टोल स्थगितच राहणार

August 24, 2015, 1:57 pm

≫ Next: ब्रेक फेल ट्रकने दिली १२ वाहनांना धडक

≪ Previous: चोर समजून मारहाण; फिरस्त्याचा मृत्यू

$

0

0

सरकारच्या प्रयत्नांमुळे वसुलीची शक्यता कमी

म. टा. प्रतिनिधी, कोल्हापूर

रस्ते विकास प्रकल्पांतर्गत आयडियल रोड बिल्डर्स (आयआरबी) कंपनीला द्यावयाच्या रकमेबाबत सरकारच्या पातळीवर प्रयत्न सुरू असल्याने टोल वसुली पुन्हा सुरू होण्याची शक्यता कमीच आहे. टोल वसुलीला दिलेल्या स्थगितीची पंधरा दिवसांची मुदत आज (मंगळवार) संपणार आहे. टोल वसुली सुरू झाल्यास शांततामय मार्गाने आंदोलन करण्याचा इशारा टोलविरोधी कृती समितीने दिला आहे.

नोबेल कंपनीने रस्ते प्रकल्पाचा अहवाल सादर केल्यानंतर ११ ऑगस्टला मुंबईत झालेल्या बैठकीत अंतिम निर्णय होईपर्यंत पंधरा दिवस टोल वसुलीला स्थगिती देण्याचे आवाहन सरकारने केले होते. त्यानुसार आयआरबीचे वीरेंद्र म्हैसकर यांनी ११ ऑगस्टपासून १५ दिवसांकरिता टोल वसुलीला थांबवली होती. मंगळवारी रात्री त्याची मुदत संपणार आहे. नोबेल कंपनीच्या मूल्यांकनानुसार व सर्व प्रकारची वजावट करून प्रकल्पाची द्यावयाची रक्कम १३९ कोटी रुपये तर महापालिका व आर्किटेक्ट अँड इंजिनीअरिंग असोसिएशनने करारातील दरानुसार केलेले १५८ कोटी रुपये रक्कम निश्चित केली आहे.

प्रक्रियेला बाधा नको

'आयआरबीचे पैसे भागवून कोल्हापूर टोलमुक्त करण्याच्या सरकारच्या भूमिकेबद्दल कृती समितीला शंका नाही. पैसे भागविणे व टोलमुक्तीची अधिसूचना जाहीर करण्यासाठी दोन, चार दिवसांचा कालावधी लागल्यास आयआरबीचे नुकसान होणार नाही. या प्रक्रियेला बाधा पोहोचेल असे कोणतेही कृत्य कंपनीने करू नये,' असे आवाहन कृती समितीचे निमंत्रक निवास साळोखे यांनी केले आहे.

'सरकार टोलप्रश्नी मार्ग काढण्यासाठी प्रयत्नशील आहे. तोडगा काढण्यासाठी दोन चार दिवसांचा कालावधी लागू शकतो. या कालावधीत आयआरबी कंपनीने संयम दाखवावा. टोलप्रश्नी जनतेच्या भावना रास्त आहेत.

- राजेश क्षीरसागर, आमदार

मोबाइल अॅप डाउनलोड करा आणि राहा अपडेट

---

ब्रेक फेल ट्रकने दिली १२ वाहनांना धडक

August 25, 2015, 4:03 am

≫ Next: ...तर भाजपची अडचण होईल

≪ Previous: टोल स्थगितच राहणार

$

0

0

मटा ऑनलाइन वृत्त । कोल्हापूर

कोल्हापूर शहरात मंगळवारी ब्रेक फेल झालेल्या एका ट्रकने १२ वाहनांना धडक दिली. शाहूपुरी पहिल्या गल्लीत झालेल्या अपघातात ४ जण गंभीर जखमी झाले. त्यांच्यावर सीपीआर रुग्णालयात उपचार सुरु आहेत.

येथील राजर्षी शाहू महाराज टर्मिनल्स वर्कशॉपमधून रेल्वेच्या चाकांचे दोन भाग घेऊन जाणाऱ्या ट्रकचा शाहूपुरी पहिल्या गल्लीतील वामन गेस्ट हाऊसजवळ ब्रेक फेल झाला. ट्रकने प्रथम एका जीपला धडक दिली. त्यानंतर मोटरसायकलला टक्कर दिली. ट्रकचा ब्रेक लागत नसल्यामुळे चालकाने उडी मारली. या ट्रकने पुढे एका रिक्षाला जोरदार धडक दिली. ही धडक इतकी जोरात होती की त्यात रिक्षाचा चक्काचूर झाला. त्यानंतर आणखी एक रिक्षा आणि काही दुचाकी गाड्यांना धडक देत ट्रक थांबला.

दरम्यान, अपघातानंतर पळून जाण्याचा प्रयत्न करणाऱ्या ट्रक चालकास जमावाने पकडले. या अपघातात रिक्षा चालकासह अन्य तिघे जण जखमी झाले. ट्रकने ज्या रिक्षाला धडक दिली होती त्यातील गॅस सिलिंडरची टाकी फुटण्याचा धोका होता. त्यामुळे अग्नीशमन दलाच्या मदतीने टाकी बाजूला काढण्यात आली.

मोबाइल अॅप डाउनलोड करा आणि राहा अपडेट

...तर भाजपची अडचण होईल

August 25, 2015, 1:05 pm

≫ Next: सक्षम उमेदवारांअभावी ब्रेक

≪ Previous: ब्रेक फेल ट्रकने दिली १२ वाहनांना धडक

$

0

0

राष्ट्रवादीच्या भूमिकेबद्दल पतंगराव कदम यांचा टोला

म. टा. प्रतिनिधी, कोल्हापूर

'राष्ट्रवादी काँग्रेसचे प्रदेशाध्यक्ष सुनील तटकरे यांनी काही दिवसांपूर्वी सांगली दौऱ्यावेली राष्ट्रवादी काँग्रेस पक्षाकडून भारतीय जनता पक्षाला पाठिंबा दिला जाणार नाही अशी घोषणा केली आहे. मात्र खरोखरच राष्ट्रवादी काँग्रेसने तशी भूमिका घेतल्यास, प्रत्यक्ष हा पक्ष तसेच वागल्यास भाजप सरकारचे काही खरे नाही' असा टोला काँग्रसचे नेते आणि आमदार पतंगराव कदम यांनी लगावला. काँग्रेस पक्षाच्यावतीने भाजप सरकारच्या विरोधात मंगळवारी पर्दाफाश आंदोलन करण्यात आले. यानि​मित्त काँग्रेस कमिटी येथे आयोजित कार्यकर्त्यांचा मेळावा आयोजित केला होता. यावेळी 'भाजपला कोंडीत पकडायला शिवसेना तयारच आहे' अशी पुस्तीही त्यांनी जोडली.

महापालिकेच्या निवडणुकीसाठी काँग्रेसकडून समन्वय समितीचे प्रमुख म्हणून कदम यांच्याकडे जबाबदारी आहे. निवडणुकीबाबत कदम म्हणाले, 'जिल्ह्यात आणि शहरात काँग्रेसची ताकत मोठी आहे. आगामी महापालिका निवडणुकीत काँग्रेस पक्षाची ताकत सिद्ध करा. जिल्हाध्यक्ष पी. एन. पाटील व शहराध्यक्ष प्रल्हाद चव्हाण यांनी कमी वेळेत भाजपच्या विरोधातील आंदोलनाची तयारी करून काँग्रेस पक्षाची संघटित शक्ती दाखवून दिली आहे.'

कदम यांनी भाजपसह राष्ट्रवादी काँग्रेसलाही टोले लगावले. 'सांगलीत झालेल्या राष्ट्रवादीच्या मेळाव्यात प्रदेशाध्यक्ष तटकरे यांनी राष्ट्रवादीचा भाजपाला पाठिंबा असणार नाही असे स्पष्ट केले होते. मात्र सत्ताधारी भाजप आ​णि शिवसेनेते कुरबुरी सुरू आहेत. भाजपवर कुरघोडी करायला शिवसेना तत्पर आहे. अशा स्थितीत राष्ट्रवादीने भाजपला पाठिंबा द्यायचे नाही असे ठरविले तर भाजप सरकारचे काही खरे नाही.'

कदम म्हणाले, 'राज्यात दुष्काळ स्थिती उद्भभवली असताना सरकार दिशाहीन बनले आहे. काँग्रेस आघाडीने दुष्काळी स्थितीत जनतेला दिलासा देताना १२५०० कोटी रुपयांची तरतूद केली होती. टँकर, चारा डेपो सुरू करण्यासंदर्भात जिल्हाधिकारी, तहसिलदारांना अधिकार दिले होते. मात्र आताचे सरकार काहीच करताना दिसत नाही. काँग्रेस आघाडी सरकारने दुष्काळी स्थितीवर मात करण्यासाठी जे निर्णय घेतले, त्याचा अभ्यास केला तरी आताच्या सरकारला काम करण्याचे शहाणपण सुचू शकेल.'

भारतीय जनता पक्षाच्या अनेक मंत्र्यावर भ्रष्टाचाराचे आरोप झाले आहेत. भ्रष्ट मंत्र्यांच्या राजीनाम्यासाठी काँग्रेसच्या खासदारांनी संसदेत आवाज उठवल्यानंतर पंतप्रधान नरेंद्र मोदी यांनी सभागृहात येऊन निवेदन करायला हवे होते. मात्र, मोदी हे पंतप्रधान कार्यालयातच बसून राहिले. संसद चालवायची जबाबदारी सत्ताधाऱ्यांची असते. उलट त्यांनी काँग्रेसच्या खासदारांचे निलंबन केले. भाजप सरकारच्या विरोधात पर्दाफाश आंदोलन करून जनतेला वस्तु​स्थिती सांगितली जाणार आहे. काँग्रेसच्या महापालिकेच्या निवडणुकीसाठी इच्छुक उमेदवारांनी भाजपची ही कूट निती जनतेपर्यंत पोहोचवावी असे यावेळी कदम यांनी सांगितले.

