‘दौलत’ विकताना कामगारांचा विचार करा

August 4, 2015, 1:48 pm

≫ Next: गस्त घालणाऱ्यांचा पोलिसांवर हल्ला

≪ Previous: पोलिस पाटील लाच घेताना जाळ्यात

$

0

0

म. टा. वृत्तसेवा चंदगड

दौलत कारखाना जिल्हा बँकेच्या ताब्यात असून बँक तो लिलावात काढत आहे. लिलावाबाबत उलटसुलट चर्चा सुरु असून भविष्यात कारखान्याबाबत कोणताही निर्णय झाल्यास कामगारांनी कोणती भूमिका घ्यावी. यावर विचार विनियम करण्यासाठी हलकर्णी (ता. चंदगड) येथील दौलतच्या कार्यस्थळावर शुक्रवारी (ता. ७) सकळी अकरा वाजता बैठक बोलावण्यात आल्याची माहिती सुरेश सावंत-भोसले यांनी दिली.

दौलत कामगार संघटनेचे सेवानिवृत्त सचिव जे. जी. पाटील यांनी दौलतच्या कर्जाला मार्च २०१६ पर्यंत मुदत द्यावी, अशी मागणी जिल्हा बँकेचे अध्यक्ष आमदार हसन मुश्रीफ यांच्याकडे केली आहे. याला अन्य कामगारांचा विरोध आहे. सचिव पाटील यांनी वैयक्तिकरित्या ही मागणी केली आहे. अशी मागणी करण्यापूर्वी पाटील यांनी कामगारांशी चर्चा करणे आवश्यक होते. मात्र त्यांनी तसे न केल्याने कामगारामध्ये संभ्रमावस्था निर्माण झाली आहे.

दौलतच्या कर्जाला मुदतवाढ दिल्यास कामगार पुरता संपणार असून दौलत कवडीमोल भावाने विकला जाणार आहे. त्यामुळे यावर्षीपेक्षा दुपटीने शेतकऱ्यांचे नुकसान होणार आहे. त्यामुळे कामगारांचा विक्रीला पाठिंबा असून मुदतवाढीला विरोध दर्शविला आहे. चार वर्षे कारखाना बंद असल्यामुळे कामगार देशोधडीला लागले आहेत. कसाही असला तरी कारखाना सुरू होण्याला आमचे प्राधान्य असून येणाऱ्या व्यवस्थापनाला आमचे संपूर्ण सहकार्य राहील अशी भूमिका आहे. यासंदर्भात चर्चा करण्यासाठी बोलावण्यात आलेल्या बैठकीला कामगार मोठ्या प्रमाणात उपस्थित होतो.

मोबाइल अॅप डाउनलोड करा आणि राहा अपडेट

---

गस्त घालणाऱ्यांचा पोलिसांवर हल्ला

August 4, 2015, 1:51 pm

≫ Next: तंग कपडे घातल्यावरून भावाकडून बहिणीचा खून

≪ Previous: ‘दौलत’ विकताना कामगारांचा विचार करा

$

0

0

म. टा. प्रतिनिधी, कोल्हापूर

चोरीच्या घटना रोखण्यासाठी गस्त घालणाऱ्या ग्रामस्थांच्या पथकाने पोलिसांच्या मोटारीवर हल्ला केला. हल्ल्यात दोघा पोलिसांना किरकोळ जखमा झाल्या असून, मोटारीचे पंधरा हजारांचे नुकसान झाले. अशा प्रकारामुळे एखाद्या निष्पाप व्यक्तीचा बळी जाण्याची भीती व्यक्त केली जात आहे.

वडणगे, निगवे, रजपुतवाडी, आसुर्ले पोर्ले परिसरात चोरट्यांनी धुमाकूळ घातल्याची चर्चा सुरू आहे. सोमवारी रात्री रत्नागिरी येथील सहायक फौजदार आदिनाथ शंकर माने व त्यांचा भाऊ पोलिस नाईक सुधीर शंकर माने कुटुंबीयांसमवेत रत्नागिरीहून सांगलीला जात होते. सोमवारी मध्यरात्री पन्हाळ्याहून कोल्हापूरकडे जाताना आसुर्ले पोर्ले येथे जमावाने त्यांची मोटार अडविण्याचा प्रयत्न केला. जमावाच्या हातात काठ्या व कुऱ्हाडी असल्याने त्यांनी मोटार न थांबवता पुढे नेली. त्यानंतर जमावाने पुढील रस्त्यांवर असलेल्या जमावाला मोटार अडवण्यास सांगितले. त्यानंतर ग्रामस्थांनी मोटारीवर दगड-विटांचा मारा केला. त्यामध्ये माने बंधू किरकोळ जखमी झाले. त्यांनी रात्री उशिरा करवीर पोलिस ठाण्यात तक्रार दिली. दरम्यान, संदीप धनाजी करमळकर (वय २४, आर.के. नगर) सोमवारी रात्री पाऊण वाजता पन्हाळ्याहून मित्रासमवेत मोटारीने येत होते. त्यांच्या मोटारीवर दगडफेक करून त्यांना थांबविण्यात आले. करमळकर यांनीही करवीर पोलिस ठाण्यात तक्रार दिली आहे.

सध्या चोरीच्या अफवा उठत आहेत. तरीही करवीर पोलिस ठाण्याचा एक पोलिस उपनिरीक्षक व दहा पोलिस वडणगेसह दहा गावांत गस्त घालत आहेत. नागरिकांनी गस्त घालू नये. बेकायदेशीर गस्त घालणाऱ्यांवर कारवाई केली जाईल.'

- दयानंद ढोमे, करवीर पोलिस निरीक्षक

मोबाइल अॅप डाउनलोड करा आणि राहा अपडेट

तंग कपडे घातल्यावरून भावाकडून बहिणीचा खून

August 4, 2015, 1:52 pm

≫ Next: पंधरा लाखांची ऑनलाइन फसवणूक

≪ Previous: गस्त घालणाऱ्यांचा पोलिसांवर हल्ला

$

0

0

म. टा. प्रतिनिधी, कोल्हापूर

तंग कपडे घालून कॉलेजला जाते, कँटीनमध्ये मित्रांबरोबर गप्पा मारत बसते, अशा कारणांवरून चिडलेल्या भावाने बहिणीला लोखंडी बारने केलेल्या मारहाणीत ती ठार झाली. ऐश्वर्या सुनील लाड (वय १७, रा. धोत्री गल्ली, रंकाळावेश स्टँड) असे त्या तरुणीचे नाव आहे. याप्रकरणी लक्ष्मीपुरी पोलिसांत खुनाचा गुन्हा नोंद झाला असून, भाऊ ओंकार सुनील लाड (१९) याला पोलिसांनी मंगळवारी अटक केली. ही घटना सोमवारी रात्री साडेदहाच्या सुमारास घडली.

याबाबत पोलिसांतून मिळालेली माहिती अशी ः ऐश्वर्याला दहावीत ८४ टक्के गुण मिळाले असून, विवेकानंद कॉलेजमध्ये प्रवेश घेतला होता. कॉलेजला जाताना ती तंग कापडे घालत असल्याने त्याला भाऊ ओंकारचा आक्षेप होता. कॉलेजमध्ये मित्रांसमवेत कँटीनमध्ये बोलतेस, मोबाइलवर तासनतास बोलतेस म्हणून तो तिच्यावर संशय घेत होता.

ओंकारने ऐश्वर्याबरोबर वाद घालून तिला वेताच्या काठीने मारहाण केली. ऐश्वर्याला सोडवायला गेलेल्या आईलाही त्याने काठीने मारले. काठी मोडल्यावर ओंकारने पडद्याचा लोखंडी रॉडने ऐश्वर्याला बेदम मारहाण केली. रॉडचा वार ऐश्वर्याच्या डोक्यात बसल्याने ती बेशुद्ध पडली.ऐश्वयाला सीपीआरमध्ये दाखल केले, पण उपचारापूर्वीच तिचा मृत्यू झाला. पोलिसांनी ओंकारला अटक केली.

ओंकार मनोरुग्ण

ओंकार मनोरुग्ण होता, अशी माहिती नातेवाइकांनी दिली. त्याच्यावर कोल्हापूर व बेळगावमधील डॉक्टरांकडून उपचार सुरू होते. ओंकार मनोरुग्ण असल्याचे पुरावे मिळाले नसल्याचे पोलिसांनी सांगितले. त्याला वाचवण्यासाठी नातेवाइकांकडून प्रयत्न केले जात आहेत.

मोबाइल अॅप डाउनलोड करा आणि राहा अपडेट

पंधरा लाखांची ऑनलाइन फसवणूक

August 4, 2015, 1:53 pm

≫ Next: डासांच्या प्रादुर्भावामुळे शहरातील पाच शाळा बंद

≪ Previous: तंग कपडे घातल्यावरून भावाकडून बहिणीचा खून

$

0

0

म. टा. प्रतिनिधी, कोल्हापूर

बनावट सीमकार्डचा आणि आधुनिक संगणक तंत्रज्ञानाचा वापर करून बँकेच्या खात्यावरील १५ लाख लंपास केल्याचा गुन्हा राजारामपुरी पोलिस ठाण्यात नोंद झाला आहे. बाबासो रामगोंडा पाटील (वय ६६, रा. हिम्मतबहाद्दर परिसर, ताराबाई पार्क) यांनी याबाबतची फिर्याद दिली आहे.

बाबासो पाटील यांची राजारामपुरीत फर्निस लीडर्स नावाची फर्म आहे. जुलै महिन्यात ते मुंबईला गेले होते. मुंबईत त्यांच्या मोबाइलचे सीमकार्ड २० जुलै रोजी बंद पडले. कोल्हापुरात आल्यावर कार्ड बदलायचे असे त्यांनी ठरवले. कोल्हापुरात आल्यावर त्यांच्या रत्नाकर बँकेच्या राजारामपुरी शाखेतील खात्यावरून २० व २१ जुलै या दोन दिवशी सात वेळा १५ लाख रूपये काढल्याचे लक्षात आले. या दोन दिवशी सीमकार्ड बंद होते असे लक्षात आले. आपली फसवणूक झाल्याचे लक्षात आल्यावर त्यांनी राजारामपुरी पोलिस ठाण्यात ३० जुलैला फिर्याद दिली.फसवणूक करणाऱ्यांनी पाटील यांच्या बंद पडलेल्या सीमकार्डच्या क्रमांकाचे दुसरे सीमकार्ड साताऱ्यातून खरेदी केल्याचे तपासात पुढे आले आहे.

मोबाइल अॅप डाउनलोड करा आणि राहा अपडेट

डासांच्या प्रादुर्भावामुळे शहरातील पाच शाळा बंद

August 4, 2015, 1:56 pm

≫ Next: अजूनही येतो अहंकाराचा दर्प...

