगाम गेला वाया

≪ Previous: हुपरी मारामारीप्रकरणी सातजण अटकेत

$

0

0

अजय जाधव, जयसिंगपूर

शिरोळी तालुक्यात उल्हास पाटील हे शिवसेनेचे आमदार आहेत. मात्र येथील राजकारणावर राष्ट्रवादी काँग्रेसचे प्रदेश सरचिटणीस राजेंद्र पाटील-यड्रावकर, काँग्रेसचे गणपतराव पाटील, स्वाभिमानीचे खासदार राजू शेट्टी यांची पकड आहे. यामुळे विधानपरिषदेच्या चुरशीच्या निवडणुकीत यांची भुमिका महत्त्वाची ठरणार आहे. आमदार महादेवराव महाडिक यांना पुन्हा उमेदवारी मिळाल्यास बदलत्या समिकरणामध्ये महाडिक पॅटर्न चालणार का हा प्रश्न आहे. तर सतेज पाटील यांना शिरोळ तालुक्यातील संपर्क तसेच आमदार हसन मुश्रीफ यांचे पाठबळ जमेचे ठरणार आहे.

विधानपरिषद निवडणुकीच्या पार्श्वभूमीवर आमदार महादेवराव महाडिक व माजी गृहराज्यमंत्री सतेज पाटील यांनी शिरोळ तालुक्यात स्थानिक नेत्यांची तसेच नगरसेवकांची भेट घेतली. यानंतर आता पी. एन. पाटील व माजी मंत्री प्रकाश आवाडे यांनी आम्हीही इच्छुक असल्याचे स्पष्ट केल्याने काँग्रेसची उमेदवारी कोणाला मिळणार याकडे तालुक्याचे लक्ष लागले आहे. तालुक्यात जयसिंगपूर व कुरूंदवाड नगरपालिकेत काँग्रेस व राष्ट्रवादीची सत्ता आहे. यामुळे येथील मतदारांचे पाठबळ मिळविण्यासाठी महाडिक व सतेज पाटील यांनी 'फिल्डींग' लावली आहे.

विधानपरिषदेमध्ये गेली अठरा वर्षे प्रतिनिधीत्व करणाऱ्या आमदार महादेवराव महाडिक यांनी दिवाळीपुर्वी शिरोळ तालुक्याचा दौरा केला. खासदार राजू शेट्टी, शरद साखर कारखान्याचे चेअरमन राजेंद्र पाटील यड्रावकर यांच्यासह अन्य स्थानिक नेते तसेच जिल्हापरिषद सदस्य व नगरसेवकांची भेट घेऊन चर्चा केली. महाडिक यांमया दौऱ्यामुळे चर्चेला उधान आले असतानाच सतेज पाटील यांनीही शिरोळ तालुक्यातील नेत्यांबरोबरच नगरसेवकांच्या गाठीभेटी घेतल्या.

सन २००९ च्या निवडणुकीत आमदार महाडिक यांना शिरोळ तालुक्यातून पाठबळ मिळाले होते. यामुळे आता २०१५ चे विधानपरिषदेचे 'टार्गेट' साध्य करण्यासाठी त्यांनी नगरसेवकांची थेट भेट घेऊन बंद खोलीत चर्चा केली. शिरोळ तालुक्यात जयसिंगपूर नगरपालिकेत २३ तर कुरूंदवाड पालिकेत १७ सदस्य आहेत. या दोन्ही पालिकांवर काँग्रेस, राष्ट्रवादीची सत्ता आहे. जयसिंगपुरात नगरपालिकेची सूत्रे शरद साखर कारखान्याचे चेअरमन राजेंद्र पाटील-यड्रावकर यांमयाकडे आहेत. कुरूंदवाडमध्ये तीन काँग्रेसचे, आठ राष्ट्रवादीचे तर सहा अपक्ष सदस्य आहेत. शिरोळ पंचायत समितीचे सभापतीपद तसेच पाच जिल्हापरिषद सदस्य स्वाभिमानीकडे आहेत.

गतवर्षी काँग्रेस, राष्ट्रवादीने विधानसभा निवडणूक स्वबळावर लढविली. या दोन्ही पक्षांच्या भांडणात शिवसेनेला लाभ झाला. शिरोळ तालुक्यातील हक्काची जागा काँग्रेसला गमवावी लागली. याची सल काँग्रेस व राष्ट्रवादीतील नेत्यांना आहे. आता विधानपरिषद निवडणुकीला एकत्र सामोरे जाण्याचा निर्णय या दोन्ही पक्षांनी घेतला आहे. महाडिक व सतेज पाटील यांच्यापाठोपाठ आता पी.एन.पाटील व प्रकाश आवाडे यांनीही शड्डू ठोकल्याने चर्चा रंगू लागली आहे.

मोबाइल अॅप डाउनलोड करा आणि राहा अपडेट

‘दौलत’चा हंगाम गेला वाया

November 18, 2015, 12:57 pm

≫ Next: मंगळवारी निर्धार परिषद

≪ Previous: महाडिक पॅटर्न चालणार का?

$

0

0

संपत पाटील, चंदगड

आज चालू होणार, उद्या चालू होणार.. अशा केवळ घोषणाच हलकर्णी (ता. चंदगड) येथील दौलत कारखान्याबाबत कानी येत आहेत. दौलत या हंगामात सुरु होईल याकडे चंदगड तालुक्यातील सभासद, शेतकरी व कामगार आस लावून बसला असताना यंदाच्या हंगामातही दौलतची मशिनरी भंगारातच जाणार आहे. गळीत हंगामाला प्रारंभ होऊन जिल्ह्यातील अन्य कारखाने सुरु झाले आहेत. दौलत चालविण्यास देण्याबाबत जिल्हा बँकेने चार वेळा निविदा काढूनही त्याला फारसा प्रतिसाद मिळाला नाही. दौलतबाबत अद्याप केवळ प्रयत्नच सुरु असल्याने दौलतचे भवितव्य सध्यातरी अंधकारमय दिसत आहे. स्थानिक नेतेमंडळी दौलत चालू करण्यासाठी प्रयत्न करण्याएवजी एकमेकांवर आरोप-प्रत्यारोप करत आहेत.

चौथा हंगामही बंदच...