कामाचा ताळेबंद मांडू

'भाजप सरकारकडून कोल्हापूरवर अन्याय केला जात आहे' अशी टीका माजी मंत्री सतेज पाटील यांनी केली. ते म्हणाले, 'काँग्रेस आघाडी सरकारने कोल्हापूरच्या विकासासाठी गेल्या पाच वर्षात कोट्यावधी रुपयांचा निधी आणला. कोल्हापूरकर विविध करांच्या माध्यमातून हजारो कोटी कराचा भरणा सरकारकडे करतात. मात्र, वर्षभरात भाजप, शिवसेनेच्या सरकारकडून कोल्हापूरच्या विकासासाठी किती निधी मिळाला हा संशोधनाचा विषय आहे. दोन्ही सरकारमधील कामकाजाचा फरक, शहराकडे बघण्याचा दृष्टिकोन, मंजूर केलेल्या निधीचा ताळेबंद पुढच्या आठवड्यात शहरवासियासमोर मांडणार आहे.'

मोबाइल अॅप डाउनलोड करा आणि राहा अपडेट

सक्षम उमेदवारांअभावी ब्रेक

August 25, 2015, 1:06 pm

≫ Next: मच्छिमारावर मगरीचा हल्ला

≪ Previous: ...तर भाजपची अडचण होईल

$

0

0

गुरुबाळ माळी, कोल्हापूर



सक्षम उमेदवारांच्या गळ्यात पक्षाच्या उमेदवारीची माळ घालत महापालिकेवर सत्ता आणण्याचे स्वप्न सर्वच पक्ष पहात आहेत. मात्र निम्या प्रभागांत कोणत्याच पक्षाला असे सक्षम उमेदवार मिळत नसल्याने पहिल्याच टप्यात स्वप्नांना ब्रेक लागण्याची वेळ आली आहे. तरीही विरोधी पक्षात संभ्रम निर्माण करण्यासाठी आमचे उमेदवार फिक्स असा दावा केला जात आहे. प्रत्यक्षात काँग्रेस, राष्ट्रवादी, भाजप व शिवसेनेसह ताराराणी आघाडीदेखील उमेदवारांच्या शोधातच आहे.

महापालिकेवर सत्ता मिळवण्यासाठी प्रत्येक पक्ष स्वतंत्रपणे रिंगणात उतरणार आहे. भाजप व शिवसेना युतीबाबत खासदार विनायक राऊत यांनी शक्यता व्यक्त केली आहे. मात्र गेल्या दोन महिन्यांत झालेल्या घडामोडीच्या पार्श्वभूमीवर ते अशक्य असल्याची स्थिती आहे. भाजप आणि ताराराणी आघाडी यांच्यात युती झाल्याने यामध्ये नव्याने सेनेला सामावून घेणे अशक्य आहे. काँग्रेस व राष्ट्रवादी काँग्रेस यांच्यातही आघाडी होण्याची चिन्हे नाहीत. त्यामुळे प्रत्येक पक्ष स्वतंत्र लढतील आणि निकालानंतर सोयीने एकत्र येतील असेच सध्याचे चित्र आहे. स्पष्ट बहूमत मिळण्यासाठी प्रत्येकाची धडपड असली तरी सध्या तशी खात्री कोणत्याच पक्षाला नाही. यामुळे अधिकाधिक जागा मिळवण्याचा प्रत्येकाचा प्रयत्न आहे. त्याची पहिली पायरी म्हणून जो तो सक्षम उमेदवाराच्या शोधात आहे.

सर्व जागा लढवणार असा दावा सर्वच पक्ष करत आहेत. मात्र, एकाही पक्षाला सध्या सर्व ८१ प्रभागांत उमेदवार मिळालेले नाहीत. ताराराणी आघाडी आणि भाजपकडे सध्या सर्वात जास्त सक्षम उमेदवार आहेत. त्यांची हवा झाल्याने काँग्रेस व राष्ट्रवादीनेही ​जोरात नियोजन सुरू केले आहे. आमदार हसन मुश्रीफ आणि माजी गृह राज्यमंत्री सतेज पाटील यांनी आता प्रत्येक प्रभागात वैयक्तिक लक्ष घालून चाचपणी सुरू केली आहे. मिळालेल्या माहितीनुसार ताराराणी आणि भाजपकडे ५१ राष्ट्रवादीकडे ३८, काँग्रेसकडे ३५ तर शिवसेनेकडे ३० सक्षम उमेदवार असल्याचा दावा केला जात आहे. इतर प्रभागात सक्षम उमेदवार मिळावा यासाठी प्रत्येकाची धडपड सुरू आहे.

सर्व प्रभागात कोणत्याच पक्षाला सक्षम उमेदवार मिळणार नाहीत याची खात्री प्रत्येक पक्षाला आहे. पण प्रभागात ओळख असलेला, काम असलेला उमेदवार मिळावा यासाठी प्रयत्न सुरू आहेत. पक्षाकडे सर्वच प्रभागात सक्षम उमेदवार नसला तरी आमच्याकडे सर्वात जास्त सक्षम उमेदवार आहेत असा दावा करत विरोधकांत संभ्रम निर्माण करण्याचा प्रयत्न सुरू आहे. विरोधकांच्या हाती लागलेला सक्षम उमेदवार आपल्याकडे खेचण्यासाठी देखील काही नेत्यांची धडपड सुरू आहे.

मागासवर्गीय उमेदवार मिळेना

महापालिका निवडणुकीसाठी ११ प्रभाग मागासवर्गीयांसाठी आरक्षित झाले आहेत. यात केवळ तीन ते चार मतदारसंघातच सक्षम उमेदवार आहेत. इतर सर्वच प्रभागांत सर्वच पक्षांना सक्षम उमेदवारांची वानवा भासत आहे. त्यामुळे हरिदास सोनवणे, रवी आवळे, सुभाष बुचडे, भूपाल शेटे असे काही तेच ते चेहरे विविध प्रभागांतून इच्छुक आहेत. काही प्रभागांत मागासवर्गीय उमेदवार भरपूर आहेत. पण त्यांना गल्लीच्या पलीकडे कोणीच ओळखत नाही. त्यामुळे अशा इच्छुकांना उमेदवारी कशी द्यायची असा प्रश्न सर्व पक्षांच्या नेत्यांना पडला आहे.

ओबीसी उमेदवारांसाठी धावपळ

मागासवर्गीय उमेदवार मिळवण्यासाठी ज्या पद्धतीने अनेक पक्षांची धावपळ सुरू आहे, तशीच स्थिती ओबीसी महिला उमेदवार मिळविण्यासाठी सुरू आहे. काही प्रभागांत विद्यमान व माजी नगरसेवकांनी कुणबी दाखला असल्याचे सांगत आपल्याच घरातील नावे पुढे केली आहेत. पण काही प्रभागांत गल्लीच्या पलीकडे ओळख असणारा, काम असणारा, आर्थिक सक्षम असणारा उमेदवार मिळत नसल्याने सर्वच पक्षांची दमछाक होत आहे. अशा प्रवर्गातील उमेदवार नसल्यास त्या प्रभागाचे काय करायचे असा प्रश्न पक्षांसमोर आहे. त्यामुळे धावपळ सुरू आहे.

मोबाइल अॅप डाउनलोड करा आणि राहा अपडेट

मच्छिमारावर मगरीचा हल्ला

August 25, 2015, 1:10 pm

≫ Next: शंभर जणांवर आरोपपत्र दाखल

≪ Previous: सक्षम उमेदवारांअभावी ब्रेक

$

0

0

कुपवाड : सांगलीनजीक कृष्णा नदीच्या पात्रात मंगळवारी सकाळी मगरीने मच्छिमार व्यक्तीवर हल्ला केला. मासेमारीसाठी टाकलेले जाळे काढण्यासाठी गेलेले मच्छिमार बाळूभाई उर्फ बालेखान यासीन शेख (वय ५६) यांच्या डाव्या पायाची पोटरी मगरीने पकडली. प्रसंगावधान ओळखून बालेखान यांनी उजव्या पायाने मगरीच्या नाकाडावर लाथ घालून आपली सुटका करून घेऊन पाण्याबाहेर धाव घेतली.

सांगलीतील रामनगरमध्ये राहणारे बालेखान आणि त्यांचा भाऊ अल्लाबक्ष हे दोघे मंगळवारी सकाळी नवीन बायपास पुलापासून काही अंतरावर कदमवाडी नजीकच्या नदीपात्रात मासेमारीसाठी गेले होते. साडेनऊ वाजण्याच्या सुमारास बालेखान हे गुडघाभर पाण्यात उभा राहून जाळे काढत असताना पाठीमागून आलेल्या मगरीने त्यांच्या पायाची पोटरी पकडली. अत्यंत धाडसाने बालेखान यांनी दुसऱ्या पायाने मगरीच्या नाकावर लाथ मारून आपली सुटका करून घेतली. जखमी बालेखान यांच्यावर खासगी हॉस्पिटलमध्ये उपचार सुरू आहेत.

मोबाइल अॅप डाउनलोड करा आणि राहा अपडेट

शंभर जणांवर आरोपपत्र दाखल

August 25, 2015, 1:11 pm

≫ Next: जयसिंगपूरच्या पार्किंगला शिस्तीची गरज

≪ Previous: मच्छिमारावर मगरीचा हल्ला

$

0

0

म. टा. वृत्तसेवा, सांगली

सांगली जिल्हा मध्यवर्ती सहकारी बँकेतील १५७ कोटी रुपयांच्या घोटाळा प्रकरणी चौकशी अधिकारी संपतराव गुंजाळ यांनी सात विद्यमान संचालक, ३६ माजी संचालक, निधन झालेल्या संचालकांचे वारस, अधिकारी अशा शंभर जणांवर आरोपपत्र दाखल केले आहे. येत्या ८ सप्टेंबर रोजी या संदर्भात सुनावणी होणार आहे. संबधित सर्वांना लेखी किंवा तोंडी म्हणणे मांडण्याबाबत आदेश दिले आहेत.

चौकशी अधिकाऱ्यांनी ९६ पानांचे आरोपपत्र आणि १८ पानी नोटीस तयार केली आहे. या कारवाईमुळे बँक परिसरात खळबळ माजली आहे. अधिकाऱ्यांचेही धाबे दणाणले आहे.

