विधानपरिषदेसाठी काँग्रेसची उमेदवारी कोणाला मिळते यावर कागल तालुक्यातून मिळणारी 'रसद' अवलंबून आहे. तालुक्यात सध्या विधानपरिषदेसाठी पाच गटांना महत्त्व प्राप्त झाले आहे. यातील चार गट या वर्षभरात लोकसभेपासून झालेल्या सर्व निवडणूकांचे उट्टे काढण्याचीच सध्या तरी शक्यता दिसते. काँग्रेसमधून महादेवराव महाडिक यांना उमेदवारी मिळाल्यास कागलमध्ये रणजित पाटील गट वगळता कोणी त्यांना मदत करेल, असे म्हणणे सध्या तरी धाडसाचे ठरेल. परंतु सतेज पाटील अथवा जिल्हाध्यक्ष पी. एन. पाटील यांना उमेदवारी मिळाल्यास कागलमधून यांना फायदा होऊ शकतो.
कागल तालुक्यात आमदार हसन मुश्रीफ यांच्याकडे १० मते कागल नगरपरिषदेची आहेत. संजय मंडलिक गटाकडे जिल्हा परिषद सदस्य, आणि मुरगूड नगरपरिषदेची ४ अशी आणि कागल नगरपरिषदेचे एक अशी सात मते आहेत. संजय घाटगे गटाकडे जिल्हा परिषदेची दोन आणि पंचायत समिती सभापती तसेच कागल नगरपरिषदेचा एक अशी चार मते आहेत. समरजितसिंह घाटगे गटाकडे कागल नगरपरिषदेचे पाच नगरसेवकांची मते आहेत. मुरगूड नगरपरिषदेची १० मते रणजित पाटील गटाची आहेत. मुश्रीफ गटातून उभारुन तत्कालिन परिस्थितीत विभक्त झालेल्या राजेखान जमादार गटाकडे तीन नगरसेवकांची मते आहेत. असे सर्व गटांचे मिळून ३९ आणि जि. प. सदस्य तावरे यांच्यासह ४० मतांना आता विशेष महत्त्व प्राप्त झाले आहे. आमदार महादेवराव महाडिक आणि माजी आमदार सतेज पाटील यांनी प्रत्यक्ष भेटून गटप्रमुखांना गळ घालण्यास सुरुवात केली आहे.
लोकसभेच्या निवडणुकीचा विचार करता संजय मंडलिकांना महादेवराव महाडिक यांची काहीच मदत झाली नाही त्यामुळे त्याचे उट्टे काढण्याची संधी म्हणूनच मंडलिक गट बघेल असे सध्या तरी दिसते. संजय घाटगे गटाचा गोकुळमधील ऐन वेळी कट रचून पत्ता कट केल्यामुळे याही गटाची शक्यता सध्या तरी अँटी महाडिकच असेल. तसेच मंडलिक यांनी संजय घाटगे यांच्याशी चर्चा करुनच निर्णय घेण्याचे सांगितल्याने दोन्ही गटांकडे ११ मते होतात. त्यांनाही महत्त्व प्राप्त होणार आहे. आमदार मुश्रीफ यांच्या विरोधात नुकत्याच झालेल्या कोल्हापूर महानगरपालिकेच्या निवडणुकीत महाडिक यांनी प्रचार केला आहे. त्यामुळे मुश्रीफांनी त्याला प्रतिउत्तर देत सतेज पाटील यांच्याशी जमवून घेतलेले पहाता राष्ट्रवादी जिल्ह्यातील १२४ मतांसह महाडिकांबरोबर रहाण्याची सध्या तरी शक्यता दिसत नाही. समरजितसिंह घाटगे गटाला सतेज पाटील यांच्या करवीरमधून साखर कारखान्यासाठी नेहमीच सभासद, ऊस,कारखान्याचे मतदान यानिमीत्ताने मदत मिळते. त्यामुळे महाडिक पॅटर्न हादेखील गट स्वीकारणे शक्य वाटत नाही. मुरगूडचा राजेखान जमादार गट आपली तीन मते घेऊन संजय मंडलिक यांच्याबरोबरच रहाणार की एकला चलो रे ची भूमिका घेणार हे येणारा काळच ठरवेल. घाटगे मंडलिक युतीतून निवडून आलेले व सध्या भाजपमध्ये असणारे बाबासाहेब तावरे यांचीही भुमिका गुलदस्त्यात आहे. केवळ रणजित पाटील गट आपली दहा मते घेऊन महाडिक यांच्या पाठीशी रहाणार कारण २५ वर्ष त्यांच्या घरात महाडिकांच्या सहकार्यानेच 'गोकुळ' नांदत आहे.
मोबाइल अॅप डाउनलोड करा आणि राहा अपडेट
