इच्छुकांचे दोन्ही दरडींवर हात

August 5, 2015, 1:52 pm

≫ Next: कुस्तीगीर भरत भारतीय संघात

≪ Previous: प्रदूषणमुक्तीत तडजोड नाही

$

0

0

सर्वच राजकीय पक्षांकडे निधीसह मनुष्यबळ, ताकदीची चाचपणी

म. टा. प्रतिनिधी, कोल्हापूर

महापालिका निवडणुकीसाठी उमेदवारीसाठी इच्छुकांनी सर्वच दरडीवर हात ठेवले आहेत. कोण चांगली ताकद देऊ शकेल, कोण जादा निधी देईल, कोणत्या पक्षाची​ ताकद फायदेशीर ठरेल याची चाचपणी हे उमेदवार करत आहेत. सर्वच पक्षाचे नेते सक्षम उमेदवाराच्या मागे लागले असताना हे उमेदवार मात्र 'बघूया, नंतर सांगतो' म्हणत निर्णय घेण्यास मुद्दाम वेळ लावत आहेत.

आठ दिवसांपूर्वी आरक्षण सोडत झाल्यानंतर भागाभागातील इच्छुकांनी उमेदवारी जाहीर करण्यास सुरूवात केली. 'लक्ष असू द्या', 'मदत करा' म्हणत प्रचाराला सुरूवात केली. काहीनी जेवणावळी घातल्या. प्रभागाचा विकास हाच ध्यास म्हणत अनेकांनी पोष्टर झळकवले. कोणाची उमेदवारी घ्यायची याची चाचपणी सुरू केली. सक्षम उमेदवार शोधत नेत्यांना त्यांचे घर गाठले. पूर्वी उमेदवारीसाठी पर्याय कमी असायचे. त्यामुळे विशिष्ट पक्षाची उमेदवारी द्या म्हणत इच्छूक नेत्यांच्या व पक्षाच्या दारात जायचे. आता मात्र परिस्थिती बदलली आहे. निवडणूक लढवणारे पक्ष जादा व सक्षम उमेदवार कमी अशी परिस्थिती निर्माण झाल्याने आता नेते उमेदवारांच्या मागे लागले आहेत.

उमेदवारांची धावपळ सुरू असतानाच अचानक प्रभाग आरक्षण रद्द झाले. ज्यांना हवा तसे आरक्षण पडले होते, ते नव्याने आरक्षण काढण्याच्या निर्णयाने नाराज झाले. पण ज्यांची संधी हुकली होती, त्यांना पुन्हा संधी मिळेल ही आशा निर्माण झाली आहे. त्यामुळे हे सर्व नव्या आरक्षणाच्या प्रतिक्षेत आहेत. गुरूवारी हे नवे आरक्षण सोडत होणार आहे. त्यामुळे सध्या अनेक इच्छूक अस्वस्थ आहेत. पण आरक्षण कोणतेही पडो, लढण्यासाठी अनेकांची संपूर्ण तयारी केली आहे. त्यासाठी दाखले काढून ठेवले आहेत.

लढण्यासाठी इच्छूक असणाऱ्यांनी सध्या सर्वच दरडीवर हात ठेवले आहेत. भाजप आणि शिवसेना युती तुटली आहे. त्यामुळे हे दोन्ही पक्ष स्वतंत्र लढणार आहेत. राष्ट्रवादी व जनसुराज्यची आघाडी झाली आहे. काँग्रेस स्वबळावर लढणार आहे. ताराराणी आघाडीने भाजपचा कमळ हातात धरला आहे. यामुळे उमेदवारांना सध्या तीन ते चार पर्याय उपलब्ध आहेत. यातील कोणत्या पक्षाची उमेदवारी घ्यायची याची चाचपणी हे इच्छूक करत आहेत. कोणत्या पक्षाची उमेदवारी अधिक फायदेशीर ठरेल याचा अंदाज ते घेत आहेत. गेल्या निवडणुकीत विविध पक्षांनी उमेदवारांना पाच ते पंधरा लाख रूपये खर्चासाठी दिले होते. यावेळी देखील पक्षांना हा निधी द्यावा लागणार आहे. कोणत्या पक्षाकडून जादा निधी मिळेल याची माहिती काही उमेदवार घेत आहेत. कारण या निवडणुकीत काही प्रभागात प्रत्येक उमेदवाराला पन्नास लाखापेक्षा अधिक रक्कम खर्च येण्याची शक्यता आहे. लोकसभा व विधानसभा निवडणुकीत प्रत्येक मंडळाला रक्कम देण्यात आली होती. यामुळे आता या मंडळांचे कार्यकर्ते कोण किती देईल याची चाचपणी करत आहेत.

मनुष्यबळाचा प्रश्न

निवडणुकीला मनुष्यबळाचा प्रश्नही महत्त्वाचा आहे. शक्तीप्रदर्शन करण्यासाटी कार्यकर्त्यांची गरज भासते. त्यामुळे किती कार्यकर्ते आहेत, भागात प्रचार यंत्रणा कशी राबवायला हवी याचा विचार उमेदवारांनी आधीच सुरू केला आहे. महिला कार्यकर्त्याही प्रचारात आवश्यक असल्याने त्यादृष्टिने नियोजन सुरू आहे. मात्र ऐन प्रचारात मनुष्यबळाचा प्रश्न भेडसावेल अशी स्थिती आहे.

खर्चाचा अंदाज येईना

महापालिकेच्या निवडणुकीला नेमका किती खर्च येईल याचा अंदाज अद्याप येत नसल्याचे काही इच्छुक उमेदवारांचे म्हणणे आहे. गणेशोत्सव आणि भागातील सार्वजनिक मंडळे याचे समिकरणही तपासले जात आहे. या निवडणुकीला खर्च वाढेल अशी शक्यता गृहीत भरून अनेकांनी तयारी केली आहे. तर काहीजण यासाठी अन्य पर्याय स्वीकारतील अशी शक्यता आहे.

मोबाइल अॅप डाउनलोड करा आणि राहा अपडेट

---

कुस्तीगीर भरत भारतीय संघात

August 5, 2015, 1:54 pm

≫ Next: अंबाबाईचे दर्शन आजपासून

≪ Previous: इच्छुकांचे दोन्ही दरडींवर हात

$

0

0

मारुती पाटील, कोल्हापूर

नुकत्याच म्यानमार येथे झालेल्या ज्युनिअर एशियन चॅम्पियन कुस्ती स्पर्धेत रौप्य पदक पटकावलेल्या सोनगे (ता. कागल) येथील भरत महादेव पाटील यांची ब्राझील येथे होणाऱ्या ज्युनिअर जागतिक कुस्ती स्पर्धेसाठी भारतीय संघात निवड झाली. संघाचे सध्या सोनपत (हरियाणा) येथे सराव शिबिर सुरू आहे. भारतीय चमू ११ ऑगस्टला रवाना होणार आहे. भरत ५० किलो फ्री स्टाइल प्रकारात भारतीय संघाचे प्रतिनिधीत्व करणार आहे.

ज्युनिअर राष्ट्रीय स्पर्धेत त्याने फ्री स्टाइल प्रकारात ५० किलो गटात सुवर्णपदक पटकावून भारतीय निवड चाचणी स्पर्धेत सहभागी झाला होता. अशी निवड होणारा जिल्ह्यातील एकमेव पैलवान असलेल्या भरतने आशियाई स्पर्धेपूर्वी सोनपत (हरियाणा) येथे तीन महिन्याचे प्रशिक्षण घेतले. प्रशिक्षणाचा फायदा त्याला म्यानमार येथील स्पर्धेत झाला.

सोनगे येथील आखाड्यात कुस्तीचे प्राथमिक धडे गिरवलेला भरत याआधी कोल्हापूर येथील क्रीडा प्रबोधिनीत दाखल झाला. त्यानंतर पुणे येथील बॉइज स्पोटर्स कंपनीत दाखल झाला. राम पवार, अमर निंबाळकर, फिरोज मकानदार यांच्या मार्गदर्शनाखाली कुस्ती करताना पुणे महापौर केसरी स्पर्धेत ५७ किलो गटात प्रथम क्रमांक मिळवला. त्यानंतर राष्ट्रीय स्पर्धेत सुवर्णपदक मिळवले.

म्यानमार येथील स्पर्धेचा अनुभव असल्याने ब्राझीलमधील स्पर्धेत सुवर्णपदक मिळवण्यासाठी शर्थीचे प्रयत्न करणार आहे.

- भरत पाटील

मोबाइल अॅप डाउनलोड करा आणि राहा अपडेट

अंबाबाईचे दर्शन आजपासून

August 5, 2015, 1:57 pm

≫ Next: अफवा उठताहेत जिवावर!

≪ Previous: कुस्तीगीर भरत भारतीय संघात

$

0

0

म. टा. प्रतिनिधी, कोल्हापूर

दहा दिवसांच्या रासायनिक संवर्धन प्रक्रियेनंतर अंबाबाईची मूर्ती आज (गुरुवार) दुपारी चारनंतर दर्शनासाठी खुली करण्यात येणार आहे. सकाळी साडेदहा वाजता श्रीमंत शाहू छत्रपती महाराज यांच्या हस्ते महापूजा होणार आहे. त्यानंतर पारंपरिक लवाजम्यासह देवीची उत्सवमूर्ती अवभृतस्नानासाठी पंचगंगा नदीवर नेण्यात येईल. दुपारची पूजा झाल्यानंतर देवीचा गाभारा उघडण्यात येणार आहे.

रासायनिक संवर्धन प्रक्रियेसाठी २३ जुलैपासून देवीचे दर्शन बंद होते. दोन दिवसांपूर्वी केंद्रीय पुरातत्त्व विभागाच्या तज्ज्ञांमार्फत मूर्तीवरील रासायनिक संवर्धन प्रक्रिया पार पडली. अंबाबाई मूर्ती प्राणप्रतिष्ठेच्या पूर्वसंध्येला गरुड मंडप येथे बुधवारी सहस्रकुंभाभिषेकाची पूर्वतयारी करण्यात आली. आठ दिशांना व मध्यभागी वर्तुळाकार पद्धतीने एकूण सहस्र कलशांची मांडणी करून देवता स्थापन करण्यात आल्या. देवीची सायंकालीन आरती श्रीमंत मालोजीराजे छत्रपती यांच्या उपस्थितीत झाली.