कलम '८८'नुसार होणाऱ्या चौकशीचे टप्पे असे असतील, जबाबदारी निश्चितीबद्दल कलम ७२(२) ची चौकशी पूर्ण झाल्यानंतर आता कलम ७२(३) नुसार आरोपपत्र निश्चित झाले आहे. त्यावर पुन्हा कलम ७२(४), ७२(५), ७२(६) नुसार सुनावणी प्रक्रिया आणि त्यानंतर जबाबदारी निश्चिती व वसुलीचे आदेश निघतील. आता ७२(४) व (५) ची कारवाई सुरू होत आहे.

शंभर जणांमध्ये राष्ट्रवादीचे जिल्हा अध्यक्ष, माजी आमदार विलासराव शिंदे, जिल्हा काँग्रेसचे अध्यक्ष मोहनराव कदम, शिवसेनेचे विद्यमान आमदार अनिल बाबर, बी. के. पाटील, विशाल पाटील, सिकंदर जमादार, महेंद्र लाड या सात विद्यमान संचालकांचा त्यात अंतर्भाव आहे. तर अधिकाऱ्यांमध्ये जे. बी. पाटील, एम. बी. तावदर, विनायक चव्हाण, संभाजी बाबर, शंकर भीमा तावदारे, एन. आर. पाटील, ए. आर. पाटील यांचा समावेश आहे.

या पूर्वी एकूण १०३ जणांना चौकशीच्या नोटिसा बजावण्यात आल्या होत्या. त्यापैकी माजी संचालक अजित घोरपडे, विद्यमान उपाध्यक्ष संग्रामसिंह देशमुख, तसेच तत्कालीन कार्यकारी संचालक जयवंतराव कडू-पाटील यांना आरोपपत्रातून वगळले आहे. त्यांचा या घोटाळ्यात वैयक्तिक व सामूहिक सहभाग दिसून येत नसल्याने त्यांची नावे आरोपपत्रातून वगळण्यात येत असल्याचे नमूद करण्यात आले आहे.

असा झाला गौरव्यवहार

विविध सहकारी संस्थांना -प्रामुख्याने साखर कारखान्यांना नियमबाह्य कर्जे देण्यात आली आहेत. त्यांची वसुली रखडली आहे. त्यामुळे बँक तोट्यात गेली. बँकेच्या इतर आर्थिक व्यवहारातही घोटाळे झाल्याची शक्यता व्यक्त करण्यात येत आहे. त्यामुळे संबधितांकडून वसुली करण्यात येणार आहे.

मोबाइल अॅप डाउनलोड करा आणि राहा अपडेट

जयसिंगपूरच्या पार्किंगला शिस्तीची गरज

August 25, 2015, 1:15 pm

≫ Next: घाटगे डेव्हलपमेंट‍्सचे सर्वसामान्यांसाठी घर

≪ Previous: शंभर जणांवर आरोपपत्र दाखल

$

0

0

अजय जाधव, जयसिंगपूर

आखीव रेखीव जयसिंगपूर नगरीत मनमानी पार्किंगमुळे वाहतुकीची नेहमीच कोंडी होते. पार्किंगला शिस्त लावण्यासाठी तीन वर्षापुर्वी इंजिनिअर्स असोसिएशनने आराखडा तयार केला. यानंतर नगरपालिकेने रस्त्याकडेची अतिक्रमणे हटविली. पार्किंगला शिस्त लावण्यासाठी रस्त्याच्या दुतर्फा सम, विषम तारखेस पार्किंग करण्याचा निर्णयही झाला. मात्र अद्याप हा निर्णय कागदावरच असून वाहतुकीच्या शिस्तीसाठी या आराखड्याची प्रत्यक्ष अंमलबजावणी गरजेची आहे.

जयसिंगपुरातील रस्ते काटकोनात आहेत. कोल्हापूर-सांगली रस्ता शहराच्या मध्यभागातून गेल्याने हे शहर दोन भागात विभागले आहे. तालुक्याचे केंद्र असणाऱ्या जयसिंगपुरात बहुतांशी सरकारी कार्यालये आहेत. याचबरोबर रूग्णालये बँका, शैक्षणिक संस्था आहेत. व्यापारपेठ असल्याने येथे शेतकऱ्यांबरोबरच तालुक्यातील नागरिकांची मोठी वर्दळ असते. शहरात वाहनांच्या संख्येतही मोठ्या प्रमाणात वाढ झाली आहे. वाहनधारकांनी मनमानी पद्धतीने केलेल्या पार्किंगमुळे येथे वाहतुकीची कोंडी नित्याचीच झाली आहे.

शहरातील वाहतुकीबरोबरच पार्किंगला शिस्त लावण्यासाठी जयसिंगपूर इंजिनिअर्स असोसिएशनने तीन वर्षापुर्वी आराखडा तयार करून पालिकेस सादर केला. पालिकेच्या सभेत या आराखड्यास मंजुरी देण्यात आली. सुसूत्रता येण्यासाठी रस्त्याच्या दुतर्फा सम विषम तारखेला पार्किग करण्याबरोबरच नगरपालिका व पोलिस यांच्या संयुक्त प्रयत्नातून पार्किंगला शिस्त लावण्याचा निर्णय झाला. यानंतर पालिकेच्या पथकाने रस्त्याकडेची अतिक्रमणे हटविली. शहरात काही ठिकाणी नो पार्किंगचे फलकही लावण्यात आले. मात्र अद्याप आराखड्याची प्रत्यक्ष अंमलबजावणी झाली नाही. शहरात कोल्हापूर-सांगली महामार्गावर चार चाकी अवजड वाहने उभी असतात.

पार्किंगला शिस्त लावण्यासाठीच पालिकेने आराखडा मंजूर केला. यास जिल्हा पोलिस प्रमुख व जिल्हाधिकारी कार्यालयाने ग्रीन सिग्नल दिला आहे.

- संजय पाटील यड्रावकर, पक्षप्रतोद

आम्ही पार्किंगच्या आराखड्याची अंमलबजावणी त्वरीत सुरू करू. प्रारंभी वाहनधारकांचे प्रबोधन व नंतर कारवाई करून शिस्त लावण्यात येईल.

- संतोष डोके, सहायक पोलिस निरीक्षक

नियोजनबद्ध पार्किंगसाठी इंजिनिअर्स असोसिएशनने आराखडा तयार केला. त्यास मंजुरी मिळाली आहे.

- नितीन पाटील, अध्यक्ष इंजिनिअर्स असोसिएशन

मोबाइल अॅप डाउनलोड करा आणि राहा अपडेट

घाटगे डेव्हलपमेंट‍्सचे सर्वसामान्यांसाठी घर

August 25, 2015, 1:23 pm

≫ Next: ‘शिवाजी’चे ठेवीदार वाऱ्यावरच

≪ Previous: जयसिंगपूरच्या पार्किंगला शिस्तीची गरज

$

0

0

कोल्हापूर : दीड ते दोन कोटींचे बंगले बांधणारे व भव्य प्रकल्पांची यशस्वी उभारणी करणारे घाटगे डेव्हलपमेंट्स सर्वसामान्यांच्या सेवेसाठी प्रतिष्ठित परिसरात शहराजवळ कसबा बावडा येथे १८ लाखांपर्यंत प्लॅटस उपलब्ध करून देत असल्याची माहिती घाटगे डेव्हलपमेंट्सचे प्रविणसिंह घाटगे यांनी पत्रकार बैठकीत दिली.

घाटगे म्हणाले, बावडा रोड, कागल आणि कंदलगाव अशा परिसरात प्लॅटचा गृहयोग म्हणजे ग्राहकांना पर्वणी ठरणार आहे. सर्वसामान्यांचे घराचे स्वप्न पूर्ण करण्यासाठी ही संधी ठरणार आहे. या प्रकल्पामध्ये सर्वोत्कृष्ट मटेरियल, कॉमन सुविधा, लिफ्ट, अंतर्गत हवेशीर वातावरण, ज्येष्ठ नागरिकांचा विचार, मुलांसाठी बाग, तर प्रत्येक प्लॅट हवेशीर, गेस्ट रूम अशा अनेक सुविधा देण्यात आलेल्या आहेत. या प्रकल्पाला चांगला प्रतिसाद मिळाला असून ताराबाई पार्कमधील घाटगे डेव्हलपमेंट्स मोठ्या प्रकल्पांचे निर्माते, बहुमजली सुज्ज इमारती, व्यावसायिक आव्हाने पेलताना सतत विश्वासाहर्ता आणि नावीन्य जपणारे आहे. सर्वसामान्य लोकांना हक्काचे घर तेही अगदी माफक दरात मिळावे अशी आमची अपेक्षा आहे. त्यामुळेच आकर्षक योजना आणि विश्वासार्हता जपलेल्या घाटगे डेव्हलपमेंट्सच्यावतीने ही योजना देण्यात आली आहे.

बावडा येथील गृहयोग प्रकल्पासाठी ग्राहकांच्या कडून प्लॅटच्या किंमतीच्या १० टक्के बुकींगवेळी, ७० टक्के रक्कम बँकेद्वारे, १० टक्के रक्कम ग्राहकाकडून व प्रत्यक्ष प्लॅटचा ताबा घेताना १० टक्के रक्कम बँकेडकून दिल्या जाणाऱ्या या स्किमला ग्राहकांचा चांगाल प्रतिसाद मिळत आहे. यावेळी अनंत खासबागदार, शिवजीत घाटगे आणि गॅप असोसिएशनचे अमर चौगुले उपस्थित होते.

मोबाइल अॅप डाउनलोड करा आणि राहा अपडेट

---

‘शिवाजी’चे ठेवीदार वाऱ्यावरच

August 25, 2015, 1:24 pm

≫ Next: किमान वेतन हवेच

≪ Previous: घाटगे डेव्हलपमेंट‍्सचे सर्वसामान्यांसाठी घर

$

0

0

संचालक, अधिकाऱ्यांवर गुन्हे दाखल झाल्याने ठेवीदारांच्या आशा पल्लवित

दीपक मांगले, गडहिंग्लज

ग‌डहिंग्लज शहर व तालुक्यात अस्मिता असलेल्या आणि वैभव मिरविलेल्या शिवाजी बँकेच्या संचालक व अधिका ऱ्यांवर गुन्हे दाखल झाल्याने एकीकडे समाधान तर दुसरीकडे ठेवीदारांमध्ये धाकधूक वाढली आहे. या बँकेवरील कारवाईसंदर्भात सर्व प्रक्रियेत ठेवीदारांच्या परतफेडीसाठी नव्हे तर दोषींना वाचविण्यासाठी सहकारासह सरकारातील सर्व यंत्रणा राबल्याचे दिसून येते. गुन्हा दाखल झाला मात्र यातून निष्पन्न काय होणार व ठेवीदारांना काय मिळणार हे काळच ठरवेल.