≪ Previous: पंधरा लाखांची ऑनलाइन फसवणूक

$

0

0

म. टा. प्रतिनिधी, कोल्हापूर

पावसाची अनेक दिवसांची उसंत, काही दिवस कडक ऊन आणि नंतर पुन्हा पाऊस अशा वातावरणामुळे मुले आजारी पडण्याचे प्रमाण वाढत आहे. त्यामुळे शाळांमधील गैरहजेरीचे प्रमाण वाढलेले आहे. अशातच आता पावसामुळे शाळांच्या परिसरात झालेली प्रचंड दलदल, कीचकट परिसर आणि कोंदट वातावरणामुळे डासांची उत्पत्ती मोठ्या प्रमाणात झाली आहे. अनेक शाळांमध्ये मुलांना बसणे शक्य होत नाही, अशी स्थिती आहे. गेल्या चार दिवसांत अशी परिस्थिती निर्माण झाली की काही शाळांना सुट्टी देऊन तेथे औषधफवारणी करावी लागली. मंगळवारी तर शहरातील पाच शाळाच बंद ठेवण्यात आल्या.

पेटाळा परिसरात गेल्या दोन दिवसांपासून डासांनी उच्छाद मांडला आहे. त्यामुळे परिसरातील काही शाळा दोन दिवस बंद ठेवण्यात आल्या. काही शाळा अर्ध्या दिवसांनी सोडण्यात आल्या. या प्रकारामुळे महापालिकेचा आरोग्य विभागाही जागा झाला असून, विभागातील २५ कर्मचारी औषध फवारणी करत यावर नियंत्रण आणण्यासाठी प्रयत्न करीत आहेत. डासांचे प्रमाण अचानक वाढल्यामुळे शाळा बंद ठेवण्याचा प्रकार पहिल्यांदाच घडला आहे.

पेटाळा परिसरातील प्रिन्सेस पद्माराजे गर्ल्स हायस्कूल, न्यू हायस्कूल, स. म. लोहिया हायस्कूल, विमला गोयंका, कोल्हापूर हायस्कूल आणि महाराष्ट्र हायस्कूल या पाच शाळा बंद ठेवण्यात आल्या. परिसरात डास वाढल्यामुळे सोमवारपासूनच काही शाळांना दोन दिवस सुट्टी देण्यात आली. विद्यार्थ्यांना काही अपाय होऊ नयेत, यासाठी ही काळजी घेण्यात आल्याचे शाळा प्रशासनाच्यावतीने सांगण्यात आले.

डास वाढल्याचे संबंधित शाळांतील शिक्षकांनी तत्काळ महापालिकेच्या आरोग्य विभागाला कळविले. त्यानंतर काही वेळातच आरोग्य यंत्रणा औषध फवारणीसाठी तेथे हजर झाली. औषध फवारणीचा त्रास विद्यार्थ्यांना होऊ नये, यासाठी मुलांना सोडण्यात आल्या असल्याचे न्यू एज्युकेशन सोसायटीचे सहसचिव प्रभाकर हेरवाडे यांनी सांगितले. प्रिन्सेस पद्माराजे हायस्कूलच्या मागील बाजूस असलेल्या दलदलीमुळे अचानक हा डासांचा प्रादुर्भाव वाढला आहे.

''हा प्रकार समजल्यानंतर तातडीने शाळा परिसरात औषध फवारणी मोहीम राबविण्यात आली. यासाठी ३५ कर्मचारी कार्यरत होते. औषध प्रभावी असल्यामुळे शाळा सोडण्याच्या सूचना दिल्या होत्या. दोन दिवसांनी पुन्हा अशी फवारणी करण्यात येईल.'' - राजेंद्र पाटील, कीटकनाशक अधिकारी, महापालिका

''सोमवारी सकाळी वर्गामध्ये व भिंतीवर वेगळ्या प्रकारचे डास दिसून आल्यामुळे सर्व मुलींना हॉलमध्ये बसविण्यात आले. या डासांमुळे विद्यार्थिनींच्या आरोग्याचा प्रश्न निर्माण होऊ नये यासाठी दुपारनंतर शाळा सोडून दिल्यानंतर औषध फवारणी सुरू करण्यात आले.'' - पी. पी. घोलप, मुख्याध्यापिका, प्रिन्सेस पद्माराजे हायस्कूल

मोबाइल अॅप डाउनलोड करा आणि राहा अपडेट

अजूनही येतो अहंकाराचा दर्प...

August 4, 2015, 1:47 pm

≫ Next: ‘संगीतसूर्य’ अंधारात

≪ Previous: डासांच्या प्रादुर्भावामुळे शहरातील पाच शाळा बंद

$

0

0

दीपक मांगले, गडहिंग्लज

सत्ता येण्याआधी दिलेली आश्वासने अनेकदा खूर्ची मिळाली की विस्मरणात जातात. तसेच सत्तेआधी असलेला नम्रपण जाऊन मग्रुरी येते असाच काहींसा अनुभव गडहिंग्लजकर गेल्या तीन-चार वर्षांपासून घेत आहेत. तेव्हाचे विरोधक आत्ताचे सत्ताधारी झाले असताना त्यांनीही मागील पानावरून पुढे असाच डाव सुरू केला आहे. आमदार हसन मुश्रीफ यांनी आपला बालेकिल्ला सुरक्षित रहावा यासाठी नगरपरिषदेत लक्ष घातले आणि सत्ता आणली. आता या सत्तेला तडे जात आहेत.

राष्ट्रवादी सत्तेतून पायउतार होताच जनता दलानेही त्यांच्या मार्गाने जायला सुरूवात केली आहे. सत्तेच्या अहंकारातून जनता दलासारखा समाजवादी पक्षही सुटलेला नाही हेच यातून स्पष्ट होत आहे.

गेल्या काही वर्षांत गडहिंग्लज नगरपरिषदेवर जनता दलाची सत्ता होती. किंबहुना ती पकड घट्ट होती. मात्र, सोयीचे राजकारण आणि श्रीपतराव ‌शिंदे यांच्यानंतर त्यांची मुलगी स्वाती कोरी यांच्याच हाती नाड्या राहिल्याने मागील निवडणुकीत सत्ताबदल झाला. त्याचवेळी हसन मुश्रीफ यांनी पालिका राजकारणात पूर्ण लक्ष घातले. कोणाच्याही मध्यास्थिविना मंत्री थेट भेटतात हा मुश्रीफांचा अनुभव गडहिंग्लजकरांना नवीन होता. मात्र मुश्रीफांच्या पुण्याईने मिळालेली सत्ता राष्ट्रवादीच्या सदस्यांना पेलता आली नाही. सहा महिन्यातच राष्ट्रवादीच्या किल्ल्याला तडे जाऊ लागले. पहिल्या टप्प्यात मंजुषा कदम यांना नगराध्यक्ष होण्याची संधी मिळाली. पहिले सहा महिने कसेबसे गेले आणि अंतर्गत कलहाला सुरवात झाली. ती सत्ताबदलापर्यंत संपलीच नाही. दरम्यानच्या काळात राष्ट्रवादीतर्फे अपेक्षित कामगिरी झाली नाही. वैयक्तिक स्वार्थात ते जनतेला आणि पक्षाच्या एकनिष्ठ कार्यकर्त्यांनापण विसरले. याचाच परिणाम म्हणून त्यांची लोकप्रियता प्रचंड वेगाने घसरली. त्या घसरणीला विरोधक म्हणून जनता दलाने वेळोवेळी खतपाणी घातले. त्यांच्या विरोधाला जनहितापेक्षा 'विरोधासाठी विरोध' याच गोष्टीची किनार जास्त होती. त्याहीपेक्षा काठावर बहुमत असल्याने अडचणीत आणून गळाला कोणी लागते का याची चाचपणी सदैव होत असे. यावेळी झालेल्या नगराध्यक्ष निवडीत सुंदराबाई बिलावर त्यांच्या गळाला लागल्या आणि अखेर मागच्या दाराने का होईना, सत्तेचा सोपान सर केला.

अंतर्गत राजकारणात मग्न राष्ट्रवादीची कमजोर कडी अखेर जनता दलाच्या गळाला लागली आणि कुणालाही कळायच्या आत सत्तांतर झाले. अनेक आरोप-प्रत्यारोप झाले. चार दिवसांच्या आढाव्यानंतर सत्ताधारी गटाने पत्रकार परिषद घेवून जनतेला सकारात्मक गोष्टींचे गाजर दाखविले. मात्र, भावनेचा बहर ओसरल्यानंतर आता पुन्हा मळलेल्या पायवाटेवरून ते चालत आहेत.

बालिश राजकारणामुळे नामुष्की

जनता दलाने विकासात्मक कामांपेक्षा व्यक्तीकेंद्रित राजकारण सुरवात करून . फक्त 'बदला' घेण्याचे राजकारण‍ाची चर्चा आहे. पहिल्याच सर्वसाधारण सभेत उपनगराध्यक्षांची खूर्ची व्यासपीठावरनू काढून टाकली. त्यानंतर केबिन बंद किंवा बोर्डवरील नाव पुसणे असे आरोप त्यांचेवर झाले. अशा बालिश गोष्टीत राष्ट्रवादी व जनता दल या दोन्ही पक्षांचे सदस्य गुंतले आहेत. बोरगावे यांनी नगराध्यक्षपद‌ी येताच अतिक्रमण हटाव, प्लास्टिक मुक्ती सारख्या नेहमीच्या चर्चेतल्या मुद्द्यांना हात घातला. पण त्यांना व्यक्तीगत अहंकारातून सुटका करून घेता आली नाही. माजी नगराध्यक्षा स्वाती कोरी या जनता दलाचे आमदार श्रीपतराव शिंदे यांच्या कन्या. त्यांनाही जनता दलासारख्या समाजवादी पक्षाची बैठक असताना त्यांनाही या गोष्टी टाळता आल्या नाहीत. यातून एकच गोष्ट स्पष्ट होते. ती म्हणजे राष्ट्रवादी काँग्रेसने सुरू केलेल्या अध्यायाचे पान बंद न होता, तो तसाच पुढे सुरू ठेवण्याचा विडा जनता दलाने उचलला आहे.

मोबाइल अॅप डाउनलोड करा आणि राहा अपडेट

‘संगीतसूर्य’ अंधारात

August 4, 2015, 1:54 pm

≫ Next: निम्मा आजरा सलाइनवर

≪ Previous: अजूनही येतो अहंकाराचा दर्प...

$

0

0

अनुराधा कदम, कोल्हापूर

संगीत रंगभूमीवर आपल्या गायन व अभिनय कौशल्याने कोल्हापूरचे नाव कोरणाऱ्या संगीतसूर्य केशवराव भोसले यांवे १२५ वे जयंती वर्ष येत्या ९ ऑगस्टपासून सुरू होत आहे. मात्र, कलानगरी असे बिरुद मिरवणाऱ्या कोल्हापूर महापालिकेच्या नियोजनात अद्याप केशवराव भोसले यांच्या १२५ व्या जयंतीवर्षाच्या सोहळ्याचे एका ओळीचेही नियोजन केलेले नाही. गेल्या वर्षभरापासून सुरू असलेल्या नाट्यगृहाच्या नूतनीकरण उद्घाटनाच्या कोनशिलेवर आपले नाव लागावे म्हणून धडपडणाऱ्या काही कारभाऱ्यांनीही याबाबत महापालिकेला स्मरण करून दिलेले नाही.

