पावसाळ्यात चिंब भिजण्यासाठी आणि कपल्सना रोमँटिक रेनी सिझन एन्जॉय करायचा असेल तर पन्हाळ्याशेजारीच असणारे मसाई पठार गेलेच पाहिजे. कोल्हापूर मधील काही हौशी पर्यटक आणि कपल्स पन्हाळा सोडून मसाईचा रस्ता धरत आहेत. हिरव्यागार गवताची शाल पांघरलेले १० किलोमीटरचे पठार, ऊन-पावसाच्या लपंडावात दाट धुक्यात हरवत येथील निसर्गसौंदर्य पाहतच बसावे वाटते. २०० ते ८०० फूट रूंद अशा वेगवेगळ्या १० पठारांचे मिळून बनलेले हे पठार पाचगणीच्या टेबल लँड पेक्षाही मोठे आहे. सध्या हे पठार पावसाळी पर्यटनासाठी फेव्हरिट बनत आहे.
पन्हाळ्यापासून अवघ्या सात किलोमीटरवर असणाऱ्या या पठारावर जाण्यासाठी बुधवारपेठ, आपटी, म्हाळुंगे मार्गे जावे लागते. आपटी सोडली की रस्त्याच्या दोन्ही बाजूला असणाऱ्या झाडे-झुडपातून लहान वळणांच्या रस्त्याने जावे लागते. अलिकडेच मसाई रेसॉर्ट नावाचे हॉटेल येथे झाले आहे. हे या परिसरात असणारे एकमेव हॉटेल. भूक लागली की या हॉटेलशिवाय पर्याय नाही. मसाई जाताना जंगलातून जावे लागते. पूर्वी या ठिकाणी शाहूकालीन चहाचे मळे होते. थोडा घाट चढून वर गेले की म्हाळुंगे गावातून मसाई पठारावर पोहोचता येते. हिरव्यागार गवताची शाल पांघरलेल्या मसाई पठारावर वारे प्रंचड वेगाने वाहते. दाट धुक्यामुळे पठारावर भरकटलेल्यांना परतीचा मार्ग सापडत नाही. वाहनांच्या मळलेल्या वाटांवरूनच परतीचा मार्ग शोधावा लागतो. धुके थोडे कमी झाले की कासारी नदीचा विस्तीर्ण प्रदेश न्याहाळता येतो.
पठारावर साचणा‍ऱ्या डबक्यात खेळण्यासाठी, एकमेकांच्या अंगावर पाणी उडवत कुटुंबिय रममाण होतात तर कॉलेज युवक-युवती धुक्यात हरवत रोमँटिक रेन्स एन्जॉय करत आहेत. पठारावर एकांत मिळत असलेने कपल्सचे हे फे व्हरिट ठिकाण बनले आहे. मसाईच्या एका टोकापासून दुसरे टोक साधारण ४ ते ५ किलोमीटर आहे. या दुसऱ्या टोकावरच मसाई देवीचे छोटेसे एक मंदिर आहे, त्यामुळे या पठाराला मसाई पठार नाव पडले. पठारावर जांभ्या दगडात खणलेले जुने तलाव देखील आहेत.
एका बाजूला इसवीसन पूर्व तिसऱ्या शतकातील पांडवकालीन लेणी असून अजून त्या आपले अस्तित्व टिकवून आहेत. पन्हाळा ते मसाई पठार रोप-वे, पर्यटकांसाठी पठारावर नैसर्गिकपणाला बाधा न आणता झोपड्या बांधून राहण्याची व्यवस्था करणे, हौशी गिर्यारोहकांसाठी ट्रेल-ट्रेक करणे, खुला निसर्ग मंच (अ‍ॅम्पी थिएटर)बोटिंग क्लब, पॅराग्लायडिंग अशा योजना राबविल्या तर राज्यातील हे पठार एक उत्कृष्ट पर्यटन केंद्र बनेल.
मोबाइल अॅप डाउनलोड करा आणि राहा अपडेट