८ ऑक्टोबर, १९७१ साली बहुजनांची बँक म्हणून शिवाजी सहकारी बँकेचा पाया रचला गेला. त्यानंतर अल्पावधीत उतुंग झेप घेत गडहिंग्लज येथील मुख्य कार्यालयासह कोल्हापूर व हरळी येथे स्वमालकीच्या जागेतील शाखा आणि नेसरी व कडगाव येथे विस्तार शाखा असा डोलारा उभारण्यात आला. शिवाजी बँकेच्या माध्यमातून उपविभागातील अर्थकारणात झपाट्याने बदल झाला. मात्र राज्यभर सुरु असलेली सहकारातील भ्रष्टाचाराची किडीपासून शिवाजी बँकसुद्धा वाचली नाही. अस्तित्वात नसलेले उद्योग दाखवत संचालक मंडळीनी कोट्यावधी रुपयांचा डल्ला मारल्याचा आरोप बँकेवर झाला. अमर्याद कर्जवाटप, वसुलीकडे दुर्लक्ष आणि अंतर्गत मतभेद यामुळे बँक आर्थिक अडचणीत सापडली.

प्रशासकांवरही शंका

दरम्यान ठेवीदार, कर्जदार व सभासद समन्वय समिती आणि भ्रष्टाचार निर्मुलन समितीच्या आंदोलनामुळे २०१० साली सहकार तत्वावर सुरु झालेल्या तालुक्यातील अग्रणी बँकेवर प्रशासक नियुक्ती झाली. विभागीय उपनिबंधक राजेंद्र महाजन यांनी बँकेची सूत्रे हातात घेतली. अकार्यक्षम तसेच भ्रष्टाचाराच्या आरोपांमुळे प्रशासकाच्या कामकाजावर प्रश्नचिन्ह उभे राहिले. महाजन यांच्या बदलीनंतर महेश कदम यांनी प्रशासक म्हणून सूत्रे हातात घेतली. सहायक निबंधक डॉ.अर्चना अटपालवार व सहकाऱ्यांच्या मदतीने वर्षभरात ४ कोटी ७८ लाखांची कर्जवसुली करून बँकेचा परवाना वाचविण्यात त्यांनी यश मिळविले.

विलिनीकरणाचा प्रयत्न फसला

मात्र १३ ऑगस्ट २०१२ च्या सर्वसाधारण सभेत आर्थिक अरिष्टात सापडलेल्या बँकेला विलीनीकरणाशिवाय पर्याय नसल्याचे कदम यांनी सांगून कॉसमॉसशी विलीनीकरणासाठी प्रयत्न सुरु केले. मात्र बँकेतील कर्मचाऱ्यांनी याला आक्षेप घेत न्यायालयाचे दार ठोठावले. तडजोडीनंतर काहींनी बिनशर्त माघार घेतली. मात्र सात कर्मचाऱ्यानी आपल्या भूमिकेवर ठाम राहून अखेर पर्यंत लढा दिला.

कुराडेंच्या पोकळ घोषणा

९७ व्या घटनादुरुस्तीनंतर झालेल्या सभेत गोंधळ घालून कदम यांचा राजीनामा घेतला. यावेळी बँकेला गतवैभव मिळवून देऊ अशी घोषणा किसन कुराडे यांनी केली होती. मात्र, ती पोकळ असल्याची प्रचिती लवकरच आली. पाच वर्ष सवलत देऊन शिवाजी बँकेबाबत सकारात्मक काहीच घडत नसल्याचे पाहून रिझर्व्ह बँकेने परवाना रद्दचा निर्णय घेतला.

शुद्धीकरण मोहीम अर्ध्यावरच थंडावली

भ्रष्टाचाराच्या मुद्द्यावर सत्तेवर आलेल्या भारतीय जनता पक्षाकडून ठेवीदारांना दोषींवर कारवाई होईल व ठेवीदारांचे पैसे मिळतील अशी भाबडी अशा होती. अशातच सहकारमंत्री चंद्रकांत पाटील यांनी राज्यातील सहकार मोडून खाणाऱ्या दोषींवर कारवाई करून सहकाराचे शुद्धीकरण करणार अशी घोषणा केली. मात्र पंधराच दिवसांत नाट्यमय घडामोडी घडत दोषींवरील कारवाईला स्थगिती दिली होती.

संचालक, अधिकारी झाले फरार

अपहारप्रकरणी गुन्हा दाखल झाल्यानंतर संबधित संचालक व अधिकारी तत्काळ फरार झाले. त्यांना पोलिसांनी शोध मोहीम राबविली मात्र त्यात यश आले नाही. मंगळवारी रात्रीपर्यंत कुणालाही अटक नाही. बँकेचे माजी अध्यक्ष प्रा. किसन कुराडे यांच्याशी संपर्क साधला असता अटकेबाबत व कारवाईला आव्हान देण्याबाबत कायदेशीर सल्ला घेत असून उद्या भूमिका जाहीर करू असे सांगितले.

मोबाइल अॅप डाउनलोड करा आणि राहा अपडेट

किमान वेतन हवेच

August 25, 2015, 1:26 pm

≫ Next: आता तुम्हीच व्हा सावध!

≪ Previous: ‘शिवाजी’चे ठेवीदार वाऱ्यावरच

$

0

0

इचलकरंजीत उद्या सायझिंग कामगारांचा मोर्चा

म. टा. वृत्तसेवा, इचलकरंजी

सुधारित किमान वेतन घेतल्याशिवाय आंदोलनाचा अश्वमेध थांबणार नाही, असा निर्धार करीत उच्च न्यायालयात शासनाकडून प्रतिज्ञापत्र सादर करण्यास विलंब होत असल्याने त्याचा जाब विचारण्यासाठी गुरुवार २७ ऑगस्ट रोजी प्रांत कार्यालयावर सहकुटुंब सायझिंग-वार्पिंग कामगारांचा धडक मोर्चा काढण्याची घोषणा कामगार नेते ए. बी. पाटील यांनी मंगळवारी केली.

सरकारने जाहीर केलेल्या सुधारित किमान वेतनाची अंमलबजावणी करण्यात यावी यासाठी २१ जुलैपासून सायझिंग-वार्पिंग कामगारांनी कामबंद आंदोलन सुरु केले आहे. या संदर्भात न्यायालयात सुरु असलेल्या सुनावणी दरम्यान म्हणणे मांडण्यास सरकारकडून विलंब होत आहे. त्यामुळे हे न्यायप्रविष्ठ प्रकरण पुन्हा लांबणीवर गेले आहे. या संदर्भातील माहिती देण्यासाठी मंगळवारी थोरात चौकात सायझिंग-वार्पिंग कामगारांचा मेळावा आयोजित करण्यात आला होता.

कामगार नेते पाटील म्हणाले, शहर बंद पाडण्याचा कट रचण्यात आला असल्याचा आरोप केला जात असून चांडाळ चौकडीकडूनच सायझिंगधारकांची दिशाभूल केली जात आहे. एकजूट दाखवून देण्यासाठी मोर्चा काढण्यात येणार आहे. यावेळी सुभाष निकम, कृष्णात कुलकर्णी, आनंदराव चव्हाण आदींची भाषणे झाली. या मेळाव्यास सायझिंग कामगार मोठ्या संख्येने उपस्थित होते.

तिढा सुटेना

गेल्या महिनाभर सुरू असलेला संप दोन्ही बाजूंनी ताठर भूमिका घेतल्याने मिटत नाही. प्रशासनाने वारंवार मध्यस्थाची भूमिका बजावत संप मिटविण्यासाठी प्रयत्न केले. मात्र, सायझिंगधारक सरकारचा आदेश मानायला तयार नाहीत.

मोबाइल अॅप डाउनलोड करा आणि राहा अपडेट

आता तुम्हीच व्हा सावध!

August 25, 2015, 1:27 pm

≫ Next: परीक्षा कामकाजातून MKCL ला डच्चू

≪ Previous: किमान वेतन हवेच

$

0

0

संकेत लाड, कोल्हापूर

फसवणुकीच्या कोणत्याही प्रकरणामध्ये दिसणारी सामायिक बाब म्हणजे म्हणजे योजनाधारकांनी कंपनीवर ठेवलेला विश्वास. योजनाधारकांनी आपणहून पैसे गुंतवल्याशिवाय कोणतीही कंपनी फसवणूक करू शकत नाही. त्यामुळे भविष्यात फसवणूक टाळण्यासाठी योजनाधारकांनीच सावधानता बाळगण्याची आवश्यकता आहे. कंपनीचा व्यवसाय वैध असेल, तर अल्पावधीत दुप्पट किंवा त्यापेक्षा अधिक परतावा देणे कोणत्याही कंपनीला शक्य नसते.

त्यामुळे अशाप्रकारच्या आकर्षक योजना एखाद्या कंपनीकडून सादर करण्यात येत असल्यास नागरिकांनी अशा योजनेत पैसे गुंतवण्यापूर्वी कंपनीची शहानिशा करावी. अनेकदा कंपनीकडून आपली खोटी वेबसाइटही तयार करण्यात येते. त्यामुळे केवळ वेबसाइटवर अवलंबून न राहता कंपनीची नोंदणी, भांडवल, मागील काही वर्षांतील कंपनीची कामगिरी, प्राप्तिकर विवरणपत्र इत्यादी कागदपत्रांची शहानिशा करावी. त्याचप्रमाणे संबंधित कंपनीचा नफा मिळवण्याचा मार्ग कोणता व कंपनी कशाच्या आधारे परतावा देत आहे, याची चौकशी करावी.