असे होणार विधी

पुनर्प्रतिष्ठापूर्वांग विधी - स. ७

प्राणप्रतिष्ठा विधी - स. ८.४५

(उपस्थिती करवीर पीठाचे शंकराचार्य विद्यानृसिंह भारती, बेंगळुरू येथील श्रीमन्मध्वाचार्य मूलमहासंस्थानम श्रीमदुत्तरादि मठाचे जगद्गुरू १००८ श्री सत्यात्मतीर्थस्वामी)

पहिली महापूजा - स. १०.३०

(श्रीमंत शाहू छत्रपती महाराज यांच्या उपस्थितीत)

पूजांगहोम, बलिदान, पूर्णाहुती - स. ११.३०

पंचगंगा नदीकडे अवभृतस्नानासाठी प्रस्थान - स. ११.४५

मोबाइल अॅप डाउनलोड करा आणि राहा अपडेट

अफवा उठताहेत जिवावर!

August 5, 2015, 1:40 pm

≫ Next: सोन्याबाबत ग्राहक सावध

≪ Previous: अंबाबाईचे दर्शन आजपासून

$

0

0

चोरीच्या अफवांमुळे प्रवासी, परप्रांतीय तरुणांवर होत आहेत हल्ले

म. टा. वृत्तसेवा शिराळा

एकीकडे चोरटे गावात शिरल्याची आवई उठवायची आणि गस्तवाले त्यांच्या मागावर गेले की इकडे हात साफ करून घ्यायचे असे फंडे सध्या जोरात सुरू आहेत. आता गावागावात कथित चोरट्यांना पकडण्याठी मिळेल त्या हत्यारानिशी सर्वच तालुक्यांमध्ये गस्त घातली जात आहे. मात्र यातील काहीजण आपला कार्यभाग साधत असल्याचे समोर येत आहे. तसेच गस्त घालणारे तरूण अतिउत्साही झाल्याने रात्री प्रवास करणारे, परप्रांतीय आणि तृतीयपंथीयांना मारहाण करण्याचे प्रकार घडत आहेत. तसेच वाहने फोडण्याचे प्रकारही होत आहेत. आता या चोरट्यांचा धसका इतका घेतला आहे की कुशिरे तर्फ ठाणे येथील महिला धावत जात असताना विहिरीत पडून जिवाला मुकली.

गस्त घालणारे तरूण इतके अतिउत्साही होत आहेत की, वाहने थांबली नाहीत तर थेट वाहनांवर दगड, विटा व लाकडी ओंडक्यांचा मारा केला जात आहे. अशा प्रकारांमुळे रात्रीचा प्रवास करणे अवघड झाले आहे. या दगडफेकीत अनेकजण जखमी झाले आहेत. तसेच वाहनांमध्ये महिला, मुली असल्याने वाहनचालकांना जिवावर उदार होऊन वाहने चालवावी लागत आहेत.

मागील आठवड्यात पुणे-बंगरूळ महामार्गावर गस्त घालण्याचा बहाना करून लोकांना लुटणाऱ्या चौघांना इस्लामपूर पोलिसांनी जेरबंद केले. गेल्या पंधरा वीस दिवसांपासून चोरांनी घरावर दगड मारले, पन्नास चोरटे एकाने बघितले, त्यातूनच गस्त घालणाऱ्यांनी गवंडी काम करणारे परप्रांतीय तरूण, तसेच प्रवाशांना चोप दिल्याचे प्रकार उघड झाले आहेत. शिराळा तालुक्यातील दोन घटना तर अंगावर शहारे आणणा-या ठरल्या पश्चिम भागातील एका गावात रात्री एक वाजेपर्यंत गस्त घालणाऱ्या मुलाने स्वत:च्या आईच्या गळ्यातील सोन्याचे दागिने काढून घेतले व घरातील अन्य दागिने घेऊन पोबारा केला. दुसऱ्या दिवशी त्यातील काही दागिने घरात आणून टाकल्यानंतर पोलिसांनी घरातील व्यक्तीनेच हे कृत्य केल्याचे लक्षात आल्यानंतर पोलिसांनी घरातील व्यक्तींची उलट तपासणी घेण्यास सुरुवात केली. घरातील लोकांच्या लक्षातही ही बाब आल्यानंतर त्यांनी पोलिसांना वेगळी दिशा दाखवून विषय थांबवला. शिराळा तालुक्यातीलच गवळेवाडी गावच्या एका विद्यार्थ्याने शाळेला जाताना एकाच्या गाडीवरून जाताना पडून जखमी झाल्यानंतर बनाव करून मला वाटेत चोरट्याने मारल्याचे सांगितले जखमी अवस्थेत त्याला रूग्णालयात दाखल केल्यानंतर पोलिसांनीही घटनेचा शोध घेण्याचा प्रयत्न केला. दुसऱ्या दिवशी तो गाडीवरून पडल्यामुळे जखमी झाल्याचे समजल्यानंतर खरा प्रकार उघडकीस आला.

मागील बुधवारी पुणे-बंगरूळ महामार्गावर गस्त घालण्याचा बहाना करून लोकांना लुटणाऱ्या चौघांना इस्लामपूर पोलिसांनी जेरबंद केले. चोरीच्या अफवा पसरवून व लुटमारीच्या भीतीचा गैरफायदा घेवून रोडवर वहाने आडवून चाकूचा धाक दाखवून लोकांना लुटण्याचा प्रकार ते करीत होते.

पन्हाळा तालुक्यात अफवांचे पीक

मंगळवारीच पन्हाळा-कोल्हापूर रस्त्यावर पहाटेच्या वेळी अनोळखी गाडी दिसली म्हणून गावकऱ्यांनी दगडफेक केली. वास्तविक ही गाडी पोलिस नाईक सुधीर माने यांची होती. गावात पहाटेच्या वेळी टेहाळणीवर असणाऱ्या ४० ते ५० जणांच्या जमावाने अनोळखी गाडी पाहून गाडी थांबविण्याचा प्रयत्न केला परंतु गाडीत महिला असल्याने तसेच अचानक समोर जमाव बघून माने यांनी गाडी न थांबविता वेगाने नेण्याचा प्रयत्न केला. गावकऱ्यांनी चोरटा पळत आहे असे समजून मोटारीवर दगडफेक करून गाडीचे नुकसान केले. तसेच कुशिरे तर्फ आळते येथे भांगलणीसाठी गेलेल्या महिलांना चोर आल्याचे कळताच त्यांनी पळापळ चालू केली. पळत असताना अस्मिता कृष्णात चोरगे यांचा पाय घसरून त्या विहिरीत पडल्या.

मोबाइल अॅप डाउनलोड करा आणि राहा अपडेट

सोन्याबाबत ग्राहक सावध

August 5, 2015, 1:47 pm

≫ Next: दहा वर्षांनंतरही मनसे गोंधळलेलीच

≪ Previous: अफवा उठताहेत जिवावर!

$

0

0

म. टा. प्रतिनिधी, कोल्हापूर

गेल्या पाच वर्षांतील सोने दरातील प्रचंड घसरण झाल्यानंतर खेरदीसाठी ग्राहकांची प्रचंड गर्दी झाली होती. मात्र, एक आठवड्यानंतर दर २५ हजारांवर स्थिर राहिल्याने सोने खरेदीसाठी ग्राहकांची वर्दळ कमी झाली आहे. दर आणखी घसरेल या प्रतीक्षेत ग्राहक आहेत. दरात घसरण झाल्याने बँकांच्या सोने तारणावर दिलेल्या कर्जवसुलीसाठी अडचणी निर्माण झाल्या आहेत, तर सराफ व्यावसायिकही 'कलम' म्हणून दिलेल्या रकमेच्या वसुलीसाठी चांगलेच धास्तावले आहेत.

२०१० मध्ये एक तोळ्याचा भाव १८ ते २० हजार रुपये होता. पाच वर्षांत हाच भाव ३३ हजारांपर्यंत पोहोचला होता. यामुळे लग्नसराई व सणासुदीच्या काळातील सोने खरेदीवर मर्यादा आल्या होत्या. मात्र, १५ जुलैनंतर देशांतर्गत रुपयाचे मूल्य वधारल्याने स्थानिक बाजारपेठेत सोन्याच्या किमती कमी झाल्या आहेत. सलग चार आठवडे सोने दरात घसरण झाल्याने खरेदीकडे ग्राहकांचा कल वाढला होता. पाच वर्षांतील सर्वांत कमी दर झाल्याने ग्राहकांनी खरेदीसाठी गर्दी केली होती. मात्र त्यानंतर सोने दर स्थिर राहिल्याने पुन्हा ग्राहकांची वर्दळ कमी झाली आहे. आवश्यकबाब वगळता गुंतवणूक म्हणून सोने खरेदीसाठी ग्राहक उत्सुक असल्याचे दिसत नाही. दर घसरल्याने बँक व सराफ व्यावसायिकांनी सोने तारणावर दिलेल्या रक्कमा वसुलीसाठी अडचणी निर्माण होत आहेत.

मोबाइल अॅप डाउनलोड करा आणि राहा अपडेट

दहा वर्षांनंतरही मनसे गोंधळलेलीच

August 5, 2015, 1:51 pm

≫ Next: आरक्षणाचा नवा डाव आज

≪ Previous: सोन्याबाबत ग्राहक सावध

$

0

0

महेश पाटील, कोल्हापूर

जेवढे कार्यकर्ते, तेवढेच गट अशी कोल्हापूर जिल्ह्यात स्थिती असलेल्या महाराष्ट्र नवनिर्माण सेनेसमोर गेल्या दहा वर्षात दुसऱ्यांदा कोल्हापूर महानगरपालिकेच्या निवडणुकीला सामोरे जावे लागले आहे. यापूर्वी २०१०च्या महापालिकेच्या निवडणुकीवेळी एकावेळी मोजक्या ठिकाणी लक्ष केंद्रित करायचे या निर्णयामुळे पक्षाचे प्रमुख राज ठाकरे यांनी कोल्हापूर महापालिका निवडणूक लढणार नाही असे जाहीर केले होते. मात्र, गेल्या पाच वर्षात तर शिल्लक राहिलेल्या मोजक्या कार्यकर्त्यांमुळे निवडणूक लढायची कुणी ? असा प्रश्न आहे.

मनसेच्या स्थापनेपासून पक्ष वाढ, संघटन यासाठी वरिष्ठ पातळीवरूनही फारसे प्रयत्न झाले नाहीत. यामुळे पक्षाच्या वाढीला मर्यादा पडल्या आहेत. पक्षप्रमुख राज ठाकरे यांच्या विषयी तरूणाईत आकर्षण आहे, मात्र तरूण या पक्षाकडे आ​कृष्ट होताना दिसत नाही, अशी कोल्हापूरमधील स्थिती आहे.

