लाखो रूपये खर्चून करण्यात आलेल्या रस्त्यांची होणारी दुरावस्था, रूंदावणाने कृष्णा नदीचे पात्र, तसेच वाळू ठेकेदारांनी गावच्या विकासासाठी निधी न दिल्याने शिरोळ तालुक्यातील कोथळीच्या ग्रामस्थांनी वाळू उपशास ग्रामसभेत ग्रामसभेत कडाडून विरोध केला.
वाळू उपशासाठी देण्यात येणाऱ्या ठेक्यांच्या पार्श्वभूमीवर कोथळीत ग्रामसभेचे आयोजन करण्यात आले होते. यावेळी प्रांताधिकारी अश्विनी जिरंगे, तहसीलदार सचिन गिरी, मंडलअधिकारी सानप, सरपंच बेबीजहिरा तांबोळी प्रमुख उपस्थित होत्या.
सभेत प्रांताधिकारी जिरंगे यांनी प्रशासनाची भुमिका मांडली. वाळू वाहतुकीच्या वाहनांमुळे गावातील रस्ते खराब झाले आहेत. गेल्या सात-आठ वर्षांपासून ग्रामपंचायत कार्यालयास गौणखनिज अनुदान मिळाले नसल्याचे विजय खवाटे यांनी सांगितले. गावातील रस्ते खराब झाल्यानंतर वाळू ठेकेदार रस्ते, शाळांच्या संरक्षक भिंतीसाठी लोकवर्गणी देत नाहीत याकडे उपसरपंच प्रमोद कुंभार यांनी लक्ष वेधले. जयसिंगपूर-कोथळी रस्त्याकडेच्या शेतजमिनी क्षारपड झाल्या असून वाळू वाहतुकीमुळे रस्ता खराब झाल्याचे श्रीकांत पाटील यांनी सांगितले. ओव्हरलोड वाळू वाहतुकीमुळे रस्त्यांची दुरावस्था होते मात्र वाळू ठेकेदारांकडून रस्त्यांची दुरूस्ती होत नसल्याचे भीमगोंडा बोरगावे म्हणाले. बेसुमार वाळू उपशामुळे नदी पात्रात माती ढासळत असून शेतजमिनींचे नुकसान होत असल्याचे जमीर मुजावर यांनी सांगितले.
कृष्णा नदीतून वाळू उपसा करण्यास ग्रामस्थांनी कडाडून विरोध केला. लाखो रूपये खर्चुन गावातील रस्ते केले जातात. मात्र वाळू वाहतुकीमुळे या रस्त्यांची दुरावस्था होते. यानंतर पुन्हा रस्ते करण्यासाठी स्थानिक लोकप्रतिनिधींची दमछाक होते. ठेकेदारांकडून बेसुमार वाळू उपसा होत असल्याने कोथळीत कृष्णा नदीचे पात्र ही रूंदावले आहे. कृष्णेला पूर आल्यास याचा फटका ग्रामस्थांनी बसू शकतो. गेल्या चार वर्षात वाळू ठेकेदारांनी गावच्या विकासासाठी ग्रामपंचायतीस निधी देण्याचे मान्य केले होते. ग्रामसभेची मंजुरी मिळविण्यासाठी ग्रामपंचायतीस निधी देण्याची ग्वाही ठेकेदार देतात.
वाळू उपशातून लाखो रूपयांचा महसूल सरकारला मिळतो. याचबरोबर ठेकेदारही लाखो रूपयांची माया जमवितात. परंतु गावच्या विकासाऐवजी रस्त्यांची दुरावस्था होते असे मत सभेत ग्रामस्थांनी मांडले.
कोथळीत ग्रामसभा पुन्हा घेण्याचा निर्णय
वाळू उपशावरून जोरदार चर्चा झाली. यावेळी नागरिकांनी संतप्त भावना व्यक्त केल्या. यावेली वाळू उपशास विरोध करणारा ठराव धनपाल परीट यांनी माडला. यास विनोद कांबळे यासह ग्रामस्थांनी अनुमोदन दिले. अखेर गावकऱ्यांच्या भावना पर्यावरण विभाग व जिल्हाधिकारी कार्यालयास कळवू. वाळू उपशाबाबात ग्रामस्थांशी चर्चा केल्याशिवाय कोणताही निर्णय घेतला जाणार नाही. पुन्हा ग्रामसभेचे आयोजन करून उपशाबाबत निर्णय घेण्यात येईल असे प्रांताधिकारी जिरंगे यांनी सांगितले.
मोबाइल अॅप डाउनलोड करा आणि राहा अपडेट