राज्य सरकारच्या सांस्कृतिक मंत्रालयालाही केशवरावांच्या रौप्यमहोत्सवी जन्मशताब्दी सोहळ्याचे सोयरसूतक नाही, तर अखिल भारतीय नाट्यपरिषदेने केवळ 'संगीत स्वयंवर'चा प्रयोग आयो​जित केला आहे. त्यामुळे केवळ केशवराव भोसले यांच्या प्रतिमेला एक पुष्पहार अर्पण करून या संगीतसूर्याला अभिवादन करण्यापलीकडे महापालिका प्रशासन काही कार्यक्रमांचे नियोजन करेल याची शक्यता धूसर आहे.

संगीतसूर्य केशवराव भोसले यांचे शतकोत्तर रौप्यमहोत्सवी जन्मशताब्दी वर्ष नऊ ऑगस्टपासून सुरू होत आहे. या निमित्ताने अखिल भारतीय मराठी नाट्य परिषद पाच नाटकांचा महोत्सव साजरा करण्यासाठी प्रयत्नशील होते. यासाठी महापालिकेने संयोजनात सक्रिय सहभाग घ्यावा तसेच निधी उपलब्ध करून द्यावा, अशी मागणी नाट्य परिषदेच्या पदाधिकाऱ्यांनी महापौर वैशाली डकरे यांच्याकडे केली होती. मात्र, त्यावर पुढे कोणतीही कार्यवाही न झाल्याने सध्या तरी हा महोत्सव बारगळला आहे.

सध्या नाट्यगृहाच्या नूतनीकरणाचे काम अंतिम टप्प्यात आले आहे. ९ ऑगस्टला नाट्यगृहाचे उद‍्घाटन करण्याचा मानस महापालिका प्रशासनाने काही दिवसांपूर्वी व्यक्त केला होता. मात्र, सध्याचे नूतनीकरणाचे चित्र पाहता ते अशक्य आहे. केशवराव भोसले यांच्या १२५ व्या जयंती वर्षानिमित्त कार्यक्रम घेण्याची तयारी नसल्याबद्दल नाट्यगृहाचे काम सुरू असल्याची सबब पुढे केली जात आहे.

राज्य सरकार उदासीन

ज्या राजर्षी शाहू महाराजांनी केशवराव भोसले यांच्या नावाने पॅलेस ​थिएटर उभारले, ज्या केशवराव भोसले यांनी संगीत रंगभूमीचा सुवर्णकाळ गाजवला त्यांच्या १२५ व्या जयंतीवर्षाची सुरुवात होण्यासाठी अवघे चार दिवस उरले असताना राज्य सरकारचे सांस्कृतिक मंत्रालय मात्र उदासीन आहे. साहित्य संमेलनांपासून बालनाट्य महोत्सवापर्यंत प्रत्येक सांस्कृतिक सोहळ्यांसाठी राज्य सरकारच्या सांस्कृतिक मंत्रालयामार्फत निधीचा पाऊस पाडला जात असताना केशवराव भोसले यांच्या १२५ व्या जयंती वर्षासाठी आर्थिक दुष्काळ का असावा, असा प्रश्न नाट्यकर्मींमधून उपस्थित केला जात आहे.

संगीत स्वयंवर

अखिल भारतीय मराठी नाट्य परिषदेच्यावतीने केशवराव भोसले यांच्या १२५ व्या जयंतीवर्षाच्या सोहळ्या​निमित्त पाच संगीत नाटकांचा महोत्सव करण्याचे नियोजन केले होते. मात्र, यासाठी महापालिकेचे सहकार्य आवश्यक असल्यामुळे त्यांनी महापालिका प्रशासनाशी संपर्क साधला. परंतु त्याबाबत सहकार्य न मिळाल्याने नाट्यपरिषदेने संगीत स्वयंवर नाटकाचा प्रयोग आयोजित केला आहे. तो १० ऑगस्टला दुपारी चारला शाहू स्मारक भवन येथे होईल.

मोबाइल अॅप डाउनलोड करा आणि राहा अपडेट

निम्मा आजरा सलाइनवर

August 4, 2015, 1:50 pm

≫ Next: काँग्रेसमध्ये फाटाफूट!

≪ Previous: ‘संगीतसूर्य’ अंधारात

$

0

0

आरोग्य सुविधेसाठी खासगी सेवेवर रहावे लागते अवलंबून

रमेश चव्हाण, आजरा

एकादा कर्तृत्ववान आमदार असला की, तालुक्याचा कायापालट व्हायला वेळ लागत नाही. मात्र, आजरा तालुक्याला तीन आमदार लाभले आहेत. तरीही आजरा तालुक्यातील आरोग्य सेवेचे ग्रहण काही सुटत नाही. आजरा तालुक्यातील पश्चिम भागात अजूनही खासगी आरोग्य सेवेवर नागरिकांना दिवस काढावे लागत आहेत.

सरकारने दोन आयुर्वेदिक डॉक्टर या विभागातील पेरणोली व गवसे उपकेंद्रामध्ये मान्य केलेले असतानाही गेली पाच-सहा वर्षे ही पदे भरलेलीच नाहीत. त्यामुळे उपकेंद्रांमध्ये नियुक्त चार नर्सवरच येथील आरोग्यसेवा अवलंबून आहे. या दोन्ही ठिकाणी उपकेंद्रासाठी स्वतंत्र इमारती असतानाही केवळ डॉक्टर्स नसल्याने नागरिकांना आजरा येथील ग्रामीण रूग्णालय अथवा खासगी आरोग्येसेवेवरच अवलंबून रहावे लागते आहे.

आजरा तालुक्यातील पश्चिम भाग हा तसा दुर्गम भाग आहे. या भागात आरोग्य सेवा पुरविण्याचे आव्हान असते. खासगी डॉक्टरांचा येथे व्यवसाय होत नसल्याने येथे त्या सुविधा मिळणेही दुरापस्त आहे.

तालुक्याची लोकसंख्या साधारणत: सव्वा लाखाहून अधिक आहे. त्यामुळे विधानसभा मतदारसंघ पुनर्रचनेत या तालुक्याची तीन शकले झाली. त्यापैकी तालुक्याच्या पश्चिमेकडील आजरा जिल्हा परिषद मतदारसंघ भुदरगड-राधानगरीला जोडला गेला आहे. या विभागात दोन उपकेंद्रे मंजूर आहेत. यापैकी दोन्ही उपकेंद्रामध्ये सरकारमान्य आयुर्वेदिक डॉक्टर्स नेमले गेलेले नाहीत. आंबोली, चंदगड परिसराला लागून असलेल्या या भागात वास्तविकत: डॉक्टरांची नेमणूक गरजेची आहे. मात्र, गेली अनेक वर्षे येथील ३०-३५ वाड्या वस्त्यांतील रूग्णांना वीस-पंचवीस किलोमीटरची पायपीट करीत आजऱ्यातील सरकारी व खासगी डॉक्टरकडे आरोग्यसेवेसाठी जावे लागते.

याबरोबरच येथील परिसरातूनच कोकण व गोव्याकडे जोडलेला मार्ग आहे. वेडीवाकडी वळणे व दाट जाडींमुळे अंदाज न येता येथे अनेक अपघात होतात. पण त्यांना उपचारासाठी आजरा अथवा आंबोलीकडे न्यावे लागते.

तालुक्यात इतर जिल्हा परिषद मतदारसंघांमध्ये प्राथमिक आरोग्य केंद्रांसह उपकेंद्रे असली तरी हीच स्थिती आहे. तालुक्यासाठी १० डॉक्टरची पदे असताना तालुक्याचा डोलारा सध्या मलिग्रे, उत्तूर व भादवण येथील केवळ तीन डॉक्टर्सच पाहातात. एवढेच नव्हे तर तालुक्याला कित्येक वर्षे स्वतंत्र आरोग्याधिकारीही नेमलेला नाही. तालुक्याचा गवसे-पेरणोली पट्टा फारच दुर्गम आहे. सरकारच्या दुर्लक्षामुळे या विभागातील ग्रामस्थ शासकीय आरोग्यसेवेपासून वंचित राहिली आहेत. आघाडी सरकारच्या काळात येथील मागण्यांना वाटाण्याच्या अक्षता लावल्या आहेत, ही वस्तूस्थिती आहे.

आयुर्वेदिक डॉक्टरांच्या नियुक्तीवरून गेली काही वर्षे वाद न्यायालयात होता. त्यामुळे नियुक्त्या रखडल्या होत्या. अजूनही या जागा भरलेल्या नसल्याने येथील रूग्ण आजरा ग्रामीण रूग्णालय व काही खासगी डॉक्टर्सकडे सेवा घेतात. याशिवाय येथील दोन उपकेंद्रांमधील चार नर्स आरोग्यसेवेशी अनुषंगिक लसीकरण व अत्यावश्यक औषधे पुरविण्याचे काम करीत आहेत. ‍

- डॉ. आर. जी. गुरव, तालुका आरोग्य अधिकारी

मोबाइल अॅप डाउनलोड करा आणि राहा अपडेट

---

काँग्रेसमध्ये फाटाफूट!

August 4, 2015, 1:58 pm

≫ Next: कर्नाटकची ओढ का? कशासाठी?

≪ Previous: निम्मा आजरा सलाइनवर

$

0

0

म. टा. प्रतिनिधी, कोल्हापूर

महापालिका निवडणुकीचे नगारे वाजायला सुरुवात होताच काँग्रेस पक्षातील कुरघोडी आणि अंतर्गत संघर्षाची नांदीही झाली आहे. आमदार महादेवराव महाडिक आणि माजी मंत्री सतेज पाटील यांच्यातील राजकीय संघर्ष टोकाला गेला असताना पाटील आणि माजी आमदार मालोजीराजे छत्रपती यांच्यात फारसे सख्य नसल्याचे उघड होत आहे. काँग्रेस कमिटीत मंगळवारी झालेल्या मेळाव्याकडे मालोजीराजे छत्रपती व त्यांचे समर्थक नगरसेवकांनी पाठ फिरवली. जिल्हाध्यक्ष पी. एन. पाटील कामानिमित्त मुंबईला गेल्यामुळे ते मेळाव्याला नव्हते.