कोल्हापूर महापालिकेच्या निवडणुकीच्या तोंडावर अन्य पक्ष, आघाड्यांनी जय्यत तयारी केली आहे. निवडणुकीचे पडघम वाजू लागले असताना पक्षाचे कोल्हापुरातील कार्यकर्ते कृष्णकुंजवर जाऊन पक्षाध्यक्ष राज ठाकरे यांना निवडणूक लढण्याची विनंती करण्याच्या प्राथमिक टप्प्यातच आहेत. पाच वर्षांचा दीर्घ कालावधी घेऊनही पक्षाला तळागाळात कार्यकर्त्यांची बांधणी करता आलेली नाही. कोल्हापुरात पक्षाची बांधणी झाली नाही. पक्षाच्या कार्यकर्त्याचा शोध घ्यायचा म्हटला तरी, हाताच्या बोटावर मोजता येतील इतकेच कार्यकर्ते नजरेसमोर येतात.

जानेवारी २००६ मध्ये स्थापन झालेल्या, आता दशकपूर्तीच्या उंबरठ्यावर असलेल्या महाराष्ट्र नवनिर्माण सेनेला कोल्हापूरसारख्या राजकीयदृष्ट्या जागरूक शहरात पक्के पाय रोवता आलेले नाहीत. वस्तूतः लोकसभा निवडणूक असो वा विधानसभा. अशा निवडणुकांमध्ये होणाऱ्या जाहीर सभांमध्ये सर्वाधिक क्रेझ दिसते ते राज ठाकरे यांची. मनसेच्या स्थापनेदरम्यान राज ठाकरेंची झालेली सभा अथवा नुकत्याच झालेल्या विधानसभा निवडणुकीतील गांधी मैदानातील सभा. त्यांची तडाखेबंद भाषणे अनेकांकडे मोबाइलवरही पहायला मिळतात. शिवसेनाप्रमुख बाळासाहेब ठाकरे यांच्यानंतर भाषणाला जमणारी गर्दी आणि प्रतिसाद राज ठाकरे यांच्या मनसेच्या सभांना मिळत असला तरी ती गर्दी मतांमध्ये रुपांतरीत करणे शक्य झालेले नाही. त्यातही कोल्हापूरात कार्यकर्त्यांचे पक्के केडर नसल्याने पक्ष धोरणांत्मक बाबीतही गटांगळ्या खातो आहे.

कोल्हापुरात पहिल्यापासूनच गटबाजीची लागण

मनसेला सुरुवातीपासूनच गटबाजीचे ग्रहण लागल्याचे दिसते. सुरुवातीच्या टप्प्यात उदय पोवार, नवेज मुल्ला, विजय करजगार, राजू जाधव, भारती आडोलकर, प्रसाद पाटील, राजू समर्थ आदी कार्यकर्ते सक्रीय होते. मात्र नंतर ठराविकांच्या गराड्यातच मनसे गुरफटली. एकदा तर तीन शहराध्यक्षांची एकाचवेळी नेमणूक झाली होती. पक्षाचे धोरण विचारात न घेता कोणीही उठून कोणत्याही प्रश्नावर आंदोलन करण्याची तर स्पर्धाच लागली. त्यातून पक्षाच्या स्थापनेच्यावेळी जिल्हाध्यक्ष असलेले उदय पोवार आज पक्षापासून बाजुला आहेत. ग्रामीण भागातील अन्य कार्यकर्तेही बाजूला गेले. हुपरीसारख्या गावात दौलत पाटील यांच्यासारख्या कार्यकर्त्याने ताकदीने ग्रामपंचायतीवर सत्ता आणली. आज नागेश चौगुले, राजेंद्र चव्हाण, संजय पाटील, बाळासाहेब पाटील आदी कार्यकर्ते कार्यरत आहेत. त्यांना बळ देण्याची गरज आहे. मध्यंतरी वरिष्ठ स्तरावरून विनोद खोपकर, आमदार शिशीर शिंदे आणि आता यशवंत किल्लेदार हे संपर्कप्रमुख म्हणून काम पहात आहेत. मात्र, तरीही पक्षाची बांधणी झाली नाही. उठसूठ आंदोलनातून कार्यकर्ते, समाज बांधला जाईल अशी धारणा असलेल्यांना गेल्या विधानसभा निवडणुकीत झटका बसला. विधानसभा निवडणुकीत 'मनसे'ने जिल्ह्यातील दहापैकी नऊ जागा लढवल्या. तेथेही अनामत जप्त होण्याचा अनुभव पक्षाला घ्यावा लागला. आजही जिल्हाध्यक्ष अभिजित साळोखे, राजू जाधव, निलेश लाड, राजू दिंडोर्ले, मंगल पाटील, विद्यार्थी सेनाध्यक्ष अभिजित राऊत, मंदार पाटील आदी कार्यकर्ते कार्यरत आहेत.

मोबाइल अॅप डाउनलोड करा आणि राहा अपडेट

आरक्षणाचा नवा डाव आज

August 5, 2015, 1:58 pm

≫ Next: जिंदगी की सफर में...

≪ Previous: दहा वर्षांनंतरही मनसे गोंधळलेलीच

$

0

0

म. टा. प्रतिनिधी, कोल्हापूर

आरक्षण सोडतीतील घोळानंतर ७० प्रभागासाठी आज (गुरूवारी) फेरआरक्षण काढण्यात येणार आहे. आरक्षण सोडत काटेकोर आणि निर्दोष व्हावी, यासाठी महापालिका प्रशासनाने पूर्ण खबरदारी घेतली आहे. शिवसेनेतर्फे, या सोडतीला स्थगिती मिळावी यासाठी दाखल केलेल्या याचिकेवर हायकोर्टाने बुधवारी म्हणणे ऐकून घेतले. याप्रश्नी आता शुक्रवारी सुनावणी होणार आहे.

आरक्षण सोडतीच्या पूर्वसंध्येला बुधवारी सायंकाळी रंगीत तालीमही घेण्यात आली. रमणमळा येथील बहुउद्देशीय सभागृहात सकाळी ११ वाजता सोडतीला प्रारंभ होईल. फेरआरक्षण सोडतीवर लक्ष ठेवण्यासाठी निवडणूक आयोगाकडील अधिकारी तथा कक्ष अधिकारी अतुल जाधव उपस्थित राहणार आहेत. ३१ जुलैला काढलेल्या आरक्षण सोडतीदरम्यान पहिल्यांदा ओबीसी प्रवर्गासाठीच्या २२ चिठ्या काढल्या होत्या. राज्य निवडणूक आयोगाच्या नियमावलीनुसार नागरिकांचा मागास प्रवर्गासाठी (ओबीसी, खुला) ११ चिठ्ठ्या काढणे आवश्यक होते. महापालिका प्रशासनाच्या या चुकीमुळे गुरुवारी ७० जागांसाठी फेरआरक्षण सोडत काढण्याचा आदेश निवडणूक आयोगाने दिला आहे.

अशी होणार सोडत

पहिल्यांदा ओबीसी प्रवर्गासाठी (महिला वगळून) सोडत काढली जाणार आहे. त्यापाठोपाठ ओबीसी महिला प्रवर्गासाठी आणि नंतर सर्वसाधारण महिला प्रवर्गासाठी व त्यापाठोपाठ सर्वसाधारण गटासाठी आरक्षण सोडत काढली जाणार आहे. दरम्यान ८१ प्रभागांपैकी ११ प्रभाग अनुसूचित जातीसाठी थेट राखीव आहेत. त्यामध्ये बदल होणार नाही.

नव्या आरक्षणाची धास्ती

आरक्षण सोडतीसंबंधी हायकोर्टात दाखल केलेल्या याचिकेमुळे शहरात दिवसभर चर्चेला ऊत आला होता. निवडणुका पुढे ढकलणार अशा अफवा पसरल्या होत्या. सोशल मीडियावरून या संदर्भात दिवसभर मेसेज फिरत होते. दुसरीकडे गुरूवारी होणाऱ्या आरक्षण सोडतीमुळे इच्छुक उमेदवारांची धाकधूक वाढली आहे. नव्याने सोडतीत काय बदल होणार, प्रभागावर काय आरक्षण पडणार याची धास्ती लागली आहे. फेरआरक्षण सोडतीत मनासारखी लॉटरी लागणार की बदलामुळे निवडणुकीपासून वंचित राहावे लागणार या विचाराने अनेकांचा जीव टांगणीला लागला आहे.

मोबाइल अॅप डाउनलोड करा आणि राहा अपडेट

जिंदगी की सफर में...

August 6, 2015, 11:55 am

≫ Next: मैत्रीचे जुळले अनोखे बंध

≪ Previous: आरक्षणाचा नवा डाव आज

$

0

0

कोल्हापूर टाइम्स टीम

आपल्या आवाजाने रूपेरी ​दुनिया गाजवणाऱ्या किशोरकुमार यांच्या गाण्यांनी कोल्हापुरातील किशोर'वेड्यांनी एक मैफल रंगवली. सरनोबतवाडी येथील यदुनाथ आळतेकर यांच्या यदुज स्टुडियोचा कानाकोपरा किशोरफॅन हौशी गायकांच्या स्वरांनी भरून गेला आणि रात्री आठ वाजता सुरू झालेल्या या मैफलीची रात्री अकरा वाजता भैरवी झाली तेव्हा प्रत्येकजण किशोरकुमार यांच्या गाण्यांनी धुंद झाला होता.

आठ वाजता ही सगळी किशोरवेडी मंडळी एकत्र आली. किशोरकुमारच्या प्रेमाने बांधलेली पण अनोळखी असलेल्या सर्वांनी एकमेकाची मॅरेथॉन ओळ्ख केली व सर्व काही मिनिटात किशोर वेडे मैफलीत रममाण झाले. किशोर कुमार यांच्या ८६ व्या जयंतीनिमित्त त्यांना अभिवादन करत या मैफलीच्या तारा छेडल्या. जवळपास १८ जण हौशी कलाकार, कराओके व यदु स्टुडीओची दर्जेदार म्युझिक सिस्टीम आणि दोन तासांचा वेळ अशा वातावरणात मैफल सुरू झाली. अट फक्त एकच, प्रत्येकाने किशोरकुमार यांनी गा​यलेले स्वतःच्या आवडीचे गाणे म्हणायचे. किशोरदा या नावाचा केक कापला आणि किशोरकुमार यांच्या गाण्यांचे सूर मनात साठवत ही किशोरवेडी मंडळी परतीच्या मार्गाला लागली.

मोबाइल अॅप डाउनलोड करा आणि राहा अपडेट

---

मैत्रीचे जुळले अनोखे बंध

August 6, 2015, 11:31 am

≫ Next: एक हजार मुली दत्तक

≪ Previous: जिंदगी की सफर में...

$

0

0

अनिकेत हुल्ले

उचगाव (ता. करवीर) येथील न्यू पॉलिटेक्निकच्या विद्यार्थ्यांनी जिवबा नाना जाधव पार्कातील 'अवनि' संस्थेला मदत करुन फ्रेंडशिप डे साजरा केला. सामाजिक बांधिलकी जपत पॉलिटेक्निकच्या विद्यार्थ्यांनी मैत्रीचे अनोखे बंधन बांधले.