कंपनीच्या आकर्षक योजनांविषयी योजनाधारकांनी आपणहून सोशल मीडियावरून प्रसार करू नये. त्यामुळे अनावश्यक प्रसिद्धी मिळतेकंपनीच्या हेतूविषयी शंका असल्यास योजनाधारकांनी पोलिसांकडे तक्रार करावी.

अशा प्रकरणांमध्ये पोलिसांकडून आपणहून कारवाई होऊ शकत नाही. तथापि, योजनाधारकांकडून तक्रार आल्यास पोलिस अशा कंपन्यांची चौकशी करू शकतात. त्याचप्रमाणे, रजिस्टार ऑफ कंपनी अफेअर्सकडे तक्रार केल्यास त्यांच्याकडून कंपनीचे व्यवहार तपासण्यात येतात व त्यामध्ये अवैध प्रकार आढळल्यास कंपनीची मान्यताही रद्द होऊ शकते.

हे करावे

कंपनीची नोंदणी, मागील काही वर्षांतील कंपनीची कामगिरी, प्राप्तिकर विवरणपत्र.

नफा मिळवण्याचा मार्ग, योजनाधारकांना मिळणाऱ्या परताव्याचे मार्ग, कंपनीचे संचालक मंडळ.

कंपनीच्या व्यवहारांमध्ये आक्षेपार्ह काही आढळल्यास पोलिस अथवा रजिस्टार ऑफ कंपनी अफेअर्सकडे तक्रार.

हे टाळावे

कोणत्याही योजनेची शहानिशा केल्याशिवाय गुंतवणूक करू नये.

कंपनीविषयी पूर्ण व खात्रीशीर माहिती असल्याशिवाय सोशल मीडियावरून कंपनीचा प्रचार करू नये.

एसएमएस व ऑनलाइन अकाउंटमध्ये येणाऱ्या आकर्षक योजनांच्या जाहिरातबाजीविषयी सावधानता बाळगावी.

कंपनीस मान्यता दिल्यानंतर ती भविष्यामध्ये कसा व्यवहार करत आहे, याविषयी प्रशासन आपणहून माहिती घेऊ शकत नाही.विशिष्ट कंपनीबाबत रजिस्टार ऑफ कंपनी अफेअर्सकडे आक्षेप नोंदवल्यास त्याची पडताळणी करून कंपनीची मान्यता रद्दही केली जाऊ शकते.

- अॅड. अनिल देसाई

मोबाइल अॅप डाउनलोड करा आणि राहा अपडेट

परीक्षा कामकाजातून MKCL ला डच्चू

August 25, 2015, 1:28 pm

≫ Next: सिलिंडरधारक गॅसवरच

≪ Previous: आता तुम्हीच व्हा सावध!

$

0

0

म. टा. प्रतिनिधी, कोल्हापूर

शिवाजी विद्यापीठातील प्रथम वर्षाच्या सर्व परीक्षेचे कामकाज एमकेसीएलकडून काढून घेऊन विद्यापीठ यंत्रणेमार्फत करण्याचा निर्णय शिवाजी विद्यापीठाच्या व्यवस्थापन परिषदेच्या मंगळवारी झालेल्या बैठकीत घेण्यात आला. अध्यक्षस्थानी कुलगुरू डॉ. देवानंद शिंदे होते.

एमकेसीएलच्या कामकाजाबाबत यापूर्वीही अधिसभेत तक्रारी झाल्या होत्या. त्या पार्श्वभूमीवर एक समिती नेमण्यात आली होती. या समितीने व्यवस्थापन परिषदेकडे अहवाल सादर केला. विद्यार्थी प्रलंबित निकाल, त्यात झालेल्या चुका आणि विद्यार्थ्यांना होत असलेला मनःस्तापाच्या पार्श्वभूमीवर हा निर्णय घेण्यात आला.

फोर-जी नेटवर्कद्वारे शिवाजी विद्यापीठाचा कॅम्पस वाय-फाय सुविधायुक्त करण्यास मान्यता देण्यात आली. तंत्रज्ञान व विज्ञान प्रसाराच्या अनुषंगाने सोलर एनर्जी पार्क, सायन्स सेंटर, सायन्स अॅन्ड टेक्नॉलॉजी पार्क आणि रुरल टेक्नॉलॉजी पार्क तयार करण्यास तत्त्वतः मान्यता देण्यात आली. विद्यापीठातील वर्ग एक ते चार कर्मचारी व अधिकाऱ्यांच्या बदल्या करण्याच्या नियमावलीस मान्यता देण्यात आली.

मोबाइल अॅप डाउनलोड करा आणि राहा अपडेट

सिलिंडरधारक गॅसवरच

August 25, 2015, 1:30 pm

≫ Next: फिरस्त्याचा काय गुन्हा?

≪ Previous: परीक्षा कामकाजातून MKCL ला डच्चू

$

0

0

एक सिलिंडरधारकालासुद्धा रॉकेल नाही; रेशनकार्डधारकाला चार लिटरच

उदयसिंग पाटील, कोल्हापूर

सार्वजनिक वितरण व्यवस्थेतील रॉकेल वितरणाबाबत गेल्या पंधरा वर्षांपासून सुरू असलेल्या वेगवेगळ्या प्रयोगांनंतर राज्य सरकारने सध्या पुन्हा एका नवीन प्रयोगाची अंमलबजावणी सुरू केली आहे. दोन सिलिंडर असणाऱ्या रेशनकार्डधारकास यापूर्वीच रॉकेल बंद केले होते. आता ते एक सिलिंडर असणाऱ्या रेशनकार्डधारकासही बंद केले आहे. त्याचबरोबर ग्रामीण असो वा शहरी, सर्वांना समान कोटा ठरवण्यात आला असून रेशनकार्डधारकास चार लिटरपेक्षा जास्त रॉकेल मिळणार नाही. या निर्णयामुळे सामान्य जनतेला अगदी तुटपुंज्या रॉकेलमध्ये महिनाभर गुजराण करावी लागणार आहे.

शहरी व ग्रामीण भागासाठी १९९७ पासून वेगवेगळा रॉकेल कोटा होता. १९९८ साली त्याला हायकोर्टात आव्हान देण्यात आले. कोर्टाने दिलेल्या आदेशानंतर सरकारने मार्च २००१ पासून शहरी व ग्रामीणसाठी समान कोटा ठेवला. त्यामुळे रॉकेलचा कोटा कमी झाल्यामुळे लोकप्रतिनिधींकडून पूर्वीप्रमाणेच धोरण अवलंबले जावे असा आग्रह केला जाऊ लागला. त्यामुळे जूनमध्ये तो निर्णय बदलून पूर्वीप्रमाणेच रॉकेल वितरण ठेवण्यात आला. त्यावर पुन्हा नागपूर खंडपीठाकडे जनहित याचिका दाखल केल्यानंतर त्यातून पुन्हा शहरी व ग्रामीणसाठी समान कोटा ठेवण्याचे आदेश दिले. यानुसार नुकताच २० ऑगस्टला पुरवठा विभागाने नवीन आदेश काढला आहे.

यापूर्वी समान कोटा ठेवला जात असताना पुरवठा विभागाने इतर काही बदल केले नव्हते. पण यावेळी महाराष्ट्राला आवश्यक असलेल्या गरजेच्या जवळपास २९ टक्केच रॉकेल पुरवठा केंद्र सरकारकडून केला जातो. त्यामुळे सर्वांना व्यवस्थित रॉकेल पुरवठा करण्यासाठी पूर्वीचे कार्डवरील वितरण बदलले असून सर्वात महत्त्वाचे म्हणजे एक सिलिंडरधारकाला मिळणारे रॉकेलही बंद केले आहे. या सिलिंडरधारकास प्रत्येक रेशनकार्डला ४ लिटर रॉकेल मिळत होते. तसेच शहरामध्ये जास्तीत जास्त २० लिटर व ग्रामीणमध्ये १५ लिटरपर्यंत रॉकेल दिले जात होते. नव्या आदेशानुसार प्रत्येक कार्डधारकास जास्तीत जास्त चार लिटरच रॉकेल दिले जाणार आहे. त्याची अंमलबजावणी तातडीने करण्याच्या सूचना दिल्या आहेत. यापूर्वी रॉकेलची मागणी जास्त असली तरी उपलब्धता कमी होती. आता तर अधिकृतरीत्याच कमी रॉकेल दिले जाणार आहे. त्यामुळे ते व्यवस्थित मिळेल की पुन्हा त्यातही काटछाट होणार याची चिंता लागली आहे.

सरकारने दिलेल्या आदेशाप्रमाणे काम केल्यास बरीच गुंतागुंत संपणार आहे. ​एक सिलिंडरधारकास रॉकेल बंद केल्यावर किती रॉकेल उपलब्ध होईल. तसेच प्रत्येक कार्डधारकाला चार लिटरचीच मर्यादा दिल्याने किती रॉकेल जिल्ह्याला हवे आहे याची माहिती सं​कलित करण्याचे काम सुरू आहे.'

विवेक आगवणे, जिल्हा पुरवठा अधिकारी

मोबाइल अॅप डाउनलोड करा आणि राहा अपडेट

फिरस्त्याचा काय गुन्हा?

August 25, 2015, 1:31 pm

≫ Next: कोल्हापूरलाही ‘सेन्सेक्स’ तडाखा

≪ Previous: सिलिंडरधारक गॅसवरच

$

0

0

निर्दोषांना मारण्याचे प्रकार पुन्हा घडण्याची भीती

सतीश घाटगे, कोल्हापूर

थंडीने कुडकुडणाऱ्या बेघरांच्या अंगावर शाल टाकणारे, बेघरांना फळे वाटणारे हात आता त्यांना चोर समजून मारू लागले आहेत. आशिर्वाद, दुवा मिळवणारे हात निरपराध्यावर उलटू लागले आहेत. माणुसकी विसरून चोर समजून फिरस्त्याला मृत्यू येईपर्यंत बेदम मारहाण झाल्याने 'चोर समजून, संन्याशाला फाशी' असा प्रकार पुन्हा घडण्याची भिती कोल्हापुरात व्यक्त होऊ लागला आहे.