माजी आमदार मालोजीराजे छत्रपती कोल्हापुरात असूनही मेळाव्याला उपस्थित नव्हते. त्यांचे समर्थक नगरसेवक प्रकाश नाईकनवरे, प्रतिभा नाईकनवरे, राजाराम गायकवाड, दिगंबर फराकटे, कांचन कवाळे, जहाँगीर पंडत, सरस्वती पोवार, शशिकांत पाटील यांनीही मेळाव्याकडे पाठ फिरवली. शिवाय जिल्हाध्यक्ष 'पीएन' गटाचे नगरसेवक रणजित परमार, इंद्रजित सलगरही मेळाव्याला नव्हते. कुणी तब्येत ठीक नसल्याचे तर कुणी आरक्षणाची कारणे सांगत बैठकीला जाण्याचे टाळले. प्रकाश नाईकनवरे अपक्ष म्हणून निवडून आले आहेत. श्रीकांत बनछोडे मात्र मेळाव्याला उपस्थित होते.

महाडिक समर्थक तर लांबच

आमदार महादेवराव महाडिक आणि सतेज पाटील यांच्यातील राजकीय संघर्ष सर्वश्रृत आहे. महाडिक आ​णि पाटील यांच्यात सध्या आरोप-प्रत्यारोप सुरू आहेत. यामुळे महाडिक समर्थक असलेले काँग्रेसचे नगरसेवक मेळाव्यापासून लांब राहणार हे अपेक्षित होते. त्यानुसार सत्यजित कदम, किरण शिराळे, सतीश घोरपडे आ​णि रवीकिरण इंगवले मेळाव्याकडे फिरकलेच नाहीत.

मेळाव्याला उपस्थिती

महापौर वैशाली डकरे, लीला धुमाळ, अजित पोवार, शारंगधर देशमुख, सचिन चव्हाण, मोहन गोंजारे, दिलीप भुर्के, राजू पसारे, संजय मोहिते, ​हरिदास सोनवणे, सुरेश ढोणुक्षे, राजू साबळे, वंदना बुचडे, संगीता देवेकर, प्रदीप उलपे, संदीप नेजदार, श्रीकांत बनछोडे, भरत रसाळे, सुलोचना नायकवडे, किशोर खानविलकर, एकनाथ काटकर, संध्या घोटणे, संजय पोवार, बशीर पेटकर, मुश्ताक मोमीन, दीपक थोरात, वैशाली महाडिक, चंदा बेलेकर.

महापालिका निवडणुकीचे नेतृत्व सतेज पाटील यांच्याकडे सोपविण्याबाबत काँग्रेस कमिटीत चर्चा झाली आहे. जिल्हाध्यक्ष पी. एन. पाटील, मालोजीराजे यांची ताकद मिळणार आहे. तथापि, दोघांनीही काही कामामुळे उपस्थित राहणार नसल्याचे कळविले आहे. आरक्षण निश्चित नसल्यामुळे अनेकजण अनुपस्थित होते. पुढच्या मेळाव्याला कार्यकर्ते, इच्छुकांची संख्या वाढेल.

- अॅड. सुरेश कुराडे, प्रदेश सरचिटणीस

मालोजीराजे छत्रपती आणि मी दोघेही एकत्रित आहोत. त्यांच्याशी बोलणेही झाले आहे. सोमवारी प्राथमिक मेळावा घेतला होता. पुढील आठवड्यापासून मालोजीराजे आणि मी एकत्रितपणे वॉर्डावॉर्डात संपर्क साधणार आहेत.

- सतेज पाटील, माजी मंत्री

मी काँग्रेसचा आमदार आहे. मेळाव्याविषयी मला बोलावणे आले नाही. मला जर मेळाव्याला बोलावणार नसाल तर मी कसा जाणार? महापालिका निवडणुकीच्या तयारीसाठी आजी, माजी नगरसेवकांची बैठक बोलावली जाते. त्यासाठी काँग्रेसच्या आमदारांनाही बोलावले जात नाही.

- महादेवराव महाडिक, आमदार

मोबाइल अॅप डाउनलोड करा आणि राहा अपडेट

कर्नाटकची ओढ का? कशासाठी?

August 5, 2015, 12:35 pm

≫ Next: कराडमध्ये गुंडांच्या टोळ्यांचे राजकीय लागेबांधे

≪ Previous: काँग्रेसमध्ये फाटाफूट!

$

0

0

पाणीटंचाई, दुष्काळ आदी समस्यांचा सातत्याने सामना करणाऱ्या जत तालुक्यांतील काही गावांतून, आमचा समावेश कर्नाटकमध्ये करा, अशी मागणी नुकतीच केली गेली. या पार्श्वभूमीवर संबंधित गावांतील नागरिकांशी संवाद साधून या मागणीमागील कारणांचा घेतलेला वेध...

रविराज गायकवाड, जत (सांगली)

महाराष्ट्र-कर्नाटक सीमाभागालगत कर्नाटकमधील गावांमध्ये छोट्या, छोट्या पाणी योजनांमधून शेतीला मिळणारं पाणी...तुडुंब भरलेल्या विहिरी आणि ओसंडून वाहणारी बोअर. महाराष्ट्रात मात्र पिण्याचे पाणी मिळवण्यासाठीही करावी लागणारी भटकंती. यामुळे जत तालुक्याच्या पूर्व भागातील गावे अधून-मधून कर्नाटकात जाण्याची भाषा करीत आहेत.

जत तालुक्याची भौगोलिक आणि सामाजिक जवळीक कर्नाटकाशी आहे. खरेदीसाठी बहुतांश नागरिक विजापूर गाठतात. रोटी-बेटी व्यवहार विजापूर जिल्ह्यातच होतात. सध्या कर्नाटकचे जलसंपदामंत्री एम. बी. पाटील यांनी महाराष्ट्राला लागून असलेल्या त्यांच्या बबलेश्वर मतदारसंघात मोठ्या प्रमाणावर सिंचनाची कामे सुरू केली आहेत. त्यातील हिरे पडसलगी योजना यशस्वी ठरली असून, २०१२पर्यंत दुष्काळी असलेल्या त्या भागात आता डाळिंब आणि द्राक्षांच्या बागा फुलत आहेत.

तालुक्यातील उमदी परिसरातील ४२ गावांनी स्थापलेल्या तालुका पाणी संघर्ष समितीने २३ जानेवारी २०१४ रोजी बेमुदत उपोषण सुरू केले होते. त्या वेळी पाच दिवस चाललेल्या उपोषणाची दखल राज्य सरकाराने घेतली; मात्र नेत्याकडून नको, अधिकाऱ्यांनी आश्वासन घ्यावे, अशी भूमिका उपोषणाकर्त्यांनी घेतल्यानंतर अधीक्षक अभियंत्यांनी 'दीड वर्षांत म्हैशाळचे पाणी तुम्हाला मिळवून देतो,' असे लेखी आश्वासन दिले होते. दीड वर्षांनंतरही पाणी न मिळाल्याने या गावांतील नागरिकांनी उमदी ते सांगली जिल्हाधिकारी कार्यालय, अशी पदयात्रा काढून पुन्हा या प्रश्नाकडे लक्ष वेधले. शेवटी जतच्या पूर्व भागात पाणी पोहोचवण्यासाठी ३२ कोटी रुपयांची मदत जाहीर करण्यात आली आणि ग्रामस्थांनी आंदोलन मागे घेतले.

''दोन वर्षांपूर्वी पंधरा हजार लिटरचा टँकर तीन हजारांना मिळायचा. विजापूरजवळच्या तोखी गावातून रोज असे चार टँकर आणत होतो. आता हिरे पडसलगीचं पाणी गावच्या बंधाऱ्याना सोडलंय. त्यामुळं विहिरीला बारा महिने पाणी आहे. आता टँकर लागत नाही.'' - रमेश गद्याळ, शेतकरी, कल्लकवटगी, विजापूर जिल्हा, कर्नाटक

''महाराष्ट्राचा अभिमान आहे; पण पाणीच मिळालं नाही, तर अभिमान बाळगून काय करू? सध्या दोन्ही राज्यांमध्ये वेगवेगळ्या पक्षांची सरकार आहेत. त्यामुळे कर्नाटकच्या योजनेतून कधी पाणी मिळेल, याचा नेम नाही. म्हणून आम्ही म्हैशाळच्या पाण्याचा आग्रह धरला आहे.'' - अनिल शिंदे, उपाध्यक्ष, तालुका पाणी संघर्ष समिती, उमदी,जत, जि. सांगली

मोबाइल अॅप डाउनलोड करा आणि राहा अपडेट

कराडमध्ये गुंडांच्या टोळ्यांचे राजकीय लागेबांधे

August 5, 2015, 1:31 pm

≫ Next: गस्त घालणारेच करताहेत चोऱ्या

≪ Previous: कर्नाटकची ओढ का? कशासाठी?

$

0

0

म. टा. वृत्तसेवा, कराड

गुंड टोळ्यांमधील पूर्ववैमनस्य आणि वर्चस्ववादातून येथे झालेल्या दुहेरी खून प्रकरणानंतर शहरातील गुंड टोळ्यांशी राजकीय मंडळींचे असलेले लागेबांधे चर्चेत आले आहेत. जिल्हा पोलिस दलाने शहर परिसरात राबविलेल्या छापासत्रात पोलिसांनी अनेकांच्या घरातून जप्त केलेल्या कागदपत्रांतून या संबंधित अनेक बाबी समोर येत आहेत. वाळू व्यवसायासह जमीन खरेदी-विक्री प्रकरणात आणि इतर अनेक गोष्टींमध्ये रेकॉर्डवरील गुन्हेगारांशी अनेक राजकीय मंडळींचे सौदाहर्यपूर्ण संबंध असल्याचे अनेक ठोस पुरावे पोलिसांच्या हाती लागले आहेत.

पै. संजय पाटील यांच्या खुनानंतर शहरात वाढत चाललेल्या गुन्हेगारी टोळ्यांमागे येथील राजकीय नेत्यांचा असलेला वरदहस्त हेच एक प्रमुख कारण असल्याचे समोर येत आहे. त्यामुळे भविष्यात शहरात कायदा व सुव्यवस्था प्रस्थापित करताना गुन्हेगारी टोळ्यांचा बिमोड करण्यासाठी राजकीय मंडळी आणि त्यांच्या तालावर नाचणाऱ्या गुंडांची पाळेमुळे खणून काढण्याचे आव्हान येथील पोलिसांसमोर उभे राहिले आहे.

काही वर्षांपूर्वी तत्कालीन कारणांमुळे विविध सण-उत्सवांच्या काळात शहरात अनुचित घटना घडल्या होत्या. त्यामुळे पोलिस दप्तरी कराड शहराची 'संवेदनशील शहर' अशी नोंद झाली. ही ओळख पुसून काढण्याचे काम शहरातील सुज्ञ नागरिक गेल्या अनेक वर्षांपासून करत आहेत. मात्र, पुणे-मुंबईतील राजकारणाप्रमाणे कराडच्या राजकीय क्षेत्रानेही गुन्हेगारी वळण घेतले असल्याचे विविध घटनांवरून स्पष्ट झाले आहे. येथे राजकारणातील गुंडागर्दीचा पहिल्यांदा पै. संजय पाटील यांच्या खूनाच्या शिरकाव झाला. तरुण मुलांच्या हातात पिस्तुलासारखी घातक शस्त्रे येऊ लागली. पाटील यांच्या खूनानंतर गुन्हेगारी क्षेत्रात सल्या चेप्या नावाच्या गुंडाचा उदय झाला. या उदयाला राजकीय पाठबळ मिळाल्यानंतर त्याने त्याच्या टोळीचीच निर्मिती केली. मात्र, राजकीय दबावामुळे पोलिसांच्या कारवाईचे घोडे तडीपारीच्या पुढे काही सरकले नाही.