दौलतवरील कर्जामुळे आज चौथ्या हंगामातही दौलत बंद आहे. दौलत बंदमुळे तालुक्याचा विकासही खुंटला आहे. दौलत कारखाना सद्या के. डी. सी. सी. (जिल्हा बँक) च्या ताब्यात आहे. दौलतबाबत केडीसीसीने चार वेळा निविदा काढूनही फारसा प्रतिसाद मिळाला नाही. दौलतवरील कर्जाचा आकडा दिवसेनदिवस मोठा होत असल्याने चालवायला घ्यायला येणारे अनेकदा विचार करत आहेत. त्यात दौलत राजकारणाचा बळी ठरल्यामुळे येणारी पार्टी धजत नाही. तालुक्याच्या प्रमुख नेतेमंडळी एकवाक्यता नाही. जिल्हा बँकेच्या प्रयत्नांनाही अनेकदा यश न आल्याने चौथ्या हंगामातही दौलत सध्या बंद अवस्थेत आहे.

भरल्या स्वत:च्या तुंबड्या

एकेकाळी दौलत कारखान्यामध्ये नोकरी करणे प्रतिष्ठेचे मानले जायचे. मात्र दौलत म्हणजे खाबुगिरीचा अड्डा समजून दौलतवर सत्ता भोगणाऱ्यांनी केवळ स्वतःचा विकास करुन घेतला. दौलतकडे शेतकऱ्यांच्या ऊसाचे पैसे, कामगारांचे थकीत पगार, परतीच्या बिनपरतीच्या ठेवी, शेअर्स रक्कम आदी मोठ्या प्रमाणावर रकमा अडकल्या आहेत. दौलतची विक्री करुन जवळपास चाडेचारशे कोटीपेक्षा अधिक रक्कम आली तरच सर्वांची देणी मिळू शकतील. २०११ मध्ये साखर जप्त केल्याने शेतकऱ्यांचे ७५ कोटी रुपये अद्याप न्यायालयात अडकले आहेत.

दोन पाटलांमुळे वाद

दौलत कारखाना जिल्हा बँकेच्या ताब्यात आहे. तो सुरु करण्यासाठी बँकेचे चेअऱमन हसन मुश्रीफ यांनी तालुक्यातील प्रमुख तिन्ही नेते, शेतकरी, कामगार व सभासदांची कारखान्यावर बैठक घेतली होती. या बैठकीमध्ये सर्वाधिकार मुश्रीफ यांना देण्यात आले. मात्र त्यांचेही अद्यापही प्रयत्नच सुरु आहेत. स्थानिक नरसिंग पाटील, गोपाळ पाटील व भरमू पाटील यांनी एकत्र आले. मात्र त्यांच्याच एकवाक्यता नसल्यामुळे दौलतचे घोंगडे अद्यापही भिजत आहे. दौलत बचाव संघर्ष समितीच्या वतीनेही दौलत चालवायला देण्याबाबत स्थानिक लोकांच्यामध्ये जनजागृती करुन उठाव करण्याचा प्रयत्न केला. मात्र शेतकऱ्यांचा नेत्यांच्यावरील विश्वास उडाल्यामुळे कोणीही स्वतःच्या खिशातील पैसे द्यायला तयार आहे. जिल्हा बँकेमध्ये शेतकऱ्यांनीच स्वतःच्या नावावर ठेवी ठेवून बँकेला ते तारण म्हणून देवून कारखाना सुरु करण्यासाठी प्रयत्न झाले. मात्र या ही प्रयत्नाला यश आले नाही.

दौलत होता राजकारणाचा अड्डा

दौलतवर बऱ्याच काळ माजी आमदार नरसिंग पाटील यांची सत्ता होती. ते स्वतः नरसिंगराव पाटील चेअरमन असले तरी त्यांना आमदार व अन्य उच्च पदांची लॉटरी लागल्यामुळे त्यांचे कारखान्याकडे दुर्लक्ष झाले. कारखान्याचा वापर राजकीय अड्डा म्हणून केला, गावपातळीवरील निवडणुकामध्ये कारखान्याचा पैसा वापरला गेला, गचाळ व्यवस्थापन व राजकीय वसुलेबाजीमुळे कारखाना रसातळाला गेला. दौलत चालविण्यासाठी ज्यांनी प्रयत्न करायला हवे होते. त्यांनी पोटतिडकीने प्रयत्न केले नाहीत. ज्यांनी प्रयत्न केले, त्यांना अनेक अडचणींना तोंड द्यावे लागले. पाच वेळा टेंडर झाली. कोणीही भरली नाही. हत्तीसारखे फुगत चाललेल्या कर्जाचा डोंगर यामद्ये टेंडरला प्रतिसाद मिळत नाही. दिवसेनदिवस कर्जाचा आकडा फुकत चालल्यामुळे टेंडरला अपेक्षित प्रतिसाद न मिळाला नाही.

विक्रीकर विभागाची नोटीस

१५ दिवसांपूर्वी विक्रीकर विभागाने साडेपंधरा कोटी रुपये भरण्यासंदर्भात कारखान्याला नोटीस बजावली आहे. तसेच कारखान्याच्या संचालकांची मुदतही संपून गेली आहे. चंदगड तालुक्यामध्ये १० हजार ९७१ हेक्टर उसाचे क्षेत्र आहे.

नेत्यांची केवळ भाषणबाजीच

कारखाना सुरू करण्याबाबत अनेकदा झालेल्या प्रयत्नांमध्ये नेत्यांनी मोठमोठी भाषणे ठोकली. यामध्ये माजी आमदार नरसिंग पाटील, माजी अध्यक्ष गोपाळ पाटील आणि अन्य नेत्यांनी भाषणबाजीत वेळ मारून नेली. मात्र, तीन वर्षांपूर्वी ताबा घ्यायला गेलेल्या जिल्हा बँकेच्या कर्मचा ऱ्यांना मारहाण करण्यास याच नेत्यांनी प्रोत्साहन दिले होते. याच कारणामुळे एकही पार्टी कारखाना चालविण्यास पुढे येत नाही.

कारखाना शेतकऱ्यांचा रहावा यासाठी प्रयत्न आहे. विरोधकांची कारखाना विक्री करण्याची भूमिका आहे. कारखान्यांकडील ठेवीदारांनी कोर्टात दावा दाखल केले आहेत. कारखाना वाचविण्यासाठी तालुक्यातील जनतेची मानसिकता बदलण्याची गरज आहे. लोकांनी पुढे येवून कारखाना वाचविण्यासाठी मदत करावी. मुख्यमंत्र्यांना भेटून सहकारातील कारखाना वाचविण्यासाठी विनंती करणार आहे.

- नरसिंग पाटील, माजी अध्यक्ष

मोबाइल अॅप डाउनलोड करा आणि राहा अपडेट

मंगळवारी निर्धार परिषद

November 18, 2015, 12:59 pm

≫ Next: मॉलमध्ये घुसले अतिरेकी...