फुलेवाडी येथे ऊनपावसात भीक मागून खाणाऱ्या बेघर व फिरस्त्याला १८ ऑगस्ट रोजी चोर समजून एकाने मारहाण केली. सोशल मिडियावर अगोदरच अफवा पसरल्याने जमाव या फिरस्त्याला लाथाबुक्क्यांनी मारहाण करू लागला. अगोदरच मनोरूग्ण असलेल्या फिरस्त्याला आपला बचाव करता आला नाही. दुचाकी थांबवून जमावात घुसून अनेकांनी चोर समजून त्याला मारहाण केली. काहींनी मर्दुमकी गाजवल्याप्रमाणे स्वतःचे सेल्फी काढून घेतले. अखेर पोलिस अर्धमेल्या फिरस्त्याची सुटका करण्यासाठी पुढे आल्यावर आम्ही इथेच न्याय करणार म्हणून जमावाने पोलिसांनाही अटकाव केला. अखेर पुण्यातील ससून रूग्णालयात सोमवारी उपचार सुरू असताना त्याचा मृत्यू झाला. करवीर पोलिसांनी २०० ते ३०० जणांच्या जमावावर गुन्हा दाखल केला आहे. फिरस्त्याच्या मृत्यूनंतर कोणतीही सामाजिक व मानवधिकाराचा पुळका असणारी एकही संघटना पुढे आलेली नाही. फिरस्त्याची ओळखच पटलेली नसल्याने कोणत्याही धर्माचा वा जातीच्या संघटना न्याय मागण्यासाठी पुढे आलेल्या नाहीत. सोशल मिडियावरील अफवेमुळे फिरस्त्याचा मृत्यू झाला, त्याला सर्व जबाबदार असताना त्याच्या मृत्यूबद्दल श्रध्दांजली वाहण्याचे धाडसही आज कुणाचे झालेले नाहीत. पोलिस कायदेशीर कारवाई करणार असले तरी मारहाण करणाऱ्या सर्वांना पकडून आणणार का हा खरा सवाल आहे. मारहाण केलेल्या व्यक्तींना पोलिसांनी जरी पकडले तरी त्यांना सोडवण्यासाठी खासदार, आमदार, राजकीय पक्षांच्या नेत्यांचे फोन येणार हे निश्चित. आगामी निवडणुकीच्या पार्श्वभूमीवर इच्छुक उमेदवारही पोलिस ठाण्यासमोर गर्दी करणार. पण फिरस्त्याला न्याय द्या म्हणून कोणीच पुढे येणार नाही.

फिरस्त्याच्या मृत्यूनंतर २०० ते ३०० व्यक्तींच्याविरूध्द खुनाचा गुन्हा नोंद केला आहे. पोलिसांनी व्हिडिओ शूटिंग, क्लिपिंग, फोटो पोलिसांनी जमा केले आहेत. शूटिंग व फोटोमध्ये ज्या व्यक्ती मारहाण करत होत्या त्यांना अटक करण्यात येणार आहे.

- दयानंद ढोमे, पोलिस निरीक्षक

का होतायेत हल्ले ?

सोशल मिडियावरून अफवा

ग्रामपंचायत निवडणुकीतील राजकारण

कुरघोडीच्या राजकारणातून दगडफेक

परजिल्हा व परराज्यातील नागरिकांची भाषा न समजून हल्ले

अनैतिक संबंधांचा बोभाटा होऊ नये म्हणून चोरीच्या अफवा

चोरी बरोबर भानामती, अंधश्रध्दा वाढवण्याचे प्रकार

पाऊस नसल्याने ग्रामीण भागात वेळ मोकळा

दुष्काळावरील लक्ष विचलित करण्यासाठी अफवा.

मोबाइल अॅप डाउनलोड करा आणि राहा अपडेट

कोल्हापूरलाही ‘सेन्सेक्स’ तडाखा

August 25, 2015, 1:33 pm

≫ Next: पाइपलाइनचे काम रखडले

≪ Previous: फिरस्त्याचा काय गुन्हा?

$

0

0

म. टा. प्रतिनिधी, कोल्हापूर

भारतीय सेन्सेक्सच्या सोमवारी झालेल्या ऐतिहासिक घसरणीचा तडाखा कोल्हापूरकरांनाही बसला आहे. कोल्हापूरमध्ये छोट्या, मध्यम आणि मोठ्या अशा तीनही प्रकारचे गुंतवणूकदार असून सोमवारच्या घसरणीमध्ये गुंतवणूकदारांना आपल्या गुंतवणुकीतील ७ ते ८ टक्के रक्कम गमवावी लागली आहे. म्हणजेच अगदी लहान गुंतवणूकदारालाही २५ ते ३० हजार रुपयांचा फटका बसला आहे. येणाऱ्या काही दिवसांमध्ये बाजारपेठेची अवस्था अस्थिर असल्याने गुंतवणूकदारांनी सावध राहण्याची गरज असल्याचे मत तज्ज्ञांनी व्यक्त केले आहे.

चीनच्या अर्थव्यवस्थेमध्ये सध्या चढउतार सुरू असल्याने तेथील बाजारपेठेमध्ये गेले काही दिवस सातत्याने घसरण होत आहे. चीनची अर्थव्यवस्था प्रामुख्याने उत्पादनावर आधारित असून त्यांची उत्पादने जगभरात निर्यात होतात. त्यामुळे त्यांच्या अर्थव्यवस्थेचा परिणाम जगभर होत असतो. त्याचप्रमाणे, अमेरिकेत गेले काही महिने कच्च्या तेलाच्या किमतीमध्ये घसरण होत आहे. त्यामुळे त्याच्याशी संबंधित कंपन्यांच्या शेअर्सचे मूल्यांकन घटत आहे. शुक्रवारी(ता.२१) अमेरिकेच्या बाजारपेठेमध्ये तब्बल तीन टक्क्यांनी घसरण झाली. या आंतरराष्ट्रीय घडामोडींचा परिणाम सोमवारी भारतीय बाजारपेठेवर दिसून आला. भारतातील बहुतांश ठिकाणी मान्सूनने दिलेली हुलकावणीही शेअर बाजाराच्या पडझडीस काही प्रमाणात कारणीभूत होती.

सध्याच्या परिस्थितीमध्ये सामान्य गुंतवणूकदारांनी व्यवहार करू नयेत, असा सल्ला तज्ज्ञांनी दिला आहे. कारण, शेअर्सच्या दैनंदिन खरेदीविक्रीसाठी लागणारे आवश्यक कौशल्य व माहिती सामान्य गुंतवणूकदारांकडे नसते. केवळ अधिक परताव्याच्या अपेक्षेने किंवा कोणाच्या तरी सांगण्यावरून गुंतवणूक केल्यास नुकसान होऊ शकते. मात्र, दीर्घकालीन गुंतवणूक म्हणून शेअर मार्केटकडे पाहणाऱ्यांसाठी ही गुंतवणूक करण्याची योग्य संधी आहे. कारण, मोठ्या प्रमाणावर झालेल्या विक्रीमुळे अनेक शेअर्सच्या किमती कमी झालेल्या असतात. त्यामुळे कमी रकमेत जास्त गुंतवणूक होऊ शकते.

पुढे काय होणार?

निर्देशांक सोळाशे अंकांनी घसरल्याच्या दुसऱ्याच दिवशी त्यामध्ये २९१ अंशांची सुधारणा झाली. यावरून भारतीय शेअर्सची बाजारपेठ मजबूत असल्याचे स्पष्ट होते. विशेषतः हाँगकाँग (हँगसेन) आणि चीनची (शांघाय) बाजारपेठेत मंगळवारीही घसरण झाली असताना भारतीय सेन्सेक्सवर त्याचा परिणाम जाणवला नाही. भारतीय बाजारपेठेत कोणताही घोटाळा वगैरे असल्याची चिन्हे नाहीत. सोमवारी झालेली घसरण ही निव्वळ आंतरराष्ट्रीय बाजारपेठेचा परिणाम व अन्य बाह्य कारणांमुळे झालेली आहे. निर्देशांक हा पहिल्या १०० कंपन्यांच्या शेअर्सच्या किमतीमध्ये होणाऱ्या चढउतारावरून काढण्यात आलेला असतो. त्यामुळे सर्व कंपन्यांना त्याची झळ बसली, असे मानणे चुकीचे आहे. मात्र, एकाच दिवशी झालेल्या एवढ्या मोठ्या घसरणीमुळे गुंतवणूकदार धास्तावले आहेत. त्यामुळे गुंतवणूकदारांचा विश्वास पुन्हा संपादन करण्यासाठी काही दिवस जातील. परिणामी, सेन्सेक्स पूर्वपदावर येण्यासाठी काही अवधी लागेल.

नुकसान कसे होते?

शेअर बाजारात होणाऱ्या एकूण व्यवहारांपैकी वर्तमानातील व्यवहारांचे प्रमाण केवळ १० ते १५ टक्के इतके असते. उर्वरित ८५ टक्के व्यवहार हे भविष्यकालीन गुंतवणुकीवर आधारित असतात. याला फ्युचर अँड ऑप्शन्स मार्केट (एफएनओ) असे म्हटले जाते. ज्या शेअरची मालकी सध्या आपल्याकडे नाही, त्याची भविष्यामध्ये विशिष्ट किंमत ठरवून तो त्या किमतीला खरेदी करून त्याची परस्पर विक्री करता येते. मात्र, या व्यवहारासाठी भविष्यातील विशिष्ट कालावधीची, उदाहरणार्थ ५ दिवसांची मुदत असते. त्यामुळे या मुदतीत सेन्सेक्सची घसरण होऊन संबंधित शेअरच्या किमतीत बदल झाला, तर तो फरक गुंतवणूकदाराला आपल्या खिशातून भरावा लागतो.

कोल्हापुरातील गुंतवणूकदारांमध्ये प्रामुख्याने सुशिक्षित व बँकिंग क्षेत्रामध्येच कार्यरत असलेले लोक आहेत. व्यक्तिगत पातळीवरील गुंतवणूकदारांची संख्या साधारणतः पाच हजारांच्या घरात असून सरासरी गुंतवणूक प्रत्येकी पाच लाख रुपये इतकी धरली, तरी हा आकडा २५० कोटींच्या घरात पोहोचेल. ही रक्कम आता परत मिळवण्यासाठी गुंतवणूकदारांना काही काळ वाट पाहावी लागणार आहे.