केवळ कॉलेजवर मित्र आणि मैत्रिणींना फ्रेंडशिप बॅँड बांधण्यापेक्षा सामाजिक उपक्रमातून फ्रेंडशिप डे साजरा करण्याचा निर्णय न्यू पॉलिटेक्निकच्या विद्यार्थ्यांनी घेतला. ऑटो मोबाइल विभागाचे विद्यार्थी उत्कर्ष पाटील, रोहन वासुदेव ,दिग्विजय पाटील, स्नेहल पाटील या विद्यार्थ्यांनी अवनि संस्थेत जाऊन मदत करण्याचा विचार व्यक्त केला. त्यासाठी प्राचार्य विनय शिंदे यांनी तत्काळ मान्यता दिली. सामाजिक कार्यासाठी झटणाऱ्या अवनि संस्थेत जाऊन विद्यार्थ्यांना भोजन दिले. शैक्षणिक आणि क्रीडा साहित्याचे वाटप केले. नव्या पिढीने बदलत्या काळानुसार विचारात आणि आचारात बदल करणे अपेक्षित आहे. न्यू पॉलिटेक्निकच्या विद्यार्थ्यांची सामाजिक बांधिलकी जोपासली आहे. भविष्यातही सामाजिक उपक्रम राबविण्यात येणार आहे. शहरातील अन्य कॉलेजच्या विद्यार्थ्यांनी विधायक समाजनिर्मितीसाठी पुढाकार घेण्याची गरज आहे, अशा भावना यावेळी उत्कर्ष पाटीलने व्यक्त केल्या.

विद्यार्थ्यांना श्री प्रिन्स शिवाजी मराठा बोर्डिंग हाऊसचे चेअरमन डी. बी. पाटील, ऑटोमोबाइल विभागाचे प्रमुख एस. जी. वैद्य, प्रा. आर. के. ढवळे, डी. डी. भोसले, आर.एम .देसाई, आर. के यादव यांचे मार्गदर्शन लाभले.

हात मदतीचा

मदतीचा एक हात अनेकांचे जीवन बदलून टाकू शकतो. आजकाल सोशल मीडिया सामाजिक जाणीवा समृद्ध करण्याचे काम करीत आहे. अनेक ग्रुप सामाजिक बांधीलकी मानून काम करीत असतात. व्हॉटस ग्रुप अनेक संस्थांना मदतीचा हात देतात. अनेकांचे आयुष्य उभे करतात. अशा ग्रुपच्या कामाची माहिती महाराष्ट्र टाइम्सच्या माध्यमातून वाचकांपर्यंत पोहोचविण्याचा प्रयत्न आहे. आपल्या ग्रुपने केलेले काम, उद्देश आणि उपक्रमांचे फोटो 'मटा'च्या वाचकांशी शेअर करा. योग्य आणि विधायक उपक्रमांना प्रसिद्धी देण्यात येईल. याविषयी अधिक माहितीसाठी (०२३१ ६६२२३०२) या क्रमांकावर संध्याकाळी चारनंतर संपर्क साधावा. (इ मेलः matakolhapur@gmail.com. सब्जेक्ट बॉक्समध्ये 'विधायक उपक्रम' असा उल्लेख करावा.)

मोबाइल अॅप डाउनलोड करा आणि राहा अपडेट

एक हजार मुली दत्तक

August 6, 2015, 11:39 am

≫ Next: टोलचे भूत उतरवा

≪ Previous: मैत्रीचे जुळले अनोखे बंध

$

0

0

'कोल्हापूर वुई केअर' ग्रुपने उचलली शिक्षणाची जबाबदारी

कोल्हापूर टाइम्स टीम

व्हॉटस अॅपचा वापर माणसे जोडणाऱ्याबरोबरच अनेक विधायक उपक्रम राबविण्यासाठी चांगल्या पद्धतीने होत आहे. अनेक ग्रुप सामाजिक कार्यात अॅक्टिव्ह झाले आहेत. नोकरी आणि व्यवसा सांभाळत अनेकजण सामाजिक बांधीलकीचे व्रत जपत आहेत. कोल्हापूर वुई केअर या व्हॉटस् ग्रुपने तर एक हजार मुलींना दत्तक घेतले आहे. त्यांच्या शिक्षणांसाठी प्रत्येकी अडीच ते पावणेतीन हजाराची मदत केली जाते.

तीन वर्षांपूर्वी राजकीय नेते, डॉक्टर, वकील, उद्योजक आणि व्यावसायिकांनी एकत्रित येऊन कोल्हापूर वुई केअर हा व्हॉटस् अॅप ग्रुप तीन वर्षांपूर्वी सुरू केला. ग्रुपमध्ये फक्त १०० सदस्य आहेत. ग्रुपवर कोणतीही आक्षेपार्ह पोस्ट टाकली जात नाही. विनोदांवर बंदी घालण्यात आली आहे. ग्रुपवर रोज सामाजिक प्रश्नांवर चर्चा होत असे. चर्चेतून आपण समाजाला देणे लागतो यावर सर्वांचे एकमत झाले. त्यातून प्रत्यक्ष कृती कार्यक्रम सुरू झाला.

जी मुले अनाथ आहेत. ज्यांना‌ सिंगल पेरेंट आहेत, अशा कुटुंबातील मुलींना शैक्षणिक मदत करण्याचा विचार मांडण्यात आला. जिल्ह्यात पाचवी ते दहावीत मुलींच्या शैक्षणिक गळतीचे प्रमाण २२ टक्के असल्याची माहिती ग्रुपच्या चर्चेत पुढे आली. गरीब कुटुंबात मुलाला शिकवले जाते आणि मुलीला घरकाम करायला लावले जाते. ही बाब चर्चेत प्रकर्षाने मांडल्यावर मुलींना मदत करण्याचा निर्णय घेण्यात आला. सर्व ग्रुपच्या सदस्यांनी उपक्रमाला पाठिंबा दिला.

ग्रुपवर निधी जमवण्याचे काम सुरू झाले. २५ ते २६ लाख रूपये जमले. २०१४ मध्ये ५०१ मुली दत्तक घेण्यात आल्या. विद्यार्थ्यांना शैक्षणिक साहित्य, गणवेश, दप्तर, शूज, संगणक वर्गाची फी देण्यात येते. गेल्यावर्षीच्या उपक्रमानंतर यावर्षी ग्रुपने १००० मुलींना मदत करण्याचा निर्णय घेतला आहे. निधी संकलनाचे काम अंतिम टप्प्यात आहे. ग्रुपकडे ३३६३ मुलींचे मदतीसाठी अर्ज आले. त्यांची छाननी करून एक हजार मुली निवडण्यात आल्या आहेत. या मुलींना मदत केली जाणार आहे. तसेच अंध, अपंग, गतीमंद विद्यार्थ्यांच्या शैक्षणिक संस्थांना मदत करण्यात आली. या उपक्रमाचे कौतुक झाले. ग्रुपच्यावतीने दोन महिन्यातून एकदा सोशल मॅगेझिन काढले जाते. तसेच पीपल सोशल रिस्पॉन्सिबिलीटी (पीएसआर) ही संस्थाही सुरू केली.

योग्य आणि विधायक मार्ग

सुरू केला उपक्रम कमालीचा यशस्वी झाल्याचे या ग्रुपचे सदस्य मिलींद धोंड यांनी सांगितले. नागरिकांकडून आमच्या उपक्रमाला प्रोत्साहित केले जाते. तसेच मदत करण्यासाठी अनेकांच्या मदतीचे हात पुढे येत आहेत. आमचा ग्रुप योग्य व विधायक मार्गाने जातोय. भविष्यात मदतीच्या जोरावर सामाजिक जाणिवांचा परिघ विस्तारत नवीन उपक्रम सुरू करण्याचा मानस आहे. यासाठी कुणाला मदत द्यायची असेल तर त्यांनी ९३२५६९५५६७ या क्रमांवर संपर्क साधावा.

मोबाइल अॅप डाउनलोड करा आणि राहा अपडेट

टोलचे भूत उतरवा

August 6, 2015, 11:50 am

≫ Next: करपलं रान अन् जळलं शिवार

≪ Previous: एक हजार मुली दत्तक

$

0

0

सांगलीवाडीच्या निर्णयाप्रकरणी कृती समिती आक्रमक

म. टा. वृत्तसेवा, कुपवाड

'कोणत्याही परिस्थितीत सांगलीवाडीचा टोल सुरू होऊ देणार नाही. राज्य सरकारने स्वतः कंपनीची देय रक्कम तातडीने देऊन टोलचे भूत कायमचेच मातीत गाडावे, अन्यथा रस्त्यावर उतरावे लागेल,' असा इशारा टोलविरोधी सर्वपक्षीय कृती समितीने गुरुवारी दिला. दरम्यान, याचवेळी आमदार सुधीर गाडगीळ यांनी सार्वजनिक बांधकाममंत्री चंद्रकांत पाटील यांची शुक्रवारी कोल्हापुरात भेट घेऊन हा विषय मार्गी लावण्याची ग्वाही दिल्याने शुक्रवारी सांगली टोलचा विषय कोल्हापूर दरबारी जाणार आहे.

सांगलीवाडीनजीकच्या नाक्यावरून पुन्हा टोल वसुली सुरू करण्यास कोर्टाने हिरवा कंदील दाखविल्याने सांगली जिल्ह्यात संतप्त प्रतिक्रिया उमटली आहे. एक कोटी वीस लाखांच्या वसुलीसाठी सोळा वर्षे टोल वसुलीला कोर्टाने परवानगी दिल्याने आश्चर्य व्यक्त होत आहे. कारण नवीन पूल अस्तित्वात आल्यानंतर साडेसात कोटी रुपयांच्या वसुलीसाठीही सोळा वर्षेच मुदत देण्यात आली होती. या पार्श्वभूमीवर गुरुवारी सांगलीत सर्वपक्षीय कृती समितीची बैठक झाली. या वेळी आमदार सुधीर गाडगीळ, महापौर विवेक कांबळे, माजी महापौर सुरेश पाटील, उपमहापौर प्रशांत पाटील, विरोधी पक्षनेते दिग्विजय सूर्यवंशी, शिवसेनेचे युवा नेते पृथ्वीराज पवार, जिल्हा काँग्रेसचे शहर जिल्हाध्यक्ष पृथ्वीराज पाटील, मनसेचे जिल्हाप्रमुख तानाजी सावंत, ज्येष्ठ स्वातंत्रसैनिक बापूसाहेब पाटील, युवराज बावडेकर आदी उपस्थित होते. या बैठकीचे संयोजन टोल विरोधी कृती समितीचे निमंत्रक सतीश साखळकर, माजी उपमहापौर प्रशांत मजलेकर, महेश पाटील, अॅड. अमित शिंदे आदींनी केले होते.