पै. संजय पाटील यांच्यावर 'मोका' कारवाईची ज्या ताकदीने अंमलबजावणी झाली त्या तत्परतेन सल्या चेप्यावर मोक्याची कारवाई न झाल्याने त्याचे 'नेटवर्क'साताऱ्यापासून ते सांगली, कोल्हापूरपर्यंत वाढत गेले. त्यामुळे सांगली, कोल्हापुरात घडणाऱ्या गुन्हेगारी घटनांमध्येही सल्या चेप्याचा संबंध जोडला जावू लागला. विशेषत: सांगली परिसरातील गुंडांनी सल्या चेप्याशी संपर्क वाढविण्यास सुरूवात केली. त्यामुळे सांगली परिसरात घडणाऱ्या हत्याप्रकरणीही सल्या चेप्याकडे पोलिसांकडून चौकशी होऊ लागली. खून, खुनाचा प्रयत्न, खंडणी, धमक्या, बेकायदा शस्त्र बाळगणे, मारहाण असे अनेक गुन्हे सल्या चेप्यावर दाखल आहेत. यातून कराडपासून सांगली, मिरज, कोल्हापूरपर्यंत अनेक छोट्या-मोठ्या गुंडांच्या टोळ्या आकाराला येऊ लागल्या. त्यातून संघर्ष सुरू झाल्याने सल्या चेप्याच्या प्रतिस्पर्धी गुंडांची संख्याही वाढत गेली. त्यातूनच 'शत्रूचा शत्रू तो मित्र'या समीकरणानुसार अनेक गुंड आपल्यापेक्षा वरचढ असलेल्या एखाद्या गुंडाचा 'काटा' काढण्यासाठी एकत्र येऊ लागले आणि त्यातूनच गतवर्षी येथील कोर्टाच्या आवारात सल्या चेप्यावर प्राणघातक हल्ला झाला. या हल्ल्यात सल्या बचावला असला तरी कायमचा जायबंदी होऊन तो आजअखेर अंथरूणावर खिळून आहे.

वाळू ठेक्यांमधून वाढली गुंडगिरी; आता पवनचक्क्यांचा आसरा

या गुंडांच्या टोळ्यांना राजकीय मंडळींकडून राजकीय आणि आर्थिक पाठबळ मिळत गेले. मात्र हे पाठबळ उघडपणे न दाखविता छुप्या पद्धतीने सुरू राहिले. यासाठी वाळू व्यवसायासारख्या व्यवसायात अनेक राजकीय मंडळींनी थेट गुंतवणूक न करता या गुंडांच्या माध्यमातून आपला पैसा गुंतवला. ठेका चालविण्याचे काम या गुंडांनी करायचे, त्यातील जोखीम स्वीकारायची आणि या गुंडांना आवश्यक ते पाठबळ राजकीय नेत्यांनी द्यायचे, असा हा अलिखीत करार सुरू होता. तो आजही सुरूच आहे. वाळूतून पैसा, पैशातून सत्ता यातून गुन्हेगारी वाढत गेली. परिणामी, वाळू ठेक्याशी संबंधित मिसरूडही न फुटलेल्या तरण्याबांड मुलांच्या हातात पैसा खुळखुळू लागला. त्यातून बेकायदा पिस्तूले, जिवंत काडतुसे अगदी सहजपणे वाळू ठेक्यावरही मिळू लागली. जादा पैशाच्या लोभाने परराज्यातून शस्त्र विक्रीसाठी येणाऱ्या एजंटांना वाळू ठेकेदार आणि त्यांच्याशी संबंधित गुंडांची टोळकी हक्काचे गिऱ्हाईक उपलब्ध होऊ लागले. आजही हे वास्तव नाकारता येत नाही. वाळूची वाहने अडविली गेली की पिस्तूल दाखवून दमदाटी केल्याच्याच तक्रारी पोलिस ठाण्यात नोंद होत असतात. बेकायदा पिस्तूले आणि वाळू व्यवसाय असे समीकरणच गेल्या काही दिवसांत कराडसह पश्चिम महाराष्ट्रात रूढ झाले आहे. त्यात आता पवनचक्क्यांसाठीही या गुंडांच्या टोळ्यांचा वापर करून घेण्यास सुरूवात केली आहे.

मोबाइल अॅप डाउनलोड करा आणि राहा अपडेट

गस्त घालणारेच करताहेत चोऱ्या

August 5, 2015, 1:32 pm

≫ Next: लाचखोरीचा विळखा सुटेना

≪ Previous: कराडमध्ये गुंडांच्या टोळ्यांचे राजकीय लागेबांधे

$

0

0

म. टा. वृत्तसेवा, कुपवाड

'चोरट्यांच्या परप्रांतीयांच्या किंवा ठराविक जमातीच्या कोणत्याही टोळ्या आलेल्या नाहीत. ही केवळ अफवा आहे. रात्रगस्त करणाऱ्यांमधीलच काही युवकांनी चोऱ्या, हुल्लडबाजी करुन नागरिकांत दहशत माजवून घरांवर दगडफेक केल्याचे प्रकार उघडकीस आले आहेत. त्यामुळे यापुढे ज्यांना गस्त घालायची आहे, त्यांनी पोलिसांना विश्वासात घेतले पाहिजे. अन्यथा घातक शस्त्रे हातात घेऊन गस्तीच्या नावाखाली हुल्लडबाजी करून अफवा पेरणाऱ्यांवर कडक कारवाई केली जाईल,' असा इशारा जिल्हा पोलिस प्रमुख सुनील फुलारी यांनी बुधवारी पत्रकारांशी बोलताना दिला.

गस्त घालण्याच्या नावाखाली हुल्लडबाजी आणि गुन्हे करणाऱ्यांवर इस्लामपूर, विश्रामबाग, सांगली ग्रामीण आणि आष्टा पोलिसांत गुन्हे दाखल करण्यात आले आहेत. काही वर्षांपूर्वीही अशीच चोरट्यांच्या टोळ्या सक्रीय झाल्याची अफवा पिकवली गेली होती. आता गेल्या काही दिवसांपासून जिल्ह्याच्या ग्रामीण भागापासून शहरांपर्यंत चोरांची अफवा आहे.

सोशल मीडिया हेही एक त्याला कारण आहे. मनोरुग्ण व्यक्ती काही वेळेला नीट माहिती देऊ शकत नाही. किंवा ती जोरजोराने पळत असते. एखाद्या ठिकाणी बसून राहते. अशा व्यक्तीला चोर समजून आरडाओरड करणे, त्या व्यक्तीला बेदम मारहाण करणे बरोबर नाही. त्याचबरोबर अनोळखी व्यक्तीला क्षणात चोर समजणे हे ही बरोबर नाही. पण अलीकडे गस्तीच्या नावावर काही भागात हुल्लडबाजी होऊन सामाजिक शांततेला बाधा येत आहे. चोरांची दहशत निर्माण केली जात आहे. ज्यांना खरोखरच आपल्या भागात गस्त घालायची आहे. त्यांनी पोलिसांना विश्वासात घेऊन सहकार्य करणे अपेक्षित आहे, असेही फुलारी म्हणाले.

मोबाइल अॅप डाउनलोड करा आणि राहा अपडेट

लाचखोरीचा विळखा सुटेना

August 5, 2015, 1:34 pm

≫ Next: अपुरी यंत्रणा; तस्कर मोकाट

≪ Previous: गस्त घालणारेच करताहेत चोऱ्या

$

0

0

म. टा. वृत्तसेवा, आजरा

तालुका निसर्गरम्य, शेती उत्पन्न भरमसाठ, काजू आणि उसाचा पैसा, मुलेबाळे नोकरीसाठी मुंबईला असे असले तरी आजरा तालुक्यातील जनता अजूनही लाचखोरीच्या चरकात भरडली जात आहे. या तालुक्यातील नियुक्ती म्हणजे शिक्षा असे समजले जाई, मा‌त्र आता येथे भ्रष्टाचाऱ्यांना चरण्याचे कुरण मिळत असल्याने येथील नियुक्ती म्हणजे कुणाच्या नजरेत न येता पैसा कमावण्याचे साधन झाले आहे.

मंगळवारी मडिलगे (ता. आजरा) येथील पोलिस पाटलाला लाच घेताना पकडल्यानंतर येथे लागलेली लाचखोरीची खरूज अजूनही संपलेली नसल्याचे समोर आले आहे. तत्कालिन तहसीलदार उज्वला सोरटे यांना रंगेहात पकडल्यानंतर आता थेट पोलिस उपनिरीक्षकासाठी लाच स्वीकारताना अटक झाल्याने महसूल आणि पोलिस यंत्रणेला लागलेली ही ‌कीड अजूनही नष्ट झाली नसल्याचे समोर आले आहे.

आजरा तालुका हा जिल्ह्याच्या एका टोकाला आणि कोकणाला जोडणारा आहे. येथील पश्चिम भाग हा अतिशय दुर्गम आहे. येथे शिक्षण आणि पायाभूत सुविधांची वानवा असल्याने लोक अजूनही शेतीवर उदरनिर्वाह करतात. तरूण नोकरीसाठी मुंबई, पुणे आणि कोल्हापूरसारख्या शहरांत असतात. त्यामुळे गावात एकतर वयोवृद्ध किंवा लहान मुलेच असतात. अशा वेळी एखादा वाद उद्‍भवला तर मध्यस्थांची साखळी कार्यरत होते. या मध्यस्थांकरवी महसूल आणि पोलिस स्टेशनची सर्व कामे होतात. अशी ही साखळी अनेक ठिकाणी कार्यरत आहे. ही साखळी थेट अधिकारी आणि तेथील कर्मचाऱ्यांसाठी काम करते. काही वेळा या साखळीची कल्पना असूनही त्याकडे कानाडोळा केल्याने त्यांचे फावते.