- किरण कर्नाड, बँकिंग तज्ज्ञ

भारतीय बाजारपेठेमध्ये २००८ नंतर प्रथमच एवढ्या मोठ्या प्रमाणावर घसरण झाली आहे. मात्र, या घसरणीचा केंद्रबिंदू हा भारताबाहेर चीन व अमेरिकेत असल्याने येथील गुंतवणूकदारांनी विचलित होण्याची गरज नाही. भारतीय अर्थव्यवस्था अशा संकटांचा सामना करण्यासाठी सक्षम असल्याचे अरुण जेटली आणि रघुराम राजन यांनी सांगितले आहे. येणाऱ्या काळामध्ये गुंतवणूकदारांनी टप्प्याटप्प्याने गुंतवणूक करण्यावर भर द्यावा.

- प्रा. डॉ. विजय ककडे

मोबाइल अॅप डाउनलोड करा आणि राहा अपडेट

---

पाइपलाइनचे काम रखडले

August 25, 2015, 1:35 pm

≫ Next: ‘स्वाइन फ्लू’ने महिलेचा मृत्यू

≪ Previous: कोल्हापूरलाही ‘सेन्सेक्स’ तडाखा

$

0

0

म. टा. प्रतिनिधी, कोल्हापूर

गेल्या वर्षभरात थेट पाइपलाइन योजनेचे काम ३५ टक्के पूर्ण होणे अपेक्षित असताना केवळ १५ टक्केच काम झाले आहे. ४८८ कोटी रुपये खर्चाच्या प्रकल्पाचे उद्घाटन होऊन येत्या शुक्रवारी वर्ष पूर्ण होत आहे. पाटबंधारे आणि जिल्हा परिषदेच्या जागेतील तेरा किलोमीटरच्या पाइपलाइन मार्गासाठी अद्याप मान्यता मिळालेली आहे. राज्य वन्य विभागाने काळम्मावाडी धरणाच्या उजव्या बाजूकडील जागेला मान्यता दिली असली तरी अद्याप केंद्राची मान्यता मिळालेली नाही. राजकीय इच्छाशक्तीचा अभाव आणि नियोजनातील सावळ्या गोंधळामुळे प्रकल्प रखडत आहे.

काळम्मावाडी धरणातून थेट पाणी पुरवठा करण्यासाठी ५२ किलोमीटरची ही योजना आहे. हैदराबाद येथील जीकेसी इन्फ्रास्ट्रक्चर कंपनीकडे प्रकल्पाचा ठेका आहे. प्रस्तावातील त्रुटी, राजकीय ताकदीचा अभाव यामुळे वर्षातील बहुतांशी कालावधी पाइपलाइन मार्गासाठी परवानगी घेण्यात खर्ची पडला.

कामाचे बिल ८५ कोटी

योजना रखडण्यास प्रशासनाचा भोंगळ कारभार कारणीभूत असल्याचा आरोप नगरसेवक प्रा. जयंत पाटील यांनी केला. प्रशासनाकडे वारंवार विचारणा करूनही सद्यस्थितीविषयी माहिती दिली जात नाही. प्रशासनाची जीकेसी इन्फ्रास्ट्रक्चर व युनिटी कन्सल्टंट कंपनीवर कृपादृष्टी का? योजनेचे १५ टक्के काम झाल्याचे सांगून ८५ कोटी रुपयांचे बिल कंपनीला दिले, असेही त्यांनी सांगितले.

वर्षभरात काय झाले?

सार्वजनिक बांधकाम विभागाकडून २८ किलोमीटरच्या मार्गाला मंजुरी मिळाली आहे. करवीर तहसीलदार कार्यालयाने आठ किलोमीटरच्या मार्गाला मान्यता दिली आहे. आतापर्यंत दोन किलोमीटर अंतर पाइपलाइन टाकली आहे. त्या शिवाय १७०० मीटर खोदाई केली आहे. फुलेवाडी रिंग रोड, आपटेनगर, साळोखेनगर भागात दीड किलोमीटरची १००० मिलीमीटर व्यासाची पाइपलाइन टाकली आहे. पुईखडी येथे जलशुद्धीकरण केंद्रासाठी खोदाई सुरू आहे.

वेगवेगळ्या विभागांच्या परवानगींसाठी विलंब लागल्याने १५ टक्केच काम झाले आहे. कामाची गती वाढविण्याच्या सूचना दिल्या आहेत. वन्यजीव विभागाची मान्यता मिळाल्यावर धरणच्या उजव्या बाजूला इनटेक वेल, जॅकवेल आणि पंप हाउस उभारणी सुरू होईल. प्रकल्प मुदतीत पूर्ण झाला नाही तरी ठरलेल्या रकमेतच कंपनीने योजना साकारायची आहे.

- मनीष पवार, जल अभियंता, महापालिका

मोबाइल अॅप डाउनलोड करा आणि राहा अपडेट

‘स्वाइन फ्लू’ने महिलेचा मृत्यू

August 25, 2015, 1:35 pm

≫ Next: शाहूपुरीत कंटेनरचा कहर

≪ Previous: पाइपलाइनचे काम रखडले

$

0

0

कागल : तमनाकवाडा (ता. कागल) येथील महिलेचा मंगळवारी स्वाइन फ्लूने मृत्यू झाला. नंदाताई मधुकर तिप्पे (वय ४५) असे त्यांचे नाव आहे. त्यांच्यावर कोल्हापुरात खासगी हॉस्पिटलमध्ये उपचार सुरू होते. त्यांच्या कुटुंबातील अन्य चार जणांवर उपचार पूर्ण झाले असून त्यांची प्रकृती ठीक आहे.

कापशी आरोग्य विभागामार्फत गेले चार दिवस गावात संपूर्ण तपासणी व संशयितांवर उपचार करण्यात आले. आज अत्यंत सावधगिरी बाळगत नंदाताई यांच्यावर अंत्यसंस्कार झाले. संपर्कात जाणाऱ्यांना मास्क आणि ग्लोज दिले होते. या बाबत तालुका वैद्यकीय अधिकारी ए.आर.गवळी म्हणाले, 'मृत नंदाताई यांना त्यांची पुण्याची दीड वर्षाची नात धनश्री हिच्यामुळे स्वाइनची लागण झाली. धनश्रीच्या आई वडिलांवरही उपचार सुरू होते; परंतु डायबेटिस असल्याने नंदाताईंची प्रतिकारशक्ती कमी झाल्याने त्यांचा मृत्यू झाला.'

मोबाइल अॅप डाउनलोड करा आणि राहा अपडेट

शाहूपुरीत कंटेनरचा कहर

August 25, 2015, 1:37 pm

≫ Next: ऑडिटसाठी पेन्शन बंद

≪ Previous: ‘स्वाइन फ्लू’ने महिलेचा मृत्यू

$

0

0

११ वाहनांना धडक, तिघे गंभीर

म. टा. प्रतिनिधी, कोल्हापूर

गजबजलेल्या शाहूपुरी व्यापारी पेठेत मंगळवारी सकाळी ब्रेक फेल कंटेनरने ११ वाहनांना जोरदार धडक दिल्याने घबराट माजली. अपघातात राहुल धनाजी मिठारी (वय २३, रा. संभाजीनगर), धनाजी जाधव (२८, रा. महागोंड, ता. आजरा) व बाळासो अनंत पाटील (वय ५२, रा. चोकाक) हे तिघे गंभीर जखमी झाले.

शाहूपुरी व्यापारी पेठेमागील रेल्वे गुड्स यार्डमध्ये आठवड्यातून दोन वेळा नव्या व खराब झालेल्या बोगीच्या चासिसची मुंबईहून ने-आण केली जाते. हे काम संदीप ट्रान्सपोर्टकडे आहे. सोमवारी रात्री नवीन चासिस घेऊन आलेला कंटेनर मंगळवारी सकाळी साडेदहा वाजता २० टन वजनाच्या नादुरुस्त दोन चासिस घेऊन गुड्स यार्डमधून बाहेर पडला.

शाहूपुरी पहिल्या गल्लीतील जैन मंदिराजवळ कंटेनरचा ब्रेक फेल झाला. वहिनी गृहिणी भांडारच्या चौकात कंटेनरने ठोकरल्याने ट्रॅक्स उलटली. कंटेनर सुरक्षित थांबवण्यासाठी चालकाने वामन गेस्ट हाउससमोरील झाडाकडे वळवून स्वतःचा जीव वाचवण्यासाठी उडी मारली. कंटेनर तसाच पुढे जात दोन रिक्षांना धडकला. त्यातील एक कंटेनरखाली सापडली. त्यानंतर कंटेनर झाडाजवळ पार्क केलेल्या तीन मोटारींवर आदळून थांबला. रिक्षाचालक राहुल मिठारी गंभीर जखमी झाला.

या अपघातामुळे नागरिक भयभीत झाले. काही नागरिकांनी पळ काढल्याने ते वाचले; पण उलटलेल्या ट्रॅक्समधील ​तीन प्रवासी किरकोळ जखमी झाले. रिक्षाचालक मिठारी गंभीर अवस्थेत विव्हळत होता. व्यापारी पेठेतील नागरिक आणि कार्यकर्त्यांनी जखमींना सीपीआर हॉस्पिटलमध्ये दाखल केले. कंटेनरच्या चाकाखाली दगड टाकून मिठारीला सुरक्षित बाहेर काढण्यासाठी तो मागे घेत असताना तो पुन्हा मोटारीवर आदळला.

बघ्यांचा आततायीपणा

या दुर्घटनेची माहिती तातडीने इतरांना कळविताना सोशल मीडिया वापरणाऱ्यांचा आततायीपणा ठळकपणे दिसून आला. सोशल मीडियावरून या घटनेचे फोटो आणि अफवा मोठ्या प्रमाणात पसरविण्यात आल्या. त्यामुळे अनेकांचा भीतीने थरकाप उडाला. दुर्घटनेत अनेकांचा मृत्यू झाल्याच्या अफवाही पसरविण्यात आल्या.