काँग्रेसचे शहर जिल्हाध्यक्ष पृथ्वीराज पाटील म्हणाले, 'टोलचे भूत पुन्हा नको, टोल जनतेचा कळीचा विषय आहे. आंदोलन होण्यापूर्वी सरकारला समज द्या, सांगली-कोल्हापुरचा प्रश्न अजून तसाच आहे.'

पृथ्वीराज पवार म्हणाले, 'टोल विरोधात न्यायालयीन लढाई आणि रस्त्यावरची लढाई अशा दोन पातळ्यावरची लढाई करावी लागणार आहे. एक दिवस जरी टोल सुरू झाला, तरी हा सांगलीकरांचा अपमान आहे.' समितीचे निमंत्रक सतीश साखळकर म्हणाले, 'टोल रद्दचा निर्णय सरकारने घ्यायला हवा, मागचा निर्णय तोंडी झाला. आता लेखी पत्राशिवाय आंदोलन मागे घेतले जाणार नाही. सरकारने कंपनीला व्याजासह जे पैसे द्यायचे आहेत ते द्या, मात्र टोलमुक्ती द्या.'

एकजूट दाखवा

'यामधील लवादच कंपनीला मॅनेज आहे, साडेचार कोटीवरून सातेसात कोटी वसूल झाले, तरी आणखी ७२ कोटी मिळवायच्या नादात कंपनी आहे. अशा गिधाडाचे पानीपत करण्यासाठी एकजूट दाखवा,' असे आवाहन स्वातंत्रसैनिक बापूसाहेब पाटील यांनी केले.

मोबाइल अॅप डाउनलोड करा आणि राहा अपडेट

करपलं रान अन् जळलं शिवार

August 6, 2015, 11:52 am

≫ Next: भुईमूग, नाचणीला फटका

≪ Previous: टोलचे भूत उतरवा

$

0

0

जत तालुक्यातील जवळपास ९० टक्के पेरण्या वाया

रविराज गायकवाड, जत (सांगली)

'पाऊस चांगला हुईल म्हणून पेरलंतं बाबा, हातात काय ऱ्हायलं नाही आता. आताच भावासंगं मळ्यात गेल्तो. मूग कुळवून आलो बघ...' (अर्धवट उगवलेली मुगाची पेरणी मोडली.) सांगली जिल्ह्यातील जत तालुक्यात जत-उमदी रस्त्यात भेटलेल्या संगाप्पा मुधोळ या शेतकऱ्याची ही प्रतिक्रिया. पावसानं ओढ दिल्यामुळं तालुक्यातील जवळपास ९० टक्के पेरण्या वाया गेल्या आहेत. आता पाऊस झाला, तरी दुबार पेरणीतून काही हाती लागणार नाही. त्यामुळं इथल्या शेतकऱ्यांनी केलेल्या पेरण्याच मोडून टाकायला सुरुवात केली आहे.

पाणीटंचाई आणि दुष्काळामुळं सातत्यानं चर्चेत असलेला सांगली जिल्ह्यातील जत तालुका यंदा पुन्हा दुष्काळाच्या झळा सोसत आहे. तालुक्यातील काही गावांमध्ये शेतीच नव्हे, तर जनावरांना आणि घरात प्यायलाही पाणी नसल्यानं तालुक्यातील शेतकरी, ग्रामस्थांची होपरळ सुरू आहे. मुळात सांगली जिल्ह्याचा पूर्व भाग कमी पावसाचा. पावसाच्या अनिश्चिततेमुळे शेती नापेर ठेवण्याची वेळ शेतकऱ्यावर ओढवली आहे. शेतात राबायची तयारी आहे; पण पाणीच नाही. त्यामुळं इथला शेतकरी हतबल आहे.

तालुक्याच्या आग्नेय टोकाला असलेल्या जालिहाळ बुद्रुकमध्ये शेतकऱ्यांना विचारलं, 'शेतात गेला नाही का?' 'काय करू बाबा. जाऊन काय करू तितं,' असं उत्तर एका शेतकऱ्यानं दिलं. शिवाजी बिराजदार म्हणाले, 'न्हाई सरकारकडनं काय हलचाल दिसत न्हाई. गेल्या वर्षी बरा पाऊस झाला म्हणून जुलै-ऑगस्ट बघतोय, न्हाई तर काय खरं नाही देवा.' 'सरकारनं काय करावं,' या प्रश्नावर बिराजदार म्हणाले, 'पाणी द्या म्हणावं फक्त. आमी राबाय तयार हाय. काय पायजे ते पिकिवतो आमी.'

तालुक्यात खरिपाचा (६५ हजार हेक्टर) हंगाम वाया गेला. रब्बीचं क्षेत्रही (९५ हजार हेक्टर) तालुक्यात मोठं आहे. परतीचा मान्सून जत परिसरात बऱ्यापैकी पडतो; पण खरीपात काहीच हाती आलं नाही. त्यामुळं रब्बीवर कितपत अवलंबून बसायचं, असा शेतकऱ्यांपुढं प्रश्न आहे.

तालुक्यात एक सलग असा पाऊस होत नाही. काही गावांत होतो, काही गावांत होत नाही. सध्या खरीपाचा हंगाम पूर्णपणे वाया गेला आहे. दुबार पेरणी होणारच नाही. आता ऑगस्टच्या दुसऱ्या तिसऱ्या आठवड्यापासून शेतकरी रब्बीची तयारी सुरू करतील. - बाळासाहेब लांडगे, तालुका कृषी अधिकारी

आता रब्बी पेरलं, तर ते येनार एप्रिलमदी. त्येचा काय नेम न्हाई. खरीपच महत्त्वाचा हुता. सगळं वाया गेलंय बगा. मका हुता. त्यो तोडून जनावरास्नी घालतोय बगा. पुढल्या नक्षत्रात काय गावतंय का बगू. - शिवाजी बिराजदार, जालिहाळ बुद्रुक, जत, सांगली

मोबाइल अॅप डाउनलोड करा आणि राहा अपडेट

भुईमूग, नाचणीला फटका

August 6, 2015, 11:52 am

≫ Next: पाऊस छोटा; धरणसाठा मोठा

≪ Previous: करपलं रान अन् जळलं शिवार

$

0

0

उशिराच्या पावसाने जिल्ह्यात अद्यापही १० टक्के क्षेत्र लागवडीविना

बाळासाहेब पाटील, कोल्हापूर

गेल्या काही दिवसांपासून दडी मारून पडलेला पाऊस पुन्हा एकदा बरसू लागला आहे. मा‌त्र, जूनमध्ये दमदार पावसानंतर यंदाचा पावसाळा समाधानकारक असेल असे वाटत असतानाच मध्यंतरी पाऊसच नसल्याने जिल्ह्यातील सर्वच पिकांना फटका बसला आहे. तर अनेक ठिकारी पावसाची प्रतीक्षा करत शेतकऱ्याने लागवडच केलेली नाही. जिल्ह्यात ऑगस्टच्या पहिल्या आठवड्यात ९१ टक्के पेरण्या झाल्या असल्या तरी अजूनही ९ ते १० टक्के पेरण्याच झालेल्या नाहीत. पावसाने सर्वात जास्त फटका दिला आहे तो भूईमूग, सोयाबीन आणि नाचणी पिकाला. तर जिल्ह्यात सूर्यफुलाची लागवडच झालेली नाही.

उशिरा आलेल्या पावसामुळे भूईमुग लागवडीला पाऊस आवश्यक असल्याने पावसाची वाट पाहत केवल ७६ टक्केच लागवड झाली आहे. तर सोयाबीनची लागवड केवळ ६९ टक्के झाली आहे. आजरा, चंदगड आणि राधानगरी तालुक्यात येणारे नाचणीची लागवड निम्मीच झाली आहे.

मध्यंतरी पावसाने ओढ दिल्याने पिके धोक्यात आली होती. मात्र, नंतर पडलेल्या पावसाने त्यांना जीवदान दिले. त्यामुळे लागवड झालेली पिके धोक्यात नसली तरी उत्पन्नात घट होणार आहे. जिल्ह्यात तीन लाख ९ हजार ९०० हेक्टर लागवडीखालील क्षेत्र आहे. त्यापैकी ऑगस्टअखेर ३ लाख पाच हजार ९९ हेक्टर क्षेत्रावर लागवड झाली आहे. उर्वरित ९ टक्के क्षेत्र लागवडीशिवाय पडून आहे. याचा फटका पुढील वर्षात बसण्याची शक्यता आहे. सध्या गगनबावडा तालुक्यात सर्वाधिक २०५२ मिलीमीटर पाऊस पडला आहे. येथे भातलागवड झाली आहे. राधानगरी तालुक्यात ६६६ मिलीमीटर पाऊस पडला असला तरी अजूनही पाच टक्के रोपलावण शिल्लक आहे.

जिल्ह्यात पेरणीची स्थिती चांगली आहे. ९० टक्क्यांहून जास्त क्षेत्रावर पेरण्या झालेल्या आहेत. जिल्ह्यात बहुतांश ठिकाणी पाऊस कमी असला, तरी अधूनमधून झालेल्या सरींमुळे पिकांना अद्यापतरी धोका दिसत नाही. सोयाबीन आणि भुईमुगाचे क्षेत्र घटले आहे, मात्र अन्य पिकांची स्थिती चांगली आहे. - मोहन अटोळे, जिल्हा अधीक्षक कृषी अधिकारी

मोबाइल अॅप डाउनलोड करा आणि राहा अपडेट

पाऊस छोटा; धरणसाठा मोठा

August 6, 2015, 11:53 am

≫ Next: झुम्बाचा ठेका आज रंगणार

≪ Previous: भुईमूग, नाचणीला फटका

$

0

0

म. टा. प्रतिनिधी, कोल्हापूर

यंदाच्या हंगामात जिल्ह्यात जूनमधील पावसाचा आठवडा सोडल्यास कोल्हापूरला साजेसा असा पाऊसच झालेला नाही. जिल्ह्याची पावसाची वार्षिक सरासरी १७७२ मिलीमीटर अशी भरभक्कम असताना आतापर्यंतच्या पावसामुळे केवळ ६३४ मिलीमीटरची सरासरी ओलांडली आहे. त्याची टक्केवारी पाहिल्यास सरासरीच्या केवळ ३६ टक्के पाऊस झाला आहे. एकीकडे जिल्ह्याच्या सरासरीमध्ये काठावर पास असलेला पाऊस धरणक्षेत्रांमध्ये मात्र चांगला बरसला आहे. ७६ टक्क्यांवर धरणसाठा पोहचला असून दोन धरणे भरली आहेत.