तालुक्यात गेल्या दोन वर्षांत तीन तलाठी ,दोन ग्रामसेवक ग्रामसेवकापासून ते एक प्रथम वर्ग श्रेणीतील वैद्यकीय अधिकारी आणि तहसीलदार उज्वला सोरटे यांच्याप्रमाणे अनेकजण 'लाचलुचपत'च्या जाळ्यात अडकले आहेत. एकीकडे आरोग्य सेवेसाठी आजरा तालुका वाट पहात असताना केवळ टक्केवारी आणि अन्य गोष्टींमध्ये आरोग्य विभाग गुंतल्याचे वैद्यकीय अधिकाऱ्यांवर झालेल्या कारवाईनंतर स्पष्ट झाले. तर अवैध वृक्षतोड, उत्खनन आणि महसूलासंदर्भात एकीकडे सर्वसामान्य लोकांना अडवायचे आणि दुसरीकडे चिरीमिरी घेऊन अवैध धंद्यांना वाट मोकळी करून द्यायची असा दुहेरी धंदा सोरटे यांच्यावर झालेल्या कारवाईनंतर उजेडात आला होता.

आजऱ्यात पोलिस पाटलांचे राज्य

आजरा तालुक्यातील अनेक गावे दुर्गम आहेत. लोकांना अजूनही तालुक्याच्या एखाद्या कार्यालयात जाणे जमत नाही. याचाच फायदा घेत येथे पोलिस पाटलांची टोळी कार्यरत आहे. अनेकदा किरकोळ तक्रारींसाठी साहेब पैशाची मागणी करत आहेत असे सांगून हजार -दोन हजार रुपये सहज उकळले जातात. अनेकांना केवळ ‌भीती दाखवून किंवा कामे करण्याचे अमिष दाखवून पैसे उकळले जात आहेत. हा वरकमाईचा धंदा सध्या जोरात आहे. याबाबत अनेकदा तक्रारी होऊनही त्याची फारशी दखल घेतली जात नाही. मंगळवारी मडिलगेच्या पोलिस पाटलावा झालेल्या कारवाईनंतर हा गोरखधंदा उघडकीस आला आहे.

जिथे सर्वसामान्य लोकांची कामे होत नाहीत तिथे दलालांची यंत्रणा कार्यरत असते. कामे जलद झाल्यास लोकांना दलालांची मदत घ्यावी लागत नाही. जर अधिकारी पैसे मागतो म्हणून लाच स्वीकारत असेल तर संबधित अधिकाऱ्याशी संपर्क साधावा. किंवा आमच्याकडे तक्रार करावी.

- शिल्पा ठोकडे, तहसीलदार

मोबाइल अॅप डाउनलोड करा आणि राहा अपडेट

अपुरी यंत्रणा; तस्कर मोकाट

August 5, 2015, 1:35 pm

≫ Next: रामलिंग, धुळेश्वरसाठी ८९ लाख

≪ Previous: लाचखोरीचा विळखा सुटेना

$

0

0

म. टा. वृत्तसेवा, राधानगरी

दाजीपूर अभयारण्यातील अवैध वृक्षतोड आणि चोरटया तस्करीमुळे जंगलाच्या सुरक्षा व संवर्धनाचा प्रश्न ऐरणीवर आला आहे. स्थानिक वनविभागाची कार्यपद्धती, अभयारण्यक्षेत्रातील तपासणी नाक्यांची अपुरी संख्या, वनरक्षकांच्या रिक्त जागा, एकूण क्षेत्राच्या तुलनेत असलेला अत्यंत तोकडा कर्मचारी वर्ग यामुळेच दाजीपूरच्या सुरक्षेला भगदाड पडल्याचे वास्तव असून या तस्करीला आळा घालण्यासाठी स्वतंत्र भरारी पथकाची गरज नव्याने पुढे येत आहे.

जगातील अत्यंत दुर्मिळ वनऔषधीसह शिसव, सागवान, नरक्या, पालीअसन अशा दुर्मिळ आणि किमती वृक्षाची पैदास येथे अधिक प्रमाणात होते. तस्करांचा या भागात मोठा सुळसुळाट आहे. आता वनविभागासमोर जंगलातील शिकारी बरोबर अवैध वृक्षतोड आणि तस्करीची समस्या उभी आहे. यापूर्वी जंगलातील नरक्या, चंदन, हिरडा अशा किमती झाडाच्या तस्करीच्या अनेक घटना घडल्या असल्यातरी गेल्या आठवड्यात झालेल्या कारवाईमध्ये माजी जि. प. सदस्य जगदीश लिंग्रस, त्यांचा मुलगा व अन्य तरूणांचा सहभाग असल्याचे स्पष्ट झाले. यापूर्वी घडलेल्या गुन्ह्यात संबधित आरोपीवर ठोस कारवाई करण्यात वनविभागाने कुचराई केल्यानेच तस्करांना बळ मिळाले असून यात नव्या ठेकेदारांची भर पडत आहे.

३५२ चौरस किलोमीटर अंतरापर्यंत राधानगरी व दाजीपूरच्या २१ बिटात पसरलेल्या या अभयारण्याच्या संवर्धन व संरक्षणासाठी केवळ ६० कर्मचाऱ्यांच्या स्टाफ कार्यरत आहे. मात्र एकूण जंगल क्षेत्राचा विस्तार, जंगली प्राणी, तस्करांची यंत्रणा आणि त्यातील समस्या पाहता येथे आणखी ५० कर्मचाऱ्यांची गरज आहे. त्यातच उपलब्ध कर्मचार्यांपैकी केवळ एक वनरक्षक आणि एका वनमजुरांवर जंगलातील सुमारे दीड ते दोन हजार हेक्टर नियतक्षेत्राच्या संरक्षणाची जबाबदारी पेलणारी नसल्याचे समोर आले आहे. या कार्यक्षेत्रात हिंस्त्र प्राण्यांचा वावर असल्याने येथे गस्त घालणे, भ्रमंती करणे अगदी धोकादायक आहे. कर्मचाऱ्यांच्या या दैनंदिन भ्रमंती कक्षेचा फायदा तस्करास होत असून त्यांच्याकडे काठी वगळता कोणतेही हत्यार नसल्याने कर्मचाऱ्यांना तस्करयांच्या अरेरावीला सामोरे जावे लागल्याच्या घटनाही घडल्या आहेत. जंगलात असलेल्या संपर्क यंत्रणेचा अभाव आणि उपलब्ध असलेली यंत्रणाही पुरेशी सक्षम नसल्याने तस्करांना जंगलातून योग्यवेळी पळ काढणे अगदी सोपे झाले आहे.जंगलाच्या तुलनेत तपासणी नाक्यांची संख्या तोकडी नगण्य असून पडळी, फराळे, डिगज आदी महत्त्वाच्या नाक्यावर कर्मचारीच नसल्याचे वस्तुस्थिती आहे. याशिवाय तस्करांचे मार्ग असलेल्या अभयारण्य हद्दीतील एजीवडे, मिसाळवाडी, दुर्गमानवड, कारिवडे येथे नव्याने तपासणी नाके उभारण्याची गरज आहे. तस्करीला आळा घालण्यासाठी भरारी पथक निर्माण करण्याची आवश्यकता आहेत.

मोबाइल अॅप डाउनलोड करा आणि राहा अपडेट

रामलिंग, धुळेश्वरसाठी ८९ लाख

August 5, 2015, 1:37 pm

≫ Next: शाहूवाडीत २१ महिला सरपंच

≪ Previous: अपुरी यंत्रणा; तस्कर मोकाट

$

0

0

म. टा. वृत्तसेवा, जयसिंगपूर

हातकणंगले तालुक्यातील एकमेव निसर्गरम्य पर्यटनस्थळ असलेल्या श्री रामलिंग वनक्षेत्र परिसराचा इकोटुरिझम योजनेअंतर्गत विकास करण्यासाठी ८९ लाख रूपये खर्चाच्या कामांना मान्यता मिळाली आहे. याकरिता वनमंत्री सुधीर मुनगंटीवार तसेच वन विभागाचे प्रधान सचिव विकास खारगे यांचे सहकार्य लाभल्याची माहिती आमदार सुरेश हाळवणकर यांनी दिली. रामलिंग व धुळेश्वर देवालय करवीर वन परिक्षेत्राअंतर्गत येत असून हातकणंगले तालुक्यासाठी एकमेव पर्यटन स्थळ उपलब्ध असल्यामुळे पर्यटकांची मोठी गर्दी असते.

या परिसराचा विकास करण्यासाठी आमदार सुरेश हाळवणकर, आमदार डॉ. सुजित मिणचेकर यांनी प्रधान सचिव खारगे यांच्यासह माहे एप्रिल २०१५ मध्ये या परिसराचा दौरा करुन आराखडा निश्चित केला होता. त्यानुसार या परिसरात नक्षत्र गार्डन, बटरफ्लाय गार्डन, औषधी वनस्पती, बालोद्यान, जैवविविधता उद्यान, निसर्ग पायवाटा, तंबू निवास, स्मृतीवन, ग्रीनलॅण्ड व गार्डनिंग, निसर्ग परिचय केंद्र, पर्यटकांसाठी गेम्स, अशा विविध संकल्पना राबिवण्यात येणार आहेत. त्यासाठी सन २०१५-१६ ते सन २०१९-२० या पाच वर्षांकरिता रामलिंगसाठी सहा कोटी ४४ कोटी तर धुळेश्वर देवालय परिसरासाठी तीन कोटी ८६ लाख रूपये खर्चाचा कृती आराखडा तयार करण्यात आला आहे. त्याअंतर्गत पहिल्या वर्षी प्राथमिक कामांसाठी ८९.१२ लाख रूपये खर्चाची कामे मंजुर झाली आहेत, अशी माहिती आमदार सुरेश हाळवणकर यांनी पत्रकाद्वारे दिली आहे.

श्री रामलिंग व श्री धुळेश्वर देवालय परिसरात निसर्गाचा समतोल राखून वन उद्यान व निसर्ग पर्यटन केंद्र विकसित करण्याचा एकूण सहा कोटी रूपयांचा आराखडा आहे. त्याअंतर्गत वनराई ते रामलिंग आणि रामलिंग ते आलमप्रभू निसर्ग पायवाट दुरुस्त करणे, पॅगोडा बांधकाम, वनरक्षक निवास स्थान दुरुस्ती, पाण्याची टाकी संरक्षक भिंत व सिंचित रोप वनासाठी पाणीपुरवठा करणे अशा विविध कामांचा समावेश आहे.

मोबाइल अॅप डाउनलोड करा आणि राहा अपडेट

---

शाहूवाडीत २१ महिला सरपंच

August 5, 2015, 1:39 pm

≫ Next: अनेक शाळांचे पिक्चर ‘डर्टी’च

≪ Previous: रामलिंग, धुळेश्वरसाठी ८९ लाख

$

0

0

म. टा. वृत्तसेवा, शाहूवाडी

शाहूवाडी तालुक्यातील ३६ ग्रामपंचायतीमधील सरपंच व उपसरपंच निवडींचा कार्यक्रम या महिन्यात तीन टप्प्यात होत असल्याची माहिती तहसीलदार ऋषिकेत शेळके व नायब तहसीलदार बाजीराव पाटील यांनी दिली.

