म. टा. प्रतिनिधी, कोल्हापूर
'सत्याचा विवेकी विचार मांडणाऱ्या थोर व्यक्तींचा गोळ्या घालून खून केला तरी त्यांचे विचार संपत नाहीत,' असा संदेश 'सॉक्रेटिस ते दाभोलकर, पानसरे व्हाया तुकाराम' या रिंगण नाट्याद्वारे देण्यात आला. शहीद डॉ. नरेंद्र दाभोलकर स्मृती दिनानिमित्त अंधश्रद्धा निर्मूलन समितीच्यावतीने देवल क्लब येथे रिंगण नाट्याचे आयोजन करण्यात आले होते. विवेकाला बळ देण्याचे आवाहन नाटकाच्या प्रयोगातून करण्यात आले.
ज्यांनी धर्माची चिकित्सा केली. कालबाह्य विचार नाकारून कालसुंगत नवा पर्याय उभा करण्याचा प्रयत्न केला त्यांचा प्रचंड छळ वा खून झाल्याचा इतिहास आहे. परिवर्तनाचा व विवेकी विचार मांडणाऱ्या सॉक्रेटिस, संत तुकाराम, नरेंद्र दाभोलकर, गोविंदराव पानसरे यांचा खून करून विचार मारण्याचा प्रयत्न करणाऱ्या प्रवृत्तीविरोधातील ज्येष्ठ लेखक राजाभाऊ शिरगुप्पे लिखित नाटकाचे सादरीकरण करण्यात आल. डॉ. दाभोलकर यांच्या खुनाला दोन वर्षे, तर कॉ. पानसरे यांच्या खुनाला सहा महिने उलटले तरी मारेकरी व सूत्रधार सापडत नाहीत. याचा संताप मनात ठेवून अंनिसच्या कार्यकर्त्यांनी हे नाटक सादर केले.
नाटकाच्या सादरीकरणापूर्वी निबंध, पथनाट्य व वक्तृत्व स्पर्धेतील विजेत्यांना डॉ. शरद भुताडिया, राजाभाऊ शिरगुप्पे, अरुंधती महाडिक व मेघा पानसरे यांच्या हस्त बक्षीस वितरण करण्यात आले. यावेळी डॉ. भुताडिया यांनी, डॉ. दाभोलकर, कॉ. पानसरे यांचे विचार पोहोचविण्याचा सर्वजण मिळून प्रयत्न करूया, असे आवाहन केले. नाटकाचे लेखक राजाभाऊ शिरगुप्पे म्हणाले, 'दाभोलकर व पानसरे सत्य बोलले. सत्य बोलणाऱ्या मंडळींना समाजातील काही लोकांचा विरोध असतो. दाभोलकर व पानसरे यांचे विचार नाटकातून मांडले आहेत. नाटकाद्वारे सांस्कृतिक उत्तर दिले आहे.'
यावेळी महापौर वैशाली डकरे उपस्थित होत्या. सुनील स्वामी यांनी प्रास्ताविक केले. सुजाता म्हेत्रे यांनी आभार मानले. दत्ता घुटगडे यांनी सूत्रसंचालन केले. कार्याध्यक्ष प्रकाश भोईटे, पी. डी. पाटील, कृष्णात कोरे, सीमा पाटील, अरूण पाटील, बाळासो कांबळे यांच्यासह कार्यकर्त्यांनी संयोजन केले.
स्पर्धेचा निकाल अनुक्रमे असाः
निबंध स्पर्धाः पूजा कुंभार, विकास मोरे, सुजाता गुरव.
पथनाट्य स्पर्धाः सुनील पारके, रोहन आदमापुरे, राहुल देसाई.
वक्तृत्व स्पर्धाः किंग मेकर, घाळी कॉलेज, गडहिंग्लज, कलारंग, उत्तेजनार्थ भारती विद्यापीठ.
मोबाइल अॅप डाउनलोड करा आणि राहा अपडेट