यंदा मान्सून वेळेवर दाखल झाला असल्याने येथूनपुढे गरजेवेळी पाऊस पडेल अशी आशा सर्वांना होती. जूनमधील दुसऱ्या पंधरवड्यात आठवडाभर झालेल्या पावसामुळे तर यंदा भरपूर पाऊस वैताग आणणार का असेच वातावरण होते. मात्र शेवटच्या आठवड्यापासून सुटी घेतलेल्या त्या जोरदार पावसाने अजूनपर्यंत हजेरी लावलेली नाही. रिमझिम, कोणत्या तरी दिवशी एखादी जोरदार सर अशा पावसामुळे जिल्ह्यात दुष्काळसारखी परिस्थिती नसली तरी काही पिकांच्यादृष्टीने आवश्यक इतका पाऊस नाही. याची चिंता शेतकऱ्यांत आहे. पश्चिम भागातील तालुक्यांमध्ये जे पावसाचे प्रमाण आहे, ते पूर्वेकडे कमी होत गेले आहे. बाराही तालुक्यांमधील सरासरी आकडेवारी पाहिल्यास वार्षिक सरासरीच्या केवळ ३६ टक्के पाऊस झाला आहे. त्यामध्ये पन्हाळा, शाहूवाडी, करवीर, कागल, भुदरगड या पाच तालुक्यांत ४० टक्क्यांवर पाऊस आहे. त्यातील शाहूवाडी व भुदरगड हे तालुके ५० टक्क्यावर पोहचले आहेत. आतापर्यंत सर्वाधिक पाऊस गगनबावडा तालुक्यात (एकूण २०५२ मि.मी.) झाला असला तरी तेथील वार्षिक सरासरी पाहता हा तालुका ३६ टक्क्यावरच आहे. त्याबरोबर राधानगरी धरण क्षेत्रात चांगला पाऊस असला तरी तालुक्याचा विचार करता तेथील पावसाची आकडेवारीही चिंताजनक आहे. तिथे केवळ वार्षिक सरासरीच्या १९ टक्के पाऊस झाला आहे. पुर्वेकडील हातकणंगले तालुक्यातही १९ टक्केच पाऊस झाला आहे.

धरणांच्या क्षेत्रात झालेल्या पावसामुळे चौदापैकी चार वगळता उर्वरित धरणांमध्ये ७० टक्क्यावर पाणीसाठा झाला आहे. या धरणांमध्ये तुळशी (६४ टक्के), दूधगंगा (६२ टक्के), चिकोत्रा (३७ टक्के), चित्री (६५ टक्के) यांचा समावेश आहे. सर्व धरणांचा पाणीसाठा पाहता तो ७६.२४ टक्के इतका आहे.

मोबाइल अॅप डाउनलोड करा आणि राहा अपडेट

झुम्बाचा ठेका आज रंगणार

August 6, 2015, 11:54 am

≫ Next: ऑनलाइन झटका!

≪ Previous: पाऊस छोटा; धरणसाठा मोठा

$

0

0

'मटा'सोबत झुम्बा शिकण्याची संधी

म. टा. प्रतिनिधी, कोल्हापूर

फिटनेस फंडा आणि डान्स फिव्हर एकाच मंचावर आणत झुम्बा डान्सने तरूणाईला पुरते वेड लावले आहे. नाचत व्यायाम हा मंत्र जपणारी ही कला शिकण्याची एक नामी संधी महाराष्ट्र टाइम्सने ​आणली आहे. शुक्रवारी, ७ ऑगस्टला सायंकाळी एक तासभर झुम्बाच्या स्टेप्स शिकता येणार आहेत. नव्या युगाचा हा ठेका शिकण्यासाठी आणि स्लिमट्रिम होण्याच्या टिप्स ​घेण्यासाठी मटा कल्चर क्लब सदस्यांना वेध लागले आहेत ते झुम्बावर थिरकण्याचे.

महाराष्ट्र टाइम्स कल्चर क्लबच्यावतीने क्लबचे सदस्य व वाचकांसाठी विविध सांस्कृतिक पर्वणी देण्यात येत आहे. गेल्या महिन्यात झालेले विविध सांगीतिक कार्यक्रम आणि विविध उपक्रमांनंतर आता ऑगस्ट महिन्यात झुम्बा डान्स शिकण्याची संधी मिळणार आहे. त्यानुसार झुम्बा डान्स वर्कशॉप होत आहे. डान्स करत वेटलॉस आणि फिटनेस असा दुहेरी आनंद देणारा हा नृत्यप्रकार चांगलाच लोकप्रिय ठरत आहे. मात्र, झुम्बा डान्सच्या स्टेप्स योग्यप्रकारे केल्या तरच त्याचा परिणाम शरीरावर दिसेल. कार्यशाळा टाकाळा येथील कोरगावकर लॉन येथे दुपारी ४.३० वाजता होणार आहे. झुम्बा प्रशिक्षक अनुराधा भोसले मार्गदर्शन करणार आहेत. वर्कशॉपमध्ये सहभागी होण्यासाठी कल्चर क्लब सदस्यांना १०० रुपये, तर अन्य वाचकांना २५० प्रवेश शुल्क आहे.

मोबाइल अॅप डाउनलोड करा आणि राहा अपडेट

---

ऑनलाइन झटका!

August 6, 2015, 11:55 am

≫ Next: हम साथ साथ...!

≪ Previous: झुम्बाचा ठेका आज रंगणार

$

0

0

सचिन यादव, कोल्हापूर

सायबर क्राइमचे गुन्ह्यात वाढ होत आहे. बहुसंख्य ग्राहक इंटरनेटचा वापर करीत आहेत. त्याचा फायदा घेत सोशल नेटवर्किंग साइटच्या माध्यमातून आर्थिक आणि वैयक्तिक माहिती चोरीचे प्रकार घडत आहे. फेसबुकच्या माध्यमांतून लाखो रुपयांचा गंडा घातल्याचा प्रकार नुकताच घडला आहे. गेल्या सहा महिन्यात सायबर क्राइमचा टक्का वाढला असून सायबर लॉविषयी अनेक लोकांमध्ये अज्ञानच आहे.

इंटरनेटचा वापर वाढला आहे. सोशल नेटवर्किंग साइटच्या माध्यमातून यूजरची सर्व माहिती अनेकांना मिळते. त्याचा गैरफायदा आणि सायबर लॉचे अज्ञान असल्यामुळे आर्थिक फसवणूक झाल्याच्या घटना घडत आहेत. अनेकदा मोफत वाय-फाय मिळते, म्हणून अनेक ग्राहक अॅप्लिकेशन आणि अन्य माहिती डाउनलोड करतात. त्यात ग्राहकांची महत्त्वाची माहिती चोरली जाते. या माहितीच्या आधारे आर्थिक फसवणूक आणि कित्येकदा ब्लॅकमेल करण्याचे प्रकारही घडतात. सायबर क्राइमच्या माध्यमातून बँक बॅलन्स, व्यक्तिगत माहिती, घरचा पत्ता, कार्यालयीन कामकाजाची माहिती गोळा केली जाते. त्यामुळे व्हॉटस्अॅपचा उपयोग करतानाही प्रत्येक अॅप्लिकेशनची माहिती आणि पर्यायाने होणाऱ्या दुरुपयोगाची माहिती प्रत्येक ग्राहकाला हवीच. पेट्रोल, रेस्टॉरंट, एटीएममध्ये डेबिट आणि क्रेडिट कार्ड वापरून अशा प्रकारचे गुन्हे घडवले जातात. विशेषतः पेट्रोलपंपावर कार्ड स्वाइप करतानाही पंपापवरील यंत्रणा सुरक्षित असल्याची खात्री देता येत नाही. काही क्रेडीट कार्ड स्वाइप करताना कोणताही पासवर्ड नसतो. त्यामुळे पंपावरील काही कर्मचाऱ्यांकडून फसवणुकीची शक्यता अधिक असते. या ठिकाणी प्रिंटेड पावतीवर स्वाक्षरी महत्त्वाची आहे.

अनेकदा या सोशल मीडियाच्या चोर बहाद्दरांकडून बँकेतील खात्याची माहिती चोरली जाण्याची शक्यता असते. त्यातून आर्थिक फसवणूक केली जाते. अँटी व्हायरस किंवा फायर वॉल नसल्यास बँक खात्याची संपूर्ण माहिती अन्य व्यक्तीकडे सहजपणे जाऊ शकते.

सायबर क्राइम

कम्प्युटर इंटरनेट, नेटवर्कच्या माध्यमातून आर्थिक आणि वैयक्तिक माहिती (डेटा) चोरून फसवणूक करणारे गुन्हे सर्रास होत आहेत. वेबसाइट हॅक करणे, क्रेडिट कार्ड, डेबिट कार्डचे पिन मिळवून आर्थिक फसवणूक करण्याचे प्रकारही वाढले आहेत.

पोलिसांना अधिकार

काही ठिकाणी मोफत वाय-फाय सुविधाही मिळते. त्याचा वापर करणाऱ्यांच्या अज्ञानाचा फायदा घेत काही लोक गुन्हे करतात. ते रोखण्यासाठी सायबर लॉ आहे. या कायद्यामुळे तपासासंदर्भात पोलिसांना काही अधिकार मिळाले आहेत. 'आयटी अमेंडमेंट अॅक्ट-२००८'नुसार संबंधितांवर गुन्हा दाखल करता येऊ शकतो. त्यामुळे या कायद्याची आवश्यकता आहे.

सायबर क्राइमचा धोका

मोबाईल किंवा संगणक यंत्रणा (ऑनलाइन) वापरत असताना कामाचा वेग मंदावला असेल तर, मजकूर पळविला जाण्याचा संकेत आहे. ऑफलाइन असतानाही ऍप्लिकेशन वापरण्यासाठी खूप वेळ लागतो. ऑनलाइन असताना नेमकी वेबसाइट उघडण्याऐवजी दुसरीच साइट सुरू होते, तेव्हा सायबर क्राइमचा धोका असल्याचे स्पष्ट होते.