या निवडी ५ ऑगस्ट, ८ ऑगस्ट व २९ ऑगस्ट या तीन दिवशी होणार आहेत. निवडीमध्ये ३६ पैकी २१ ग्रामपंचायतींवर महिलाराज येणार आहे. दरम्यान पाच ऑगस्टला सात, आठला २३ तर २९ ऑगस्टला सहा ग्रामपंचायतीमधील सरपंच व उपसरपंच पदांसाठी निवडी होणार आहेत. ३६ ग्रामपंचायतीपैकी आठ ग्रामपंचायती बिनविरोध झाल्या आहेत तर निवडणूक पार पडलेल्या २८ ग्रामपंचायतीपैकी १८ ग्रामपंचायतीमध्ये सत्तांतर झाल्याने सरपंच व उपसरपंच पदांसाठी इच्छुकांची भाऊगर्दी झाली आहे.

३६ ग्रामपंचायतीपैकी पनुंद्रे-म्हाळसवडे, थेरगाव- सैदापूर, कांडगाव, जांबूर-मालगाव, गोंडोली, बुरंबाळ, सोनवडे, सावर्डे बुद्रुक, नांदारी, सवते, मानोली, गजापूर- विशाळगड, परळे निनाई-वाकोली, वाडीचरण, मोळवडे, आंबा-चाळणवाडी-तळवडे, सोन्डोली, पेंडाखळे, नांदगाव, शिंपे व शिरगाव या २१ ग्रामपंचायतींवर महिलाराज येणार आहे. उर्वरित पेरीड-गाडेवाडी, उकोली, परळे, वारूळ, ससेगाव, शित्तूर तर्फ वारुण, नेर्ले, शित्तूर तर्फ मलकापूर, परळी, सोनुर्ले, गिरगाव, शिराळे तर्फ मलकापूर, पाटणे, वडगाव या ग्रामपंचायतीवर आरक्षित जागेवर पुरुषांची वर्णी लागणार आहे. तालुक्यातील ३६ ग्रामपंचायतींच्या निवडणुकांचा धुरळा शांत होत असतानाच सरपंच निवडीचा कार्यक्रम जाहीर झाल्याने सरपंचपदी आपलीच वर्णी लागावी, यासाठी इच्छुकांनी मात्र आपापल्या नेत्याकडे जोरदार फिल्डिंग लावली आहे.

मोबाइल अॅप डाउनलोड करा आणि राहा अपडेट

अनेक शाळांचे पिक्चर ‘डर्टी’च

August 5, 2015, 1:42 pm

≫ Next: विवाहाचे आमिष दाखवून युवतीवर बलात्कार

≪ Previous: शाहूवाडीत २१ महिला सरपंच

$

0

0

म. टा. प्रतिनिधी, कोल्हापूर

डासांच्या प्रादुर्भावामुळे शहरातील काही शाळांना सुट्टी देण्यात आली. अद्यापही अनेक शाळांचा परिसर डर्टीच आहे. शाळेचा परिसर स्वच्छ ठेवण्याचे शाळांचे कर्तव्य असल्याचा निर्वाळा शिक्षण विभाग देत असला तरी प्रत्यक्षात क्रमिक पाठ्यपुस्तकातील शाळा परिसर स्वच्छतेचा धडा काही शाळांत कागदावरच आहे. महापालिकेच्या आणि खासगी प्राथमिक, माध्यमिक शाळांच्या परिसरात आरोग्याचे तीन तेरा वाजले आहेत.

पावसाळ्यात काही शाळांचा परिसरात दुर्गंधी आणि दलदल झाली आहे. शाळेच्या क्रीडांगणावर अनेक ठिकाणी चिखल आणि पाण्याची डबकी आहेत. पाण्याचा निचरा होण्यासाठी कोणतीही ठोस उपाययोजना केली जात नाही. शाळेच्या जवळूनच सांडपाणी वाहते. परिसरातच कचरा कोंडाळेही भरुन वाहत आहेत. शिवाजी पेठेतील आठ क्रमांक शाळेचे पटांगणात चिखल आहे. या ठिकाणी उघड्यावरच सांडपाणी वाहते. शाळेच्या आवारातच गवत वाढलेले आहे. कोल्हापूर हायस्कूलच्या दारातच कचरा कोंडाळा आहे. काही वेळेला महापालिकेची कचरा उठाव वाहनातून शाळा भरण्याच्या वेळेतच कचरा उठाव केला जातो. महाराष्ट्र हायस्कूलच्या उजव्या बाजूला आणि न्यू हायस्कूलच्या पाठीमागे सांडपाण्याचे साम्राज्य आहे. या ठिकाणीच स्वच्छतागृहाची सुविधा आहे. न्यू हायस्कूलच्या इमारतीला लागूनच गटार तुंबलेली आहेत. तुंबलेले सांडपाणी रोडवर वाहते. त्यातूनच शाळा ते कॉलेजच्या विद्यार्थ्यांची ये-जा सुरु असते. शिवाजी पेठेतील पद्माराजे गार्डन जवळील सावित्रीबाई फुले विद्यालयात दलदल आणि चिखल आहे. त्यातच विद्यार्थ्यांचा क्रीडांगणाचा तास भरतो. नागाळा पार्कातील श्रीमंत विजयादेवी घाटगे विद्यामंदिराचा परिसरही दलदलीच्या विळख्यात आहे.

डासांमुळे मलेरिया, डेंगी, चिकन गुनियांसारख्या आजाराला निमंत्रण मिळते. त्यामुळे शाळा आणि घराचा परिसर स्वच्छ हवा. रात्री झोपताना मच्छरदाणी अत्यावश्यक आहे. मलेरियाचे डास रात्री चावत असल्याने शरीराचा पूर्ण भाग झाकणारे कपडे घालावेत.

- डॉ. मोहन पाटील, बालरोगतज्ज्ञ

शैक्षणिक संस्थांनी शाळा परिसर स्वच्छ ठेवण्याचे कोणताही लेखी आदेश नाहीत. मात्र परिसर स्वच्छ ठेवण्याची नैतिक जबाबदारी प्रत्येक शाळेची आहे. शाळेचे आणि विद्यार्थ्यांचे आरोग्य ठणठणीत ठेवण्याची जबाबदारी शाळा व्यवस्थापनवरच आहे. भविष्यात तक्रार आल्यास संबधितांवर तातडीने कारवाई करण्यात येईल.

- एम. के. गोंधळी, शिक्षण उपसंचालक

प्रत्येक पालक शाळेची गुणवत्ता आणि भौतिक सुविधा पाहूनच कोणत्याही शाळेत प्रवेश घेतो. शाळेचा परिसर चकाचकच हवा. शुल्कांच्या तुलनेत सुविधा हव्यात. महापालिकेच्या आरोग्य विभागाकडूनही सातत्याने प्रतिबंधात्मक उपाययोजना करायला हवी.

- नितीन पाटील, पालक

मोबाइल अॅप डाउनलोड करा आणि राहा अपडेट

विवाहाचे आमिष दाखवून युवतीवर बलात्कार

August 5, 2015, 1:44 pm

≫ Next: अंबाबाई मूर्तीवरील नागमुद्रेचा विसर

≪ Previous: अनेक शाळांचे पिक्चर ‘डर्टी’च

$

0

0

कोल्हापूरः विवाहाचे आमिष दाखवून बलात्कार केल्याप्रकरणी अनिकेत अशोक सडोलीकर (वय ३०, रा. जिजामाता उद्यान, आर.के. नगर) या युवकावर शाहूपुरी पोलिस ठाण्यात गुन्हा नोंद झाला आहे. तसेच सडोलीकर कुटुंबीयांनी पाच लाख २० हजार रुपयांची फसवणूक केल्याप्रकरणीही गुन्ह नोंद झाला आहे. मुंबईहून हा गुन्हा शाहूपुरी पोलिस ठाण्यात वर्ग झाला आहे. २०१३ मध्ये अनिकेतची पीडित युवतीशी फेसबुकद्वारे ओळख झाली. ओळखीचे रूपांतर प्रेमात झाले. अनिकेतने युवतीला विवाहाचे आमिष दाखवून कोल्हापूर, मालवण, औरंगाबाद, गोवा येथे वेळेवेळी बलात्कार केला. तसेच अनिकेतने वडिलांच्या शस्त्रक्रियेसाठी, आईला दागिने खरेदी करण्यासाठी वेळोवेळी पैसे घेऊन पाच लाख २० हजार रुपयाची फसवणूक केली. अनिकेतचे वडील अशोक सडोलीकर, काका दिगंबर सडोलीकर, आई पार्वती सडोलीकर, भाऊ अभिजित सडोलीकर, भावजय शर्वर अभिजित सोडवलीकर यांच्याविरोधात फसवणुकीचा गुन्हा नोंद झाला आहे. गुन्हा डोंबवली विष्णूनगर पोलिस ठाण्यातून राजारामपुरी पोलिस ठाण्यात नोंद झाला आहे.

आत्महत्येप्रकरणी तिघांवर गुन्हा

कोल्हापूरः आत्महत्येस प्रवृत्त केल्याप्रकरणी पती गजानन देसाई याच्यासह तिघांविरुद्ध राजारामपुरी पोलिस ठाण्यात गुन्हा नोंद झाला आहे. गीतांजली गजानन देसाई (वय ३५) यांनी राहत्या घरी लोखंडी अँगलला साडीने गळफास लावून आत्महत्या केली होती. मंगळवारी दुपारी चार वाजता ही घटना उघडकीस आली होती. गीतांजलीच्या आई कमल वसंतराव मोरे (रा. राजीव झोपडपट्टी, मार्केट यार्ड) यांनी बुधवारी गीतांजलीला आत्महत्येस प्रवृत्त केल्याप्रकरणी फिर्याद दिली आहे. माहेरहून सोन्याचे दागिने आणण्यासाठी पती गजानन, सासू लक्ष्मण व अवधूत यांनी गीतांजलीला शारीरिक व मानसिक त्रास दिला, अशी तक्रार दिली आहे.

खुनी भावाला पोलिस कोठडी

कोल्हापूरः तंग कपडे का घालतेस म्हणून काठी व लोखंडी रॉडने मारहाण करून बहिणीचा खून केलेल्या ओंकार सुनील लाड (वय १९, रा. धोत्री गल्ली, रंकाळावेश स्टँडजवळ) याला प्रथम वर्ग न्यायदंडाधिकाऱ्यांनी पाच दिवस पोलिस कोठडीत ठेवण्याचा आदेश दिला. सोमवारी रात्री ओंकारने बहीण ऐश्वर्या (१७) हिला राहत्या घरी बेदम मारहाण केल्याने त्यात तिचा मृत्यू झाला होता. ऐश्वर्याचा खून केल्याप्रकरणी ओंकारला मंगळवारी अटक केली होती.

