गुरुबाळ माळी, कोल्हापूर
महापालिका आरक्षणाची लॉटरी फुटायच्या आधीपासूनच शहरात निवडणुकीचे वातावरण तयार झाले आहे. सर्वच प्रभागांची मोडतोड झाल्यामुळे इच्छुकांना घाम फुटला आहे. पाच वर्षे विशिष्ट मतदार डोळ्यासमोर ठेवून काहीजण तयारी करीत होते. मात्र ते मतदारच गायब झाल्याने नव्या मतदारांपर्यंत पोहोचण्याचे आव्हान त्यांच्यासमोर आहे. हे आव्हान पेलावेच लागणार असल्याने शुक्रवारपासूनच अनेकांनी पायाला भिंगरी बांधून धडपड सुरू केली आहे.
अपक्ष लढणाऱ्यांची संख्या जास्त होती. नेतेही निवडून येईल तो आमचा याच न्यायाने आघाडी करीत. गेल्या निवडणुकीत मात्र सर्वच पक्षांनी चिन्हावर निवडणूक लढविली. त्यात काँग्रेस आणि राष्ट्रवादीला चांगले यश मिळाले. दोघांनीही हातात घालून पाच वर्षे सत्ता भोगली. पूर्वी जशी आघाडीची सत्ता होती. जे जे आघाडीच्या सत्तेत होत होते ते सारे पक्षाची सत्ता येऊनही घडले. फक्त पदाधिकारी निवडताना जो पैशाचा खेळ होत होता तो थांबला. शुक्रवारी आरक्षणाची लॉटरी फुटल्यानंतर सारेच पक्ष महापालिकेवर झेंडा फडकविण्यासाठी सज्ज झाले आहेत.
काही आत काही बाहेर
यावेळी अनेक मान्यवरांवर घरी बसण्याची वेळ आली आहे. कादंबरी कवाळे, कांचन कवाळे, महेश सावंत, मधुकर रामाणे, राजेश लाटकर, महेश जाधव, आर. डी. पाटील, रवीकिरण इंगवले, आदिल फरास, दिगंबर फराकटे, सर्जेराव पाटील, रमेश पोवार, प्रकाश कुंभार अशा अनेकांचा यात समावेश आहे. पण काही कारभारी आणि 'नावाजलेल्या' नगरसेवकांना पुन्हा महापालिकेत येण्याची संधी मिळवून दिली आहे.
सुनील कदम, सुनील मोदी, नंदकुमार वळंजू, हरिदास सोनवणे, प्रकाश मोहिते, विक्रम जरग, बाजीराव चव्हाण, सुजय पोतदार, उदय साळोखे, अजित राऊत अशा जुन्या नगरसेवकांना पुन्हा एकदा संधी मिळण्याची शक्यता आहे.
सक्षम उमेदवाराचा शोध
ऑक्टोबरच्या शेवटच्या आठवड्यात या निवडणुकीसाठी भाजप आणि ताराराणी आघाडीने एकत्र येऊन अनेकांना शह दिला आहे. भाजपची फारशी ताकद नसल्याने त्यांनी ताराराणी आघाडीला सोबत घेऊन उसनी का होईना ताकद मिळवली आहे. काँग्रेसमध्ये माजी गृहराज्यमंत्री सतेज पाटील आणि आमदार महादेवराव महाडिक असे दोन गट आहेत. राष्ट्रवादी आणि जनसुराज्यमध्ये आघाडीची शक्यता आहे. शिवसेना आणि मनसे एकत्र येण्याच्या दृष्टीने हालचाली सुरू झाल्या आहेत. प्रत्येक पक्षाला सक्षम उमेदवार हवा आहे. तो मिळण्याची शक्यता सर्वच प्रभागात नाही.
पक्षांतर्गत गटबाजी आणि शिळ्या कढीला ऊत
निवडणुकीला सामोरे जाताना काँग्रेस, शिवसेनेला अंतर्गत गटबाजीला प्रथम सामोरे जावे लागणार आहे. ताकद असूनही त्यांना गटबाजीमुळे फटका बसण्याची शक्यता आहे. शिवसेनेतील गटबाजी संपविण्यासाठी प्रयत्न सुरू झाले आहेत. हीच अवस्था काँग्रेसचीही आहे. गटबाजीचा फटका लोकसभा, विधानसभा, बाजार समिती अशा अनेक ठिकाणी या पक्षाला बसला, तरीही नेत्यांचे डोळे उघडले नाहीत. हीच परंपरा महापालिका निवडणुकीतही सुरू राहणार याची झलक दिसत आहे. महाडिक-पाटील गटात वाढलेल्या संघर्षामुळे ते दोघे या निवडणुकीत एकत्र येतील अशी चिन्हे नाहीत.
भाजप यापूर्वी कमकुवत पक्ष होता. आता मात्र राज्यात सत्ता आणि सोबत ताराराणी आघाडीची कुमक यामुळे सध्या तरी उत्साहाचे वातावरण आहे. आर्थिक व्यवहारात सातत्याने कमी पडणाऱ्या भाजपने हात सैल सोडले आहेत. त्यांच्या तुलनेत हात सैल सोडण्यात इतर पक्षांना मर्यादा असतील. आमदार हसन मुश्रीफ यांनी राष्ट्रवादीची धुरा खासदार धनंजय महाडिक यांच्या खांद्यावर देण्याचे यापूर्वी जाहीर केले होते, पण नव्या घडामोडीत ते शक्य दिसत नाही. त्यामुळे पुन्हा एकदा मुश्रीफांनाच महापालिकेची सूत्रे हलवावी लागणार आहेत. आता राज्यात सत्ता नसल्याने गेल्यावेळेप्रमाणे उमेदवारांसाठी हात सैल सोडणे शक्य नाही. अशावेळी सतेज पाटील आणि विनय कोरे यांची मदत घेत स्वतंत्र आघाडी स्थापण्याचे प्रयत्न सुरू झाले आहेत. त्याला यश आले तर ही आघाडी भाजप आणि ताराराणीला आव्हान देऊ शकते. शहरात शिवसेनेला चांगले वातावरण आहे. गटबाजी संपली तर हा पक्षही ताकदीने निवडणुकीत उतरू शकतो. त्यामुळे सध्याच्या हालचालीनुसार तिरंगी लढत होण्याचीच दाट शक्यता आहे.
मोबाइल अॅप डाउनलोड करा आणि राहा अपडेट