≪ Previous: ‘दौलत’चा हंगाम गेला वाया

$

0

0

पानसरेंच्या खुन्यांच्या शोधासाठी आयोजन

म. टा. प्रतिनिधी, कोल्हापूर

ज्येष्ठ नेते कॉम्रेड गोविंद पानसरे यांचे खुनी व त्यामागील सूत्रधारांचा शोध घेण्यासाठी पानसरे यांच्या जन्मदिनी मंगळवारी (२४ नोव्हेंबर) शाहू स्मारक भवन येथे सायंकाळी सहा वाजता जाहीर निर्धार परिषदेचे आयोजन केल्याची माहिती निमंत्रक अनिल म्हमाने यांनी पत्रकार परिषदेत दिली.

डॉ. दाभोलकर, कॉ. पानसरे व डॉ. कलबुर्गी या पुरोगामी विचारवंतांची हत्या झाली. पानसरे यांच्या हत्येप्रकरणी सनातन संस्थेचा प्रमुख संशियत साधक समीर गायकवाड याला पोलिसांनी अटक केली आहे; पण याप्रश्नी मुख्यमंत्री कोणतेही भाष्य करत नाहीत. या पार्श्वभूमीवर यापुढे चौथा खून आम्ही होऊ देणार नाही, असा निर्धार करत मंगळवारी निर्धार सभेचे आयोजन केले आहे. परिषदेचे प्रमुख वक्ते डॉ. बाबूराव गुरव असून, अध्यक्षस्थान डॉ. ज. रा. दाभोळे भूषवणार आहेत. अॅड आर. बी. शरमाळे यांच्या हस्ते परिषदेचे उद्घाटन होणार आहे,

अध्यासनासाठी लाखाची देणगी

राजर्षी छत्रपती शाहू कॉलेज सेवकांकडून कॉम्रेड पानसरे अध्यासनासाठी एक लाखाची देणगी शुक्रवारी (ता.२०) शाहू कॉलेज येथील एका ​कार्यक्रमात देण्यात येणार असल्याची माहिती प्राचार्य राजेंद्र कुंभार यांनी दिली. ज्येष्ठ विचारवंत प्रा. एन. डी. पाटील यांच्या मार्गदर्शनाखाली निधी संकलन सुरू आहे. पानसरे यांच्या कार्याविषयी कृतज्ञता म्हणून व त्यांचे प्रबोधनाचे कार्य पुढील काळात सुरू ठेवण्यासाठी लोक अध्यासनाची निर्मिती करण्यात आली आहे.

२५ हजार पुस्तकांची भेट

पानसरे अध्यासनास निर्मिती विचारमंचच्यावतीने २५ हजार रुपयांची पुस्तके भेट देण्यात येणार आहेत. पुरोगामी विचारांच्या प्रसारासाठी पुस्तकांची भेट देण्यात येणार असल्याचे अनिल म्हमाने यांनी सांगितले.

तरंग लघुपटाद्वारे पानसरेंना लाल सलाम !

पानसरे हत्येनंतर सर्वसामान्य माणसामध्ये कशाप्रकारे भावनिक आघात झाला यांचे चित्रण हळुवारपणे टिपण्याचा प्रयत्न तरंग या लघुपटाद्वारे दिग्दर्शक मोहित घाटगे यांनी केला आहे. पानसरे आणि असंघटित कामगार फेरीवाल्यांचा मानवी संवाद व्यक्त करणारा हा एक वेगळ्या धाटणीचा लघुपट आहे. पानसरेंच्या माणूसपणाचा व न्यायाचा धागा पकडताना कामगार नेता, विचारवंत, फेरीवाल्यांची संघटना या कामाची नोंद घेण्यात आली आहे. शुक्रवारी सकाळी दहा वाजता शाहू कॉलेज येथे प्रीमिअर शोचे आयोजन केले आहे. समाजवादी प्रबोधिनीचे प्रसाद कुलकर्णी यांच्यासह दिग्दर्शक मोहित घाटगे, निर्माते ओंकार पाटील, ऋतुराज जाधव, मयूर कांबळे, सुमेध घोरपडे, कांतिलाल कांबळे, अनिकेत कांबळे, अजित सुतार, कलाकार मोहन तराळ, करण गावडे, अदिती तर्डेकर उपस्थित राहणार आहेत.

मोबाइल अॅप डाउनलोड करा आणि राहा अपडेट

मॉलमध्ये घुसले अतिरेकी...

November 18, 2015, 1:00 pm

≫ Next: उपसाबंदी लागू होणार

≪ Previous: मंगळवारी निर्धार परिषद

$

0

0

पॅरिस हल्ल्याच्या पार्श्वभूमीवर पोलिसांचे मॉकड्रील

म. टा. प्रतिनिधी, कोल्हापूर

टेंबलाई उड्डाण पुलाजवळील मॉलमध्ये सहा अतिरेकी घुसल्याची माहिती कळताच अधिकाऱ्यांसह शंभर पोलिस घटनास्थळी ताबडतोब दाखल झाले. जलदगती कारवाई सुरू झाली. पोलिसांनी मॉलला चारही बाजूंनी वेढा घातला. पोलिस अधिकारी व कर्मचाऱ्यांनी पोझिशन घेतली. जलद कृती दलाच्या पथकाचे दोन विभाग करण्यात आले. डोक्याला बांधलेले काळे फडके, काळा टी शर्ट आणि हातात एके ४७ एसएलआर घेतलेले कमांडो पुढील दरवाजा व बाजूच्या दरवाजाने घुसले आणि त्यांनी तीन अतिरेक्यांचा खात्मा केला, तर जखमी तिघा अतिरेक्यांना जिवंत पकडण्यात आले. हे ऑपरेशन पाहण्यासाठी उड्डाणपुलावर मोठी गर्दी होती. पण हे मॉकड्रील होते हे समजल्यावर नागरिकांनी सुटकेचा निःश्वास सोडला.

पॅरिसवरील दहशतवादी हल्ल्यामुळे पोलिस दल सतर्क आहे. अतिरेकी कारवायांच्या पार्श्वभूमीवर बुधवारी सकाळी साडेदहा वाजता मॉकड्रील घेण्यात आले. स्टार बझारमध्ये सहा अतिरेकी घुसल्याची माहिती मिळताच शहर पोलिस अधीक्षक भारतकुमार राणे यांच्यासह राजारामपुरी, शाहूपुरी, जुना राजवाडा व लक्ष्मीपुरी पोलिस ठाण्याचे निरीक्षक पोलिस दलासह घटनास्थळी आले. अतिरेक्यांशी लढाई करणारे जलद कृती पथकाचे वीस जणांचे पथक घटनास्थळी आहे.

