देशभरातील राज्यांच्या विविध क्षेत्रातील प्रगतीचा आढावा कलाकृतीतून घेण्यासाठी नवी दिल्ली येथे ३५ व्या अखिल भारतीय आंतरराष्ट्रीय व्यापार मेळ्याचे आयोजन केले आहे. प्रदर्शनामध्ये राज्यातील विविध कलाकृतींसह राज्यांची वैशिष्ट्ये जपणाऱ्या वस्तूंचे स्टॉल मांडले आहेत. प्रदर्शनामध्ये कोल्हापुरातील ज्वेलरी, गूळ, चप्पल यांच्यासह राष्ट्रीय पुरस्कार विजेत्या अस्मिता अरुणकुमार पोतदार यांच्या भरतकाम कलाकृतींचा समावेश आहे. देशातील राज्यांनी कलाकृती आणि वस्तूंच्या माध्यमांतून राज्याची कृषी, औद्योगिक, व्यापर क्षेत्रातील प्रगती मांडली आहे. प्रदर्शनातील महाराष्ट्र दालनामध्ये कोल्हापुरातील वस्तूंसह अस्मिता पोतदार यांच्या कलाकृतीने आपले वेगळेपण दाखवून दिले आहे.
देशातील राज्यांच व्यापार क्षेत्रातील प्रगतींचा आढावा आणि कलाकृतींना प्रोत्साहन देण्यासाठी नवी दिल्ली येथे मेळ्याचे आयोजन केले जाते. देशभरातील कलाकृतींना अत्युच्च स्थान असलेल्या मेळ्यामध्ये वस्रोद्योग मंत्रालयाच्यावतीने राष्ट्रीय पुरस्काराने सन्मानित केलेल्या अस्मिता पोतदार यांना सलग तिसऱ्या वर्षी निमंत्रित केले आहे. पोतदार यांनी पंजाब, हरियाणा व नवी दिल्ली येथील अनेक महिलांना भरतकाम कलेचे प्रशिक्षण दिले आहे. राजस्थानी शेतकरी, नववधू आणि प्राण्यांच्या कलाकृती त्यांनी भरतकामातून साकारल्या आहेत. पंजाब, हरियाणा, नवी दिल्ली येथील प्रदर्शनानंतर त्यांनी इटली येथील आंतरराष्ट्रीय प्रदर्शनामध्येही भरतकाम कलेची छाप पाडली आहे. पोतदार या प्रदर्शनामध्ये भरतकाम कलेचे प्रात्यक्षिक सादर करुन कलेचा प्रसार करत आहेत.
पोतदार यांच्या कलाकृतींसह राज्यातील ६० स्टॉल उभारण्यात आले. राज्यातील विविध भागातील वैशिष्ट्ये प्रदर्शनात मांडली आहेत. कोल्हापूरच्या कलाकृतींसह राज्यातील कलाकृतींनी प्रदर्शनामध्ये चांगलीच धूम उडवली आहे. शनिवारी(ता.१४) प्रदर्शनाला सुरुवात झाली असून २७ नोव्हेंबरपर्यंत ते सुरू राहणार आहे. तब्बल चारशे रुपये तिकिट दर असूनही प्रदर्शनाला अलोट गर्दी होत आहे. शनिवारी प्रदर्शनाचे उद्घाटन राज्याचे उद्योगमंत्री सुभाष देसाई यांच्या हस्ते झाले. यावेळी उद्योग राज्यमंत्री प्रवीण पोटे-पाटील, सचिव अपूर्वा चंद्रा, केंद्रीय आयुक्त अभा शुक्ल, विकास आयुक्त सुरेंद्रकुमार बगाडे, एमएसआरडीसीचे व्यवस्थापक शिवाजी दौंड आदी मान्यवर उपस्थित होते.
मोबाइल अॅप डाउनलोड करा आणि राहा अपडेट