प्रत्येक घरात तीन ते चार मोबाइल,लॅपटॉप आणि अन्य साधने आहेत. त्यामानाने त्याच्या गैरवापराची माहिती आणि कायद्याचे ज्ञान नाही. सायबर सेलच्या माध्यमातून अनेक प्रकारचे गुन्हे रोखले जात आहे. ग्राहक सायबर सेलच्या ९५५२३२८३८३ या व्हॉटसअप हेल्पलाइनवर संपर्क साधून फसवणुकीपासून बचाव करु शकतात. अॅप्लीकेशन आणि इलेक्ट्रॉनिक उपकरणांची माहिती करुन घेणे अत्यावश्यक आहे. - धनंजय जाधव, सायबर सेल प्रमुख, राज्य पोलिस

प्रत्येक मोबाइल कंपनीने ग्राहक मेळावे घेऊन अॅप्लिकेशनची माहिती दिली पाहिजे. सर्व इलेक्ट्रॉनिक साहित्याचा वापराची माहिती ग्राहकांना आहे. मात्र त्याचा गैरवापर कसा केला जातो. त्यासाठी कार्यवाही बाबात अज्ञानच आहे. कंपनी आणि ग्राहक संघटनांनी याबाबत पुढाकार घेण्याची गरज आहे. - कौंतेय धडाम, ग्राहक

मोबाइल अॅप डाउनलोड करा आणि राहा अपडेट

हम साथ साथ...!

August 6, 2015, 11:56 am

≫ Next: तणावपूर्ण वातावरणात सोडत

≪ Previous: ऑनलाइन झटका!

$

0

0

अनेक प्रभागांमध्ये आठ पत्नी-पत्नी निवडणूक रिंगणात

आप्पासाहेब माळी, कोल्हापूर

महापालिका निवडणूक म्हणजे अटीतटीची, एकेका मताची बेरीज करावी लागते. लोकांपर्यंत पोहोचण्यासाठी पायाला भिंगरी बांधून परिसर पिंजून काढावा लागतो. उमेदवारी मिळवण्यापासून प्रचार यंत्रणा कार्यान्वित ठेवण्यासाठी उमेदवारांना मोठी कसरत करावी लागते. एकीकडे असे चित्र असताना दुसरीकडे लोकसंपर्क, समाजासाठी वेळ देण्याची तयारी या बळावर आठ पती-पत्नी शहरातील विविध भागांमध्ये महापालिका निवडणूक लढविण्याच्या तयारीत आहेत. सर्वसाधारण खुल्या गटातील आणि ओबीसी (महिला) तसेच अनुसूचित जाती प्रवर्गासाठी आरक्षण पडल्याने अनेकांना अशी संधी मिळणार आहे. यात वाढही होऊ शकेल अशी स्थिती आहे.

हरिदास सोनवणे - जयश्री सोनवणे, भूपाल शेटे - शशिकला शेटे, प्रकाश मोहिते - यशोदा मोहिते, सचिन चव्हाण - जयश्री चव्हाण, नंदकुमार वळंजू - मंगल वळंजू, आर. डी. पाटील - सुनीता पाटील, अजित राऊत - सुनीता राऊत हे पती-पत्नी यंदा निवडणुकीत नजरेस पडणार आहेत. आघाडी वा पक्ष अजून ठरलेला नाही, मात्र निवडणूक लढवायची या इराद्याने त्यांच्यापैकी काहीजणांनी प्रचाराला सुरुवातही केली आहे. नव्या प्रभाग रचनेमुळे जुना प्रभाग वेगवेगळ्या भागांमध्ये विखुरला आहे.

गेली अनेक वर्षे महापालिकेच्या राजकारणात असताना प्रत्येक भागात कमी-अधिक प्रमाणात मतांचे पॉकेट तयार झाले आहे. या बळावर निवडणूक लढविणार असल्याचे संबंधितांचे म्हणणे आहे.

अशा असणार जोड्या

हरिदास सोनवणे - जयश्री सोनवणे

भूपाल शेटे- शशिकला शेटे

प्रकाश मोहिते-यशोदा मोहिते

सचिन चव्हाण -जयश्री चव्हाण

नंदकुमार वळंजू - मंगल वळंजू

आर. डी. पाटील-सुनीता पाटील

अजित राऊत - सुनीता राऊत

बाळकृष्ण मेढे - ज्योत्स्ना मेढे

मोबाइल अॅप डाउनलोड करा आणि राहा अपडेट

तणावपूर्ण वातावरणात सोडत

August 6, 2015, 11:57 am

≫ Next: महापालिकेत शुकशुकाट

≪ Previous: हम साथ साथ...!

$

0

0

म. टा. प्रतिनिधी, कोल्हापूर

महापालिका निवडणुकीसाठी गुरुवारी फेरआरक्षण सोडत काढण्यात आली. फेरआरक्षण आपल्या पथ्यावर पडेल, या आशेने आलेल्या अनेक इच्छुकांच्या चेहऱ्यावर हुरहुर आणि चिंतेचा भाव दिसून आला. मात्र, ज्यांचे प्रभाग खुले त्यांनी जल्लोष साजरा केला, तर काहींच्या आरक्षणात बदल न झाल्याने इच्छुक उमेदवार व त्यांचे समर्थक नाराज झाले. कडक पोलिस बंदोबस्तात तणावपूर्ण वातावरणात नव्याने आरक्षण सोडत काढण्यात आली. शिवसेना व राष्ट्रवादी काँग्रेसच्या पदाधिकाऱ्यांनी आक्षेप घेतल्याने काही काळ गोंधळ उडाला.

३१ जुलैला प्रभागाची आरक्षण सोडत झाली होती. मात्र ती चुकीची झाल्याने राज्य निवडणूक आयोगाने गुरुवारी नव्याने सोडत घेण्यात आली. गुरुवारी सकाळी नऊपासून सोडतीची तयारी सुरू होती. आयुक्त पी. शिवशंकर, राज्य निवडणूक आयोगाचे कक्ष अधिकारी अतुल जाधव, उपायुक्त अश्विनी वाघमळे, उपायुक्त विजय खोराटे, सहायक आयुक्त उमेश रणदिवे, संजय सरनाईक, केएमटीचे अतिरिक्त व्यवस्थापक संजय भोसले प्रत्येक गोष्टीकडे जातीने लक्ष घालत होते. त्यांच्याही चेहऱ्यावर तणाव स्पष्टपणे जाणवत होता. कोणताही अनुचित प्रकार घडू नये म्हणून प्रेक्षकांमध्ये पोलिस कर्मचारी तैनात होते. महापालिकेचे अग्निशमन दलाचे जवान व व्यायामशाळेतील प्रशिक्षक प्रेक्षकांत बसले होते.

आरक्षण प्रक्रिया अकरा वाजता सुरू झाली. उपायुक्त अश्विनी वाघमळे यांनी सर्व प्रभागांची माहिती दिल्यानंतर अनुसूचित जाती जमाती प्रवर्गाचे पुरुष व महिला वर्गातील अकरा प्रभागांची घोषणा करण्यात आली. त्यानंतर ३४ प्रभागांतून इतर मागास वर्ग प्रवर्गाची सोडत काढण्याची प्रक्रिया सुरू झाली. यावेळी राष्ट्रवादी काँग्रेसचे आर. के. पोवार, शिवसेनेचे दुर्गेश लिंग्रस, पद्माकर कापसे यांनी काही सूचना विचारल्याने गोंधळ झाला. माजी नगरसेवक पांडुरंग आडसुळे यांनी प्रभाग रचनेबद्दल प्रश्न उपस्थित केला. प्रभाग रचनेबद्दल हरकती घेतल्या जात आहेत असा खुलासा प्रशासनाकडून करण्यात आला. सध्या सुरू असलेली आरक्षण सोडत कायम ठेवणार का, असा प्रश्न आर.के. पोवार यांनी उपस्थित केला. निवडणूक आयोगातील कक्ष अधिकारी अतुल जाधव यांनी ३१ जुलै व सध्या सुरू असलेल्या आरक्षण सोडतीत फरक स्पष्ट केल्यानंतर आऱक्षण सोडत सुरू करण्यात आली. २००५ व २०१० मधील इतर मागास वर्ग प्रभाग वगळून ३४ प्रभाग वेगळे करण्यात आले. ३४ प्रभागांतून ११ इतर मागास वर्ग प्रवर्गासाठी न्यू पॅलेसच्या विद्यार्थ्यांकडून चिठ्ठ्या काढण्यात आल्या. त्यानंतर इतर मागास वर्ग महिलांसाठी आरक्षण प्रक्रिया राबविण्यात आली. सर्वांत शेवटी सर्वसाधारण महिला वर्गाचे आरक्षण जाहीर करण्यात आल्यावर शिल्लक २४ प्रभाग सर्वसाधारण गटांसाठी आरक्षित झाल्याची घोषणा होताच सभागृहात जल्लोष झाला. आरक्षणामुळे ज्यांची संधी हुकली त्यांच्यात निराशेचा सूर उमटला.

सभागृहात शिवसेनेचे शहराध्यक्ष शिवाजीराव जाधव, दुर्गेश लिंग्रस, माजी जिल्हाप्रमुख विजय कुलकर्णी यांच्यासह शिवसेनेचे कायकर्ते डोक्याला भगव्या पट्ट्या बांधून सभागृहात आले होते. तसेच नगरसेवक रमेश पोवार, प्रदीप उलपे, डॉ. संदीप नेजदार, सुभाष रामुगडे, भाजप युवा मोर्चाचे संदीप देसाई, माजी नगरसेवक नंदकुमार गजगेश्वर, आप्पा बेडगकर, अशोक जाधव यांच्यासह कार्यकर्ते उपस्थित होते. नेते व कार्यकर्त्यांमध्ये 'कहीं खुशी कहीं गम'ची भावना होती.

१ जुलैची आरक्षण सोडत राजकीय हस्तक्षेपामुळे रद्द झाली, असा आरोप झाल्याने गुरुवारची सोडत शांततेत पार पडण्यासाठी कडक पोलिस बंदोबस्त ठेवला होता. शहर पोलिस अधीक्षक भारतकुमार राणे यांच्या मार्गदर्शनाखाली शाहूपुरी, लक्ष्मीपुरी, राजारामपुरी, राजवाडा पोलिस ठाण्यातील अधिकारी, कर्मचाऱ्यांची नियुक्ती केल्याने रमणमळा परिसराला छावणीचे स्वरूप आले होते.

सोडतीवेळी तणाव असल्याने आयुक्त पी. शिव शंकर स्वतः जातीने लक्ष घालत होते. आरक्षणासाठी काढलेल्या चिठ्ठ्या ड्रममध्ये टाकण्यात आल्या होत्या. स्वतः आयुक्तांनी अनेकवेळा ड्रम फिरवून तणाव कमी करण्याचा प्रयत्न केला. ड्रममधून विद्यार्थ्यांनी काढलेली चिठ्ठी आयुक्त स्वतः उघडून बघून मगच प्रभागाचा आरक्षण क्रमांक जाहीर केला जात होता.