अतिरिक्त पोलिस अधीक्षक एस. चैत्यन्य घटनास्थळी आले. त्यांच्या मार्गदर्शनानुसार पोलिसांनी मॉलला चारही बाजूंनी वेढा घातला. जलद कृती दलाच्या पथकाचे दोन विभाग करण्यात आले. एके ४७ व एसएलआर घेतलेले कमांडो पुढील व मागच्या दरवाजाने मॉलमध्ये घुसले. त्यांनी गोळीबारात तीन अतिरेक्यांना टिपले.

त्यानंतर डॉग स्कॉड व बॉम्बशोधक पथकाने कारवाई सुरू केली. डॉगने दोन बॉम्ब शोधून काढले. घटनास्थळीच बॉम्बशोधक पथकाने ते निकामी करून टाकले. सुमारे तासाभराच्या प्रयत्नानंतर मॉकड्रील करण्यात आले. मॉकड्रील करण्यासापूर्वी मॉलच्या प्रशासनाला कल्पना देऊन मॉलमधील ग्राहकांना सूचना देण्यात आल्याने गोंधळ उडाला नाही. ग्राहकांनीही सहकार्य केले. पोलिसांच्या सूचनाही त्यांनी पाळल्याने पोलिसांबरोबर नागरिकांचाही मॉकड्रीलमधील सहभाग महत्त्वाचा ठरला.

मोबाइल अॅप डाउनलोड करा आणि राहा अपडेट

उपसाबंदी लागू होणार

November 18, 2015, 1:03 pm

≫ Next: समीर गायकवाडचा जामीन अर्ज फेटाळला

≪ Previous: मॉलमध्ये घुसले अतिरेकी...

$

0

0

Uddhav.Godase@timesgroup.com

कोल्हापूरः पावसाळा संपताच आता कोल्हापूर जिल्ह्यालाही दुष्काळाच्या झाळा बसू लागल्या आहेत. गेल्या वर्षाच्या तुलनेत जिल्ह्यातील धरण आणि तलावांमधील पाणीसाठे खालावल्याने मे महिन्यापर्यंत पाणी पुरणार नाही. यातच शेतीसाठी पाण्याचा वापर वाढत असल्याने पंचगंगा नदीतील पाणीउपसा बंद करण्यात येणार आहे. सिंचन विभागाने शेतकऱ्यांसाठी नवीन ऊस लावणीला बंदी घातल्याने दुष्काळाची दाहकता जाणवू लागली आहे.

राज्यातील सर्वाधिक पावसाच्या जिल्ह्यांमध्ये समाविष्ठ असलेल्या कोल्हापूर जिल्ह्यात यावेळी राज्यातील निचांकी पाऊस पडला आहे. एकीकडे अपुऱ्या पावसाने खरीप हंगामातील कृषी उत्पन्नात घट झाली आहे, तर दुसरीकडे पाणीटंचाईने रब्बी आणि बागायतीलाही मोठा फटका बसणार आहे. सध्या जिल्ह्यात दूधगंगा नदीतील पाणी उपसा करण्यास पाटबंधारे विभागाने बंदी घातली आहे. हीच स्थिती पंचगंगा नदीसाठीही लागू करण्याचा विचार आहे. येणाऱ्या महिन्याभरात पंचगंगा नदीसाठीही उपसाबंदी लागू होऊ शकते. ही उपसाबंदी महिन्यातील ठराविक दिवसांसाठी असणार आहे.

राधानगरी वगळता इतर प्रकल्प पूर्ण क्षमतेने भरलेले नाहीत. कागल तालुक्यातील चिकोत्रा खोरे आणि हातकणंगले, शिरोळ तालुक्यातील पंचगंगा नदीच्या पात्रात टंचाई जाणवू लागली आहे.

पाण्याची गरज वाढली

जिल्ह्यात साडेतीन लाख हेक्टर जमीन सिंचनाखाली आहे. लघु आणि मध्यम पाटबंधारे प्रकल्प वगळता मोठ्या प्रमाणात क्षेत्र नदीतील पाण्यावर अवलंबून आहे. १ जून ते १५ ऑक्टोबर दरम्यान धरणांमधून पाणी सोडण्याची गरज नसते, मात्र उर्वरित काळात शेतीसाठी १५ वेळा पाणी सोडावे लागते. सध्या कमी पावसामुळे जमिनीतील ओल कमी झाल्याने आणि तलाव, विहिरींमधील पाणीपातळी खालावल्याने नदीतील पाण्याचा वापर वाढणार आहे.

जिल्ह्यात कमी पाऊस झाल्याने बरेचसे प्रकल्प अपेक्षित प्रमाणात भरलेले नाहीत. लवकरच पंचगंगा नदीसाठीही ठराविक दिवसांसाठी उपसाबंदी लागू होईल.

- विजय पाटील, कार्यकारी अभियंता

मोबाइल अॅप डाउनलोड करा आणि राहा अपडेट

समीर गायकवाडचा जामीन अर्ज फेटाळला

November 18, 2015, 1:04 pm

≫ Next: ‘आयआरबी’शी चर्चा करा

≪ Previous: उपसाबंदी लागू होणार

$

0

0

म. टा. प्रतिनिधी, कोल्हापूर

ज्येष्ठ नेते कॉ. गोविंदराव पानसरे यांच्या हत्येप्रकरणी अटक करण्यात आलेला संशयित सनातन संस्थेचा कार्यकर्ता समीर गायकवाड याच्या वकिलांनी केलेला अर्ज प्रथम वर्ग न्यायदंडाधिकारी आर.डी. डांगे यांनी फेटाळला.

समीरला खटल्यासंबधी लेखी निवेदन द्यावयाचे असल्याने कारागृह अधिक्षकांना कोर्टाने आदेश द्यावेत असा विनंती अर्ज केला होता. पण कारागृह अधीक्षकांच्या हक्कामध्ये हस्तक्षेप करण्यास कोर्टाने नकार देत अर्ज फेटाळला. समीरचे वकील वीरेंद्र इचलकरंजीकर यांनी समीरला खटल्यासंबधी लिखित गोपनीय माहिती दयावयाची असल्याने कोर्टाने कारागृह अधीक्षकांना आदेश द्यावेत, असा विनंती अर्ज केला होता. या अर्जाला विशेष सरकारी अभियोक्ता बुधले यांनी हरकत घेतली.