बंदी असूनही वाहतूक

शहरात सकाळी १० ते साडेबारा आणि सायंकाळी साडेचार ते साडेसातपर्यंत अवजड वाहनांना बंदी असूनही अनेक अवजड वाहनांची वाहतूक सुरू असते. आजच्या घटनेत तर बोगीच्या चासीस घेऊन कंटेनर सकाळी साडेदहाच्या सुमारासच भर गर्दीच्या रस्त्यातून जात होता. त्यामुळे वाहतूक पोलिसांची कार्यपद्धती चव्हाट्यावर आली आहे.

मोबाइल अॅप डाउनलोड करा आणि राहा अपडेट

ऑडिटसाठी पेन्शन बंद

August 26, 2015, 1:44 pm

≫ Next: ‘राधानगरी’च तारणहार

≪ Previous: शाहूपुरीत कंटेनरचा कहर

$

0

0

कागलचे तहसीलदार सांगडे यांची माहिती

म. टा. वृत्तसेवा, कागल

कागलमधील संजय गांधी निराधार योजनेची थांबवलेली पेन्शन आणि आता होणारे वाटप तसेच काढलेल्या नोटिसा या सर्व बाबी सरकारी कामकाजाचा एक भाग आहे. कुठल्याही राजकीय व्यक्ती अथवा आंदोलन मोर्चाचा हा परिणाम नाही तर सरकारी नियमानुसार झालेली कार्यवाही आहे, अशी माहिती कागलचे तहसीलदार शांताराम सांगडे यांनी दिली.

नियमानुसार सोशल ऑडिटअंतर्गत लाभार्थ्यांची चौकशी होणारच मात्र त्यातील आम्ही अपात्र केलेल्या लाभार्थ्यांचे काय करायचे? हा निर्णय मात्र विद्यमान समितीचा आहे, असेही ते म्हणाले. गेले काही दिवस कागल तालुक्यात गोरगरीब पेन्शन धारकांच्या आधाराचे राजकारण केले जात आहे. श्रेयवादाची लढाई राष्ट्रवादी आणि शिवसेना यांच्यात सुरु आहे.त्या पार्श्वभूमीवर तहसीलदार सांगडे यांच्याशी संपर्क साधला असता ही माहिती दिली.

दरवर्षी होणारे सोशल ऑडिट हा सरकारी नियमाचा एक भाग आहे. त्यामुळे कुणाचाही यात हस्तक्षेप असण्याचा प्रश्नच येत नाही, असे स्पष्ट करुन सांगडे म्हणाले, संपूर्ण जिल्ह्यातीलच निराधारांचे आलेले अनुदान वरिष्ठ पातळीवरुन थांबवण्यात आले होते. ही चौकशी संपूर्ण जिल्ह्यात सुरु आहे. एप्रिलमध्ये निवडणुका आल्याने त्यापूर्वीचे आणि नंतरचे अनुदान एकदमच देण्याचा निर्णय कमी मनुष्यबळामुळे घेण्यात आला होता. डिसेंबर, २०१४ मध्ये सोशल ऑडिटला सुरुवात करण्यात आली. ज्यांनी दाखले दिले त्यांनाच घेवून तपासणी करता येत नाही. म्हणून पारदर्शी कारभारासाठी वरिष्ठ अधिकाऱ्यांच्या आदेशाने राधानगरी तालुक्यातील अधिकारी मागवून तपासणी करण्यात आली. लाभार्थ्यांमधील उत्पन्न तपासणे, आई-वड‌िलांना पुन्हा जवळ करणे, मृत्यू होणे, कष्टातून यश मिळवून यशस्वी होणे आदी कारणांनी लाभार्थी कमी झालेच पाहीजेत, असे सरकारचे म्हणणे अथवा अपेक्षा आहे. त्यामुळेच २०११ ला ऑडिट, २०१२ मध्ये चौकशी आणि आता पुन्हा सोशल ऑडिट केले जात आहे. यामध्ये कुणाचा राजकीय हस्तक्षेप अथवा श्रेय असण्याचा प्रश्नच येत नाही, असेही ते म्हणाले.

सरकारी अधिकाऱ्यांच्या मदतीने लाभार्थ्यांच्या हिताच्या दृष्टीने काही निर्णय घेण्याचा समितीलाच अधिकार असतो. यामध्ये विरोधकांचा काहीच संबंध येत नाही.

- धनराज घाटगे, विद्यमान अध्यक्ष, संजय गांधी निराधार पेन्शन योजना

आमच्या समितीने मंजूर केलेली प्रकरणे आता अपात्र ठरविण्यात आली आहेत. त्यामुळेच गरीबांची पेन्शन थांबवणे आम्हाला मान्य नाही. येथून पुढेही गरीबांच्या पेन्शनमध्ये आड आलेले आम्ही खपवून घेणार नाही.

- प्रताप माने, माजी अध्यक्ष, संजय गांधी निराधार पेन्शन योजना

मोबाइल अॅप डाउनलोड करा आणि राहा अपडेट

‘राधानगरी’च तारणहार

August 26, 2015, 1:46 pm

≫ Next: वाळू उपशास विरोध

≪ Previous: ऑडिटसाठी पेन्शन बंद

$

0

0

बाळासाहेब पाटील, कोल्हापूर

यंदाच्या पावसाळ्यात पावसाने ओढ दिल्याने जिल्ह्यातील सर्वच तालुक्यांत चिंतेचे वातावरण आहे. मा‌त्र, राधानगरी धरण पूर्ण क्षमतेने भरल्याने भोगावती व पंचगंगा नदीकाठावरील गावांनी सुटकेचा निश्वास सोडला आहे. राधानगरी धरण निम्म्याहून अधिक भरले तरी पुरेसा पाणीपुरवठा होतो असा अनुभव असल्याने धरण पूर्ण क्षमतेने भरल्याने पाणीटंचाईच्या ‌चर्चेला पूर्णविराम मिळाला आहे.राजर्षी शाहू महाराजांनी ज्या दुरदृष्टीने या धरणाची उभारणी केली होती त्या दुरदृष्टीचा प्रत्यय अवर्षणाच्या काळात येत आहे.

राजर्षी शाहू महाराजांनी १९०८ मध्ये दूरदृष्टीने राधानगरी धरणाची पायाभरणी केली. सिंचानाची सुविधा उपलब्ध होण्यासाठी या धरणाची पायाभरणी झाली आणि आजतागायत या धरणावर अनेक संसार उभे राहिले. जिल्ह्यातील सर्वाधिक जुने धरण असलेल्या राधानगरी धरणावर राधानगरीपासून ते हातकणंगलेपर्यंतची शेकडो गावे अवलंबून आहे. भोगावती नदीवर फेजिवडेत हे धरण असून त्यातून शेतीसाठी व ‌वीजनिर्मितीसाठी उपलब्ध पाणीसाठ्याचा वापर होतो. हे धरण भोगावती नदीवर असले तरी पुढे पंचगंगा व कृष्णेच्या संगमापर्यंतची सर्व गावे या लाभक्षेत्रात येतात. धरणाची सुरूवात झाली त्यावेळी ११ ते १२ लाख रूपये त्याचे बजेट होते. कोल्हापूर शहरापासून हे धरण साधारणत: ५१ किलोमीटर अंतरावर आहे. राजर्षी शाहू महाराजांनी या धरणाची दूरदृष्टीने उभारणी केली. स्वातंत्र्यानंतर म्हणजे १९५४ मध्ये धरणाचे बांधकाम पूर्ण झाले.

धरण बांधताना राजर्षी शाहू महाराजांनी त्या काळातील नामवंत इंजिनीअर्सशी चर्चा केली. त्यानंतर सर विश्वेश्वरय्या यांना बोलावून त्यांच्याशी मसलत केली. विश्वेश्वरय्या धरणाच्या कार्यस्थळावर आले. त्यांनी काही सूचना सुचविल्या. त्यानुसार धरण उभारणीला प्रारंभ झाला.

उत्पन्नाएवढे बजेट

ज्यावेळी धरण बांधकामाला प्रारंभ झाला त्यावेळी कोल्हापूर जिल्ह्याचे वार्षिक उत्पन्न १३ ते १४ लाख रूपये होते. तर धरणाचा खर्चही तेवढाच होता. मात्र, हा चलसिंचन प्रकल्प व्हावा यासाठी शाहू महाराजांनी वैयक्तिक आयुष्यात काटकसरी‌चे धोरण अवलंबले, असे काही नोंदीवरून दिसून येते. महाराजांसाठी असलेले खास रेल्वेगाडी त्यांनी वापरणे बंद केले होते.

कोल्हापूरचे अवलंबित्व

धरणाची उभारणी केल्यानंतर परिसरात हरितक्रांती झाली. अनेक गावे पाण्याखाली आल्याने बागायती शेती बहरली. उसाचे क्षेत्र वाढल्याने कारखान्यांची संख्या वाढली. त्यामुळे सहकाराचे जाळे वाढत गेले. किंबहुना त्यामुळेच राजकीय क्षेत्रातही सहकाराचे वर्चस्व निर्माण झाले. दरडोई उत्पनामध्ये कोल्हापूर जिल्ह्याचा अव्वल क्रमांकात धरणाचे योगदान आहे.

दरवाजांवरून वाद

वास्तूशास्त्राचा एक सर्वोत्तम नमुना आणि राजर्षी शाहू महाराजांच्या कर्तृत्वाचा दाखला देणारे राधानगरी धरणाचे सातही स्वयंचलित दरवाजे बदलण्यासाठी जलसंपदा विभाग प्रयत्नशील आहे. धरणावरील अतिरीक्त दाब आणि सुरक्षा आदी कारणास्तव हा निर्णय घेण्यात आला आहे. मात्र, हे दरवाजे सुस्थितीत असून ते बदलण्यास विरोध केला आहे.

यांत्रिक दरवाजांचा पर्याय

२००५ मध्ये अतिवृष्टी आणि धरणातील अतिरिक्त पाण्याचा दाब वाढल्याने धरणास धोका निर्माण होण्याची परिस्थिती उद्‍भवली होती. हे एकमेव कारण पुढे करीत जलसपंदा विभागाने पाच वर्षापूर्वी निरीक्षण समितीच्या शिफारसीनुसार दरवाजे बदलून येथे नवे यांत्रिक दरवाजे बसविण्याचा सुमारे ४२ कोटींचा प्रस्ताव सरकारकडे पाठविला आहे.

मोबाइल अॅप डाउनलोड करा आणि राहा अपडेट