मोबाइल अॅप डाउनलोड करा आणि राहा अपडेट

महापालिकेत शुकशुकाट

August 6, 2015, 11:58 am

≫ Next: धाकधूक, तणाव अन् दिलासा

≪ Previous: तणावपूर्ण वातावरणात सोडत

$

0

0

नागरिकांनीही फिरवली पाठ; दैनंदिन कामावर परिणाम

म. टा. प्रतिनिधी, कोल्हापूर

रोज दहाच्या ठोक्यालाच नागरिकांच्या, अधिकाऱ्यांच्या आणि कर्मचाऱ्यांच्या वर्दळीने गजबजणाऱ्या महापालिकेच्या आवारात गुरूवारी सकाळपासूनच शांतता होती. येत्या पंचवार्षिक निवडणुकीसाठी काढण्यात येणाऱ्या आरक्षण सोडत प्रक्रिया पुन्हा झाल्याने मुख्य कार्यालयात शुकशुकाट होता. नगरसेवकांपासून ते अधिकाऱ्यांपर्यंत आणि कर्मचाऱ्यांपासून ते सर्वसामान्य नागरिकांपर्यंत सोडतीबाबत उत्सुकतेचे पडसाद महापालिका आवारातील रोजच्या वर्दळीवरही उमटले.

३१ जुलै रोजी काढण्यात आलेल्या आरक्षण सोडतीच्या नियमअंमलबजावणीत तांत्रिक चूक झाल्यामुळे महापालिका प्रशासनातर्फे गुरूवारी ७० प्रभागासाठी पुन्हा आरक्षण सोडत काढण्याचे ठरवले होते. त्यानुसार कसबा बावडा येथील बहुउद्देशीय सभागृहात गुरूवारी सकाळी आरक्षण सोडत काढण्याच्या प्रक्रियेला सुरूवात झाली. या पार्श्वभूमीवर महापालिकेच्या मुख्य कार्यालयात नागरी कामासाठी येणाऱ्या नागरिकांनीही आपला मोर्चा सोडत काढण्याची प्रक्रिया सुरू असलेल्या ठिकाणी वळवला. महापालिकेत जे विभाग सुरू होते त्याठिकाणी कामासाठी येणारे नागरिकांची वर्दळ तुरळक असल्यामुळे आरक्षण सोडतीमध्ये कुणाला लॉटरी लागली असेल आणि कुणाला कट्ट्यावर बसावे लागणार असेल हीच चर्चा सुरू होती.

सकाळी दहा वाजल्यापासून महापालिकेच्या विठ्ठल रामजी चौकात 'शांतता कोर्ट' सुरू झाले. कोणत्याही विभागात आज कामासाठी नागरिकांची फारशी रांग लागली नव्हती. तर कर्मचाऱ्यांची ही लगबग दिसत नव्हती. बहुतांशी अधिकारी आणि कर्मचारी सोडत प्रक्रियेसाठी गेल्यामुळे आज कोणतेही काम महापालिकेत मार्गी लागेल याची खात्री नसल्यानेही काही ना​गरिकांनी कामासाठी महापालिकेत येण्याकडे पाठ फिरवली.

मोबाइल अॅप डाउनलोड करा आणि राहा अपडेट

धाकधूक, तणाव अन् दिलासा

August 6, 2015, 11:59 am

≫ Next: फटक्यांऐवजी फटाकेच

≪ Previous: महापालिकेत शुकशुकाट

$

0

0

म. टा. प्रतिनिधी, कोल्हापूर

महापालिकेच्यावतीने गुरुवारी काढण्यात आलेल्या फेरआरक्षण सोडतीवेळी फार मोठा बदल होणार की आरक्षण जैसे थे राहणार या विचारांनी ग्रासलेले चेहरे, हक्काच्या प्रभागावर गंडांतर येणार का म्हणून अनेकांना लागलेली धास्ती, ओबीसी प्रवर्गातील आरक्षणामुळे निवडणूक लढण्याची संधी लाभल्यामुळे चेहऱ्यावर फुललेले हास्य आणि शिवाजी पेठ, मंगळवार पेठेतील आरक्षणात फारसा बदल झाला नसल्याचे स्पष्ट झाल्यानंतर इच्छुकांनी सोडलेला सुटकेचा निश्वास अशा संमिश्र भावनांचे दर्शन रमणमळा येथील बहुउद्देशीय सभागृहाने अनुभवले.

गुरुवारच्या फेरआरक्षण सोडतीत कसबा बावडा परिसरातील सहापैकी एकच प्रभाग सर्वसाधारण गटासाठी खुला राहिला. त्यामुळे कसबा बावड्यात खुशी कम आणि गम जादा असे चित्र निर्माण झाले आहे. यापूर्वीच्या आरक्षणानुसार सर्वसाधारण गटात लढण्याची तयारी केलेल्या इच्छुकांच्या आकांक्षावर पाणी पडले. आजच्या फेरआरक्षणामुळे सारे संदर्भच बदलले आहेत. कसबा बावडा पूर्व बाजू प्रभाग सर्वसाधारण गटासाठी आरक्षित असल्याने येथे मोठी चुरस असणार आहे. विद्यमान नगरसेवक प्रदीप उलपे, अशोक जाधव, पवन साळोखे यांची नावे सर्वसाधारण प्रवर्गातून चर्चेत आहेत. तर कसबा बावडा हनुमान तलाव व लक्ष्मी विलास पॅलेस प्रभाग ओबीसी प्रवर्गासाठी आरक्षित झाले. शुगरमिल प्रभाग यापूर्वीच एससी प्रवर्गासाठी आरक्षित आहे. शुगर मिलमधून सुभाष बुचडे, हेमंत इंगवले,निशिकांत कांबळे, माजी नगरसेविका सुनीता हवालदार यांची नावे चर्चेत आहेत.

कसबा बावडा पॅव्हेलियन प्रभाग सर्वसाधारण महिला गटासाठी आरक्षित झाला आहे. येथून सभागृह नेते चंद्रकांत घाटगे, संजय लाड, सुरेश चौगुले यांच्या कुटुंबीयांतील महिला सदस्या संभाव्य उमेदवार असण्याची शक्यता आहे. पोलिस लाइन प्रभाग ओबीसी महिलासाठी आरक्षित झाला आहे. पोलिस लाइन प्रभागमधून माजी नगरसेवक मुश्ताक मोमीन, नामदेव बिरांजे, सागर यवलूजे यांच्या कुटुंबीयांतील महिला सदस्यांना संधी दिसते.

फेर आरक्षणामुळे परिवहन समिती सभापती अजित पोवार यांना प्रभाग गमवावा लागला. कसबा बावडा हनुमान तलाव प्रभाग ओबीसी आर​क्षित आहे येथून विद्यमान नगरसेवक संदीप नेजदार पुन्हा लढणार आहेत. कसबा बावडा परिसरात शिवसेनेचे संघटन चांगले आहे. येथे सेनेचे उमेदवार कोण आणि ताराराणी आघाडी कुणाला रिंगणात उतरविणार यावर निवडणुकीत रंगत येईल.

कवाळेंना दिलासा

फेर आरक्षण सोडतीत कवाळे कुटुंबींयाला थोडा दिलासा मिळाला आहे. यापूर्वीच्या आरक्षण सोडतीत नगरसेविका कांचन कवाळे आणि कांदबरी कवाळे प्रतिनिधीत्व करत असलेले अनुक्रमे राजारामपुरी व शिवाजी उद्यमनगर प्रभाग ओबीसीसाठी आरक्षित झाले होते. फेर आरक्षण सोडतीत राजारामपुरी प्रभाग सर्वसाधारण गटासाठी घोषित झाल्याने येथून माजी नगरसेवक शिवाजी कवाळे अथवा त्यांच्या पत्नी व विद्यमान नगरसेविका कांचन कवाळे, मुलगा संदीप कवाळे यांच्यापैकी एक उमेदवार असेल. दुसरीकडे कांदबरी कवाळेंचा शिवाजी उद्यमनगर प्रभाग ओबीसीसाठी आरक्षित आहे.

व्हिनस कॉर्नरमध्ये खुली लढत

व्हिनस कॉर्नर हा सर्वसाधारण गटासाठी आरक्षित आहे. येथे नगरसेवक प्रकाश नाईकनवरे, शिवसेनेचे शशिकांत बिडकर, ताराराणी आघाडीचे कारभारी सुनील मोदी अशी नावे चर्चेत आहेत. व्हिनस कॉर्नर प्रभागात नवीन भाग समाविष्ठ आहे. लक्ष्मीपुरी, रिलायन्स मॉल परिसर, टायटन शो रूम, महावीर गार्डन परिसरातील भाग असा नवीन भाग यामाध्ये आहे.

रंकाळा परिसरात फील गुड

रंकाळा तलावाच्या परिसरातील रंकाळा स्टँड व दुधाळी पॅव्हेलियन, रंकाळा तलाव, बलराम कॉलनी, तटाकडील तालीम, पद्माराजे उद्यान हे शेजारचे प्रभाग आरक्षित झाल्याने रंकाळा परिसरात फिलगुड वातावरण आहे. ३१ जुलैच्या प्रभाग रचनेत रंकाळा तलाव, बलराम कॉलनी, तटाकडील तालीम, पद्माराजे उद्यान, चंद्रेश्वर हे प्रभाग खुले झाले हाते. मात्र, गुरूवारच्या सोडतीत चंद्रेश्वर प्रभाग सर्वसाधारण महिला प्रवर्गासाठी आरक्षित झाला. तर रंकाळा स्टँड व दुधाळी पॅव्हलियन हे रंकाळ्याच्या काठावरील सहा प्रभाग सर्वसाधारण गटासाठी खुले झाले. यांतून माजी महापौर सई खराडे, माजी महापौर उदय साळोखे, माजी महापौर बाजीराव चव्हाण, माजी नगरसेवक अजित राऊत, माजी उपमहापौर विक्रम जरग, माजी नगरसेवक सुजय पोतदार, नंदकुमार सूर्यवंशी यांना निवडणुकीसाठी संधी मिळणार आहे.

काकी-पुतणीत लढत

फेर आरक्षणानंतरही चंद्रेश्वर प्रभागात बोंद्रे विरूद्ध खराडे अशीच लढत रंगण्याची चिन्हे आहेत. यापूर्वी हा प्रभाग सर्वसाधारण गटासाठी आरक्षित झाल्याने येथून नगरसेवक इंद्रजित बोंद्रे, शिवतेज खराडे यांच्या उमेदवारीची चर्चा होती. फेरसोडतीत हा प्रभाग सर्वसाधारण महिला गटासाठी आर​क्षित झाला आहे. माजी महापौर सई खराडे येथून निवडणूक लढविण्याच्या तयारीत आहेत. नगरसेवक इंद्रजित बोंद्रे यांच्या आई शोभा पंडीत बोंद्रे या निवडणूक लढविणार आहेत.

मोबाइल अॅप डाउनलोड करा आणि राहा अपडेट