मोबाइल अॅप डाउनलोड करा आणि राहा अपडेट

‘आयआरबी’शी चर्चा करा

November 18, 2015, 1:05 pm

≫ Next: ‘निष्ठे’चा ‘अर्थ’ लवकरच कळेल

≪ Previous: समीर गायकवाडचा जामीन अर्ज फेटाळला

$

0

0

म. टा. प्रतिनिधी, कोल्हापूर

शहरातील आयआरबी कंपनीचे टोलनाके बंद करण्याबाबत बुधवारी (ता.१८) मुख्यमंत्री देवेंद्र फडणवीस आणि सार्वजनिक बांधकाममंत्री चंद्रकांत पाटील यांची बैठक झाली. या बैठकीत टोलमुक्तीबाबतचे विविध पर्याय मुख्यमंत्र्यांसमोर सादर केल्यानंतर आयआरबी कंपनीशी चर्चा करण्याच्या सूचना त्यांनी मंत्री चंद्रकांत पाटील यांना दिल्या. दरम्यान, ३० नोव्हेंबरपूर्वी टोलचा प्रश्न निकालात काढू, असा विश्वास चंद्रकांत पाटील यांनी व्यक्त केला आहे.

राज्य सरकारने कोल्हापुरातील रस्ते विकास प्रकल्पाचे पुनर्मूल्यांकन केल्यानंतर तीन महिन्यांसाठी टोल वसुलीला स्थगिती दिली होती. ही स्थगिती ३० नोव्हेंबरला संपत असल्याने राज्य सरकारकडून पर्याय काढण्यास यंत्रणा गतिमान झाली आहे. सार्वजनिक बांधकाममंत्री चंद्रकांत पाटील यांनी मंगळवारी मुंबई येथे सचिवस्तरीय अधिकाऱ्यांशी चर्चा केल्यानंतर बुधवारी मुख्यमंत्री देवेंद्र फडणवीस आणि चंद्रकांत पाटील यांची बैठक पार पडली. या बैठकीत पाटील यांनी टोलमुक्तीबाबत विविध पर्याय मुख्यमंत्र्यांसमोर मांडले. यानंतर मुख्यमंत्र्यांनी आयआरबी कंपनीशी चर्चा करण्याची सूचना त्यांना केली आहे.

राज्य सरकारने नेमलेल्या पुनर्मूल्यांकन समितीने रस्ते विकास प्रकल्पाचे मूल्यांकन केल्यानंतर रस्ते विकास प्रकल्पावर १९२ कोटी रुपये खर्च झाल्याचा अहवाल राज्य सरकारकडे सादर केला होता, तर आयआरबी कंपनीने ४७३ कोटी रुपये खर्च झाल्याचा दावा करीत व्याजासहीत रक्कम मिळावी असा आग्रह धरला होता. राज्य सरकारने आयआरबीच्या विरोधात निर्णय घेत टोलमुक्तीचा निर्णय रेटल्यास आयआरबी कंपनी कोर्टात जाऊ शकते, त्यामुळे आयआरबी कोर्टात जाऊ नये असा तोडगा काढण्यासाठी कंपनीशी चर्चा केली जाणार आहे. आयआरबीशी चर्चा करून ३० नोव्हेंबरपूर्वी टोलमुक्तीचा अंतिम निर्णय घेऊन अधिसूचना काढू, असा विश्वास चंद्रकांत पाटील यांनी व्यक्त केला आहे.

दरम्यान, टोल विरोधी कृती समितीने संपूर्ण टोलमुक्तीचा आग्रह कायम ठेवला आहे. टोल हद्दपार करताना शहरातील नागरिकांवर कोणतेही छुपे कर लादू नयेत, अन्यथा पुन्हा आंदोलन करण्याचा इशारा दिला आहे.

आयआरबीसोबत विविध पर्यायांवर चर्चा हणार आहे. कंपनीने सांगितलेली ४७३ कोटींची रक्कम कमी करण्यावर राज्य सरकारचा भर असेल. रक्कम निश्चितीनंतर ती भागवायची कशी याचा निर्णय होणार आहे. महापालिकेने यापूर्वीच कंपनीला शहरातील एक भूखंड दिला आहे, याची रक्कम वजा करून उर्वरित रक्कम वसुलीचे पर्याय शोधले जाणार आहेत.

गेल्या चार वर्षांच्या आंदोलनांनंतर अनेकदा शहरातील टाेलवसुली चालू आणि बंदही करण्यात आली होती. आता सरकारने याबाबत अंतिम तोडग्यासाठी प्रयत्न सुरू केल्याने टोल हद्दपार होण्याची शक्यता आहे.

मोबाइल अॅप डाउनलोड करा आणि राहा अपडेट

---

‘निष्ठे’चा ‘अर्थ’ लवकरच कळेल

November 19, 2015, 12:41 pm

≫ Next: कृषी धोरणांचा ‘पालापाचोळा’

≪ Previous: ‘आयआरबी’शी चर्चा करा

$

0

0

दीपक मांगले, गडहिंग्लज

विधानपरिषद निवडणुकीच्या पार्श्वभूमीवर गडहिंग्लजचे राजकीय वातावरण ढवळून निघणार आहे. स्वतःच्या राजकीय अस्तित्वासाठी जिल्ह्याची नेतेमंडळी झगडत असून विधानपरिषदेच्या उमेदवारीसाठी गाठीभेटी वाढल्या आहेत. माजी गृहराज्यमंत्री सतेज पाटील, पी. एन. पाटील व महादेवराव महाडिक यांनी उमेदवारीवर आपला हक्क सांगत तयारीला सुरूवात केली आहे. मात्र स्थानिक पातळीवर पक्षीय उमेदवारीला सर्वाधिक संधी आहे. याउपर नेत्यावरील 'निष्ठा' श्रेष्ठ की 'अर्थ' हेही येणारा काळच ठरवेल.

गडहिंग्लज नगरपालिकेवर सध्या जनता दलाची सत्ता असली तरी आजही तालुक्यात राष्ट्रवादीचाच बोलबाला आहे. नगरपालिका, पंचायत समितीसह जिल्हा परिषदेत बहुतांश चेहरे राष्ट्रवादीचे आहेत. मुश्रीफ यांची पकड घट्ट आहे.

जिल्हा परिषेदत तालुक्यातून शैलजा पाटील, शिवप्रसाद तेली, अप्पी उर्फ विनायक पाटील, जयकुमार मुन्नोळी व मीनाताई जाधव अशी राष्ट्रवादीची सक्षम फळी आहे. तर पंचायत समितीवर सुद्धा राष्ट्रवादीचीच सत्ता आहे. त्यामुळे तालुक्यात आमदार मुश्रीफ यांचा शब्द मानणारी संख्या अधिक आहे. मात्र अद्याप राष्ट्रवादीकडून उमेदवार जाहीर नसल्यामुळे पुढची वाटचाल गुलदस्त्यात अशी परिस्थिती आहे.