मोबाइल अॅप डाउनलोड करा आणि राहा अपडेट

अंबाबाई मूर्तीवरील नागमुद्रेचा विसर

August 5, 2015, 1:46 pm

≫ Next: प्रदूषणमुक्तीत तडजोड नाही

≪ Previous: विवाहाचे आमिष दाखवून युवतीवर बलात्कार

$

0

0

म. टा. प्रतिनिधी, कोल्हापूर

नाग, लिंगयोनी, पानपात्र आणि म्हाळुंग अशी महत्त्वाची चिन्हे हीच ज्या देवीची महत्त्वाची ओळख आहे, त्या करवीर निवासिनी श्री अंबाबाई मूर्तीच्या मस्तकावरील नाग घडविण्याचा विसर रासायानिक संवर्धन प्रक्रिया करणाऱ्या तज्ज्ञांच्या समितीला पडला. परिणामी नव्याने संवर्धित केलेल्या मूर्तीच्या मस्तकावर नागच नाही. प्रक्रिया करत असताना नाग दिसला नसल्याने तो घडवण्याचे राहून गेले असून आवश्यक असल्यास नागाचा आकार घडवून दिला जाईल, असे पुरातत्त्वचे अधिकारी डॉ. एम. आर. सिंग यांनी सांगितले. अंबाबाईची संवर्धित मूर्ती खुली करण्यापूर्वी सोन्याचा नाग मूर्तीच्या मस्तकावर तातडीने बसवूनच पुनर्प्राणप्रतिष्ठापना करावी लागणार आहे.

मूर्तीवर रासायनिक संवर्धन करण्यापूर्वी तज्ज्ञांना मूळ मूर्तीचे फोटो, १९५५ साली वज्रलेप केल्यानंतरचा मूर्तीचा फोटो, मूर्तीच्या वर्णनाबाबतचे शिलालेखातील दाखले, पुराणकथेतील देवीच्या मूर्तीचे वैशिष्ट्य अशा नोंदी तज्ज्ञांना मूर्ती अभ्यासकांमार्फत दिल्या होत्या. यामध्ये देवीच्या मूर्तीच्या मस्तकावर असलेल्या नागाचाही उल्लेख होता. मात्र, संवर्धन प्रक्रियापूर्तीनंतर प्रक्रियेपूर्वीची आणि प्रक्रियेनंतरची मूर्ती यांची छायाचित्रे उपलब्ध झाल्यानंतर मस्तकावर नागच नसल्याचे ​मूर्तीअभ्यासकांच्या निदर्शनास आल्यानंतर त्यांनी हा मुद्दा उपस्थित केला.

दरम्यान, अकराव्या शतकातील शिलालेखात ​'लिंगशैषाघौषहारिणी' असा देवीचा उल्लेख आहे. देवीच्या संस्कृत आरतीमध्येही तिच्या मस्तकावरील नागाचे वर्णन केले जाते. करवीर माहात्म्य ग्रंथात १३ व्या अध्यायातील सातव्या श्लोकात असे म्हटले आहे की, पन्नागांकित मस्तकाम म्हणजे नागांनी आपला फणा देवीच्या मस्तकावर पाहिला आहे असा उल्लेख आहे. हेमाडपंथी मंदिर प्रणालीचा प्रणेता हेमाद्री यांनी रचलेल्या हेमाद्री वीरचित चतुर्वर्गचिंतामणी या व्रतखंडात मस्तकावर नाग असे वर्णन असलेली मूर्ती करवीरनिवासिनीच आहे असे नमूद केले आहे.

मस्तकावरील नाग हीच खरी ओळख

आयुधे, बसण्याची पद्धत, मूर्तीवर कोरण्यात येणारी चिन्हे यावर त्या मूर्तीची ओळख ठरलेली असते. हीच ओळख अंबाबाईच्या मूर्तीचीही आहे आणि त्यामध्ये मस्तकावरील नागाचे महत्त्वाचे स्थान आहे. १८९६ साली ब्रिटिश छायाचित्रकाराने काढलेल्या मूर्तीच्या छायाचित्रातही मस्तकावरील नाग दिसून येतो. त्यामुळे संवर्धनप्रक्रियेनंतर मूर्ती भाविकांसाठी खुली होत असताना सोन्याचा नाग देवीच्या मस्तकावर ठेवण्याचा पर्याय असल्याचे मूर्तीअभ्यासक प्रसन्न मालेकर आणि उमाकांत राणिंगा यांनी सांगितले.

मोबाइल अॅप डाउनलोड करा आणि राहा अपडेट

प्रदूषणमुक्तीत तडजोड नाही

August 5, 2015, 1:49 pm

≫ Next: इच्छुकांचे दोन्ही दरडींवर हात

≪ Previous: अंबाबाई मूर्तीवरील नागमुद्रेचा विसर

$

0

0

म. टा. प्रतिनिधी, कोल्हापूर

येत्या गणेशोत्सवामध्ये पंचगंगा नदीचे प्रदूषण रोखण्यासाठीच्या उपाययोजनांची सक्तीने अंमलबजावणी करण्याचे कडक आदेश विभागीय आयुक्त एस. चोक्कलिंगम यांनी दिले. त्यासाठी जिल्हा प्रशासन, पोलिस, महानगरपालिका व महाराष्ट्र प्रदूषण नियंत्रण मंडळ (एमपीसीबी) यांना आतापासूनच कामाला सुरुवात करून पर्यायी व्यवस्था उभी करण्याच्या सूचनाही दिल्या. यामुळे गणेशोत्सवापूर्वी केवळ औपचारिक बैठक घेण्याची पद्धत बदलून यंदा प्रशासनाला ठोस कारवाई करावी लागणार आहे.

हायकोर्टामध्ये सुरू असलेल्या पंचगंगा नदीच्या प्रदूषणासंदर्भाने बुधवारी जिल्हाधिकारी कार्यालयात आढावा बैठक झाली. यावेळी सातत्याने एमपीसीबीच्या भूमिकेबाबत संदिग्धता निर्माण होत असल्याने सदस्य सचिव अनबालगन यांच्या उपस्थितीत ही बैठक घेण्यात आली. तसेच 'नीरी'चे तज्ज्ञ, पर्यावरणप्रेमी संघटनेचे प्रतिनिधी, अधिकारीही उपस्थित होते.

गणेशोत्सव तोंडावर आहे. पंचगंगेचे प्रदूषण रोखण्यासाठी उपाययोजना राबविण्याचे हायकोर्टाचे आदेश आहेत. त्यानुसार चोक्कलिंगम यांनी गणेशमूर्ती व निर्माल्य दानमधून शहर परिसरात फार मोठा प्रतिसाद मिळत नाही. त्यामुळे प्रदूषणाचे विविध प्रकार रोखण्यासाठी त्यांनी सक्तीने कारवाई करण्याचे आदेश जिल्हाधिकारी डॉ. अमित सैन यांना दिले. त्यासाठी पोलिस, महानगरपालिका, एमपीसीबी या यंत्रणांनी आतापासूनच कामाला सुरुवात करावी. बहुतांशवेळेस मंडळांना पर्याय नसल्याने नदीमध्ये विसर्जन होत असते. त्यासाठी सक्षम पर्यायी व्यवस्था निर्माण करण्यासही सांगितले आहे. गणेशोत्सव मंडळांना त्यादृष्टीने सजग करण्यासाठी बैठका घेण्यात याव्यात. या घटकांबरोबरच महापालिकेच्यावतीने उभारण्यात आलेला ७६ एमएलडी क्षमतेचा सांडपाणी प्रक्रिया प्रकल्प तीन महिन्यांत पूर्ण क्षमतेने सुरू करण्याचे आदेश दिले आहेत. तर दुधाळी येथील १७ एमएलडी प्रकल्पासाठी एप्रिल २०१६ पर्यंतची मुदत​ दिली आहे.

साखर कारखान्यांमधून होणारे प्रदूषण हीसुद्धा मोठी डोकेदुखी आहे. अनेक साखर कारखाने क्षमतेपेक्षा जास्त गाळप करतात. त्याबाबत तातडीने बैठक घेऊन त्यांचे ऑडिट करण्याचे व त्यानुसारच मंजुरी देण्याची प्रक्रिया करण्याचे आदेश दिले. साखर आयुक्तांच्या पातळीवर या मंजुरी दिल्या जात असल्याची बाब स्पष्ट झाल्याने आता त्यांना एमपीसीबीच्या 'ना हरकती'शिवाय ही मंजुरी दिली जाऊ नये असेही

आयुक्तांना कळवण्यात येणार आहे. तसेच ज्या कारखान्यांना गळीत क्षमतेप्रमाणे सांडपाण्यावर प्रक्रिया करता येणार नाही, त्यांची हंगाम सुरू होण्यापूर्वी बँक गॅरंटी जप्त करून त्यांच्याकडून क्षमतेनुसारची यंत्रणा उभी केल्याशिवाय परवानगी दिली जाऊ नये. कारखान्यांनी वॉश घेण्याचे वेळापत्रक जाहीर करावे व त्यानुसार एमपीसीबीकडून त्या काळात लक्ष ठेवण्यात यावे, अशी सूचना चोक्कलिंगम यांनी केली आहे.

२५ टक्के पाणीकपात

बैठकीत पंचता​रांकित एमआयडीसीतील प्रदूषणाच्या मुद्द्यावर चर्चा झाली. तेथील सहा एमएलडी क्षमतेचा सांडपाणी प्रक्रिया प्रकल्प पूर्णक्षमतेने सुरू नसल्याचे यावेळी मांडण्यात आले. त्यामुळे एमपीसीबीचे सदस्य सचिव अनबालगन यांनी हा प्रकल्प पूर्णक्षमतेने सुरू करण्यासाठी एक महिन्याची मुदत दिली आहे. तत्पूर्वी पाणीपुरवठ्यात २५ टक्के कपात करण्याचे आदेशही त्यांनी बैठकीतच येथील अधिकाऱ्यांना दिले.

एव्हीएचच्या हरकतींवर उत्तर देण्यास मुदत

चंदगड येथील वादग्रस्त एव्हीएच प्रकल्प सुरू करण्याबाबतच्या मुद्द्यावर तेथील लोकप्रतिनिधी, ग्रामस्थ, संघटनांच्या प्रतिनिधींकडून विभागीय आयुक्तांनी हरकती ऐकून घेतल्या. पूर्वीची परवानगी घेताना झालेली चूक तसेच प्रकल्प सुरू झाल्यानंतर पर्यावरण, शेती, ग्रामस्थांना काय धोका आहे, याबाबत चर्चा झाली. त्यानुसार प्रत्येक हरकतीला दहा दिवसांच्या आत उत्तर देण्यास कंपनीला सांगितले आहे. त्यांचे उत्तर समाधानकारक आल्यानंतर पुढील निर्णयासाठी सर्वांसमोर चर्चा करण्यात येणार आहे. ही सर्व प्रक्रिया पूर्ण होण्यास वीस दिवसांचा कालावधी अपेक्षित असल्याचे विभागीय आयुक्तांनी सांगितले.

मोबाइल अॅप डाउनलोड करा आणि राहा अपडेट