राष्ट्रीय काँग्रेसची गडहिंग्लजमधील परिस्थती पाहता 'असून वांदे नसून खोळंबा' अशीच म्हणावी लागेल. कोल्हापूर जिल्हात राष्ट्रीय काँग्रेसचे माजी गृहराज्यमंत्री सतेज पाटील यांचा दबदबा असला तरी त्यांचा गडहिंग्लज तालुक्यात वावर खूपच कमी आहे. तालुक्यात अंजना रेडेकर, विद्याधर गुरबे, बी. एन. पाटील-गिजवणेकर यांच्यासारखी नेतेमंडळी त्यांचा गड राखून आहेत. मात्र काँग्रेसच्या झेंड्याखालील मतदारांची संख्या जवळपास नाहीच.

कोल्हापूर महानगरपालिकेनिमित्त आमदार मुश्रीफ, सतेज पाटील व जनसुराज्यचे विनय कोरे यांनी थाटलेला घरोबा अखंड राहील अशी आशा आहे. आमदार मुश्रीफ आणि सतेज पाटील यांचे सख्य पाहता येथे खरा 'चमत्कार' घडू शकेल. महायुतीतील घटक पक्ष असलेले भाजप-शिवसेनाने केंद्रासह राज्यात 'चमत्कार' घडवला असला तरी कोल्हापूर जिल्ह्यात मात्र त्यांना हाती फारसे काही गवसलेले नाही. तीच परीस्थिती गडहिंग्लज तालुक्यात असून पक्ष एक मात्र नेते डझनभर अशी अवस्था शिवसेनेची तर राज्यात आणि केंद्रात सत्तेत असून गडहिंग्लजची झोळी रिकामी अशी स्थिती भाजपची आहे.

मोबाइल अॅप डाउनलोड करा आणि राहा अपडेट

कृषी धोरणांचा ‘पालापाचोळा’

November 19, 2015, 12:42 pm

≫ Next: ‘राज्य नाट्य’ची घंटा रात्री दहालाच

≪ Previous: ‘निष्ठे’चा ‘अर्थ’ लवकरच कळेल

$

0

0

uddhav.godase@timesgroup.com

कोल्हापूर : शेतातील पिकाचा पालापाचोळा जाळण्यापेक्षा मातीखाली मुजवण्याचा सल्ला कृषी विद्यापीठ आणि कृषी संशोधन केंद्र देते, मात्र जगाला तत्त्वज्ञान शिकवणारेच स्वतः मात्र मनमानी कारभार करीत आहेत. महात्मा फुले कृषी विद्यापीठांतर्गत कसबा बावडा येथील कृषी संशोधन केंद्रात शेतातील पालापाचोळा कुजवून खत करण्याऐजी चक्क पेटवून देण्यात आला आहे. विशेष म्हणजे ही चूक मान्य करण्याऐवजी अधिकाऱ्यांकडून या कृतीचे समर्थन केले जात आहे.

जगाला शिकवी जत्त्वज्ञान आणि स्वतः कोरडा पाषाण या सर्वश्रूत म्हणीचा प्रत्यय कसबा बावड्यातील कृषी संशोधन केंद्रात वारंवार येतो. या ठिकाणी मका आणि गव्हाच्या बियाणांची पैदास केली जाते. इथे तयार होणारे बियाणे राज्य सरकारच्या कृषी विभागामार्फत राज्यभर पोहोचवले जाते. बियाणे विकसित करण्यासाठी या केंद्राला सतरा हेक्टर जमिन मिळाली आहे. या जमिनीत मका, गहू, ऊस, भाताची पिके घेतली जातात. कृषी विद्यापीठाच्या मार्गदर्शनाने शेती पिकवली जाते, मात्र या परिसरावर नजर टाकली तर इथल्या कर्मचाऱ्यांची आणि अधिकाऱ्यांची टिपिकल सरकारी मानसिकता नजरेत भरते. कृषी संशोधन विभागाने एक एकर जमिनीत नुकतेच भात पीक घेतले होते. यांत्रिक मशिनच्या सहायाने भात काढल्यानंतर उरलेले भाताचे पिंजर मातीत मुजवण्याऐवजी इथल्या कर्मचाऱ्यांनी चक्क जाळून टाकले आहे. याबाबत कृषी संशोधन केंद्राचे प्राचार्य के. के. माणगावे यांची भेट घेतली असता, त्यांनी या कृतीचे समर्थन केले. भाताच्या खोडातील किडीचा परिणाम पुढील पिकावर होऊ नये यासाठी पिंजर जाळल्याचे कारण त्यांनी सांगितले, परंतु खोड कीड असेल तर पाचट, किंवा पिंजर जमिनीत खोलवर मुजवण्याचा सल्ला कृषी विभागाकडून दिला जातो.

भात, ऊस, गहू अशा पिकांचे पाचट किंवा पिंजर जमिनीत मिसळल्यास एकरी किमान तीन टन सेंद्रीय खत मिळते. शिवाय जमिनीचा पोत सुधारण्यासही याची मदत होते, त्यामुळे पिंजर जमिनीत मिसळावे यासाठी कृषी विभागाने जनजागृती मोहीमच हाती घेतली होती. शेतकऱ्यांनी याचा अवलंब करावा यासाठी आधी कृषी संशोधन केंद्राने याचा आदर्श घालून देण्याची गरज असताना, इथे मात्र 'जगाला शिकवी तत्त्वज्ञान, आणि स्वतः कोरडे पाषाण' अशीच स्थिती आहे. खुद्द जबाबदार अधिकारीच चुकीच्या कृतीचे समर्थन करीत असल्याने या विभागाच्या अजब कारभाराविषयी आश्चर्य व्यक्त केले जात आहे.

कृषी संशोधन केंद्राकडे एकरभर जागेत भात पिक होते. मनुष्यबळाची कमतरता असल्याने यांत्रिक मशिनच्या सहायाने भाताची मळणी केल्यानंतर गव्हाची टोकण करण्यासाठी भाताचे पिंजर जाळले. भाताची उरलेली खोडे आणि पिंजर जाळणे चुकीचे नाही.

- डॉ. के. के. माणगावे, प्राचार्य, कृषी संशोधन केंद्र

भाताच्या पिंजारामधून मातीला पोटॅश आणि सिलिका ही अन्नद्रव्ये मिळतात. यामुळे मातीची सेंद्रीय खताची गरज काही प्रमाणात पूर्ण होते, शिवाय मातीची पाणी टिकवून ठेवण्याची क्षमताही पाच पट वाढते, त्यामुळे पाचट जमिनीत मिसळणे शेतीसाठी अधिक फायद्याचे आहे.

- डॉ. अशोक पिसाळ, विस्तार कृषीविद्यावेत्ता

मोबाइल अॅप डाउनलोड करा आणि राहा अपडेट

‘राज्य नाट्य’ची घंटा रात्री दहालाच

November 19, 2015, 12:43 pm

≫ Next: ‘व्हॉट‍्सअॅप कोल्हापुरी’च भारी

≪ Previous: कृषी धोरणांचा ‘पालापाचोळा’

$

0

0

म. टा. प्रतिनिधी, कोल्हापूर

हौशी कलाकारांचे हक्काचे व्यासपीठ असलेल्या आणि व्यावसायिक रंगभूमीचा मार्ग सुकर करण्याची संधी देणाऱ्या राज्यनाट्य स्पर्धेतील दुपारच्या प्रयोगांचा प्रश्न अखेर सुटला. संपूर्ण स्पर्धा शाहू स्मारक भवनमध्येच घेण्यात येणार असून, सर्व नाटकांचे प्रयोग रात्री दहा वाजताच होतील, या पर्यायाला स्पर्धक रंगकर्मींनीही दुजोरा दिला. २४ नोव्हेंबर ते १० डिसेंबर या काळात होणाऱ्या या स्पर्धेत एकूण पंधरा नाट्यसंस्थांचे प्रयोग सादर होतील. त्यामुळे गेल्या काही दिवसांपासून राज्यनाट्य स्पर्धेचा टायमिंग घोळ संपला असून राज्यनाट्यची तिसरी घंटा रात्री दहा वाजताच वाजणार आहे.रंगकर्मी आणि स्पर्धेची समन्वयक समिती यांच्यात झालेल्या चर्चेअंती हा निर्णय घेण्यात आला. २४ ते ३० नोव्हेंबरअखेर सायंकाळी सहा ते रात्री नऊ या वेळेत श्रमिक प्रतिष्ठानच्या व्याख्यानमालेतील शाहू स्मारकमधील बुकिंग अगोदरच झाल्याने या काळातील प्रयोग दुपारी एक वाजता घेण्याचे नियोजन कला संचालनालयाने केले. मात्र, दुपारच्या वेळी नाटकातील युवा रंगकर्मींच्या परीक्षा आहेत आणि दुपारी प्रेक्षक येण्याची शक्यता धूसर असल्याच्या कारणावरून या सात संघांनी प्रयोग रात्रीच व्हावेत, अशी आग्रही मागणी केली. त्यासाठी प्रसंगी स्पर्धा पुढे ढकलावी अशी भूमिकाही स्थानिक समन्वयकांकडे मांडली. केशवराव भोसले नाट्यगृहातील यंत्रणा तांत्रिकदृष्ट्या अपूर्ण आहे, या साऱ्या पार्श्वभूमीवर अखेरचा पर्याय म्हणून संबंधित नाट्यसंस्थेच्या पदाधिकाऱ्यांनी श्रमिक प्रतिष्ठानच्या पदाधिकाऱ्यांची भेट घेऊन व्याख्याने अर्धा ते एक तास अगोदर घेण्याची विनंती केली. प्रतिष्ठानने ही विनंती मान्य करून सहकार्य करण्याची ग्वाही दिल्यानंतर सर्व नाटकांचे प्रयोग रात्री दहा वाजता सुरू करण्यावर शिक्कामोर्तब करण्यात आले. बैठकीला अध्यक्ष विलास रणसुभे, मेघा पानसरे, दिलीप पवार, आनंदराव परुळेकर, मिलिंद यादव, पवन खेबूडकर, दिलीप बापट, रसिया पडळकर आदींसह स्पर्धा समन्वयक मिलिंद अष्टेकर आदी उपस्थित होते.

मोबाइल अॅप डाउनलोड करा आणि राहा अपडेट

‘व्हॉट‍्सअॅप कोल्हापुरी’च भारी

November 19, 2015, 12:45 pm

≫ Next: सत्तेबाबत खदखद कायमच

≪ Previous: ‘राज्य नाट्य’ची घंटा रात्री दहालाच

$

0

0

राज्यात कोल्हापुरी पॅटर्न राबविण्याचे आदेश

Satish.Ghatage@timesgroup.com

कोल्हापूर : चार महिन्यांपूर्वी कोल्हापूर पोलिस दलाने व्हॉटस् अॅपवर नागरिकांनी तक्रारी देण्याचे आवाहन केल्यानंतर जिल्ह्यातून या उपक्रमास चांगला प्रतिसाद लाभला. दिवसभरात सरासरी १२ ते १५ तक्रारी येतात आणि त्यांची तडही लावली जाते. व्हॉटस् अॅपवर तक्रार हा कोल्हापुरी पॅटर्न राज्यातही सुरू करण्याचे आदेश राज्याच्या पोलिस महासंचालकांनी सर्व परिक्षेत्रांना दिले आहेत.

महिलांच्या छेडछाडप्रकरणी कोल्हापूर पोलिस दलाने दीड वर्षापूर्वी मोबाइलवर तक्रार करा, असा उपक्रम सुरू केला होता. पोलिसांनी मोबाइल व्हॅनही सुरू केली होती. छेडछाडविरोधी पथक जागेवर जाऊन कारवाई करत होते. ज्येष्ठ नेते कॉ. गोविंदराव पानसरे हत्येचा तपास करताना कोल्हापूर पोलिसांनी हत्येसंबधी माहिती देण्यासाठी मोबाईल नंबर दिला. दोन्ही उपक्रमांत चांगला प्रतिसाद लाभल्यानंतर व्हॉटस् अॅपवर तक्रारी दाखल करा, असे आवाहन पोलिस दलाकडून चार महिन्यांपूर्वी केले होते.

पोलिसांनी व्हॉटस अॅपवर तक्रारी करण्यासाठी दोन मोबाइल क्रमांक दिले असून, ते पोलिस कंट्रोल रूमला अॅटॅच असतात. व्हॉटस् अॅपवर आलेल्या तक्रारीची नोंद ताबडतोब घेतली जाते. मटका, जुगार, दारूचा धंदा सुरू असल्याची माहिती नागरिक व्हॉटस् अॅपवर देत आहेत. युवापिढीसुद्धा परिसरात घडलेल्या घटना फोटो व व्हिडिओसह व्हॉटस् अॅपवर पाठवतात. कोणत्या भागात वाहतुकीची कोंडी झाली आहे, अपघात घडला आहे याची माहिती मिळते. आक्षेपार्ह आलेल्या पोस्टही पोलिसांच्या व्हॉटस् अॅपवर पाठवल्या जातात. या सर्व पोस्ट, तक्रारीची पोलिस दलाकडून नोंद घेतली जाते. युवतींकडून छेडछाडीच्या तक्रारींसंबधी पोस्ट येतात.

व्हॉटस् अॅपवर आलेली तक्रार संबंधित पोलिस ठाण्याच्या निरीक्षकांकडे पाठवली जाते. कोल्हापूर पोलिस दलातील २७ निरीक्षकांचा ग्रुप असून, प्रत्येक पोलिस ठाण्याचा व्हॉट्स अॅपचा ग्रुप आहे. पोलिस निरीक्षक संबंधित बीट अंमलदाराकडे तक्रार पाठवतात. त्यानंतर कारवाई केली जाते. कारवाईची पोस्ट पुन्हा वरिष्ठ अधिकाऱ्यांना पाठवली जाते. स्वतः पोलिस अधीक्षक रोज व्हॉटस् अॅपवरील तक्रारीची नोंद घेतात.

कोल्हापूर पोलिसांनी सुरू केलेल्या या उपक्रमाची नोंद राज्य पातळीवर घेण्यात आली आहे. राज्याचे पोलिस महासंचालक प्रवीण दीक्षित यांनी प्रत्येक परिक्षेत्रात जिल्हानिहाय व्हॉटस् अॅप क्रमांक सुरू करण्याचे आदेश दिले आहेत. व्हॉट्स अॅपवर तक्रार, हा कोल्हापूर पॅटर्न राज्याने उचलला आहे.

व्हॉटस् अॅप कोल्हापूर पॅटर्न' या उपक्रमाला युवा वर्गाकडून अतिशय चांगला प्रतिसाद मिळतो आहे. युवावर्ग संवेदनशील असून अपघात, ट्रॅफिक जॅम, आक्षेपार्ह पोस्टची माहिती पोलिसांच्या व्हॉटस् अॅपवर पाठवतात. जलद कारवाईसाठी होत आहे. नागरिकांनी ९५५२३२८३८३, ७२१८०३८५८५ वर तक्रारी कराव्यात.

- मनोजकुमार शर्मा, पोलिस अधीक्षक

मोबाइल अॅप डाउनलोड करा आणि राहा अपडेट

सत्तेबाबत खदखद कायमच

November 19, 2015, 12:46 pm

≫ Next: टोलचा भुर्दंड कोणावर?

≪ Previous: ‘व्हॉट‍्सअॅप कोल्हापुरी’च भारी

$

0

0

Udaysing.Patil@timesgroup.com

कोल्हापूर : पंधरा वर्षे लाभलेल्या सलग सत्तेमुळे काँग्रेस व राष्ट्रवादी काँग्रेस या मोठ्या व छोट्या भावांमध्ये एकमेकांच्या शक्तीबाबत निर्माण झालेल्या अहंभावाला लोकसभा, विधानसभा निवडणुकीच्यानिमित्ताने धक्का बसला. त्यातून शहाणे होत फारशी खळखळ न करता महापालिकेत सत्ता मिळवली. विधानपरिषदेसाठीही काँग्रेसला साथ देण्याचा राष्ट्रवादीने निर्णय घेतला. पण जिल्हा परिषदेतील सत्तेतील वाटा घेण्यासाठी येथील राष्ट्रवादीकडून केलेल्या मागणीमुळे हा दबावतंत्राचा भाग मानला जात असला तरी कार्यकर्त्यांमध्ये खदखद आहे हेही पुन्हा दिसून येत आहे. यामुळे विधानपरिषद निवडणूक होईपर्यंत जिल्ह्यातील राजकारण या अंगाने पुन्हा ढवळून निघण्याची चिन्हे आहेत.

काँग्रेस व राष्ट्रवादी हे जरी गेल्या पंधरा वर्षांत राज्यात सत्तेत असले तरी स्थानिक पातळीवर वेगवेगळी समीकरणे तयार झाली. कधी ते एकमेकांसमोर प्रतिस्पर्धी म्हणून राहिले तर ग्रामपंचायत, पंचायत समित्यांच्या निवडणुकांमध्ये गटांच्या राजकारणातून एकमेकांना शह देण्याचा प्रयत्न केला. यातून कार्यकर्त्यांमध्ये सत्तेतील पक्ष म्हणून एकसंधपणा आलाच नाही. उलट स्थानिक राजकारणात या दोन पक्षांमधील दरी रुंदावत गेली. ही दरी दूर करण्यासाठी मध्यंतरी राज्य पातळीवरून काही प्रयत्न केले गेले.

कोल्हापूर जिल्हा दूध उत्पादक संघाच्या (गोकुळ) निवडणुकीत राष्ट्रवादीच्या हाती काही लागले नाही, तर बाजार समितीमध्ये काँग्रेसला फारसा शिरकाव करू दिला नाही. जिल्हा परिषदेतील सत्तेतही याच प्रकारामुळे राष्ट्रवादी सहभागी झाली नाही. यामुळे दोन्ही पक्षांतील या संस्थांमध्ये जाण्यासाठी इच्छुक असलेल्यांना लगाम बसला आहे. त्यातून ते व त्यांचे कार्यकर्ते दुखावले जाणे स्वाभाविक आहे. त्यांच्या या दुखावलेपणाची किनार राष्ट्रवादीतील बैठकीत दिसून आली.

जिल्हा परिषदेच्या राजकारणात राष्ट्रवादीचा शिरकाव करण्याचा प्रयत्न असला तरी जिल्हा परिषदेची अवघ्या एक वर्षाच्या अंतरावर निवडणूक लागणार आहे. त्यावेळी हे दोन्ही पक्ष पुन्हा मैत्रीपूर्ण लढणार की आमने-सामने उभे ठाकणार याची सुरुवात या प्रयत्नातून होणार आहे. त्याचवेळी अशी सत्ता घेऊन पुढील पाच वर्षांसाठी पायावर दगड मारून घेण्यापेक्षा आता काही नको, निवडणुकीवेळी पाहू असा एक मतप्रवाह कार्यकर्त्यांमध्ये आहे. यामुळे 'मिनी मंत्रालय' म्हणून ओळख असलेल्या जिल्हा परिषदेच्या सत्तेच्या राजकारणासाठी काँग्रेस व राष्ट्रवादीच आमने-सामने राहू शकतील असे दिसते.

उमेदवार कोण हे महत्त्वाचे

विधानपरिषद निवडणुकीवेळी राष्ट्रवादीच्या ११८ मतांचा निश्चितच फरक पडू शकतो. मात्र, काँग्रेसचा उमेदवार कोण असेल यावर बरेच ठरणार आहे. राष्ट्रवादीने जरी आम्ही काँग्रेससोबत आहोत असे स्पष्ट केले असले तरी उमेदवार कोण येणार यावर स्थानिक राजकारणातून विरोध होण्याची शक्यता नाकारता येत नाही. हा विरोध नसणारा उमेदवार काँग्रेसला द्यावा लागणार आहे. तरच ही निवडणूक काँग्रेसला सोपी जाईल, असेच एकंदरीत राष्ट्रवादीकडून संदेश दिला गेला आहे.

मोबाइल अॅप डाउनलोड करा आणि राहा अपडेट